གསར་འགྱུར།

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་ལྷོ་ཕྱོགས་གཞིས་ཆགས་ཁག་ནང་ཆེས་ཐོག་མ་གཞུང་འབྲེལ་མཚམས་གཟིགས་གནང་བཞིན་ཡོད་པའི་ཁྲོད་ཕྱི་ཟླ་ ༥ ཚེས་ ༣༡ ནས་ཉིན་གསུམ་རིང་སྦེལ་ཀོབ་ལུགས་བདེ་གཞིས་ཆགས་གཉིས་དང་། དེ་བཞིན་ཟླ་ ༦ ཚེས་ ༣ ནས་ ༥ བར་ཧོན་སུར་རབ་རྒྱས་གླིང་བོད་མིའི་གཞིས་ཆགས་ལ་ཆེད་ཕེབས་ཀྱིས་འཚགས་གཟིགས་ཁག་ལེགས་པར་གྲུབ་རྗེས་དེ་རིང་ནས་ཀོ་ལེ་གྷལ་དོན་ལྡན་གླིང་གཞིས་ཆགས་ནང་འཚམས་གཟིགས་དབུ་འཛུགས་གནང་སོང་།སྲིད་སྐྱོང་མཆོག་དེ་རིང་སྔ་དྲོ་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་སུ་ཕེབས་འབྱོར་བྱུང་སྐབས་ས་གནས་ལྷ་མོ་རུ་ཁག་གིས་བཀྲིས་པའི་རྟགས་རྟེན་འབྲེལ་མཚོན་པའི་ལྷ་མོ་གཟིགས་འབུལ་དང་གྲོ་སོ་ཕྱེ་མར་འདེགས་འབུལ་ཞུས་པར་མ་ཟད་ས་གནས་མང་ཚོགས་དང་གཞུང་དང་གཞུང་འབྲེལ་མིན་པའི་ཚོགས་སྡེ་ སྲིད་སྐྱོང་མཆོག་ཀོ་ལེ་གྷལ་དོན་ལྡན་བོད་མིའི་གཞིས་ཆགས་ནང་ཕེབས་འབྱོར།བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་ལྷོ་ཕྱོགས་གཞིས་ཆགས་ཁག་ནང་ཐེངས་དང་པོ་གཞུང་འབྲེལ་འཚམས་གཟིགས་གནང་བཞིན་ཡོད་པའི་ཁྲོད། ཕྱི་ཟླ་ ༥ ཚེས་ ༣༡ ནས་ཉིན་གསུམ་རིང་སྦེལ་ཀོབ་ལུགས་བདེ་གཞིས་ཆགས་གཉིས་དང་། དེ་བཞིན་ཟླ་བ་འདིའི་ཚེས་ ༣ ནས་ ༥ བར་ཧོན་སུར་རབ་རྒྱས་གླིང་བོད་མིའི་གཞིས་ཆགས་ལ་ཆེད་ཕེབས་ཀྱིས་འཚགས་གཟིགས་ཁག་ལེགས་པར་གྲུབ་རྗེས། དེ་རིང་ནས་ཀོ་ལེ་གྷལ་དོན་ལྡན་གླིང་གཞིས་ཆགས་ནང་འཚམས་གཟིགས་དབུ་འཛུགས་གནང་སོང་།སྲིད་སྐྱོང་མཆོག་དེ་རིང་སྔ་དྲོ་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་སུ་ཕེབས་འབྱོར་བྱུང་སྐབས་ས་གནས་ལྷ་མོ་རུ་ཁག་གིས་བཀྲིས་པའི་རྟགས་རྟེན་འབྲེལ་མཚོན་པའི་ལྷ་མོ་གཟིགས་འབུལ་དང་གྲོ་སོ་ཕྱེ་མར་འདེགས་འབུལ་ཞུས་པ་དང་། དེ་བཞིན་ས་གནས་མང་ཚོགས་དང་གཞུང་དང་གཞུང་འབྲེལ་མ་ཡིན་པའི་ཚོགས་སྡེ་ཁག་དང་དགོན་སྡེ་ཁག་གི་སྐུ་ཚབ་བཅས་ཀྱིས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད། སྲིད་སྐྱོང་མཆོག་གིས་དེ་རྗེས་ས་གནས་ཀྱི་དགོན་སྡེ་ཁག་ལ་གནས་གཟིགས་དབུ་འཛུགས་གནང་སོང་།སྤྱིར་སྲིད་སྐྱོང་སྤེན་པ་ཚེ་རིང་མཆོག་གིས་ཀོ་ལེ་གྷལ་ལ་བོད་མིའི་གཞིས་ཆགས་ནང་ཆེད་ཕེབས་མ་གནང་གོང་ཁ་སང་སྔ་དྲོ་ཧོན་སུར་རབ་རྒྱས་གླིང་གི་མི་མང་ཚོགས་ཁང་དུ་སེར་སྐྱ་མང་ཚོགས་ལ་འཚམས་འདྲིའི་བཀའ་སློབ་གནང་བ་མ་ཟད། ཉིན་རྒྱབ་ཏུ་ལྷོ་ཕྱོགས་ཁག་ལྔའི་རྐང་རྩེད་སྤོལ་ལོའི་རྩེད་འགྲན་གྱི་མཇུག་སྡོམ་མཛད་སྒོའི་སྐུ་མགྲོན་གཙོ་བོར་ཕེབས་ཆེད་ཕེབས་ཀྱིས་བཀའ་སློབ་གནང་ཡོད་པ་རེད། སྲིད་སྐྱོང་མཆོག་གིས་མང་ཚོགས་ལ་གཏམ་བཤད་གནང་བར་བཙན་བྱོལ་བོད་མིའི་སྤྱི་ཚོགས་ཁྲོད་ད་ལྟའི་ཆར་དཀའ་ངལ་ཆེ་ཤོས་ཤིག་ནི་བོད་མིའི་གཞིས་སྒར་ཁག་མ་འོངས་པར་རྒྱུན་གནས་ཐུབ་དང་མི་ཐུབ་ཅེས་པ་དེར་གདོང་ལེན་གནང་རྒྱུ་དེ་ཆགས་ཡོད། དེས་ན་བོད་མིའི་སྒྲིག་འཛུགས་ཀྱིས་དེའི་ཐོག་གྲ་སྒྲིག་གནང་བཞིན་ཡོད་ཅེས་གསུངས་སོང་།སྲིད་སྐྱོང་མཆོག་གིས་སྐབས་དེར་ད་དུང་བཀའ་ཤག་གི་ངོས་ནས་མི་མང་གི་ངལ་བ་སེལ་དགོས་པ་གཟིགས་ཀྱང་མི་མང་གི་འདོད་པ་བསྒྲུབ་ཐུབ་ཀྱི་མེད་པར་ནན་བརྗོད་དང་འབྲེལ། ད་ལྟའི་ཆར་བོད་ནས་ཕེབས་པའི་བོད་མི་རྣམས་ལ་སྡོད་ཁང་མེད་པའི་ངལ་བ་འཕྲད་པ་དེ་ཡོངས་སེལ་གནང་རྒྱུ་ཛ་དྲག་ཆགས་ཡོད་སྐོར་གསུངས་ཡོད།མང་ཚོགས་ཁྲོད་ནས་བཙན་བྱོལ་བོད་མིའི་མང་གཙོའི་གནས་བབ་དང་འབྲེལ་ཆོས་བརྒྱུད་སྤྱི་འཐུས་མི་དགོས་པའི་དགོངས་འཆར་ཕུལ་བ་དང་དེ་བཞིན་བཙན་བྱོལ་བོད་མི་རྣམས་ལ་སྤྱི་འཐུས་ ༡༢ རེ་འོས་འདེམས་གནང་རྒྱུའི་ཐོབ་ཐང་གཅིག་མཚུངས་དགོས་པའི་དགོངས་ཚུལ་ཡང་བཏོན་སོང་བ་དེ་ལྟར་ཡང་། སྲིད་སྐྱོང་མཆོག་གིས་གནད་དོན་དེར་གྲོས་ཚོགས་ནས་ཐུགས་ཐག་གཅོད་དགོས་སྐོར་སོགས་གསུངས་སོང་།སྲིད་སྐྱོང་མཆོག་གིས་ཧོན་སུར་ནང་ཕེབས་སྐབས་ས་གནས་ཀྱི་གྲོང་སྡེ་དང་དགོན་སྡེ་ཁག དེ་བཞིན་སློབ་གྲྭ་སོགས་ལ་ཆེད་ཕེབས་ཀྱིས་འབྲེལ་ཡོད་རྣམས་དང་མཇལ་མོལ་གྱིས་གསུང་བཤད་གནང་བ་མ་ཟད། ༸དཔལ་ལྡན་སྨད་རྒྱུད་གྲྭ་ཚང་གི་གངས་ཅན་རིག་གནས་སློབ་གྲྭར་ཕེབས་ཏེ་དགོན་པར་གུང་སེང་དང་སྟབས་བསྟུན་ནས་ཧོན་སུར་དང་ཀོ་ལེ་གྷལ་གྱི་སློབ་ཕྲུག་རྣམས་ལ་རིན་མེད་ཐོག་བོད་ཀྱི་སྐད་ཡིག་དང་རིག་གཞུང་། ནང་ཆོས་བཅས་སློབ་གཉེར་གནང་རྒྱུའི་གོ་སྐབས་གནང་བར་ཡི་རང་བསྔགས་བརྗོད་གནང་ཡོད།

ཁ་ཉིན་ཕྱི་ཟླ་ ༦ ཚེས་ ༤ ཉིན་གྱི་སྔ་དྲོ་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟུར་པ་སྐུ་ཞབས་ཐུབ་བསྟན་བསམ་འཕེལ་ལགས་རྒྱ་གར་ལྷོ་ཕྱོགས་སྦེལ་ཀོབ་ཏུ་ཡོད་པའི་སྲིད་ཞུ་བའི་བགྲེས་ཤག་ཏུ་གློ་བུར་དུ་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་པ་དང་བསྟུན། ཁ་ཉིན་ཉིན་རྒྱབ་ཆུ་ཚོད་ ༣ ཐོག་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ཀྱིས་གོ་སྒྲིག་འོག་གངས་སྐྱིད་སྲིད་སྐྱོང་ཚོགས་ཁང་དུ་གནས་ཆུང་སྒྲ་དབྱངས་གླིང་གི་དགེ་འདུན་པ་ཁག་ཅིག་དབུ་བཞུགས་ཐོག་བོད་མིའི་སྒྲིག་འཛུགས་ཀྱི་མང་གཙོ་ཀ་བ་གསུམ་གྱི་མཛད་གཙོ་རྣམ་པས་གཙོས་པའི་ལྷན་ཁང་ཁག་གི་དྲུང་ཆེ་ཆུང་རྣམ་པ། དེ་བཞིན་སྲི་ཞུ་བ་ཡོངས་ཀྱིས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟུར་པ་དམ་པ་ཁོང་ལ་མྱ་ངན་གུས་བཏུད་ཞུ་ཕྱིར་ལྷན་འཛོམས་ཀྱིས་བསྔོ་སྨོན་གསུང་འདོན་གནང་བ་མ་ཟད་ཉིན་རྒྱབ་ནས་དབུས་ལས་ཁུངས་ཁག་ལས་མཚམས་བཞག་ཡོད་པ་རེད།སྐབས་དེར་བོད་མིའི་སྒྲིག་འཛུགས་ཀྱི་སྲིད་ཚབ་ཤེས་རིག་བཀའ་བློན་ལྕང་ར་ཐར་ལམ་སྒྲོལ་མ་མཆོག་གིས་སྐུ་ཞབས་དམ་པ་ཐུབ་བསྟན་བསམ་འཕེལ་ལགས་ནི་མཐོ་སློབ་སྙན་གྲགས་ཅན་ནང་སློབ་གཉེར་མཐར་ཕྱིན་པ་གནང་སྟེ་བོད་མིའི་སྒྲིག་འཛུགས་ཀྱི་སྲི་ཞུ་བར་འཛུགས་ཞུགས་གནང་ནས་བསྔགས་པར་འོས་པའི་ཕྱག་ལས་རླབས་ཆེན་གནང་ཡོད། དེ་ནི་མི་ཚེ་ནང་གི་གྲུབ་འབྲས་ཆེན་པོ་ཞིག་ལ་ངོས་འཛིན་ཞུ་གྱི་ཡོད་ཅེས་གསུངས་འདུགད་དུང་བཀའ་བློན་མཆོག་གིས་ང་ཚོ་ཚང་མ་སྐྱེ་འགྲོ་ཀུན་སྐྱེ་བའི་མཐའ་མར་འཆི་དགོས་པ་ནི་ཆོས་ཉིད་ལས་མ་འདས་སྟབས་འཚོ་བའི་རིང་ལ་སྤྱི་ཚོགས་ལ་སྨན་པ་དང་ཡ་རབས་བཟང་སྤྱོད་དང་ལྡན་པའི་ཕྱག་ལས་གནང་ཐུབ་ཚེ་འཆི་བའི་སྐབས་སུའང་འགྱོད་སེམས་མེད་པ་ཞིག་ཡོང་ཐུབ་ཀྱི་རེད། དེས་ན་སྐུ་གཤེགས་དམ་པ་ཁོང་གི་ཕྱག་ལས་བསྔགས་འོས་གནང་ཁག་ལས་མིག་དཔེ་བླངས་དགོས་གལ་ཡིན་པ་སོགས་གསུངས་འདུགགཞི་རྩའི་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཟུར་པ་དང་དྲུང་ཆེ་ཟུར་པ་སྐུ་ཞབས་ཐུབ་བསྟན་བསམ་འཕེལ་ལགས་ནི། ཕྱི་ལོ་ ༡༩༥༦ ཟླ་ ༡༡ ཚེས་ ༢ ཉིན་བོད་ཀྱི་རྒྱལ་ས་ལྷ་སར་འཁྲུངས་ཤིང་། དགུང་ལོ་དྲུག་ལ་ཕེབས་སྐབས་རྒྱ་གར་ལ་བཙན་བྱོལ་དུ་ཕེབས་པ་དང་། དེ་རྗེས་བོད་ཕྲུག་ཁྱི་སྡེ་ནས་སློབ་སྦྱོང་གནང་བ་དང་དེ་ནས་ཀ་སྦུག་ཏུ་རྟེན་གཞི་བྱས་པའི་ Dr. Graham མཐོ་སློབ་ནས་སློབ་མཐར་སོན་དོན་ལྟར་ལྡི་ལི་གཙུག་ལག་སློབ་གཉེར་ཁང་གི་ཁྱབ་ཁོངས་ St. Stephen’s College མཐོ་སློབ་ནང་ལོ་རྒྱུས་རིག་པའི་ཐོག་ཉེ་བའི་གཙུག་ལག་རབ་འབྱམས་པ་དང་ལྡི་ལི་གཙུག་ལག་སློབ་གཉེར་ཁང་དུ་ལོ་རྒྱུས་རིག་པའི་ཐོག་གཙུག་ལག་རབ་འབྱམས་པའི་སློབ་གཉེར་གནང་ཡོད། དེ་རྗེས་ཨ་རིའི་བོད་མིའི་སློབ་ཡོན་ལས་གཞི་འོག་ཨ་རིའི་ནིའུ་ཡོག་གྲོང་ཁྱེར་དུ་ཡོད་པའི་ Columbia གཙུག་ལག་སློབ་གཉེར་ཁང་ནས་གསར་འགོད་ལས་རིགས་ཐོག་སློབ་གཉེར་མཐར་སོན་གནང་ཡོད། ཕྱི་ལོ་ ༡༩༨༠ ཟླ་ ༡༠ ཚེས་ ༡ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་སུ་གནས་བརྒྱད་པ་ཚོད་ལྟའི་ཐོག་དྲིལ་བསྒྲགས་ཨིན་ཡིག་རྩོམ་སྒྲིག་པ་རྒན་དྲུང་དུ་བསྐོ་གཞག་གནང་བ་ནས་བཟུང་བོད་མིའི་སྒྲིག་འཛུགས་ཀྱི་བསྟི་གནད་དང་བལ་ཡུལ། ཨ་རི་སོགས་སུ་ཐེག་པ་རིམ་འཛེགས་ཀྱིས་ཕྱི་ལོ་ ༡༩༩༩ ལོ་ནས་ཕྱི་ལོ་ ༢༠༡༢ བར་ཕྱི་དྲིལ་ལས་ཁུངས་ཀྱི་དུང་ཆེ་དང་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་བཅས་ཀྱི་ཐུགས་འགན་བཞེས་ཏེ་བོད་མིའི་སྒྲིག་འཛུགས་ཀྱི་ལས་ཁུངས་མ་ལག་གཉིས་སུ་ཁྱོན་ཞབས་ལོ་ ༣༨ ལྷག་གི་རིང་སྲི་ཞུ་ལེགས་པར་བསྒྲུབས་ཡོད།ལྷག་པར་དུ་སྐུ་གཤེགས་དམ་པ་ཁང་དེ་སྔ་ཕྱི་ལོ་ ༡༩༨༥ ལོར་བོད་ནང་དུ་བདེན་དོན་ཚོལ་ཞིབ་ཀྱི་སྐུ་ཚབ་ཁོངས་སུ་ཕེབས་མྱོང་ཡོད་པ་རེད།དམ་པ་དེ་ཉིད་ཀྱི་བརྩམས་ཆོས་ཁོངས་ལས་ཨིན་སྐད་ཐོག Falling Through the Roof དང་། The Dalai Lamas of Tibet དང་། Copper Mountain སོགས་དང་། ཁོང་གིས་བོད་ཀྱི་རྩ་དོན་སྐོར་བརྩམས་པའི་དཔྱད་རྩོམ་མང་དག་ཅིག་རྒྱལ་སྤྱིའི་གསར་ཤོག་གྲགས་ཅན་དུ་མར་འཁོད་ཡོད། འབྲེལ་ཡོད་པར་གྱི་བདག་དབང་བོད་མིའི་སྒྲིག་འཛུགས།

༸རྒྱལ་བའི་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མ་ཎི་དུང་སྒྲུབ་དབུ་འཛུགས་གནང་བ་དང་བསྟུན་དེ་རིང་སྔ་དྲོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཐེག་ཆེན་ཆོས་གླིང་གཙུག་ལག་ཁང་དུ་ཆིབས་བསྒྱུར་བཀྲིན་བསྐྱངས་ཏེ་ཚོགས་མགོན་དུ་དབུ་བཞུགས་མཛད་སོང་།རྩ་བའི་ཉེ་ལམ་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བོད་རིགས་གཞོན་སྐྱེས་རྣམས་ལ་ཉིན་གཉིས་ཀྱི་འཕགས་པ་སྤྱན་རས་གཟིགས་ཀྱི་བཀའ་དབང་དང་༸རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་བཀའ་ཆོས་བཀའ་དྲིན་སྩལ་སྐབས་ཇོ་བོ་ཝ་ཏི་བཟང་པོའི་སྐུ་བརྙན་གཙུག་ལག་ཁང་དུ་གདན་འདྲེན་ཞུས་ཏེ། འཕགས་པ་སྤྱན་རས་གཟིགས་ཀྱི་ཆོ་གའི་ཐོག་ནས་མ་ཎི་རིལ་བུ་གསོག་སྒྲུབ་གནང་བཞིན་ཡོད་པ་རེད། གཞི་རྩའི་ལོ་ལྟར་ས་ག་ཟླ་བའི་དུས་ཆེན་ནམ་ཡིན་ལ་མ་ཎི་དུང་སྒྲུབ་གསོག་གནང་གི་ཡོད་པ་དང་། དེའང་སྔ་དྲོ་ཚོུད་ ༦༌༣༠ ནས་ ༡༡༌༣༠ བར་དང་ཉིན་རྒྱབ་ཚོུད་ ༡༌༣༠ ནས་ ༥ བར་ཚོགས་ཀྱི་ཡོད་པ་རེད།གཤམ་དུ་རྣམ་གྲྭ་ཕན་བདེ་ལེགས་བཤད་གླིང་གི་སློབ་གྲྭའི་དཔེ་ཁྲིད་སློབ་དཔོན་དགེ་བཤེས་བློ་བཟང་གྲགས་པ་ལགས་ལ་མ་ཎི་དུང་སྒྲུབ་ཀྱི་གོ་དོན་དང་ཚོགས་དམིགས་སོགས་དང་འབྲེལ་བའི་དམིགས་བསལ་བཅར་འདྲི་ཞུས་པའི་བརྙན་པར་གྱི་དྲ་ཐག་བཀོད་ཡོད་པས་གསན་གཟིགས་ཡོང་བ་ཞུ། https://www.youtube.com/watch?v=yzJS1k-aoQE

ཁ་སང་ཕྱི་ཟླ་ ༦ ཚེས་ ༢ ཉིན་ཨ་རིའི་ཕྱི་སྲིད་ལྷན་ཁང་གིས་ཕྱི་ལོ་ ༢༠༢༡ ལོའི་རྒྱལ་སྤྱིའི་ཆོས་དད་རང་དབང་གི་ལོ་འཁོར་སྙན་ཐོ་འདོན་སྤེལ་གནང་བ་དང་སྦྲགས་ཏེ་རྒྱ་གཞུང་གིས་བོད་མིའི་ཆོས་དད་རང་དབང་ལ་མུ་མཐུད་རྡོག་རོལ་གཏོང་བཞིན་པར་མངོན་གསལ་གནང་འདུགའདས་ལོའི་རྒྱལ་སྤྱིའི་ཆོས་དད་རང་དབང་གི་སྙན་ཐོའི་ནང་རྒྱལ་ཁབ་དང་ས་ཁུལ་ ༢༠༠ ཙམ་གྱི་ཆོས་ལུགས་རང་དབང་གི་གནས་བབས་ལ་ཞིབ་འཇུག་གནང་སྟེ་སྙན་ཐོ་འདོན་སྤེལ་གནང་ཡོད་པ་དང་།  ཁ་སང་སྙན་ཐོ་འདོན་སྤེལ་གྱི་གསར་འགོད་གསལ་བསྒྲགས་སྐབས་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Antony Blinken མཆོག་གིས་ཕྱི་ལོ་ ༢༠༢༡ ལོའི་སྙན་ཐོ་ནང་རྒྱལ་ཁབ་ཁག་ཅིག་ཏུ་ཆོས་ལུགས་རང་དབང་གི་གནས་སྟངས་ཐད་ཡར་རྒྱས་ཀྱི་རྣམ་པ་ཐོན་ཡོད་ཀྱང་། འཛམ་གླིང་གི་རྒྱལ་ཁབ་མང་པོ་ཞིག་ཏུ་སྲིད་གཞུང་ནས་མང་ཚོགས་ཀྱི་གཞི་རྩའི་རང་དབང་ལ་གུས་བརྩི་མེད་པར་མི་མང་གི་ཆོས་ཕྱོགས་ཀྱི་བྱེད་སྒོ་ཁག་ལ་དམ་དྲག་བྱས་དང་བྱེད་བཞིན་ཡོད་པ་མཐོང་རྒྱུ་ཡོད་སྟབས། ཨ་རི་གཞུང་གིས་འཛམ་གླིང་གི་ཆོས་ལུགས་རང་དབང་གོང་མཐོར་སླད་མུ་མཐུད་རྒྱལ་ཁབ་གཞན་གྱི་གཞུང་དང་ཚོགས་སྡེ་ཁག་དང་ལྷན་ཕྱག་ལས་གནང་རྒྱུ་ཡིན་པར་གསུངས་ཡོད། སྙན་ཐོ་ནང་བོད་ཀྱི་སྡེ་ཚན་ནང་ཆོས་ལུགས་ཀྱི་མི་འབོར་གྲངས་རྩིས་དང་སྲིད་གཞུང་གི་ཆོས་དད་རང་དབང་ཐད་བརྩི་མཐོང་། སྤྱི་ཚོགས་ཀྱི་ཆོས་དད་རང་དབང་ལ་གུས་བཀུར་གྱི་གནས་བབས།  དེ་བཞིན་ཨ་རི་གཞུང་ནས་འཛིན་པའི་སྲིད་བྱུས་བཅས་སྡེ་ཚན་བཞིར་ཆ་བགོས་གནང་འདུག དེའི་ནང་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ནང་མང་ཚོགས་ནས་ཆོས་དད་རང་དབང་ཡོངས་སུ་ལོངས་སྤྱོད་བྱ་རྒྱུའི་རང་དབང་ཡོད་ལུགས་འཁོད་ཡོད་ཀྱང་དངོས་ཡོད་ཐོག་རྒྱ་གཞུང་གིས་མང་ཚོགས་ཀྱི་ཆོས་ཕྱོགས་ཀྱི་བྱེད་སྒོ་ཁག་ལ་དམ་དྲག་བྱེད་ཀྱི་ཡོད་པ་དང་། དེ་བཞིན་བོད་རང་སྐྱོང་ལྗོངས་ཟེར་བ་གཙོས་བོད་ཀྱི་ས་ཁུལ་གཞན་ཁག་ནས་གྲྭ་བཙུན་གཙོ་བོར་གྱུར་པའི་བོད་མི་རྣམས་ཆོས་ཕྱོགས་ཀྱི་བྱེད་སྒོ་དང་འབྲེལ་གང་བྱུང་དུ་འཛིན་བཟུང་བཀག་སྐྱིལ་གྱིས་སྡུག་སྦྱོང་མནར་གཅོད་ཚད་མེད་བཏང་བར་མ་ཟད།  ཁག་ཅིག་གར་སོང་ཆ་མེད་དུ་བཏང་བའི་ཁོངས་ཆོས་ལུགས་རང་དབང་རྡོག་རོལ་དང་འབྲེལ་༸ཀུན་གཟིགས་༸པཎ་ཆེན་རིན་པོ་ཆེའི་གནད་དོན་འབུར་འདོན་གནང་བ་དང་ཆབས་ཅིག བོད་བརྒྱུད་ནང་བསྟན་དེ་རྒྱ་ནག་ཅན་དུ་བསྒྱུར་རྒྱུའི་སྲིད་བྱུས་མུ་མཐུད་སྤེལ་བཞིན་ཡོད་པ་སོགས་གསལ་འདོན་གནང་འདུག ད་དུང་རྒྱ་གཞུང་གིས་མུ་མཐུད་བོད་པའི་དགོན་པའི་གནང་སྒོར་ཐེ་གཏོགས་བྱས་ཏེ་རྒྱ་གཞུང་གིས་མོས་མཐུན་ཡོད་པའི་དགེ་འདུན་པ་དགོན་པའི་ལྟ་རྟོག་སླད་བསྐོ་གཞག་དང་གྲྭ་བཙུན་རྣམས་ལ་མུ་མཐུད་ཆབ་སྲིད་ཀྱི་སློབ་གསོ་སྤྲོད་པ་དང་། དེ་བཞིན་བོད་པའི་དགོན་སྡེ་དང་ཆོས་ཕྱོགས་ཀྱི་བསྟི་གནས་ཁག་དེབ་སྐྱེལ་ཐད་སྟངས་འཛིན་བྱེད་བཞིན་སྐོར་མངོན་གསལ་གནང་འདུག གཞན་ཡང་སྙན་ཐོ་དེའི་ནང་།  གྲྭ་བཙུན་གཙོས་བོད་མི་རྣམས་ལ་མགྲོན་ཁང་དང་མོ་ཊ་གླ་རྒྱུ་སོགས་ལ་དཀའ་ངལ་འཕྲད་པ་དང་ལྷག་པར་དུ་ལས་ཀའི་བརྒྱུད་རིམ་ཁྲོད་དབྱེ་འབྱེད་བྱས་དང་བྱེད་མུས་ཡིན་པའི་གནད་དོན་མངོན་གསལ་གནང་འདུག་པར་མ་ཟད་རྒྱ་ནག་གཞུང་གིས་ཧན་ནང་པ་མང་པོ་ཞིག་ནས་བོད་བརྒྱུད་ནང་བསྟན་ཐོག་དོ་སྣང་ཤུགས་ཆེར་གནང་བཞིན་པའི་ཁྲོད་འདིར་ཧན་ནང་པ་ཚོ་བོད་པའི་དགོན་སྡེ་ཁག་ལ་བསྐྱོད་རྒྱུའང་རྒྱ་གཞུང་གིས་སྐབས་རེ་དམ་དྲག་བྱེད་ཀྱི་ཡོད་པར་མངོན་གསལ་གནང་ཡོད།རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་གཞུང་ཚབ་ཆེན་མོ་སྐུ་ཞབས་ Rashad Hussain ལགས་ཀྱིས་ཁ་སང་གསར་འགོད་གསལ་བསྒྲགས་སྐབས་སྲིད་གཞུང་མང་པོ་ཞིག་ནས་དབྱེ་འབྱེད་ཀྱི་སྒྲིག་གཞི་ལག་བསྟར་བྱེད་དེ་མང་ཚོགས་ཀྱི་ཆོས་དད་རང་དབང་ལ་རྡོག་རོལ་དང་།  དེའི་ཁྲོད་རྒྱ་གཞུང་གིས་མུ་མཐུད་བོད་མིའི་ཆོས་དད་རང་དབང་ལ་རྡོག་རོལ་དང་བོད་མིའི་རིག་གཞུང་དང་སྐད་ཡིག་གོང་མཐོར་གཏོང་མཁན་གྱི་གང་ཟག ལྷག་དོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་ཉར་ཚགས་གནང་མཁན་སོགས་འཛིན་བཟུང་གིས་མནར་གཅོད་བཏང་བར་འགྲེལ་བརྗོད་ཀྱིས་དེར་སྐྱོན་བརྗོད་གནང་འདུག གཞི་རྩའི་རྒྱ་གཞུང་གིས་བོད་ནང་བོད་མིའི་ཚོའི་ཆོས་ལུགས་རང་དབང་ལ་མུ་མཐུད་རྡོག་རོལ་གཏོང་བཞིན་པའི་གནད་དོན་རིམ་པ་འཐོན་བཞིན་པར་མ་ཟད།  ལྷག་དོན་ཁ་སྔོན་རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་ནག་རྒྱལ་ཡོངས་ཆོས་ལུགས་ལས་དོན་ལྷན་ཁང་དང་དཔལ་འབྱོར་ལྷན་ཁང་གཉིས་ཀྱིས་ཆོས་ཕྱོགས་དང་འབྲེལ་བའི་དཔལ་འབྱོར་གྱི་ལས་དོན་ལ་ཚོད་འཛིན་དམ་དྲག་གི་ཁྲིམས་སྒྲིག་ཅིག་ཁ་སྔོན་ཕྱི་ཚེས་ ༡ ནས་ལག་བསྟར་བྱ་རྒྱུའི་གསལ་བསྒྲགས་སྤེལ་ཡོད་པ་དང་བསྟུན་བོད་ནང་གི་དགོན་སྡེ་ཁག་ལ་སྔར་ལྷག་དམ་དྲག་གི་དཀའ་ངལ་འཕྲད་ངེས་ཡིན་པར་གསུངས་ཡོད།

ཁེ་ན་ཌའི་ Ontario མངའ་ཁུལ་གྱི་ Parkdale ས་གནས་སུ་གནས་སྡོད་བོད་རིགས་བེུད་བུ་འཁྲིད་དཀར་པོ་ཆེ་ལགས་སླར་ཡང་ས་གནས་དེའི་གྲོས་ཚོགས་ཀྱི་འཐུས་མིར་འོས་འདེམས་བྱུང་ཡོད་པ་རེད། ཁ་སང་ Toronto Star གསར་ཁང་གིས་གནས་ཚུལ་སྤེལ་བར་བུ་འཁྲིད་ལ་དཀར་པོ་ཆེ་ལགས་སུ་ Parkdale High ས་གནས་གྲོས་ཚོགས་ཀྱི་འོས་བསྡུའི་ཁྲོད་བརྒྱ་ཆ་ ༥༣.༣ འམ་འོས་གྲངས་ ༥༩༦༤ བཅས་ཚད་མཐོའི་ཐོག་ནས་སླར་ཁེ་ན་ཌའི་ Parkdale High ས་གནས་ཀྱི་གྲོས་ཚོགས་འཐུས་མིེར་འདེམས་ཐོན་བྱུང་ཡོད་པ་རེད། བུ་འཁྲིད་དཀར་པོ་ཆེ་ལགས་ནི་ཁེ་ན་ཌའི་ཆབ་སྲིད་པ་ཞིག་ཡིན་པ་དང་། Ontario མངའ་ཁུལ་ཀྱི་ New Democratic ཆབ་སྲིད་ཚོགས་པའི་ཚོགས་མི་ཡིན་པ་རེད། ཁོང་དེ་སྔ་ཕྱི་ལོ་ ༢༠༡༨ ཟླ་ ༧ ནས་བཟུང་ Parkdale ས་གནས་གྲོས་ཚོགས་འཐུས་མིའི་འགན་བཞེས་ཀྱི་ཡོད་པ་དང་། སྐབས་དེར་ཕྱིའི་རྒྱལ་ཁབ་ཁག་དང་ལྷག་པར་དུ་བྱང་ཨ་རི་ནང་དུ་བོད་རིགས་ཤིག་དེ་ལྟ་བུའི་ཆབ་སྲིད་ཀྱི་སྡིངས་ཆ་ཆེ་གྲས་ནང་ཕེབས་པ་ཆེས་ཐོག་མ་ ཆགས་ཀྱི་ཡོད་པ་རེད། ཁོང་གིས་ལོ་ ༡༤ ལྷག་རིང་ས་གནས་མི་མང་གི་འཕྲོད་བསྟེན་དང་ཤེས་ཡོན་གཙོས་གལ་ཆེའི་ལས་དོན་མང་དག་ཅིག་གི་གཙོ་འགན་བཞེས་ཡོད་པ་མ་ཟད་རྒྱལ་སྤྱིའི་བོད་དོན་འབྲེལ་མཐུད་ལས་ཁང་གི་ལམ་སྟོན་ཚོགས་ཆུང་གི་ཚོགས་མི་གཙོས་བོད་རིགས་ཚོགས་པ་མི་ཉུང་བའི་ནང་ཚོགས་མི་སོགས་ཀྱི་ཐུགས་འགན་བཞེས་མྱོང་ཡོད་པ་རེད། གཞི་རྩའི་ཁེ་ན་ཌའི་ Ontario མངའ་ཁུལ་གྱི་ Parkdale-High Park ས་གནས་ནང་འོས་ཤོག་འཕེན་པར་འོས་ཆོས་ལྡན་པའི་མི་གྲངས་ ༨༥༦༣༠ ཡོད་པ་དང་ཁུལ་དེའི་ནང་ཁ་སང་ཁེ་ན་ཌའི་དགོང་དྲོ་ཆུ་ཚོད་ ༩།༢༨ བར་འོས་བསྡུའི་ས་ཚིགས་ཁྱོན་བསྡོམས་ ༡༢༤ ཡོད་པའི་ནང་ནས་ New Democratic ཆབ་སྲིད་ཚོགས་པའི་འོས་བསྡུའི་ས་ཚིགས་ ༢༥ ནང་རྒྱལ་ཁ་ཐོབ་པའམ་མང་མོས་འོས་ཐོབ་པར་བརྩིས་འདུག

དེ་རིང་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་རིགས་གཞོན་སྐྱེས་རྣམས་ལ་ཉིན་གཉིས་ཀྱི་འཕགས་པ་སྤྱན་རས་གཟིགས་ཀྱི་བཀའ་དབང་དང་༸རྗེ་ཙོང་ཁ་པ་ཆེན་པོས་མཛད་པའི་རྟེན་འབྲེལ་བསྟོད་པའི་བཀའ་ཆོས་མཇུག་སྒྲིལདང་སྦྲགས་ཏེ་༸གོང་ས་མཆོག་གིས་༸རྒྱལ་བ་རིན་པོ་ཆེས་རྩ་ཆེན་པོ་རྩིས་ས་དེ་བྱང་ཆུབ་ཀྱི་སེམས་ཡིན་སྟབས། ཁྱེད་རང་ཚོས་ངོས་ལ་རྩིས་པོ་ཡོད་ན་བྱང་ཆུབ་སེམས་དང་སྟོང་ཉིད་ཀྱི་ལྟ་བ་སྒོམས་ཤིག་ཅེས་བཀའ་སྩལ་སོང་། དེ་རིང་སྔ་དྲོ་ཕྱག་ཚོད་ ༧ པ་མ་ཟིན་ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་༸རྒྱལ་བའི་ཕོ་བྲང་ནས་ཕྱི་ནང་གི་དད་ལྡན་མང་ཚོགས་སྟོང་ཚོགས་བརྒལ་བའི་འདུ་འཛོམས་གནང་ཡུལ་ཐེག་ཆེན་ཆོས་གླིང་དུ་གཙུག་ལག་ཁང་དུ་ཆིབས་བསྒྱུར་བཀྲིན་བསྐྱངས་ཏེ་གདོང་ལྔས་གཏེགས་པའི་གསེར་གྱི་ཁྲི་འཕང་མཐོན་པོར་༸ཞབས་སོར་བདེ་བར་འཁོད་མཚམས་སུ་སྤྱན་རས་གཟིགས་ཀྱི་བཀའ་དབང་དངོས་གཞི་དབུ་འཛུགས་མཛད་པ་དང་འབྲེལ། ༸གོང་ས་མཆོག་གིས་འཕགས་པ་སྤྱན་རས་གཟིགས་ནི་ནང་པའི་ལུང་པ་མང་པོར་རྩ་ཆེན་པོ་རྩིས་ཀྱི་ཡོད་པ་དང་རྒྱ་ནག་ལྟ་བུ་ནང་དུའང་ཨ་ཝ་ལོ་ཀི་ཏེཤ་ཝ་ར་ཟེར་ནས་རྩ་ཆེན་པོ་རྩིས་ཀྱི་ཡོད་མ་ཟད་བོད་ལ་ཆ་བཞག་ན་འཕགས་པ་སྤྱན་རས་གཟིགས་ཀྱི་འདུལ་ཞིང་ཆགས་ཏེ་སྔར་ཆོས་རྒྱལ་ཚོའི་སྐབས་ནས་དམིགས་བསལ་གྱི་འབྲེལ་བ་ཡོད་པར་བཀའ་སྩལ་མཛད་སོང་། དེ་བཞིན་མགོན་པོ་༸གང་ཉིད་མཆོག་གིས་བཀའ་དབང་སྩལ་བའི་ཁྲོད་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་གཉིས་སྒོམ་པས་སེམས་ལ་ཞི་བདེ་ཡོང་གི་ཡོད་པ་དང་། སེམས་ལ་ཞི་བདེ་ཡོང་བའི་རྒྱུ་རྐྱེན་ལ་བརྟེན་ནས་ལུས་པོ་བདེ་ཐང་ཡོང་གི་ཡོད་སྟབས། སེམས་ལ་ཞི་བདེ་འཐོབ་རྒྱུ་དེ་ནི་འཕྲོད་བསྟེན་ལེགས་ཤོས་རེད། ཁྱེད་རང་ཚོའི་སེམས་ཀྱི་ཞི་བདེར་དོ་སྣང་བྱེད་དགོས་ཞེས་ལམ་སྟོན་བཀྲིན་ཆེ་བ་སྩལ་ཡོད།༸གོང་ས་མཆོག་གིས་ཁྱེད་རང་ཚོས་གལ་ཏེ་༸རྒྱལ་བ་རིན་པོ་ཆེ་བླ་མར་བརྩིས་ཀྱི་ཡོད་ན། ༸རྒྱལ་བ་རིན་པོ་ཆེས་རྩ་ཆེན་པོར་བརྩི་ས་དེ་བྱང་ཆུབ་ཀྱི་སེམས་ཡིན། ཁྱེད་རང་ཚོས་ངོས་ལ་རྩིས་པོ་ཡོད་ན་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་སྒོམས་ཤིག་ཅེས་བཀའ་སྩལ་ཡོད།ད་དུང་མགོན་༸གང་ཉིད་མཆོག་གིས་ངོས་རང་རྒྱ་གར་ནང་བསྡད་ནས་སེམས་ཅན་གྱི་འགྲོ་དོན་རྒྱ་ཆེན་པོ་བྱེད་ཐུབ་པ་ཆགས་ཡོད་པ་དེ་ལྟར་ནའང་བོད་ནང་ཡོད་པ་ཡིན་ན་དེ་ལྟར་གནང་དཀའ་སྐོར་བཀའ་སྩལ་བ་དང་འབྲེལ། ཁྱེད་རང་ཚོས་རང་ཉིད་ཀྱི་ངོ་ཤེས་པ་ཚོར་༸སྐུ་མདུན་གྱིས་སེམས་བཟང་པོ་དང་ཀུན་ལ་ཕན་སེམས། དེ་བཞིན་མ་ཎི་བགྲོངས་ཤིག་ཅེས་བཀའ་སྩལ་སྐོར་ལན་སྤྲོད་དགོས་ཞེས་བཀའ་སྩལ་མཛད་སོང།སྤྱིར་ཐེངས་འདིའི་ཆོས་འབྲེལ་ཐོག་རྒྱ་གར་གཙོས་པའི་ཨ་རི་ནས་སློབ་གྲྭ་དང་མཐོ་སློབ་འགྲིམ་བཞིན་པའི་བོད་ཕྲུག་ ༣༠༠༠ མན་ཙམ་ནས་མཉམ་ཞུགས་གནང་ཡོད་པ་དང་། ཉིན་གཉིས་ཀྱི་བཀའ་ཆོས་རྣམས་རྣམ་ཀུན་ལྟར་སྐད་ཡིག་སྣ་མང་ཐོག་ཐད་སྲིང་གནང་ཡོད།དེ་རིང་༸གོང་ས་མཆོག་གིས་ཐུགས་རྗེ་ཆེན་པོའི་དབང་དངོས་གཞི་སྩལ་སྒྲུབ་རྗེས་ངོས་ཀྱི་དམིགས་འོག་ཏུ་ཡོད་པའི་བོད་ཀྱི་རྒྱ་ཆེ་མི་མང་རྣམས་ནི་༸རྒྱལ་བ་རིན་པོ་ཆེར་ཡིད་ཆེས་རྩེ་གཅིག་བྱེད་མཁན་ཤ་སྟག་ཆགས་ཡོད་ཁྱེད་རང་ཚོར་དབང་ཐོབ་ཡོད་ལ། ངོས་ལ་རྒྱ་རིགས་དད་མོས་ཡོད་མཁན་ཚོས་འཕགས་པ་སྤྱན་རས་གཟིགས་ཀྱི་བྱིན་བརླབས་འཇུག་པར་ཤོག་ཟེར་ནས་སྨོན་ལམ་སྐྱོན་གྱི་ཡོད་ཅེས་བཀའ་སྩལ་བ་དང་སྦྲགས། ཁྱེད་རང་ཚོ་ཚང་མ་བློ་བདེ་པོ་དང་སེམས་སྐྱིད་པོ་བགྱིས་ཤིག ངོས་རང་ལོ་ན་ ༨༧ ལ་བསླེབས་ཡོད་པ་དང་ད་དུང་ལོ་བཅོ་ལྔ་ཉི་ཤུ་བསྡད་རྒྱུ་ཡིན། བོད་ནང་གི་དཀའ་ངལ་དེ་རིམ་པས་སེལ་ཐུབ་ཀྱི་རེད་ཅེས་ཀྱི་བཀའ་སྩལ་སོང་། ༸སྐུ་པར་ཁག་ཅིག་གི་བདག་དབང་༸སྐུ་སྒེར་ཡིག་ཚང་།

རྒྱ་ནག་རྒྱལ་ཡོངས་ཆོས་ལུགས་ལས་དོན་ལྷན་ཁང་དང་དཔལ་འབྱོར་ལྷན་ཁང་གཉིས་ཀྱིས་ཆོས་ཕྱོགས་དང་འབྲེལ་བའི་དཔལ་འབྱོར་གྱི་ལས་དོན་ལ་ཚོད་འཛིན་དམ་དྲག་གི་ཁྲིམས་སྒྲིག་ཞིག་ཁ་སང་ཕྱི་ཚེས་ ༡ ནས་ལག་བསྟར་བྱ་རྒྱུའི་གསལ་བསྒྲགས་སྤེལ་བ་དང་བསྟུན་བོད་ནང་གི་དགོན་སྡེ་ཁག་ལ་སྔར་ལྷག་དམ་དྲག་གི་དཀའ་ངལ་འཕྲད་ངེས་ཡིན་པར་བརྗོད་འདུགཁ་སང་ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་ནག་གཞུང་གིས་བོད་བརྒྱུད་ནང་བསྟན་གྱི་དགོན་སྡེ་ཁག་ལ་སྟངས་འཛིན་སླད་དགོན་པའི་དཔལ་འབྱོར་གཙོས་ལས་དོན་མཐའ་དག་ལ་ཚོད་འཛིན་གྱི་ཁྲིམས་སྒྲིག་གསར་པ་གཏན་འབེབས་བྱས་ཡོད་པ་དང་། ཐེངས་འདིའི་ཁྲིམས་སྒྲིག་ནི་འདི་ལོའི་ཕྱི་ཟླ་ ༣ པའི་ནང་དྲ་རྒྱའི་ཐོག་ཆོས་ཕྱོགས་ཀྱི་གནས་ཚུལ་ལ་སྟངས་འཛིན་བྱ་རྒྱུའི་ཁྲིམས་སྒྲིག་ལག་བསྟར་བྱ་རྒྱུའི་གསལ་བསྒྲགས་སྤེལ་བའི་རྗེས་སུ་ཆོས་ཕྱོགས་དང་འབྲེལ་བའི་ཁྲིམས་སྒྲིག་ཐེངས་གཉིས་པ་དེ་ཆགས་ཀྱི་ཡོད་པར་བཤད་འདུག སྤྱིར་ཁྲིམས་སྒྲིག་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་གི་ཆོས་ལུགས་དང་འབྲེལ་བའི་ས་ཚིགས་ཡོངས་ལ་ཁྱབ་ཀྱི་ཡོད་ཚུལ་ཟེར་ཡོད་པ་དེ་ལྟར་ནའང་། བོད་ནང་རྒྱུན་ལྡན་ནས་སྤྱི་ཚོགས་དང་རིག་གཞུང་གཉིས་ཀའི་ཐད་དགོན་སྡེ་ཁག་དང་བཙུན་དགོན་ཁག་གིས་ཐུགས་འགན་ཆེན་པོ་བཞེས་ཀྱི་ཡོད་པའི་གནས་སྟངས་ལ་གཞིགས་ཏེ་ཐེངས་འདིའི་ཁྲིམས་སྒྲིག་དེའི་ཤུགས་རྐྱེན་བོད་ནང་ཆེས་ཆེར་ཐེབས་ངེས་ཡིན་སྐོར་གསུངས་འདུག་པ་མ་ཟད། ཁྲིམས་སྒྲིག་དེའང་རྒྱ་གཞུང་གིས་བོད་བརྒྱུད་ནང་བསྟན་དེ་ཉིད་ཀྲུང་གོ་ཅན་དུ་བསྒྱུར་རྒྱུའི་ལས་གཞི་མྱུར་ཚད་ཐོན་པོའི་སྒོ་ནས་ལག་བསྟར་ཡོང་ཐབས་དང་མཐུན་པ་ཞིག་བཟོས་ཡོད་པ་གསུངས་འདུག དེ་བཞིན་བོད་ཀྱི་དགོན་སྡེ་ཁག་གིས་སྲོལ་རྒྱུན་གྱི་ཐོག་ནས་ཆོས་ལུགས་དང་སྤྱི་ཚོགས་ཀྱི་དགོས་མཁོ། དགོན་པའི་སློབ་གཉེར་གྱི་གལ་གནད་ལ་གཞིགས་ནས་རང་དབང་གི་དབང་ཚད་ལྡན་པའི་ལས་དོན་གཉེར་ཀྱི་ཡོད་ཀྱང་ད་ཆ་ཁྲིམས་སྒྲིག་དེའི་ཐོག་ནས་རྒྱ་ནག་གཞུང་དང་ཤེས་ཡོན་ལྟེ་གནས་ཀྱིས་གང་བཤད་ལ་ཉན་དགོས་སྐོར་བཀོད་པ་དང་འབྲེལ། སྤྱིར་རྒྱ་ནག་གཞུང་གིས་དེ་སྔ་ཡང་དགོན་སྡེ་ཁག་གི་དཔལ་འབྱོར་གྱི་ལས་དོན་ལ་སྟངས་འཛིན་གྱི་ཐབས་ཤེས་བྱས་ཡོད་ཀྱང་དེར་དོན་འབྲས་སོན་མེད་པར་བཤད་འདུག རྒྱལ་སྤྱིའི་བོད་དོན་ལས་འགུལ་ཁང་གིས་རྒྱ་ནག་གཞུང་གིས་ཆོས་ཕྱོགས་དང་འབྲེལ་བའི་དཔལ་འབྱོར་གྱི་ལས་དོན་ལ་ཚོད་འཛིན་དམ་དྲག་གི་ཁྲིམས་སྒྲིག་དེ་ ༢༠༡༠ ལོར་ཚོད་ལྟ་བྱས་ཡོད་ཀྱང་རྒྱ་ནག་གཞུང་གི་རེ་བ་བཞིན་དོན་འབྲས་སོན་མེད་པ་དང་ལོ་ངོ་བཅུའི་གོང་ལ་ཚོད་ལྟ་བྱས་པའི་ཁྲིམས་སྒྲིག་ནང་ལེ་ཚན་ ༩ དང་དོན་ཚན་ ༤༠ ཡོད་པ་དང་། ཁྲིམས་སྒྲིག་གསར་པའི་ནང་དཔལ་འབྱོར་དང་འབྲེལ་བའི་ལེ་ཚན་གསར་པ་འཇུག་རྒྱུ་མ་ཟད་དོན་ཚན་ཁག་ཞིབ་ཕྲར་བཀྲལ་བའི་ལེ་ཚན་ ༡༠ དང་དོན་ཚན་ ༥༥ ཡོད་པ་བཀོད་འདུག ཕྱི་ལོ་ ༢༠༡༠ ལོར་ཚོད་ལྟ་བྱས་པའི་ཁྲིམས་སྒྲིག་ནང་ཆོས་ཕྱོགས་ཀྱི་ལས་དོན་ཐད་དཔལ་འབྱོར་ལྷན་ཁང་གི་འགན་སྐོར་ལ་དམིགས་བསལ་གང་ཡང་བཀོད་མེད་ཀྱང་ཁྲིམས་སྒྲིག་གསར་པའི་ནང་ཆོས་ཕྱོགས་དང་འབྲེལ་ཚོགས་སྡེ་ཁག་གི་དཔལ་འབྱོར་དོ་དམ་གྱི་ལས་དོན་ཐོག་ཆོས་ལུགས་ལས་དོན་ལྷན་ཁང་དང་དཔལ་འབྱོར་ལྷན་ཁང་གཉིས་འབྲེལ་བ་དམ་ཟབ་ཐོག་མཉམ་ལས་བྱ་རྒྱུ་ཡིན་སྐོར་བཀོད་འདུག དགོན་སྡེ་ཁག་གི་སྤྱི་ཚོགས་བདེ་དོན་དང་འབྲེལ་བའི་ལས་དོན་སོགས་ཀྱི་ཐོག་ནས་ཡོང་འབབ་བཟོ་ཆོག་ཀྱང་། ཁྲིམས་སྒྲིག་གསར་པའི་ནང་མི་མང་ཁྲོད་ཆོས་ཕྱོགས་ཀྱི་ཤུགས་རྐྱེན་འགོག་ཐབས་སུ་གཞུང་ཁོ་ནའི་ལས་དོན་གཉེར་རྒྱུ་ཞེས་སྔར་གྱི་དོན་ཚན་དེ་མེད་པ་བཟོས་ཡོད་པ་དང་། དེ་སྔ་ཚོད་ལྟ་བྱས་པའི་ཁྲིམས་སྒྲིག་ནང་དགོན་པར་ཞལ་འདེབས་ལ་སོགས་ཕུལ་མཁན་བྱུང་སྐབས་དགོན་པའི་བྱུང་འཛིན་ཕུལ་ཆོག་པ་བཀོད་ཡོད་ཀྱང་ཁྲིམས་སྒྲིག་གསར་པའི་ནང་དགོན་སྡེ་ཁག་གི་ཡོང་འབབ་ལ་མྱུལ་ཞིབ་ནན་པོ་བྱ་སླད་དགོན་སྡེ་ཁག་ནས་སྦྱིན་བདག་རྣམ་པར་བྱུང་འཛིན་ཕུལ་སྐབས་ས་གནས་གཞུང་གི་ཆོས་ལུགས་ལས་དོན་ལྷན་ཁང་གིས་ཆེད་བཟོ་བྱས་པའི་བྱུང་འཛིན་སྤྱོད་དགོས་པ་མ་ཟད། དགོན་སྡེ་ཁག་གི་འཛིན་སྐྱོང་དང་ལས་བྱེད་པ་ཚོས་ཁྲིམས་སྒྲིག་ལྟར་ལས་འགན་མ་བསྒྲུབ་པ་དང་རྩིས་མེད་བཏང་ཚེ་ཉེས་ཆད་འགེལ་རྒྱུ་ཡིན་པ་སོགས་ཆེད་བཀོད་ཡོད་འདུག

བོད་མི་མང་སྤྱི་འཐུས་ལྷན་ཚོགས་ནས་གངས་ལྗོངས་དཔལ་འབྱོར་ཞབས་ཞུ་ཁང་གི་ཁེ་ཉེན་གྱི་གནས་སྟངས་ཇི་ཆགས་རྟོག་ཞིབ་སླད་མི་གྲངས་ལྔ་ལས་གྲུབ་པའི་ཚོགས་ཆུང་ཞིག་ཆེད་འཛུགས་དང་འབྲེལ་དེ་རིང་ལས་དོན་དངོས་སུ་དབུ་འཛུགས་གནང་འདུགསྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་དང་དཔལ་འབྱོར་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་གངས་ལྗོངས་དཔལ་འབྱོར་ཞབས་ཞུ་ཁང་གི་དཔལ་འབྱོར་གྱི་གནས་སྟངས་ལ་བལྟས་ན་གཡང་མ་གཏོགས་མཐོང་གི་མེད་སྟབས་མ་འོངས་པར་ཁུངས་འཁྱོལ་རྒྱུ་ཁག་པོ་ཞིག་ཏུ་གཟིགས་ཀྱི་ཡོད་པར་འགྲེལ་བརྗོད་དང་འབྲེལ། ལས་གཞི་དེ་མུ་མཐུད་ནས་མཇུག་སྐྱོང་གནང་རྒྱུར་གྲོས་ཚོགས་ནས་ཚོགས་ཆུང་ཞིག་ཆེད་འཛུགས་ཀྱིས་ཞིབ་འཇུག་མཐིལ་ཕྱིན་པ་གནང་སྟེ་ལམ་སྟོན་གནང་ཚེ་ལས་གཞི་མཇུག་སྐྱོང་ཞུ་རྒྱུ་ཡིན་ཞེས་གསུངས་རྗེས། གྲོས་ཚོགས་ཀྱི་ལས་ཉིན་མཐའ་མའི་ཐོག་སྤྱི་འཐུས་རྣམ་པས་མང་མོས་ཐོག་ཚོགས་ཆུང་འཛུགས་རྒྱུའི་གྲོས་ཆོད་གཏན་འབེབས་གནང་དོན་ལྟར། དེ་རིང་སྔ་དྲོ་སྤྱི་འཐུས་ཚོགས་གཙོ་སྦྲེལ་པོ་མཆོག་རྣམ་གཉིས་དབུ་བཞུགས་ཐོག་གངས་ལྗོངས་དཔལ་འབྱོར་ཞབས་ཞུ་ཁང་གི་ཁེ་ཉེན་གྱི་གནས་སྟངས་ཇི་ཆགས་རྟོག་ཞིབ་བྱེད་པོའི་ཞིབ་འཇུག་ཚོགས་ཆུང་གི་ལས་དོན་དབུ་འཛུགས་གནང་ཡོད་པ་རེད།ཚོགས་ཆུང་ནང་སྤྱི་འཐུས་ཟླ་བ་ཕུན་སྐྱིད་ལགས་དང་སྤྱི་འཐུས་གསེར་རྟ་ཚུལ་ཁྲིམས་ལགས། སྤྱི་འཐུས་དཀོན་མཆོག་ཡར་འཕེལ་ལགས། སྤྱི་འཐུས་ཀརྨ་དགེ་ལེགས་ལགས། དཔལ་འབྱོར་རིག་པའི་མཁས་དབང་སྐུ་ཞབས་ Rahul Joshi ལགས་བཅས་ཡོད་པ་མ་ཟད། ཚོགས་ཆུང་གི་ཚོགས་གཙོར་སྤྱི་འཐུས་ཟླ་བ་ཕུན་སྐྱིད་ལགས་དང་དྲུང་ཆེར་སྤྱི་འཐུས་གསེར་རྟ་ཚུལ་ཁྲིམས་ལགས་སྤྱི་མོས་ཀྱིས་བསྐོ་བཞག་གནང་འདུག ཐེངས་འདིའི་ཚོགས་ཆུང་གི་གྲུབ་དོན་སྙན་ཐོ་དེ་སྐབས་ ༡༧ པའི་གྲོས་ཚོགས་ཚོགས་དུས་ ༤ པའི་གོང་སྤྱི་འཐུས་ཚོགས་དྲུང་ལས་ཁུངས་སུ་འབུལ་གནང་ཐུབ་པ་དགོས་ཀྱི་འདུགགཞི་རྩའི་སྐབས་ ༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པ་དང་གསུམ་པའི་ཐོག་གངས་ལྗོངས་དཔལ་འབྱོར་ཞབས་ཞུ་ཁང་གི་གནས་སྟངས་ཐོག་ལ་སྤྱི་འཐུས་རྣམ་པས་དོགས་འདྲི་དང་དགོངས་འཆར་མང་དག་ཅིག་གནང་ཡོད་པའི་ཁྲོད། ཁག་གཅིག་གིས་སྲིད་སྐྱོང་མཆོག་གི་ལམ་སྟོན་ལྟར་ཚོགས་ཆུང་ཆེད་འཛུགས་དགོས་པ་དང་། ལ་ལས་སྲིད་སྐྱོང་མཆོག་ནས་གངས་ལྗོངས་ཞབས་ཞུ་ཁང་མུ་མཐུད་གནས་པར་ཐུགས་འདོད་གནང་གི་མེད་པ་གསལ་པོ་ཡིན་སྐོར་སྐྱོན་བརྗོད་གནང་མཁན་བྱུང་ཡོད་པ་རེད།གང་ལྟར་གྲོས་ཚོགས་ཚོགས་དུས་གསུམ་པའི་ལས་ཉིན་མཐའ་མར་ཚོགས་ཆུང་ཆེད་འཛུགས་བྱ་རྒྱུའི་གྲོས་ཆོད་གཏན་འབེབས་གནང་བའི་ནང་གསལ་ལ་གཞིགས་ན། ཚོགས་ཆུང་ནས་གངས་ལྗོངས་དཔལ་འབྱོར་ཞབས་ཞུ་ཁང་གི་གནས་སྟངས་དང་འབྲེལ་གནས་ཡུལ་གཞུང་གི་ཁྲིམས་ལུགས་དང་མ་འཛུགས་བྱ་ཕྱོགས། ད་ལྟའི་གནས་བབ། མ་འོངས་དམིགས་ཡུལ་གཞིར་བཟུང་ཡོང་ཐུབ་མིན་གྱི་སྙན་ཐོ་ཁ་གསལ་ཞིག་སྐབས་ ༡༧ པའི་གྲོས་ཚོགས་ཚོགས་དུས་ ༤ པའི་གོང་སྤྱི་འཐུས་ཚོགས་དྲུང་ལས་ཁུངས་སུ་འབུལ་ཐུབ་པ་དགོས་རྒྱུ་དང་། ཚོགས་ཆུང་གི་སྙན་ཐོ་གཞིར་བཟུང་གྲོས་ཚོགས་ནས་ཐག་གཅོད་ཁ་གསལ་ཞིག་མ་འབྱུང་བར་གངས་ལྗོངས་དཔལ་འབྱོར་ཞབས་ཞུ་ཁང་གི་ལས་དོན་རྣམས་མུ་མཐུད་གནང་དགོས་པ་བཅས་འཁོད་ཡོད།

མི་རིགས་རྩ་གཏོར་ལ་འགོག་རྒོལ་གནང་མཁན་ཤེས་ཡོན་ཅན་དང་རང་དབང་རྩོད་ལེན་པ་ཁག་ཅིག་ནས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་མཆོག་གི་ད་ཐེངས་ཤིན་ཅང་ནང་གི་ལྟ་སྐོར་དེ་བསྐྱར་ཟློས་ཙམ་ལས་དོན་དངོས་ཐོག་རྒྱ་གཞུང་ལ་ཤིན་ཅང་གི་མི་རིགས་རྩ་གཏོར་གཏོང་བཞིན་པར་སྐྱོན་བརྗོད་གནང་མེད་པར་འགྲེལ་བརྗོད་ཀྱིས་ལྕམ་སྐུ་མཆོག་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་གྱི་ལས་འགན་ནས་རྩ་དགོངས་ཞུ་དགོས་པའི་དགོས་འདུན་བཏོན་འདུགཨ་རིའི་ནང་གི་ Axios གསར་ལས་ཁང་གི་རྒྱ་ནག་སྡེ་ཚན་གྱི་གསར་འགོད་པ་ལྕམ་ Bethany Allen Ebrahimian ལགས་ཀྱིས་མི་རིགས་རྩ་གཏོར་ལ་འགོག་རྒོལ་གནང་མཁན་གྱི་མཁས་ལྡན་མི་སྣ་དང་འགྲོ་བ་མིའི་ཐོབ་ཐང་རྩོད་ལེན་པ་ཁག་ཅིག་གིས་ལྕམ་སྐུ་ Michelle མཆོག་གི་ཐེངས་འདིའི་འཚམས་གཟིགས་ལ་སྐྱོན་བརྗོད་གནང་བའི་གནས་ཚུལ་ཁག་ཕྱོགས་བསྡོམས་ཀྱིས་དཔྱད་བརྗོད་གནང་བའི་ནང་ཁོང་གིས་ད་ལན་ལྕམ་སྐུ་ Michelle མཆོག་གི་འཚམས་གཟིགས་དེས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་དེ་རྒྱ་ནག་དང་ནུབ་ཕྱོགས་དབར་བར་གནས་གནང་དགོས་བྱུང་ཡོད་པར་འགྲེལ་བརྗོད་དང་འབྲེལ། གང་ལྟར་རྒྱ་གཞུང་ནས་རྒྱལ་ཚོགས་ཀྱི་ལྷན་ཁང་ལ་ཤུགས་རྐྱེན་ཇེ་མང་སྤྲད་ཡོད་པ་མངོན་གསལ་གནང་བ་མ་ཟད་ཨ་རིའི་Washington DC ནང་རྟེན་གཞི་བྱས་པའི་ Newlines Institute for strategy and Police ཐབས་བྱུས་དང་སྲིད་བྱུས་ཀྱི་གསར་འགྱུར་བསྟི་གནས་ཁང་གི་ངེས་སྟོན་པ་སྐུ་ཞབས་ Azeem Ibrahim ལགས་ཀྱིས་རྒྱ་གཞུང་ནས་ལྕམ་སྐུ་མཆོག་གི་འཚམས་གཟིགས་དེ་རྒྱ་ནག་གི་སྲིད་བྱུས་དང་མཐུན་པའི་ལམ་ལྷོང་ལྡན་པ་ཞིག་ཏུ་ཁ་བསྒྱུར་ཐུབ་པ་དེས་རྒྱལ་ཚོགས་ལ་མིང་ངན་བཟོས་ཡོད་པའི་ཟུར་ཟ་གནང་འདུགདེ་བཞིན་སྐུ་ཞབས་ Azeem ལགས་ཀྱིས་ལྕམ་སྐུ་མཆོག་གི་གཟིགས་དེའི་ཁྲོད་ཤིན་ཅང་གཙོས་རྒྱ་ནག་གི་ས་ཁུལ་ཁག་ཅིག་ཏུ་གཞུང་འབྲེལ་སྐོར་སྐྱོད་གནང་སྟེ་་ཟླ་བ་འདིའི་ཕྱི་ཚེས་ ༢༨ ཉིན་གྱི་གཟིགས་སྐོར་མཇུག་སྒྲིལ་སྐབས་བརྙན་པར་བརྒྱུད་གསར་འགོད་ལྷན་ཚོགས་ཤིག་གནང་བར་ལྕམ་སྐུ་མཆོག་གིས་ཤིན་ཅང་ནང་གི་སྲིད་བྱུས་ཁག་དྲག་སྤྱོད་པར་གདོང་ལེན་གྱི་སྲིད་བྱུས་ཤིག་དང་དེ་བཞིན་གཞི་རྒྱ་ཆེ་བའི་དོ་དམ་བཀག་ཉར་གྱི་མཐུན་རྐྱེན་དག་ལ་ལས་རིགས་དང་ཤེས་ཡོན་སློབ་གསོའི་ལྟེ་གནས་སུ་ལུང་འདྲེན་གནང་བ་མ་ཟད། ཁོང་གིས་ཤིན་ཅང་ནང་མི་རིགས་རྩ་མེད་གཏོར་བཞིན་པའི་ཐད་རྒྱ་གཞུང་ལ་ཡོངས་གྲགས་ཐོག་ནས་སྐྱོན་བརྗོད་གནང་མེད་པ་དང་། ད་དུང་ཡུ་གུར་གཙོས་གྲགས་ཉུང་མི་རིགས་ཐོག་དྲག་གནོན་བྱེད་བཞིན་པ་མཚམས་འཇོག་དགོས་པའི་རེ་སྐུལ་གནང་རྒྱུ་ལས་ལྡོག་ཏེ་རྒྱ་གཞུང་ལ་རྒྱལ་ཁབ་དེའི་ནང་གི་ཉམ་ཐག་ཉུང་དུ་གཏོང་ཐབས་དང་འཕྲོད་བསྟེན་གནས་བབ་ཡར་རྒྱས་གཏོང་རྒྱུར་གྲུབ་འབྲས་སོན་པར་བསྔགས་བརྗོད་གནང་ཡོད་པ་སོགས་ལུང་འདྲེན་གནང་འདུག རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་མཆོག་གི་ད་ཐེངས་ཀྱི་འཚམས་གཟིགས་ལ་འགྲོ་བ་མིའི་ཐོབ་ཐང་རྩོད་ལེན་པ་དང་ཡུ་གུར་ལས་འགུལ་བ་རྣམས་ཧ་ལས་ཧོར་འཐོར་ནས་ཁོ་མོའི་བྱ་སྤྱོད་ལ་འཕྲལ་མར་སྐྱོན་བརྗོད་གནང་བཞིན་པའི་ཁྲོད་འདིར། ཤིན་ཅང་གི་བཀག་སྐྱིལ་ཁང་ནང་ཡོད་པའི་ཡུ་གུར་བ་ཞིག་གི་སྤུན་མཆེད་ད་ཆ་འགྲོ་བ་མིའི་ཐོབ་ཐང་ཁྲིམས་རྩོད་པའི་ཕྱག་ལས་གནང་བཞིན་པ་ལྕམ་སྐུ་ Rayhan Asat ལགས་ཀྱིས་ང་ཚོར་རྒྱབ་སྐྱོར་གྱིས་རྒྱ་ནག་ལ་གདོང་ལེན་བྱ་ཐུབ་མཁན་གྱི་ལྟེ་གནས་ཁང་གི་ངོས་ནས་རྒྱ་ནག་གི་འགྲེལ་བརྗོད་ལ་མཐུན་འགྱུར་གནང་ཚེ་དེས་གནོད་གཞིར་འགྲོ་ཉེན་སོགས་ཀྱི་དྲི་བ་གནང་འདུག་པ་དང་དེ་བཞིན་ཨོ་ཊ་ཝ་གཙུག་ལག་སློབ་གཉེར་ཁང་གི་ཁྲིམས་ཀྱི་སློབ་དཔོན་སྐུ་ཞབས་ Fredrick John Packer ལགས་ཀྱིས་ད་ཆ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་དེ་འགྲོ་བ་མིའི་ཐོབ་ཐང་ཐད་ནས་ལྷོད་གཡེང་ཚབས་ཆེན་ཕྱིན་ཡོད་པ་དང་ལྕམ་སྐུ་མཆོག་གི་སྐོར་སྐྱོད་དེའི་འཇུག་འབྲས་ལ་ཁོང་ད་ལྟའང་ཧ་ལས་ཧོན་འཐོར་ཡོད་པར་མ་ཟད་ད་ཐེངས་ཀྱི་གྱོང་གུད་ཚབས་ཆེན་འདིར་འཛམ་གླིང་སུས་ཀྱང་བློས་བཏང་ཐུབ་ཀྱི་མ་རེད་ཅེས་གསུངས་ཏེ་ཁོང་གིས་གཙོས་པའི་ཁོང་ལ་འཇིགས་རྔམ་ཅན་གྱི་ལམ་ཕྱོགས་འདིར་སྐྱོད་དགོས་པའི་ལམ་སྟོན་གནང་མཁན་འབྲེལ་ཡོད་ཀུན་ལས་གནས་ནས་རྩ་དགོངས་ཞུ་དགོས་པར་ནན་བརྗོད་གནང་འདུགཨ་རི་ནང་གི་ཡུ་གུར་ཐོབ་ཐང་རྩོད་ལེན་ཚོགས་པས་ལྕམ་སྐུ་ Bachellet མཆོག་ལ་ཁོང་ནས་འགྲོ་བ་མིའི་ཐོབ་ཐང་སྲུང་སྐྱོབ་བྱ་རྒྱུའི་རང་ཉིད་ཀྱི་ལས་འགན་དང་རྒྱལ་ཚོགས་ཀྱི་གཞི་རྩའི་ལྟ་གྲུབ་ཁག་ལ་བརྩི་མེད་བཏང་ཡོད་སྟབས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གཙོ་འཛིན་གྱི་ལས་འགན་ནས་རྩ་དགོངས་ཞུ་དགོས་པའི་དགོས་འདུན་བཏོན་འདུག