Tibetan Royal Year of 2151 | Year of the Wood Dragon

བོད།

རྫ་སྨད་དབོན་པོ་ཁུལ་དུ་སླར་བོད་མི་ ༥༣ ཙམ་འཛིན་བཟུང་།

རྒྱ་གཞུང་གིས་དབྱེ་བའི་ཟི་ཁྲོན་ཞིང་ཆེན། དཀར་མཛེས་བོད་རིགས་རང་སྐྱོང་ཁུལ། སེར་ཤུལ་རྫོང་རྫ་སྨད་དབོན་པོ་ཁུལ་ནས་སླར་ཡང་བོད་མི་ ༥༣ སྐོར་ཞིག་འཛིན་བཟུང་བྱས་པ་དང་ས་གནས་སུ་དམ་དྲག་ཤུགས་ཆེ་བྱེད་བཞིན་ཡོད་པ་རེད་འདུག རྫ་སྨད་དབོན་པོ་སྡེ་བ་ཁུལ་དུ་ཉེ་ཆར་ཕྱི་ཚེས་ ༢༢ ནས་ ༢༥ བར་༸གོང་ས་མཆོག་གི་༸སྐུ་པར་བདག་ཉར་གནང་བའི་གནད་དོན་གཙོ་གྱུར་ཕྱི་ཕྱོགས་ལ་འབྲེལ་བ་གནང་བ་སོགས་ཀྱི་ཉེས་འཛུགས་འོག་བོད་མི་ ༦༠ ཙམ་ཞིག་འཛིན་བཟུང་བྱས་པ་མ་ཟད། ཕྱི་ཟླ་ ༨ ཚེས་ ༢༥ ནས་དབོན་པོ་སྡེ་བའི་རུ་ཁག་རེ་རེ་ནང་གི་བོད་པའི་ཁྱིམ་ཚང་ཡོངས་རྫོག་ལ་བསྔོགས་བཤེར་གྱི་བྱ་འགུལ་སྤེལ་བཞིན་ཡོད་པ་ཤེས་རྟོགས་བྱུང་ཡོད། དེ་རིང་རླུང་འཕྲིན་ཁང་ལ་འབྲེལ་ཡོད་ཅིག་གིས་གནས་ཚུལ་མཁོ་སྤྲོད་གནང་བར་ཕྱི་ཟླ་ ༨ ཚེས་ ༢༥ ནས་ ༢༩ བར་རྫ་སྨད་དབོན་པོ་ཁུལ་དུ་སླར་ཡང་བོད་མི་ ༥༣ ཙམ་འཛིན་བཟུང་བྱས་ཡོད་པ་དང་དེའང་གཙོ་བོ་༸གོང་ས་མཆོག་གི་༸སྐུ་པར་གཅེས་ཉར་དང་ཞལ་པར་ནང་དུ་ཆབ་སྲིད་དང་འབྲེལ་བའི་བཀའ་མོལ་འདྲ་མིན་གནང་བ་སོགས་ཀྱི་ཉེས་འཛུགས་འོག་འཛིན་བཟུང་བྱས་ཏེ་སེར་ཤུལ་རྫོང་ཐོག་ཏུ་བཀག་ཉར་བྱས་འདུག ཕྱི་ཚེས་ ༢༢ ནས་བཟུང་སྟེ་ཁ་སང་བར་དུ་རྒྱ་གཞུང་གིས་རྫ་སྨད་དབོན་པོ་སྡེ་བ་ནས་ཁྱོན་བོད་མི་ ༡༡༣ ཙམ་འཛིན་བཟུང་བྱས་པའི་ཁོངས་ནས་ཁ་སང་ཚེས་ ༣༡ ཉིན་མི་སྐྱ་ ༢ དང་བེུད་ ༡ དགེ་འདུན་པ་ ༡ བཅས་ཁྱོན་མི་ ༤ གློད་བཀྲོལ་བཏང་ཡོད་ཀྱང་གཞན་རྣམས་ཟླ་བ་གཅིག་ཙམ་རིང་བཀག་ཉར་བྱེད་ཀྱི་ཡོད་པ་རེད་འདུག དེ་བཞིན་ཁ་སང་ནས་བཟུང་སྟེ་དབོན་པོ་དགོན་པའི་ལོ་ན་ ༡༨ ཡན་གྱི་དགེ་འདུན་པ་ ༢༠ རེ་ཉིན་ལྟར་རྫ་སྨད་སྲིད་གཞུང་གི་ལས་ཁུངས་སུ་ཆེད་འབོད་ཀྱིས་འདྲི་རྩད་བྱས་ཏེ་རང་ཉིད་ཀྱི་ངོས་ནས་ནག་ཉེས་བསགས་མེད་པ་དང་ཕྱི་ཕྱོགས་སུ་འབྲེལ་བ་གནང་མྱོང་མེད་པ། ཞལ་པར་ཐོག་ཆབ་སྲིད་དང་འབྲེལ་བའི་བཀའ་མོལ་གནང་མྱོང་མེད་པར་དག་སེལ་གནང་དགོས་པ་དང་། དགེ་འདུན་པ་ཚོར་དེ་མཚུངས་ཀྱིས་འདྲི་རྩད་ནན་པོ་བྱེད་ཀྱི་ཡོད་པ་རེད་འདུག རྒྱ་ནག་གཞུང་གིས་རྫ་སྨད་དབོན་པོ་དགོན་གྲོང་གཉིས་གཅིག་པོ་མིན་པར་སེར་ཤུལ་རྫོང་ཁོངས་ཀྱི་སྡེ་བ་དང་དགོན་པ་ཡོངས་ལ་དམ་དྲག་ཆེན་པོ་བྱེད་བཞིན་པ་མ་ཟད། མི་མང་པོ་ཞིག་འཛིན་བཟུང་བྱེད་བཞིན་ཡོད་པ་དེ་ལྟར་ཡང་ད་ལྟའི་ཆར་མང་ཚོགས་ཇི་ཙམ་འཛིན་བཟུང་བྱས་དང་བྱེད་མུས་སོགས་ཀྱི་གནས་ཚུལ་ཁ་གསལ་ཤེས་རྟོགས་ཐུབ་ཀྱི་མི་འདུགརྩ་བའི་དེ་སྔ་ཕྱི་ལོ་ ༢༠༡༩ ལོར་རྫ་སྨད་དབོན་པོ་ཁུལ་དུ་དགེ་འདུན་པ་ཁག་ཅིག་གིས་བོད་དོན་ཡིག་ཆ་གཏོར་འགྲེམས་བྱས་པ་དང་། མི་སྐྱ་ཡོན་ཏན་ལགས་དང་ལྷ་རྒྱལ་ལམ་ཆོས་རྒྱལ་ལགས་གཉིས་ཀྱིས་སྲིད་གཞུང་གི་སྒོ་ཁར་ཕྱིན་ནས་བོད་དོན་ངོ་རྒོལ་གནང་བའི་རྐྱེན་གྱིས་ཁོང་རྣམས་འཛིན་བཟུང་བྱས་ཡོད་པ་མ་ཟད། སྔར་ལོར་རྒྱ་གཞུང་གིས་དབོན་པོ་ཡུལ་ཚོའི་ནས་འཛིན་བཟུང་བྱས་པའི་དགེ་འདུན་པ་བསྟན་འཛིན་ཉི་མ་ལགས་བཀག་ཉར་འོག་གཅར་རྡུང་ཚད་མེད་བཏང་སྟེ་དམར་གསོད་བཏང་བའི་གནས་ཚུལ་ཡང་ཤེས་རྟོགས་བྱུང་ཡོད་པ་ལྟར། དེའི་རྐྱེན་གྱིས་འདི་ལོའི་ཕྱི་ཟླ་ ༣ ནང་རྒྱ་གཞུང་གི་དྲག་ཆས་དམག་མི་བསླེབས་ནས་དམ་དྲག་བྱས་པ་དང་། ད་ལྟ་བོད་མི་ ༦༠ སྐོར་ཞིག་འཛིན་བཟུང་བྱས་ཡོད་པའི་གནས་ཚུལ་བྱུང་ཡོད། རྒྱ་གཞུང་གིས་རྫ་དབོན་པོས་གཙོས་པའི་བོད་ཀྱི་ས་ཁུལ་ཁག་ཏུ་འབྲོག་པ་གཞིས་སྤོར་གྱི་སྲིད་བྱུས་འོག་བོད་མིའི་འཚོ་བའི་གནས་སྟངས་དང་ཐུན་མོང་མ་ཡིན་པའི་རིག་གཞུང་རྩ་བརླག་འགྲོ་བཞིན་པ་དང་། ༸གོང་ས་མཆོག་གི་༸སྐུ་པར་ཉར་ཚགས་ལ་དམ་དྲག བོད་མི་རྣམས་ལ་བཙན་དབང་གིས་རྒྱ་ནག་གཞུང་ལ་དགའ་མོས་དང་༸གོང་ས་མཆོག་ལ་མཚན་སྨད་ཞུ་བཅུག་པ་སོགས་ལ་བརྟེན་ནས་བོད་མིས་ངོ་རྒོལ་གྱི་རྣམ་པ་དེ་ལྟར་ཆེད་བཏོན་གནང་བ་ཞིག་ཆགས་ཀྱི་འདུག

འདས་པའི་ལོ་གསུམ་ནང་བོད་མི་བཞི་བཅུ་ཙམ་གར་སོང་ཆ་མེད་དུ་སྒྱུར་ཡོད་པར་བསྒྲགས་འདུག

ཁ་སང་བཙན་དབང་འོག་ནས་གར་སོང་ཆ་མེད་དུ་བཏང་བའི་ཉིན་མོ་ཐེངས་ ༢༨ པའི་དུས་དྲན་དང་བསྟུན་ནས། བཞུགས་སྒར་ཁུལ་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་འདས་པའི་ལོ་གསུམ་ནང་རྒྱ་ནག་གཞུང་གིས་བོད་མི་ ༤༠ ལྷག་བཙན་དབང་འོག་གར་སོང་ཆ་མེད་དུ་བཏང་ཡོད་པའི་གནས་ཚུལ་སྤེལ་འདུགལྟེ་གནས་ཁང་གིས་གནས་ཚུལ་སྤེལ་བའི་ནང་དུ། རྒྱ་ནག་གིས་དུས་རྒྱུན་ནས་བོད་མི་རྣམས་ཉེས་མིང་སྣ་ཚོགས་ཀྱི་འོག་ནས་འཛིན་བཟུང་བཙན་ཁྲིད་བྱེད་བཞིན་པའི་གནད་དོན་དང་འབྲེལ་ནས། འདི་ལོའི་ཕྱི་ཟླ་གསུམ་པའི་ནང་མིང་ལ་བཀྲ་ཤིས་ཟེར་ཞིང་ལོ་ན་སུམ་ཅུར་སོན་པའི་བོད་མི་ཞིག་ལ་རྒྱ་གཞུང་སྤྱི་བདེ་མི་སྣས་བཀག་བསྐྱིལ་ཁང་དུ་མནར་གཅོད་ཚད་མེད་བཏང་བས་མ་བཟོད་པར་རང་སྲོག་བཅད་ཡོད་པ་དང་། དེ་བཞིན་མིང་ལ་དངོས་གྲུབ་ཕུན་ཚོགས་ཟེར་བའི་བགྲེས་པོ་ཞིག་ལ་ལོ་ངོ་བརྒྱད་ཀྱི་ཁྲིམས་ཐག་བཅད་དེ་བཀལ་སྐྱིལ་ཁང་ནས་ནད་གཅོང་དུ་སྒྱུར་བ། གཞན་ཡང་དགེ་འདུན་པ་འཇིགས་མེད་རྒྱ་མཚོ་ཞེས་པ་ཞིག་ལ་བཙན་དབང་གིས་བཀག་སྐྱིལ་ཁང་ནས་སྨན་བཅོས་བྱ་དགོས་བར་བསྙལ་ནས་སྨན་ཁང་དུ་བཙན་ཁྲིད་བྱེད་པ་དེར་དགོས་མེད་ཀྱི་སྨན་བཅོས་བྱ་སྲིད་པ་སོགས། རྒྱ་ནག་གིས་མནར་གཅོད་གཏོང་བཞིན་པའི་བོད་མི་ཁག་ཅིག་གི་གནད་དོན་གསལ་འདོན་གྱིས། ད་ལྟའི་བར་གནས་ཚུལ་ཤེས་རྟོགས་བྱུང་དང་མ་བྱུང་ཅི་རིགས་ཀྱི་བོད་མི་བགྲང་ལས་འདས་པ་ཞིག་གིས་རང་ཉིད་ཀྱི་གཞི་རྩའི་འགྲོ་བ་མིའི་ཐོབ་ཐང་སྤྱད་པའམ། ཡང་ན། ཁྲིམས་མཐུན་གྱི་ལས་འགུལ་སྤེལ་བ་ཙམ་གྱིས་ཁོང་ཚོར་ཁྲིམས་ཀྱི་སྲུང་སྐྱོབ་གང་ཡང་མེད་པར་མངོན་གསལ་དང་གསང་བ་ཅི་རིགས་ཀྱི་སྒོ་ནས་འཇུ་བཟུང་བཀག་ཉར་གྱིས་མནར་གཅོད་སྣ་ཚོགས་མྱོང་དགོས་ཐུག་གི་ཡོད་པ་རེད་ཅེས་མངོན་གསལ་གནང་འདུགགསར་འགོད་པས་ལྟེ་གནས་ཁང་གི་བོད་གནས་ཉམས་ཞིབ་པ་ཉི་འོད་ལགས་སུ་ཐེངས་འདིའི་ལྟེ་གནས་ཁང་གི་བསྒྲགས་གཏམ་དང་འབྲེལ་ནས་བཀའ་འདྲི་ཞུས་པར་ཁོང་གིས། མནར་གཅོད་ནི་མཉམ་འབྲེལ་རྒྱལ་ཚོགས་ཀྱི་མནར་གཅོད་འགོག་པའི་ཁྲིམས་ཡིག་ནང་ཡོངས་གྲགས་ཀྱིས་བཀག་འགོག་བྱས་ཡོད་པ་ལུང་འདྲེན་གྱིས་རྒྱ་ནག་གཞུང་གིས་རྒྱལ་ཁབ་བརྟན་བརླིང་ལ་ཁ་གཡར་བོད་མི་རྣམས་བཙན་དབང་གིས་གར་སོང་ཆ་མེད་དུ་གཏོང་བའི་རིགས་མཚམས་འཇོག་བྱ་དགོས་སྐོར་དང་། རྒྱ་ནག་གཞུང་གིས་རྒྱ་ནག་གི་ཉེས་དོན་ཁྲིམས་ཡིག་དོན་ཚན་ ༧༣ དང་ ༨༣ གཉིས་ཕྱིར་འཐེན་དང་རྒྱལ་སྤྱིའི་ཁྲིམས་ལུགས་དང་མཐུན་པར་བསྐྱར་བཅོས་བྱ་དགོས་སྐོར་འགྲེལ་བརྗོད་གནང་བྱུང་།གཞན་ཡང་ཁོང་གིས་རྒྱ་ནག་གིས་དུས་རྒྱུན་ནས་ཆབ་སྲིད་དང་འབྲེལ་ནས་བོད་མི་རྣམས་འཇུ་བཟུང་བྱེད་སྐབས། རྒྱལ་ཁབ་ཀྱི་གསང་བ་ཕྱིར་བསྒྲགས་བྱས་པ་དང་རྒྱལ་ཁབ་ཀྱི་བརྟན་བརླིང་ལ་གནོད་པའི་ནག་ཉེས་བསྙད་འདོགས་ཀྱིས་གནས་ཚུལ་འཚོལ་ཞིབ་བྱེད་ཐབས་བྲལ་བའི་ཁྱབ་ཆེ་བའི་ཐ་སྙད་རིགས་བེད་སྤྱོད་གཏོང་གི་ཡོད་སྐོར་གསུང་བ་དང་འབྲེལ། ལྟེ་གནས་ཁང་གིས་ཤེས་རྟོགས་བྱུང་བའི་འདས་བའི་ལོ་གསུམ་རིང་གར་སོང་ཆ་མེད་དུ་བསྒྱུར་བའི་བོད་མི་ ༤༠ ལྷག་ཀྱང་བསྙད་འདོགས་དེ་དག་གི་འོག་ནས་གར་སོང་ཆ་མེད་དུ་སྒྱུར་བ་ཞིག་ཡིན་སྐོར་གསུངས་སོང་།སྤྱིར་ཁ་སང་ཨ་རིའི་ཕྱི་སྲིད་ལྷན་ཁང་གིས་འཕྲུལ་སྒྲ་བརྒྱུད་ནས་བཙན་དབང་གིས་གར་སོང་ཆ་མེད་དུ་སྒྱུར་བའི་ཉིན་མོ་སྲུང་བརྩི་ཞུས་པ་དང་འབྲེལ། འགྲོ་བ་མི་ཡོངས་རྫོགས་ས་ཕྱོགས་གང་དུ་གནས་མིན་དང་མི་སུ་ཡིན་མིན། དེ་བཞིན་དད་མོས་ཅི་ཡིན་སོགས་ལ་ལྟོས་བ་མེད་པར་ཐོབ་ཐང་དང་ཆེ་མཐོང་གཅིག་པ་ཡིན་པར་བསྒྲགས་འདུག དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གིས་ཀྱང་ཁ་སང་གི་རྒྱལ་སྤྱིའི་བཙན་དབང་གིས་གར་སོང་ཆ་མེད་དུ་སྒྱུར་བའི་ཉིན་མོ་དང་བསྟུན་ནས། རྒྱལ་སྤྱིའི་ཆབ་སྲིད་བཙོན་པ་ཆུང་ཤོས་སམ། བོད་ཀྱི་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གླེང་སློང་གིས། རྒྱ་ནག་གིས་ཆུང་སྲིད་མཆོག་གང་དུ་བཀག་སྐྱིལ་བྱས་ཡོད་མེད་གསལ་བོ་བཟོ་དགོས་བ་དང་། དེ་བཞིན་གང་ཉིད་མཆོག་ལ་སྨྲ་བརྗོད་ཀྱི་རང་དབང་སྤྲོད་དགོས་བའི་ཞུ་སྐུལ་གནང་འདུག་པ་དང་། གཞན་ཡང་ཨ་རིའི་རྒྱལ་སྤྱིའི་ཆོས་ལུགས་ལྷན་ཚོགས་ཀྱིས་ཀྱང་རྒྱ་ནག་གིས་བོད་ཀྱི་པཎ་ཆེན་ཆུང་སྲིད་མཆོག་བཙན་ཁྲིད་བྱས་པ་ཡོད་པར་འགྲེལ་བརྗོད་ཀྱིས་རྒྱ་ནག་གིས་གང་ཉིད་གང་དུ་བཀག་ཉར་བྱས་ཡོད་པར་མངོན་གསལ་བྱེད་དགོས་བའི་སྐུལ་མ་གནང་འདུག བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ཁ་སང་གི་ཉིན་མོ་དང་སྟུན་ནས་འདོན་སྤེལ་གནང་བའི་སྒྲགས་གཏམ་ནང་། བོད་ཀྱི་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་ཀྱིས་རྒྱ་ནག་གིས་བོད་ཀྱི་ཆབ་སྲིད་བཙོན་པ་རྣམས་ལ་ངོས་འཛིན་བྱེད་ཕྱོགས་དང་འབྲེལ་ནས་ངོ་སྤྲོད་གནང་བ་ཞིག་ལུང་འདྲེན་གནང་ཡོད་པ་དང་། དེའི་ནང་དུ། བོད་ནང་བོད་མི་ཚོར་གཞི་རྩའི་འགྲོ་བ་མིའི་ཐོབ་ཐང་ལོངས་སུ་སྤྱོད་དབང་མེད། བོད་མི་ཚོར་དུད་འགྲོ་སེམས་ཅན་གྱི་འདུ་ཤེས་འཛིན་གྱི་ཡོད། རྒྱ་གཞུང་གི་དབང་འཛིན་པ་ཚོས་བོད་མི་རྣམས་འགྲོ་བ་མི་ཞིག་ཡིན་པའི་ངོས་འཛིན་བྱ་ཐབས་ཤེས་ཀྱི་མེད། རྒྱ་ནག་གཞུང་གིས་ང་ཚོར་དུད་འགྲོའི་འདུ་ཤེས་ལས་འཛིན་གྱི་མེད་པས་དུད་འགྲོ་སེམས་ཅན་ལྟར་མནར་གཅོད་གཏོང་རྒྱུ་ཡིན་པ་བོད་མི་ཚོས་ཤེས་ཀྱི་ཡོད་པ་རེད། ང་རང་སྒེར་གྱི་ངོས་ནས་ཀླ་ཀློའི་སྤྱོད་པ་རྩིང་པོ་འདི་ལ་སྙིང་སྟོབས་ཞུམ་ནས་མགོ་སྒུར་མ་མྱོང་། རྒྱུ་མཚན་ནི་མནར་གཅོད་ཀྱི་སྦྱོར་བ་འདིས་ངའི་པུས་མོ་ས་ལ་འཛུགས་སུ་འཇུག་པ་ཤེས་ཀྱི་ཡོད། འོན་ཀྱང་མནར་གཅོད་ཀྱི་ན་ཟུག་ལ་གདོང་ལེན་གྱིས་ཕྱིར་རྐང་པ་གཉིས་ཀྱི་སྒང་ལ་ལངས་རྒྱུའི་སེམས་ཀྱི་དམ་བཅའ་དེ་ནམ་ཡང་འགྱུར་མ་མྱོང་། དེ་ང་གཅིག་བུ་མ་རེད། བོད་མི་ཚང་མར་དཀའ་སྡུག་གི་གདོང་ནས་ལངས་ཐུབ་པའི་སྙིང་སྟོབས་འདི་ཡོད་པ་རེད། ང་ཚོས་དུས་རྒྱུན་རྒྱ་ནག་གི་དབང་འཛིན་པ་ཚོས་ང་ཚོར་དུད་འགྲོའི་འདུ་ཤེས་འཛིན་གྱི་ཡོད་པ་ཤེས་ཀྱི་ཡོད་ལ། ང་ཚོས་དུས་རྒྱུན་མཚན་ཉིད་ཚང་བའི་འགྲོ་བ་མི་ཞིག་ལྟར་རང་ཉིད་རྐང་པ་གཉིས་ཀྱི་སྒང་ལ་ཡང་བསྐྱར་ལངས་ཏེ་རང་ཉིད་འགྲོ་བ་མི་ཞིག་བྱེད་པའི་སེམས་ཐག་བཅད་ཡོད། ཅེས་འགྲེལ་བརྗོད་གནང་འདུག

རྒྱ་ནག་གིས་བོད་མཐོ་སྒང་གི་ཁུལ་དུ་གཞི་རྒྱ་ཆེ་བའི་དམག་སྦྱོང་བྱས་འདུག

རྒྱ་ནག་གི་བཅིངས་གྲོལ་དམག་མིས་བོད་མཐོ་སྒང་གི་ཁུལ་དུ་ Snowfield Duty-2021 ཞེས་པའི་སྟོང་ལོ་ཉེར་གཅིག་གི་གངས་ལྗོངས་ཁུལ་གྱི་འགན་འཁྲིའི་མིང་ཐོག་ནས་དམིགས་འབེན་རྩ་གཏོང་ལ་ཕྱོགས་ཏེ་གཞི་རྒྱ་ཆེ་ཞིང་ཕྱོགས་ངོས་མང་པོའི་འཐབ་ཇུས་རང་བཞིན་གྱི་དམག་སྦྱོང་བྱས་འདུགརྒྱ་ནག་གཞུང་འབྲེལ་གྱིས་གནས་ཚུལ་སྤེལ་བའི་ནང་དུ། ཐེངས་འདིའི་རྒྱ་ནག་གི་བཅིངས་གྲོལ་དམག་མིའི་དམག་སྦྱོང་དེའི་ནང་དུ། བོད་ཁུལ་གྱི་བཅིངས་གྲོལ་དམག་སྡེ་ཆུང་གྲས་བཅུ་ལྷག་གིས་དེར་འཛུལ་ཞུགས་བྱས་པ་མ་ཟད། དེང་རབས་རང་བཞིན་གྱི་ཁྱད་ཆོས་ལྡན་པའི་གོ་མཚོན་གྱི་རིགས་ཀྱང་བེད་སྤྱོད་བྱས་བ་བརྒྱུད་ནས། མཚན་སྨག་གི་ཁྲོད་ནས་དམག་སྦྱོང་དེ་འགོ་འཛུགས་བྱས་ཡོད་པར་བསྒྲགས་འདུག དེ་བཞིན་དམག་སྦྱོང་གི་སྐབས་སུ་མེ་མདའ་ཆེ་ཆུང་ཅི་རིགས་དང་། གཞན་ཡང་འཕུར་མདའ་ཆེད་གཏོང་གི་མ་ལག་ཁག་ཅིག་སྦྱོང་བརྡར་གྱིས་འཐབ་དམག་གི་བརྡ་ཁྱབ་ལྟེ་གནས་དང་གྱེན་འཕུར་གནམ་གྲུར་གཏོར་རྒོལ་བྱེད་ཐབས་ལ་སྦྱོང་བརྡར་བྱས་ཡོད་པ་དང་། དམག་སྦྱོང་གི་སྐབས་སུ་མཚོ་ངོས་ལས་མཐོ་ཚད་མི་ཊར་ ༦༡༠༠ ལྷག་གི་མཚམས་སུ་ས་བབ་དང་མཐུན་པའི་རིག་རྩལ་བསྐྱར་དར་གྱི་ཚད་གཞི་ལྡན་པའི་སྦྱོང་བརྡར་བྱས་ཡོད་པར་འཁོད་འདུག དེ་བཞིན་དམག་སྦྱོང་གི་སྐབས་སུ། གནམ་དམག་ལ་འཐབ་རྒོལ་བྱེད་ཐབས་ཀྱང་སྦྱོང་བརྡར་བྱས་ཡོད་པའི་ཁྲོད་དུ། ལྕགས་ཁྲབ་འཁོར་ལོ་དང་རྐང་དམག   དེ་བཞིན་འཐབ་དམག་གི་འཕྲུལ་རིགས་རླངས་འཁོར་དང་གྱེན་འཕུར་གནམ་གྲུར་རྒོལ་ཐབས་སོགས་ཀྱང་སྦྱོང་བརྡར་སྤྲད་པ་མ་ཟད་དམག་འཐབ་སྐབས་ཀྱི་འགལ་རྫས་དང་བར་ཆད་རིགས་ཟློག་ཐབས་ཀྱི་སྦྱོང་བརྡར་བྱས་འདུགགཞི་རྩའི་འདི་ལོའི་ལོ་མགོ་ནས་བོད་ཉིང་ཁྲིའི་ཁུལ་དུ་བོད་ཀྱི་བྱིས་པ་རྣམས་ལ་དམིགས་བཀར་གྱིས་དམག་གི་སྦྱོང་བརྡར་ལྟེ་གནས་ཤིག་ཆེད་འཛུགས་བྱས་པ་དང་། དེ་རིང་་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ Wion གསར་ཁང་གིས་གནད་དོན་དེ་དང་འབྲེལ་ནས་གནས་ཚུལ་སྤེལ་བའི་ནང་དུ། འདི་ལོའི་དབྱར་གནང་གི་སྐབས་སུ་རྒྱ་ནག་གིས་བོད་ཁུལ་དུ་དམག་སྦྱོང་གི་རིགས་འདྲ་མིན་སྤེལ་བའི་ཁྲོད་དུ། བོད་ཀྱི་བྱིས་པ་ལོ་བརྒྱད་ཅན་གྱིས་ཀྱང་འཛུལ་ཞུགས་བྱེད་དུ་བཅུག་ཡོད་པ་དང་། རྒྱ་ནག་གིས་ལོ་ཆུང་གི་བྱིས་པ་དེ་དག་ལ་དམག་སྦྱོང་སྤྲོད་བཞིན་པ་དེ་ནི་བོད་ཀྱི་བྱིས་པ་དག་རྒྱ་ནག་དམར་ཤོག་ལ་བློ་དཀར་གཞུང་དྲང་གི་འདུ་ཤེས་སྐྲུན་ཐབས་སུ་ཡིན་པར་བསྒྲགས་འདུགགཞན་ཡང་གསར་ཁང་གིས་བོད་ཁུལ་སྤྱི་ཡོངས་སུ་བོད་ཀྱི་བྱིས་པ་རྣམས་ལ་དམག་སྦྱོང་སྤྲོད་ཀྱི་ཡོད་པ་དང་། སྒོས་སུ་རྒྱ་གར་དང་ས་འབྲེལ་ཡོད་པའི་བོད་ཀྱི་ལྷོ་རྒྱུད་ཀྱི་ས་ཁུལ་དུ་རྒྱ་ནག་གིས་བོད་ཀྱི་བྱིས་པ་བརྒྱ་ཙལ་ལ་བཙན་དབང་གིས་དམག་སྦྱོང་གི་ནང་དུ་ཞུགས་སུ་བཅུག་ནས་རྒྱ་ནག་གི་དམར་ཤོག་གི་ལྟ་བ་ཁྱབ་སྤེལ་བྱེད་ཐབས་དང་། དེ་བཞིན་རྒྱ་ནག་ལ་རྒྱལ་ཞེན་གྱི་བསམ་བློ་སྐྲུན་ཐབས། གཞན་ཡང་དབྱར་གནང་གི་སྐབས་སུ་བོད་ཀྱི་བྱིས་པ་དག་ལ་བོད་ཀྱི་སྐད་ཡིག་དང་རིག་གཞུང་ཟབ་ཁྲིད་སོགས་འགོག་ཆེད་དུ་ཡིན་པར་བསྒྲགས་འདུག་པ་མ་ཟད། རྒྱ་ནག་གིས་དེང་སྐབས་བོད་མི་མང་པོ་རྒྱ་ནག་གི་བཅིངས་གྲོལ་དམག་མིའི་ཁོངས་སུ་འཇུག་བཞིན་པ་དང་།  དེ་ནི་བོད་མི་རྣམས་བོད་མཐོ་སྒང་གི་ས་བབ་དང་གནམ་གཤིས་ལ་གདོང་གཏོད་ཐུབ་པའི་ཁྱད་ཆོས་ཡོད་པ་སོགས་ཀྱིས་ཡིན་ལུགས་སོགས་མངོན་གསལ་གནང་འདུག ཉེ་སྔོན་འདི་གའི་གསར་ཁང་གིས་བོད་གནས་ལྟ་ཞིབ་ཁང་ལ་བོད་ནང་གི་བྱིས་པར་དམག་སྦྱོང་སྤྲོད་བཞིན་པ་དང་འབྲལེ་ནས་བཀའ་འདྲི་ཞུས་པའི་ནང་དུ། རྒྱ་གཞུང་གིས་དམིགས་ཡུལ་ངེས་ཅན་ཞིག་ལ་བརྟེན་ནས་ཞིང་པ་དང་འབྲོག་ས་ནས་ཡིན་པའི་བོད་པའི་བྱིས་པ་དང་། ཆབ་སྲིད་བཙོན་ཟུར་བ་རྣམས་ལ་དམིགས་བཀར་གྱིས་དམག་སྦྱོང་ཁང་དུ་སྦྱོང་བརྡར་སོགས་སྤྲད་པ་དེས་བོད་ཀྱི་གནའ་བོའི་རིག་གཞུང་དང་རྒྱལ་རབས། དེབཞིན་སྤྱི་ཚོགས་ལ་ངན་ཕྱོགས་ཀྱི་འགྱུར་བ་ཆེན་པོ་གཏོང་བཞིན་པ་མ་ཟད། བོད་པའི་གཞོན་སྐྱེས་རྣམས་རྒྱ་གཞུང་གིས་བཙན་དབང་འོག་དམག་གི་སྦྱོང་བརྡར་བསྟི་གནས་དང་ལག་ཤེས་སློབ་གསོ་བསྟི་གནང་ཁང་དུ་མར་མི་འགྲོ་ཀ་མེད་ཆགས་ཀྱི་ཡོད་པ་མངོན་གསལ་གནང་ཡོད།

༸གོང་ས་མཆོག་གི་༸སྐུ་པར་ཉར་བ་དང་འབྲེལ་ནས་བོད་མི་དྲུག་ཅུ་ཙམ་འཛིན་བཟུང་།

རྒྱ་གཞུང་གིས་དབྱེ་བའི་ཟི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ། སེར་ཤུལ་རྫོང་རྫ་སྨད་དབོན་པོ་ཁུལ་ནས་བོད་པའི་དགེ་འདུན་པ་ ༡༩ དང་མི་སྐྱ་༤༠ བཅས་ཁྱོན་མི་ ༦༠ ཙམ་འཛིན་བཟུང་བྱས་འདུག་པ་དང་དེ་དག་ལས་མང་ཆེ་བ་༸གོང་ས་མཆོག་གི་༸སྐུ་པར་ཉར་གནང་བའི་ཉེས་མིང་འོག་འཛིན་བཟུང་བྱས་འདུགརླུང་འཕྲིན་ཁང་ལ་འབྲེལ་ཡོད་བོད་མི་ཞིག་གིས་གནས་ཚུལ་མཁོ་སྤྲོད་གནང་བར་ཕྱི་ཟླ་ ༨ ཚེས་ ༢༢ ཉིན་རྫ་སྨད་ཁུལ་དུ་རྒྱའི་དམག་མིའི་རླངས་འཁོར་བདུན་བརྒྱད་ཅིག་འབྱོར་བ་དང་འབྲེལ་ཏེ་རྫ་དབོན་པོ་ཡུལ་ཚོ་ཁུལ་གྱི་དབོན་པོ་དགོན་པའི་དགེ་འདུན་པ་ ༡༩ དང་མི་སྐྱ་ ༤༠ བཅས་ཁྱོན་མི་ ༦༠ ཙམ་སྔ་རྗེས་སུ་འཛིན་བཟུང་བྱས་ནས་སེར་ཤུལ་རྫོང་ཐོག་ཏུ་བཀག་ཉར་བྱེད་བཞིན་པ་རེད་འདུག འཛིན་བཟུང་བྱས་པའི་ཁོངས་ནས་རེ་ཟུང་ཞིག་ལ་རླངས་འཁོར་དང་སྦག་སྦག་གི་ཡིག་ཆ་མེད་པ་སོགས་ཀྱི་རྐྱེན་གྱིས་ཡིན་ཡང་ཕལ་མོ་ཆེ་༸གོང་ས་མཆོག་གི་༸སྐུ་པར་ཉར་གནང་བ་དང་འབྲེལ་འཛིན་བཟུང་བྱས་པ་ཞིག་འདུགདེ་སྔོན་ཨ་རི་ནང་དུ་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པས་གནས་ཚུལ་སྤེལ་བར་འདི་ལོའི་ཕྱི་ཟླ་ ༣ ཚེས་ ༥ ཉིན་ལ་རྒྱ་ནག་གི་བཅིངས་གྲོལ་དམག་གི་ཁྱབ་ཁོངས་སུ་འཇིགས་སྐུལ་ལ་གདོང་ལེན་གྱི་དམག་མི་རུ་ཁག་རྫ་དབོན་པོ་སྡེ་ཁུལ་སོ་སོར་ཆེད་བསྐྱོད་ཀྱིས་བོད་མི་ཁག་ཅིག་གི་ཁྱིམ་ཚང་ལ་གཙང་བཟོ་བྱས་ཚུལ་འོག་༸གོང་ས་མཆོག་གི་༸སྐུ་པར་ཡོད་པའི་བོད་པའི་ཁྱིམ་ཚང་ཁག་ཐོ་འགོད་བྱས་པ་མ་ཟད་བོད་པའི་ཁྱིམ་ཚང་ཁག་ཏུ་རྒྱ་ནག་གི་དཔོན་རིགས་འདྲ་པར་སྒྲིག་གཤོམ་བྱེད་དགོས་པར་བརྗོད་ཡོད། ཐེངས་འདིར་འཛིན་བཟུང་བྱས་པའི་བོད་མི་ཁག་ཅིག་འདི་ལོའི་ཕྱི་ཟླ་ ༣ པའི་ནང་དུ་༸གོང་ས་མཆོག་གི་༸སྐུ་པར་ཉར་མཁན་ཁོངས་སུ་ཐོ་འགོད་ཟིན་པ་ཆགས་ཀྱི་འདུག  ཉེ་ཆར་འགྲེམས་འཇོག་བྱས་པའི་ཉེན་རྟོག་པས་རྫ་སྨད་དབོན་པོ་ཡུལ་ཚོའི་སྡེ་ཁག་གམ་རུ་ཁག་རེ་རེ་བཞིན་བོད་མིའི་ཁྱིམ་ཚང་ཁག་ཏུ་༸གོང་ས་མཆོག་གི་༸སྐུ་པར་ཡོད་མེད་སོགས་ཀྱི་སྔོག་བཤེར་གྱི་བྱ་སྤྱོད་སྤེལ་འདུག ཁ་སང་ཚེས་ ༢༥ ཉིན་ས་གནས་སྲིད་གཞུང་གིས་ཁུལ་དེའི་མང་ཚོགས་ལོ་ན་ ༡༨ ཡན་ཚང་མ་བཙན་དབང་ཐོག་བསྐོང་སྟེ་༸གོང་ས་མཆོག་གི་༸སྐུ་པར་སྒྲིག་གཤོམ་བྱེད་མི་ཆོག་པ་དང་ཁ་པར་ཐོག་ནས་གནས་ཚུལ་དང་པར་རིགས་གང་ཡང་གཏོང་རེས་མི་ཆོག་པ། དེ་བཞིན་ཕྱི་ཕྱོགས་ལ་གནས་ཚུལ་གཏོང་མི་ཆོག་པ་སོགས་ཀྱི་བཀོད་ཁྱབ་བཏང་འདུག རྩ་བའི་དེ་སྔ་ཕྱི་ལོ་ ༢༠༡༩ ལོར་རྫ་སྨད་དབོན་པོ་ཁུལ་དུ་དགེ་འདུན་པ་ཁག་ཅིག་གིས་བོད་དོན་ཡིག་ཆ་གཏོར་འགྲེམས་བྱས་པ་དང་། མི་སྐྱ་ཡོན་ཏན་ལགས་དང་ལྷ་རྒྱལ་ལམ་ཆོས་རྒྱལ་ལགས་གཉིས་ཀྱིས་སྲིད་གཞུང་གི་སྒོ་ཁར་ཕྱིན་ནས་བོད་དོན་ངོ་རྒོལ་གནང་བའི་རྐྱེན་གྱིས་ཁོང་རྣམས་འཛིན་བཟུང་བྱས་ཡོད་པ་མ་ཟད། སྔར་ལོར་རྒྱ་གཞུང་གིས་དབོན་པོ་ཡུལ་ཚོའི་ནས་འཛིན་བཟུང་བྱས་པའི་དགེ་འདུན་པ་བསྟན་འཛིན་ཉི་མ་ལགས་བཀག་ཉར་འོག་གཅར་རྡུང་ཚད་མེད་བཏང་སྟེ་དམར་གསོད་བཏང་བའི་གནས་ཚུལ་ཡང་ཤེས་རྟོགས་བྱུང་ཡོད་པ་ལྟར། དེའི་རྐྱེན་གྱིས་འདི་ལོའི་ཕྱི་ཟླ་ ༣ ནང་རྒྱ་གཞུང་གི་དྲག་ཆས་དམག་མི་བསླེབས་ནས་དམ་དྲག་བྱས་པ་དང་། ད་ལྟ་བོད་མི་ ༦༠ སྐོར་ཞིག་འཛིན་བཟུང་བྱས་ཡོད་པའི་གནས་ཚུལ་བྱུང་ཡོད་པར་ངོས་འཛིན་གནང་བཞིན་འདུག རྒྱ་གཞུང་གིས་རྫ་དབོན་པོས་གཙོས་པའི་བོད་ཀྱི་ས་ཁུལ་ཁག་ཏུ་འབྲོག་པ་གཞིས་སྤོར་གྱི་སྲིད་བྱུས་འོག་བོད་མིའི་འཚོ་བའི་གནས་སྟངས་དང་ཐུན་མོང་མ་ཡིན་པའི་རིག་གཞུང་རྩ་བརླག་འགྲོ་བཞིན་པ་དང་། ༸གོང་ས་མཆོག་གི་༸སྐུ་པར་ཉར་ཚགས་ལ་དམ་དྲག བོད་མི་རྣམས་ལ་བཙན་དབང་གིས་རྒྱ་ནག་གཞུང་ལ་དགའ་མོས་དང་༸གོང་ས་མཆོག་ལ་མཚན་སྨད་ཞུ་བཅུག་པ་སོགས་ལ་བརྟེན་ནས་བོད་མིས་ངོ་རྒོལ་གྱི་རྣམ་པ་དེ་ལྟར་ཐོན་བཞིན་ཡོད་པ་གསུངས་ཡོད།

ཞི་ཅིན་ཕིང་གི་དགོངས་པ་ཞེས་བ་རྒྱ་ནག་གི་བསླབ་གཞིའི་ནང་དུ་འཇུག་བཞིན་པ།

རྒྱ་ནག་དམར་ཤོག་སྲིད་གཞུང་གི་ཤེས་རིག་ལྷན་ཁང་གིས་ཡུལ་དེའི་སློབ་གྲྭ་ཆེ་འབྲིང་ཆུང་གསུམ་གྱི་བསླབ་གཞིའི་ནང་དུ་སྲིད་འཛིན་ཞི་ཅིན་ཕིང་གི་ཆབ་སྲིད་ཀྱི་ལྟ་གྲུབ་ངེས་བར་དུ་འཇུག་དགོས་བའི་གཞུང་འབྲེལ་གྱི་བཀའ་རྒྱ་བཏང་འདུགདེ་རིང་BBC གསར་ཁང་གིས་གནས་ཚུལ་སྤེལ་བའི་ནང་དུ། རྒྱ་ནག་གིས་ད་ཆ་རྒྱལ་ནང་གི་སློབ་གྲྭ་ཁག་གི་ནང་དུ་སྲིད་འཛིན་ཞི་ཅིན་ཕིང་གི་ལྟ་བ་གཙོ་བོར་བྱས་པའི་བསླབ་གཞི་རྩ་འཛུགས་ཀྱིས། ཞི་ཅིན་ཕིང་གི་ལྟ་བས་ན་གཞོན་རྣམས་ལ་དམར་ཤོག་གི་ལྟ་བར་ཡིད་ཆེས་སྐྲུན་རྒྱུར་ནུས་བ་ཐོན་རྒྱུ་ཡིན་སྐོར་བསྒྲགས་འདུག གསར་ཁང་གིས་ཞི་ཅིན་ཕིང་གི་ཆབ་སྲིད་ལྟ་གྲུབ་རྒྱ་ནག་གི་སློབ་གྲྭ་ཆེ་འབྲིང་ཆུང་གསུམ་གྱི་བསླབ་གཞིའི་ནང་དུ་འཇུག་རྒྱུའི་གནད་དོན་དེ་ནི་ཞི་ཅིན་ཕིང་ངོས་ནས་ཡུལ་དེའི་སྤྱི་ཚོགས་ཁྱོན་ཡོངས་དམར་ཤོག་སྲིད་གཞུང་གི་དབང་བསྒྱུར་གྱི་འོག་ཏུ་ཕྱོགས་གཅིག་ཏུ་སྒྲིལ་ཐབས་ལ་འབད་བརྩོན་བྱེད་བཞིན་པ་ཞིག་ཡིན་སྐོར་འགྲེལ་བརྗོད་དང་སྦྲགས། རྒྱ་ནག་གི་ཤེས་རིག་ལྷན་ཁང་གིས་སྤེལ་བའི་གནས་ཚུལ་ལུང་འདྲེན་གནང་བའི་ནང་དུ། ཞི་ཅིན་ཕིང་གི་ལྟ་བ་བསླབ་གཞིའི་ནང་དུ་འཇུག་རྒྱུ་དེ་ནི་སྤྱི་ཚོགས་རིང་ལུགས་དང་མཐུན་པའི་ཀུན་སྤྱོད་སློབ་གསོ་དང་རྣམ་དཔྱོད་བཀྲ་བ། དེ་བཞིན་མཛེས་ཆོས་རིག་པའི་རྒྱུད་འཛིན་ཁྱབ་སྤེལ་གཏོང་ཐབས་དང་། གཞན་ཡང་བདེ་འཇགས་དང་ངལ་རྩོལ་གྱི་སློབ་གསོ་སོགས་རྒྱུད་དུ་འཇགས་ཐབས་ལ་དམིགས་པ་ཞིག་ཡིན་སྐོར་འབྲེལ་བརྗོད་གནང་འདུགརྩ་བའི་རྒྱ་ནག་གཞུང་གིས་ཞི་ཅིན་ཕིང་གི་ལྟ་གྲུབ་ཞེས་པ་དེ་བཞིན་ཕྱི་ལོ་ ༢༠༡༨ ལོར་རྒྱ་ནག་རྒྱལ་ཁབ་ཀྱི་རྩ་ཁྲིམས་ཀྱི་ནང་དུ་བཅུག་ཟིན་ཡོད་པ་མ་ཟད། སྐབས་དེ་ནས་བཟུང་ཞི་ཅིན་ཕིང་གི་ལྟ་གྲུབ་འམ་དགོངས་པ་ཞེས་པ་དེ་རྒྱ་ནག་གི་ན་གཞོན་ཆབ་སྲིད་ཕྱོགས་ཁག་དང་གཙུག་ལག་སློབ་གྲྭ་ཁག་ཏུ་ཁྱབ་སྤེལ་བཏང་དང་གཏོང་བཞིན་ཡོད་པ་དང་། སྤྱིར་ཞི་ཅིན་ཕིང་གི་ལྟ་གྲུབ་ནང་དམར་ཤོག་གི་ལྟ་གྲུབ་གཙོ་བཟུང་བྱས་པའི་དོན་ཚན་༡༤ དང་། གཞན་ཡང་ལྟ་བ་གསར་བའི་ཐོག་ནས་སྤྱི་ཚོགས་བསྐྱར་བཟོ་དང་། དམར་ཤོག་ཚོགས་པར་རྒྱ་ནག་གི་དམར་དམག་དང་འབྲེལ་བའི་དབང་ཚད་ཡོད་ཚད་ཡོད་རབས། དེ་བཞིན་རྒྱལ་ཁབ་གཅིག་དང་ལམ་ལུགས་གཉིས་གཙོ་འཛིན་གྱི་ཐོག་ནས་མེས་རྒྱལ་གཅིག་སྒྲིལ་བྱེད་དགོས་བ་སོགས་ཀྱང་ཡོད་པ་རེད་འདུག རྒྱ་ནག་གི་གཞུང་འབྲེལ་བརྒྱུད་ལམ་ཐོག་འཁོད་པར་གཞིགས་ན། ཐེངས་འདིར་བསླབ་གཞིའི་ནང་དུ་བཅུག་པའི་ཞི་ཅིན་ཕིང་གི་ལྟ་གྲུབ་དེ་ད་དུང་ཁྱབ་ཆེ་བ་ཡོད་པ་དང་། དེའང་སློབ་ཆུང་གི་སློབ་གསོའི་ནང་དུ། རྒྱ་དམག་དམར་ཤོག་སྲིད་གཞུང་དང་སྤྱི་ཚོགས་རིང་ལུགས་ལ་དགའ་ཞེན་སྐྲུན་ཐབས་དང་། སློབ་འབྲིང་གི་ནང་དུ་ཆབ་སྲིད་དང་འབྲེལ་བའི་ལྟ་ཕྱོགས་དང་ཉམས་མྱོང་གཙོར་འཛིན་བྱས་པ་དང་། དེ་བཞིན་སློབ་ཆེན་གྱི་ནང་དུ་གཞུང་ལུགས་དང་མཐུན་པའི་བསམ་བློའི་ཕྱོགས་ལ་ཤུགས་སྣོན་རྒྱག་རྒྱུ་ཡིན་པར་མངོན་གསལ་གནང་འདུགགཞི་རྩའི་རྒྱ་ནག་དམར་ཤོག་ཚོགས་པའི་ངོས་ནས་ལོ་ཤས་ནས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ཞེས་པ་དེ་རྒྱ་ནག་རྒྱལ་ཡོངས་སུ་ཁྱབ་སྤེལ་ཤུགས་ཆེ་བྱས་དང་བྱེད་མུས་མ་ཟད། སྔ་ལོའི་ལོ་མཇུག་ཏུ་ཐོན་པའི་གནས་ཚུལ་ནང་གསལ་ལྟར་ནར། ད་སྐབས་བོད་ནང་དུའང་བོད་མི་ན་གཞོན་རྣམས་ཀྱིས། གླ་ཕོག་མཐོ་བའི་ལས་ཀའི་གོ་སྐབས་འཚོལ་སྐབས་རྒྱ་ནག་དམར་ཤོག་ཚོགས་པར་འཛུལ་ཞུགས་དང་འབྲེལ། ཞི་ཅིན་ཕིང་གི་ལྟ་གྲུབ་ལ་སློབ་སྦྱོང་མི་བྱེད་ཀ་མེད་ཆགས་ཡོད་པ་རེད་འདུགམ་ཟད་སྔ་ལོར་རྒྱ་ནག་གི་ལོ་ལྔ་ཚན་བཅུ་བཞི་བའི་ཚོགས་འདུ་སྐབས་གཏན་འཁེལ་བྱས་པ་ལྟར། འབྱུང་འགྱུར་གྱི་ཕྱི་ཟླ་ ༩ པ་ནས་བཟུང་རྒྱ་ནག་གི་ཞིང་ཆེན་དང་རང་སྐྱོང་ས་ཁུལ། གྲོང་སྡེ་ཁག་སོགས་ནས་ཞི་ཅིན་ཕིང་གིས་རྒྱ་ནག་ནང་གི་སྐད་ཡིག་སློབ་གསོའི་ཐད་གནང་བའི་ལམ་སྟོན་དང་དགོངས་པར་སློབ་སྦྱོང་ཡང་དག་ཟེར་བ་ལག་བསྟར་ཡོང་སླད། བོད་ཁུལ་ཡོངས་ཀྱི་མཚོན་པའི་གྲངས་ཉུང་མི་རིགས་ས་ཁུལ་དང་གྲོང་གསེབ་ས་ཁུལ་གྱི་བྱིས་པ་རྣམས་ལ་རྒྱ་སྐད་རྒྱ་ཡིག་སློབ་ཁྲིད་ཀྱིས། ཆུང་དུས་ནས་རྒྱའི་སྐད་ཡིག་གི་བག་ཆགས་ཟབ་མོ་བཞག་སྟེ། མི་སྒེར་འཕེལ་རྒྱས་དང་རིག་རྩལ་ལྡན་པ་ཞིག་ཏུ་བཟོས་པ་བརྒྱུད་གྲོང་གསེབ་གོང་འཕེལ་དང་། ཀྲུང་ཧཱ་མི་རིགས་ཆེན་མོའི་གཞིས་ཁྱིམ་སྲ་བརྟན་གྱི་འདུ་ཤེས་ཡོད་མཁན་ཟེར་བ་ཞིག་ཏུ་བསྒྱུར་དགོས་སྐོར་བསྒྲགས་ཡོད་པ་དང་། སྲིད་བྱུས་ཏེ་དངོས་སུ་བོད་ཁུལ་དུ་ལག་བསྟར་བྱས་པའི་ཁྲོད་ནས། ཟླ་བ་སྔོན་མའི་ནང་དུ། མདོ་སྨད་མགོ་ལོག་ཁུལ་གྱི་སེང་འབྲུག་སྟག་རྩེ་སློབ་གྲྭ་སློབ་གྲྭ་བཙན་དབང་གིས་སྒོ་རྒྱག་ཏུ་བཅུག་པ་དང་། དེ་བཞིན་ ཁམས་དཀར་མཛེས་ཏྲེ་ཧོར་རོང་པ་ཚ་ས་ཁུལ་གྱི་རྒྱལ་བསྟན་དགེ་རྩ་སློབ་གྲྭར་ཟླ་བ་སྔོན་མའི་ནང་རྒྱ་ནག་གིས་བཙན་བཀའ་བཏང་སྟེ། དགེ་རྒན་རྣམས་ཀྱིས་སློབ་གྲྭ་དེའི་བསླབ་གཞི་ཁག་རྒྱ་ཡིག་གི་ལམ་ནས་སློབ་ཁྲིད་བྱེད་དགོས་བ་དང་། དགེ་རྒན་རྣམས་ཀྱིས་རྒྱ་ནག་གི་བཀའ་ལྟར་མ་སྒྲུབ་ན་སློབ་གྲྭ་སྒོ་རྒྱག་རྒྱུ་ཡིན་པའི་འཇིགས་སྐུལ་བྱས་པའི་གནས་ཚུལ་ཐོན་ཡོད་པ་རེད།    

རྒྱལ་བསྟན་དགེ་རྩ་སློབ་གྲྭའི་བསླབ་གཞི་ཁག་རྒྱ་སྒྱུར་གྱི་བཙན་བཀའ་བཏང་བ།

ཁམས་དཀར་མཛེས་ཏྲེ་ཧོར་རོང་པ་ཚ་ས་ཁུལ་གྱི་རྒྱལ་བསྟན་དགེ་རྩ་སློབ་གྲྭར་ཟླ་བ་སྔོན་མའི་ནང་རྒྱ་ནག་གིས་བཙན་བཀའ་བཏང་སྟེ། དགེ་རྒན་རྣམས་ཀྱིས་སློབ་གྲྭ་དེའི་བསླབ་གཞི་ཁག་རྒྱ་ཡིག་གི་ལམ་ནས་སློབ་ཁྲིད་བྱེད་དགོས་བ་དང་། དགེ་རྒན་རྣམས་ཀྱིས་རྒྱ་ནག་གི་བཀའ་ལྟར་མ་སྒྲུབ་ན་སློབ་གྲྭ་སྒོ་རྒྱག་རྒྱུ་ཡིན་པའི་འཇིགས་སྐུལ་བྱས་འདུག དེ་ཡང་ཁ་སང་བོད་གནས་ལྟ་ཞིབ་ཁང་གིས་གནས་ཚུལ་སྤེལ་བའི་ནང་དུ། འདི་ལོའི་ཟླ་བ་བདུན་པའི་ཟླ་འགོར་རྒྱ་ནག་དམར་ཤོག་སྲིད་གཞུང་གི་ཁུལ་དེའི་འབྲེལ་ཡོད་དཔོན་རིགས་ཀྱིས་རྒྱལ་བསྟན་དགེ་རྩ་སློབ་གྲྭར་བཙན་བཀའ་བཏང་སྟེ། སློབ་གྲྭ་དེའི་བསླབ་གཞིའི་གཙོ་རྒྱུགས་ཀྱི་སྐད་ཡིག་དེ་རྒྱ་ཡིག་འཇོག་དགོས་བ་མ་ཟད། ཡིག་རྒྱུགས་ཀྱང་རྒྱ་ཡིག་གི་ལམ་ནས་གཏོང་དགོས་བར་བཙན་སྐུལ་གྱིས། རྒྱ་ནག་གི་བཀས་བཀོད་ལྟར་མ་སྒྲུབ་ཚེ་སློབ་གྲྭ་དེ་འཕྲལ་དུ་སྒོ་རྒྱག་རྒྱུ་ཡིན་སྐོར་གྱིས་འཇིགས་སྐུལ་བྱས་ཡོད་པར་བཀོད་འདུག རྒྱལ་བསྟན་དགེ་རྩ་སློབ་གྲྭ་ནི་ཕྱི་ལོ ༡༩༩༤ ལོར་བླ་མ་རྒྱལ་མཚན་བྱམས་པ་ལགས་ཀྱིས་གསར་འཛུགས་གནང་བ་ཞིག་ཡིན་ཞིང་། སློབ་གྲྭ་དེར་བོད་ཀྱི་སློབ་ཕྲུག་རྣམས་ལ་རྒྱ་བོད་དབྱིན་གསུམ་གྱི་གཙོ་བྱས་པའི་འཚེམ་བཟོ་དང་རི་མོ་སོགས་ཀྱི་ལག་ཤེས་ཀྱི་སློབ་སྦྱོང་སྣ་མང་ཞིག་སྤྲོད་བཞིན་ཡོད་པ་དང་། ད་ལྟའི་བར་དུ་སློབ་གྲྭ་དེ་ནས་བོད་ཀྱི་སློབ་མ་ ༦༠༠ ལྷག་དངོས་སུ་སློབ་མཐར་ཕྱིན་ཡོད་པ་མ་ཟད། སློབ་ཁྲིད་ཀྱི་དགེ་རྒན་ཡང་༣༥ ལྷག་ཡོད་པ་ལྟར་ལོ་རེར་སློབ་འཇུག་གསར་དུ་བྱེད་མཁན་གྱི་སློབ་མའི་གྲངས་ཚད་ཀྱང་མང་དུ་འཕེལ་བཞིན་ཡོད་པ་ལྟར། ཟི་ཁྲོན་ཞིང་ཆེན་སྤྱི་ཚོགས་ནུས་པ་ལྡན་པའི་སློབ་འཛུགས་སྔོན་ཐོན་མི་སྣའི་བྱ་དགའ་ཞེས་པ་ཡང་སྤྲད་པ་རེད།འདི་གས་གསར་འགོད་པས་བཞུགས་སྒར་ཁུལ་གྱི་བོད་གནས་ལྟ་ཞིབ་ཁང་གི་ཉམས་ཞིབ་པ་པདྨ་རྒྱལ་ལགས་སུ་ཐེངས་འདིར་རྒྱ་ནག་གིས་བཙན་བཀའ་བཏང་་བའི་རྒྱལ་བསྟན་དགེ་རྩ་སློབ་གྲྭ་དང་འབྲེལ་བའི་གནས་ཚུལ་སྐོར་ནས་བཀའ་འདྲི་ཞུས་པར་ཁོང་གིས་རྒྱ་ནག་གིས་བོད་ཁུལ་དུ་སྲིད་བྱུས་སྣ་མང་ཞིག་ལག་བསྟར་གྱིས་བོད་ཀྱི་སྐད་ཡིག་སློབ་ཁྲིད་དང་སློབ་སྦྱོང་གི་ཁོར་ཡུག་ལ་ཚོད་འཛིན་གྱིས་སྐད་ཡིག་རྩ་མེད་བཟོ་བཞིན་པར་བརྟེན་ནས་བོད་ཁུལ་གྱི་བོད་སྐད་ཡིག་རྒྱ་བསྒྱུར་གྱི་ལས་གཞི་དེ་ནི་བོད་ས་ཡོངས་རྫོགས་རྒྱ་ནག་གི་ངོ་བོར་བསྒྱུར་རྒྱུའི་ལས་གཞི་ཆེན་པོ་ཞིག་ཡིན་ཚུལ་དང་འབྲེལ་ནས། དངོས་སུ་བོད་ཁུལ་ནས་ཤེས་ཡོན་སློབ་གསོའི་སྒང་ནས་སྤྱི་ཚོགས་ཀྱི་ནང་དུ་ནུས་བ་ཆེན་པོ་ཐོན་བཞིན་པའི་སྒེར་གཉེར་གྱི་སློབ་གྲྭ་ཁག་མང་པོ་ཞིག་སྒོ་རྒྱག་བཞིན་པར་ངོ་སྤྲོད་གནང་སོང་།གཞི་རྩའི་འདི་ལོར་གསར་དུ་གནས་ཚུལ་ཐོན་པ་ལྟར་ན་རྒྱ་ནག་གི་ཤེས་རིག་ལྷན་ཁང་ཟེར་བས་ཡོངས་གྲགས་ཀྱིས་གནས་ཚུལ་སྤེལ་བའི་ནང་དུ། སྔ་ལོར་ལོ་ལྔ་ཚན་བཅུ་བཞི་བའི་ཚོགས་འདུ་སྐབས་གཏན་འཁེལ་བྱས་པ་ལྟར། འབྱུང་འགྱུར་གྱི་ཕྱི་ཟླ་ ༩ པ་ནས་བཟུང་རྒྱ་ནག་གི་ཞིང་ཆེན་དང་རང་སྐྱོང་ས་ཁུལ། གྲོང་སྡེ་ཁག་སོགས་ནས་ཞི་ཅིན་ཕིང་གིས་རྒྱ་ནག་ནང་གི་སྐད་ཡིག་སློབ་གསོའི་ཐད་གནང་བའི་ལམ་སྟོན་དང་དགོངས་པར་སློབ་སྦྱོང་ཡང་དག་ཟེར་བ་ལག་བསྟར་ཡོང་སླད། གྲངས་ཉུང་མི་རིགས་ས་ཁུལ་དང་གྲོང་གསེབ་ས་ཁུལ་གྱི་བྱིས་པ་རྣམས་ལ་རྒྱ་སྐད་རྒྱ་ཡིག་སློབ་ཁྲིད་ཀྱིས། ཆུང་དུས་ནས་རྒྱའི་སྐད་ཡིག་གི་བག་ཆགས་ཟབ་མོ་བཞག་སྟེ། མི་སྒེར་འཕེལ་རྒྱས་དང་རིག་རྩལ་ལྡན་པ་ཞིག་ཏུ་བཟོས་པ་བརྒྱུད་གྲོང་གསེབ་གོང་འཕེལ་དང་། ཀྲུང་ཧཱ་མི་རིགས་ཆེན་མོའི་གཞིས་ཁྱིམ་སྲ་བརྟན་གྱི་འདུ་ཤེས་ཡོད་མཁན་ཟེར་བ་ཞིག་ཏུ་བསྒྱུར་དགོས་སྐོར་བསྒྲགས་ཡོད་པ་ལྟར་ད་ཆ་དངོས་སུ་སྲིད་བྱུས་དེ་ལག་བསྟར་གྱིས་ཉེ་ལམ་ཟླ་བ་སྔོན་མའི་ནང་དུ་དངོས་སུ་མདོ་སྨད་མགོ་ལོག་ཁུལ་གྱི་སེང་འབྲུག་སྟག་རྩེ་སློབ་གྲྭ་ཞེས་པ་དེ་སྒོ་རྒྱབ་པ་མ་ཟད་དེར་འབྲེལ་གྱི་བོད་ཡིག་དགེ་རྒན་ཞིག་ཀྱང་རྒྱ་ནག་གིས་འཛིན་བཟུང་བཙན་ཁྲིད་བྱས་ཡོད་པ་རེད། གནད་དོན་དེ་དང་འབྲེལ་ནས་པདྨ་རྒྱལ་ལགས་ཀྱིས་འདི་ལོའི་སློབ་སྐབས་གསར་བ་འགོ་བཙུགས་པ་ནས་བཟུང་རྒྱ་ནག་གིས་རྒྱ་ནག་རྒྱལ་ཡོངས་དང་སྒོས་སུ་བོད་ཁུལ་དུ་རྒྱ་ནག་གི་སྤྱི་སྐད་གཙོར་འཛིན་ཞེས་པའི་སྲིད་བྱུས་འོག་བསླབ་གཞིའི་མ་སྐད་དེ་རྒྱ་ཡིག་བཞག་ཡོད་པ་དང་འབྲེལ་ནས་བྱིས་པ་ཆུང་ཆུང་ནས་རྒྱ་ནག་གི་སྐད་ཡིག་དང་རིག་གཞུང་གི་ཤན་ཤུགས་ཐེབས་ཐབས་སུ་སྲིད་བྱུས་དེ་འདྲ་ཞིག་ལག་བསྟར་བྱེད་བཞིན་ཡོད་པར་མངོན་གསལ་གནང་སོང་།གཞི་རྩའི་ཁམས་དཀར་མཛེས་ཏྲེ་ཧོར་རོང་པ་ཚ་ས་ཁུལ་གྱི་རྒྱལ་བསྟན་དགེ་རྩ་སློབ་གྲྭ་དེ་གསར་འཛུགས་གནང་མཁན་གྱི་བླ་མ་རྒྱལ་མཚན་བློ་བཟང་བྱམས་པ་ལགས་ནི་ཕྱི་ལོ་ ༡༩༤༩་ལོར་དགུང་ལོ་གསུམ་གྱི་སྟེང་རྒྱ་ནག་གིས་ས་བགོས་བྱས་པའི་ཁམས་དཀར་མཛེས་བོད་རིགས་རང་སྐྱོང་ས་ཁུལ་གྱི་ཏྲེ་ཧོར་བཀྲ་ཤིས་དར་རྒྱས་དགོན་པའི་བླ་མ་རྒྱལ་མཚན་རིན་པོ་ཆེ་མཆོག་གི་ཡང་སྲིད་དུ་ངོས་འཛིན་གནང་བ་བརྒྱུད་ནས། ཁོང་གི་མཐུན་འགྱུར་རོགས་རམས་ཁྲོད་སློབ་གྲྭ་དེ་གསར་འཛུགས་ཀྱིས་བོད་རིགས་སློབ་མ་རྣམས་ལ་རིན་མེད་ཀྱིས་ཤེས་ཡོན་སློབ་སྦྱོང་སྤྲོད་བཞིན་པ་ཞིག་ཆགས་ཡོད་པ་དང་། ཁོང་ད་ཆ་རྒྱ་ནག་གི་རྒྱལ་ཡོངས་མི་མང་འཐུས་མི་ལྷན་ཚོགས་ཀྱི་ཚོགས་མི་ཞིག་དང་ཟི་ཁྲོན་ནང་བསྟན་ལྷན་ཚོགས་ཀྱི་ཚོགས་གཞོན་ཡང་ཆགས་ཡོད་འདུག རྩ་བའི་ཉེ་སྔོན་Financial Times ཞེས་པའི་གསར་ཁང་གིས་རྒྱ་ནག་ནང་གི་སྒེར་གཉེར་སློབ་གྲྭའི་གནས་ཚུལ་རྒྱུས་ལོན་བྱས་པའི་ནང་དུ། རྒྱ་ནག་གི་ནང་དུ་མ་མཐའ་ཡང་སྒེར་གཉེར་སློབ་གྲྭ་འབུམ་གཉིས་མ་ཟིན་ཙམ་ཡོད་པ་དང་། དེ་དག་གི་ཁོངས་སུ་སྒེར་གཉེར་གྱི་སློབ་གྲྭ་འགྲིམས་མཁན་གྱི་སློབ་མའི་གྲངས་ཚད་ས་ཡ་ ༥༦ ཙམ་ཟིན་ཡོད་པར་ཤེས་རྟོག་བྱུང་ཡོད་ནའང་། ད་ཆ་རྒྱ་ནག་ནང་གི་སྒེར་གཉེར་གྱི་སློབ་གྲྭ་ཁག་སྲིད་གཞུང་གི་བཀའ་རྒྱའི་འོག་ཡོངས་སུ་སྒོ་རྒྱག་རྒྱུ་ཡིན་པར་འཁོད་འདུག

བོད་རིགས་སློབ་མ་ཞིག་གིས་བོད་ཡིག་སློབ་ཁྲིད་གཙོར་འཛིན་གྱི་སྙན་ཞུ་ཕུལ་རྐྱེན་འཛིན་བཟུང་།

རྒྱ་ནག་གཞུང་གིས་རྔ་བ་ཁུལ་སྤྲོ་ཚིགས་ཡུལ་ཚོའི་གཞོན་ནུ་ཤེས་རབ་རྡོ་རྗེ་ཞུ་བ་ཞིག་དང་ཁོང་གི་སློབ་གྲོགས་སྐོར་ཞིག་ཟླ་འདིའི་ཚེས་ ༡༦ ཉིན་རང་གི་ཡུལ་ཚོ་ནས་འཛིན་བཟུང་བྱས་ཏེ་བཀག་སྐྱིལ་བྱས་པའི་ཁྲོད། སློབ་གཞན་རྣམས་གནས་སྐབས་སུ་གློད་གྲོལ་བཏང་ཡོད་ཀྱང་ཤེས་རབ་རྡོ་རྗེ་ལགས་མུ་མཐུད་དུ་བཀག་ཉར་བྱེད་བཞིན་པ་རེད་འདུགཁ་སང་བཞུགས་སྒར་ཁུལ་གྱི་བོད་གནས་ལྟ་ཞིབ་ཁང་གིས་གནས་ཚུལ་སྤེལ་བ་ལྟར་ན། ཤེས་རབ་རྡོ་རྗེ་ལགས་ཀྱིས་ས་གནས་ཀྱི་རྒྱ་ནག་གི་དཔོན་རིགས་ལ་ཡུལ་ཚོའི་སློབ་གྲྭའི་ནང་དུ་བསླབ་གཞིའི་མ་ཡིག་དེ་བོད་སྐད་བོད་ཡིག་འཇོག་དགོས་བའི་ཞུ་ཡིག་ཕུལ་ཡོད་པ་དང་། དེ་བཞིན་ཟླ་འདིའི་ཚེས་ ༡༤ ཉིན་རྒྱ་ནག་གི་ཉེན་རྟོག་པས་སྤྲོ་ཚིགས་ཡུལ་ཚོའི་སློབ་མ་རྣམས་སྐོང་འགུག་གིས་རྒྱ་ནག་དམར་ཤོག་གཞུང་ལ་བསྟོད་པ་དང་བདེ་འཇགས་དང་འབྲེལ་བའི་ཤེས་ཡོན་སློབ་གསོའི་དྲིལ་བསྒྲགས་ཀྱི་ཚོགས་འདུ་ཞིག་བསྡུས་ཡོད་པའི་ཁྲོད། རང་ལོ་ ༡༩ ཡིན་པའི་ཤེས་རབ་རྡོ་རྗེ་ལགས་ཀྱིས་སྐབས་དེར་ཚོགས་བཅར་ཞུས་མེད་སྟབས། ཚེས་བཅུ་དྲུག་གི་ཉིན་རྒྱ་ནག་གིས་ཁོང་དང་ཁོང་གི་སློབ་གྲོགས་སྐོར་ཞིག་འཛིན་བཟུང་ཡོད་པར་འཁོད་འདུགལྟ་ཞིབ་ཁང་གིས་གནས་ཚུལ་རྒྱུས་ལོན་བྱས་པ་ལྟར་ན། འདི་ལོའི་དབྱར་གནང་རྫོགས་ནས་སློབ་སྐབས་གསར་བ་འགོ་འཛུགས་གནང་སྐབས། རྒྱ་ནག་གིས་སྤྲོ་ཚིགས་ཡུལ་ཚོའི་སློབ་གྲྭའི་བསླབ་གཞི་ཁག་ལ་འགྱུར་བ་བཏང་ནས། སློབ་ཁྲིད་ཀྱི་གཙོ་རྒྱུགས་མ་སྐད་དེ་རྒྱ་ཡིག་གི་ངོ་བོར་བསྒྱུར་ཡོད་སྟབས། ཤེས་རབ་རྡོ་རྗེ་ལགས་དང་ཁོང་གི་སློབ་གྲོགས་སྐོར་ཞིག་གིས་མཉམ་འབྲེལ་གྱིས་རྒྱ་ནག་གི་ཤེས་རིག་གི་གོང་རིམ་དཔོན་རིགས་ལ་གནད་དོན་དེར་འབྲེལ་གྱི་སྙན་ཞུ་ཞིག་ཕུལ་ཏེ། བསླབ་གཞིའི་གཙོ་རྒྱུགས་ཀྱི་མ་སྐད་བོད་ཡིག་གི་ནང་དུ་ཁྲིད་རྒྱུའི་རེ་ཞུ་བྱས་ཡོད་སྟབས། ད་ཐེངས་ཁོང་འཛིན་བཟུང་བྱས་པ་ཡང་གཙོ་བོ་གནད་དོན་དེ་དང་འབྲེལ་བ་ཆགས་ཡོད་སྐོར་གསལ་འདུགགཞི་རྩའི་འདི་ལོར་རྒྱ་ནག་གིས་ཟི་ཁྲོན་ཞིང་ཆེན་ཁུལ་དུ་ཡོད་པའི་བོད་རིགས་སློབ་གྲྭ་མང་པོ་ཞིག་གི་ནང་དུ་རྒྱ་ནག་གི་ཆབ་སྲིད་དང་འབྲེལ་དྲིལ་བསྒྲགས་རིགས་ཁྱབ་སྤེལ་ཆེས་ཆེར་བྱས་ཏེ་བོད་རིགས་སློབ་གྲྭ་མང་པོ་ཞིག་གི་བསླབ་གཞིའི་རྩ་འཛིན་ཡོངས་སུ་རྒྱ་ཡིག་གི་ནང་དུ་སློབ་ཁྲིད་བྱེད་རྒྱུའི་སྲིད་བྱུས་ལག་བསྟར་བྱེད་བཞིན་ཡོད་པ་དང་། ཟླ་སྔོན་མའི་ཚེས་༢༠ ཡས་མས་ཤིག་ལ་རང་ལོ་༤༥ ཙམ་ཡིན་པའི་རྔ་པ་རྫོང་སྤྲོ་ཚིགས་དགོན་པའི་དགེ་བསྐོས་དཀོན་མེ་ལགས་ཀྱང་རྒྱ་གཞུང་གིས་འཛིན་བཟུང་བྱས་ཏེ་ད་ལྟ་མུ་མཐུད་བཀག་ཉར་བྱས་ཡོད་པ་ལས་ཁོང་ཅིའི་ཕྱིར་འཛིན་བཟུང་བྱས་པ་སོགས་ཀྱི་གནས་ཚུལ་ཁ་གསལ་ཆགས་མེད་པར་ལྷག་ཡོད་པ་རེད། དེ་བཞིན་ཁ་ཉིན་ཟླ་བ་ ༨ པའི་ཚེས་༨ ཉིན་སྟེ། ཀིརྟི་རིན་པོ་ཆེ་མཆོག་གི་འཁྲུངས་སྐར་གྱི་ཉིན་ལ་ཡང་། རྒྱ་ནག་གི་རྔ་བ་ཀིརྟི་དགོན་གྱི་གཙོ་བྱས་པའི་ཁུལ་དེའི་དགོན་ཁག་མང་པོ་ཞིག་གི་མཐའ་སྐོར་དུ་གོ་མཚོན་ཐོགས་པའི་རྒྱ་ནག་གི་དམག་མི་འགྲེམས་འཇོག་གིས་གྲྭ་མང་གི་འགྲོ་འདུག་ལ་སྟངས་འཛིན་ནན་མོ་བྱས་པ་མ་ཟད། མང་ཚོགས་ཀྱི་ཁ་པར་ལ་ཡང་འབྲེལ་ཡོད་ཀྱི་ཆེད་མཁས་འཕྲུལ་ལས་སྡེ་ཁག་གིས་ཞིབ་བཤེར་བྱས་པའི་གནས་ཚུལ་བྱུང་ཡོད་པ་རེད།གཞི་རྩའི་ཕྱོགས་གཅིག་གིས་ད་ལྟའི་ཆར་རྒྱ་ནག་གི་བོད་ནང་དུ་ཞི་བའི་བཅིངས་གྲོལ་ཟེར་བ་བཏང་ནས་མང་ཚོགས་རང་དབང་དང་བདེ་སྐྱིད་སྐྲུན་བཞིན་པར་དྲིལ་བསྒྲགས་བྱེད་ཀྱི་ཡོད་པ་མ་ཟད། རྒྱ་ནག་གི་གཞུང་འབྲེལ་གྱི་ཞིན་ཧ་གསར་ཁང་གིས་སྐབས་འདིར་ཆེད་དུ་བོད་མི་ཁག་ཅིག་ལ་བོད་ས་མ་ཤོར་གོང་དུ་བོད་ཁུལ་དུ་ཞིང་བྲན་ལམ་ལུགས་དང་ས་བདག་གྲལ་རིམ་གྱི་སྤྱི་ཚོགས་ཁྲོད་མང་ཚོགས་ཀྱིས་དཀའ་སྡུག་མང་པོ་མྱངས་ཡོད་ཀྱང་། ད་ཆ་རྒྱ་ནག་གི་དབང་བསྒྱུར་གྱི་འོག་ཏུ་མང་ཚོགས་ལ་བདེ་སྐྱིད་ཀྱི་འཚོ་བ་གསར་བ་ཞིག་སྐྲུན་ཡོད་ཚུལ་གྱི་དྲིལ་བསྒྲགས་ཀྱི་རིགས་སྤེལ་དུ་བཅུག་ཡོད་ཀྱང་། ཕྱོགས་གཞན་ཞིག་ནས་རྒྱ་ནག་གིས་བོད་ས་དབང་སྒྱུར་བྱས་ནས་མི་ལོ་བདུན་ཅུ་འཁོར་བའི་དུས་སྟོན་དང་འབྲེལ་ནས། སྔར་ལྷག་བོད་ནང་གི་ས་ཆ་གང་སར་རྒྱ་ནག་གི་ཉེན་རྟོག་རུ་ཁག་གིས་ཞིབ་བཤེར་ས་ཚུགས་མང་པོ་གསར་འཛུགས་ཀྱིས་མང་ཚོགས་ཀྱི་འགྲོ་འདུག་སྤྱོད་གསུམ་ལ་སྟངས་འཛིན་ནན་མོ་བྱེད་བཞིན་པ་མ་ཟད། བོད་ཁུལ་དུ་སྒེར་བཙུགས་ཀྱི་སློབ་གྲྭ་མང་པོ་ཞིག་བཙན་དབང་གིས་སྒོ་རྒྱག་ཏུ་བཅུག་ནས་བོད་སྐད་བོད་ཡིག་གཙོ་གཉེར་གྱི་ཤེས་ཡོན་སློབ་གསོར་སྡང་སྡུག་ཆེན་པོ་བྱེད་ཀྱི་ཡོད་པ་དང་། འབྲེལ་ཡོད་བོད་རིགས་དགེ་རྒན་རྣམས་ཀྱིས་སློབ་གྲྭ་སྒོ་རྒྱག་ཏུ་བཅུག་པའི་གནས་ཚུལ་ཕྱིར་བསྒྲགས་བྱས་པ་ཡིན་ན་མ་འོངས་བའི་མདུན་ལམ་དང་མི་སྒེར་གྱི་ཚེ་སྲོག་ལ་ཉེན་ཁ་ཡོད་པའི་འཇིགས་སྐུལ་རིམ་པ་བྱས་པའི་གནད་དོན་བྱུང་ཡོད་པར་འབྲེལ་ཡོད་ཀྱིས་འདི་ག་གསར་ཁང་ལ་འགྲེལ་བརྗོད་གནང་ཡོད།

རྡོ་རྗེ་བཀྲ་ཤིས་ལགས་སུ་ཁྲིམས་བཤེར་མ་བྱས་སྔོན་དུ་མི་སྤྱོད་ལས་འདས་བའི་མནར་གཅོད་བཏང་འདུག

བོད་ཀྱི་འབྱོར་ལྡན་གྱི་ཚོང་པ་དང་སྤྱི་ཚོགས་ཞབས་ཞུ་བ་རྡོ་རྗེ་བཀྲ་ཤིས་ལགས་ས་བྱི་ལོའི་ཞི་རྒོལ་དང་བསྙད་འདོགས་ཀྱིས་ཕྱི་ལོ་༢༠༠༨ ལོར་རྒྱ་ནག་གིས་འཛིན་བཟུང་བྱས་ཤིང་། ཕྱི་ལོ་༢༠༡༠ ལོར་ཚེ་བཙོན་གྱི་ཁྲིམས་ཐག་བཅད་ཡོད་པ་ཁོང་ལ་ཁྲིམས་བཤེར་མ་བྱས་པའི་སྔོན་དུ་མི་སྤྱོད་ལས་འདས་བའི་སྡུག་སྦྱོང་མནར་གཅོད་ཚད་ལས་བརྒལ་བ་བཏང་སྟེ། ཁོང་བཙོན་ཁང་དུ་བསད་བཞག་པ་ཡིན་ན་ཡང་ཁྲིམས་ཐོག་ནས་བདག་པོ་རྒྱག་མཁན་མེད་པའི་འཇིགས་སྐུལ་བྱས་འདུག དེ་ཡང་ཁ་སང་རྒྱལ་སྤྱིའི་བོད་དོན་ལས་འགུལ་ཁང་གིས་རྡོ་རྗེ་བཀྲ་ཤིས་ལགས་ཀྱི་ཉན་ཞིབ་ཀྱི་གསང་ཡིག་ཅིག་ཕྱི་ལ་ཤོར་བའི་གནད་དོན་དང་འབྲེལ་བའི་གནས་ཚུལ་སྤེལ་བའི་ནང་དུ། རྡོ་རྗེ་བཀྲ་ཤིས་ལགས་ལ་ཁྲིམས་བཤེར་མ་བྱས་སྔོན་གྱི་ཟླ་བ་བཞིའི་རིང་ལ་རྒྱ་ནག་གིས་ཁོང་ལ་བསྟུད་མར་འདྲི་གཅོད་བྱེད་སྐབས་ལྕགས་སྒྲོག་བརྒྱབས་ནས་གནམ་ལ་བཏགས་ཏེ་སྣ་ཁུང་ནང་དུ་སི་པན་ཁུ་བ་ཚ་བོ་བླུགས་པ་དང་གློག་རྒྱུགས་ཀྱིས་ཡང་ཡང་རྡུང་ནས་ཐེངས་མང་དྲན་པ་འཐོར་དུ་བཅུག་ཡོད་པ་ཡོངས་གྲགས་གནང་འདུག ལས་འགུལ་ཁང་ལ་རག་པའི་གསང་ཡིག་དེ་ནི་སྐུ་ཞབས་རྡོ་རྗེ་བཀྲིས་ལགས་ཀྱིས་ཕྱི་ལོ་ ༢༠༡༣ དང་ ༡༤ ཡས་མས་ཤིག་ལ་རྒྱ་ནག་གི་ཁྲིམས་ཁང་གོང་མར་རང་ཉིད་ཀྱི་གྱོད་དོན་ལ་བསྐྱར་དུ་ཁྲིམས་བཤེར་ཡོང་བའི་ཞུ་གཏུགས་ཀྱི་ཡིག་ཆའི་ཆ་ཤས་ཞིག་ཡིན་པ་དང་། ཡིག་ཆ་དེའི་ནང་གསལ་བའི་ཁོང་གི་དཀའ་སྡུག་གི་བྱུང་བ་དེ་དག་ནི་ཁོང་ཕྱི་ལོ་ ༢༠༠༨ ལོར་ལྷ་སའི་ནང་ནས་འཛིན་བཟུང་གིས་རིམ་བཞིན་ཉིང་ཁྲི་སྨན་གླིང་རྫོང་གི་དོ་དམ་ཁང་དུ་བཙན་ཁྲིད་མ་བྱས་གོང་གི་ཟླ་བ་བཞིའི་དུས་ཡུན་ཁྲོད་བྱུང་བ་ཞིག་རེད་འདུག ཡིག་ཆ་དེའི་ནང་རྡོ་རྗེ་བཀྲིས་ལགས་ཀྱིས་རང་ཉིད་ལ་མནར་གཅོད་གཏོང་མཁན་ཁོངས་སུ་རྒྱ་ནག་དབུས་བདེ་འཇགས་ལས་ཁུངས་དང་། དེ་བཞིན་བོད་རང་སྐྱོང་ལྗོངས་དང་སྨན་གླིང་རྫོང་གི་མི་མང་བདེ་འཇགས་ལས་ཁུངས་དང་ཐད་ཀར་འབྲེལ་བ་ཡོད་པའི་རྒྱ་ནག་གི་དཔོན་རིགས་གང་ཟག་སོ་སོ་མིང་འདོན་གནང་ཡོད་སྟབས། ཡིག་ཆ་དེ་དམིགས་བསལ་གྱི་གནད་འགག་ཅིག་ཆགས་ཀྱི་ཡོད་པ་མ་ཟད། རྡོ་རྗེ་བཀྲིས་ལགས་ཀྱི་གནད་དོན་དེ་ནི་འགྲོ་བ་མིའི་ཐོབ་ཐང་དང་འབྲེལ་བའི་རྒྱལ་སྤྱིའི་རང་དབང་ཅན་གྱི་སྐུ་ཚབ་རྣམས་ཀྱིས་བོད་ནང་སྡུག་སྦྱོང་མནར་གཅོད་ཀྱི་ཉམས་ཞིབ་འབྲུ་དོན་དང་ཡོངས་སུ་མཐུན་གྱི་ཡོད་པར་གསུངས་འདུག ཡིག་ཆ་དེའི་ནང་གསལ་ལྟར་ན། འདྲི་གཅོད་པ་མང་པོས་རྡོ་རྗེ་བཀྲ་ཤིས་ལགས་གཉིད་གཅོག་ཏུ་བཅུག་ནས་བསྟུད་མར་འདྲི་གཅོད་སྣ་ཚོགས་བྱས་ཏེ་ཁོང་ཏཱ་ལའི་རུ་ཚོགས་དང་འབྲེལ་བ་ཅི་ཡོད་སོགས་ཀྱི་ཉེས་པ་བཙན་འགེལ་གྱི་བཟོད་གླགས་བྲལ་བའི་ཡ་ང་འཇིགས་རུང་གི་མནར་གཅོད་ཚད་ལས་བརྒལ་བ་བཏང་བ་མ་ཟད། བདེ་འཇགས་ཚན་ཁག་གི་འབྲེལ་ཡོད་ཀྱི་མནར་གཅོད་གཏོང་མཁན་གྱིས། སྟབས་བདེ་བོའི་ཐོག་ནས་བརྗོད་ན། རྡོ་རྗེ་བཀྲ་ཤིས་ལགས་ཉེས་རྡུང་གིས་བསད་བཞག་པའམ། ཡང་ན་དབང་བོ་སྐྱོན་དུ་བསྒྱུར་བཞག་ནའང་ཁྲིམས་མཐུན་ཡིན་ལུགས་དང། ཁོང་གིས་རང་ཉིད་ཀྱི་ནག་ཉེས་ལ་ངོས་ལེན་མ་བྱས་ཚེ་རང་ལོ་ ༧༠ ཡིན་པའི་ཁོང་གི་ཨ་མ་འཛིན་བཟུང་དང་། བཟའ་ཟླ་དང་བུ་ཕྲུག་རྣམས་འདྲི་རྩད་ཆེད་སྐོང་རྒྱུ་སོགས་ཀྱི་འཇིགས་སྐུལ་སྣ་ཚོགས་བྱས་ཡོད་པ་སོགས་མངོན་གསལ་གནང་འདུགགཞི་རྩའི་རྒྱ་ནག་གིས་ཕྱི་ལོ་ ༢༠༠༨ ལོའི་གསུམ་གཅིག་བཞིའི་དོན་རྐྱེན་དང་འབྲེལ་ནས་ཐོག་མར་ཁ་བྲལ་གྱི་ནག་ཉེས་བཙུགས་ཀྱང་། རྗེས་སུ་བུ་ལོན་གཡོ་ལེན་བྱས་ཡོད་པར་བསྙད་འདོགས་ཀྱིས་ཚེ་བཙོན་གྱི་ཁྲིམས་ཐག་བཅད་ཡོད་པ་དང་། ད་ཆ་ཁོང་ལ་སྙིང་གི་ན་ཚ་དང་། ལུས་པོ་སྐྲངས་པ། གཞང་འབྲུམ་སོགས་ཀྱི་ནད་གཞི་ལྕི་མོ་ཕོག་སྟེ་གཟུགས་གཞིའི་གནས་བབ་ཧ་ཅང་ཛ་དྲག་གི་ངང་གནས་ཡོད་པ་དེ་ལྟར་ཡང་། རྒྱ་ནག་གི་དཔོན་རིགས་ཀྱིས་ཁོང་གི་ཁྲིམས་རྩོད་པ་དང་། བཟའ་ཟླ་བཅས་རྩ་བ་ནས་ཐུགས་འཕྲད་བྱེད་དུ་བཅུག་མེད་པའི་གནས་ཚུལ་ཉེ་ལམ་ཕྱི་ལ་ཐོན་ཡོད་པ་རེད། རྒྱལ་སྤྱིའི་བོད་དོན་ལས་འགུལ་ཁང་གིས་རྡོ་རྗེ་བཀྲ་ཤིས་ལགས་ཀྱི་གྱོད་དོན་དང་འབྲེལ་བའི་གསང་བའི་ཡིག་ཆ་དེར་གཞིགས་ན། ཁོང་གིས་མནར་གཅོད་ཇི་ཙམ་ཕོག་ཀྱང་རང་ཉིད་ལ་བཙན་འགེལ་བྱས་བའི་ཆབ་སྲིད་ཀྱི་ནག་ཉེས་དེར་ངོས་ལེན་རྩ་བ་ནས་བྱས་མེད་པ་མངོན་གསལ་བྱུང་ཡོད་སྐོར་གསུངས་བ་དང་འབྲེལ། ཁོང་འཕྲལ་དུ་གློད་གྲོལ་གཏོང་དགོས་བའི་ཞུ་སྐུལ་གནང་བ་དང་། དེ་བཞིན་ཁོང་གི་ཉན་ཞིབ་ཀྱི་ནང་དུ་གསལ་བའི་མནར་གཅོད་ཀྱི་གོ་རིམ་དེ་དག་ལ་རྒྱ་ནག་གིས་ངེས་བར་དུ་རང་དབང་ལྡན་ཞིང་ཕྱོགས་ལྷུང་བྲལ་བའི་ཞིབ་འཇུག་བྱེད་དགོས་བ་མ་ཟད། ཁོང་ལ་ཚད་བརྒལ་གྱི་མནར་གཅོད་གཏོང་མཁན་རྣམས་གསལ་བོ་བཟོས་བ་བརྒྱུད་ནས་རྒྱ་ནག་གིས་བོད་ཁུལ་དུ་དམིགས་བསལ་གྱི་ཉེས་འགལ་རིགས་དེ་དག་གང་མགྱོགས་མཇུག་སྒྲིལ་དགོས་བར་ཞུ་སྐུལ་གནང་འདུག དེ་བཞིན་ལས་འགུལ་ཁང་གིས་རྒྱལ་སྤྱིའི་སྤྱི་ཚོགས་དང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེད་མཁས་བ་རྣམས་ཀྱིས་འཕྲལ་དུ་རྒྱ་ནག་དང་ལྷན་དུ་བོད་ཀྱི་བཙོན་པ་རྡོ་རྗེ་བཀྲ་ཤིས་ལགས་ཀྱི་གནད་དོན་དེ་གླེང་སློང་བྱེད་རྒྱུར་ཞུ་སྐུལ་དང་འབྲེལ་ནས། རྒྱ་ནག་གིས་ཁོང་ལ་མནར་གཅོད་ཚ་ནན་གྱིས་དྲང་བདེན་མིན་པའི་ཁྲིམས་བཤེར་བྱས་བ་བརྒྱུད་ནས་ད་ཆ་ཁོང་གི་མི་ཚེ་བཙོན་ཁང་གི་ནང་དུ་ཉེན་གནས་སུ་ལྷུང་ཡོད་པ་དང་། ཁོང་ནི་རྒྱ་ནག་གིས་ཁྲིམས་གཞི་དང་བྲལ་བའི་ཐོག་ནས་ཁྲིམས་ཐག་བཅད་པའི་ཁྲོད་ཀྱི་གཅིག་ཡིན་པ་དང་། གནས་བབ་དེ་ནི་ནམ་ཡང་ངོས་ལེན་བྱེད་ཐབས་མེད་པ་ཞིག་ཡིན་པར་གསུངས་འདུགཡང་དེའི་བར་ན་དབྱིན་ཡུལ་དུ་རྟེན་གཞི་བྱས་པའི་Freetibet ཞེས་པའི་བོད་དོན་རྒྱབ་སྐྱོར་ཚོགས་པས་སྤེལ་བའི་བོད་ནང་གི་འབྲེལ་ཡོད་གནས་ཚུལ་གཞན་ཞིག་ནང་གསལ་ལྟར་ན། ཟླ་འདིའི་ཚེས་ ༡༥ ཉིན། བོད་སྐྱེ་རྒུ་མདོ་ཁུལ་ནས་རྒྱ་ནག་གི་ཉེན་རྟོག་པས་བོད་མི་རླངས་འཁོར་རྣམས་ལ་ཞིབ་བཤེར་བྱེད་སྐབས་བོད་མི་རིག་གྲགས་ཞེས་པ་ཞིག་ལ་འབུད་རྒྱག་གིས་འབྲི་ཆུའི་ནང་གཡུགས་པ་དང་ཁོང་གི་གྲོགས་པོ་ཤེས་རབ་རྒྱ་མཚོ་ཟེར་བར་མེ་མདའ་བརྒྱབས་ནས་རྨས་སྐྱོན་ཆེན་པོ་བཟོས་འདུག དེའང་རིག་གྲགས་དང་ཤེས་རབ་རྒྱ་མཚོ་གཉིས་སྐྱེ་རྒུ་མདོ་ནས་རང་ཁྱིམ་དུ་ཕྱིར་ལོག་གནང་སྐབས། ཉེན་རྟོག་པར་རླངས་འཁོར་སྔོག་བཤེར་བྱེད་དོན་སོགས་དྲིས་སྟབས། སྐྱ་ཆས་གྱོན་པའི་ཉེན་རྟོག་པ་དེས་ཁོང་ཁྲོ་ལངས་ནས་རིག་གྲགས་འབུད་རྒྱག་བརྒྱབ་ནས་འབྲི་ཆུའི་ནང་གཡུགས་པ་དང་། སྐབས་དེར་མི་མང་འཛོམས་ཏེ་འབྲི་ཆུའི་ནང་ཁོང་གི་ཕུང་པོ་འཚོལ་ཐབས་བྱས་ཀྱང་རྙེད་སོན་ཐུབ་མེད་པ་རེད་འདུགFreetibet བོད་དོན་རྒྱབ་སྐྱོར་ཚོགས་པས་སྤྱིར་རྒྱ་ནག་གིས་དེང་སྐབས་བོད་ནང་དུ་ཞིབ་བཤེར་གྱི་ས་ཚིགས་མང་དུ་གཏོང་བཞིན་པ་མ་ཟད། ཏོག་དབྱིབས་ཉེན་འགོག་གི་མིང་བྱང་འོག བོད་མི་རྣམས་ཀྱི་རླངས་འཁོར་དང་་ཁ་པར་སོགས་སྔོག་བཤེར་དམ་པོ་བྱེད་བཞིན་ཡོད་པར་ཡོངས་གྲགས་ཀྱིས་རྒྱ་ནག་གིས་བོད་མི་རྣམས་ལ་རྩུབ་སྤྱོད་སྤེལ་བཞིན་པའི་གནད་དོན་རེ་རེ་ནི་རྒྱ་ནག་ལ་ཅིའི་ཕྱིར་སང་ལོའི་དགུན་དུས་ཀྱི་ཨོ་རྩལ་འགྲན་ཚོགས་བསྡུ་རྒྱུའི་འོས་བབ་མེད་པའི་རྒྱུ་མཚན་རེ་རེ་ཡིན་པར་ལུང་འདྲེན་དང་འབྲེལ། དབྱིན་ཡུལ་ཨོ་རྩལ་འགྲན་ཚོགས་ནས་རྒྱ་ནག་གི་འགྲན་ཚོགས་དེར་ཆ་ཤས་ལེན་རྒྱུ་མེད་པའི་ཞུ་སྐུལ་གནང་འདུག

རྡོ་སོལ་སྔོག་འདོན་གྱི་ལས་གཞི་ཁྲོད་འདམ་ཉིལ་གྱིས་མིར་གོད་ཆག་ཕོག་པ།

བརྒྱུད་ལམ་ཁག་ཏུ་གནས་ཚུལ་ཐོན་པར་གཞིགས་ན་བོད་མཚོ་སྔོན་ཁུལ་དུ་རྒྱ་ནག་གཞུང་གིས་ཕྱི་ལོ་ ༢༠༠༩ ལོར་རྡོ་སོལ་སྔོག་འདོན་བྱ་འགོ་བཙུགས་པའི་གཏེར་ཁ་སྔོན་འདོན་བྱ་ཡུལ་གྱི་ས་ཚིགས་སུ་འདམ་ཉིལ་བྱུང་ནས་མི་ཤི་གོད་ཆག་ཆེན་པོ་བྱུང་འདུགརེས་གཟའ་སྤེན་པའི་ཉིན་མཚོ་སྔོན་ཞིང་ཆེན་གྱི་ཁོངས་སུ་དབྱེ་བའི་མཚོ་བྱང་བོད་རིགས་རང་སྐྱོང་ཟེར་བའི་ཁུལ་གྱི་རྐང་ཚ་རྫོང་དུ་ཕྱི་ལོ་ ༢༠༠༩ ལོ་ནས་རྒྱ་ནག་གཞུང་གིས་རྡོ་སོལ་སྔོག་འདོན་བྱ་སར་གཏེར་ཁ་སྔོག་འདོན་བྱེད་མཁན་གྱི་མི་གྲངས་ ༢༡ གིས་རྡོ་སོལ་སྔོག་འདོན་བྱེད་བཞིན་པའི་སྐབས་འདམ་ཉིལ་བྱུང་སྟེ་མི་གཅིག་ཉེན་སྐྱོབ་ཐུབ་པ་དང་གཞན་གཅིག་འདས་གྲོངས་སུ་གྱུར་བ་མ་ཟད་དོན་རྐྱེན་དེའི་ཁྲོད་མི་ ༡༩ ཕྱིར་ཐོན་མ་ཐུབ་པར་གཏེར་ཁ་སྔོག་འདོན་གྱི་ས་ཚིགས་དེར་ལུས་ཡོད་པ་རེད་འདུག རྒྱ་ནག་གི་བརྒྱུད་ལམ་ཁག་གིས་གནས་ཚུལ་བཀོད་པར་གཏེར་ཁ་སྔོག་འདོན་བྱ་ཡུལ་གྱི་འདམ་ཉིལ་བྱུང་སྟེ་མི་ཤི་གོད་ཆག་བྱུང་བའི་དོན་རྐྱེན་དེའི་ཉེན་སྐྱོབ་ཆེད་མཚོ་སྔོན་ཞིང་ཆེན་གྱི་སྲིད་གཞུང་ནས་ཛ་དྲག་ཉེན་སྐྱོབ་རིམ་པ་གཉིས་པའི་འོག་ནས་ཉེན་སྐྱོབ་ཀྱི་མཁོ་ཆས་སོགས་ཁྲི་གསུམ་ཙམ་ཆེད་གཏོང་བྱས་ཡོད་སྐོར་དང་ས་གནས་དེའི་མེ་གསོད་རུ་ཁག་གི་འཕྲུལ་འཁོར་ ༣༢ དང་ཉེན་སྐྱོབ་མི་སྣ་ ༡༢༠ དེ་བཞིན་ཆེད་ལས་རོགས་སྐྱོབ་རུ་ཁག་ཚན་པའི་ཉེན་སྐྱོབ་པ་མི་གྲངས་ ༢༠༠ ཆེད་གཏོང་བྱས་ཡོད་ཚུལ་སྤེལ་འདུག རྩ་བའི་རྡོ་སོལ་སྔོག་འདོན་བྱ་རྒྱུའི་ལས་གཞི་དེ་ཕྱི་ལོ་ ༢༠༠༩ ལོར་འགོ་བཙུགས་པ་ཞིག་དང་ལོ་རེར་ས་ཚིགས་དེ་ནས་རྡོ་སོལ་གཏེར་ཁ་ཁྱོན་ཀེ་ལོ་འབུམ་དགུ་ཙམ་སྔོག་འདོན་བྱེད་ཀྱི་ཡོད་པ་རེད། དེ་བཞིན་སྔ་ལོར་རླུང་འཕྲིན་ཁང་ལ་གནས་ཚུལ་མཁོ་སྤྲོད་གནང་བ་ཞིག་གི་ནང་དུའང་རྒྱ་ནག་གཞུང་གིས་ཕྱི་ལོ་ ༢༠༠༥ ནས་བཟུང་ཁམས་ཉག་ཆུ་རྫོང་སྟོད་དུ་ཆུ་ཤུགས་གློག་ཁང་གསར་རྒྱག་གི་ལས་གཞི་ལ་ཁ་གཡར་ནས་གཏེར་ཁ་སྔོག་འདོན་བྱེད་བཞིན་ཡོད་མ་ཟད། ད་བར་ཁམས་ཡུལ་ཤུལ་དང་ཁམས་མི་ཉག  བསང་ཆུ་དང་རྨ་ཆུ་རྫོང་། ཁམས་འབྲི་རུའི་སེབ་ཁྲ་རྫ་རྒན་གྱི་གནས་རི་དང་ཨ་མྱེས་རྨ་ཆེན་རི་ཁྲོད་སོགས་སུ་གཏེར་ཁ་སྔོག་འདོན་རིམ་པ་བྱས་པའི་གནས་ཚུལ་ཐོན་ཡོད་པ་མ་ཟད། རྒྱ་ནག་གཞུང་གིས་སྐྱེ་རྒུ་མདོ་ཁུལ་གྱི་འབྲོག་པའི་རྩྭ་ས་དང་ལྷ་ཐོག་ལུང་པའི་ཡུལ་མིའི་ས་ཆ་བཙན་འཕྲོག་གིས་གཏེར་ཁ་སྔོག་འདོན་བྱས་པའི་གནས་ཚུལ་ཡང་རིམ་པ་ཐོན་ཡོད་པ་རེད།

Latest news