༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་སྒར་དུ་རྟེན་གཞི་བྱས་པའི་གདན་ས་འབྲས་སྤུངས་དང་དགའ་ལྡན་ནང་གི་མཛད་འཆར་ཁག་ལེགས་པར་གྲུབ་སྟེ། དེ་རིང་ཉིན་གུང་ཙམ་ལ་མགོན་པོ་གང་ཉིད་མཆོག་གནས་མཆོག་རྡོ་རྗེ་གདན་དུ་ཞབས་གསོ་བདེ་བར་འཁོད་གནང་མཛད་འདུག དེ་ཡང་༸གོང་ས་སྐྱབས་མགོན་ཆེན་པོ་མཆོག་དེ་རིང་སྔ་དྲོ་ཆུ་ཚོད་བདུན་པ་ཡོལ་ཙམ་ལ་དགའ་ལྡན་བྱང་རྩེ་གྲྭ་ཚང་གི་རྟེན་གཙོ་བོར་གནས་གཟིགས་མཛད་རྗེས་དགའ་ལྡན་ཁྲི་རིན་པོ་ཆེ་མཆོག་དང་། ཤར་བྱང་ཆོས་རྗེ་རྣམ་གཉིས། དེ་བཞིན་གྲྭ་ཚང་གི་དགེ་འདུན་འདུས་མང་བཅས་དང་ལྷན་དུ་འདུ་ཁང་གི་སྒོ་འགྲམ་དུ་སྐུ་པར་ལྷན་སྒྲོན་མཛད་རྗེས། ཁུལ་དེའི་ཉེ་འཁྲིས་སུ་ཆགས་པའི་ཧོབ་ལིའི་གནམ་ཐང་བརྒྱུད་གནས་མཆོག་རྡོ་རྗེ་གདན་དུ་ཆིབས་༸ཞལ་སྒྱུར་གནང་མཛད་ཡོད་པ་དང་། མགོན་པོ་གང་ཉིད་མཆོག་ཉིན་མོའི་ཆུ་ཚོད་དང་པོ་ཡོལ་ཙམ་ལ་གནས་མཆོག་རྡོ་རྗེ་གདན་དུ་ཞབས་གསོ་འཁོད་སྐབས་ས་གནས་སུ་ཡོད་པའི་དད་ལྡན་མང་ཚོགས་ཡོངས་ཀྱིས་ཕེབས་བསུ་གཟབ་རྒྱས་ཞུས་འདུག མཛད་འཆར་ལྟར་བྱས་ན་༸གོང་ས་སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་གྱི་གསུངས་ཆོས་ར་བའི་ནང་དུ་ཕྱི་ལོ་ ༢༠༢༠ ལོའི་ཟླ་ ༡ ཚེས་ ༢ ཉིན་དད་ལྡན་མང་ཚོགས་ཡོངས་ལ་རྒྱལ་སྲས་ཐོགས་མེད་བཟང་པོས་མཛད་པའི་རྒྱལ་སྲས་ལག་ལེན་སོ་བདུན་མའི་གསུང་ཆོས་དང་། ཕྱི་ཚེས་ ༣ ཉིན་སྤྱན་རས་གཟིགས་ཀྱི་བཀའ་དབང་། དེ་བཞིན་ཕྱི་ཚེས་ ༤ ནས་ ༦ བར་ཉིན་གྲངས་གསུམ་རིང་འདི་ལོའི་མགོ་སྟོད་གནས་མཆོག་རྡོ་རྗེ་གདན་དུ་སྩལ་བའི་ཉེ་བརྒྱུད་འཇམ་དབྱངས་ཆོས་སྐོར་གྱི་བཀའ་ཆོས་འཕྲོ་སྐྱོང་བཀའ་དྲིན་མཛད་གནང་གི་ཡོད་པ་རེད། གཞི་རྩའི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ཟླ་བ་འདིའི་ཕྱི་ཚེས་བཅུ་གཉིས་ནས་ལྷོ་ཕྱོགས་མོན་གྷོ་འདོད་རྒྱུ་གླིང་བོད་མིའི་གཞིས་སྒར་དུ་རྟེན་གཞི་བྱས་པའི་གདན་ས་འབྲེ་སྤུངས་དང་གདའ་ལྡན་སོ་སོའི་དགོན་ཁག་ཏུ་དད་ལྡན་ཆིག་ཁྲི་བརྒལ་བར་ནང་ཆོས་ངོ་སྤྲོད་དང་ཚེ་དབང་བཅས་བཀའ་དྲིན་བསྩལ་བ་མ་ཟད། དགོན་སྡེ་ཁག་གི་རྟགས་གསལ་ལ་གཟིགས་ཞིབ། ལྷག་པར་དུ་རྗེ་ཙོང་ཁ་པ་ཆེན་པོ་སྐུ་མྱ་ངན་ལས་འདས་ནས་ལོ་དྲུག་བརྒྱ་འཁོར་བའི་རྒྱལ་སྤྱིའི་མཁས་པའི་བགྲོ་གླེང་དང་། རྗེ་ཙོང་ཁ་པ་ཆེན་པོ་མཆོག་གི་དགོངས་རྫོགས་མཆོད་འབུལ་འདུ་འཛོམས་སོགས་སུ་དབུ་བཞུགས་ཀྱིས་བཀའ་སློབ་བཀའ་དྲིན་སྩལ་བ་སོགས་ཁྱོན་ཉིན་གྲངས་ ༡༤ ལྷག་གི་རིང་ལ་མཛད་འཕྲིན་རྒྱ་ཆེར་བསྐྱངས་གནང་མཛད་ཡོད་པ་རེད།

དེ་རིང་བོད་མིའི་སྒྲིག་འཛུགས་ཀྱི་དྲ་གནས་སུ་གནས་ཚུལ་སྤེལ་བ་ལྟར་ན། ཨ་རིའི་བོད་ཀྱི་དོན་གཅོད་ཁང་གི་གོ་སྒྲིག་གིས། སྤྱི་ལོ་༢༠༡༩ ལོའི་བོད་རྒྱ་ཞི་མོལ་ཞེས་པའི་བརྗོད་གཞིའི་འོག རྒྱ་རིགས་ཤེས་ལྡན་མི་སྣ་དང་མང་གཙོ་དོན་གཉེར་བ་སོགས་ཀྱི་གཙོ་བྱས་པའི་རྒྱ་རིགས་འཐུས་ཚབ་པ་སུམ་བཅུ་ཙམ་མཉམ་འཛོམས་ཀྱི་ཐོག་ནས་གསར་འགོད་གསལ་བསྒྲགས་ཤིག་སྤེལ་དེ། རྒྱ་ནག་གིས་༸གོང་ས་ཏཱ་ལའི་བླ་མིའི་ཡང་སྲིད་ཀྱི་ཐད་ལ་ཐེ་ཇུས་བྱེད་བཞིན་པ་དེར་ངོས་ལེན་མེད་པའི་དོན་ཚན་བཞི་ཕྱིར་བསྒྲགས་བྱས་འདུག ཨ་རིའི་གྲོང་ཁྱེར་ནིའུ་ཡོག་ཏུ་འཚོགས་པའི་ལས་རིམ་དེའི་སྐབས། རྒྱ་ནག་གི་དཔྱིད་ཀ་དུས་དེབ་ཀྱི་རྩོམ་སྒྲིག་པ་ཟུར་བ་སྐུ་ཞབས་ཧཱོ་ཕཱེན་ 胡平དང་། རྒྱ་རིགས་མང་གཙོ་དོན་གཉེར་བའི་ཚོགས་གཙོ་སྐུ་ཞབས་ཁྲིན་པོ་ཁཱོང་陈破空སོགས་ཀྱི་གཙོ་བྱས་པའི་རྒྱ་རིགས་ཀྱི་ཤེས་ལྡན་མི་སྣ་སུམ་བཅུ་ཙམ་ལྷན་འཛོམས་ཀྱི་ཐོག ༸གོང་ས་ཏ་ལའི་བླ་མིའི་སྐུའི་ཡང་སྲིད་ཀྱི་གནད་དོན་དེ་ནི་ཆོས་ལུགས་ཀྱི་བྱེད་སྒོ་དང་འབྲེལ་བ་ཡོད་པ་ཞིག་ཡིན་པར་བརྟེན། གནད་དོན་དེ་ནི་༸གོང་ས་མཆོག་དང་བོད་མི་མང་གི་ཕྱག་ན་ཡོད་པ་ལས་རྒྱ་ནག་དམར་ཤོག་སྲིད་གཞུང་ལ་དེར་ཐེ་བྱུས་བྱེད་རྒྱུའི་དབང་ཆ་གཅིག་ཀྱང་མེད་པ་ཡོངས་གྲགས་གནང་འདུག དེ་ཡང་ཐེངས་འདིའི་ཚོགས་ཐོག་ཏུ་སྐུའི་ཡང་སྲིད་དང་འབྲེལ་བའི་དོན་ཚན་བཞི་ཅན་གྱི་བསྒྲགས་གཏམ་ཞིག་ཕྱིར་བསྒྲགས་བྱས་ཡོད་པ་རྣམས་ནི། ལོ་རྒྱུས་ཀྱི་ཐོག་ནས་བོད་བརྒྱུད་ནང་བསྟན་གྱི་བླ་སྤྲུལ་ངོས་འཛིན་ཞུ་ཕྱོགས་དེ་ནི་བོད་མི་ཁོ་ནས་རང་ཆས་སུ་མངའ་བའི་ཆོས་ཕྱོགས་ཀྱི་ལམ་ལུགས་ཤིག་ཡིན་པར་བརྟེན། རྒྱ་ནག་གཞུང་གིས་༸གོང་ས་ཏཱ་ལའི་བླ་མའི་ཡང་སྲིད་འཚོལ་ཞིབ་ཀྱི་ཐད་ལ་ཐེ་གཏོགས་བྱེད་ཐབས་མེད་པ་དང་། དམིགས་བསལ་གྱིས་དུས་རྒྱུན་ནས་༸གོང་ས་མཆོག་གིས་བཀའ་གནང་བ་ལྟར། རྒྱ་ནག་དམར་ཤོག་སྲིད་གཞུང་གིས་ནང་བསྟན་ཆོས་ལུགས་འདི་རྨོངས་དད་དང་རྗེས་ལུས་སུ་བརྩི་མཁན་ཞིག་ཡིན་པ་མ་ཟད། མགོན་པོ་གང་ཉིད་གདོན་འདྲེར་བལྟ་མཁན་ཞིག་ཡིན་པར་བརྟེན། མགོན་པོ་གང་ཉིད་མཆོག་གི་ཡང་སྲིད་འཚོལ་ཞིབ་ལ་ཐེ་གཏོགས་བྱེད་བཞིན་པ་དེ་ནི་རྒྱུ་མཚན་དང་བྲལ་ཞིང་དགོད་བྲོ་བའི་བྱ་སྤྱོད་ཅིག་ཡིན་པ་དང་། ལྷག་པར་དུ་རྒྱ་ནག་གིས་སྐུའི་ཡང་སྲིད་ལ་ཐེ་བྱུས་བྱས་པ་འདི་ཡིས་འཛམ་གླིང་གི་ཤར་ནུབ་གང་སར་ཡོད་པའི་བོད་མི་རྣམས་ཀྱི་རྩ་བའི་ཐོབ་ཐང་ལ་རྡོག་རོལ་བྱས་པ་ཞིག་ཡིན་པར་བརྟེན། རྒྱ་ནག་གིས་སྐུའི་ཡང་སྲིད་ཀྱི་གནད་དོན་དེར་ཐེ་གཏོགས་བྱས་པ་ནི་དུས་ནམ་ཡང་ཁྲིམས་འགལ་གྱི་བྱ་སྤྱོད་ཅིག་ཡིན་པར་གསུངས་འདུག གཞན་ཡང་། ཐེངས་འདིའི་ཚོགས་ཞུགས་ཀྱི་རྒྱ་རིགས་ཤེས་ལྡན་པ་དང་མང་གཙོ་དོན་གཉེར་བ་རྣམས་ཀྱིས་བོད་མི་རྣམས་ཀྱི་རྩ་བའི་འགྲོ་བ་མིའི་ཐོབ་དང་རིག་གཞུང་སྲུང་སྐྱོབ། གཞན་ཡང་ཆོས་ལུགས་དད་མོས་དང་རང་བྱུང་སྐྱེད་ཁམས་ཁོར་ཡུག་སྲུང་སྐྱོབ་བཅས་ཀྱི་ཐོབ་ཐང་ལ་རྒྱབ་སྐྱོར་བྱེད་ཀྱི་ཡོད་པ། དེ་བཞིན་མགོན་པོ་གང་ཉིད་ཀྱིས་ལམ་སྟོན་མཛད་པའི་བོད་རྒྱ་གཉིས་ཕན་གྱི་དབུ་མའི་ལམ་གྱི་སྲིད་བྱུས་ལ་ཡང་རྒྱབ་སྐྱོར་བྱེད་ཀྱི་ཡོད་པར་གསལ་བོར་འཁོད་འདུག དེ་བཞིན་དོན་ཚན་ཕྱི་མའི་ནང་དུ། ཚོགས་ཞུགས་པ་རྣམས་ཀྱིས་མགོན་པོ་གང་ཉིད་མཆོག་གིས་དགོངས་བཞེས་མཛད་པའི་བོད་རྒྱ་མཛའ་འབྲེལ་དེར་རྒྱབ་སྐྱོར་དང་གུས་བརྩི་ཡོད་པར་བརྗོད་དེ། བོད་རྒྱ་མཛའ་འབྲེལ་དེ་ནི་ལོ་རྒྱུས་རང་བཞིན་ལྡན་པ་ཞིག་ཡིན་ཕྱིར་རྒྱ་རིགས་ཤེས་ལྡན་པ་དང་མང་གཙོ་དོན་གཉེར་བ་རྣམས་ཀྱིས་མཛའ་འབྲེལ་དེ་རྒྱུན་སྲིང་བྱེད་རྒྱུར་ཤུགས་སྣོན་བྱེད་རྒྱུ་ཡིན་པ་སོགས་ཀྱི་དོན་ཚན་བཞི་འཁོད་པའི་ཐོག རྒྱ་ནག་ལ་ནམ་ཡང་མགོན་པོ་གང་གི་སྐུའི་ཡང་སྲིད་འཚོལ་ཞིབ་ཀྱི་ཐད་ལ་ཐེ་བྱུས་བྱེད་རྒྱུའི་ཐོབ་ཐང་མེད་པ་མངོན་གསལ་གནང་འདུག གཞན་ཡང་སྐབས་དེར་རྒྱ་རིགས་མང་གཙོ་དོན་གཉེར་བའི་ཚོགས་གཙོ་སྐུ་ཞབས་ཁྲིན་པོ་ཁཱོང་陈破空 ཀྱིས། དེང་གི་ཆར་རྒྱ་ནག་གི་ནང་དུ་དཔལ་འབྱོར་དང་ཕྱི་འབྲེལ་གྱི་ཐད་ནས་ཉམས་དམས་ཆེན་པོ་བྱུང་བཞིན་པའི་གཏམ་བཤད་སྤེལ་བ་མ་ཟད། ཧོང་ཀོང་གཙོ་བྱས་པའི་རྒྱ་ནག་གི་ས་ཁུལ་གང་སར་སྤྱི་ཚོགས་བརྟན་བརླིང་དང་ལྷིང་འཇགས་མེད་སྐོར་བརྗོད་ཡོད་པ་ལྟར། ཧོང་ཀོང་གི་སྐུ་ཚབ་ཞིག་གིས་ཀྱང་ཧོང་མི་མང་གི་མངོན་འདོད་དང་ཕུགས་བསམ་སོགས་ཀྱི་ཐད་ནས་གཏམ་བཤད་གནང་འདུག སྐབས་དེར་ཨ་རིའི་དོན་གཅོད་དངོས་གྲུབ་ཚེ་རིང་ལགས་ཀྱིས། རྒྱ་ནག་དམར་ཤོག་གི་རྩུབ་སྤྱོད་འོག་ཏུ་མནར་གཅོད་ཐེབས་པའི་བོད་མི་དང་ཡུ་གུར་བ། དེ་བཞིན་ཧོང་ཀོང་མི་མང་སོགས་ཀྱིས་མཉམ་མཐུན་གྱི་སྒོ་ནས་ལས་འགུལ་སྤེལ་ཤུགས་ཆེ་རུ་བཏང་སྟེ། རྒྱལ་སྤྱིའི་སྤྱིི་ཚོགས་ཀྱི་ཁྲོད་དུ་རྒྱ་ནག་གི་དབང་བསྒྱུར་ལ་ཁ་གཏད་གཅོག་དགོས་གལ་ཡིན་པ་དང་། དེ་བཞིན་བོད་མིའི་སྒྲིག་འཛུགས་ཀྱི་ངོས་ནས་མི་ལོ་བཞི་བཅུའི་རིང་ལ་དབུ་མའི་ལམ་གྱི་སྲིད་བྱུས་ཀྱི་ཐོག་ནས་བོད་རྒྱ་དཀའ་རྙོག་སེལ་ཐབས་མཛད་ཡོད་ནའང་རྒྱ་ནག་དམར་ཤོག་སྲིད་གཞུང་གིས་དེར་ངོས་ལེན་གནང་མེད་ཚུལ་དང་འབྲེལ་ནས་ད་ཆ་བོད་རྒྱ་མཛའ་འབྲེལ་ཀྱི་ཚོགས་པ་དེ་ཤུགས་ཆེ་རུ་གཏོང་དགོས་བའི་ཞུ་སྐུལ་གནང་འདུག གཞན་ཡང་ཁོང་གིས། རྒྱ་ནག་སྲིད་གཞུང་གིས་ཉེ་བའི་ཆར་ཧྥོ་ཊན་གཙུལ་ལག་མཐོ་སློབ་ཀྱི་སྒྲིག་ཡིག་གི་ཁོངས་ནས་བསམ་བློའི་རང་དབང་སོགས་ཀྱི་ཚིག་བརྗོད་ཁག་ཕྱིར་འཐེན་བྱས་ཏེ་ཞི་ཅིན་ཕིང་གི་ལྟ་བ་གསར་འཇུག་བྱས་ཡོད་པ་སོགས་ཀྱི་གནས་ཚུལ་དེ་ཡང་ལུང་འདྲེན་གནང་སྟེ་ད་ལྟའི་སྤྱི་ཡོངས་ཀྱི་རྒྱ་ནག་གི་གནས་བབ་ཐད་ནས་གཏམ་བཤད་གནང་འདུག རྩ་བའི་ཐེངས་འདིའི་བོད་རྒྱ་མཛའ་འབྲེལ་གྱི་བསྒྲགས་གཏམ་གྱི་ཚོགས་ཐོག་ཏུ། རྒྱ་རིགས་མང་གཙོ་དོན་གཉེར་བ་དང་ཤེས་ལྡན་མི་སྣ་སུམ་བཅུ་ལྷག་གི་གཙོ་བྱས་པའི་ཨ་རིའི་དོན་གཅོད་པ་དང་ད་ཡོད་ཀྱི་ཨ་རིའི་དོན་གཅོད་ཁང་གི་བོད་རྒྱ་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་དང་འབྲེལ་མཐུད་པ་ཟུར་བ་ཀུན་དགའ་བཀྲ་ཤིས་ལགས། གཞན་ཡང་ཨ་རིའི་ནིའུ་ཡོག་དང་ནིའུ་ཇིར་སཱི་ཁུལ་གྱི་བོད་རིགས་སྤྱི་དོན་ཚོགས་པའི་ཚོགས་གཙོ་དང་ཚོགས་མི་རྣམས། དེ་བཞིན་ཨ་རིའི་ཁུལ་གྱི་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་སོགས་ཀྱིས་མཉམ་ཞུགས་མཛད་ཡོད་པ་དང་། རྒྱ་རིགས་འབྲེལ་མཐུད་པ་ཚུལ་ཁྲིམས་རྒྱ་མཚོ་ལགས་ཀྱིས་རྒྱ་རིགས་རྣམས་ལ་སྣེ་ལེན་བྱས་པའི་ཐོག དོན་གཅོད་ཁང་གི་རྒྱ་རིགས་འབྲེལ་མཐུད་ཀྱི་ལས་རིམ་ངོ་སྤྲོད་དང་བོད་རྒྱ་གཉིས་ཀྱི་སྤྱི་ཚོགས་ཀྱི་ཁྲོད་དུ་མཛའ་འབྲེལ་མཐོར་འདེགས་གཏོང་ཕྱོགས་སོགས་ཀྱི་ཐད་ནས་གསུངས་བཤད་གནང་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དེ་རིང་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གི་ཉིན་མཐའ་མའི་མཛད་འཆར་དེའི་ཐོག གདན་སའི་དགེ་འདུན་པ་ཚོས་ནང་པའི་བསྟན་པ་ཡུན་རིང་གནས་པར་བསླབ་པ་སློབ་གཉེར་ཙམ་མིན་པར་ཉམས་མྱོང་དགོས་རྒྱུ་གལ་འགངས་ཆེན་པོ་ཡིན་པའི་ལམ་སྟོན་བཀའ་བསྩལ་གནང་བ་མ་ཟད།   རྒྱ་རིགས་བོད་བརྒྱུད་ནང་བསྟན་ལ་དོ་སྣང་ཡོད་མཁན་ཚོར་རྒྱ་སྐད་སློབ་སྦྱོང་བྱས་པ་བརྒྱུད་ཞབས་འདེགས་ཞུ་ཐུབ་པ་ཞིག་གནང་དགོས་པ་དང་།   ལྷག་པར་ཆོས་དད་ཆེ་བའི་ཧི་མ་ལ་ཡའི་རི་རྒྱུད་ཀྱི་མང་ཚོགས་རྣམས་ལ་འབྲེལ་ཡོད་དགེ་འདུན་པ་ཚོས་ཚན་རིག་གི་རྒྱུ་མཚན་ལྡན་པའི་ཐོག་ནས་ནང་ཆོས་ངོ་སྤྲོད་ཡོང་ཐབས་གནང་དགོས་པ་སོགས་ཀྱི་ལམ་སྟོན་ཡང་བསྩལ་གནང་ཡོད་པ་རེད། དེ་ཡང་ད་རིང་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གིས་དགའ་ལྡན་བྱང་རྩེ་གྲྭ་ཚང་གི་རྩོད་རྒྱུགས་ཐོག་དབུ་བཞུགས་མཛད་པ་དང་བསྟུན།  རྩ་བའི་ང་ཚོ་བཙན་བྱོལ་བ་ཞིག་ཡིན་ནའང་ཪང་གཞན་གཉིས་ཀྱི་ངོས་ནས་ཡིད་སྨོན་བྱེད་དགོས་པ་ཞིག་ཆགས་ཡོད་པའི་བཀའ་དགོངས་སྩལ་གནང་པ་དང་སྦྲགས། གཙུག་ལག་ཁང་དང་སྐུ་གསུང་ཐུགས་རྟེན་རྫིག་པོས་ནང་པའི་བསྟན་པ་ཡུན་གནས་རྒྱུར་ཕན་ཐོགས་མེད་པར།  བོད་ཀྱི་ནང་པའི་བསྟན་པ་དེ་ཆོས་ལུགས་འདྲ་འདྲའི་ནང་ནས་མི་འདྲ་བ་ཞིག་ཆགས་དགོས་དོན་དེ་ནི་ཟབ་པ་དང་རྒྱ་ཆེ་བའི་སྟོན་པ་བཅོམ་ལྡན་འདས་དང་ཀླུ་སྒྲུབ་ཡབ་སྲས་སོགས་ཀྱི་རིག་པའི་ལམ་ནས་བཏོན་བཞག་པའི་གཞུང་དང་།   དེའི་ནང་ཚན་ད་དུང་མཁན་ཆེན་ཞི་བ་འཚོའི་ཐུགས་རྗེ་བཀའ་དྲིན་བཅས་ལ་ཐུགས་ཡོད་སྟབས།  རིག་པའི་ལམ་ནས་མིག་མཐོང་ལག་ཟིན་བྱེད་ཐུབ་པའི་རིག་པའི་ལམ་ལུགས་དེ་ཡུན་གནས་ཐུབ་པར་བསླབ་པ་སློབ་གཉེར་བྱེད་རྒྱུ་གལ་འགངས་ཆེན་པོ་ཡིན་པ་དང་།    དེ་ཡང་ཚིག་སྐམ་པོ་ཙམ་མིན་པར་དཔྱད་ཞིབ་དང་ཉམས་མྱོང་གི་ངེས་པ་ཐོབ་པའི་ཐོག་ནས་བསྟན་པ་འཛིན་སྐྱོང་སྤེལ་གསུམ་གནང་ཐབས་དགོས་པའི་ལམ་སྟོན་བཀའ་བསྩལ་གནང་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་།    དགེ་འདུན་པ་སློབ་གཉེར་ཐོན་པ་དེ་དག་གིས་བོད་ཀྱི་སོ་སོའི་ཕ་ཡུལ་ཁུལ་དུ་གཞུང་ཆེན་སློབ་ཁྲིད་གནང་ཐུབ་བྱེད་དགོས་པ་དང་།   དེ་བཞིན་ཆོས་དད་ཤིན་ཏུ་ནས་ཆེ་བའི་ཧི་མ་ལ་ཡའི་རི་རྒྱུད་ཀྱི་ནང་པ་ཚོར་འབྲེལ་ཡོད་དགེ་འདུན་པ་ཚོས་ཚན་རིག་གི་རྒྱུ་མཚན་ལྡན་པའི་ཐོག་ནས་ནང་ཆོས་ངོ་སྤྲོད་ཡོང་ཐབས་ཀྱི་འབད་བརྩོན་གནང་དགོས་པའི་ལམ་སྟོན་ཡང་བསྩལ་གནང་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་སྐབས་དེར་ད་དུང་།   རྒྱ་ནག་ནང་དེང་སྐབས་ཆོས་དད་རང་དབང་གི་སྲིད་བྱུས་ལ་ཕྲན་བུའི་གུ་ཡངས་ཀྱི་རྣམ་པ་ཞིག་ཡོད་སྟབས་ཕ་མེས་ནས་ནང་པ་ཡིན་པའི་འཛམ་གླིང་གི་མི་འབོར་མང་ཤོས་ཡིན་པའི་རྒྱ་རིགས་བོད་བརྒྱུད་ནང་བསྟན་ལ་དོ་སྣང་ཡོད་མཁན་ཚོར་དགེ་འདུན་པ་ཚོས་རྒྱ་ཡིག་དང་རྒྱ་སྐད་སློབ་སྦྱོང་བྱས་པའི་ཐོག་ནས་ཞབས་འདེགས་སྒྲུབ་དགོས་པའི་ལམ་སྟོན་ཡང་བཀའ་བསྩལ་གནང་ཡོད།   གཞི་རྩའི་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁ་སྔོན་ཕྱི་ཚེས་ ༡༢ ཉིན་རྗེ་གཙོང་ཁ་ཆེན་པོ་མཆོག་གི་དྲུག་བརྒྱའི་དུས་དྲན་དང་འབྲེལ་མོན་གྷོ་འདོད་རྒུ་གླིང་དུ་ཞབས་སོར་འཁོད་པ་ཞིག་ཡིན་པ་དང་།  དེ་རིང་དགའ་ལྡན་བྱང་རྩེ་གྲྭ་ཚང་གི་རྩོད་རྒྱུགས་སུ་དབུ་བཞུགས་མཛད་པ་དེ་ནི་༸མགོན་པོ་གང་ཉིད་ཀྱི་མོན་གྷོ་གཞིས་ཆགས་ཀྱི་མཛད་འཆར་མཐའ་དེ་ཡིན་པ་རེད།

དེ་རིང་རྗེ་ཙོང་ཁ་པ་ཆེན་པོ་མཆོག་གི་དགོངས་རྫོགས་མཆོད་འབུལ་དགའ་ལྡན་ལྔ་མཆོད་དང་བསྟུན།  འཇམ་མགོན་རྒྱལ་བའི་གདུང་ཚབ་དགའ་ལྡན་ཁྲི་རིན་པོ་ཆེ་་མཆོག་གིས།  དགེ་ལྡན་པ་ཡོངས་ཀྱི་ཚབ་མཛད་དེ་རི་བོ་དགེ་ལྡན་པ་སྤྱིའི་ཐོག་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱལ་བའི་བསྟན་པ་སྤྱི་དང་། ཁྱད་པར་དུ་འཇམ་མགོན་བླ་མའི་བསྟན་པར་མཛད་རྗེས་དང་བཀའ་དྲིན་འགྲན་ཟླ་མེད་པར་ངོས་འཛིན་གྱིས་རྗེ་ཙོང་ཁ་པ་ཆེན་པོའི་གཟེངས་རྟགས་ཤིག་འབུལ་ལམ་ཞུས་ཡོད་པ་རེད།  དེ་རིང་སྔ་དྲོ་རྒྱ་གར་ལྷོ་ཕྱོགས་མོན་གྷོ་བོད་མིའི་གཞིས་ཆགས་སུ་རྟེན་གཞི་བྱས་པའི་དགའ་ལྡན་བླ་སྤྱི་རུ་༸འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་དང་།  ཤར་བྱང་ཆོས་རྗེ་རྣམ་པ་གཉིས།  དགའ་ལྡན་ཁྲི་ཟུར་རིན་པ་ཆེ།  ཇོ་ནང་བསྟན་བདག་རིན་པོ་ཆེ།  བླ་སྤྲུལ་དགེ་བཤེས་དང་དགེ་འདུན་འདུས་མང་། དེ་བཞིན་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་དང་། སྤྱི་འཐུས་ཚོགས་གཙོ་མཆོག    ཁྲིམས་ཞིབ་པ་ཆེ་བ་མཆོག  ད་རེས་ཀྱི་དུས་དྲན་ཁྱད་པར་ཅན་དེར་ཆེད་མངགས་ཕེབས་པའི་ཕྱི་རྒྱལ་གྱི་བོད་རིག་པའི་མཁས་དབང་དང་གཞན་ཡང་སྐུ་མགྲོན།   བོད་མི་མང་ཚོགས་བཅས་མི་གྲངས་སྟོང་ཕྲག་འགའ་ཤས་བརྒལ་བ་ཞིག་འདུ་འཛོམས་བྱུང་བའི་ཁྲོད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རི་བོ་དགེ་ལྡན་ཡོངས་ཀྱི་ཚབ་མཛད་དེ་དགའ་ལྡན་ཁྲི་རིན་པོ་ཆེ་མཆོག་གི་དབུས་པའི་ཤར་བྱང་གི་ཆོས་རྗེ་རྣམ་གཉིས་བཅས་ཀྱིས་རྗེ་ཙོང་ཁ་པ་ཆེན་པོ་མཆོག་སྐུ་མྱ་ངན་ལས་འདས་ཏེ་མི་ལོ་དྲུག་བརྒྱ་འཁོར་བ་དང་། ༸གང་ཉིད་ཀྱིས་ཕྱག་བཏབ་པའི་དགའ་ལྡན་རྣམ་པར་རྒྱལ་བའི་གླིང་བཅས་དུས་ཚིགས་ཁྱད་པར་ཅན་དེ་དང་བསྟུན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྗེ་ཙོང་ཁ་པ་ཆེན་པོའི་གཟེངས་རྟགས་འབུལ་བཞེས་མཛད་སོང་། མཛད་སྒོའི་ཐོག་དགའ་ལྡན་ཤར་རྩེའི་མཁན་པོ་བྱང་ཆུབ་སངས་རྒྱས་མཆོག་གིས་དེ་རིང་གི་དུས་དྲན་ཁྱད་པར་ཅན་དང་འབྲེལ་བའི་དགའ་བསུའི་གསུང་བཤད་ནང་རྗེ་ཙོང་ཁ་པའི་གདན་སའི་ཁྱད་ཆོས་དང་གང་ཉིད་ཀྱི་མཛད་རྣམ་སྙིང་བསྡུས་བཅས་པ་ངོ་སྤྲོད་གནང་ཡོད་པ་མ་ཟད།   ༸གོང་ས་༸སྐྱབས་མགོན་ཆེན་པོ་མཆོག་གིས་རྗེ་ཙོང་ཁ་པའི་རྣམ་ཐར་དང་མཛད་པ་བཅས་ཀྱི་ཕྱག་དེབ་ཁག་གཅིག་དབུ་འབྱེད་མཛད་པ་དང་འབྲེལ།  མཛད་སྒོའི་ཐོག་ད་དུང་སོག་པོའི་དགའ་ལྡན་མགོན་པའི་མཁན་པོ་བླ་མ་ཆོས་ཀྱི་རྒྱ་མཚོ་མཆོག་གིས་ལོ་རྒྱུས་ཁྲོད་ཀྱི་བོད་སོག་བར་གྱི་འབྲེལ་བ་དང་།  ལྷག་པར་སོག་ཡུལ་དུ་བར་སྐབས་ཤིག་ལ་ཆབ་སྲིད་དབང་གིས་ནང་པའི་བསྟན་པ་དང་རིག་གཞུང་ལ་དཀའ་ངལ་འཕྲད་ཡོད་ཀྱང་ད་ཆ་སོག་ཡུལ་ནང་བསྐྱར་གསོ་བྱུང་སྟེ་སློབ་གཉེར་ཡར་ཐོན་འགྲོ་བཞིན་པ་སོགས་ཀྱི་གསུང་བཤད་བགན་ཡོད་པ་རེད། དྲུག་བརྒྱའི་དུས་དྲན་མཛད་སྒོ་དེའི་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་གིས་དེ་རིང་ཚོགས་འདུ་དེའི་གལ་གནད་སོགས་ཀི་སྐོར་གསུང་བཤད་གནང་བ་མ་ཟད་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཀྱང་སྐབས་དེར་བོད་བརྒྱུད་ནང་བསྟན་གྱི་གལ་གནད་དང་ད་ལྟའི་འཛམ་གླིང་སྤྱིའི་འགྱུར་འགྲོས་ལ་གཞིགས་པའི་བོད་བརྒྱུད་ནང་བསྟན་གྱི་མིའི་བདེ་དོན་ཐོག་ཕན་རླབས་བསྒྲུབ་པའི་ནུས་པ་ཡོད་སྐོར་སོགས་ཀྱི་གསུང་བཤད་གནང་ཡོད། སྐབས་དེར་༸འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་གིས་༸རྗེ་ཙོང་ཁ་པ་ཆེན་པོ་མཆོག་གི་མདོ་བསྔགས་ཀྱི་བསྟན་པ་སྤྱི་དང་ལྷག་པར་དུ་ལྟ་གྲུབ་ཀྱི་མཛད་རྗེས་བཅས་ཀྱི་སྐོར་གསུང་སྟེ་རྒྱུན་དུ་ནས་ང་ཚོ་ཚང་མས་ཆོས་ལ་དད་མོས་བྱས་པ་ཙམ་མིན་པར་ཉམས་ལེན་ཡོང་ཐབས་སོགས་ཀྱི་ལམ་སྟོན་བསྩལ་སོང་། དེ་རྗེས་དེ་རིང་གི་དྲུག་བརྒྱའི་དུས་དྲན་མཛད་སྒོིའི་སྐུ་མགྲོན་གཙོ་བོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་གི་དུས་དྲན་དང་འབྲེལ་བའི་གསུང་བཤད་གནང་མཁན་ཡོངས་དང་ལྷག་པར་དུ་ད་རེས་ཡུལ་ཁག་འདྲ་མིན་ནས་སོ་སོའི་ཕ་མེས་ཀྱི་ཆོས་བརྒྱུད་ལ་ལྟོས་མེད་སྤྱིར་སངས་རྒྱས་པའི་ཆོས་དང་ཡང་སྒོས་སུ་ཙོང་ཁ་ཆེན་པོའི་ལེགས་བཤད་ལ་དོ་སྣང་གནང་བར་ཐུགས་རྗེ་ཞུས་པ་དང་འབྲེལ་དེ་རིང་དགའ་ལྡན་ལྔ་མཆོད་ཀྱི་དུས་ཆེན་དང་བསྟུན་རྗེ་དགེ་འདུན་གྲུབ་ཀྱི་མཛད་པའི་ཤར་གངས་རི་མའི་བཀའ་ཆོས་བཀའ་དྲིན་བསྩལ་གནང་མཛད་ཡོད་པ་དང་། དེ་རྗེས་དེ་རིང་གི་དྲུག་བརྒྱའི་དུས་དྲན་དང་འབྲེལ་བའི་དགའ་ལྡན་ལྔ་མཆོད་ཀྱི་གཟེངས་རྟགས་འབུལ་བཞེས་མཛད་སྒོ་དེ་ལེགས་གྲུབ་བྱུང་ཡོད་པ་དང་། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དེ་རིང་ནས་ཉིན་གྲངས་གསུམ་རིང་དགའ་ལྡན་བྱང་རྩེ་གྲྭ་ཚང་དུ་སྐུ་བཞུགས་མཛད་རྒྱུ་ཡིན་པ་རེད།

དེ་རིང་འདི་ག་རྒྱ་གར་ལྷོ་ཕྱོགས་སུ་གདན་ས་དགའ་ལྡན་རྣམ་པར་རྒྱལ་བའི་གླིང་དུ་རི་བོ་དགེ་ལྡན་པའི་སྲོལ་འབྱེད་ཁམས་གསུམ་ཆོས་ཀྱི་རྒྱལ་པོ་རྗེ་བཙུན་ཙོང་ཁ་པ་ཆེན་པོ་སྐུ་མྱ་ངན་ལས་འདས་ནས་ལོ་དྲུག་བརྒྱ་འཁོར་བ་དང་བསྟུན་དགའ་ལྡན་ཚོགས་ཆེན་དུ་རྒྱལ་སྤྱིའི་མཁས་པའི་བགྲོ་གླེང་ཞིག་དབུ་འཛུགས་གནང་ཡོད་པ་དང་།   འཛམ་གླིང་རྒྱལ་ཁབ་འདྲ་མིན་ཁག་བཅུ་ཙམ་ནས་ཕེབས་པའི་མཁས་པའི་བགྲོ་གླེང་དེར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུ་འབྱེད་བཀའ་དྲིན་མཛད་ཡོད་པ་མ་ཟད།   མགོན་པོ་གང་ཉིད་མཆོག་གིས་སྐབས་དེར་སྤྱིར་ནང་པ་སངས་རྒྱས་པའི་བསྟན་པ་དང་།  ཡང་སྒོས་སུ་རི་བོ་དགེ་ལྡན་པའི་བསྟན་པའི་སྲོལ་འབྱེད་རྗེ་ཙོང་ཁ་པ་ཆེན་པོ་མཆོག་གི་མཛད་པའི་རྣམ་བཞག་ཁག་གཅིག་ངོ་སྤྲོད་དང་འབྲེལ།      རྗེ་ཙོང་ཁ་པ་ཆེན་པོ་མཆོག་ནི་སྔོན་གྱི་མཁས་པ་ཚོས་ཀྱང་ཡིད་རང་བསྔགས་བརྗོད་ཞུ་ཡུལ་གྱི་བསམ་གྱི་མི་ཁྱབ་པའི་མཁས་པ་ཞིག་ཡིན་སྐོར་སོགས་ཀྱི་བཀའ་སློབ་བཀྲིན་བསྩལ་གནང་སོང་། དེ་རིང་ནས་དབུ་འཛུགས་ཞུས་པའི་རྒྱལ་སྤྱིའི་མཁས་པའི་བགྲོ་གླེང་དེའི་ཐོག་རྒྱལ་སྤྱིའི་ནང་སྙན་གྲགས་ཆེ་བའི་ཕྱི་རྒྱལ་བའི་བོད་རིག་པའི་མཁས་དབང་སློབ་དཔོན་ Jeffrey Hopkins མཆོག་གི་དབུས་པའི་ Donald S Lopez,  Bob Thurman ལ་སོགས་པའི་རྒྱལ་ཁབ་ཁག་བཅུའི་ནང་ནས་མཁས་དབང་མང་པོ་ཞིག་ཆེད་ཕེབས་གནང་འདུག་པ་མ་ཟད།   ཉིན་གྲངས་གསུམ་རིང་མུ་མཐུད་རྗེ་ཙོང་ཁ་ཆེན་པོའི་རྗེས་དྲན་གྱི་མཁས་པའི་བགྲོ་གླེང་དེའི་ཐོག་བོད་པའི་མཁས་དབང་མང་པོ་ཞིག་གིས་ཀྱང་གཏམ་བཤད་གནང་རྒྱུའི་ལས་རིམ་ཡོད་པ་རེད།   དེ་རིང་གི་དབུ་འབྱེད་མཛད་སྒོའི་སྐུ་མགྲོན་གཙོ་བོ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས།  རི་བོ་དགེ་ལྡན་པའི་བསྟན་པའི་སྲོལ་འབྱེད་རྗེ་ཙོང་ཁ་པ་ཆེན་པོ་མཆོག་ནི་བཤད་སྒྲུབ་གཉིས་ལྡན་གྱི་སེར་འབྲས་དགའ་གསུམ་གྱི་གདན་ས་ཁག་གསར་འཛུགས་གནང་བ་དང་།    ལྷག་པར་དུ་རྗེ་རིན་པོ་མཆོག་གིས་རྒྱལ་བའི་ལུང་དང་རྟོགས་པ་འཛིན་སྐྱོང་སྤེལ་གསུམ་ཐོག་མཛད་པ་ཆེན་པོ་བསྐྱངས་ཡོད་པ་སོགས་ཀྱི་ཁྱད་ཆོས་ཀྱང་ངོ་སྤྲོད་བསྩལ་གནང་ཡོད།  དགའ་ལྡན་རྣམ་པར་རྒྱལ་བའི་གླིང་གི་གོ་སྒྲིག་ཞུས་པའི་ད་རེས་རྗེ་ཙོང་ཁ་པ་ཆེན་པོའི་མྱང་འདས་བའི་དུས་དྲན་དང་འབྲེལ་བའི་རྒྱལ་སྤྱིའི་མཁས་པའི་བགྲོ་གླེང་གི་དབུ་འབྱེད་མཛད་སྒོེ་དེའི་ཐོག་གོ་སྒྲིག་ཚོགས་ཆུང་ཁོངས་སུ་ཡོད་པའི་དགེ་བཤེས་ཐུབ་བསྟན་སྦྱིན་པ་ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་ལ་ཁོང་རང་ཉིད་ཀྱི་རྩོམ་བྲིས་གནང་བའི་རྗེ་རིན་པོ་ཆེའི་རྣམ་ཐར་གྱི་དེབ་དེའི་དཔར་ཕུད་ཞུས་པ་མ་ཟད་ད་རེས་ཀྱི་མཁས་པའི་བགྲོ་གླེང་ཚོགས་འདུའི་ངོ་སྤྲོད་དང་དམིགས་ཡུལ་བཅས་པ་ཚོགས་མགོན་དུ་སྙན་སྒྲོན་ཞུས་ཡོད་པ་རེད ཤེས་རྟོག་བྱས་པ་ཡིན་ན་རྗེ་ཙོང་ཁ་པའི་མྱང་འདས་དུས་དྲན་དང་འབྲེལ་བའི་རྒྱལ་སྤྱིའི་མཁས་པའི་བགྲོ་གླེང་དེ་དེ་རིང་ནས་ཉིན་གྲངས་གསུམ་རིང་མུ་མཐུད་འཚོགས་རྒྱུ་ཡིན་པ་དང་།  ཉིན་གྲངས་གསུམ་དེའི་རིང་མཁས་དབང་དེ་དག་བར་རྗེ་རིན་པོ་ཆེའི་རྣམ་ཐར་དང་།  བཞེད་པ།  མཛད་རྗེས་སྤྱིའི་སྐོར་དང་།    ལྷག་པར་དུ་ཟབ་མོ་དབུ་མའི་སྐོར།  དྲང་ངེས་དང་ཕར་ཕྱིན།    བློ་སྦྱོང་དང་གསང་བསྔགས་རྣལ་འབྱོར་བླ་མེད་བཅས་ཀྱི་སྐོར་ཡང་བགྲོ་གླེང་གནང་གི་ཡོད་པ་རེད།

ཁ་སང་ཨ་རིའི་གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གི་ངོས་ནས་ Tibet Policy Act 2019 ཞེས་པའི་བོད་མི་རྣམས་ལ་སྐུའི་ཡང་སྲིད་ཀྱི་གནད་དོན་ཐད་ཐག་གཅོད་བྱེད་རྒྱུའི་ཐོབ་ཐང་དགོས་པ་དང། གནད་དོན་དེའི་ཐོག་ཐེ་བྱུས་བྱེད་མཁན་རྒྱ་ནག་དཔོན་རིགས་རྣམས་ཨ་རིའི་ནང་བསྐྱོད་པར་དམ་དྲག་བྱེད་རྒྱུ་སོགས་འཁོད་པའི་བོད་དོན་རྒྱབ་སྐྱོར་གྱི་ཁྲིམས་འཆར་དེའི་ཐོག་གྲོས་བསྡུར་བསྐྱར་ཞིབ་གནང་རྗེས། ཆབ་སྲིད་ཚོགས་པ་དབྱེར་མེད་ཀྱི་གྲོས་ཚོགས་འཐུས་མི་ཡོངས་ཀྱིས་རྒྱབ་སྐྱོར་གནང་བ་དང་འབྲེལ། རིང་མིན་ཁྲིམས་འཆར་དེ་གཏན་འབེབས་ཆེད་གྲོས་ཚོགས་འོག་མའི་ནང་འཁྱེར་རྒྱུ་གཏན་ཁེལ་འདུག རྩ་བའི་ཁྲིམས་འཆར་དེ་ཕྱི་ལོ་ ༢༠༠༢ ལོའི་ཨ་རིའི་གཞུང་གི་བོད་དོན་རྒྱབ་སྐྱོར་གྱི་ཁྲིམས་འཆར་གཏན་འབེབས་གནང་བའི་ཐོག་ལ་བསྐྱར་བཅོས་གནང་བ་ཞིག་ཆགས་ཀྱི་ཡོད་པ་དང་། དེའང་འདི་ལོའི་ཕྱི་ཟླ་ ༩ པའི་ནང་ ཨ་རིའི་གྲོས་ཚོགས་དང་འཛིན་སྐྱོང་གི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་གྲོས་ཚོགས་འཐུས་མི་སྐུ་ཞབས་ Jim McGovern ལགས་དང་ཚོགས་ཆུང་དེའི་མཉམ་འབྲེལ་ཚོགས་གཙོ་གྲོས་ཚོགས་འཐུས་མི་ Chris Smith ལགས། དེ་བཞིན་ཨ་རིའི་གྲོས་ཚོགས་ཀྱི་ཕྱི་འབྲེལ་ལས་དོན་ཚོགས་ཆུང་གི་ཚོགས་མི་དང་གྲོས་ཚོགས་འཐུས་མི་ Ted Yoho ལགས་དང་གྲོས་ཚོགས་འཐུས་མི་ Michael McCaul ལགས་བཅས་ཀྱིས་ཨ་རིའི་གྲོས་ཚོགས་གོང་འོག་གཉིས་ཀྱི་ནང་དུ་ཁྲིམས་འཆར་དེ་ངོ་སྤྲོད་གནང་ཡོད་པ་རེད། དེ་ཡང་ཁ་སང་རྒྱལ་སྤྱིའི་བོད་དོན་ལས་འགུལ་ཁང་གིས་གནས་ཚུལ་སྤེལ་བར་གཞིགས་ན། ཁ་སང་ཨ་རིའི་གྲོས་ཚོགས་འོག་མའི་ཕྱི་སྲིད་ལས་དོན་ཚོགས་ཆུང་གིས་ཁྲིམས་འཆར་དེར་སྤྱི་མོས་ཀྱི་རྒྱབ་སྐྱོར་ཞུས་པ་དང་འབྲེལ། སྐབས་དེར་ཚོགས་ཆུང་གི་ཚོགས་གཙོ་སྐུ་ཞབས་ Eliot Engel ལགས་ཀྱིས། རྒྱ་ནག་གཞུང་གིས་བོད་མི་རྣམས་ལ་གནའ་བོའི་རིག་གཞུང་ལམ་ལུགས་གཞིར་བཞག་གིས་རང་གི་ཆོས་ཕྱོགས་ཀྱི་དབུ་ཁྲིད་ཐག་གཅོད་བྱེད་རྒྱུའི་ཐོབ་ཐང་སྤྲོད་རྒྱུ་ལས་ལྡོག་སྟེ། བོད་མིའི་ཆོས་དད་རང་དབང་གཙོ་བོར་གྱུར་བའི་གཞི་རྩའི་འགྲོ་བ་མིའི་ཐོབ་ཐང་ཁག་རྩིས་མེད་རྡོག་རོལ་བཏང་སྟེ་བོད་མིའི་ཆོས་ཕྱོགས་ཀྱི་དབུ་ཁྲིད་རྒྱ་ནག་གི་གདམ་ཀྱི་ཡིན་ཟེར་བ་དེ་ནི་བསམ་ཡུལ་ལས་འདས་པ་ཞིག་ཡིན་སྐོར་དང་འབྲེལ། བོད་དོན་ཁྲིམས་འཆར་དེར་རྒྱབ་སྐྱོར་ཞུས་པ་བརྒྱུད། གལ་ཏེ་རྒྱ་ནག་གཞུང་གིས་བོད་མིའི་ཆོས་དད་རང་དབང་རྩིས་མེད་རྡོག་རོལ་བཏང་བ་ཡིན་ན། ཨ་རིའི་ངོས་ནས་ཁ་ཁུ་སིམ་པོར་འདུག་རྒྱུ་མིན་པའི་བརྡ་ལན་གསལ་པོ་ཞིག་སྤྲད་ཡོད་སྟབས། ཁོང་གིས་སྤོབས་པ་མཐོན་པོའི་སྒོ་ནས་ཁྲིམས་འཆར་དེར་རྒྱབ་སྐྱོར་ཞུ་རྒྱུ་ཡིན་པ་དང་། གྲོས་ཚོགས་འཐུས་མི་གཞན་རྣམས་ཀྱིས་ཀྱང་དེ་མཚུངས་རྒྱབ་སྐྱོར་གནང་རྒྱུའི་རེ་བ་ཡོད་པ་གསུངས་འདུག དེ་བཞིན་ཁྲིམས་འཆར་དེ་ཐོག་མར་བཏོན་གནང་མཁན་གྱི་གྲས་སུ་ཡོད་པའི་གྲོས་ཚོགས་འཐུས་མི་ Chris Smith ལགས་ཀྱིས། དེ་སྔ་ཕྱི་ལོ་་༢༠༠༢ ལོར་ཨ་རིའི་བོད་དོན་ཁྲིམས་འཆར་ཐོག་མ་དེ་གཏན་འབེབས་གནང་བ་ནས་བཟུང་ད་བར་གྱི་ལོ་ངོ་ ༡༧ དེའི་ནང་བོད་ནང་གི་གནས་སྟངས་ཇེ་ཞན་ཇེ་འདུག་ཏུ་ཕྱིན་ཡོད་པ་དང་། རྒྱ་ནག་གཞུང་གི་ངོས་ནས་བོད་མིའི་སྐུ་ཚབ་ལྷན་དུ་གྲོས་མོལ་བསྐྱར་གསོ་མ་བྱས་པ་མ་ཟད། སྐུའི་ཡང་སྲིད་གཙོ་བྱས་པའི་མ་འོངས་བོད་མིའི་ཆོས་ཕྱོགས་ཀྱི་དབུ་ཁྲིད་རྒྱ་ནག་གིས་གདམ་རྒྱུའི་འཇིགས་སྐུལ་བྱེད་བཞིན་པ་རྣམས་ནི་བོད་མིའི་ཆོས་ཕྱོགས་ཀྱི་རིག་གཞུང་འགྲོ་ལུགས་དང་རྒྱ་ནག་གཞུང་གིས་ཁས་བླངས་བའི་རྒྱལ་སྤྱིའི་ཆོས་དད་རང་དབང་གི་ཁྲིམས་སྒྲིག་རྣམས་དང་ཡོངས་སུ་རྒྱབ་འགལ་ཡིན་པ་དང་། ལྷག་པར་དུ་རྒྱ་ནག་གིས་བོད་ཐོག་འཛིན་པའི་སྲིད་བྱུས་རྣམས་ཀྱིས་བོད་མིའི་ཆོས་དང་རིག་གཞུང། དེ་བཞིན་སྐད་ཡིག་དང་འཚོ་གནས། རང་བྱུང་ཁོར་ཡུག་བཅས་ལ་དོ་ཕོག་ཤུགས་ཆེར་བཏང་ཡོད་སྐོར་གསུངས་པ་དང་འབྲེལ། སྔར་ལོ་གཏན་འབེབས་གནང་བའི་བོད་ནང་འདྲ་མཉམ་འགྲུལ་བསྐྱོད་ཀྱི་རང་དབང་དགོས་པའི་ཁྲིམས་འཆར་དང་ད་རེས་ཀྱི་བོད་དོན་རྒྱབ་སྐྱོར་གྱི་ཁྲིམས་ཆར་དེ་གཉིས་ཀྱིས། བོད་དང་བོད་མིའི་ལས་དབང་དང་། བོད་ཀྱི་ཁོར་ཡུག་དང་ཆོས། རིག་གཞུང་། དེ་བཞིན་བོད་མིའི་མང་གཙོ་དང་རང་དབང་ཐོབ་ཐང་གི་གནད་དོན་དེ་དག་ཨ་རིའི་གཞུང་གི་ངོས་ནས་གནད་འགག་ཆེན་པོར་བརྩི་བཞིན་ཡོད་པའི་བརྡ་ལན་གསལ་པོ་ཞིག་ཀྱང་སྤྲོད་རྒྱུ་ཡིན་པ་གསུངས་འདུག དེ་བཞིན་གྲོས་ཚོགས་འཐུས་མི་ Jim Mcgovern ལགས་ཀྱིས། ད་རེས་གྲོས་ཚོགས་ཀྱི་ཕྱི་སྲིད་ལས་དོན་ཚོགས་ཆུང་གི་ཁྲིམས་འཆར་དེར་སྤྱི་མོས་ཀྱི་རྒྱབ་སྐྱོར་ཞུས་པར་དགའ་བསུ་ཞུས་པ་དང་འབྲེལ་རྒྱ་ནག་དཔོན་གྱི་རིགས་ཚོའི་ངོས་ནས་༸རྒྱལ་བའི་ཡང་སྲིད་གཙོ་བྱས་པའི་བོད་བརྒྱུད་ནང་བསྟན་གྱི་བླ་སྤྲུལ་ཡང་སྲིད་འདེམས་ཕྱོགས་ལ་ཐེ་བྱུས་བྱས་པ་ཡིན་ན། ཨ་རིའི་གཞུང་གི་ངོས་ནས་དེར་གདོང་ལེན་ནན་པོ་བྱེད་རྒྱུ་ཡིན་པ་མ་ཟད། དེ་ལྟར་བྱེད་མཁན་རྣམས་ལ་ཉེས་ཆད་འགེལ་རྒྱུ་ཡིན་པ་ཤེས་དགོས་བ་ཞིག་རེད་ཅེས་གསུངས་འདུག དེ་རིང་བོད་མིའི་སྒྲིག་འཛུགས་ཀྱི་དྲ་གནས་ཐོག་དེའི་སྐོར་གནས་ཚུལ་སྤེལ་བར་གཞིགས་ན། ཁ་སང་ཚོགས་ཆུང་གི་ངོས་ནས་ཁྲིམས་འཆར་དེ་གཏན་འབེབས་གནང་བ་དང་འབྲེལ། བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་བོད་མིའི་སྒྲིག་འཛུགས་ཀྱི་ཚབ་ཞུས་ཏེ་གྲོས་ཚོགས་འཐུས་མི་རྣམས་ལ་ཐུགས་རྗེ་ཆེ་ཞུས་འདུག

བོད་མིའི་བླ་ན་མེད་པའི་དབུ་ཁྲིད་༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་དེ་མི་ལོ་ ༣༠ འཁོར་བའི་དུས་ཆེན་སྲུང་བརྩི་མ་ཞུས་གོང་རྒྱ་ནག་གཞུང་ཨ་མདོ་བསང་ཆུ་ཁུལ་གྱི་བོད་མི་གསུམ་འཛིན་བཟུང་དོ་དམ་བྱས་པའི་གནས་ཚུལ་ཐོན་འདུག དེ་ཡང་ཁ་སང་ཕྱི་ཚེས་ ༡༧ ཨ་རིར་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་གིས་བྱེས་སུ་ཡོད་པའི་བོད་མི་ཞིག་བརྒྱུད་དེ་ཤེས་རྟོགས་བྱུང་བའི་གནས་ཚུལ་སྤེལ་བའི་ནང་། ཟླ་བ་འདིའི་ཕྱི་ཚེས་ ༡༠ ཉིན་ནོ་སྦེལ་ཞི་བདེ་གཟེངས་རྟགས་ཀྱི་དུས་ཚིགས་མ་བསླེབ་གོང་རྒྱ་ནག་གཞུང་གིས་ཀན་སུའུ་ཞིང་ཆེན་ཀན་ལྷོ་བོད་རིགས་རང་སྐྱོངས་ཁུལ་གྱི་བསང་ཆུ་རྫོང་ནས་བོད་མི་གསུམ་གྱིས་wechat འམ་སྐད་འཕྲིན་བརྒྱུད་དེ་བྱེས་སུ་ཡོད་པའི་བོད་རིགས་དང་འབྲེལ་བ་གནང་བའི་རྐྱེན་གྱིས་འཛིན་བཟུང་བྱས་ཡོད་པ་བརྗོད་འདུག འཛིན་བཟུང་བྱས་པའི་བོད་མི་གསུམ་པོ་ནི་ལོ་ན་སུམ་བཅུ་སོ་གྲངས་ཡིན་པའི་བོད་མི་ཚེ་རྒྱལ་ལགས་དང་། ཀླུ་འབུམ་རྡོ་རྗེ་ལགས། གཞན་ཡང་མིང་ཁ་གསལ་མེད་པའི་བོད་རིགས་གཅིག་ཅེས་རེད་འདུག་པ་དང་། བོད་མི་ཀླུ་འབུམ་རྡོ་རྗེ་ལགས་ནི་ཆུང་དུས་ནས་འོན་པ་ཞིག་ཡིན་པ་དང་། ཕྱིས་སུ་ཐང་གའི་སྒྱུ་རྩལ་ལ་སློབ་གཉེར་གནང་སྟེ་ད་ཆ་ཐང་ག་འབྲི་མཁན་གྱི་སྒྱུ་རྩལ་བ་ཞིག་ཡིན་པ་དང་། ཁོང་གསུམ་པོ་ད་ལྟའི་ཆར་གང་དུ་ཡོད་མིན་སོགས་ཀྱི་གནས་ཚུལ་གང་ཡང་ཤེས་རྟོགས་ཐུབ་ཀྱི་མེད་པ་རེད་འདུག རྒྱལ་སྤྱི་བོད་དོན་ལས་འགུལ་ཁང་གིས་ཀན་ལྷོ་ས་གནས་སྲིད་གཞུང་གིས་གསལ་བསྒྲགས་སྤེལ་བ་ཞིག་ལུང་འདྲེན་གནང་བའི་ནང་། ལོ་རྗེས་མའི་ཟླ་བ་གསུམ་པའི་ཚེས་གཅིག་ནས་རྒྱ་ནག་གཞུང་གིས་ས་གནས་མི་མང་གི་སྤྱི་ཚོགས་དྲ་ལམ་ཁག་ལ་དམ་དྲག་ཤུགས་ཆེ་རུ་བྱེད་རྒྱུ་ཡིན་པ་མ་ཟད། ཕྱི་ཟླ་གསུམ་པའི་ནང་བོད་མིའི་རང་དབང་སྒེར་ལངས་ཀྱི་ཉིན་མོ་དང་། ༢༠༠༨ ལོའི་ས་བྱི་ཞི་རྒོལ་ཆེན་མོའི་དུས་ཚིགས་ཤིག་འཁེལ་གྱི་ཡོད་སྟབས། གསལ་བསྒྲགས་དེའི་ནང་དུས་ཚིགས་དེར་སྐད་འཕྲིན་གྱི་ཚོགས་པ་ཁག་ལ་དོ་དམ་ནན་པོ་བྱ་རྒྱུ་ཡིན་ཞེས་དང་། ཅི་སྟེ་སྐད་འཕྲིན་ཚོགས་པ་སུ་ཞིག་གིས་ཁྲིམས་འགལ་གྱི་གནས་ཚུལ་སྤེལ་བ་སོགས་ཤེས་རྟོགས་བྱུང་ཚེ་ལོ་ངོ་གཅིག་ནས་བརྒྱད་བར་བཙོན་འཇུག་ཁྲིམས་ཐག་གཅོད་རྒྱུ་ཡིན་པ་མ་ཟད། སྐད་འཕྲིན་ཚོགས་པའི་ཚོགས་གཙོ་ལའང་ཉེས་ཆད་གཅིག་མཚུངས་གཏོང་རྒྱུ་ཡིན་ཞེས་དང་། བོད་རིགས་ཚོས་དཀྲོག་གཏམ་སོགས་གང་བྱུང་དྲིལ་བསྒྲགས་བྱས་ཚེ་མཇུག་འབྲས་ངན་པ་ཡོང་སྲིད་པའི་གསལ་བསྒྲགས་སྤེལ་ཡོད་སྐོར་བརྗོད་འདུག གཞི་རྩའི་སྐད་འཕྲིན་གྱི་གནད་དོན་དང་འབྲེལ་ནས་རྒྱ་ནག་གཞུང་གིས་བོད་མི་གང་བྱུང་འཛིན་བཟུང་བྱས་པ་ནི་ཐེངས་དང་པོ་མིན་པར་ཉེ་ལམ་ཕྱི་ཟླ་ ༡༡ པའི་ནང་བོད་གཞིས་ཀ་རྩེ་ནས་ཡིན་པའི་སྐུ་ཞབས་དབང་ཕྱུག་ལགས་ཀྱིས་སྐད་འཕྲིན་བརྒྱུད་༸གོང་ས་མཆོག་གི་ཕྱག་དེབ་དང་༸སྐུའི་གཅེན་པོ་རྒྱལ་ལོ་དོན་གྲུབ་མཆོག་གིས་བརྩམས་པའི་ཀ་ལིམ་པོང་གི་ཐུག་པ་ལས་བཟོ་བའི་ཕྱག་དེབ་བརྒྱུད་སྤེལ་གནང་བར་བརྟེན་འཛིན་བཟུང་བྱས་ཡོད་པ་མ་ཟད། བོད་ཆབ་མདོ་ས་ཁུལ་ནས་ཡིན་པའི་པདྨ་བསམ་གྲུབ་ལགས་ཀྱིས་ བོད་དོན་དང་འབྲེལ་བའི་པར་རིས་ཁག་གཅིག་སྐད་འཕྲིན་བརྒྱུད་ནང་སྤེལ་བའི་ཉེས་མིང་འོག་འདི་ལོའི་གསུམ་བཅུ་དུས་དྲན་གྱི་ཉིན་གཅིག་གི་སྔར་ཉིན་ལ་འཛིན་བཟུང་བྱས་ཡོད་པ་མ་ཟད། ཕྱི་ལོ་ ༢༠༡༦ ལོའི་ནང་དུའང་སྐད་འཕྲིན་བརྒྱུད་དེ་༸གོང་ས་མཆོག་གི་༸སྐུའི་གྱ་སྟོན་སྲུང་བརྩི་དང་འབྲེལ་ནས་རྔབ་ཁུལ་གྱི་བོད་མི་དགུ་འཛིན་བཟུང་བྱས་ཡོད་པ་རེད།

དེ་རིང་འདི་ག་མོན་གྷོ་འདོད་རྒུ་གླིང་གི་དཔལ་ལྡན་འབྲས་སྤུངས་མཁས་མང་བློ་གསལ་བྱེས་པ་གྲྭ་ཚང་དུ་འཇམ་མགོན་བླ་མ་ཙོང་ཁ་པ་ཆེན་པོས་འོད་གསལ་ཆོས་སྐུ་མངོན་དུ་མཛད་དེ་ལོ་ངོ་ ༦༠༠ འཁོར་བའི་རྗེས་དྲན་དང་། འཇམ་མགོན་༸རྒྱལ་བའི་ཐུགས་སྲས་༸རྒྱལ་ཚབ་རྒྱལ་སྲད་དར་མ་རིན་ཆེན་མཆོག་དགའ་ལྡན་ཁྲི་པར་ཁྲི་གསོལ་གནང་སྟེ་ལོ་ངོ་ ༦༠༠ ༸གོང་ས་༸སྐྱབས་མགོན་ཆེན་པོ་མཆོག་དགེ་བཤེས་ལྷ་རམས་པའི་མཚན་གནས་བཞེས་ཏེ་ལོ་ ༦༠ འཁོར་བ་བཅས་ཀྱི་དུས་དྲན་དང་བསྟུན་དབུ་མ་བཞི་བརྒྱ་པའི་མཁས་པའི་བགྲོ་གླེང་ཞིག་ཚོགས་ཡོད་པ་རེད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་མཁས་པའི་བགྲོ་གླེང་དེའི་ཚོགས་མགོན་དུ་དབུ་བཞུགས་མཛད་དེ་ཕྱག་དཔེ་གཟིགས་པའི་དགོས་དོན་གཙོ་བོ་དེ་གཞན་ལ་བདེ་སྐྱིད་ཀྱི་ཞབས་འདགེས་བསྐྲུན་ཐུབ་ཐབས་ཤིག་ཡིན་པའི་ལམ་སྟོན་སོགས་བཀྲིན་བསྩལ་ཡོད་པ་རེད། དེ་ཡང་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱག་དཔེ་གཟིགས་ཏེ་ཐོས་བསམ་སྒོམ་གསུམ་ཡ་མ་བྲལ་བའི་སྒོ་ནས་བྱང་ཆུབ་སེམས་པ་དང་སྟོང་ཉིད་ཀྱི་ལྟ་བ་བསྒོམ་པའི་ཐོག་ནས་རང་གི་བློ་ལ་འགྱུར་བ་འགྲོ་ཐུབ་པ་ཞིག་གནང་དགོས་པ་ལས་ཕྱག་དཔེ་གཟིགས་པའི་དགོས་དམིགས་དེ་དགེ་བཤེས་ཀྱི་མཚན་ཙམ་ཞིག་ཐུབ་ཐབས་མིན་པའི་ལམ་སྟོན་བཀྲིན་ཆེ་བ་མཛད་སོང་། དབུ་མ་བཞི་བརྒྱ་པའི་མཁས་པའི་བགྲོ་གླེང་དེའི་ཐོག་ད་དུང་༸གོང་ས་༸སྐྱབས་མགོན་ཆེན་པོ་མཆོག་ནས་བློ་ལ་འགྱུར་བ་གཏོང་བའི་ལག་ཆ་ཡག་ཤོས་དེ་རྩ་འཇུག་བཞི་གསུམ་ནང་དུ་གསུངས་ཡོད་པའི་ལམ་སྟོན་དེ་དག་ཕུལ་དུ་བྱུང་བ་ཞིག་ཡིན་པའི་བཀའ་བསྩལ་བ་དང་སྦྲགས།  ད་རེས་ཀྱི་བགྲོ་གླེང་དང་འབྲེལ་བའི་དཔྱད་རྩོམ་གནང་མཁན་དེ་དག་ལ་ཡི་རང་བསྔགས་བརྗོད་དང་། ལྷག་པར་དུ་ནང་པ་སངས་རྒྱས་པའི་བསྟན་པ་དེ་མི་རབས་ནས་མི་རབས་བར་གནས་ཐབས་ཀྱི་དམིགས་ཡུལ་ཞིག་གི་འོག་ནས་འཛམ་གླིང་གི་མི་འབོར་དུང་ཕྱུར་བདུན་ཅུ་ལྷག་ཡོད་པ་དེ་དག་ལ་བདེ་སྐྱིད་ཀྱི་ཞབས་འདེགས་ཞུ་ཐུབ་པ་ཞིག་གནང་དགོས་པའི་ལམ་སྟོན་ཡང་བཀྲིན་བསྩལ་སོང་།  དེ་རིང་འབྲས་སྤུངས་བློ་གསལ་གླིང་དུ་ཚོགས་པའི་དབུ་མ་བཞི་བརྒྱ་པའི་བགྲོ་གླེང་དེའི་ཐོག་མཁན་བླ་སྤུལ་འདུས་མང་དང་། དོན་གཉེར་ཅན་གྱི་ཕྱི་རྒྱལ་བའི་མི་རིགས། དེ་བཞིན་བོད་མི་དང་ཧི་མཱ་ལ་ཡའི་དད་ལྡན་མང་ཚོགས་བཅས་མི་གྲངས་ ༤༠༠ ལྷག་འདུ་འཛོམས་བྱུང་འདུག་པ་དང་། བགྲོ་གླེང་དེ་ཝཱ་ཎ་དབུས་་བོད་ཀྱི་གཙུག་ལག་སློབ་གཉེར་ཁང་གི་སློན་དཔོན་ཆེན་མོ་མཁས་དབང་དགེ་བཤེས་ཡེ་ཤེས་ཐབས་མཁས་མཆོག་ནས་གཙོ་སྐྱོང་གནང་ཡོད་པ་ལྟར། འདི་ག་རླུང་འཕྲིན་ཁང་ནས་དགེ་བཤེས་ལགས་སུ་བཅའ་འདྲི་ཞུས་པར་དབུ་མ་བཞི་བརྒྱ་པའི་བསྟན་བཅོས་ཀྱི་བསྟན་བྱ་གཙོ་བོ་ནི་སྟོང་པ་ཉིད་དང་བདག་མེད་སྐོར་ཡིན་པ་དང་།  དེ་རིང་བགྲོ་གླེང་དེའི་ཐོག་རབ་བྱེད་བཞིའི་ཐོག་བགྲོ་གླེང་གནང་བ་དེ་དག་གི་བརྗོད་གཞི་གཙོ་བོ་ནི་ཕྱི་ནང་གི་སྣོད་བཅུས་གཉིས་པོ་མི་རྟག་སྟོང་བདག་མེད་ཀྱི་རང་བཞིན་ཡིན་པ་དང་། ལྷག་པར་དུ་མིའི་མི་ཚེ་དེ་སྡུག་འསྔལ་གི་རང་བཞིན་ཡིན་པ། འགྲོ་བ་མི་ཕན་ཚུན་དབར་ལ་རིགས་རུས་སོགས་ཀྱིས་གཙོས་པའི་གཙང་བཙོག་ཀྱི་དབྱེ་འབྱེད་གནང་རྒྱུ་མེད་སོགས་རབ་བྱེད་བཞིའི་ཐོག་བགྲོ་གླེང་གནང་ཡོད་པར་འགྲེལ་བརྗོད་གནང་སྟེ་རྩ་བའི་དེ་རིང་གི་བགྲོ་གླེང་ཐོག་མཉམ་ཞུགས་གནང་མཁན་ཚོས་དཔྱད་རྩོམ་གི་སྤུས་ཚད་ཡག་པོ་ཡོད་ཀྱང་ཡར་རྒྱས་ལ་མཐའ་མེད་པས་རིམ་བཞིན་ཡར་རྒྱས་གནང་དགོས་གལ་ཡིན་པ་གསུངས་སོང་། གཞི་རྩའི་དེ་རིང་སྔ་དྲོའི་ཚོགས་ཐུན་དང་པོའི་ཐོག་༸གོང་ས་མཆོག་དབུ་བཞུགས་ཀྱིས་དབུ་མ་བཞི་བརྒྱ་པའི་ལེའུ་ ༡༦ ཡོད་པ་ནས་ལེའུ་བཞིའི་ཐོག་བགྲོ་གླེང་གནང་ཡོད་པ་དང་།  དེ་རིང་ཉིན་རྒྱབ་ནས་ད་དུང་ཤར་པ་ཆོས་༸རྗེ་མཆོག་དབུ་བཞུགས་ཀྱིས་གླིང་མཆོག་སྤྲུལ་རིན་པོ་ཆེ་མཆོག་གིས་གཙོ་སྐྱོང་གནང་ཐོག་ལེའུ་ ༥ པ་ནས་ ༡༦ བར་མུ་མཐུད་བགྲོ་གླེང་གནང་གི་ཡོད་པ་རེད།

དེ་རིང་འདི་ག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་གཞིས་ཆགས་ཀྱི་འབྲས་སྤུངས་བློ་གསལ་གླིང་གི་ཆོས་རར་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ནང་གི་དད་ལྡན་ཆི་ཁྲི་བརྒལ་བར་ནང་པའི་ཆོས་ཀྱི་སྙིང་པོ་དང་༸རྗེ་ཚེ་འཛིན་མའི་ཆོ་གའི་སྒོ་ནས་ཚེ་དབང་བཀྲིན་བསྩལ་ཡོད་པ་རེད།  སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་ཚེ་དབང་དངོས་གཞི་དབུ་འཛུགས་མ་བསྩལ་གོང་དུ་ཆོས་འབྲེལ་གྱི་ལམ་སྟོན་བཀྲིན་བསྩལ་བ་དང་།མགོན་པོ་༸གང་ཉིད་མཆོག་ནས་ཚེ་སྒྲུབ་ངོ་མ་དེ་རྒྱུན་དུ་ནས་སེམས་ལ་ཞི་བདེ་བག་ཕེབས་དགོས་རྒྱུ་དེ་ཡིན་པ་དང་།  སེམས་ལྷོད་ལྷོད་ཡོད་ན་ལུས་ཀྱི་འབྱུང་བ་ཆ་སྙོམས་ཡོང་བ་དང་དེའི་ཐོག་ནས་ལུས་ཀྱི་ཟུངས་ཤུགས་གསོས་ཏེ་རང་བཞིན་གྱིས་ཚེ་རིང་པོ་ཡོང་རྒྱུ་ཡིན་པས་དེའི་ཐད་ལ་འབད་བརྩོད་བྱེད་གོས་གལ་ཡིན་པའི་  ལམ་སྟོན་མཛད་པ་དང་བསྟུན་ད་ལྟའི་འཛམ་གླིང་ནང་གི་དཀའ་ངལ་མང་པོ་ཞིག་སེམས་པ་ཆགས་ལྡང་དབང་དུ་སོང་རྐྱེན་ཡོང་གི་ཡོད་སྟབས་རྣམ་ཀུན་ནས་བྱང་ཆུབ་སེམས་དང་སྟོང་ཉིད་ཀྱི་ལྟ་བ་བསྒོམ་རྒྱུ་དེ་ཚེ་སྒྲུབ་ངོ་མ་ཡིན་པའི་ལམ་སྟོན་ཐུགས་བརྩེ་ཆེན་པོས་བསྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་ནས་སྐབས་དེར་ད་དུང་ནང་པའི་ཆོས་ཀྱི་འབྱུང་ཁུངས་གཙོ་བོ་པྭ་ལི་གཞུང་གི་འཚེ་མེད་ཞི་བའི་ལྟ་སྤྱོད་ལ་ཡི་རང་བསྔགས་བརྗོད་མཛད་པ་དང་འབྲེལ་ཏེ་སངས་རྒྱས་བཅོམ་ལྡན་འདས་ཀྱིས་རིག་པར་བརྟེན་པའི་འཚེ་མེད་ཞི་བའི་ལྟ་གྲུབ་བཀའ་བསྩལ་ཡོད་པ་མ་ཟད།  རྩ་བའི་རྒྱ་གར་ནང་དུ་གྲངས་ཅན་པའི་སྟོན་པས་གཙོས་པའི་སྟོན་པ་མང་པོ་བྱུང་ཡོད་ཀྱང་། སེམས་ཁམས་རིག་པ་དང་འབྲེལ་བའི་རྣམ་གཞག་ཞིབ་ཚགས་པོ་གསུང་མཁན་དེ་སྟོན་པ་བཅོམ་ལྡན་འདས་ཉག་གཅིག་ཡིན་སྐོར་བཀའ་བསྩལ་མཛད་པ་དང་སྦྲགས། བཅོམ་ལྡན་འདས་ཀྱིས་ལོ་ངོ་ ༢༥༠༠ གོང་ནས་གསུང་ཟིན་པའི་སེམས་ཁམས་རིག་པའི་ཐོག་ལ་ཚན་རིག་པ་ཚོས་ཀྱང་སློབ་སྦྱོང་བྱ་ཡུལ་ཞིག་ཆགས་ཡོད་སྐོར་སོགས་བཀའ་བསྩལ་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་བོད་མི་ཚོའི་ངོས་ནས་དཔལ་ནཱ་ལེནྡཱའི་ཆོས་བརྒྱུད་དེ་དག་འཛིན་སྐྱོང་སྤེལ་གསུམ་གྱི་ཐོག་ནས་བདག་གཉེར་བྱེད་ཡོད་པར་བཀའ་བསྩལ་བ་ཆབས་ཅིག་ཏུ་དེ་ནི་བོད་མིའི་གཟི་བརྗིད་ཅིག་ཡིན་སྐོར་བཀའ་བསྩལ་སོང་།   མགོན་པོ་༸གང་ཉིད་མཆོག་གིས་དེ་བཞིན་ང་ཚོར་ངལ་བ་མང་དག་ཅིག་འཕྲད་བཞིན་པ་དེ་རྣམས་ནི་རང་གཅེས་འཛིན་གྱི་བློ་ཤུགས་ཆེ་དྲགས་པས་རང་གཞན་ཀུན་ལ་ཕན་པའི་བདག་མེད་རྟོགས་པའི་ཤེས་རབ་དང་གཞན་གཅེས་འཛིན་གྱི་བློ་ལ་འབད་གནད་ཡིན་པར་བཀའ་བསྩལ་དང་སྦྲགས། ཚེ་སྒྲུབ་ངོ་མ་དེ་སེམས་པ་བཟང་པོ་བྱེད་དགོས་ཞེས་ལམ་སྟོན་བཀྲིན་ཆེ་བ་བསྩལ་ཡོད་པ་རེད། དེ་རྗེས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནས་༸རྗེ་ཚེ་འཛིན་མའི་ཆོ་གའི་སྒོ་ནས་ཚེ་དབང་དངོས་གཞི་བཀྲིན་བསྩལ་ཡོད། དེ་རིང་གི་ཆོས་འབྲེལ་ཐོག་ལྷོ་ཕྱོགས་བོད་མིའི་གཞིས་སྒར་ཁག་གི་བོད་མིས་གཙོས་པའི་འབྲུག་ཡུལ། དེ་བཞིན་བལ་ཡུལ་སོགས་ཧི་མཱ་ལ་ཡའི་རི་རྒྱུད་ཀྱི་དད་ལྡན་སེར་སྐྱ་མང་ཚོགས་དང་།ལྷག་པར་དུ་ནུབ་ཕྱོགས་པ་དང་ཤར་ཕྱོག་ཁུལ་ནས་ཀྱང་ཕྱི་རྒྱལ་མི་རིགས་མང་དག་ཅིག་བཅས་ཁྱོན་ཆོས་ཞུ་བ་ཆིག་ཁྲི་སུམ་སྟོང་ལྷག་ཡོད་པ་རེད་འདུག གཞི་རྩའི་༸གོང་ས་༸སྐྱབས་མགོན་ཆེན་པོ་ཁ་སང་འབྲས་སྤུངས་སྒོ་མང་ནས་བློ་གསལ་གླིང་གྲྭ་ཚང་དུ་༸ཞབས་སོར་བདེ་བར་འཁོད་ཡོད་པ་དང་བློ་གསལ་གླིང་གྲྭ་ཚང་དུ་སང་ཉིན་དང་གནངས་ཉིན་བཅས་ཉིན་གྲངས་གཉིས་ཀྱི་བཞུགས་ཞག་མཛད་རིང་ལ་དབུ་མ་བཞི་བརྒྱ་པའི་མཁས་པའི་བགྲོ་གླེང་དང་རྩོད་རྒྱུགས་ཀྱི་ལས་རིམ་ཐོག་དབུ་བཞུགས་མཛད་རྒྱུ་བཅས་ཀྱི་མཛད་འཆར་ཡོད་པ་རེད།