བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཁ་སང་དབྱིན་ཡུལ་གྲོས་ཚོགས་འཐུས་མི་རྣམས་དང་མཇལ་མོལ་གྱིས་དབྱིན་ཡུལ་གཞུང་ནས་བོད་ཀྱི་གནད་དོན་ཐོག་འགན་ཁུར་གཙོ་བཞེས་གནང་སྟེ་རྒྱལ་སྤྱིའི་སྡིངས་ཆའི་ཐོག་ནུས་པ་རྒྱ་གང་ཆེ་བཏོན་གནང་གལ་ཡིན་པ་གསུངས་འདུག
དེ་ཡང་དབྱིན་ཡུལ་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པས་གོ་སྒྲིག་འོག་སྲིད་སྐྱོང་མཆོག་གིས་ཡུལ་དེའི་གྲོས་ཚོགས་ཚོགས་ཁང་དུ་བོད་དོན་རྒྱབ་སྐྱོར་ཚོགས་པའི་ཚོགས་འདུར་གཙོ་བཞུགས་ཀྱིས་དབྱིན་ཡུལ་གྲོས་ཚོགས་
འཐུས་མི་ ༡༠ ཙམ་དང་མཇལ་མོལ་གནང་པ་མ་ཟད། ཡུལ་དེར་རྟེན་གཞི་བྱས་པའི་ Henry Jackson Society ཚོགས་པའི་ཚོགས་མི་རྣམས་ལ་མཇལ་འཕྲད་གནང་སྟེ་བཙན་བྱོལ་བོད་མིའི་མང་གཙོའི་འཕེལ་རིམ་དང་འབྱུང་འགྱུར་བོད་རྒྱ་འབྲེལ་མོལ་གྱི་ཁ་ཕྱོགས་སྐོར་གསུང་བཤད་གནང་འདུག དབྱིན་ཡུལ་གྲོས་ཚོགས་འོག་མའི་ཚོགས་གཙོ་སྐུ་ཞབས་ John Bercow མཆོག་མཇལ་མོལ་གནང་པ་མ་ཟད། ལྷག་དོན་སྲིད་སྐྱོང་བློ་བཟང་སེང་གེ་མཆོག་གིས་ཁ་སང་དབྱིན་ཡུལ་གྲོས་ཚོགས་འཐུས་མི་རྣམས་ལ་དབྱིན་ཡུལ་གཞུང་ནས་བོད་ཀྱི་གནད་དོན་ཐོག་འགན་ཁུར་གཙོ་བཞེས་ཀྱིས་རྒྱལ་སྤྱིའི་སྡིངས་ཆའི་ཐོག་ནུས་པ་རྒྱ་གང་ཆེ་བཏོན་གནང་གལ་ཡིན་པ་གསུངས་འདུག
ཡང་སྐབས་དེར་གྲོས་ཚོགས་ཚོགས་གཙོ་སྐུ་ཞབས་ John Bercow ལགས་ཀྱིས་ཁོང་ནས་༸གོང་ས་༸སྐྱབས་མགོན་ཆེན་པོ་མཆོག་གྲོས་ཚོགས་ནང་གདན་འདྲེན་ཞུ་རྒྱུའི་སྐལ་བཟང་གི་གོ་སྐབས་ཐོབ་པ་རྣམས་དགའ
་སྤྲོའི་རྣམ་འགྱུར་མངོན་གསལ་ཐོག་ནས་དྲན་གསོ་དང་སྦྲགས་སྲིད་སྐྱོང་མཆོག་ལའང་དེ་མཚུངས་ད་རེས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ཆེད་ཕེབས་གནང་བར་དགའ་བསུ་ཞུས་པ་དང་ཆབས་ཅིག ཚོགས་གཙོ་མཆོག་ནི་དུས་རྟག་ཏུ་བོད་དོན་འཐབ་རྩོད་ལ་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན་པ་མ་ཟད། མ་འོངས་པའང་མུ་མཐུད་བོད་དོན་ལ་རྒྱབ་སྐྱོར་གནང་རྒྱུ་ཡིན་སྐོར་གསུངས་འདུག
དེ་རྗེས་སྲིད་སྐྱོང་མཆོག་གིས་དུས་ཡུན་སྐར་མ་ ༦།༣༠ ཙམ་ཡོད་པའི་བྷི་བྷི་སི་བརྙན་འཕྲིན་གསར་འགྱུར་ལས་རིམ་ཐོག་ BBC World News television གདན་ཞུས་ཀྱིས་བུད་མེད་གསར་འགོད་པ་ Halda Yakim ལགས་ཀྱི་བཅར་འདྲི་དང་ལེན་གནང་པ་དང་འབྲེལ། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་གནད་དོན་སྐོར་གསུངས་པར་ ང་ཚོའི་ངོས་ནས་མ་འོངས་པར་༸གོང་ས་མཆོག་གི་༸སྐུ་ཕྲེང་ན་རིམ་ཕེབས་པ་ལ་གསོལ་འདེབས་ཞུ་རྒྱུ་དང་དེ་ལྟར་བྱོན་པར་ཡིད་ཆེས་ཡོད་ཅེས་གསུངས་པ་དང་ཆབས་ཅིག མགོན་པོ་མཆོག་ནི་ང་ཚོའི་དབུ་ཁྲིད་བླ་ན་མེད་པ་ཞིག་ཡིན་པ་དང་ད་ལྟའི་ཆར་༸གོང་ས་མཆོག་སྐུ་ཁམས་གསལ་བཞེས་ཡིན་པ་མ་ཟད། ཁྱད་པར་དུ་༸གང་ཉིད་མཆོག་ནི་རྒྱ་ནག་གི་དཔོན་རིགས་མའོ་དང་ཏིང་ཞའོ་ཕིང་སོགས་ལས་ལྷག་པའི་སྐུ་འཚོ་བཞུགས་མཛད་མུས་ཡིན་པ་གསུངས་འདུག
དེ་བཞིན་གསར་འགོད་པས་སྲིད་སྐྱོང་མཆོག་ལ་བོད་ནང་གི་གནས་སྟངས་ཉིན་རེ་བཞིན་ཇེ་སྡུག་ཏུ་འགྲོ་བཞིན་པའི་དུས་མཚམས་འདིར་རྒྱ་ནག་དེ་རྒྱལ་སྤྱིའི་ཁྲོད་དབང་ཤུགས་ཆེ་རུ་འགྲོ་བཞིན་པར་དགོངས་ཚུལ་ཇི་ཡོད་བཅར་འདྲི་ཞུས་པར། སྲིད་སྐྱོང་མཆོག་གིས་རྒྱ་གཞུང་གི་ཕུགས་ཀྱི་དམིགས་ཡུལ་ནི་བོད་དེ་རྒྱ་ནག་གི་མངའ་འོག་ཏུ་དབང་བསྡུ་བྱས་ནས་བོད་རིགས་རྒྱ་རིགས་ལ་འགྱུར་ཐབས་བྱ་རྒྱུ་ཡིན་སྟབས། རྒྱ་གཞུང་གིས་འདས་པའི་ལོ་ ༦༠ ནང་བོད་པའི་དགོན་སྡེ་ཁག་བརྒྱ་ཆ་༩༩ ལྷག་བཙན་དབང་གིས་གཏོར་བཤིག་བཏང་པ་དང། བོད་མིའི་ངོ་བོ་མཚོན་པའི་བོད་ཀྱི་ཐུན་མིན་རིག་གཞུང་གཉིས་རྩ་གཏོར་གཏོང་བཞིན་པ་མ་ཟད། བོད་བརྒྱུད་ནང་བསྟན་སློབ་གཉེར་ཁང་གཙོ་གྲས་གསེར་རྟ་རྫོང་བླ་རུང་ལྔ་རིག་ནང་བསྟན་སློབ་གླིང་གཏོར་བཤིག་གི་ལས་གཞི་རྒྱ་ཆེ་སྤེལ་མུས་ཡིན་པས་བཙུན་མ་གསུམ་གིས་རང་སྲོག་བཅད་ཡོད་པ་མངོན་བཏོན་གནང་འདུག
