ཁ་སང་ཟླ་ ༡༠ ཚེས་ ༡༡ ཉིན་གྱི་ཞོགས་པར་མདོ་ཁམས་འཇོ་མདའ་རྫོང་། སྤོ་ལོ་ཡུལ་ཚོརརི་ཉིལ་བའི་གོད་ཆག་ཆེན་པོ་ཞིག་བྱུང་སྟབས་ཨེ་ཤ་ཡའི་རྒྱུག་ཆུ་རིང་ཤོས་ཡིན་པའི་འབྲི་ཆུའི་བཞུར་རྒྱུན་འགག་ཡོད་པས་ས་གནས་ཀྱི་ཡུལ་མི་ཚོ་འཕྲལ་དུ་གནས་སྤོ་གནང་ཡོད་པའི་གནས་ཚུལ་ཞིག་སྤྱི་ཚོགས་དྲྭ་ལམ་གང་སར་ཐོན་འདུག
རྒྱ་ནག་གི་གསར་ལམ་ཁག་གིས་གནས་ཚུལ་སྤེལ་བར་འབྲི་ཆུའི་ཉེ་འགྲམ་དུ་ཆགས་པའི་དཔལ་ཡུལ་རྫོང་དང་འབའ་ཐང་རྫོང་། སྡེ་རོང་རྫོང་། དེ་བཞིན་རང་བྱུང་གོད་ཆག་བྱུང་བའི་ཡུལ་དངོས་ཀྱི་སྤོ་ལོ་ཡུལ་ཚོའི་སློབ་གྲྭ་སོགས་ཀྱི་བདེ་འཇགས་ལ་ཉེན་ཁ་ཡོད་སྟབས་ས་གནས་སུ་ཡུལ་མི་རྣམས་གནས་སྤོ་གནང་ནས་ཉེན་གཡོལ་གནང་བཞིན་ཡོད་པར་འགྲེལ་བརྗོད་གནང་འདུག
རྩ་བའི་ཡུལ་དངོས་ཀྱི་བརྙན་ཐུང་མང་པོ་ཞིག་སྤྱི་ཚོགས་དྲྭ་ལམ་གང་སར་བརྒྱུད་སྤེལ་བྱེད་བཞིན་ཡོད་ནའང། གོད་ཆག་ཕོག་སའི་ཡུལ་མི་དང་སྒོ་ཕྱུགས་སེམས་ཅན་སོགས་ལ་གནོད་སྐྱོན་བྱུང་བའི་གནས་ཚུལ་ཁ་གསལ་མངོན་རྒྱུ་མེད་ཀྱང་། འབྲི་ཆུའི་ཉེ་འགྲམ་གྱི་དུད་ཁྱིམ་རེ་གཉིས་ཤིག་ཆུ་ལ་འཐིམ་བཞིན་པའི་སྣང་བརྙན་དངོས་སུ་མཐོང་རྒྱུ་འདུག
གཞན་ཡང་སྤྱི་ཚོགས་དྲྭ་ལམ་དུ་ཁྱབ་སྤེལ་བྱེད་བཞིན་པའི་བརྙན་ཞིག་གི་ནང་དུ་མི་ཞིག་ནས་ས་བརྐོ་རྡོ་སློག་གནང་ཚེ་མཇུག་འབྲས་དེ་འདྲ་ཡོང་གི་རེད་ཅེས་བརྗོད་བཞིན་པ་ཐོས་རྒྱུ་འདུག་ཀྱང། ས་བརྐོ་རྡོ་སློག་བྱེད་མཁན་དེ་རྒྱ་ནག་སྲིད་གཞུང་ཡིན་མིན་གྱི་གསལ་ཁ་གང་ཡང་གནང་མི་འདུག
རྒྱ་གཞུང་གིས་གང་མགྱོགས་ས་གནས་ས་ཐོག་ལ་ཞིབ་བཤེར་བྱས་ནས་ཆུ་འགག་དེར་ཉེན་སྲུང་བྱེད་མ་ཐུབ་ཚེ། ཉེ་འཁྲིས་ཀྱི་དུད་ཚང་མང་པོ་ཞིག་གི་འཚོ་བ་དང་ཁང་ཁྱིམ་སོགས་ལ་དཀའ་ངལ་ཆེན་པོ་འཕྲད་སྲིད་པར་ཚོད་དཔག་གནང་མཁན་མང་པོ་བྱུང་འདུག
