ཁ་སང་ཕྱི་ཟླ་ ༤ ཚེས་ ༢༩ ཉིན་ཞོགས་པ་དཀར་མཛེས་བོད་རིགས་རང་སྐྱོང་ཁུལ། སེར་ཤུལ་རྫོང་། སེར་ཤུལ་ཡུལ་ཚོའི་ས་གནས་བོད་རིགས་མང་ཚོགས་ཀྱིས་སེར་ཤུལ་དགོན་པའི་རྒྱབ་རིར་བསང་གསོལ་དང་རླུང་རྟ་དར་འཛུགས་སོགས་གནང་སྟེ་ཡུལ་ལྷ་གཞི་བདག་གསོལ་བའི་ཆོས་ཕྱོགས་ཀྱི་གནང་སྒོ་སྤེལ་ཡོད་ཅིང་། སྐབས་དེར་རང་ལོ་ ༢༠ ཡིན་པའི་བོད་མི་དབང་ཆེན་ལགས་ཀྱིས་༸ཀུན་ཟིགས་༸པཎ་ཆེ་རིན་པོ་ཆེ་མཆོག་གློད་བཀྲོལ་ཡོང་བར་ཤོག ༸ རྒྱལ་བ་༸པཎ་ཆེ་རྣམ་གཉིས་བོད་དུ་ལྷན་འཛོམས་ཡོང་བར་ཤོག་ཅེས་སྨོན་ལམ་བརྒྱབ་འདུག
བསང་གསོལ་གནང་རྗེས་ཕྱིར་ལོག་འགྲོ་སྐབས་ལམ་བར་དུ་བོད་ནང་གི་སྔ་དྲོའི་ཚོུད་ ༡༠༌༣༠ ཙམ་ལ་ས་གནས་རྒྱ་ནག་ཉེན་རྟོག་པས་ཁོང་དང་ཁོང་གི་རོགས་པ་བློ་བཟང་ལགས་དང་། ཡོན་ཏན་ལགས། ད་དུང་ལྐུག་པ་ཞིག་བཅས་མི་བཞི་འཛིན་བཟུང་བྱས་འདུག་པ་མ་ཟད། ཁོང་རྣམས་ཀྱི་ལག་ཐོགས་ཁ་པར་ཡང་བཙན་འཕྲོག་བྱས་ཏེ་ད་ལྟ་སེར་ཤུལ་རྫོང་ཉེན་རྟོག་ཁང་དུ་བཀག་ཉར་བྱས་ཡོད་པ་རེད་འདུག
འཛིན་བཟུང་བྱས་པའི་བོད་མི་བཞི་པོ་དེ་དག་ལས་ལྐུག་པ་དེ་རྗེས་སུ་གློད་བཀྲོལ་བཏང་ཡོད་ཀྱང་ཁོང་དང་རོགས་པ་གཉིས་བཅས་བོད་མི་གསུམ་ད་ལྟ་སེར་ཤུལ་རྫོང་ཉེན་རྟོག་ཁང་དུ་བཀག་ཉར་བྱས་འདུག དེ་རིང་ཟླ་ ༤ ཚེས་ ༣༠ ཉིན་ཞོགས་པ་གསར་དུ་ཤེས་རྟོགས་བྱུང་བར་རྫོང་ཉེན་རྟོག་པས་ཉིན་གྲངས་ ༡༥ ནང་ཚུད་ཁོང་ཚོར་ཁྲིམས་ཐག་གཅོད་རྒྱུ་ཡིན་ཚུལ་བརྗོད་འདུག 
གནས་ཚུལ་མཁོ་སྤྲོད་པས་མུ་མཐུད་དུ་བརྗོད་པར་གཞིགས་ན་སྤྱིར་བཏང་ཁ་སང་ས་གནས་ཡུལ་མི་ཚོས་བསང་གསོལ་གནང་བའི་བྱེད་སྒོ་དེ་ནི་ལོ་ཤས་གོང་ནས་བཟུང་ལོ་ལྟར་སེར་ཤུལ་གྲོང་གི་ས་གནས་མང་ཚོགས་ཀྱིས་༸ཀུན་གཟིགས་༸པཎ་ཆེན་རིན་པོ་ཆེ་༸སྐུ་ཕྲེང་བཅུ་གཅིག་པ་མཆོག་གི་༸སྐུའི་འཁྲུངས་སྐར་ཉིན་ནས་དབུ་འཛུགས་ཀྱིས་བདུན་ཕྲག་གཅིག་ཙམ་གི་རིང་ཡུལ་ལུང་དེའི་ནང་ཁོར་ཡུག་གཙང་བཟོ་གནང་རྒྱུའི་ལས་འགུལ་ཞིག་སྤེལ་སྲོལ་ཡོད་པ་ལྟར། ད་ལོ་ཡང་བདུན་གཅིག་ཙམ་གི་རིང་ཁོར་ཡུག་གཙང་བཟོ་གནང་གྲུབ་པ་དང་ཆབས་ཅིག་རི་མགོར་བསང་གསོལ་གནང་སྐབས་དོན་རྐྱེན་དེ་བྱུང་ཡོད་པར་འགྲེལ་བརྗོད་གནང་ཡོད།
སྤྱིར་གསོལ་བ་སྨོན་ལམ་བཏབ་རྐྱེན་འཛིན་བཟུང་བྱས་པའི་དབང་ཆེན་ལགས་ནི་སེར་ཤུལ་གྲོང་ཚོར་གཏན་སྡོད་གནང་མཁན་ཞིག་ཡིན་པ་དང་། ཁོང་རང་ཉིད་ལོ་ན་གསུམ་སོན་སྐབས་ཕ་འདས་གྲོངས་སུ་གྱུར་འདུག ཨ་མ་ནི་ལམ་བཟོ་བྱེད་མཁན་ཞིག་ཡིན་སྟབས་ཁྱིམ་ཚང་གི་འཚོ་བར་དཀའ་ངལ་ཡོད་རྐྱེན་སློབ་གྲྭར་གཏན་ནས་འགྲོ་ཐུབ་མེད་པ་རེད་འདུག ཁོང་ད་ལྟ་ལོ་ན་ ༢༠ ལ་སོན་འདུག
ཁོང་ནི་མགོ་ལོག་དང་སྐྱེ་དགུ་མདོ་བཅས་ས་གནས་གང་སར་རྟ་རྒྱུག་འགྲན་བསྡུར་ཁག་ཏུ་ཞུགས་མཁན་གྱི་རྟ་རྩལ་པ་གྲགས་ཅན་ཞིག་ཡིན་པ་མ་ཟད་ཁོང་གི་རྟ་རྒྱུག་འགྲན་བསྡུར་ལ་བརྟེན་ནས་ཁྱིམ་ཚང་གི་འཚོ་རྟེན་ལ་རོགས་པ་བྱེད་ཀྱི་འདུག ཁོང་དང་མཉམ་དུ་འཛིན་བཟུང་བྱས་པའི་རོགས་པ་གཉིས་པོ་ཁོང་དང་གྲོང་སྡེ་གཅིག་པ་ཡིན་པ་མ་ཟད་རྟ་རྒྱུག་འགྲན་བསྡུར་ནང་ཞུགས་མཁན་གཅིག་པའང་རེད་འདུག
མཆན། བོད་ནང་གི་གསར་འགྱུར་འདི་དང་འབྲེལ་བའི་འདྲ་པར་བསྐྱར་བཅོས་ཞུས་ཡོད་པས་དེ་དོན་དགོངས་འཇགས་འཚལ།
