བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་རྒྱ་གཞུང་ནས་མཚོ་ལྷོ་ཁུལ་གྱི་འབའ་རྫོང་དུ་དབུར་ཐར་མཁྲེགས་གཏོར་གྱི་མིང་བྱང་འདྲ་མིན་འོག་ས་ཁུལ་དེའི་མི་མང་གི་ཉིན་རེའི་འཚོ་བའི་ཁྲོད་དཀའ་ངལ་མང་དག་ཅིག་འཕྲད་བཞིན་ཡོད་པ་མ་ཟད། ལས་གཞི་དེའི་འོག་འབའ་རྫོང་གཙོས་པའི་བོད་ཁུལ་གྱི་འབྲོག་ཁྱིམ་གནས་སྤོར་གྱི་གནས་བབ་ཛ་དྲག་ཅན་ཏུ་འགྱུར་བཞིན་པའི་སྙན་ཐོ་ཞིག་ཆེད་བཏོན་གནང་འདུག
སྙན་ཐོའི་ནང་ཟླ་བ་སྔོན་མར་རྒྱ་གཞུང་གིས་མཚོ་སྔོན་ཞིང་ཆེན་མཚོ་ལྷོ་ཁུལ་འབའ་རྫོང་ནང་ཆ་སྒྲིག་རོགས་སྐྱོར་ཞེས་པའི་ལས་གཞི་ཇེ་མགྱོགས་སུ་གཏོང་དགོས་རབས་བརྗོད་པ་དང་ལས་གཞི་དེའི་ཆ་ཤས་ཤིག་དབུལ་ཐར་གཏོང་བའི་དམིགས་ཡུལ་ཡིན་ལུགས་བཤད་ཀྱང་། ལས་གཞི་དེའི་འོག་རྒྱ་ནག་ས་གནས་སྲིད་གཞུང་གི་ལས་བྱེད་དང་ཏང་ཡོན་འབོར་ཆེན་གྲོང་ཁུལ་དང་འབྲོག་ཁུལ་དུ་ཆེད་གཏོང་བྱས་ཏེ་ས་གནས་མང་ཚོགས་ཀྱི་གནས་སྟངས་ལ་མྱུལ་ཞིབ་རྒྱུས་ལོན། ལྷག་པར་དུ་ཆབ་སྲིད་དང་འབྲེལ་བའི་དཀའ་རྙོག་རིགས་ལ་དམ་དྲག་བྱེད་བཞིན་ཡོད་སྐོར་གསུངས་འདུག
ལྟེ་གནས་ཁང་གིས་དམིགས་ཡུལ་དང་ལྡན་པའི་ལས་གཞི་དེ་ནི་དོན་དངོས་ཐོག་དབུལ་ཐར་མཁྲེགས་གཏོར་གྱི་མིང་བྱང་འོག་ཏུ་ས་གནས་བོད་མིའི་བསམ་སྤྱོད་ལ་མྱུལ་ཞིབ་དང་དམ་དྲག་བྱ་ཐབས་ཤིག་ཡིན་པ་དང་། རྒྱ་གཞུང་གི་ལས་བྱེད་དང་ཏང་ཡོན་ཚོས་ཞིང་འབྲོག་ས་ཁུལ་གྱི་ཁྱིམ་ཚང་ནང་ལ་སོང་སྟེ་གཟའ་འཁོར་མང་པོར་བསྡད་ནས་མང་ཚོགས་ལ་ཆབ་སྲིད་ཀྱི་སློབ་གསོ་སྤེལ་བའི་ཞོར་དུ་ཚོར་ཤུགས་ལྡན་པའི་གནས་ཚུལ་འཚོལ་བསྡུ་བྱེད་བཞིན་ཡོད་པ་རེད་ཅེས་བཀོད་འདུག
དེ་ནི་ཕྱི་ལོ་ ༢༠༡༢ ལོ་ནས་སྐྱེ་ཁམས་ཁོར་ཡུག་སྲུང་སྐྱོང་དང་དབུལ་ཐར་མཁྲེགས་གཏོར་གྱི་ལས་གཞི་ཁག་དང་མཉམ་དུ་སྤེལ་བ་ཞིག་ཡིན་ཞིང་། ལས་གཞི་དེ་དང་མཉམ་དུ་བོད་ཁུལ་ལ་གཞི་རྒྱ་ཆེ་བའི་དོགས་ཟོན་མྱུལ་ཞིབ་དང་བོད་མིའི་བསམ་བློར་བཏང་འཛིན་བྱ་ཐབས་ཀྱི་ཆབ་སྲིད་སློབ་གསོའི་ལས་གཞི་སྣ་ཚོགས་སྤེལ་མུས་ཡིན་པ་ཆེད་བཀོད་གནང་ཡོད།
གསར་འགོད་པས་བོད་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་་པདྨ་རྒྱལ་ལགས་སུ་རྒྱ་ནག་གི་དབུལ་ཐར་མཁྲེགས་གཏོར་ཟེར་བའི་མིང་བྱང་གི་འོག་ནས་བོད་མི་དག་ལ་དཀའ་ངལ་ཅི་ཞིག་སྤྲོད་བཞིན་པའི་སྐོར་ལ་བཅར་འདྲི་ཞུས་པར་རྒྱ་ནག་གིས་ལོ་རབས་དགུ་བཅུ་ནས་བཟུང་འབྲོག་པ་གྲོང་སྙེགས་དང་ནུབ་རྒྱུད་གསར་གཏོད། དེང་སང་གི་ཕྱུག་སྐྱུར་རྩ་འདེབས་དང་དབུལ་ཐར་མཁྲེགས་གཏོར་སོགས་ཀྱི་མིང་འདྲ་མིན་འོག་ནས་བོད་ཁུལ་གྱི་འབྲོག་རི་མང་པོ་གནས་སྤོར་བྱས་ནས་རང་བྱུང་གི་ཐོན་ཁུངས་བདག་གཉེར་བྱེད་པ་དང་། འབྲོག་པ་མང་ཚོགས་དམར་ཕྱོགས་ཀྱི་བཏང་འཛིན་དོན་གྱི་འོག་ཏུ་འཇུག་རྒྱུའི་དམིགས་ཡུལ་གཅིག་པ་ཡིན་པ་ངོ་སྤྲོད་གནང་སོང་།
རྩ་བའི་ལས་གཞི་དེའི་ཆ་ཤས་རྒྱ་ཆེ་བ་ཞིག་ནི་གཞི་རིམ་མང་ཚོགས་ནང་ཆབ་སྲིད་ཀྱི་སློབ་གསོ་སྤེལ་ནས་དམར་ཤོག་ཚོགས་པའི་དབང་ཆ་དང་ཆབ་སྲིད་ཤུགས་ཆེར་གཏོང་རྒྱུ་དེ་རེད། རྒྱ་ནག་གི་སྲིད་འཛིན་ཞི་ཅིན་ཕིང་གིས་དབུལ་ཐར་མཁྲེགས་གཏོར་ནི་ཕྱི་ལོ་ ༢༠༡༧ ནས་ ༢༠༢༠ བར་གྱི་དམག་འཐབ་ཆེན་པོ་གསུམ་གྱི་ནང་གི་གཅིག་ཡིན་རབས་དང་། དམག་ཐབས་གཞན་གཉིས་ནི་ཉེན་ཁ་སྔོན་འགོག་དང་དུག་རླངས་ཚོད་འཛིན་བྱ་རྒྱུ་དེ་ཡིན་པར་ངོས་འཛིན་བྱས་ཤིང་། ཕྱི་ལོ་ ༢༠༡༩ ལོར་དམར་ཤོག་ཚོགས་པའི་སྲིད་གཞུང་རིམ་ཁག་གིས་མི་དམངས་ས་ཡ་ ༡༠ དབུལ་ཐར་གཏོང་བའི་འགན་སྤྲད་ཡོད་པ་དང་། ཕྱི་ལོ་༢༠༢༠ ལོའི་དམིགས་འབེན་མངོན་འགྱུར་བྱ་བར་རྒྱ་གཞུང་གིས་ཟླ་རེར་མི་དམངས་ས་ཡ་ ༡ ཙམ་དང་སྐར་མ་རེ་རེར་ཁྱིམ་ཚང་ ༢༠ དབུལ་ཐར་གཏོང་དགོས་ཆགས་ཡོད་པ་རེད། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་དབུལ་ཐར་མཁྲེགས་གཏོར་ཁྲོད་དུ་ད་ལྟ་ལག་ལེན་བསྟར་བཞིན་པའི་གནས་སྤོར་ལས་གཞི་ཁག་གིས་བོད་མིའི་འགྲོ་བ་མིའི་ཐོབ་ཐང་ལ་ཚད་མི་འདྲ་བའི་བརྡལ་བཤིག་བཏང་ཡོད་སྐོར་གསུངས་འདུག
