བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་རྒྱ་གར་བྱང་ཕྱོགས་གྲོང་ཁྱེར་ལྡེ་ར་ལྡུན་ཁུལ་དུ་རྟེན་གཞི་བྱས་པའི་ཝ་ན་འཕྲོད་བསྟེན་བསྟི་གནས་ཁང་དུ་ཐུགས་སྨོན་གནང་པ་དང་འབྲེལ། མགོན་པོ་༸གང་ཉིད་མཆོག་གིས་གཞན་ཕན་དང་སེམས་པ་བཟང་པོ་བྱ་རྒྱུ་ནི་གང་ཟག
་མི་རེ་ངོ་རེར་འགན་ཡོད་ཅེས་བཀའ་སྩལ་འདུག
དེ་ཡང། ཝ་ན་འཕྲོད་བསྟེན་བསྟི་གནས་ཁང་ནས་ཇི་ལྟར་གདན་ཞུའི་གསོལ་འདེབས་ཞུ་དོན་ལྟར། དེ་རིང་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་རྒྱ་གར་བྱང་ཕྱོགས་ཨུཏྟར་ཁཎྜ་མངའ་སྡེའི་གྲོང་ཁྱེར་ལྡེ་ར་ལྡུན་ཁུལ་དུ་ཆིབས་སྒྱུར་མཛད་ཡོད་པ་རེད།
སྐབས་དེར་ཐད་ཕུར་གནམ་ཐང་གི་ཕེབས་ལམ་གཡས་གཡོན་དུ་བདེ་སྐྱིད་གླིང་དུ་གཉུག་མར་གནས་པ་དང་གློ་བུར་དུ་ལྷགས་པ་བོད་མི་སེར་སྐྱ་མང་ཚོགས་བཅས་ཀྱིས་དགའ་དད་སྤྲོ་གསུམ་ངང་ཕེབས་བསུའི་སྣེ་ལེན་ཟབ་རྒྱས་ཞུས་ཡོད་པ་རེད། མགོན་པོ་༸གང་ཉིད་མཆོག་གིས་ཁུལ་དེའི་ནང་དུ་ཉིན་ཕྱེད་ཀྱི་མཛད་འཆར་བསྐྱངས་ཡོད་པ་དང། དེ་ཡང་གཙོ་བོ་ལྡེ་ར་ལྡུན་གྲོང་ཁྱེར་གྱི་ཉེ་འདབས་སུ་ཆགས་པའི་ཝ་ན་འཕྲོད་བསྟེན་བསྟི་གནང་ཁང་དུ་ཆིབས་སྒྱུར་བཀྲིན་བསྐྱངས་པ་དང་འབྲེལ། བསྟི་གནས་ཁང་དེའི་སྡེ་ཚན་ཁག་ལ་གཟིགས་ཞིབ་ཀྱིས་ཐུགས་སྨོན་དང། བསྟི་གནས་ཁང་དེའི་ནང་གི་ནད་པ་དང་འབྲེལ་སྨན་པ་དང་འབྲེལ་བའི་འགན་འཛིན་ཁག་སོ་སོར་མཇལ་འཕྲད་གནང་འདུག་པ་མ་ཟད། ༸གང་ཉིད་མཆོག་གིས་སྐར་མ་ ༤༥ རིང་བཀའ་སློབ་སྩལ་དོན་། དུས་རབས་ཉི་ཤུ་པ་འདིའི་ནང་མི་རབས་ཕན་ཚུན་དབར་འགྲོ་བ་མི་གཅིག་འགྱུར་གི་འདུ་ཤེས་འཛིན་དགོས་པ་དང། ཁྱད་པར་དུ་༸གང་ཉིད་མཆོག་གིས་གཞན་ཕན་དང་སེམས་པ་བཟང་པོ་བྱ་རྒྱུ་ནི་གང་ཟག་མི་རེ་ངོ་རེར་འགན་ཡོད་ཅེས་བཀའ་སྩལ་འདུག
གཞི་རྩའི་ད་ལན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གདན་ཞུ་གསོལ་འདེབས་ཞུ་མཁན་ཝ་ན་འཕྲོད་བསྟེན་བསྟི་གནས་ཁང་དེ་ནི། སྐུ་ཞབས་ཨ་ནིལ་སིངྒ་ལགས་ཀྱིས་ཆེད་བཙུགས་གནང་པ་ཞིག་ཡིན་པ་དང། དེའི་ནང་ལ་རྒྱ་གར་གྱི་ཚེའི་རིག་བྱེད་ Ayurveda དང་བོད་ཀྱི་གསོ་བ་རིག་པ། རྒྱ་ནག་གི་སྨན་གཞུང་། ལུས་སྦྱོང། ཕྱི་ལུགས་འཇམ་དཔྱད་བཅས་གནའ་དེང་ཟུང་སྦྲེལ་གིས་སྨན་བཅོས་བཅས་ཀྱི་སྡེ་ཁག་འདྲ་མིན་བདུན་ཡོད་པའི་བསྟི་གནས་ཁང་ཆེ་གྲས་ཤིག་ཡིན་པ་དང། བསྟི་གནས་ཁང་དེས་གནའ་དེང་གཉིས་ཀྱི་སྨན་བཅོས་གནང་ལུགས་མི་འདྲ་བའི་བརྒྱུད་ནས་མང་ཚོགས་ལ་ལུས་སེམས་ཀྱི་བདེ་ཐང་སོགས་ཀྱི་ཞབས་ཞུ་ཕུལ་གྱི་ཡོད་པ་རེད།
རྩ་བའི་༸གང་ཉིད་མཆོག་གིས་རྒྱ་གར་བྱང་ཕྱོགས་ལྡེ་ར་ལྡུན་དུ་རྟེན་གཞི་བྱས་པའི་ཝ་ན་འཕྲོད་བསྟེན་བསྟི་གནས་ཁང་དུ་ ཐུགས་སྨོན་དང་བཀའ་སློབ་བཀྲིན་སྩལ་རྒྱུ་བཅས་ཀྱི་མཛད་འཆར་ལེགས་གྲུབ་རྗེས། སླར་ཡང་ལྡི་ལི་ཁུལ་དུ་ཆིབས་སྒྱུར་གྱིས་སང་ཕྱི་ཚེས་ ༧ ནས་དབུ་འཛུགས་ཀྱིས་ཕྱི་ཚེས་ ༡༠ བར་ཉིན་གྲངས་ལྔའི་རིང་ལྡི་ལི་ནང་དུ་རྟེན་གཞི་བྱས་པའི་རྒྱ་གར་གྱི་འཕྲུལ་རིག་བསྟི་གནས་ཁང་གྲགས་ཅན་ IIT དང་ཁུལ་དེའི་ནང་གི་ཨ་རིའི་གཞུང་ཚབ་ཀྱི་སློབ་གྲྭ དེ་བཞིན་ལྡི་ལིའི་གཙུག་ལག་སློབ་གཉེར་ཁང་ཁག་ཅིག་ཏུ་ཆིབས་བསྒྱུར་བཀྲིན་བསྐྱང་རྒྱུ་གཙོས་པའི་ཤེས་ཡོན་ཅན་མི་སྣ་དང་ཚན་རིག་པ་སོགས་དང་ལྷན་མཇལ་གྱིས་བྱམས་བརྩེ་དང་གོ་ལའི་ཁྱོན་ཡོངས་ཀྱི་འགན་འཁུར། ཞི་བདེ་དང་བཟང་སྤྱོད། དེ་བཞིན་བདེ་སྐྱིད་བཅས་ཀྱི་བརྗོད་གཞི་འདྲ་མིན་ཐོག་བཀའ་སློབ་བཀྲིན་བསྩལ་རྒྱུ་མ་ཟད། ལྷག་དོན་སློབ་གྲྭའིི་ནང་ཆོས་དང་མ་འབྲེལ་བའི་བཟང་སྤྱོད་གོང་འཕེལ་གཏོང་ཐབས་ཀྱི་སློབ་ཚན་གཏན་འབེབས་གནང་ཕྱོགས་སོགས་ཀྱི་མཛད་རིམ་ཁག་ཅིག་དང། ལྷག་དོན་རྒྱ་གར་གཞུང་གི་ལས་བྱེད་དང་གཞུང་ཚབ་མི་སྣ་བཅས་ལ་དམིགས་བསལ་གྱི་མཇལ་ཁ་གནང་རྒྱུའི་མཛད་འཆར་བཅས་ལེགས་པར་གྲུབ་རྗེས་ཟླ་འདིའི་ཚེས་ ༡༡ ཉིན་ལྡི་ལི་ནས་བཞུགས་སྒར་དུ་ཚུར་ཆིབས་ཐོན་མཛད་རྒྱུ་ཡིན་འདུག
