དེ་རིང་ཕྱི་ཚེས་ ༢༣ ཉིན་གངས་སྐྱིད་ཀྱི་ཚོགས་ཁང་གསར་པར་སྔ་དྲོ་ཚོུད་ ༩༌༣༠ ཡོལ་ཙམ་ལ་བོད་མིའི་མཉམ་འབྲེལ་བཅོ་ལྔའི་ལོ་འཁོར་འཛིན་སྐྱོང་ཚོགས་ཆེན་ཐེངས་ ༡༩ པ་དབུ་འཛུགས་དང་བསྟུན། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་སྐབས་དང་དུས་ལ་བསྟུན་ནས་མཉམ་འབྲེལ་བསྒྱུར་བ་དང་ཟླ་སྒྲིལ་གནང་རྒྱུར་དགོངས་པ་བཞེས་དགོས་གལ་ཡིན་པ་གསུངས་སོང་། 
བོད་མིའི་མཉམ་འབྲེལ་བཅོ་ལྔའི་ལོ་འཁོར་འཛིན་སྐྱོང་ཚོགས་ཆེན་ཐེངས་ ༡༩ པའི་དབུ་འབྱེད་མཛད་སྒོར་སྐུ་མགྲོན་གཙོ་བོ་སྲིད་སྐྱོང་མཆོག་གིས་གཙོས་པའི་དམིགས་བསལ་སྐུ་མགྲོན་བོད་མིི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག ཁྲིམས་ཞིབ་པ་ཆེ་བ་མཆོག་གིས་གཙོས་པའི་ཁྲིམས་ཞིབ་པ་གཞན་རྣམས། དེ་བཞིན་ནང་སྲིད་བཀའ་བློན་འཁོར་ལྷ་ཚང་བསོད་ནམས་སྟོབས་རྒྱལ་མཆོག ལྷན་ཁང་ཁག་གི་བཀའ་བློན་རྣམ་པ་དང་སྤྱི་འཐུས་རྣམ་པ། ལྷན་ཁང་ཁག་གི་དྲུང་ཆེ་ཆུང་རྣམ་པ། ཕྱོགས་མཐའ་ཁག་ནས་ཕེབས་པའི་མཉམ་འབྲེལ་གྱི་ཚོགས་མི་བཅས་ལྷན་འཛོམས་ཐོག་དབུ་འབྱེད་མཛད་སྒོ་ཚོགས་སོང་། 
སྐབས་དེར་སྲིད་སྐྱོང་མཆོག་གིས་༸གོང་ས་མཆོག་ནས་དུས་རྟག་ཏུ་གཞིས་ཆགས་སྲ་བརྟན་གནང་དགོས་སྐོར་དང་བོད་མིའི་སྤྱི་ཚོགས་ཁྲོད་ཆེད་མངགས་གསར་འཛུགས་ཞུས་པའི་མཉམ་འབྲེལ་ཁག་ལ་བཀའ་ཤག་དང་༸དཔལ་ལྡན་དགའ་ལྡན་ཕོ་བྲང་ནས་ཕྱག་རོགས་གནང་དགོས་སྐོར་ལམ་སྟོན་བཀའ་སློབ་བསྩལ་བ་བཞིན་ད་བར་བཀའ་ཤག་ནས་དེ་འབྲེལ་མཐུན་འགྱུར་གང་ཐུབ་ཅི་ཐུབ་གནང་ཡོད་པ་དང་སླད་མར་དེ་འབྲེལ་གནང་རྒྱུར་འབད་རྩོན་ཞུ་རྒྱུ་ཡིན་ཞེས་གསུངས་པ་དང་སྦྲགས། ཉེ་ཆར་འཕྲུལ་ཆ་དང་མི་ཆ་སོགས་ལ་འགྱུར་བ་ཕྱིན་ཡོད་སྟབས་བཀའ་ཤག་ནང་དེ་འབྲེལ་བགྲོ་གླེང་རིམ་པ་བྱུང་ནས་ Integrity Settlement Development Plan ཞེས་གཞིས་ཆགས་རང་གི་དཔལ་འབྱོར་དང་འཚོ་རྟེན་བཅས་སྲ་བརྟན་ཡོང་རྒྱུར་ལས་འཆར་བཟོས་ཡོད་པ་དང་། ད་ཆ་ལས་འཆར་དེ་བརྒྱུད་མེའོ་ཆོས་འཕེལ་གླིང་གཞིས་ཆགས་སུ་བཟོ་གྲྭ་བཙུགས་ནས་ཇ་བཟོ་ཐབས་དང་། མེན་པཊ་ཕན་བདེ་གླིང་ལ་ཐུག་པ་བཟོ་རྒྱུ། བདེ་སྐྱིད་གླིང་ལ་པང་གདན་བཟོ་རྒྱུའི་ལས་འཆར་སོགས་བང་སྒྲིག་ཡོད་པ་དེ་འབུམ་ ༣༠༠ འི་འཆར་གཞི་ཡིན་སྐོར་གསུངས་པ་དང་ཆབས་ཅིག་ཏུ་མཉམ་འབྲེལ་ལ་ཕན་པའི་ལས་གཞི་ཁག་གཅིག་ངོ་སྤྲོད་གནང་ཡོད།
སྲིད་སྐྱོང་མཆོག་གིས་ད་དུང་མཉམ་འབྲེལ་ཁག་གཅིག་གི་དཔལ་འབྱོར་གནས་བབ་ཞན་པོར་གྱུར་བ་མཁྱེན་རྟོགས་བྱུང་བ་ལྟར་མཉམ་འབྲེལ་དེ་དག་བསྐྱར་གསོ་གནང་རྒྱུའི་རེ་བ་མེད་ཚེ་ས་གནས་འགོ་འཛིན་དང་ལྷན་དུ་ཟླ་སྒྲིལ་གནང་དགོས་བྱུང་ཡང་དེས་ཕན་མིན་ཐོག་དགོངས་བཞེས་གནང་དགོས་གལ་ཡིན་པ་མ་ཟད། ད་ཆ་ང་ཚོའི་ཤེས་ཡོན་དང་ནང་སྲིད་ཟླ་སྒྲིལ་གནང་གི་ཡོད་པས་མཉམ་འབྲེལ་ཐོག་སྐབས་དང་དུས་ལ་བསྒྱུར་བ་དང་ཟླ་སྒྲིལ་གནང་རྒྱུར་དགོངས་པ་བཞེས་ཐོག་དུས་དང་བསྟུན་ནས་ཕེབས་དགོས་གལ་ཡིན་པ་ལམ་སྟོན་གནང་སོང་།
དེ་བཞིན་ཚོགས་གཙོ་མཆོག་གིས་མཉམ་འབྲེལ་གྱི་གལ་གནད་འགྲེལ་བརྗོད་དང་འབྲེལ། ཚོགས་གཙོ་མཆོག་ས་གནས་ཁག་ཏུ་ཕེབས་སྐབས་ས་གནས་ཁ་ཤས་ནང་སྤྱི་མཐུན་མཉམ་འབྲེལ་དང་ས་གནས་འགོ་འཛིན་གཉིས་འཆམ་མཐུན་ཞེ་དྲག་ཡོད་པ་དང་། འཆམ་མཐུན་དེའི་དབང་གིས་མང་ཚོགས་སྤྱི་ལ་ཁེ་ཕན་བསྒྲུབ་ཐུབ་ཀྱི་ཡོད་སྐོར་དང་། ས་གནས་གཞན་ཁག་ལ་ང་ཚོ་རང་སྐྱོང་ཡིན་པ་དང་ས་གནས་འགོ་འཛིན་ལ་བསྟུན་དགོས་ཀྱི་མེད་ཅེས་དགོངས་པ་བཞེས་ཀྱི་ཡོད་སྟབས་དེ་ལྟར་གནང་ན་མི་འགྲིག་པ་དང་། ས་གནས་གང་རུང་གི་མཉམ་འབྲེལ་ནས་ས་གནས་སོ་སོའི་འགོ་འཛིན་ཁྱབ་ཁོངས་ཡིན་པ་མཁྱེན་དགོས་པ་མ་ཟད་བཅའ་ཁྲིམས་ནང་ལའང་གསལ་ཡོད་སྟབས། མཉམ་རུབ་ཀྱི་ནུས་པ་སྤུངས་ནས་སྤྱིའི་རྩ་དོན་སླད་ལས་དོན་བསྒྲུབ་ཐབས་དགོངས་པ་བཞེས་དགོས་པ་གསུངས་སོང་།
དབུ་འབྱེད་མཛད་སྒོའི་ཐོག་བོད་མིའི་སྤྱི་མཐུན་མཉམ་འབྲེལ་གྱི་ཕྱི་ལོ་ ༢༠༡༨༌༌༡༩ ལོའི་རྩིས་ཁུངས་ནས་ས་གནས་མཉམ་འབྲེལ་རེར་ཧིན་སྒོར་འབུམ་གཉིས་རེ་དང་ཤས་བདག་མཉམ་འབྲེལ་ཚོགས་མིའི་ཕྲུ་གུ་ ༡༠ མཚན་གཞུང་རྒྱན་དཀྲུགས་ཀྱིས་སློབ་ཡོན་གསོལ་བསྩལ་དང་། དེ་བཞིན་བདེ་སྐྱིད་སླར་གསོའི་བོད་མིའི་སོ་ནམ་གཞི་རིམ་མཉམ་འབྲེལ་ལོ་ངོ་ ༥༠ འཁོར་བའི་དྲན་རྟེན་གྱི་ཕྱག་རྟགས་བཅས་གནང་ཡོད་པ་རེད།
གཞི་རྩའི་དེ་རིང་ནས་དབུ་འཛུགས་ཀྱིས་ཉིན་གསུམ་གྱི་ཚོགས་ཆེན་ཐོག་མཉམ་འབྲེལ་བཅོ་ལྔའི་ལོ་གཅིག་གི་ལས་བསྡོམས་དང་རྩིས་ཁྲ། དེ་བཞིན་མཉམ་འབྲེལ་མུ་མཐུད་སྲ་བརྟན་གནས་དགོས་པའི་ཐད་ད་བར་ལས་དོན་གང་གནང་བ་དང་སླད་མར་གང་གནང་ཐུབ་མིན་སྐོར། མཉམ་འབྲེལ་བཅོ་ལྔའི་ནང་མཉམ་འབྲེལ་ཆེ་བས་ཆུང་བར་རོགས་སྐྱོར་ཇི་ལྟར་གནང་ཐུབ་སྐོར་སོགས་དོན་ཚན་གསུམ་དང་ནང་གསེས་ལྔའི་ཐོག་གྲོས་བསྡུར་གྱིས་ གཏན་འབེབས་གནང་གི་འདུག
