བདག་ཅག་གི་སྟོན་པ་རྣམ་འདྲེན་བཞི་པ་སངས་རྒྱས་བཅོམ་ལྡན་འདས་ཐེངས་ ༢༥ དབྱར་གནས་ལ་བཞུགས་པ་དང་དེ་བཞིན་ཆོ་འཕྲུལ་བསྟན་པ་སོགས་ཀྱི་མཛད་པ་དུ་མ་བསྐྱངས་པའི་གནས་ཆེན་ཁྱད་པར་ཅན་རྒྱ་གར་གྱི་ཨུ་ཏྟརཔྲ་དེ་ཤའི་ཁོངས་གཏོགས་སུ་ཆགས་པའི་ Shravasti འམ་མཉན་ཡོད་དུ་བྷར་མ་དང་ཤྲི་ལངྐ་སོགས་ནས་ཆེད་དུ་གདན་འདྲེན་ཞུས་པའི་འཕགས་པ་གནས་བརྟན་སྡེ་པའི་དགེ་སློང་ ༡༠༨ ལྷག་ལྷན་ཞུགས་ཐོག་དམ་ཆོས་འདུལ་བའི་ཕྱག་བཞེས་དང་མཐུན་པའི་དབྱར་གནས་དབུ་འཛུགས་གནང་འདུག
ཁ་སང་བོད་ཟླ་ ༥ ཚེས་ ༡༥ ཉིན་ནས་དབུ་འཛུགས་ཀྱིས་༸སྒྲུབ་བརྒྱུད་བསྟན་པའི་མངའ་བདག་འབྲི་གུང་༸སྐྱབས་མགོན་མཆོག་གི་རླབས་ཆེན་གྱི་དགོངས་གཞི་དང་མཐུན་འགྱུར་གནང་བ་ལྟར། འབྲི་གུང་༸སྐྱབས་མགོན་༸གང་ཉིད་མཆོག་དབུ་བཞུགས་ཐོག་ཟླ་བ་གསུམ་གྱི་རིང་བྷར་མ་དང་ཤྲི་ལངྐ་སོགས་ནས་འཕགས་པ་གནས་བརྟན་སྡེ་པའི་དགེ་སློང་ ༡༠༨ ལྷག་ལྷན་འཛོམས་སར་དབྱར་གནས་དབུ་འཛུགས་ཀྱི་རྟེན་འབྲེལ་མཛད་སྒོ་ཚོགས་ཡོད་པ་དང་། མཛད་སྒོའི་ཐོག་མར་དབྱར་གནས་གོ་སྒྲིག་ཚོགས་ཆུང་གི་ཚོགས་མི་མཁས་དབང་དབང་ཕྱུག་རྡོ་རྗེ་མཆོག་ནས་འཚམས་འདྲི་དང་འབྲེལ་ངོ་སྤྲོད་གསུང་བཤད་གནང་འདུག
དེ་བཞིན་དབྱར་གནས་ཀྱི་བྷར་མའི་གནས་བརྟན་ཆེན་པོ་པར་མོ་ཁ་མཆོག་དང་ཤྲི་ལངྐ་དང་བྷར་མ་བཅས་ཀྱི་བགྲེས་སོང་དགེ་སློང་ཁ་ཤས་ཀྱིས་དམ་ཆོས་འདུལ་བ་དང་འབྲེལ་བའི་གསུང་བཤད་གནང་བ་དང་ཆབས་ཅིག འབྲི་གུང་༸སྐྱབས་མགོན་མཆོག་ལ་གོ་སྒྲིག་དེ་ལྟར་གནང་བར་ཡི་རངས་ཀྱི་བསྔགས་བརྗོད་དང་ཐུགས་རྗེ་ཆེ་ཞུས་འདུག
འབྲི་གུང་༸སྐྱབས་མགོན་མཆོག་གིས་མཉན་ཡོད་ཀྱི་གནས་ཆེན་འདི་བཞིན་རང་ཅག་ནང་པ་ཡོངས་ལ་གལ་ཆེན་པོ་ཞིག་ཆགས་ཡོད་སྐོར་དང་། དེ་བཞིན་མཉན་ཡོད་ནང་པའི་ལྟེ་གནས་གཙུག་ལག་ཁང་འདི་ཉིད་གསར་བཞེངས་གནང་བའི་དགོས་དམིགས་སོགས་རྒྱབ་ལྗོངས་ཀྱི་ལོ་རྒྱུས་ངོ་སྤྲོད་ཞིབ་རྒྱས་བསྩལ་འདུག
དེ་བཞིན་བཞུགས་སྒར་དུ་རྟེན་གཞི་བྱས་པའི་ཐེག་ཆེན་ཆོས་གླིང་གཙུག་ལག་ཁང་དུ་སྐུ་བཅར་རྣམ་རྒྱལ་གྲྭ་ཚང་དང་རིགས་ལམ་སློབ་གཉེར་ཁང་གཉིས་ཐུན་མོང་གིས་བོད་ཟླ་ ༥ ཚེས་ ༡༥ ནས་ ༣༡ བར་ཚད་མ་རྣམ་འགྲེལ་ཐོག་དབྱར་ཆོས་ཀྱི་ཆོས་རྭ་ཆེས་ཐོག་མ་དེ་དབུ་འཛུགས་གནང་ཡོད་པ་རེད།
རྩ་བའི་ད་རེས་འབྲི་གུང་༸སྐྱབས་མགོན་མཆོག་གི་ཐུགས་བསྐྱེད་ལ་བརྟེན་ནས་མཉན་ཡོད་ཀྱི་གནས་ཆེན་འདིར་ལོ་ངོ་གཉིས་སྟོང་ལྷག་ཙམ་གྱི་རྗེས་ལ་དབྱར་གནས་ཚོགས་ཐུབ་པ་འདི་ནི་ནང་པ་སངས་རྒྱས་པའི་ལོ་རྒྱུས་ནང་ཆེས་གནད་ཆེ་བ་ཞིག་ཆགས་ཡོད་པ་རེད།
