རྒྱ་ནག་ནང་ Winnie the Pooh ཡི་གློག་བརྙན་བཀག་སྡོམ།


vot.org
Facebooktwittergoogle_plusmail
རྒྱ་ནག་ནང་ Winnie the Pooh ཡི་གློག་བརྙན་བཀག་སྡོམ།

བྱིས་པའི་འགུལ་རིས་གྲགས་ཅན་ Winnie the Pooh ཞེས་པའི་དོམ་ཕྲུག་སེར་པོའི་གློག་བརྙན་གསར་པ་ Christopher Robin ཟེར་བ་དེ་རྒྱ་ནག་ནང་བཀག་སྡོམ་བྱས་འདུག

དེའང་ཉེ་བའི་ལོ་ཤས་ནང་རྒྱ་རིགས་མང་ཚོགས་ནས་ Winnie the Pooh ཞེས་པའི་དོམ་ཕྲུག་རྒྱག་པ་རིལ་རིལ་དེའི་ཕྱིའི་གཟུགས་ཀྱི་ཁྱད་ཆོས་དེ་རྒྱ་ནག་གི་སྲིད་འཛིན་ཞི་ཅིང་ཕིང་དང་མཚུངས་བསྡུར་གྱིས་བསྟན་བཤིག་སློང་གི་ཡོད་པ་ལྟར། རྒྱ་ནག་གཞུང་གིས་སྤྱི་ཚོགས་དྲྭ་རྒྱ་སོགས་ཀྱི་སྟེང་དོམ་ཕྲུག་དེའི་འགུལ་རིས་དང་དེའི་མིང་སོགས་སྤྱོད་རྒྱུར་བཀག་སྡོམ་བྱེད་མུས་ཡིན་པ་མ་ཟད། ཟླ་བ་འདིའི་ཚེས་ ༣ ཉིན་འཛམ་གླིང་ཁྱོན་དུ་གཟིགས་འབུལ་འགོ་འཛུགས་ཞུས་པའི་ Winnie the Pooh གློག་བརྙན་དེ་ད་ཆ་རྒྱ་ནག་ནང་ཡོངས་བསྒྲགས་ཐོག་བཀག་སྡོམ་བྱས་ཡོད་པ་རེད་འདུག

རྩ་བའི་སྲིད་འཛིན་ཞི་ཅིང་ཕིང་དང་ Winnie དབར་མཚུངས་བསྡུར་བྱ་རྒྱུ་དེ་ཐོག་མར་ཕྱི་ལོ་ ༢༠༡༣ ལོར་ཨ་རིའི་སྲིད་འཛིན་ཟུར་པ་སྐུ་ཞབས་ཨོ་བྷ་མ་དང་ཞི་ཅིང་ཕིང་རྣམ་གཉིས་དགོང་ཚིགས་བཞེས་པར་མཉམ་དུ་བསྐྱོད་སྐབས་ཀྱི་འདྲ་པར་ཞིག་ནས་འགོ་བཙུགས་ཡོད་པ་དང། སྐབས་དེར་ཞི་ཅིང་ཕིང་ནི་ Winnie དང་སྐུ་ཞབས་ཨོ་བྷ་མ་ནི་དོམ་ཕྲུག་དེ་དང་འབྲེལ་བའི་དགོད་བྲོའི་རྟོག་སྒྲུང་ལས་ tigger ཞེས་པའི་སྟག་གི་དཔེ་མཚུངས་བཀོད་ཡོད་པ་རེད།

དེ་རྗེས་སླར་ཡང་ཕྱི་ལོ་ ༢༠༡༤ ལོར་ཞི་ཅིང་ཕིང་དང་ཉི་ཧོང་གི་སྲིད་བློན་ Shinzo Abe རྣམ་གཉིས་མཇལ་འཕྲད་སྐབས་རྟོག་སྒྲུང་དོམ་དང་མཚུངས་བསྡུར་བྱས་ཡོད་པ་མ་ཟད་ Shinzo Abe དེ་ Winnie the Pooh རྟོག་སྒྲུང་ལས་ Eeyore བོང་བུ་དང་དཔེ་མཚུངས་བཀོད་པ་བཅས་སྤྱི་ཚོགས་བརྒྱུད་ལམ་དྲྭ་རྒྱའི་ཐོག་ཏུ་ཞི་ཅིང་ཕིང་དང་དོམ་ཕྲུག་དེ་མཚུངས་བསྡུར་གྱིས་བྱ་སྤྱོད་དེ་རིམ་བཞིན་མང་དུ་སོང་བ་ལྟར་རྒྱ་ནག་གཞུང་གིས་ཞི་ཅིང་ཕིང་ལ་འཕྱ་སྨོད་ཀྱི་སྣང་བརྙན་དེ་རིགས་ཡོངས་རྫོགས་ནག་སུབ་བཏང་ཡོད་པ་རེད།

ལྷག་པར་དུ་ཕྱི་ལོ་ ༢༠༡༥ ལོར་དམག་རྩེད་རུ་སྒྲིག་རྒྱས་སྟོན་སྐབས་སྲིད་འཛིན་ཞི་ཅིང་ཕིང་དང་དོམ་ Winnie དབར་མཚུངས་བསྡུར་བྱས་པ་དེ་ཆེས་ཡོངས་གྲགས་གྱུར་པ་མ་ཟད་ལོ་དེའི་ནང་སྣང་བརྙན་དེར་དམ་དྲག་ཤུགས་ཆེ་བྱ་ཡུལ་ཞིག་ཆགས་ཡོད་པ་མ་ཟད། རྒྱ་ནག་གཞུང་དང་ཞི་ཅིང་ཕིང་སྒེར་གྱི་ངོས་ནས་ཀྱང་དོ་སྣང་ཤུགས་ཆེ་བྱེད་དགོས་པའི་གནད་དོན་ཞིག་ཆགས་སྐོར་ Global Risk Insights ཞེས་པའི་ཆབ་དཔལ་རིག་གསུམ་དང་འབྲེལ་བའི་དཔྱད་ཞིབ་གསར་ཤོག་སྟེང་བཀོད་ཡོད་པ་རེད།

འབྲེལ་ཡོད་གསར་འགྱུར།