ཉི་ཧོང་རྒྱལ་ས་ Tokyo ནང་ཚོགས་པའི་ Interethnic Interfaith Leadership Conference འམ་མི་རིགས་དང་ཆོས་ལུགས་ནང་ཁུལ་འགོ་ཁྲིད་ལྷན་ཚོགས་ཐེངས་ ༡༢ ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་་མགོན་ཆེན་པོ་མཆོག་གིས་གསུང་འཕྲིན་ཞིག་བསྩལ་ཏེ་འགྲོ་བ་མི་གཅིག་གྱུར་གྱི་འདུ་ཤེས་གོང་འཕེལ་གནང་དགོས་གལ་ཡིན་པ་བཀའ་བསྩལ་འདུག
དེ་ཡང་ཨ་རི་ནང་དུ་རྟེན་གཞི་བྱས་པའི་རྒྱ་རིགས་སྤྱི་དམངས་སྟོབས་ཤུགས་ཚོགས་པས་གོ་སྒྲིག་འོག་ཉི་ཧོང་གི་རྒྱལ་ས་ Tokyo ནང་དུ་ཟླ་བ་འདིའི་ཕྱི་ཚེས་ ༡༤ ནས་ ༡༧ བར་མི་རིགས་འདྲ་མིན་གྱི་གཞོན་སྐྱེས་འགོ་ཁྲིད་ཟབ་སྦྱོང་གི་ཚོགས་འདུ་ཐེངས་བཅུ་གཉིས་པ་འཚོགས་བཞིན་ཡོད་པར་༸གོང་ས་༸སྐྱབས་མགོན་ཆེན་པོ་མཆོག་གིས་བརྙན་འཕྲིན་བརྒྱུད་དམིགས་གསུང་འཕྲིན་ཞིག་བསྩལ་འདུག་པ་དང་དེའི་ནང་། དེང་སྐབས་འཛམ་གླིང་འདིའི་སྒང་ལ་རྙོག་གྲ་མང་པོ་ཞིག་མི་རང་ཉིད་ཀྱིས་བཟོས་པའི་རྙོག་གྲ་ཞིག་ཆགས་ཡོད། དེའང་མི་རིགས་དང་རྒྱལ་ཁབ། ཆོས་ལུགས་མི་འདྲ་བ་ལ་སོགས་པའི་མི་འདྲ་བ་དེ་དག་དབྱེ་རྐྱེན་ཡོང་གི་ཡོད་པ་བཀའ་བསྩལ་བ་དང་འབྲེལ་ཏེ་ཚང་མས་འགྲོ་བ་མི་གཅིག་གྱུར་གྱི་འདུ་ཤེས་གོང་འཕེལ་གཏོང་དགོས་གལ་ཡིན་པ་རེད་ཅེས་བཀའ་བསྩལ་འདུག
དེའང་རྒྱ་ནག་དང་རྒྱ་གར་ལྟ་བུའི་རྒྱལ་ཁབ་ནང་དུ་སྐད་དང་ཡི་གེ་འདྲ་མིན་ཡོད་པའི་མི་རིགས་མང་དག་ཞིག་འགྲོ་བ་མི་ཕན་ཚུན་སྤུན་ཟླའི་འདུ་ཤེས་འཛིན་ཐོག་མཉམ་གནས་གནང་མུས་ཡིན་པ་དང་། མགོན་པོ་༸གང་ཉིད་མཆོག་ནས་འགྲོ་བ་མི་གཅིག་གྱུར་གྱི་འདུ་ཤེས་ཡར་རྒྱས་གཏོང་དགོས་པར་དགོངས་བཞེས་ཧ་ཅང་གནང་བཞིན་ཡོད་པ་བཀའ་སྩལ་དང་ཆབས་ཅིག ལྷག་དོན་༸གང་ཉིད་མཆོག་ནས་འགྲོ་བ་མི་ཞིག་ཡིན་པ་ལས་ནང་པ་ཞིག་དང་། བོད་པ་ཞིག ཏཱ་ལའི་བླ་མ་ཡིན་པའི་དགོངས་བཞེས་རྩ་བ་ནས་མཛད་ཀྱི་མེད་པ་བཀའ་བསྩལ་འདུག
ལྷན་ཚོགས་དེ་ནི་རྒྱ་རིགས་རང་དབང་དང་མང་གཙོ་དོན་གཉེར་བ་སྐུ་ཞབས་ཡང་ཅེན་ལི་ཡིས་བཙུགས་པའི་སྤྱི་དམངས་ཀྱི་སྟོབས་ཤུགས་ཞེས་པས་གོ་སྒྲིག་གནང་བ་ཞིག་ཡིན་ཞིང་། ཚོགས་པའི་དམིགས་ཡུལ་གཙོ་བོ་ནི་མི་རིགས་དང་ཆོས་ལུགས་འདྲ་མིན་བར་ཕན་ཚུན་གུས་བརྩི་དང་བསམ་ཤེས་གོང་འཕེལ་བཏང་རྒྱུའི་ཆེད་ཡིན་པ་རེད། ལོ་ལྟར་བོད་དང་རྒྱ་ནག ཐེ་ཝན་ ཧོང་ཀོང་། མེ་ཀའོ་བཅས་ནས་ནང་པ་དང་ཁ་ཆེ། ཡི་ཤུ་སོགས་ཆོས་ལུགས་དང་མི་རིགས་འདྲ་མིན་གྱི་སྐུ་ཚབ་མང་དག་ཞིག་མཉམ་འཛོམས་བརྒྱུད་ཕན་ཚུན་ཡིད་ཆེས་དང་འཆམ་མཐུན་གོང་འཕེལ་ཐོག་གྲོས་བསྡུར་སྦྱང་བཤད་གནང་གི་ཡོད་པ་རེད།
རྩ་བའི་འགོ་ཁྲིད་ལྷན་ཚོགས་ཀྱིས་ལོ་ལྟར་བརྗོད་གཞི་འདྲ་མིན་གནང་ཐོག་གྲོས་བསྡུར་དང་གོ་རྟོགས་སྤེལ་རེས་གནང་སྲོལ་ཡོད་པ་བཞིན། འདི་ལོ་ཚོགས་ཆེན་ཐེངས་ ༡༢ ཐོག་གཙོ་བོ་འགྲོ་བ་མིའི་ཐོབ་དང་མང་གཙོ། ཞེ་བདེ་གོང་འཕེལ། མི་རབས་གསར་པ་དང་ཐབས་བྱུས་གསར་པ། དེ་བཞིན་ལག་ཆ་གསར་པ་ཞེས་པའི་བརྗོད་གཞིའི་ཐོག་གླེང་སློང་གནང་རྒྱུ་རེད་འདུག ལྷན་ཚོགས་དེ་ཐོག་མར་ཕྱི་ལོ་ ༢༠༠༠ ལོར་དབུ་འཛུགས་གནང་བ་ཞིག་དང། ཨ་རིའི་མང་གཙོ་གོང་སྤེལ་བསྟི་གནས་ཁང་དང་ཐེ་ཝན་མང་གཙོ་ཐེབས་རྩ་ཁང་སོགས་ཚོགས་སྡེ་ཁག་གཅིག་གིས་མཐུན་འགྱུར་གནང་གི་ཡོད་པ་རེད།
