བོད་མིའི་སྒྲིག་འཛུགས་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་འཛམ་གླིང་ཊི་བི་ཉིན་མོ་སྲུང་བརྩི་ཞུས་པ་དང་འབྲེལ། བོད་པའི་སྤྱི་ཚོགས་ནང་ཊི་བིའམ་གློ་ནད་ནི་འཕྲོད་བསྟེན་གྱི་དོ་ཁུར་ཆེ་ཤོས་བྱ་ཡུལ་གྱི་ནད་གཞི་རེད་ཅེས་གསུངས་ཡོད།
དེ་རིང་ཟླ་ ༣ ཚེས་ ༢༤ སྟེ་ཉིན་མོ་འདི་ནི་འཛམ་གླིང་འཕྲོད་བསྟེན་ལྷན་ཚོགས་ཀྱིས་ཉིན་མོ་འདིའི་བརྗོད་གཞི་ནི་གཅིག་སྒྲིལ་གྱི་སྒོ་ནས་ཊི་བིའི་ནད་གཞི་རྩ་མེད་གཏོང་དགོས་ཞེས་གོ་ལའི་ཕྱོན་ཀུན་ལ་སྲུང་བརྩི་ཞུ་བཞིན་ཡོད་པ་ལྟར། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་གོ་སྒྲིག་འོག རྡ་ས་གཙོ་བོར་གྱུར་བའི་བཙན་བྱོལ་བོད་མིའི་འདུ་སྡོད་ཀྱི་གནས་ཡུལ་འདྲ་མིན་ཁག་ཏུ་གློ་ནད་སྐོར་གོ་རྟོགས་ལས་འགུལ་རྒྱ་ཆེ་སྤེལ་དགོས་པ་དང་། དེ་བཞིན་མང་ཚོགས་ཚོས་གློད་ནད་ཀྱི་ནད་གཞི་དེ་ལ་བཅོས་ཐབས་དང་སྔོན་འགོག་ཇི་ལྟར་བྱ་དགོས་པ་ངེས་པར་དུ་ཤེས་དགོས་ཅེས་གསུངས་པ་དང་སྦྲགས། འདི་ལོའི་སྔོན་རྩིས་ནང་ཊི་བི་ནད་གཞི་སྔོན་འགོག་གྱི་ལས་གཞིའི་སླད་ཧིན་སྒོར་འབུམ་ ༩༠ ལྷག་ཙམ་འཆར་འབུལ་ཞུས་ཡོད་ཅེས་གསུངས་ཡོད་པ་རེད།
དེ་ཡང་ཉིན་དེར་འཕྲོད་བསྟེན་བཀའ་བློན་མཆོག་གིས་ཡོངས་གྲགས་སྤེལ་བའི་གསུང་བཤད་ནང་འཁོད་དོན།
ཚོགས་སྡེ་ཁག་ནང་ཊི་བི་ཡི་གནས་སྟངས་ལ་བཟང་ཕྱོགས་ཀྱི་རྣམ་པ་ཤུགས་ཆེ་ཞིག་ཐོན་ཡོད་ནའང་བོད་མིའི་སྤྱི་ཚོགས་ནང་ད་དུང་ཡང་གློ་ནད་ནི་འཕྲོད་བསྟེན་གྱི་དོ་ཁུར་ཆེ་ཤོས་བྱ་ཡུལ་གྱི་ནད་གཞི་ཡིན་པར་བརྟེན།
གཞུང་སྒེར་ཅི་རིགས་ཀྱི་ཚོགས་སྡེ་ཁག་དང་འཕྲོད་བསྟེན་ལས་བྱེད། དེ་བཞིན་མང་ཚོགས་དཀྱུས་མ་བཅས་ཀུན་གྱིས་གཅིག་སྒྲིལ་སྒོ་ནས་ཊི་བིའི་ནད་གཞི་དེར་བཟོ་ཕྱོགས་ཐད་ཕྱར་གྲུ་མཉམ་འདེགས་ཀྱི་སྒོ་ནས་རང་ནུས་ཡོད་དོ་ཅོག་སྤུངས་ཏེ་བོད་མིའི་སྤྱི་ཚོགས་འདི་གློ་ནད་དང་བྲལ་བའི་ཚོགས་སྡེ་ཞིག་ཏུ་བསྐྲུན་རྒྱུར་དམ་བཅའ་བསྐྱར་དུ་འཇོག་དགོས་པའི་འབོད་སྐུལ་ཞུས་འདུག
རྩ་བའི་འཛམ་གླིང་ནང་དུ་ལོ་ལྟར་ཊི་བིའི་ནད་གཞི་རྐྱེན་པས་ མི་ས་ཡ་ ༡༌༥ འདས་གྲོངས་སུ་ཕྱིན་ཡོད་པ་དང་། ཊི་བི་ནི་འཛམ་གླིང་ཁྱོན་ཡོངས་སུ་མི་རྣམས་རྐྱེན་འདས་སུ་གཏོང་མཁན་གྱི་འགོས་ནད་གཙོ་ཆེ་ཤོས་ཤིག་ཆགས་ཡོད། དེ་བཞིན་དབུས་འཕྲོད་བསྟེན་ལས་ཁུངས་སུ་སྨན་ཁང་ཁག་བདུན་ནས་འབུལ་འབྱོར་བྱུང་བའི་གྲངས་ཐོ་ལ་གཞིགས་ན་ ༢༠༡༢ ནས་ ༢༠༡༤ བར་དུ་ཊི་བི་ཡི་ནད་གཞི་ ༡༡༦༨ བྱུང་ཡོད་པ་དང་། དེའི་ནང་ ༦༤༌༩༨ ཙམ་བུ་ཡིན་པ་དང་། ༣༥༌༠༢ ནི་བོུ་ཆགས་ཀྱི་ཡོད་པ་རེད་འདུག
