བོད་མིའི་སྒྲིག་འཛུགས།

དེ་རིང་སྔ་དྲོ་ཕྱག་ཚོད་ ༡༠ བའི་ཐོག   གངས་སྐྱིད་ལྷག་པ་ཚེ་རིང་ཚོགས་ཁང་གི་ནང་དུ། བོད་མིའི་སྒྲིག་འཛུགས་ཀྱི་དབུས་འོས་བསྡུ་ལས་ཁང་གི་འགན་འཛིན་དབང་འདུས་ཚེ་རིང་ལགས་དང་། འགན་འཛིན་ལས་འཕར་སྤྱི་ཟུར་བསོད་ནམས་རྒྱལ་མཚན་དང་དགེ་བཤེས་མ་བདེ་ལེགས་དབང་མོ་གཉིས་ཀྱི་དབུ་བཞུགས་ཀྱིས་གསར་འགོད་ལྷན་འཛོམས་ཤིག་སྐོང་ཚོགས་གནང་སྟེ།  བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་དང་འོས་བསྡུའི་སྒྲིག་གཞིའི་འོག  ཕྱི་ལོ་ ༢༠༢༡ ལོའི་ལོའི་སྲིད་སྤྱི་གཉིས་ཀྱི་འོས་བསྡུ་དངོས་སུ་འགོ་འཛུགས་གནང་བ་གསལ་བསྒྲགས་བསྐྱངས་སོང་།  དབུས་འོས་བསྡུ་ལས་ཁང་གིས་ད་ལྟའི་ཆར་སྲིད་སྤྱི་གཉིས་སྔོན་འགྲོ་དང་དངོས་གཞིའི་འོས་བསྡུ་ག་དུས་གནང་མིན་གྱི་དུས་ཚོད་གཏན་འབེབས་གནང་མེད་ནའང་།  འོས་བསྡུ་འགན་འཛིན་ལགས་ཀྱིས་དེང་སྐབས་ནད་ཡམས་གྱི་རྐྱེན་གྱིས་དཀའ་ཚེགས་དུ་མ་ཡོད་མེད་ལ་མ་ལྟོས་པར་འོས་བསྡུ་ཆེན་མོ་དུས་ཐོག་ལ་ཞུ་རྒྱུའི་ཆོད་སེམས་བརྟན་པོ་ཡོད་པ་དང་། ས་གནས་འོས་བསྡུ་ལས་ཁང་དང་རྒྱ་ཆེ་མང་ཚོགས་རྣམས་ཀྱིས་ཀྱང་ངལ་བ་ཁྱད་བསད་ཀྱིས་ཞུ་སྒོ་ཁག་གནང་ཐབས་དང་། ལྷག་པར་དུ་རང་རིགས་ཡོངས་ནས་རྡོག་རྩ་གཅིག་ཏུ་སྒྲིལ་ཏེ་འོས་བསྡུའི་ནང་ཆ་ཤས་བཞེས་རྒྱུ་གལ་ཆེན་ཡིན་པར་ངོ་སྤྲོད་གནང་བ་མ་ཟད། འོས་བསྡུའི་སྒྲིག་གཞི་བསྐྱར་བཅོས་ཀྱི་དགོངས་དོན་ལྟར། འོས་བསྡུའི་དེབ་སྐྱེལ་གསར་དུ་ཞུ་གཏན་འཁེལ་བ་ཡིན་པས་མང་ཚོགས་ཀྱིས་དམིགས་བསལ་ཐུགས་སྣང་བཞེས་དགོས་བའི་རེ་སྐུལ་ཞུས་སོང་། དེ་དང་འབྲེལ་ནས། འོས་བསྡུ་ལས་ཁང་གིས་སྲིད་སྐྱོང་དང་སྤྱི་འཐུས་འོས་མི་རྣམས་ཀྱིས་འོས་འགྲན་དྲིལ་བསྒྲགས་བྱེད་ཕྱོགས་དང་འབྲེལ་ནས་རྩ་འཛིན་གྱི་ལམ་སྟོན་དོན་ཚན་བཅུ་གཉིས་ཅན་ཞིག་གསལ་བསྒྲགས་གནང་བའི་ནང་།  འོས་མི་རྣམས་ཀྱིས་དྲིལ་བསྒྲགས་ཀྱི་ཡིག་ཆའི་ཐོག་༸གོང་ས་མཆོག་གི་སྐུ་པར་དང་བོད་མིའི་སྒྲིག་འཛུགས་ཀྱི་ལས་རྟགས། བོད་རྒྱལ་ཁབ་ཆེན་མོའི་རྒྱལ་དར་སོགས་འཁོད་མི་ཆོག་པ་དང་། དེ་བཞིན་སྤྱི་ཡོངས་ནས་ཡ་རབས་བཟང་སྤྱོད་དང་ལྡན་པ། འཆམ་མཐུན་གྱི་རྨང་གཞི་བརྟན་པ། གཞན་ཡང་གཞི་རིམ་གྱི་ཐོབ་ཐང་ཁག་ལ་སྲུང་བརྩི་ཞུ་རྒྱུ་དང་། དྲང་བདེན་མིན་པའི་གནས་ཚུལ་ཁྱབ་སྤེལ་མི་ཆོག་པ་སོགས་ཀྱི་དོན་ཚན་བཅུ་གཉིས་ཕྱིར་བསྒྲགས་གནང་སོང་། གཞན་ཡང་སྐབས་དེར་བཙན་བྱོལ་བོད་མིའི་འོས་བསྡུའི་སྒྲིག་གཞིའི་ནང་གསལ་ལྟར་བོད་མི་མང་སྤྱི་འཐུས་ཀྱི་རྩ་འབོར་གྲངས་དེ་སྔ་ལྟར་ ༤༥ ངེས་གནས་ཡིན་པ་དང་། མང་ཚོགས་རྣམས་ནས་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༢༤ དང་ ༢༥ གཉིས་ལ་དམིགས་བསལ་གྱི་ཐུགས་སྣང་དགོས་པ་མ་ཟད། དེང་སྐབས་ཁ་པར་དང་དྲ་ལམ་ཁག་ཏུ་སྒེར་ནད་སྤྱི་སྤུངས་ཀྱི་ནང་ཁུལ་འཁྲུགས་གཞི་དང་། དགོས་མེད་དཀྲོགས་རྐྱེན་རིགས་ལ་དབུ་མ་འཁོར་བར་དྭོགས་ཟོན་དང་སྦིར་བསངས་དོད་པོས་བྱ་ར་དམ་འཛིན་གནང་དགོས་པའི་ལམ་སྟོན་སོགས་གནང་སོང་པ་མ་ཟད། རིམ་བཞིན་དབུས་འོས་བསྡུ་ལས་ཁང་ནས་ཚེས་གྲངས་གསལ་སྒྲགས་གནང་མཚམས་སུ་འོས་བསྡུའི་དེབ་སྐྱེལ་ངེས་པར་དུ་གནང་དགོས་པ་གསུངས་སོང་། དེ་བཞིན་སྐབས་དེར་འདི་གའི་གསར་འགོད་པས་ཕྱི་ལོ་ ༢༠༡༦ འོས་བསྡུའི་ཁྲོད་དགོན་པ་གྲྭ་ཚང་དང་སྡེ་ཚན་བྱེ་བྲག་པ་རེ་འགས་སྲིད་སྐྱོང་གི་འོས་བསྡུའི་དྲིལ་བསྒྲགས་ཀྱི་སྐབས་སུ་དམིགས་བསལ་གྱི་ཁྱབ་ཁོངས་ཀྱི་ས་ཁུལ་རེ་འགར་འགྲོ་རུ་མ་བཅུག་པ་སོགས་ཀྱི་གནད་དོན་བྱུང་ཡོད་སྟབས། དེ་འདྲའི་རྙོག་གླིང་གི་སྐབས་སུ་འོས་བསྡུ་ལས་ཁང་གི་ངོས་ནས་འགན་ག་རེ་བཞེས་བཞིན་ཡོད་པར་བཀའ་འདྲི་ཞུས་པར། ཁོང་གིས་མང་ཚོགས་ཀྱི་བོད་མིའི་བཅའ་ཁྲིམས་ལ་རྩ་འཛིན་བྱས་པའི་ཐོག་ནས་མང་ཚོགས་ཀྱི་ཐོབ་ཐང་དང་འོས་འགན་གཉིས་ལ་བརྩི་སྲུང་བྱེད་རྒྱུ་གལ་ཆེན་པོ་ཡིན་ལུགས་ཀྱིས། འོས་བསྡུ་ལས་ཁང་གི་ངོས་ནས་འོས་མི་ཡོངས་ལ་གཅིག་གྱུར་གྱིས་དྲིལ་བསྒྲགས་ཀྱི་གོ་སྐབས་འབུལ་བར་མཐུན་རྐྱེན་སྒྲུབ་དགོས་ལུགས་ཀྱི་ལམ་སྟོན་གནང་སོང་། གཞི་རྩའི་དབུས་འོས་བསྡུ་ལས་ཁང་ནས་རིམ་པའི་ ༢༠༢༡ ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོ་འདི་བཞིན་སྒྲིག་མཐུན་ཚགས་ཚུད་ཡོང་ཐབས་སུ་ཟབ་སྦྱོང་ཁག་ཅིག་གནང་འཆར་འདུག་ཀྱང་། ད་ལྟའི་རིམས་ནད་ཁྱབ་བརྡལ་གྱི་ཛ་དྲགས་གནས་སྟངས་ཁྲོད་མང་ཚོགས་ཀྱིས་སྟབས་བདེའི་ངང་ནས་འོས་བསྡུའི་གནས་ཚུལ་འཚོལ་བཤེར་བྱེད་ཐབས་དང་། འོས་བསྡུའི་གོ་རྟོག་སྤེལ་རྒྱུ་སོགས་ལ་དམིགས་ཏེ། tibetanelection.net ཞེས་པའི་འོས་བསྡུའི་དྲ་རྒྱ་གསར་པ་ཞིག་ཀྱང་དབུ་འབྱེད་གནང་ཡོད།    དབུས་འོས་བསྡུ་ལས་ཁང་གི་བསྒྲགས་གཏམ། To press Tibetan

ཉེ་ཆར་བོད་མི་མང་སྤྱོ་འཐུས་རྒྱུན་ལས་ཀྱི་ལྷན་ཚོགས་ཐེངས་ ༣༢༤ པའི་ཐོག་སྤྱི་མོས་ཀྱིས་བདམས་ཐོན་བསྐོ་གཞག་བྱུང་བའི་དབུས་འོས་བསྡུ་ལས་ཁང་གི་འགན་འཛིན་ལས་འཕར་གཉིས་ནས་ཆེས་མཐོའི་ཁྲིམ་པ་ཆེ་བའི་དྲུང་ནས་ལས་ཁུར་དམ་འབུལ་ཞུས་སོང་།དེ་རིང་སྔ་དྲོ་བཞུགས་སྒར་གངས་སྐྱིད་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་ནང་དུ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། བདམས་ཐོན་འོས་བསྡུའི་འགན་འཛིན་ལས་འཕར་རྣམ་གཉིས། གཞན་ཡང་སྐུ་མགྲོན་རྣམ་པ་བཅས་ཚང་འཛོམས་སར་གནས་ཆུང་སྒྲ་དབྱངས་གླིང་གི་དགེ་འདུན་པ་ཁག་ཅིག་ནས་ཤིས་བརྗོད་གསུང་འདོན་དང་། ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་མཐོང་གྲོལ་རིན་པོ་ཆེར་མཎྜལ་རྟེན་གསུམ་འདེགས་འབུལ་ཞུས་པ་སོགས་རྟེན་འབྲེལ་གྱི་མཛད་རིམ་ཁག་གྲུབ་མཚམས་སུ་བདམས་ཐོན་འོས་བསྡུའི་འགན་འཛིན་ལས་འཕར་སྒྲོལ་མ་གླིང་གི་དཔེ་ཁྲིད་དགེ་རྒན་དགེ་བཤེས་མ་བདེ་ལེགས་དབང་མོ་ལགས་དང་ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་རྒན་པ་སྤྱི་ཟུར་བསོད་ནམས་རྒྱལ་མཚན་ལགས་གཉིས་ཀྱིས་ཆེས་མཐོའི་ཁྲིམས་པ་ཆེ་བ་དྭགས་པོ་བསོད་ནམས་ནོར་བུ་མཆོག་གི་དྲུང་ནས་ལས་ཁུར་དམ་འབུལ་ཞུས་ཡོད།གཞི་རྩའི་བཙན་བྱོལ་བོད་མིའི་འོས་བསྡུ་ཆེན་མོ་ནམ་ཡིན་སྐབས་སུ་བཙན་བྱོལ་བོད་མིའི་བཅའ་ཁྲིམས་ནང་གསལ་ལྟར་དབུས་འོས་བསྡུ་ལས་ཁང་གི་འགན་འཛིན་ལས་འཕར་གཉིས་བསྐོ་གཞག་དགོས་ཀྱི་ཡོད་པ་དང་། འགན་འཛིན་ལས་འཕར་གཉིས་ཀྱི་ལས་ཡུན་དེ་ནི་སྲིད་སྤྱི་གཉིས་ཀྱི་འོས་བསྡུ་ཆེན་མོའི་ལས་རིམ་གསལ་བསྒྲགས་གནང་བ་ནས་དངོས་གཞིའི་གྲུབ་འབྲས་གསལ་བསྒྲགས་མ་ཟིན་གྱི་བར་དུ་ཆགས་ཀྱི་ཡོད་པ་རེད།གནངས་ཉིན་རེས་གཟའ་ལྷག་པའི་ཉིན་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་དང་འགན་འཛིན་ལས་འཕར་རྣམ་པ་ལྷན་ཞུགས་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་དང་སྐབས་ ༡༧ པའི་བོད་མི་མང་སྤྱི་འཐུས་བཅས་ཀྱི་འོས་བསྡུ་ཆེན་མོའི་ལས་རིམ་དང་འབྲེལ་བའི་ཐོག་ལ་གསར་འགོད་ལྷན་ཚོགས་ཤིག་གནང་གི་ཡོད་པ་རེད། འབྲེལ་ཡོད་པར་ཁག་བོད་མིའི་སྒྲིག་འཛུགས།

བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ངོས་ནས་ཉེ་ཆར་ཕྱི་ཟླ་ ༧ པའི་ཚེས་ ༣༡ ཉིན་གསལ་བསྒྲགས་ཤིག་འདོན་སྤེལ་གནང་འདུག་པའི་ནང་དུ། བོད་མིའི་སྒྲིག་འཛུགས་ཀྱི་ཉམ་ཐག་རོགས་སྐྱོར་ཐོབ་མཁན་ཁོངས་ནས། སྤྱི་ཚོགས་དྲ་རྒྱ་བརྒྱུད་དཔལ་འབྱོར་བསྡུ་སློང་ཞུ་རིགས་ཀྱི་གནད་དོན་བྱུང་ཚེ། བོད་མིའི་སྒྲིག་འཛུགས་ཀྱི་ཉམས་ཐག་རོགས་སྐྱོར་ཐོབ་ཐང་ཁོངས་ནས་རང་བཞིན་གྱི་འབུད་པའམ་ཉམ་ཐག་གི་གནས་སྟངས་ནས་གྲོལ་བར་ངོས་འཛིན་ཞུས་ཏེ་འབྲེལ་ཡོད་ཚོགས་སྒེར་སུས་དཔལ་འབྱོར་བསྡུ་འགོད་བྱས་པ་དེས་མུ་མཐུད་མི་ཚེར་ལྟ་སྐྱོང་གནང་དགོས་པ་འཁོད་འདུག འདི་ལོ་རྒྱ་ནག་ནས་མཆེད་པའི་ཏོག་དབྱིབས་གཉན་རིམས་ཀྱི་དཀའ་ངལ་ཁྲོད། རྒྱ་གར་གཙོས་པའི་འཛམ་གླིང་རྒྱལ་ཁབ་ཕལ་མོ་ཆེའི་གཞུང་འཛིན་པ་རྣམས་ནས་རིམས་ནད་སྔོན་འགོག་དང་འབྲེལ། ཐེམ་སྤང་གི་དུས་བཀག་གི་ཁྲོད། ཉམས་ཐག་དབུལ་ཕོངས་མང་པོ་ཞིག་ལ་དཀའ་ངལ་དུ་མ་འཕྲད་པ་དང་འབྲེལ། གཏོང་ཕོད་ཅན་རྣམས་ཀྱིས་དབུལ་ཕོངས་དེ་དག་ལ་དངུལ་དང་སྐམ་ཟས་སོགས་ཀྱི་རོགས་སྐྱོར་ཤུགས་ཆེར་བྱས་པ་བཞིན། བཙན་བྱོལ་བོད་མིའི་སྤྱི་ཚོགས་ནང་དུའང་བོད་མིའི་སྒྲིག་འཛུགས་གཙོས་པའི་ཚོགས་སྒེར་མང་དག་ཅིག་གིས་དངུལ་གྱི་རོགས་སྐྱོར་དང་། དེ་མིན་སྐམ་ཟས་མཁོ་སྤྲོད་གནང་བ་སོགས་ཀྱི་ལས་འགུལ་རྒྱ་ཆེར་སྤེལ་ཡོད་པ་རེད། དེ་མིན་བོད་མི་ཁག་ཅིག་གིས་ངོ་དེབ་དང་ YouTube དེ་བཞིན་ Instagram སོགས་སྤྱི་ཚོགས་དྲ་ལམ་ཐོག དཀའ་ཚེགས་ཅན་གྱི་དུས་ཚོད་འདིའི་ནང་དཀའ་ངལ་འཕྲད་བཞིན་པའི་བོད་མི་ཉམ་ཐག་ཁག་ཅིག་བརྙན་ཐུང་ནང་བརྒྱུད་སྤེལ་བྱས་པའི་ཐོག་ནས། ཕྱི་ནང་བོད་མི་མང་པོའི་ཁྲོད་ནས་རོགས་དངུལ་བསྡུ་རུབ་ཀྱིས་དེ་དག་ལ་རོགས་རམ་བྱས་པའི་གནས་ཚུལ་ཡང་ཐོན་ཡོད་པ་རེད། ཉེ་ཆར་ཚེས་ ༣༡ ཉིན་ནང་སྲིད་ལས་ཁུངས་ཀྱི་གནད་དོན་དེ་དང་འབྲེལ་གསལ་བསྒྲགས་ཤིག་འདོན་སྤེལ་གནང་བར་བོད་མི་ཁག་ཅིག་གིས་ཏོག་དབྱིབས་གཉན་རིམས་ཀྱི་གོ་སྐབས་བཟུང་སྟེ། ཉམ་ཐག་རེ་ཟུང་ལ་བརྙན་ཐུང་བཟོས་ཏེ་དཔལ་འབྱོར་བསྡུ་སློང་ཞུ་རྒྱུའི་ལམ་སྲོལ་ངན་པ་ཞིག་ཆགས་ཡོད་པ་དང་། ཚོགས་སྒེར་དེ་དག་ཁག་ཅིག་ལྷག་བསམ་ལྡན་ཅིང་ཉམ་ཐག་རྣམས་ལ་རོགས་ཕན་སྒྲུབ་རྒྱུའི་ཀུན་སློང་ཡོད་སྲིད་ཀྱང་། རིགས་ཤིག་ནས་སོ་སོའི་ཁེ་ཕན་ཁོ་ནའི་ཆེད་དུ་བེད་སྤྱོད་གཏོང་མི་སྲིད་པ་མིན་སྐོར་འགྲེལ་བརྗོད་གནང་འདུག ནང་སྲིད་ལས་ཁུངས་ངོས་ནས་ད་དུང་སྤྱི་ཚོགས་དྲ་རྒྱའི་ནང་ཉམ་ཐག་གནས་སྟངས་དང་འབྲེལ་བའི་བརྙན་ཐུང་དེ་དག་འཛམ་གླིང་ཀུན་ལ་ཁྱབ་བརྡལ་འགྲོ་རྐྱེན་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་ཐུགས་དགོངས་དཀྲུག་པའི་རྒྱུ་རུ་འགྱུར་ངེས་དང་སྒོས་སུ་བོད་མིའི་སྒྲིག་འཛུགས་ཀྱི་མཐོང་ལ་གནོད་གཞིར་འགྱུར་བ་ལྷག་པར་རྒྱ་ནག་གཞུང་ལ་ཆབ་སྲིད་ཀྱི་ལག་ཆ་ཞིག་ཏུ་འགྱུར་ཉེན་བཅས་ཆེད་བཀོད་དང་སྦྲགས། མ་འོངས་པར་བོད་མིའི་སྒྲིག་འཛུགས་ཀྱི་ལྟ་སྐྱོང་འོག་ཡོད་པའི་ཉམ་ཐག་སུ་འདྲ་ཞིག་སྤྱི་ཚོགས་དྲ་རྒྱ་བརྒྱུད་དཔལ་འབྱོར་བསྡུ་སློང་ཞུ་རིགས་ལ་བོད་མིའི་སྒྲིག་འཛུགས་ཀྱི་ཉམ་ཐོག་རོགས་སྐྱོར་ཐོབ་ཐང་ཁོངས་ནས་རང་བཞིན་གྱི་འབུད་པའམ་ཉམ་ཐག་གི་གནས་སྟངས་ནས་གྲོལ་བར་ངོས་འཛིན་ཞུས་ཏེ་འབྲེལ་ཡོད་ཚོགས་སྒེར་དུས་དཔལ་འབྱོར་བསྡུ་དགོས་བྱས་པ་དེས་མུ་མཐུད་མི་ཚེ་ལྟ་སྐྱོང་བྱེད་དགོས་པའི་བཀའ་ཁྱབ་བཏང་འདུག ཁ་སང་དང་དེ་རིང་བཅས་སྤྱི་ཚོགས་དྲ་ལམ་ཐོག་ནང་སྲིད་ལས་ཁུངས་ཀྱི་བཀོད་ཁྱབ་དེར་འགྲིག་མིན་གྱི་བཀའ་མོལ་གནང་མཁན་མི་ཉུང་བ་ཞིག་འདུག་པ་མ་ཟད། ལྷག་དོན་སྐྱོན་བརྗོད་གནང་མཁན་ཚོས༸གོང་ས་མཆོག་གིས་བོད་མི་རྣམས་ལ་རང་མགོ་ཐོན་ཙམ་བྱུང་ན། བོད་མི་ཉམ་ཐག་གཞན་རྣམས་ལ་རོགས་རམ་གང་ཐུབ་བྱེད་དགོས་བའི་བཀའ་བསྩལ་ལུང་འདྲེན་གྱིས་དེ་རིང་གི་གནད་དོན་འདིའི་ཐོག་ནས་༸གོང་ས་མཆོག་གི་དགོངས་པ་དཀྲུག་པ་ལས་ཐུགས་དགྱེས་པའི་རེ་བ་ཡོད་པ་དང་། ཉམ་ཐག་ཚོར་རོགས་རམ་གནང་བ་དེ་ནི་དགའ་དགོས་བ་ཞིག་ལས་སྡུག་དགོས་བའི་རྒྱུ་མཚན་གང་ཡང་མ་མཐོང་ཞེས་དང་། དེ་བཞིན་རྒྱ་ནག་གཙོས་རྒྱལ་ཁབ་སྟོབས་ཆེ་ཆུང་ཅི་འདྲ་ཞིག་ཡིན་རུང་མང་ཚོགས་ཁྲོད་དབུལ་ཕྱུག་གི་གནས་སྟངས་གཉིས་ཀ་ཡོད་པ་འཇིག་རྟེན་ཆོས་ཉིད་ཡིན་སྟབས། བཙན་བྱོལ་བོད་མིའི་སྤྱི་ཚོགས་ནང་དུ་ཉམ་ཐག་རེ་ཟུང་ཡོད་པ་མཐོན་པར་དགྲ་དགའ་གཉེན་སྡུག་སོགས་ཀྱི་གནད་དོན་ག་ལ་ཆགས་སྲིད་པ་སོགས་གསུང་མཁན་འདུག རླུང་འཕྲིན་ཁང་གིས་དེ་རིང་ནང་སྲིད་ལས་ཁུངས་སུ་དེ་དོན་བཀའ་འདྲི་ཞུ་རྒྱུའི་དུས་ཚོད་ཞུས་ཀྱང་། རིང་མིན་ལས་ཁུངས་ཀྱི་གསལ་བསྒྲགས་དེའི་ཐོག་གསལ་བཤད་གནང་རྒྱུ་ཡིན་སྐོར་གསུངས་བ་ལས་བཅར་འདྲི་དང་ལེན་གནང་མ་སོང་།

བཙན་བྱོལ་བོད་མིའི་འོས་བསྡུ་ཆེན་མོ་ནམ་ཡིན་སྐབས་སུ་བཙན་བྱོལ་བོད་མིའི་བཅའ་ཁྲིམས་ནང་གསལ་ལྟར། དབུས་འོས་བསྡུ་ལས་ཁང་གི་འགན་འཛིན་ལས་འཕར་གཉིས་བསྐོ་བཞག་དགོས་པ་ལྟར། ཁ་སང་ཉིན་རྒྱབ་ཆུ་ཚོད་གསུམ་དང་ཕྱེད་ཀ་ཙམ་གྱི་ཐོག་སྐབས་བཅུ་དྲུག་པའི་བོད་མི་མང་སྤྱི་འཐུས་རྒྱུན་ལས་ལྷན་ཚོགས་ཐེངས་ ༣༢༤ པའི་ཐོག་སྒྲོལ་མ་གླིང་གི་དཔེ་ཁྲིད་དགེ་རྒན་དགེ་བཤེས་མ་བདེ་ལེགས་དབང་མོ་ལགས་དང་། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་རྒན་པ་སྤྱི་ཟུར་བསོད་ནམས་རྒྱལ་མཚན་ལགས་གཉིས་འོས་བསྡུའི་འགན་འཛིན་ལས་འཕར་དུ་སྤྱི་མོས་ཐོག་ནས་བདམས་ཐོན་བྱུང་འདུགདེ་ཡང་བཙན་བྱོལ་བོད་མིའི་བཅའ་ཁྲིམས་ལེའུ་བརྒྱད་པའི་འོས་བསྡུའི་ལས་དོན་དང་འབྲེལ་བའི་དོན་ཚན་ ༩༧ གྱི་ནང་གསེས་ ༢ པའི་ཀ་པ་དང་ཁ་པ་གཉིས་སུ་གསལ་དོན་ལྟར། ཆེས་མཐོའི་ཁྲིམས་ཞིབ་པ་ཆེ་བ་དང༌། སྤྱི་འཐུས་ཚོགས་གཙོ་ཚོགས་གཞོན། དེ་བཞིན་སྲིད་སྐྱོང་བཅས་ལས་བགྲུབ་པའི་འོས་མི་འདེམས་སྒྲུག་ཚོགས་ཆུང་ནས་འོས་བསྡུའི་འགན་འཛིན་ལས་འཕར་གྱི་འོས་དམིགས་ཁོངས་སུ་སྒྲོལ་མ་གླིང་གི་དཔེ་ཁྲིད་དགེ་རྒན་བདེ་ལེགས་དབང་མོ་ལགས་དང་། བོད་རྒྱལ་ཡོངས་རྩེད་རིགས་ཚོགས་པའི་ཚོགས་མི་བསྟན་འཛིན་དོན་ཡོད་ལགས། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་རྒན་པ་སྤྱི་ཟུར་བསོད་ནམས་རྒྱལ་མཚན་ལགས། སྨན་རྩིས་ཁང་གི་སྨན་རམས་པ་ཆོས་ལོ་ཐར་ལགས་བཅས་འཆར་འབུལ་གནང་པའི་ཐོག ཁ་སང་སྐབས་ ༡༦ པའི་བོད་མི་མང་སྤྱི་འཐུས་རྒྱུན་ལས་ལྷན་འཛོམས་ཐོག་སྒྲོལ་མ་གླིང་གི་དཔེ་ཁྲིད་དགེ་རྒན་དགེ་བཤེས་མ་བདེ་ལེགས་དབང་མོ་ལགས་དང་། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་ལོ་རྒྱུས་སློབ་དཔོན་རྒན་པ་སྤྱི་ཟུར་བསོད་ནམས་རྒྱལ་མཚན་ལགས་རྣམ་གཉིས་འོས་བསྡུའི་འགན་འཛིན་ལས་འཕར་དུ་སྤྱི་མོས་ཀྱིས་བདམས་ཐོན་བསྐོ་བཞག་གནང་འདུགད་རེས་བསྐོ་གཞག་བྱུང་བའི་དབུས་འོས་བསྡུ་ལས་ཁང་གི་འོས་བསྡུའི་འགན་འཛིན་ལས་འཕར་གཉིས་ནི་བསླེབ་ལ་ཉེ་བའི་སྲིད་སྐྱོང་དང་སྤྱི་འཐུས་ཀྱི་འོས་བསྡུ་ཆེན་མོར་དམིགས་པ་ཞིག་ཡིན་པ་ལྟར། ཁོང་རྣམ་པའི་ལས་ཡུན་ནི་སྲིད་སྤྱི་གཉིས་ཀྱི་འོས་བསྡུ་ཆེན་མོའི་ལས་རིམ་གསལ་བསྒྲགས་བྱས་པ་ནས་དངོས་གཞིའི་གྲུབ་འབྲས་གསལ་བསྒྲགས་མ་ཟིན་གྱི་བར་དུ་ཆགས་ཀྱི་ཡོད་པ་རེད།དེ་རིང་འདི་ག་རླུང་འཕྲིན་ཁང་གིས་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་དང་ལས་བྱེད་འདེམས་བསྐོ་ལྷན་ཁང་གི་ཚོགས་གཙོ་གཅིག་ལྕོག་དཔེ་ཟུར་དབང་འདུས་ཚེ་རིང་ལགས་སུ་ཞལ་པར་བརྒྱུད་དེར་འབྲེལ་བཀའ་དྲི་ཁག་ཅིག་ཞུ་སྐབས། དབུས་འོས་བསྡུ་ལས་ཁང་གིས་དེ་སྔ་ནས་བོད་མི་གནས་ཡུལ་ས་གནས་ཁག་ཏུ་ཟབ་སྦྱོང་དང་། དེ་བཞིན་རིམ་པས་ས་གནས་འོས་བསྡུ་ལས་ཁང་གི་ཚོགས་མི་བསྐོ་བཞག་སོགས་ཀྱི་ཐད་ལ་འབྲེལ་བ་ཞུས་ཟིན་པ་དང་། དེ་ནས་རིམས་པས་ཁ་སང་བསྐོ་བཞག་བྱུང་བའི་དབུས་འོས་བསྡུ་ལས་ཁང་གི་འོས་བསྡུའི་འགན་འཛིན་ལས་འཕར་གཉིས་ཀྱི་དམ་འབུལ་གྲུབ་མཚམས་སུ་འོས་བསྡུའི་ལས་དོན་ཁག་ཁ་གསལ་ཆགས་རྒྱུ་དང་། ལྷག་པར་དུ་ད་ལྟའི་ཏོག་དབྱིབས་རིམ་ནད་ཀྱི་ཛ་དྲགས་གནས་སྟངས་ལ་ལྟོས་མེད་འོས་བསྡུའི་ལས་རིམ་ཁག་དུས་ཐོག་ལ་འགྲོ་ཐུབ་པའི་ཆོད་སེམས་བརྟན་པོ་ཡོད་ཅེས་གསུངས་སོང་།

ཨ་རིར་རྟེན་གཞི་བྱས་པའི་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་སྡེ་ཚན་གྱི་འགན་འཛིན་ Sophie Richardson ལགས་ཀྱིས་ད་ལྟའི་ཆར་རྒྱ་ནག་གཞུང་གིས་བོད་ནང་དུ་སྤེལ་བཞིན་པའི་ཤེས་ཡོན་སློབ་གསོ་སྲིད་བྱུས་དེ་ནི་བོད་མི་ཚོར་རང་ཉིད་ཀྱི་ཕ་སྐད་ནང་ཤེས་ཡོན་སློབ་གཉེར་རྩ་བ་ནས་གནང་རྒྱུ་མེད་པ་བཟོ་རྒྱུ་དེ་རེད་ཅེས་གསུངས་སོང་། སུད་སི་གྲོང་ཁྱེར་ཇི་ནི་ཝ་ནང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༤ པ་དང་བསྟུན་ཁ་སང་ཕྱི་ཚེས་ ༡༥ ཉིན་སུད་སི་སྐུ་ཚབ་དོན་ཁང་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་ལ་ཆེད་ལས་མི་སྣ་གདན་ཞུས་ཀྱིས་དྲྭ་ཐོག་གི་ཐད་གཏོང་གླེང་མོལ་ལས་རིམ་ཞིག་གནང་སོང་། སྐབས་དེར་འགྲོ་བ་མིའི་ཐོབ་ཐང་ལྟ་ཞིབ་ཚོགས་པའི་རྒྱ་ནག་སྡེ་ཚན་གྱི་འགན་འཛིན་ལྕམ་སྐུ་ Sophie Richardson ལགས་ཀྱིས་བོད་ནང་གི་སྐད་ཡིག་སློབ་གསོའི་རང་དབང་སྐོར་གླེང་བ་དང་འབྲེལ། ཕྱི་ལོ་ ༡༩༦༠ ཙམ་ནས་རྒྱ་གཞུང་གིས་བོད་ནང་གི་སློབ་འབྲིང་དང་མཐོ་རིམ་སློབ་གྲྭ་ཁག་ཏུ་རྒྱ་སྐད་ནང་དུ་ཤེས་ཡོན་སློབ་གསོ་སྤྲོད་འགོ་བཙུགས་ཡོད་ཅིང་། དེ་སྔའི་རྒྱ་སྐད་གཙོ་བོར་གཞིགས་པའི་ཤེས་ཡོན་སློབ་གསོའི་སྲིད་བྱུས་དེ་ད་ཆ་བོད་ཁུལ་གྱི་དམའ་རིམ་སློབ་གྲྭ་ཁག་དང་སྔོན་འགྲོའི་འཛིན་གྲྭ་ཁག་ཏུ་ལག་བསྟར་བྱེད་འགོ་བཙུགས་ཡོད་པ་དང་། དེས་ད་སྐབས་བོད་པའི་བྱིས་པ་ཚོར་རང་ཉིད་ཀྱི་ཕ་སྐད་ནང་དུ་སློབ་གཉེར་བྱེད་རྒྱུར་དཀའ་ཚེགས་ཆེན་པོ་འཕྲད་བཞིན་ཡོད་པ་མ་ཟད། རྒྱ་གཞུང་གིས་བོད་ཁུལ་དུ་ཡོངས་གྲགས་སུ་སྐད་གཉིས་སློབ་གསོའི་སྲིད་བྱུས་ལག་བསྟར་བྱེད་ཀྱི་ཡོད་ལུགས་བརྗོད་བཞིན་ཡོད་ཀྱང་དོན་དངོས་ཐོག་ས་གནས་སུ་ཡོད་པའི་བོད་པའི་སློབ་གྲྭ་ཁག་ཏུ་རྒྱ་སྐད་གཙོ་བོ་བཞག་གིས་སློབ་ཁྲིད་བྱེད་དགོས་པའི་གནོན་ཤུགས་སྤྲོད་བཞིན་ཡོད་ཅེས་གསུངས་སོང་། དེ་བཞིན་ཁོང་གིས་ད་སྐབས་རྒྱ་ནག་གཞུང་གིས་བོད་ཀྱི་ས་ཁུལ་ཡོད་པའི་སློབ་གྲྭ་ཁག་ཏུ་རྒྱ་སྐད་ཁོ་ན་ལས་མི་ཤེས་མཁན་གྱི་དགེ་རྒན་ཆེད་གཏོང་བྱེད་བཞིན་ཡོད་པ་དང་། སློབ་གྲྭ་ཁག་གི་འགན་འཛིན་དང་འབྲེལ་ཡོད་དགེ་རྒན་རྣམས་ནས་བོད་ཕྲུག་སློབ་མར་བོད་པའི་སྐད་ཡིག་རང་གི་ཐོག་ཤེས་ཡོན་སྤྲོད་རྒྱུའི་ཆོད་སེམས་ཡོད་ཀྱང་དོན་དངོས་ཐོག་སློབ་གྲྭ་ནང་དུ་ཤེས་ཡོན་སློབ་ཁྲིད་བྱ་རྒྱུའི་ཡོ་ཆས་འདང་ངེས་མེད་པ་དང་། ཁྱད་པར་དུ་བོད་པའི་སྐད་ཡིག་སྲུང་སྐྱོབ་དང་ལས་འགུལ་སྤེལ་མཁན་བཀྲིས་དབང་ཕྱུག་མཚོན་པའི་ད་བར་འབྲེལ་སྐད་ཡིག་རང་དབང་སྲུང་སྐྱོབ་པ་བོད་པ་མང་པོ་ཞིག་རྒྱ་ནག་གཞུང་གིས་འཛིན་བཟུང་བཙན་ཁྲིད་ཀྱིས་བཀག་བསྐྱིལ། དེ་བཞིན་མནར་གཅོད་དང་བཙོན་འཇུག་ཁྲིམས་ཐག་བཅད་ཡོད་པ་གསུངས་ཡོད།གཞན་ཡང་དྲྭ་ཐོག་གླེང་མོལ་ལས་རིམ་ཐོག་ཡོ་རོབ་རྒྱལ་སྤྱིའི་བོད་དོན་ལས་འགུལ་ཁང་གི་ཞུ་གཏུག་ལས་འགུལ་གྱི་འགན་འཛིན་ལྕམ་སྐུ་ Christa Meindersma ལགས་ཀྱིས་བོད་ནང་གི་སྨྲ་བརྗོད་རང་དབང་གི་གནས་སྟངས་སྐོར་གསུངས་ཡོད་པ་རེད། ཉེ་ཆར་རྒྱལ་ཚོགས་ཀྱི་ལྷན་ཚོགས་ཐོག་རྒྱལ་ཚོགས་ཀྱི་སྨྲ་བརྗོད་དང་བསམ་བརྗོད་རང་དབང་གི་དམིགས་བསལ་ཁྱད་ལས་རྟོག་ཞིབ་མི་སྣས་ཏོག་དབྱིབས་གཉན་རིམས་འདིས་མང་ཚོགས་ཀྱི་ཚེ་སྲོག་འཕྲོག་པ་ཁོ་ན་ཙམ་མིན་པར་དབང་ཆ་གཅིག་བསྡུས་རིང་ལུགས་ཀྱི་རྒྱལ་ཁབ་ཁག་གིས་གཉན་རིམས་ཀྱི་མིང་བྱང་འོག་མང་ཚོགས་ཐོག་དྲག་གནོན་བྱེད་བཞིན་ཡོད་ཅེས་སྙན་ཐོ་ནང་གསལ་སྐོར་ Christa Meindersma ལགས་ཀྱིས་ལུངས་འདྲེན་དང་འབྲེལ། བོད་ནང་ད་ལྟའི་ཆར་གནས་སྟངས་གཅིག་མཚུངས་ཆགས་ཡོད་པ་དང་། རྒྱ་གཞུང་གིས་བོད་ཁུལ་དུ་ད་ཆ་ཏོག་དབྱིབས་གཉན་རིམས་ལ་གདོང་ལེན་གྱི་གནང་སྒོ་དང་བརྟན་ལྷིང་སྲུང་སྐྱོབ་བཅས་ལ་ཁ་གཡར་ནས་ས་གནས་བོད་མིའི་ཐོག་དྲག་གནོན་བྱེད་བཞིན་ཡོད་པ་མ་ཟད། སྐད་འཕྲིན་ལ་སོགས་པའི་ནང་ཏོག་དབྱིབས་གཉན་རིམས་དང་འབྲེལ་བའི་གནས་ཚུལ་སྤེལ་མཁན་དང་དེ་འབྲེལ་བསྔོ་སྨོན་གསུང་མཁན་བོད་མིའི་ཐོག་དྲག་གནོན་དང་འཛིན་བཟུང་བྱེད་བཞིན་ཡོད་པ་གསུངས་ཡོད་པ་རེད། ལྷག་པར་དུ་ཁོང་གིས་འདས་པའི་ལོ་ངོ་ ༦༠ ལྷག་གི་རིང་རྒྱ་ནག་གཞུང་གིས་བོད་དེ་ཕྱི་ལ་སྒོ་མོ་བརྒྱབ་ནས་བོད་དེ་ད་ཆ་བོད་མི་ཚོར་བཙོན་ཁང་ལྟ་བུ་ཆགས་ཡོད་པ་དང་། བོད་ནང་གི་བོད་མི་ཚོར་བསམ་བརྗོད་རང་དབང་དང་འགྲོ་བསྐྱོད་རང་དབང་མེད་པ་མ་ཟད། བཙན་བྱོལ་དུ་ཡོད་པའི་བོད་མི་ཚོར་བོད་དུ་ནང་མི་དང་གཉེན་འཕྲད་དུ་བསྐྱོད་ཐུབ་ཀྱི་མེད་པ་དང་། དེ་བཞིན་ཕྱི་རྒྱལ་གྱི་གཞུང་འབྲེལ་མི་སྣ་དང་གསར་འགོད་པ་། རྒྱལ་ཚོགས་ཀྱི་དམིགས་བསལ་ཁྱད་ལས་རྟོག་ཞིབ་མི་སྣ་བཅས་བོད་ནང་འགྲུལ་བཞུད་གནང་རྒྱུའི་ཆོག་མཆན་གནང་གི་མེད་ཅེས་གསུངས་པ་དང་ཆབས་ཅིག བོད་དེ་བཞིན་ད་ཆར་རྒྱ་ནག་མངའ་འོག་ཏུ་ས་ཁུལ་ཁག་ནང་ནས་ཆེས་དམ་དྲག་ཆེ་ཤོས་ཀྱི་ས་ཁུལ་ཞིག་རེད་ཅེས་གསུངས་ཡོད།བོད་མིའི་སྒྲིག་འཛུགས་ཀྱི་སྲིད་བྱུས་ཉམས་ཞིབ་ཁང་གི་ཉམས་ཞིབ་པ་བསྟན་འཛིན་ལྷག་སྒྲོན་ལགས་ཀྱིས་བོད་ནང་གི་འདུ་འཛོམས་རང་དབང་གི་གནས་སྟངས་སྐོར་གླེང་སློང་གནང་སྐབས་བོད་དེ་ལོ་རྒྱུས་ཀྱི་ཆ་ནས་རྒྱ་ནག་དང་ཐ་དད་རང་བཙན་གྱི་རྒྱལ་ཁབ་ཅིག་ཡིན་སྟབས་དུས་དང་རྣམ་པ་ཀུན་ཏུ་རྒྱ་ནག་གཞུང་གིས་བོད་དེ་བརྟན་ལྷིང་དང་བདེ་འཇགས་ཡོང་བར་ངེས་ཤེས་མེད་པའི་དབང་གིས་དེ་ལྟར་ཡོང་ཐབས་སུ་བོད་མིར་དྲག་གནོན་དང་འདུ་འཛོམས་རང་དབང་རྡོག་རོལ་དང་དམ་དྲག་བྱེད་བཞིན་ཡོད་སྐོར་གསུངས་ཡོད་པ་རེད།རྩ་བའི་ཐེངས་འདིའ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དེ་ཕྱི་ཟླ་ ༦ ཚེས་ ༣༠ ཉིན་ནས་ཕྱི་ཟླ་ ༧ ཚེས་ ༢༠ བར་ཚོགས་ཀྱི་ཡོད་པ་རེད། འདི་ལོ་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་རྐྱེན་པས་སྔ་ལོའི་ཚོགས་དུས་ ༤༣ པ་དེ་དུས་ཚོད་གཅིག་གི་ནང་ཆ་ཚང་ཚོགས་ཐུབ་མེད་པ་དང་། ད་ལན་རྒྱལ་ཚོགས་ཀྱི་ལྷན་ཚོགས་ཐེངས་ ༤༤ པའི་ཚོགས་འདུ་འགྲོ་ལུགས་དང་ལས་རིམ་ཁག་ཀྱང་རྣམ་ཀུན་དང་མི་འདྲ་བ་གནང་དགོས་བྱུང་ཡོད་པ་རེད། སུད་སི་དོན་ཁང་གི་ངོས་ནས་ཀྱང་ད་ལན་བོད་ནང་གི་འགྲོ་བ་མིའི་ཐོབ་ཐང་གི་གནད་དོན་དང་འབྲེལ་བའི་ཟུར་ཚོགས་དེ་དྲྭ་ཐོག་བརྒྱུད་གཉེར་ཡོད་པ་རེད།

འདི་ལོ་བོད་པའི་སློབ་གྲྭ་ཁག་གི་ནང་དུ་རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་ཀྱིས་གཏན་འབེབས་གནང་བའི་འཛིན་རིམ་བཅུ་གཉིས་ཀྱི་ཡིག་རྒྱུགས་ལ་ཞུགས་མཁན་བོད་རིགས་སློབ་མ་ ༡༠༡༦ བྱུང་ཡོད་པ་ལས་སློབ་ཚན་ལྔའི་ཆ་སྙོམས་ཀྱི་བརྒྱ་ཆ་ ༩༥ ལྷག་བླངས་པའི་སྲིད་སྐྱོང་གི་སློབ་ཡོན་བཞེས་མཁན་སློབ་མ་གྲངས་ ༡༩ བྱུང་འདུག་པ་དང་རྒྱལ་ཡོངས་ཡིག་རྒྱུགས་ཁྲོད་བོད་སློབ་ཁག་གི་རྒྱུགས་འཕྲོད་ཀྱི་བརྒྱ་ཆ་ ༩༨༌༢༣ སོན་འདུགདེ་རིང་ཉིན་རྒྱབ་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ཀྱིས་འདི་ལོའི་འཛིན་རིམ་བཅུ་གཉིས་ཀྱི་ཡིག་རྒྱུགས་གྲུབ་འབྲས་དང་འབྲེལ་བའི་གསར་འགོད་གསལ་བསྒྲགས་ཤིག་བསྐོང་ཚོགས་གནང་སོང་བ་དང་། སྐབས་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་འབུམ་རམས་པ་བློ་བཟང་སེང་གེ་མཆོག་དང་ཤེས་རིག་བཀའ་བློན་འབུམ་རམས་པ་པདྨ་དབྱངས་ཅན་མཆོག དེ་བཞིན་ཤེས་རིག་ལས་ཁུངས་ཀྱི་ཤེས་ཡོན་ཚན་པའི་འགན་འཛིན་བསྟན་འཛིན་རྡོ་རྗེ་ལགས་བཅས་ལྷན་ཞུགས་གནང་སོང་།འདི་ལོའི་ཡིག་རྒྱུགས་ནང་བརྒྱ་ཆ་ ༩༥ ལྷག་སོན་པའི་བོད་པའི་སློབ་མ་གྲངས་ ༡༩ བྱུང་བའི་ཁོངས་ནས་སྡེ་ཚན་སོ་སོའི་རྩེ་ཕུད་གསུམ་ནི་མ་སུ་རི་བོད་ཁྱིམ་ཚན་རིག་སྡེ་ཚན་གྱི་སློབ་མ་ཀུན་དགའ་ལེགས་བྱུང་ལགས་སུ་རྒྱ་ཆ་ ༩༩༌༢ དང་། སྒྱུ་རྩལ་སྡེ་ཚན་གྱི་སློབ་མ་བསོད་ནམ་སྟོབས་རྒྱལ་ལགས་སུ་རྒྱ་ཆ་ ༩༨༌༦ དེ་བཞིན་ཚོང་རིག་སྡེ་ཚན་གྱི་སློབ་མ་བསྟན་འཛིན་ནོར་སྒྲོན་ལགས་སུ་རྒྱ་ཆ་ ༩༦༌༨ ཐོབ་ཡོད་པ་དང་། བརྒྱ་ཆ་ ༩༥ ལྷག་སོན་པའི་སློབ་མ་ ༡༩ ཡོད་པའི་ཁོངས་ནས་ ༡༤ མ་སུ་བོད་ཁྱིམ་ནས་རེད་འདུག གསར་འགོད་ལྷན་ཚོགས་ཐོག་སྲིད་སྐྱོང་བློ་བཟང་སེང་གེ་མཆོག་གིས་འདི་ལོའི་འཛིན་རིམ་བཅུ་གཉིས་ཀྱི་ཡིག་རྒྱུགས་ཁྲོད་ནས་སྲིད་སྐྱོང་གི་སློབ་ཡོན་བཞེས་མཁན་གྱི་སློབ་མ་རྣམས་ལ་འཚམས་འདྲི་བཀྲ་ཤིེས་བདེ་ལེགས་ཞུས་པ་དང་། བཀའ་ཤག་སྐབས་སྔོན་མ་ནས་དབུ་འཛུགས་ཀྱིས་བཙན་བྱོལ་ནང་གི་ཤེས་ཡོན་སློབ་གསོའི་ཆེད་དུ་མ་དངུལ་ལྡབ་གསུམ་ཙམ་སྤར་ཆ་གནང་བའི་ཐོག་ལས་གཞི་སྤེལ་བ་ཁག་གཞིར་བཞག་གིས་དམིགས་བསལ་ཐུགས་རེ་གནང་བ་ལྟར། འདི་ལོར་སྲིད་སྐྱོང་གི་སློབ་ཡོན་ཡོན་བཞེས་མཁན་གྲངས་བཅུ་དགུ་བྱུང་བ་ནི་ལོ་རྒྱུས་རང་བཞིན་ལྡན་པ་ཞིག་ཡིན་སྐོར་ངོ་སྤྲོད་གནང་སོང་བ་མ་ཟད། བརྒྱ་ཆ་ ༩༥ བཞེས་མཁན་ཟེར་དུས་ཤེལ་སྒོ་ནང་གི་མོག་མོག་རེད་ཟེར་མཁན་བྱུང་ཡོད་ཀྱང་། ད་ཆ་དེ་ལྟར་མིན་པར་དངོས་སུ་དམིགས་ཚད་བཟུང་བ་བཞིན་གྲུབ་འགྲས་ཆེན་པོ་སོན་ཡོད་སྐོར་གསུངས་སོང་།དེ་བཞིན་སྐབས་དེར་ཤེས་རིག་བཀའ་བློན་མཆོག་གིས་འདི་ལོའི་ཡིག་རྒྱུགས་ཀྱི་གྲུབ་འབྲས་ནི་བཙན་བྱོལ་གྱི་འདས་པའི་ལོ་རྒྱུས་ཁྲོད་བྱུང་མ་མྱོང་བ་ཞིག་ཡིན་པར་འགྲེལ་བརྗོད་དང་སྦྲགས། སྤྱི་ཡོངས་ཀྱི་ཆ་ནས་ཡིག་རྒྱུགས་ཁྲོད་རོགས་འདེགས་གནང་མཁན་ལས་ཀྱི་སྣེ་མོ་བ་མང་པོ་ཡོད་ཀྱང་། དེ་དག་ཚང་མ་ཁུངས་གཏུགས་ནས་སོང་ན་སྤྱི་ནོར་༸གོང་ས་༸སྐྱབས་མགོན་རིན་པོ་མཆོག་གི་བཀའ་དྲིན་ཉག་གཅིག་ལ་རག་ལས་ཡོད་སྟབས། དེ་རིང་གི་རྒྱལ་ཁའི་གྲུབ་འབྲས་དང་སྟབས་བསྟུན་མགོན་པོ་༸གང་ཉིད་མཆོག་གིས་ཐོག་མ་བཙན་བྱོལ་དུ་ཕེབས་ནས་བོད་ཕྲུག་རྣམས་ལ་སློབ་གྲྭ་ལོགས་སུ་གསར་འཛུགས་གནང་དགོས་པའི་ལམ་སྟོན་ཕེབས་པ་ལྟར། ད་ཆ་ཚང་མ་གྲུབ་འབྲས་སྨིན་ནས་ཡོད་པར་བརྟེན་དེ་རིང་གི་ཉིན་མོ་འདིར་མགོན་པོ་༸གང་ཉིད་མཆོག་གི་བཀའ་དྲིན་རྗེས་སུ་དྲན་ཐོག་༸སྐུ་མདུན་ལ་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས་སོང་། སྤྱིར་འདི་ལོའི་ཡིག་རྒྱུགས་ནང་གཏན་སློབ་ཁག་ ༡༦ ནས་ཁྱོན་བསྡོམས་སློབ་ཕྲུག་ ༡༠༡༦ མཉམ་ཞུགས་ཀྱིས་རྒྱུགས་འཕྲོད་པའི་བརྒྱ་ཆ་ ༩༨༌༢༣ ལོན་ཡོད་པ་དང་། དེ་ནི་སྔ་ལོ་ལས་བརྒྱ་ཆ་ ༡༌༢༣ འཕར་ཡོད་པ་མ་ཟད། འདི་ལོའི་ཡིག་རྒྱུགས་ཀྱི་གྲུབ་འབྲས་ལས་བརྒྱ་ཆ་བརྒྱ་ཡིག་རྒྱུགས་འཕྲོད་པའི་སློབ་གྲྭ་བཅུ་ཡོད་པ་དང་། བརྒྱ་ཆ་༩༠ ཡན་ལོན་པའི་སློབ་ཕྲུག་ ༩༡ བྱུང་བའི་ཁོངས་ནས་སློབ་མ་ ༤༤ མ་སུ་རི་བོད་ཁྱིམ་ནས་ཡིན་པ་རེད།རྩ་བའི་འདི་ལོར་ཡིག་རྒྱུགས་ཀྱི་སྐབས་རྒྱ་ནག་གི་ཏོག་དབྱིབས་རིམས་ནད་ཁྱབ་བརྡལ་བྱུང་འགོ་ཚུགས་པའི་རྐྱེན་གྱིས་སློབ་གྲྭ་མང་ཆེ་ཤོས་སུ་བོད་ཡིག་དང་ས་ཁམས་རིག་པ་གཉིས་ལ་ཡིག་རྒྱུགས་གཏོང་མ་ཐུབ་སྟབས། རྒྱ་གར་དབུས་ཤེས་ཡོན་ལྷན་ཚོགས་ཀྱི་ལམ་སྟོན་ལྟར་བརྒྱ་ཆ་མཐོ་ཞོས་བཞེས་ཡོད་པའི་སློབ་ཚན་ཉིས་ཀྱི་བརྒྱ་ཆའི་ཆ་སྙོམས་ཀྱི་བརྒྱ་ཆ་ལྟར་ཆ་བགོས་བྱས་ཡོད་སྟབས། གསར་ཁང་ལ་དེར་འབྲེལ་གྱི་ཐོག་ནས་བོད་ཡིག་གི་སློབ་ཚན་ལ་ཡིག་རྒྱུགས་གཏོང་མ་ཐུབ་པར་བློ་ཕམ་ཡོད་སྐོར་གསུང་མཁན་རེ་གཉིས་བྱུང་སོང་། ཤེས་རིག་བཀའ་བློན་མཆོག་ལ་གནད་དོན་དེར་འབྲེལ་གྱི་བཀའ་འདྲི་ཞུས་པར་དེ་ནི་རྒྱ་གར་དབུས་ཤེས་ཡོན་ལྷན་ཚོགས་ཀྱི་ལམ་སྟོན་ཡིན་སྟབས་འགྱུར་བ་གཏོང་ཐབས་གང་ཡང་མེད་ཀྱང་། སྐད་ཡིག་ལ་ཡག་པོ་ཡོད་ན་དེ་ནི་རང་གི་མི་ཚེ་གཅིག་གི་མཛེས་རྒྱན་ལྟ་བུ་ཡིན་སྟབས། མཐོ་སློབ་འགྲིམ་སྐབས་རྒྱུན་འཛིན་གནང་གལ་ཡིན་པའི་ལམ་སྟོན་གནང་སོང་།

ཕྱི་ཟླ་ ༦ ཚེས་ ༣༠ ཉིན་ནས་སུད་སི་གྲོང་ཁྱེར་ཇི་ནི་ཝ་ནང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༤༤ འཚོགས་བཞིན་ཡོད་པ་དང་། ཕྱི་ཚེས་ ༡༠ ཉིན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་དང་ཚོང་འབྲེལ་སྡེ་ཁག་ཐོག་གི་དམིགས་བསལ་ཁྱད་ལས་རྟོག་ཞིབ་ཚོགས་ཆུང་གི་སྙན་ཐོ་དང་འབྲེལ་བའི་བགྲོ་གླེང་ལས་རིམ་ཐོག་བོད་ནང་རྒྱ་ནག་གི་གཞུང་འབྲེལ་མི་སྣས་ཁྲིམས་འགལ་ཐོག་འབྲོག་ས་བཙན་འཕྲོག་བྱེད་བཞིན་པའི་གནས་སྟངས་སྤྱི་དང་དེ་འབྲེལ་རྒྱ་གཞུང་ལ་ཞི་རྒོལ་གྱིས་གདོང་ལེན་གནང་མཁན་བོད་མི་རྣམས་འཛིན་བཟུང་བཙོན་འཇུག་གིས་ཁྲིམས་ཆད་གཅོད་བཞིན་པའི་གནས་སྟངས་སྙན་སེང་ཞུས་འདུག སྐབས་དེར་སུད་སི་དོན་ཁང་གི་འབྲེལ་ཡོད་ལས་བྱེད་འཕྲིན་ལས་ཆོས་སྐྱིད་ལགས་ཀྱིས་ Society  for Threatened People ཞེས་པའི་རྒྱལ་ཚོགས་ཀྱི་གཞུང་འབྲེལ་མིན་པའི་ཚོགས་པའི་མཚན་ཐོག་ནས་བོད་ནང་གི་འབྲོག་པའི་གནས་སྟངས་སྐོར་སྙན་སེང་ཞུས་པ་དང་འབྲེལ། ཉེ་བའི་ཆར་རྒྱ་ནག་གཞུང་གིས་བོད་ནང་འཛུག་སྐྲུན་དང་རྒྱུད་ཅིག་ལམ་གཅིག་གི་ལས་གཞིར་ཁ་གཡར་ནས་ མང་ཚོགས་སྤྱི་དང་སྒོས་འབྲོག་པ་ཚོའི་རྩྭ་ས་བཙན་འཕྲོག་གིས་གྲོང་ཁྱེར་ནང་གནས་སྤོས་བྱེད་བཅུག་ པའི་གནས་སྟངས་དང་། དེ་བཞིན་ས་ཆ་བཙན་འཕྲོག་གི་གནད་དོན་དང་འབྲེལ་བའི་ཐོག་ནས་རྒྱ་ནག་གཞུང་ལ་ཞི་རྒོལ་དང་གདོང་ལེན་གནང་མཁན་ཚོ་འཛིན་བཟུང་བཀག་ཉར་དང་མནར་གཅོད། བོད་མི་དེ་དག་ལ་རྒྱལ་ཁབ་ཁ་བྲལ་གྱི་ནག་ཉེས་གཡོགས་ནས་བཙོན་འཇུག་གི་ཁྲིམས་ཐག་གཅོད་བཞིན་ཡོད་པ་སྙན་སེང་ཞུས་འདུག ལྷག་པར་དུ་འདས་ལོ་ནང་བོད་མགོ་ལོག་ཁུལ་ནས་རྒྱ་གཞུང་གིས་འབྲོག་ས་བཙན་འཕྲོག་ལ་ཞི་རྒོལ་གནང་མཁན་བོད་མི་ཨ་ཉ་སེང་སྒྲ་ལགས་སུ་རྒྱ་གཞུང་གིས་སྤྱི་བདེ་ཉེན་རྟོག་དང་གཞུང་། དེ་བཞིན་ཁྲིམས་ཁང་ངན་པ་ལག་འབྲེལ་གྱིས་ཁོང་འཛིན་བཟུང་བཀག་ཉར་དང་མནར་གཅོད། དེ་བཞིན་ལོ་བདུན་གྱི་བཙོན་འཇུག་ཁྲིམས་ཐག་བཅད་ཡོད་པ་མ་ཟད། ནག་ཆེན་ས་ཁུལ་ནས་སྔ་རྗེས་སུ་རྒྱ་ནག་གཞུང་གི་རྩྭ་ས་བཙན་འཕྲོག་ལ་ཞི་རྒོལ་གནང་མཁན་བོད་མི་ ༣༠ བཙོན་འཇུག་ཁྲིམས་ཐག་བཅད་པ་སོགས་ཀྱི་གནད་དོན་ཡང་ལུང་འདྲེན་གནང་ཡོད་པ་རེད། ཁོང་གིས་ལྷན་ཚོགས་ཐོག་རྒྱལ་ཚོགས་ཀྱི་ངོས་ནས་རྒྱ་གཞུང་ལ་གནོན་ཤུགས་ཀྱིས་ཨ་ཉག་སེང་སྒྲ་ལགས་ཀྱིས་གཙོས་པའི་བོད་མི་བཙོན་པ་གཞན་རྣམས་གློད་བཀྲོལ་ཡོང་བའི་འབོད་སྐུལ་ཞུས་པ་དང་འབྲེལ། རྒྱལ་ཚོགས་ཀྱིས་རྒྱ་ནག་གི་གཞུང་འབྲེལ་སྡེ་ཁག་ནས་ངན་པ་ལག་འབྲེལ་གྱིས་བོད་ནང་གི་མང་ཚོགས་ཀྱི་ས་ཆ་འཕྲོག་བྱེད་བཞིན་པའི་བྱ་སྤྱོད་དེ་དག་འཕྲལ་མར་མཚམས་འཇོག་བྱེད་རྒྱུའི་དུས་ལ་བསླེབས་སོང་ཞེས་གསུངས་འདུགཉེ་ཆར་རྒྱལ་ཚོགས་ཁྱད་ལས་མི་སྣ་ ༤༩ ནས་རྒྱ་ནག་གཞུང་གིས་བོད་དང་ཧོང་ཀོང་། དེ་བཞིན་ཤར་ཏུ་ཀི་སི་ཐན་ནང་གི་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནད་དོན་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་དང་ཚོགས་མི་རྒྱལ་ཁབ་ཁག་ལ་རྒྱ་ནག་ཐོག་དམིགས་བསལ་ཚོགས་དུས་བསྐོང་ཚོགས་གནང་དགོས་པའི་རེ་འདུན་གནང་ཁག་དོན་འཁྱོལ་ཕྱག་བསྟར་ཡོང་བའི་འབོད་སྐུལ་བསྐྱར་ནན་ཞུས་ཡོད་པ་རེད། རྩ་བའི་ཐེངས་འདིའ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་དེ་ཕྱི་ཟླ་ ༦ ཚེས་ ༣༠ ཉིན་ནས་ཕྱི་ཟླ་ ༧ ཚེས་ ༢༠ བར་ཚོགས་ཀྱི་ཡོད་པ་རེད། འདི་ལོ་རྒྱ་ནག་ཝུ་ཧན་ནས་ཐོག་མར་མཆེད་པའི་ཏོག་དབྱིབས་གཉན་རིམས་རྐྱེན་པས་སྔ་ལོའི་ཚོགས་དུས་ ༤༣ པ་དེ་དུས་ཚོད་གཅིག་གི་ནང་ཆ་ཚང་ཚོགས་ཐུབ་མེད་པ་དང་། ད་ལན་རྒྱལ་ཚོགས་ཀྱི་ལྷན་ཚོགས་ཐེངས་ ༤༤ པའི་ཚོགས་འདུ་འགྲོ་ལུགས་དང་ལས་རིམ་ཁག་ཀྱང་རྣམ་ཀུན་དང་མི་འདྲ་བ་གནང་དགོས་བྱུང་འདུག་པ་མ་ཟད། དེ་བཞིན་ཚོགས་་འདུ་མང་དག་ཅིག་དྲྭ་ལམ་ཐོག་ཚོགས་ཀྱི་ཡོད་པ་རེད།

ཁ་ཉིན་ཕྱི་ཚེས་ ༧ ཉིན་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་དེ་སྔ་ ༢༠༡༨ ལོར་ཡུལ་དེའི་གྲོས་ཚོགས་གོང་འོག་གཉིས་སུ་གཏན་འབེབས་གནང་རྗེས་སྲིད་འཛིན་སྐུ་ཞབས་ Donald Trump མཆོག་གིས་མཚན་རྟགས་བསྐྱོན་ནས་ཨ་རིའི་ཁྲིམས་སུ་གཏན་ལ་ཕབ་པའི་Reciprocal Access to Tibet Act ཞེས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ཕྱག་བསྟར་བརྒྱུད་ཨ་རིའི་གསར་འགོད་པ་དང་ཡུལ་སྐོར་སྤྲོ་འཆམ་པ། དེ་བཞིན་སྲིད་དོན་པ་དང་གཞུང་འབྲེལ་ལས་བྱེད་སོགས་བོད་ནང་ཕེབས་རྒྱུར་བཀག་སྡོམ་བྱེད་མཁན་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་གྲགས་གནང་ཡོད་པ་རེད།གནད་དོན་དེ་དང་འབྲེལ་ཁ་སང་རྒྱ་ནག་གཞུང་འབྲེལ་གྱི་ཉིན་རེའི་གསར་འགོད་ལྷན་ཚོགས་ཐོག་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ Zhao Lijian ཡིས་ཨ་རིས་བོད་དང་འབྲེལ་རྒྱ་ནག་རྒྱལ་ནང་གི་གནད་དོན་ལ་ཐད་བྱུས་གནང་རྒྱུ་ངེས་པར་དུ་མཚམས་འཇོག་བྱས་ཏེ་ཨ་རི་དང་རྒྱ་ནག་གཉིས་ཀྱི་འབྲེལ་བ་བཟང་དུ་གཏང་རྒྱུར་དོ་སྣང་གནང་དགོས་ཞེས་བརྗོད་པ་དང་ཆབས་ཅིག ཨ་རིས་བོད་ཀྱི་གནད་དོན་དང་འབྲེལ་རྒྱ་ནག་གི་དཔོན་རིགས་ཚོ་ཨ་རི་ནང་བསྐྱོད་རྒྱུའི་མཐོང་མཆན་གནང་རྒྱུ་མིན་སྐོར་བརྗོད་པ་དེར་རྒྱ་ནག་ཕྱོགས་ནས་ཀྱང་བོད་དོན་འབྲེལ་བ་དམ་ཟབ་ཡོད་པའི་ཨ་རིའི་གཞུང་འབྲེལ་མི་སྣ་དང་མི་སྒེར་རྣམས་རྒྱ་ནག་དང་བོད་ནང་ཕེབས་རྒྱུར་དམ་དྲག་བྱེད་ངེས་ཡིན་ཞེས་ལན་འདེབས་བྱས་འདུགཁོ་པས་ད་དུང་རྒྱ་ནག་གི་ངོས་ནས་བོད་འདི་རྒྱལ་སྤྱིའི་གཞུང་ཚབ་དང་ཡུལ་སྐོར་སྤྲོ་འཆམ་པ་ཚོར་དུས་རྟག་ཏུ་སྒོ་ཕྱེ་ཡོད་པ་མ་ཟད་ཕྱི་ལོ་ ༢༠༡༥ ནས་ ༢༠༡༨ བར་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཁོ་ནའི་ནང་གཞུང་ཚབ་པ་དང་ཡུལ་སྐོར་སྤྲོ་འཆམ་པ་ ༡༧༦༠༠༠  ལྷག་བཏང་ཡོད་པར་འགྲེལ་བརྗོད་དང་སྦྲགས། ད་རེས་ཨ་རིས་ཕྱག་བསྟར་གནང་རྒྱུའི་ཁྲིམས་འཆར་དེ་ནི་གནང་སྟངས་ཡག་པོ་ཞིག་མིན་པ་དང་། རྒྱ་ནག་ནས་བོད་ཐོག་འགྲོ་སྐྱོད་ཆོག་མིན་དང་འབྲེལ་བའི་སྒྲིག་ཁྲིམས་གཏན་འབེབས་ཡོད་པ་དེ་བོད་ཀྱི་ས་བབས་གནས་སྟངས་ལ་གཞིགས་ཏེ་ཕྱི་མིའི་བདེ་འཇགས་ལ་ཆེད་དམིགས་ཀྱིས་བཟོས་པ་ཞིག་རེད་ཅེས་བརྗོད་འདུགརྒྱ་གཞུང་གི་ཡར་ལན་དེ་དང་འབྲེལ་ཁ་སང་གསར་འགོད་པ་ཁག་ཅིག་ནས་ཨ་རི་ཕོ་བྲང་དཀར་པོའི་གསར་འགོད་ལྷན་ཚོགས་སྐབས་གསར་འགོད་དྲུང་ཆེ་ Kayleigh McEnany ལགས་སུ་བཀའ་འདྲི་ཁག་ཅིག་ཞུ་སྐབས་སྲིད་འཛིན་སྐུ་ཞབས་ Donald Trump མཆོག་ནས་རྒྱ་ནག་གི་བྱ་སྤྱོད་ཡར་ལན་སོགས་ཀྱི་ཐད་ཕྱག་བསྟར་གནང་རྒྱུའི་སྲིད་བྱུས་དང་འཆར་གཞི་ཁག་ཅིག་གཏན་འབེབས་གནང་ཡོད་པས་དེ་དག་རིམ་པས་མཁྱེན་རྟོགས་ཡོང་གི་རེད་ཅེས་གསུངས་ཡོད་པ་ལས་དེ་མིན་ཕྱག་བསྟར་གནང་རྒྱུའི་འཆར་གཞི་གང་དག་ཡོད་མེད་ཁ་གསལ་གནང་མེད་པ་རེད།གཞི་རྩའི་རྒྱ་ནག་གཞུང་ནས་བོད་ཀྱི་ས་ཁུལ་ཁག་ཏུ་རྒྱལ་སྤྱིའི་གཞུང་ཚབ་མི་སྣ་དང་ཡུལ་སྐོར་སྤྲོ་འཆམ་པ་རྣམས་རང་དབང་ཐོག་བསྐྱོད་རྒྱུར་དམ་དྲག་བྱེད་བཞིན་པ་དེ་ནི་དངོས་ཡོད་གནས་སྟངས་ཤིག་ཡིན་པ་དང་། གལ་སྲིད་གཞུང་ཚབ་མི་སྣ་གཙོས་ཕྱི་མི་ཞིག་རྒྱ་གཞུང་གིས་དབྱེ་བའི་བོད་རང་སྐྱོང་ལྗོངས་ཀྱིས་གཙོས་པའི་བོད་ཀྱི་ས་ཁུལ་ཁག་ཏུ་བསྐྱོད་རྒྱུའི་ཆོག་མཆན་སྤྲད་དབང་དུ་བཏང་ཡང་ས་གནས་རྒྱ་གཞུང་ལས་བྱེད་ཚོས་ཁོང་ཚོར་ལྟ་སྲུང་ནན་པོ་བྱས་ནས་བོད་མི་དང་ཐུག་འཕྲད་གནང་རྒྱུར་དམ་དྲག་ཆེན་པོ་བྱེད་ཀྱི་ཡོད་པ་རེད།ཁ་ཉིན་ཨ་རིའི་ཕྱི་སྲིད་དྲུང་ཆེ་སྐུ་ཞབས་ Mike Pompeo མཆོག་གིས་བོད་ནང་ཕར་འགྲོ་ཚུར་འོང་གི་ཁྲིམས་འཆར་ཕྱག་བསྟར་བརྒྱུད་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་ཁྱབ་གནང་བ་དང་འབྲེལ། དེ་སྔ་ཁྲིམས་དེ་ཨ་རིའི་གྲོས་ཚོགས་སུ་ཆེད་འདོན་གནང་མཁན་ཁོངས་སུ་ཡོད་པ་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་ནས་དགའ་བསུ་དང་བོད་ནང་གཞི་རྩའི་འགྲོ་བ་མིའི་ཐོབ་ཐང་རྡོལ་རོལ་གཏང་མཁན་རྒྱ་ནག་གི་དཔན་རིགས་ཚོ་ཨ་རི་ནང་རང་དབང་ལོངས་སུ་སྤྱོད་རྒྱུའི་ཐོབ་ཐང་ཡོད་མ་རེད་ཅེས་ནན་བརྗོད་གནང་བ་མ་ཟད། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཀྱང་ཁ་སང་རྒྱ་གར་གྱི་ Republic གསར་ཁང་གི་བཅར་འདྲི་ཐོག་ཨ་རིས་རྒྱ་གཞུང་གི་དཔོན་རིགས་ཚོ་ཨ་རིར་ཡོང་རྒྱུར་དམ་དྲག་གནང་རྒྱུ་ཡིན་པ་ཡོངས་ཁྱབ་གནང་བ་དེ་ནི་དགའ་བསུ་ཞུ་འོས་པ་དང་རྒྱལ་སྤྱིར་བསྒྲགས་ཆོག་པའི་བརྡ་ལན་ཞིག་ཀྱང་རེད་ཅེས་གསུངས་འདུགསྲིད་སྐྱོང་མཆོག་ནས་ད་དུང་རྒྱ་ནག་གཞུང་གིས་བོད་ནང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པར་རྒྱལ་སྤྱིའི་མང་ཚོགས་ནས་བློ་འཚབ་ཀྱིས་དོ་སྣང་ཆེན་པོ་གནང་བཞིན་ཡོད་པ་མ་ཟད། ཉེ་ཆར་ཡོ་རོན་མཐུན་ཚོགས་དང་རྒྱ་ནག་དབར་གྱི་ཆེ་མཐོའི་ལྷན་ཚོགས་ཐོག་བོད་དོན་གླེང་བ་དང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཁྱད་ལས་པ་ ༥༠ ཐུན་མོང་གིས་བོད་ནང་གི་འགྲོ་བ་མིའི་ཐོབ་ཐང་གནས་སྟངས་ལ་ཞིབ་འཇུག་ཆེད་ཕེབས་འདོད་ཡོད་པའི་བསྒྲགས་གཏམ་ཞིག་སྤེལ་ཡོད་པ་སོགས་གསུངས་ཡོད། དེ་བཞིན་རྒྱ་དཀར་ནག་གཉིས་ཀྱི་གནད་དོན་དང་འབྲེལ་ལོ་རྒྱུས་ཐོག་རྒྱ་གར་དང་རྒྱ་ནག་དབར་གྱི་ས་མཚམས་ཞེས་པ་ཞིག་མེད་པ་དང་། བོད་དང་རྒྱ་གར་གཉིས་དབར་ས་མཚམས་ཞེས་པ་ཞིག་ཡོད་སྟབས། གསར་ཁང་ཁག་གིས་གཙོས་པའི་ཉམས་ཞིབ་པ་རྣམས་ནས་རྒྱ་དཀར་ནག་མིན་པར་བོད་དང་རྒྱ་གར་གྱི་ས་མཚམས་ཞེས་བེད་སྤྱོད་གནང་དགོས་པ་དང་། བོད་མི་རྣམས་དུས་རྟག་ཏུ་རྒྱ་གར་དང་ལྷན་དུ་ཡོད་ཅེས་གསུངས་འདུགགཞི་རྩའི་ད་ལྟའི་ཆ་ས་མཚམས་དང་ཚོང་འབྲེལ། དེ་བཞིན་ཏོག་དབྱིབས་རིམས་ནད་དང་འགྲོ་བ་མིའི་ཐོབ་ཐང་སོགས་གནད་དོན་དུ་མ་ཞིག་གི་ཐད་ནས་རྒྱ་ནག་ལ་གནོན་ཤུགས་ཆེན་པོ་སྤྲོད་བཞིན་པ་མ་ཟད། ལྷག་པར་དུ་ཨ་རིས་བོད་ནང་ཕར་འགྲོ་ཚུར་འོང་གི་ཁྲིམས་འཆར་དེ་ཕྱག་བསྟར་དུ་འཛུགས་གནང་མུས་ཀྱི་དུས་སྐབས་འདིར་དབྱིན་ཡུལ་གྲོས་ཚོགས་འཐུས་མི་སྐུ་ཞབས Tim Loughton ལགས་ཀྱིས་དབྱིན་ཡུལ་གྲོས་ཚོགས་ནང་འགྲོ་བ་མིའི་ཐོབ་ཐང་རྡོག་རོལ་གཏང་མཁན་རྒྱ་ནག་གི་དཔོན་རིགས་རྣམས་དབྱིན་ཡུལ་ནང་ཡོང་རྒྱུར་བཀག་སྡོམ་གནང་དགོས་པའི་གླེང་སློང་དང་། དབྱིན་ཡུལ་སྲིད་གཞུང་གིས་ཀྱང་བོད་ནང་ཕར་འགྲོ་ཚུར་འོང་གི་ཁྲིམས་འཆར་གཏན་འབེབས་གནང་དགོས་པའི་གཞེན་སྐུལ་གནང་ཡོད།

རིང་སྔ་དྲ་ཕྱག་ཚོད་བཅུ་དང་ཕྱེད་ཀའི་ཐོག    ཐེ་ཝན་གྱི་རྒྱལ་ས་ཐེ་པཱེ་རུ་རྟེན་གཞི་བྱས་པའི་ཐེ་ཝན་གྱི་གྲོས་ཚོགས་ཁང་གི་དབུས་སུ།  ཐེ་ཝན་ནང་གི་སྐབས་བཅུ་བའི་གྲོས་ཚོགས་ཀྱི་འཐུས་མི་གསར་འདེམས་བྱུང་བ་དང་འབྲེལ་ནས། གྲོས་ཚོགས་འཐུས་མི་༤༦ ལྷག་གི་རྒྱབ་སྐྱོར་གྱི་འོག    བོད་དོན་རྒྱབ་སྐྱོར་གྱི་ཚོགས་པ་གསར་བ་ཞིག་བསྐྱར་དུ་བཙུགས་འདུགདེ་རིང་གི་ཐེ་ཝན་གྲོས་ཚོགས་ཀྱི་བོད་དོན་རྒྱབ་སྐྱོར་གྱི་ཚོགས་འདུའི་སྐབས་སུ། གྲོས་ཚོགས་འཐུས་མི་༤༦ གི་དབུ་བཞུགས་ཀྱི་ཐོག   ཐེ་ཝན་དོན་གཅོད་པ་ཟླ་བ་ཚེ་རིང་ལགས་དང་དོན་གཅོད་ཁང་གི་ལས་བྱེད། དེ་བཞིན བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་ཚོགས་གཙོ་བཀྲ་ཤིས་ཚེ་རིང་ལགས་བཅས་ཀྱིས་མཉམ་ཞུགས་གནང་བའི་ཐོག   གྲོས་ཚོགས་ཀྱི་འཐུས་མི་བརྒྱད་ཀྱིས་ཆ་ཤས་བླངས་ནས་བོད་དོན་དང་འབྲེལ་བའི་གཏམ་བཤད་གནང་འདུག     སྐབས་དེར་ཐེ་ཝན་གྲོས་ཚོགས་ཀྱི་བོད་དོན་རྒྱབ་སྐྱོར་གྱི་ཚོགས་གཙོ་སྐུ་ཞབས་Freddy Lim གྱིས་རྒྱ་ནག་དམར་ཤོག་སྲིད་གཞུང་གིས་བོད་ཀྱི་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བཞིན་པ་མ་ཟད། བོད་ཀྱི་སྐད་ཡིག་རིག་གཞུང་དང་བཅས་ལ་ཡང་རྩ་གཏོར་གཏོང་གི་ཡོད་པ་ཡོངས་གྲགས་གནང་བ་དང་སྦྲགས། ༸གོང་ས་སྐྱབས་མགོན་རིན་པོ་མཆོག་ག་དུས་ཐེ་ཝན་དུ་ཕེབས་པ་ཡིན་ན་ཡང་ཐེ་ཝན་སྲིད་གཞུང་གིས་དགའ་བསུ་ཞུ་རྒྱུ་ཡིན་པའི་གཏམ་བཤད་གནང་འདུགདེ་རིང་གི་ཐེ་ཝན་གྲོས་ཚོགས་ཀྱི་བོད་དོན་རྒྱབ་སྐྱོར་གྱི་ཚོགས་འདུ་དང་འབྲེལ་ནས། འདི་གའི་གསར་འགོད་པས་བོད་དང་ཐེ་ཝན་གྱི་འགྲོ་བ་མིའི་ཐོབ་ཐང་འབྲེལ་མཐུད་ཁང་གི་ཚོགས་གཙོ་བཀྲ་ཤིས་ཚེ་རིང་ལགས་སུ་ཞལ་པར་བརྒྱུད་ནས་བཀའ་འདྲི་ཞུས་པར།  ཁོང་གིས་ཐེ་ཝན་གྲོས་ཚོགས་ཀྱི་བོད་དོན་རྒྱབ་སྐྱོར་གྱི་ཚོགས་པ་དེ་ནི་དེབ་སྐྱེལ་བྱས་ཡོད་པའི་ཚོགས་པ་ཞིག་ཆགས་ཀྱི་ཡོད་པ་དང་། གྲོས་ཚོགས་ཀྱི་འོས་བསྡུ་དང་འབྲེལ་ནས་འཐུས་མི་གསར་བ་མང་པོ་ཞིག་བྱུང་ཡོད་སྟབས་དེ་རིང་སླར་ཡང་གྲོས་ཚོགས་ཀྱི་བོད་དོན་རྒྱབ་སྐྱོར་གྱི་ཚོགས་པ་དེ་བསྐྱར་དུ་བཙུགས་པ་ཞིག་ཡིན་སྐོར་ངོ་སྤྲོད་ཀྱིས། ཚོགས་འདུའི་ཐོག་རྒྱ་གཞུང་གིས་བོད་ཀྱི་ཆོས་རིག་ལ་གཏོར་བཅོམ་གཏོག་གི་ཡོད་པའི་ཐད་ནས་གཏམ་བཤན་གནང་མཁན་མང་པོ་བྱུང་ཡོད་པར་གསུངས་སོང་།དེ་བཞིན་ཁོང་གིས་གསར་འགོད་པ་རྣམས་ཀྱིས་སྐྱབས་མགོན་རིན་པོ་ཆེ་ཐེ་ཝན་ལ་ཆིབས་བསྒྱུར་གནང་ཐུབ་མིན་གྱི་སྐོར་ནས་བཀའ་འདྲི་གནང་སྐབས། གྲོས་ཚོགས་ཀྱི་འཐུས་མི་རྣམས་ཀྱིས་༸གོང་ས་མཆོག་ག་དུས་ཕེབས་ཀྱང་དགའ་བསུ་ཞུ་རྒྱུ་ཡིན་པར་གསུངས་བ་དང་འབྲེལ།  ཐེ་ཝན་དོན་གཅོད་ཟླ་བ་ཚེ་རིང་ལགས་ཀྱིས་ཀྱང་སྐུ་མདུན་ཀྱི་དགུང་ལོའི་བབ་དང་བསྟུན་ནས་ས་ཐག་རིང་པོར་འགྲུལ་བཞུད་བྱེད་རྒྱུ་ཁག་པོ་ཡིན་ནའང་། མ་འོངས་བར་མགོན་པོ་གང་ཉིད་ཐེ་ཝན་དུ་ཆིབས་བསྒྱུར་བསྐྱང་ཐུབ་པའི་རེ་བ་ཡོད་སྐོར་ངོ་སྤྲོད་གནང་ཡོད་ལུགས་གསུངས་སོང་། གཞན་ཡང་ཁོང་གིས་དེ་རིང་གི་བོད་དོན་རྒྱབ་སྐྱོར་གྱི་ཚོགས་འདུའི་གོ་སྐབས་དང་སྟབས་བསྟུན་གྱིས།  བཙན་བྱོལ་ནང་གི་རྒྱ་སྐད་རྒྱ་ཡིག་ཤེས་མཁན་གྱི་མི་རབས་གཉིས་བ་རྣམས་རྫོགས་འགྲོ་བཞིན་ཡོད་པར་བརྟེན། གྲོས་ཚོགས་འཐུས་མི་རྣམས་ཀྱི་རྒྱབ་སྐྱོར་གྱི་འོག་ནས་མ་འོངས་བར་བོད་རིགས་སློབ་མ་རྣམས་ལ་རྒྱ་སྐད་རྒྱ་ཡིག་སློབ་སྦྱོང་གི་སློབ་ཡོན་འབུལ་རྒྱུའི་རེ་སྐུལ་གནང་ཡོད་པར་གསུངས་སོང་།