རྒྱ་གཞུང་གིས་གཞིས་རྩེ་གཉའ་མོ་གྲོང་ཚོའི་ཡུལ་མིར་དྲག་གནོན་དང་མང་ཚོགས་ ༡༤ འཛིན་བཟུང་བྱས་པའི་ཁྲོད་ནས་གྲོང་ཚོའི་ཏང་གི་དྲུང་ཆེ་རྒྱལ་མཚན་གྱིས་གཙོས་གཤམ་འོག་འགོ་ཁྲིད་ཚང་མ་འཛིན་བཟུང་བྱས་ཡོད་པ་ཤེས་རྟོགས་ཐུབ་ཡོད་པ་རེད། ཏང་གི་དྲུང་ཆེ་དང་ཏང་ཡོན་ལས་བྱེད་རྣམས་འཛིན་བཟུང་བྱེད་དགོས་དོན་ནི་མང་ཚོགས་ལ་ངན་སྐུལ་དང་འུར་ལངས་བྱེད་བཅུག་པའི་ཉེས་འཛུགས་འོག་འཛིན་བཟུང་བྱས་ནས་ཉ་རི་བཙོན་ཁང་དུ་བཀག་ཉར་བྱས་འདུག
འཛིན་བཟུང་བྱས་པའི་མི་ ༡༤ དེ་དག་གི་ཁྲོད་ནས་མི་ལྔ་ཉེ་ལམ་ཕྱི་ཚེས་ ༡༨ ཉིན་གློད་བཀྲོལ་བཏང་ཡོད་ཀྱང་གྲོང་ཚོའི་ཏང་གི་དྲུང་ཆེ་དང་དང་གཤམ་འོག་ཏང་གི་འགོ་ཁྲིད་གཞན་རྣམས་ཀྱིས་གཙོས་མི་གཞན་རྣམས་མུ་མཐུད་བཀག་ཉར་བྱས་ཡོད་པ་མ་ཟད་ས་གནས་སུ་མུ་མཐུད་དྲག་གནོན་འོག་གནས་ཡོད་པ་རེད་འདུག
ས་གནས་ལ་དོན་རྐྱེན་དེ་བྱུང་རྗེས་རྣམ་གླིང་ཤན་ནམ་ཡུལ་ཚོར་བདེ་འཇགས་ཀྱི་ཚད་གཞི་མ་ལོན་པར་རྩིས་ཏེ་ལོ་རེའི་དཔེ་བཟང་གི་བྱ་དགའ་སྤྲོད་པའི་བྱེད་སྒོ་དེ་ཡང་མེད་པ་བཟོ་འཆར་ཡོད་པ་རེད་འདུག
སྤྱིར་གོང་གསལ་དོན་རྐྱེན་དེ་ནི་བོད་རང་སྐྱོང་ལྗོངས་གཞིས་རྩེ་གྲོང་ཁྱེར་རྣམ་གླིང་རྫོང་། རྡོ་རྗེ་ཤང་། གཉའ་མོ་གྲོང་ཚོའི་ནང་ཕྱི་ལོ་ ༢༠༡༦ ལོར་རྒས་མི་ཞིག་ལྐོག་བསད་བཏང་བའི་མི་བསད་གྱོད་གཞི་ཞིག་བྱུང་ཡོད་ཅིང་ས་གནས་རྒྱ་ནག་གཞུང་གི་འབྲེལ་ཡོད་ལས་བྱེད་དང་ཉེན་རྟོག་པས་མི་གསོད་མཁན་གྱི་ཉེས་ཅན་པའི་ལག་ནས་ལྐོག་རྔན་བླངས་ཏེ་མི་གསོད་མཁན་ཉེས་ཅན་པ་འགེབས་སྲུང་བྱས་པ་མ་ཟད། མི་ཤི་མཁན་གྱི་ནང་མི་འཛིན་བཟུང་དང་ཉེས་རྡུང་དྲག་པོ་བཏང་ནས་ད་བར་གནད་དོན་དེར་དྲང་བདེན་གྱི་ཐག་གཅོད་ཡང་དག་པ་མ་བྱས་པར་བརྟེན་འདི་ལོ་ཕྱི་ལོ་ ༢༠༡༨ ཟླ་ ༥ ཚེས་ ༦ ཉིན་གཉའ་མོ་གྲོང་ཚོར་ཁྱིམ་ཚང་ ༡༨༢ ཡོད་པའི་མང་ཚོགས་ཚང་མས་རྡོག་རྩ་གཅིག་སྒྲིལ་གྱིས་སྲིད་གཞུང་ནས་དྲང་བདེན་གྱི་ཐག་གཅོད་མ་བྱས་པ་དེར་རྫོང་ལས་བྱེད་ལ་སླར་ཡང་ཞུ་རྒོལ་གནང་སྟབས། རྫོང་ཉེན་རྟོག་པའི་རླངས་འཁོར་དང་བཙོན་པ་བཅུག་སའི་རླངས་འཁོར་བཅས་ཁྱོན་རླངས་འཁོར་ ༣༢ འབྱོར་ཏེ་མང་ཚོགས་ཐོག་དྲག་གནོན་བྱས་པ་མ་ཟད་རྒྱལ་ཁབ་ལ་ངོ་ལོག་བྱས་པའི་ཆབ་སྲིད་ཀྱི་ཞྭ་་མོ་གཡོག་པ་དང་མང་ཚོགས་ཀྱི་དྲང་བདེན་ལས་འགུལ་དེ་ཆབ་སྲིད་གནད་དོན་ཡིན་པར་འགྲེལ་བརྗོད་བྱས་ཏེ་ཟླ་ ༥ ཚེས་ ༨ ཉིན་གྲོང་ཚོའི་འགོ་ཁྲིད་གཙོས་པའི་ཏང་ཡོན་ལས་བྱེད་དང་གྲོང་མང་ཚོགས་བཅས་མི་ ༡༤ འཛིན་བཟུང་གིས་བཙོན་འཇུག་བྱས་པའི་ཛ་དྲག་གནས་ཚུལ་ཐོན་ཡོད་པ་རེད།
གྲོང་ཚོ་དེའི་ཡུལ་མི་ཚང་མས་འཛིན་བཟུང་བྱས་པའི་མི་རྣམས་གློད་བཀྲོལ་དགོས་པ་དང་གལ་ཏེ་གློད་བཀྲོལ་མ་གཏང་ཚེ་ཁོ་ཚོས་ད་ལོ་ས་ཞིང་འདེབས་ལས་གནང་རྒྱུ་མིན་པ་དང་གྲོང་ཚོའི་ཡུལ་མི་ཚང་མ་མཉམ་དུ་བཙོན་འཇུག་བྱེད་དགོས་པའི་དགོས་འདུན་བཏོན་ནས་ས་ཞིང་འདེབས་ལས་མཚམས་འཇོག་བྱས་ཡོད་འདུག
ས་གནས་རྒྱ་གཞུང་གི་སྲིད་གཞུང་གིས་གོང་གི་གནད་དོན་དེ་མི་གཞན་དང་ཕྱིར་ཕྱོགས་ལ་འགྲེལ་བརྗོད་བྱེད་མི་ཆོག་པར་གསང་དགོས་པའི་བཀའ་རྒྱ་བཏང་བ་དང་། ཕྱི་ལ་གནད་དེ་བཤད་པ་ཤེས་རྟོགས་བྱུང་ཚེ་ཐག་གཅོད་ནན་པོ་བྱེད་རྒྱུ་ཡིན་པའི་འཇིགས་སྐུལ་བྱས་འདུག ལྷག་དོན་ས་གནས་སུ་ཉེན་རྟོག་པ་དང་དམག་མི་ཕོན་ཆེ་འགྲེམས་འཇོག་གིས་ས་གནས་ལ་དམ་དྲག་ཆེན་པོ་བྱས་དང་བྱེད་བཞིན་ཡོད་པ་རེད་འདུག
