འདི་གར་བོད་ནང་ནས་བོད་མི་ཞིག་གིས་ཉེ་ལམ་ཕྱི་ཟླ་བཞི་པ་ནས་བཟུང་མཚོ་སྔོན་ཞིང་ཆེན་ཡུལ་ཤུལ་ཁྲི་འདུ་རྫོང་སྡོམ་མདའ་གྲོང་རྡལ་བཅས་ནང་དུ་ཆུ་ལོག་ཤུགས་ཆེན་བྱུང་སྟེ་གྲོང་མིའི་སྡོད་ཁང་ཕལ་མོ་ཆེར་ཆུས་ཁེངས་ནས་གནས་སྤོར་མ་བྱེད་ཐབས་མེད་དུ་འགྱུར་བཞིན་ཡོད་པ་མ་ཟད། བཀའ་བརྒྱུད་དགོན་པ་ཞིག་ཀྱང་ཆུའི་གོད་ཆག་ནང་ཚུད་ཉེན་ཡོད་པ་སོགས་ཡུལ་དངོས་ཀྱི་བརྙན་ཐུང་དང་འདྲ་པར་བཅས་མཁོ་སྤྲོད་དང་འགྲེལ་བརྗོད་གནང་སོང་།
ཁོང་གིས་ད་དུང་ཁ་སང་དང་དེ་རིང་བཅས་ལ་སྡོད་ཁྱིམ་མང་ཆེ་བའི་ནང་ཆུས་ཁེངས་ཡོད་སྟབས་སྡོད་ཐབས་མེད་པར་གྱུར་བ་མ་ཟད་ནང་གི་ཅ་དངོས་རྣམས་ཕྱི་ལ་དབོར་འདྲེན་གྱིས་འཇིག་ཉེན་མེད་པའི་སར་གནས་སྤོ་གནང་དགོས་བྱུང་འདུག ལྷག་དོན་མི་རྒྱུ་ཟོག་གསུམ་ལ་གནོད་འཚེ་ཚབས་ཆེན་བྱུང་བའི་ཁྲོད་ཕྱུུགས་ཟོག་སྟོང་ཕྲག་ཁ་ཤས་ཤི་སྐྱོན་བྱུང་ཡོད་སྐོར་གསུངས་སོང་།
སྤྱིར་འདི་ལོའི་དགུན་དུས་སུ་མཚོ་སྔོན་ཞིང་ཆེན་ལྷོ་རྒྱུད་དུ་ཁ་བ་ཤུགས་ཆེན་བབས་ཏེ་གངས་སྐྱོན་ཆེན་པོ་བྱུང་ཡོད་པ་དང་། ད་ལྟ་རི་སྒང་གི་གངས་རྣམས་བཞུས་ཏེ་རྫ་ཆུ་རྒྱས་ནས་རྫ་ཆུ་རྒྱུད་དུ་གནས་པའི་ཡུལ་སྡེ་མང་པོར་ཆུ་ལོག་གི་འཇིག་ཉེན་ཡོད་འདུག་པ་དང་། ད་ལྟའི་ཆར་ཆུ་ལོག་གི་གནོད་འཚེ་ཕོག་ཡུལ་རྫ་སེར་ཤུལ་གྲོང་རྡལ་དང་དེ་བཞིན་གཡས་གཡོན་གཞུང་ལམ་ཁག་ཆུས་བསྣུབས་རྐྱེན་འགྲོ་འོང་ལ་དཀའ་ངལ་འཕྲད་བཞིན་ཡོད་རེད་འདུག
དེ་བཞིན་ཡུལ་ཤུལ་ཁུལ་སྡོམ་མདའ་ཡུལ་ཚོའི་སྡོམ་ཆུ་རྒྱས་ཏེ་གཞུང་ལམ་དང་འགྲོ་ལམ་རྣམས་ཆུས་བསྣུབས་ཡོད་པ་དང་ཡུལ་ཚོའི་ནང་ཆུ་ལོག་གི་འཇིག་པའི་རྐྱེན་པས་གྲོང་ཚོ་གཉིས་ཀྱི་དབར་འགྲོ་འོང་གནང་བར་འགྱིག་གྲུ་བཏང་ནས་འགྲོ་བཞིན་ཡོད་པ་དང་། ཉིན་རེ་བཞིན་ཆུའི་གནོད་འཚེ་ཆེ་རུ་འགྲོ་བཞིན་ཡོད་པ་རེད་འདུག
