བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དེ་རིང་སྐབས་༡༦པའི་སྤྱི་འཐུས་གསར་པ་ཁག་ཅིག་ལ་དབུ་མའི་ལམ་དང་བོད་རྒྱ་འབྲེལ་མོལ་སྐོར་ལ་ཟབ་སྦྱོང་གནང་སྐབས། དབུ་མའི་ལམ་གྱི་གལ་གནད་་སྐོར་དང་འབྲེལ། སྲིད་བྱུས་འདི་ནི་ཛ་དྲག་ཅིག་ཆགས་ཡོད་པ་དང་། ༸གོང་ས་མཆོག་༸སྐུ་འཚོ་བཞུགས་རིང་བོད་དོན་སེལ་དགོས་རྒྱུ་ནི་ཤིན་ཏུ་ནས་གལ་ཆེ་ཡིན་པ་མ་ཟད། འཛིན་སྐྱོང་ངོས་ནས་རྒྱ་བོད་འབྲེལ་མོལ་བསྐྱར་གསོ་ཡོང་སླད་རྒྱལ་སྤྱིའི་
གྲོ་ལུགས་དང་མཐུན་པའི་འབད་བརྩོན་སྔར་ལྷག་གནང་མུས་ཡིན་པ་གསུངས་སོང།
བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དྲུང་ལས་ཁུངས་ནས་ཟླ་འདིའི་ཚེས་ ༤ ནས་དབུ་འཛུགས་ཀྱིས་སང་ཚེས་ ༡༠ བར་ལ་གསར་དུ་བདམས་ཐོན་སྤྱི་འཐུས་རྣམས་ལ་བཙན་བྱོལ་བོད་མའི་སྒྲིག་འཛུགས་ཀྱི་སྲིད་བྱུས་དང་ཁྲིམས་སྒྲིག་ཁག་ཟབ་སྦྱོང་ཕུལ་བཞིན་ཡོད་པ་ལྟར། དེ་རིང་སྔ་དྲོའི་ཚོགས་ཐུན་གཉིས་རིང་ལ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་སྤྱི་འཐུས་རྣམས་ལ་བོད་མིའི་སྒྲིག་འཛུགས་ནས་དབུ་མའི་ལམ་གྱི་སྲིད་བྱུས་བཟུང་དགོས་དོན་དང། བོད་རྒྱ་འབྲེལ་མོལ་གྱི་འབྱུང་རིམ་དང་རྒྱབ་ལྗོངས་ངོ་སྤྲོད་ཅེས་པའི་བརྗོད་གཞི་གཉིས་ཐོག་ལ་ཟབ་སྦྱོང་གནང་ཡོད།
བརྗོད་གཞི་དང་པོ་དབུ་མའི་ལམ་སྐོར་དང་འབྲེལ། སྲིད་སྐྱོང་མཆོག་གིས་ང་ཚོས་དབུ་མའི་ལམ་གྱི་སྲིད་བྱུས་བཟུང་དགོས་པའི་རྒྱུ་རྐྱེན་གཙོ་བོ་ནི་རྐང་རྒྱ་ནག་དང་རྒྱ་གར། དེ་བཞིན་རྒྱལ་སྤྱིའི་སྤྱི་ཚོགས་དང། གཞིས་བཞུགས་བོད་མི། བཙན་བྱོལ་བོད་མི་བཅས་དོན་ཚན་ལྔར་ཐུག་ཡོད་པ་ངོས་འཛིན་དང། ལྷག་པར་དུ་དབུ་མའི་ལམ་དེ་གྲུབ་མ་གྲུབ་དང་གྲུབ་འབྲས་སོན་མིན་དེ་གོང་ཞུས་རྒྱུ་རྐྱེན་དེ་དག་མཐུན་མིན་དང་རྒྱུ་རྐྱེན་དེ་དག་དང་འབྲེལ་བ་སོགས་ལ་རག་ལུས་ཡོད་པ་གསུངས་པ་མ་ཟད། ལྷག་དོན་སྲིད་བྱུས་འདི་ནི་ཛ་དྲག་གི་རང་བཞིན་ཞིག་ཆགས་ཡོད་པ་གསུངས་སོང། ད་དུང་སྲིད་སྐྱོང་མཆོག་གིས་དབུ་མའི་ལམ་གྱི་ནུས་པ་དང་གྲུབ་འབྲས་གཙོ་གནད་འགས་སྐོར་དང་འབྲེལ། སྲིད་བྱུས་དེ་ལ་ད་སྐབས་ཨ་རིའི་ཕོ་བྲང་དཀར་པོ་དང་ཡོ་རོབ་མཐུན་ཚོགས་སོགས་ནས་རྒྱབ་སྐྱོར་ཚད་མཐོ་བོ་ཐོབ་ཡོད་པ་མ་ཟད། རྒྱ་རིགས་མང་ཚོགས་ནས་ཀྱང་དེ་ལ་གོ་རྟོགས་ཆེ་བ་དང་ཡིག་ངག་གཉིས་ཐོག་ནས་རྒྱབ་སྐྱོར་གནང་མཁན་མང་དུ་སོང་ཡོད་པ་དང། རྒྱ་ནག་གཞུང་ཕྱོགས་ནས་ཀྱང་གྲངས་ཉུང་མི་རིགས་ཁོངས་སུ་རྩིས་བཞིན་པ་གཞན་ལས་བོད་ཐོག་རྒྱབ་ཤ་དཀར་པོ་མང་བ་བཏོན་ཡོད་པ་དག་ནི་དབུ་མའི་ལམ་གྱི་ནུས་པ་ཞིག་ཆགས་ཡིན་སྐོར་གསུངས་ཡོད།
དེ་རིང་གི་ཟབ་སྦྱོང་དེའ་ཐོག་ནས་སྲིད་སྐྱོང་བློ་བཟང་སེང་གེ་མཆོག་གིས་སྤྱི་འཐུས་རྣམས་ལ་བོད་རྒྱ་འབྲེལ་མོལ་གྱི་བྱུང་རིམ་དང་རྒྱབ་ལྗོངས་སྐོར་དང་འབྲེལ། ཕྱི་ལོ་ ༡༩༧༩ ནས་བོད་རྒྱའི་དབར་ལ་ཐད་ཀར་འབྲེལ་ལམ་འགོ་ཚུགས་ནས་བཟུང་། ད་དབར་ཕན་ཚུན་དབར་གཞུང་འབྲེལ་དང་གཞུང་འབྲེལ་མིན་པའི་འབྲེལ་ལམ་ཚར་༣༠ཙམ་བྱུང་ཡོད་པ་དང། ད་དབར་བོད་ནང་དུ་ལྟ་སྐོར་སྐུ་ཚབ་ཚོགས་པ་ཐེངས་བཞི་ཕེབས་ཡོད་པ། དེ་བཞིན་གྲོས་མོལ་རྟོག་ཞིབ་སྐུ་ཚབ་ཚོགས་པ་ཐེངས་གཉིས་ཕེབས་པ། རྒྱ་ཕྱོགས་ནས་བཤད་པའི་རྩ་དོན་ཁག་དང་བོད་མིའི་རྩ་དོན་ཁག ༢༠༠༢ ད་དབར་འབྲེལ་མོལ་ཐེངས་དགུའི་མཇུག་འབྲས་སོགས་ཀྱི་སྐོར་ལ་གསུངས་གནང་སོང་བ་མ་ཟད། ལྷག་པར་དུ་སྐབས་དེར་སྤྱི་འཐུས་གཅིག་གིས་ ༢༠༡༠ ནས་འབྲེལ་མོལ་བསྐྱར་གསོ་བྱུང་མེད་པ་དང་ ༢༠༡༢ ལོ་ནས་༸གོང་ས་མཆོག་གི
་སྐུ་ཚབ་རྣམ་གཉིས་ལས་གནས་ནས་དགོངས་ཞུས་གནང་པའི་སྐོར་ཞུས་པ་དང་ཆབས་ཅིག སྲིད་སྐྱོང་མཆོག་གིས་བཀའ་ཤག་གསར་པ་འདི་ནས་མ་འོངས་འབྲེལ་མོལ་ཡོང་རྒྱུའི་རྟགས་དང་མཚན་མ་རིགས་གཟིགས་མིན་བཀའ་འདྲི་ཞུས་སོང་བས། དེ་ལ་སྲིད་སྐྱོང་མཆོག་གིས་བཀའ་ཤག་ནས་འབྲེལ་མོལ་བསྐྱར་གསོ་སླད་རྒྱལ་སྤྱིའི་འགྲོ་ལུགས་དང་མཐུན་པའི་སྒོ་ནས་འབད་བརྩོན་སྔར་ལྷག་གནང་མུས་ཡིན་པ་གསུངས་གནང་སོང།
ད་དུང་སྲིད་སྐྱོང་མཆོག་གིས་འབྲེལ་མོལ་བསྐྱར་གསོའི་སླད་བོད་མིའི་སྒྲིག་འཛུགས་ངོས་ནས་ལོ་ལྟར་བོད་རྒྱ་ཞི་མོལ་ལས་དོན་ཚོགས་ཆུང་ཐེངས་གཅིག་གམ་གཉིས་ཚོགས་ནས་ཐབས་བྱུས་ཇི་དགེ་སྐོར་བཀའ་བསྡུར་ཞིབ་ལྷུག་གནང་གི་ཡོད་པ་ཡང་གསུངས་གནང་ཡོད་པ་རེད།
གཞི་རྩའི་སྤྱི་འཐུས་གསར་པ་རྣམས་ལ་འདས་པའི་ཉིན་གྲངས་དྲུག་གི་ཟབ་སྦྱོང་ཁྲོད། ཐོག་མར་སྤྱི་འཐུས་པདྨ་འབྱུང་གནས་ལགས་ནས་བཙན་བྱོལ་བོད་མིའི་བཅའ་ཁྲིམས་སྐོར་ཟབ་ཁྲིད་གནང་ཡོད་པ་དང། དེའི་རྗེས་ནས་སྤྱི་འཐུས་ཐུབ་བསྟན་ལུང་རིག་ལགས་དང་སྤྱི་འཐུས་དགེ་བཤེས་སྨོན་ལམ་ཐར་ཕྱིན་ལགས་ནས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ཕྱོགས་ཀྱི་སྒྲིག་གཞི་ངོ་སྤྲོད། དེ་བཞིན་བོད་མིའི་སྒྲིག་འཛུགས་ཀྱི་སྔོན་རྩིས་འགྲོ་སྟངས་དང་སྔན་རྩིས་འཆར་འབུལ་གནང་ཕྱོགས་སོགས་ཀྱི་སྐོར་ཟབ་ཁྲིད་གནང་འདུག
གསར་འགྱུར་འདིའི་ཐོག་མའི་འགོ་བརྗོད་དུ་ ༼ སྲིད་སྐྱོང་མཆོག་གིས་དབུ་མའི་ལམ་ནི་༸གོང་ས་མཆོག་༸སྐུ་འཚོ་བཞུགས་རིང་བོད་དོན་སེལ་ཆེད་ཀྱི་ཛ་དྲག་སྲིད་བྱུས་ཤིག་ཡིན་པ་གསུངས་གནང་སོང་།༽ ཞེས་ཞུས་ཡོད་པ་དེ་ནི་ནོར་འཛོལ་བྱུང་འདུག་པས་དགོངས་སེལ་དང་སྦྲགས་ནོར་བཅོས་ཞུས་ཡོད།
