བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་རིང་ཕྱི་ཚེས་ ༨ ཉིན་གྱི་ཉིན་དགུང་ཚོུད་ ༡༢༌༣༠ ཙམ་ལ་བཞུགས་སྒར་༸རྒྱལ་བའི་ཕོ་བྲང་ནས་ཆིབས་ཐོན་གྱིས་གྷ་གྷལ་གནམ་ཐང་ནས་མཁའ་ལམ་བརྒྱུད་སིག་ཆོས་ལུགས་ཀྱི་གནས་མཆོག་ཨ་མི་རི་སར་མཛད་འཆར་གྱི་སླད་ཆིབས་བསྒྱུར་བསྐྱང་གནང་མཛད་སོང་།
མཛད་འཆར་ལྟར་ན་མགོན་པོ་མཆོག་སང་ཉིན་ཕྱི་ཚེས་ ༩ རེས་གཟའ་སྤེན་པའི་ཉིན་གྱི་སྔ་དྲོ་ཆུ་ཚོད་ ༡༠ ནས་ ༡ བར་གུ་རུ་ནཱ་ནག་དེ་ཝ་གཙུག་ལག་སློབ་ཆེན་ Guru Nanak Dev University དུ་པན་ཇབ་མངའ་སྡེ་གཞུང་གིས་གོ་སྒྲིག་ཞུས་པའི་གུ་རུ་ནཱ་ནག་དེ་ཝ་མཆོག་སྐུ་འཁྲུངས་ནས་མི་ལོ་ཧྲིལ་པོ་ ༥༥༠ འཁོར་བའི་དུས་དྲན་སྲུང་བརྩི་དང་འབྲེལ། Inter-Faith Conclave ཞེས་ཆོས་ལུགས་འདྲ་མིན་དབར་གྱི་ལྷན་ཚོགས་ཀྱི་ཚོགས་མགོན་དུ་དབུ་བཞུགས་ཀྱིས་བཀའ་སློབ་བཀྲིན་བསྩལ་གཏན་ཁེལ་འདུག དེ་རྗེས་ཕྱི་ཚེས་ ༡༡ ཉིན་ཕྱིར་བཞུགས་སྒར་དུ་ཆིབས་ཐོན་མཛད་ཀྱི་ཡོད་པ་རེད།
