Tibetan Royal Year of 2151 | Year of the Wood Dragon

༸གོང་ས་མཆོག

ཨ་རི་བོད་དོན་རྒྱབ་སྐྱོར་གྱི་ཁྲིམས་འཆར་གསར་པ་གཏན་འབེབས་གནང་བར་དགའ་བསུ།

ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་སམ United States Commission on International Religious Freedom ནས་ཉེ་ཆར་ ༢༨ ཉིན་ཨ་མི་རི་ཀའི་གྲོས་ཚོགས་འོག་མའི་ནང་ Tibetan Policy and Support Act ཞེས་ཨ་རི་བོད་རྒྱབ་སྐྱོར་གྱི་ཁྲིམས་འཆར་གསར་པ་དེ་ཚད་མཐོའི་མང་མོས་ཀྱིས་གཏན་འབེབས་གནང་བར་དགའ་བསུ་དང་སྦྲགས་ཏེ་ཁྲིམས་འཆར་དེ་གང་མགྱོགས་གྲོས་ཚོགས་གོང་མར་གཏན་འབེབས་དང་། ཨ་རི་སྲིད་འཛིན་སྐུ་ཞབས་ཌོ་ནལ་ཊམ་མཆོག་གིས་དེར་མཚན་རྟགས་བསྐྱོན་ཏེ་ཁྲིམས་འཆར་གྱི་དོན་ཚན་ཁག་བཅོས་མིན་གྱིས་ཕྱག་བསྟར་གནང་དགོས་པའི་ཞུ་སྐུལ་གནང་འདུག ཁ་སང་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་དྲྭ་གནས་ཐོག་བསྒྲགས་གཏམ་ཞིག་སྤེལ་བར་ཨ་རིའི་གྲོས་ཚོགས་འོག་མས་གཏན་འབེབས་གནང་བའི་བོད་དོན་རྒྱབ་སྐྱོར་གྱི་ཁྲིམས་འཆར་དེ་རིམ་པས་གྲོས་ཚོགས་གོང་མ་དང་ཨ་རི་སྲིད་འཛིན་བརྒྱུད་དེ་ཡུལ་དེའི་ཁྲིམས་སུ་གཏན་འབེབས་ཐུབ་ཚེ་ཁྲིམས་འཆར་གྱི་ནང་གསལ་ལྟར་༸གོང་ས་མཆོག་གིས་དབུས་པའི་བོད་ཀྱི་བླ་སྤྲུལ་ཡང་སྲིད་ཀྱི་གནད་དོན་ཐོག་རྒྱ་ནག་གཞུང་ལ་ཐེ་བྱུས་བྱེད་དབང་མེད་པ་དང་། ཨ་རིའི་ཕྱི་ལས་ཁུངས་ཀྱིས་བོད་ཀྱི་རྒྱལ་ས་ལྷ་སར་ཨ་རིའི་གཞུང་ཚབ་ལས་ཁུངས་ཆེད་འཛུགས་གནང་ཐུབ་ངེས་ཡིན་པ་སོགས་ཀྱི་དགེ་མཚན་ལྡན་ཡོད་པ་གསུངས་འདུག ལྷག་པར་དུ་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་འགན་འཛིན་གྲས་སུ་ཡོད་པ་སྐུ་ཞབས་ Gary Bauer ལགས་ནས་ཨ་མི་རི་ཀའི་བོད་དོན་རྒྱབ་སྐྱོར་གྱི་ཁྲིམས་འཆར་གསར་པ་འདིས་རྒྱ་ནག་གཞུང་གིས་བོད་དེ་རྒྱལ་སྤྱིའི་ཐོག་སྒོ་བརྒྱབ་ཏེ་ཕྱིའི་རྒྱལ་ཁབ་ཚོ་དང་འབྲེལ་ཐག་གཅོད་བཞིན་པའི་དུས་སྐབས་འདིར་ཨ་རི་གཞུང་ནས་བོད་དོན་དང་བོད་མིའི་མངོན་འདོད་ལ་རྒྱབ་སྐྱོར་ཡོད་པ་མངོན་གསལ་གནང་ཡོད་ཅེས་གསུངས་པ་དང་ཆབས་ཅིག ཁྲིམས་འཆར་དེ་རིམ་པས་གྲོས་ཚོགས་གོང་མར་གཏན་འབེབས་གནང་ཐོག་ཨ་རིའི་སྲིད་འཛིན་སྐུ་ཞབས་ Donald Trump མཆོག་གིས་དེར་མཚན་རྟགས་བསྐྱོན་ཏེ་ཁྲིམས་འཆར་གྱི་དོན་ཚན་ཁག་བཅོས་མིན་གྱིས་ཕྱག་བསྟར་དགོས་པའི་ཞུ་སྐུལ་གནང་འདུག དེ་བཞིན་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་འགན་འཛིན་གྲས་སུ་ཡོད་པ་འབུམ་རམས་པ་བསྟན་འཛིན་རྡོ་རྗེ་ལགས་ཀྱིས་ཨ་རི་བོད་དོན་རྒྱབ་སྐྱོར་གྱི་ཁྲིམས་འཆར་ཆེད་འདོན་གནང་མཁན་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ Jim McGovern ལགས་དང་ཚོགས་ཆུང་དེའི་མཉམ་འབྲེལ་ཚོགས་གཙོ་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས། དེ་བཞིན་ཁྲིམས་འཆར་གཏན་འབེབས་སྐབས་སུ་བོད་དོན་ལ་རྒྱབ་སྐྱོར་གྱི་གསུང་བཤད་གནང་མཁན་གྲོས་ཚོགས་འོག་མའི་ཚོགས་གཙོ་ལྕམ་ Nancy Pelosi མཆོག་གིས་དབུས་པའི་གྲོས་ཚོགས་འཐུས་མི་ཚོར་ཐུགས་རྗེ་ཆེ་ཞུས་པ་དང་སྦྲགས། ཁྲིམས་འཆར་དེ་གང་མགྱོགས་ཁྲིམས་སུ་གཏན་འབེབས་ཐོག་ཁྲིམས་འཆར་གྱི་ནང་གསལ་ལྟར་ཨ་རིའི་ཕྱི་སྲིད་ལས་ཁུངས་སུ་ཨ་རིའི་བོད་དོན་དམིགས་བསལ་འབྲེལ་མཐུད་པ་གང་མགྱོགས་བསྐོ་གཞག་གནང་དགོས་པའང་གསུངས་འདུག ཕྱོགས་མཚུངས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་པདྨ་འབྱུང་གནས་མཆོག་གིས་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ Nancy Pelosi མཆོག་གི་མཚན་ཐོག་ལ་ཕྱག་ཡིག་ཞིག་ཕུལ་ཏེ་འདས་ལོ་ནང་ཨ་རི་གཞུང་ནས་བོད་མི་སྐྱབས་བཅོལ་བ་ཨ་རིར་གཞིས་སྤོས་ཀྱི་ལས་གཞི་དང་། བོད་ནང་འདྲ་མཉམ་འགྲུལ་སྐྱོད་ཀྱི་ཐོབ་ཐང་དགོས་པའི་ཁྲིམས་འཆར་གཏན་འབེབས། དེ་བཞིན་བོད་ནང་གི་འགྲོ་བ་མིའི་ཐོབ་ཐང་དང་འབྲེལ་བའི་གྲོས་ཆོད་གཏན་འབེབས། ༸གོང་ས་མཆོག་ལ་ཨ་རིའི་གསེར་གྱི་གཟེངས་རྟགས་གཙོ་གྱུར་ཆེས་མཐོའི་གཟེངས་རྟགས་མང་དག་ཅིག་ཕུལ་ཡོད་པ་སོགས་ལུང་འདྲེན་དང་སྦྲགས། ཨ་རི་གཞུང་དང་མི་མང་ཡོངས་ནས་ད་བར་བོད་དོན་ཐོག་གཡོ་བ་མེད་པར་རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞེས་གསུངས་འདུག ལྷག་པར་དུ་ཚོགས་གཙོ་མཆོག་གིས་ཐེངས་འདིའི་བོད་དོན་རྒྱབ་སྐྱོར་གྱི་ཁྲིམས་འཆེ་དེ་ཚད་མཐོའི་མང་མོས་ཀྱིས་ གཏན་འབེབས་བྱུང་བ་དེ་ནི་དྲང་བདེན་གྱི་རྒྱལ་ཁ་ཞིག་མཚོན་པ་མ་ཟད། ད་ལྟ་རྒྱ་གཞུང་གི་བཙན་གནོན་འོག་དཀའ་སྡུག་མྱོང་བཞིན་པའི་བོད་མི་ཚོར་རེ་བ་གསར་པ་ཞིག་བསྐྲུན་ཐུབ་ཡོད་པ་སོགས་གསུངས་ཡོད། གཞི་རྩའི་ཉེ་ཆར་ཨ་རིའི་གྲོས་ཚོགས་འོག་མའི་ནང་གཏན་འབེབས་ཟིན་པའི་ Tibetan Policy and Support Act ཞེས་ཨ་རི་བོད་རྒྱབ་སྐྱོར་གྱི་ཁྲིམས་འཆར་གསར་པ་དེ་རིམ་པས་ཡུལ་དེའི་གྲོས་ཚོགས་གོང་མའི་ནང་གཏན་འབེབས་གནང་གི་ཡོད་པ་དང་། ཁྲིམས་འཆར་གསར་པ་དེར་དེ་སྔ་ ༢༠༠༢ ལོར་གཏན་འབེབས་གནང་བའི་ Tibet Policy Act 2002 ཞེས་ཨ་རིའི་བོད་ཐོག་འཛིན་པའི་སྲིད་བྱུས་ནང་གསལ་བའི་དོན་ཚན་ཁག་ལ་རྒྱས་བཤད་དང་༸གོང་ས་མཆོག་གིས་དབུས་པའི་བོད་ཀྱི་བླ་སྤྲུལ་ཡང་སྲིད་ཀྱི་གནད་དོན་ཐོག་རྒྱ་ནག་གཞུང་ལ་ཐེ་བྱུས་བྱ་རྒྱུའི་ཐོབ་ཐང་མེད་པ་དང་། བོད་ཀྱི་རང་བྱུང་ཁོར་ཡུག་སྲུང་སྐྱོབ་དགོས་པ། བོད་མིའི་སྒྲིག་འཛུགས་འདི་བོད་མི་ཡོངས་ཀྱི་མངོན་འདོད་མཚོན་པའི་སྒྲིག་འཛུགས་ཤིག་ཏུ་ངོས་འཛིན་གནང་རྒྱུ་སོགས་འཁོད་ཡོད་པ་རེད།

༸གོང་ས་མཆོག་གི་མང་མཇལ་གནས་སྐབས་རིང་མཚམས་འཇོག་གནང་འདུག

རྒྱ་ནག་ཝུ་ཧན་གྲོང་ཁྱེར་ནས་ཐོག་མར་ཁྱབ་བརྡལ་དུ་བྱུང་བའི་ཏོག་དབྱིབས་ནད་དུག་གམ་ Coronavirus ཞེས་པ་དེ་ད་ལྟའི་ཆར་རྒྱ་ནག་རྒྱལ་ཡོངས་ཙམ་མ་ཟད་འཛམ་གླིང་ཡུལ་གྲུ་མང་དག་ཅིག་ཏུ་རིམ་བཞིན་ཁྱབ་བརྡལ་འགྲོ་མུས་ཡིན་སྟབས། ༸དཔལ་ལྡན་དགའ་ལྡན་ཕོ་བྲང་ཡིག་ཚང་གིས་མགོན་པོ་༸གང་ཉིད་མཆོག་གི་མང་མཇལ་གནས་སྐབས་རིང་མཚམས་འཇོག་གནང་འདུག གཞི་རྩའི་རྣམ་ཀུན་བཞུགས་སྒར་དུ་༸གོང་ས་མཆོག་༸སྐུ་བཞུགས་མཛད་པའི་རིང་རེས་གཟའ་ཟླ་བ་དང་ལྷག་པ། པ་སངས་ནམ་ཡིན་ལ་བོད་མིས་གཙོས་པའི་ཕྱི་རྒྱལ་ཡུལ་གྲུ་གང་ས་ནས་བཅར་བའི་མང་ཚོགས་ལ་མཇལ་མང་བསྩལ་གྱི་ཡོད་པ་མ་ཟད། དེ་བཞིན་ནང་པའི་དད་ལྡན་རྣམས་ལ་དགོས་གལ་ནམ་གཟིགས་བཀའ་ཆོས་སོགས་བཀྲིན་བསྩལ་གྱི་ཡོད་པ་དང་། དེ་དག་གི་ཁོངས་སུ་རྒྱ་ནག་དང་ལྷོ་ཤར་ཨེ་ཤ་ཡ་སོགས་གཙོ་གྱུར་ཡུལ་གྲུ་ཁག་གི་ནང་པའི་དད་ལྡན་ཕོན་ཆེ་ཡོད་པ་རེད། འདི་ག་རླུང་འཕྲི་ཁང་གིས་དེ་རིང་གནས་ཚུལ་ཤེས་རྟོགས་བྱུང་བར་གཞིགས་ན། ༸དཔལ་ལྡན་དགའ་ལྡན་ཕོ་བྲང་ཡིག་ཚང་གིས་ཏོག་དབྱིབས་ནད་དུག་རྐྱེན་པས་གཟའ་འཁོར་འདིའི་རེས་གཟའ་ཟླ་བ་ནས་བཟུང་རྒྱ་ནག་སྐམ་ས་ནས་བཅར་མཁན་ཚོར་མཇལ་ཁ་བསྩལ་མཚམས་བཞག་ཟིན་ཡོད་པ་མ་ཟད། དེ་རིང་ནས་དུས་རྒྱུན་གྱི་མང་མཇལ་ཞུ་སླད་ཐོ་འགོད་གནང་རྒྱུ་རེ་ཞིག་མཚམས་འཇོག་གནང་འདུག གཞི་རྩའི་ཏོག་དབྱིབས་ནད་ཡམས་ཁྲོད་ཉེ་ལམ་རྒྱ་ནག་སྐམ་སའི་ནང་གི་དད་ལྡན་པ་ཁག་གཅིག་ནས་༸གོང་ས་མཆོག་ལ་ནད་གཞི་དེ་ཞི་བར་ཐུགས་སྨོན་སྐྱབས་འཇུག་ཞུས་ཡོད་པ་དང་།  ཁ་སང་༸གོང་ས་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་ཐེ་ལན་ཌི་དང་ཝེ་ཏི་ནམ་གྱི་དད་ལྡན་ཁག་གཅིག་ལ་མཇལ་ཁ་བསྩལ་སྐབས་རྒྱ་ནག་ནང་གི་ནད་ཡམས་དེའི་ཆེད་ཐུགས་སྨོན་མཛད་པ་མ་ཟད། ནད་ཡམས་དེ་ཞི་བར་སྒྲོལ་མའི་གཟུངས་སྔགས་གསུང་འདོན་གནང་ཚེ་ཕན་ཕོགས་ཡོད་པར་ལམ་སྟོན་མཛད་ཡོད་པ་རེད། དེ་རིང་༸མགོན་པོ་མཆོག་གི་ངོ་དེབ་རྒྱལ་བ་རིན་པོ་ཆེ་ཐོག་སྤྱི་རིམ་གསལ་བསྒྲགས་ཤིག་སྤེལ་གནང་བར་ཏོག་དབྱིབས་ནད་གཞི་སྔོན་འགོག་འབྱུང་བཅོས་སླད། བླ་ལྷའི་ཐུགས་དམ་དགོངས་དོན་ལྟར་ཐུབ་པའི་མཚན་སྔགས་དང་མ་ཎི་དུང་ཕྱུར།  དེ་བཞིན་སྒྲོལ་མའི་མཚན་སྔགས་ཡི་གེ་བཅུ་པ། བཀའ་འགྱུར་དག་སྒྲོག རྡོ་རྗེ་རྣམ་འཇོམས་མའི་སྒོ་ནས་རྟེན་ཁྲུས་ཡུལ་ཁྲུས་དང་། འདོད་ཁམས་བདག་མོའི་བསྐང་བ་དང་འབྲེལ་མ་མོའི་འཁྲུགས་སྐོང་། པདྨའི་མནོལ་བསངས་བཅས་འཕྲལ་དུ་བསྒྲུབ་དགོས་པ་དང་། གཟུང་སྔགས་ཁག་མང་ཚོགས་སོ་སོ་ནས་གནང་དགོས་པ། དེ་མིན་རྣམས་དགོན་སྡེ་དང་གྲོང་སྡེ་སྤྱི་ཚོགས་བཅས་ནས་རང་དོན་རང་གཅེས་ཀྱིས་འཕྲལ་དུ་བསྒྲུབ་གལ་ཆེ་བའི་འབོད་སྐུལ་གནང་འདུག བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནང་པའི་དད་ལྡན་པ་རྣམས་ལ་རྒྱ་ནག་ནང་གི་ཏོག་དབྱིབས་ནད་དུག་ཞི་བའི་སླད་སྒྲོལ་མའི་གཟུངས་སྔགས་གསུང་འདོན་གནང་ན་ཕན་ཕོགས་ཆེན་པོ་ཡོད་པར་ལམ་སྟོན་བཀྲིན་བསྩལ་བ་ལྟར། བྱེས་ཀྱི་གདན་ས་ཁག་ཏུ་གྲྭ་བཙུན་རྣམས་ཀྱིས་མགོན་པོ་༸གང་ཉིད་མཆོག་གི་ལམ་སྟོན་ཕེབས་དོན་བཞིན་༸རྗེ་བཙུན་སྒྲོལ་མའི་མཚན་སྔགས་གཙོ་གྱུར་འཕགས་བསྟོད། མ་ཎི། ཏཱ་རེ་འབུམ་ཐེར། ལྷ་མོའི་བསྐང་བཤགས། པཎ་གྲུབ་བསྟོད་ཆེན། བོད་སྐྱོང་འཕྲིན་བསྐུལ། དེ་བཞིན་གདུགས་ཤེར་སེང་གསུམ་གསུང་འདོན་གྱིས་ཞབས་རིམ་གསོག་སྒྲུབ་དབུ་འཛུགས་གནང་འདུག

བཞུགས་སྒར་དུ་ནང་པའི་མཚོན་བྱེད་ཅན་གྱི་གླིང་ཁ་ཆེན་པོ་ཞིག་གསར་འཛུགས་བྱ་འཆར།

མི་འགྱངས་བར་བཞུགས་སྒར་དྷ་སའི་ཁུལ་དུ་ནང་པའི་མཚོན་བྱེད་ཅན་གྱི་གླིང་ཁ་ཆེན་པོ་ཞིག་གསར་རྒྱག་བྱེད་རྒྱུ་རེད་འདུག དེ་རིང་རྒྱ་གར་གྱི་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ༸གོང་ས་༸སྐྱབས་མགོན་རིན་པོ་ཆེ་མཆོག་གི་བཞུགས་སྒར་དྷརྨ་ས་ལ་ནི་ད་ཆ་རྒྱལ་སྤྱིའི་སྒང་ནས་ནང་བའི་གནས་མཇལ་བྱེད་སའི་གདན་ས་གལ་ཆེན་ཞིག་ཏུ་བརྩི་བཞིན་པར་བརྟེན་ས་གནས་སྲིད་གཞུང་གིས་མི་འགྱངས་བར་དྷ་སའི་ཁུལ་དུ་སྨི་གྲུ་བཞི་མ་འབུམ་གཅིག་ལྷག་གི་རྒྱ་ཁྱོན་ཅན་གྱི་ནང་བའི་མཚོན་བྱེད་ལྡན་པའི་གླིང་ཁ་ཆེན་པོ་ཞིག་གསར་རྒྱག་བྱེད་རྒྱུ་ཡིན་པར་འཁོད་འདུག དེ་བཞིན་གསར་ཁང་གིས་ད་ལྟའི་བར་དུ་ཞིབ་འཇུག་བྱས་པ་ལྟར་ན། གླིང་ཁ་དེ་བཞུགས་སྒར་གྱི་དྷོ་ལ་དྷར་རི་རྩར་ཡོད་པའི་ Khaniyara ཁུལ་དུ་གསར་འཛུགས་བྱེད་འཆར་ཡོད་པ་དང་། ཁུལ་དེར་མི་སྟོང་ཕྲག་མང་པོ་འདུས་སྡོད་བྱེད་ཐུབ་པ་མ་ཟད། བཟའ་བཅའི་མཁོ་ཆོས་ཀྱང་མཁོ་སྒྲུབ་ཐུབ་ཀྱི་ཡོད་པ་དང་གླིང་ཁ་དེ་ལེགས་འགྲུབ་བྱུང་ཚེ་དེ་ནི་ཧི་མཱ་ཅལ་མངའ་ཁུལ་གྱི་ནང་པའི་ཞིབ་འཇུག་ལྟེ་གནས་ཆེ་ཤོས་ཤིག་ཏུ་འགྱུར་རྒྱུ་ཡིན་པར་ཚོད་དཔག་གནང་གི་འདུག Asian Development Bank ཞེས་པའི་ཨེ་ཤ་ཡའི་འཕེལ་རྒྱས་དངུལ་ཁང་གིས་མ་དངུལ་སྒོར་བྱེ་བ་ ༨༠ ལྷག་ཆེད་གཏོང་གིས་མ་འཛུགས་བྱེད་རྒྱུ་ཡིན་པར་བསྒྲགས་ཡོད་པ་དང་། ཧི་མཱ་ཅལ་གྱི་ཀང་ར་རྫོང་དཔོན་སྐུ་ཞབས Rakesh Kumar Prajapat ལགས་ཀྱིས་གླིང་ཁ་གསར་རྒྱག་གི་ཞིབ་འཇུག་ཚོགས་ཆུང་ཞིག་གིས་ལས་གཞི་དེ་ལག་བསྟར་ཡོང་ཆེད་ཀྱི་ཕྱག་ལས་གནང་མུས་ཡིན་པར་ཡོངས་གྲགས་གནང་ཡོད་པ་རེད། རྩ་བའི་བཞུགས་སྒར་དྷརྨ་ས་ལ་ནི་རྒྱ་གར་བྱང་ཕྱོགས་ཀྱི་དྷོ་ལ་དྷར་རི་རྒྱུད་དུ་ཆགས་ཡོད་པ་དང་། ཁུལ་འདིའི་མཐོ་ཚད་ནི་རྒྱ་མཚོའི་ངོས་ནས་སྨི་ ༡༥༠༠ མ་ཟིན་ཙམ་ཡིན་པ་དང་ད་ལྟའི་ཆར་བོད་མི་དང་རྒྱ་གར་གྱི་ཡུལ་མི་ཁྲི་ལྔ་ལྷག་གི་གཏན་སྡོད་ཀྱི་གནས་མལ་ཡིན་པ་རེད། སྔོན་ཆད་དྷརྨ་ས་ལ་ནི་གདོད་མའི་ནགས་ཁྲོད་ཀྱི་ལྷིང་འཇགས་ཀྱི་ས་གནས་ཤིག་ཡིན་པ་དང་། ཁུལ་འདིར་རྒྱ་གར་ཧི་མཱ་ཅལ་གྱི་ཧི་མ་ལ་ཡའི་ཁུལ་དུ་གནས་བའི་ Pahari རིགས་རྒྱུད་ཀྱི་འབྲོག་ས་ལྟ་བུ་ལས་གཏན་སྡོད་བྱེད་མཁན་ཉུང་ངུ་ཙམ་ལས་མེད་པ་རེད། འོན་ཏེ་ཕྱི་ལོ་ ༡༩༦༠ ལོ་༸གོང་ས་༸སྐྱབས་མགོན་རིན་པོ་མཆོག་གི་སྐུ་འཁོར་ལྷན་རྒྱས་དང་བོད་གཞུང་དགའ་ལྡན་ཕོ་བྲང་མ་སུ་རི་ནས་དྷ་སར་གནས་སྤོར་གནང་སྟེ་མགོན་པོ་༸གང་ཉིད་མཆོག་སྔོན་ཆད་རྒྱ་གར་དབྱིན་གཞུང་གི་འོག་ཏུ་ཡོད་དུས་ཀྱི་དབྱིན་ཇིའི་དམག་མི་སྡོད་སའི་ཁང་རྙིང་ཞིག་བཟོ་བཅོས་ཤིག་བྱས་རྗེས་ཁུལ་དེར་༸སྐུ་བཞུགས་མཛད་པ་ལྟར་རིམ་བཞིན་རྣམ་རྒྱལ་གྲྭ་ཚང་གསར་རྒྱག་གནང་བ་དང་ལྷན་དུ་བོད་གཞུང་དགའ་ལྡམ་ཕོ་བྲང་གི་གཞུང་འཛིན་ལས་ཁུངས་སོགས་གསར་རྒྱག་གནང་ཡོད་པ་རེད། དེ་ནས་བཟུང་བཞུགས་སྒར་དྷརྨ་ས་ལ་ནི་རྒྱལ་སྤྱིའི་སྒང་ནས་དོ་སྣང་བྱ་ཡུལ་ཞིག་ཏུ་གྱུར་ཡོད་པ་མ་ཟད། ད་ཆ་མཆོད་མཇལ་བ་དང་ཡུལ་སྐོར་སྤྲོ་འཆམ་གྱི་ལྟེ་གནས་ཤིག་ཏུ་གྱུར་ཡོད་པ་མ་ཟད། ༢༠༡༨ ལོར་རྒྱ་གར་སྲིད་གཞུང་གིས་བཞུགས་སྒར་དྷརྨ་ས་ལ་ནི་དེང་རབས་ཀྱི་ཁྱད་ཆོས་ལྡན་པའི་དཔེ་གསར་རང་བཞིན་གྱི་གྲོང་ཁྱེར་འཛུགས་བསྐྲུན་གྱི་ས་ཁུལ་བརྒྱ་ལྷག་གི་ནང་དུ་བདམས་ཐོན་བྱུང་ཡོད་པ་ལྟར། ཧི་མཱ་ཅལ་མངའ་སྡེས་ཀྱང་དྷརྨ་ས་ལ་ནི་མངའ་སྡེའི་རྒྱལ་ས་གཉིས་པ་ཡིན་པར་ཡོངས་གྲགས་གནང་ཡོད་པ་ལྟར། ད་ཆ་བཞུགས་སྒར་དྷརྨ་ས་ལ་ནི་རིག་གནས་སྣ་མང་གི་ལྟེ་བ་དང་། ཕྱི་གླིང་གི་མི་ཚོགས་བརྒྱ་ཁྲི་བཞི་སྟོང་གི་སྨོན་འདུན་ཀློང་གི་ཡུལ་སྐོར་སྤྲོ་འཆམ་གྱི་ལྟེ་གནས་ཤིག་ཏུ་གྱུར་ཡོད་པ་རེད།

༸གོང་ས་མཆོག་གིས་ཏོག་དབྱིབས་ནད་དུག་ཞི་བར་ཐུགས་སྨོན་མཛད་པ།

དེ་རིང་ཕྱི་ ༡ ཚེས་ ༢༩ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་ཐེ་ལན་ཌི་དང་ཝེ་ཏི་ནམ་གྱི་དད་ལྡན་ཁག་གཅིག་ལ་མཇལ་ཁ་བཀའ་དྲིན་བསྩལ་བར་རྒྱ་ནག་ཝུ་ཧན་གྲོང་ཁྱེར་ནས་ཁྱབ་གདལ་བྱུང་བའི་ཏོག་དབྱིབས་ནད་དུག་འམ་ Corona virus ཞེས་པ་དེ་ཞི་བར་དམིགས་བསལ་ཐུགས་སྨོན་མཛད་འདུག ༸དཔལ་ལྡན་དགའ་ལྡན་ཕོ་བྲང་ཡིག་ཚང་གི་རྒྱ་ཡིག་གི་ངོ་དེབ་ཐོག་བརྙན་ཐུང་ཞིག་སྤེལ་གནང་བར་༸གོང་ས་མཆོག་གིས་རྒྱ་ནག་དེ་ལོ་རྒྱུས་ཀྱི་ཐོག་ནས་ནང་པ་ཡིན་པར་བཀའ་བསྩལ་བ་དང་འབྲེལ། དེ་རིང་འདིར་ལེགས་སྦྱར་གྱི་ཆོས་བརྒྱུད་འཛིན་མཁན་དང་པཱ་ལིའི་ཆོས་བརྒྱུད་འཛིན་མཁན་རྣམས་ལྷན་འཛོམས་བྱུང་ཡོད་སྟབས། ང་ཚོ་ཐུན་མོང་གི་ཐོག་ནས་ནད་ཡམས་དེ་ཞི་བར་སྨོན་ལམ་གསུང་འདོན་གནང་དགོས་པ་མ་ཟད་ནང་ཆོས་ལ་དད་པ་དང་རྣམ་ཀུན་གཟུངས་སྔགས་གསོག་རྒྱུའི་གོམས་གཤིས་ཡོད་མཁན་རྣམས་ཀྱི་ངོས་ནས་ཀྱང་༸རྗེ་བཙུན་སྒྲོལ་མའི་མཚན་སྔགས་གང་མང་གསུང་འདོན་གནང་དགོས་པ་དང་དེ་ལྟར་གནང་ཚེ་རིམས་ནད་དེ་ཞི་བར་ཕན་ཐོགས་ཆེན་པོ་ཡོད་པར་ལམ་སྟོན་མཛད་འདུག རྩ་བའི་ཏོག་དབྱིབས་ནད་དུག་དེའི་རྐྱེན་པས་རྒྱ་ནག་རྒྱལ་ཁབ་ཀྱི་ནང་དུ་ད་བར་མི་གྲངས་ ༡༣༢ འདས་གྲོངས་སུ་གྱུར་ཟིན་ཡོད་པ་མ་ཟད། མི་གྲངས་ ༦༠༠༠ ལྷག་ལ་ནད་ཡམས་དེ་ཕོག་ཡོད་པ་ར་འཕྲོད་བྱུང་ཡོད་སྟབས་ཉེ་ལམ་རྒྱ་ནག་སྐམ་ས་ཆེན་པོའི་དད་ལྡན་མང་པོ་ཞིག་གིས་དྲྭ་ལམ་བརྒྱུད་དེ་༸གོང་ས་མཆོག་ལ་ནད་ཡམས་དེ་ཞི་བར་ལམ་སྟོན་བསྩལ་གནང་ཡོང་བའི་གསོལ་འདེབས་ཞུས་ཡོད་པ་ལྟར་༸གོང་ས་མཆོག་གིས་རྒྱ་ནག་ནང་ཡོད་པའི་དགོན་པ་ཁག་དང་། དད་ལྡན་མང་ཚོགས་ཀྱི་ངོས་ནས་༸རྗེ་བཙུན་སྒྲོལ་མའི་མཚན་སྔགས་གང་མང་གསུང་འདོན་གནང་ཚེ་ནད་ཡམས་དེ་ཞི་བར་ཕན་ཐོགས་ཡོད་ཅེས་ལམ་སྟོན་བཀྲིན་ཆེ་བ་བསྩལ་ཡོད་པ་རེད། དེའི་བར་ན་བཙན་བྱོལ་བོད་མི་རྣམས་ཀྱིས་ནད་ཡམས་དེ་ཁྱབ་གདལ་བྱུང་ཟིན་པའི་རྒྱ་ནག་རྒྱལ་ཁབ་སྤྱི་དང་སྒོས་བོད་ནང་ཀྱི་མང་ཚོགས་ཚོར་དངངས་སྐྲག་ཆེ་བའི་དུས་སྐབས་འདིར་གདུང་སེམས་མཉམ་བསྐྱེད་ཞུས་པ་དང་ཆབས་ཅིག སྐུལ་ལྕག་གི་ཚུལ་དུ་ཡིད་གཟབ་གནང་དགོས་པའི་འབོད་སྐུལ་གནང་བཞིན་འདུག གཞི་རྩའི་ནད་ཡམས་དེ་དང་འབྲེལ་ཏེ་༸དཔལ་རྒྱལ་དབང་ཀརྨ་པ་རིན་པོ་ཆེ་མཆོག་གིས་ཀྱང་རྒྱ་སྐད་ནང་དམིགས་བསལ་གསུང་འཕྲིན་ཞིག་བསྩལ་ཏེ་ང་ཚོའི་ངོས་ནས་མཉམ་རུབ་ཀྱིས་འབད་བརྩོན་གནང་ཚེ་དཀའ་ངལ་ལས་མཉམ་དུ་སྒྲོལ་ཐུབ་ངེས་ཡིན་པ་བཀའ་བསྩལ་བ་དང་ཆབས་ཅིག ས་སྐྱ་ནད་བཅོས་ཞེས་པའི་ནད་མེད་པར་བཟོ་བ་དང་གནོད་འཚེ་སེལ་བའི་ཡི་གེ་ཞིག་གསར་སྤེལ་གནང་ཡོད་པ་མ་ཟད། ཁ་སང་ཕྱི་ཚེས་ ༢༨ ཉིན་༸དཔལ་ས་སྐྱ་༸གོང་མ་ཁྲི་ཆེན་རིན་པོ་ཆེ་མཆོག་གིས་ཀྱང་སྤྱི་ཚོགས་དྲྭ་ལམ་བརྒྱུད་བརྙན་ཐུང་ཞིག་འདོན་སྤེལ་གནང་སྟེ་རྒྱ་ནག་ནང་གི་ནད་ཡམས་དེ་ཞི་བར་ལོ་གྱོན་མའི་མཚན་སྔགས་གསུང་འདོན་དང་སྦྲགས་ཏེ་མཚན་གཟུངས་གསུང་འདོན་གནང་ཚེ་ཕན་ཐོགས་ཆེན་པོ་ཡོད་པར་བཀའ་བསྩལ་འདུག

ཨ་རིའི་གྲོས་འོག་མས་བོད་དོན་རྒྱབ་སྐྱོར་གྱི་ཁྲིམས་འཆར་གསར་པ་དེ་ཚད་མཐོའི་མང་མོས་ཀྱིས་གཏན་འབེབས།

ཁ་སང་ཕྱི་ཚེས་ ༢༨ ཉིན་ཨ་རིའི་གྲོས་ཚོགས་འོག་མའི་ནང་ Tibetan Policy and Support Act ཞེས་ཨ་རི་བོད་རྒྱབ་སྐྱོར་གྱི་ཁྲིམས་འཆར་གསར་པ་དེ་ངོ་ཡོད་གྲོས་ཚོགས་འཐུས་མི་ ༤༣༠ ནས་གྲོས་ཚོགས་འཐུས་མི་ ༣༩༢ ནས་རྒྱབ་སྐྱོར་གནང་སྟེ་ཚད་མཐོའི་མང་མོས་ཀྱིས་གཏན་འབེབས་གནང་འདུག གཞི་རྩའི་ཨ་རིའི་བོད་དོན་རྒྱབ་བསྐྱོར་གྱི་ཁྲིམས་འཆར་གསར་པ་དེ་ནི་སྔ་ལོའི་ཕྱི་ཟླ་ ༩ ཚེས་ ༡༣ དང་ ༢༤ སོ་སོར་ CECC ཞེས་ཨ་རིའི་འཛིན་སྐྱོང་དང་གྲོས་ཚོགས་ཀྱི་རྒྱ་ནག་ཐོག་གི་ཚོགས་ཆུང་གི་ཚོགས་གཙོ་ཨ་རིའི་གྲོས་ཚོགས་འོག་མའི་འཐུས་མི་སྐུ་ཞབས་ Jim McGovern ལགས་དང་ཚོགས་ཆུང་དེའི་མཉམ་འབྲེལ་ཚོགས་གཙོ་གྲོས་ཚོགས་གོང་མའི་འཐུས་མི་སྐུ་ཞབས་ Marco Rubio ལགས་གཉིས་ནས་ཡུལ་དེའི་གྲོས་ཚོགས་གོང་འོག་གཉིས་སུ་ཆེད་འདོན་གནང་བ་ཞིག་ཡིན་པ་དང་། འདས་པའི་ཟླ་བ་གསུམ་ལྷག་གི་རིང་ཁྲིམས་འཆར་དེ་ཨ་མི་རི་ཀའི་ཕྱི་འབྲེལ་ལས་དོན་ཚོགས་ཆུང་དང་ཁྲིམས་ལུགས་ཚོགས་ཆུང་སོགས་སུ་ཞིབ་དཔྱད་ཀྱིས་རྒྱབ་སྐྱོར་ཐོབ་ཐོག་ད་རེས་དངོས་སུ་གྲོས་ཚོགས་འོག་མའི་ནང་ཚད་མཐོའི་མང་མོས་ཀྱིས་གཏན་འབེབས་གནང་ཡོད་པ་རེད། ཁ་སང་ཁྲིམས་འཆར་གཏན་འབེབས་ཀྱི་ལས་རིམ་ཐོག་ཁྲིམས་འཆར་ཆེད་འདོན་གནང་མཁན་སྐུ་ཞབས་ Jim McGovern ལགས་ཀྱིས་རྒྱ་ནག་གཞུང་ནས་བོད་རྒྱའི་དཀའ་རྙོག་ཞི་འགྲིག་ཡོང་སླད་བོད་མིའི་འགོ་ཁྲིད་ལྷན་དུ་དོན་དམ་གྱི་གྲོས་མོལ་མ་གནང་བའི་ཁར་བོད་ནང་གྱི་གཞི་རྩའི་འགྲོ་བ་མིའི་ཐོབ་ཐང་ཁག་ཇེ་ཞན་ཇེ་སྡུག་ཏུ་བཏང་སྟེ་བོད་དེ་རྒྱལ་སྤྱིའི་སྐུ་ཚབ་དང་གསར་འགོད་པར་སྒོ་བརྒྱབས་ཡོད་པ་དང་། དམ་དྲག་ཅན་གྱི་སྒྲིག་ཁྲིམས་གཏན་འབེབས་བྱས་ཏེ་བོད་མིའི་ཆོས་ཕྱོགས་ཀྱི་བྱེད་སྒོར་ཚོད་འཛིན་དང་། བོད་ཀྱི་རང་བྱུང་ཁོར་ཡུལ་གཏོར་རྒོལ་སོགས་གཏོང་བཞིན་པའི་སྐབས་འདིར་ཨ་མི་རི་ཀའི་ངོས་ནས་དེ་སྔ་ ༢༠༠༢ ལོར་གཏན་འབེབས་གནང་བའི་ Tibet Policy Act 2002 ཞེས་ཨ་རིའི་བོད་ཐོག་འཛིན་པའི་སྲིད་བྱུས་དེ་ནུས་ཤུགས་ཆེ་རུ་བཏང་སྟེ་ཨ་རིས་བོད་ཀྱི་རང་བྱུང་ཁོར་ཡུག་སྲུང་སྐྱོབ་དང་། བོད་མིའི་རང་ཐག་རང་གཅོད་ཀྱི་ཐོབ་ཐང་གཙོ་གྱུར་འགྲོ་བ་མིའི་གཞི་རྩའི་ཐོབ་ཐང་ཁག་སྲུང་སྐྱོབ། དེ་བཞིན་བཞུགས་སྒར་དུ་རྟེན་གཞི་བྱས་པའི་བོད་མིའི་སྒྲིག་འཛུགས་འདི་བཞིན་བོད་མི་ཡོངས་ཀྱི་མངོན་འདོད་མཚོན་པའི་སྒྲིག་འཛུགས་ཤིག་ལ་ངོས་འཛིན་གནང་དགོས་པ་སོགས་གསུངས་འདུག  དེ་བཞིན་གྲོས་ཚོགས་འཐུས་མི་ལྕམ་ Nancy Pelosi མཆོག་གིས་བོད་དོན་ཁྲིམས་འཆར་དེ་ཆེད་འདོན་གནང་མཁན་དང་རྒྱབ་སྐྱོར་བ་ཡོངས་ལ་ཐུགས་རྗེ་ཆེ་ཞུས་པ་དང་སྦྲགས། བོད་དོན་ཁྲིམས་འཆར་གསར་པ་བརྒྱུད་དེ་རྒྱ་ནག་གཞུང་གིས་བོད་མིའི་ཐོག་ལག་བསྟར་བྱེད་བཞིན་པའི་སྲིད་བྱུས་དང་གཞི་རྩའི་འགྲོ་བ་མིའི་ཐོང་རྡོག་རོལ་གཏོང་བཞིན་ཁག་འགན་ཁུར་དགོས་པའི་བརྡ་ལན་གསལ་པོ་ཞིག་སྤྲད་ཐུབ་ངེས་ཡིན་པ་སོགས་གསུངས་འདུག སྐབས་དེར་གྲོས་ཚོགས་འཐུས་མི་སྐུ་ཞབས་ Dean Phillips ལགས་དང་སྐུ་ཞབས་ Ted Yoho ལགས་དང་སྐུ་ཞབས་ Michael McCaul ལགས། ལྕམ་ Eleanor Holmes Norton ལགས། སྐུ་ཞབས་ Tom Souzzi ལགས་བཅས་ཀྱིས་ཀྱང་རྒྱ་གཞུང་གི་སྲིད་བྱུས་འོག་བོད་ནང་གི་གནས་སྟངས་དེ་ནི་བྱང་ཀོ་རི་ཡ་ལས་ཞན་པ་གྱུར་ཡོད་པ་སོགས་རྒྱ་ནག་གཞུང་སྐྱོན་བརྗོད་དང་འབྲེལ། ཨ་རིའི་ཆབ་སྲིད་ཚོགས་པ་དང་གཞུང་འཛིན་པ་ཨ་རིའི་གཞི་རྩའི་རིང་ཐང་ཁག་སྲུང་སྐྱོབ་ཐོག་བོད་དོན་ཐོག་མུ་མཐུད་རྒྱབ་སྐྱོར་གནང་དགོས་གལ་ཡིན་པ་སོགས་གསུངས་ཏེ་བོད་དོན་རྒྱབ་སྐྱོར་གྱི་ཁྲིམས་འཆར་གསར་པ་དེར་རྒྱབ་སྐྱོར་ཤུགས་ཆེ་གནང་འདུག ད་རེས་ཨ་རིའི་གྲོས་ཚོགས་འོག་མས་བོད་དོན་རྒྱབ་སྐྱོར་གྱི་ཁྲིམས་འཆར་གསར་པ་དེ་ཚད་མཐོའི་མང་མོས་ཀྱིས་གཏན་འབེབས་གནང་བ་འབྲེལ། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བཞུགས་གངས་སྐྱིད་ལྷག་པ་ཚེ་རིང་ཚོགས་ཁང་དུ་གསར་འགོད་ལྷན་ཚོགས་ཤིག་གནང་སྟེ་བོད་མི་ཡོངས་ཀྱི་ཚབ་ཞུས་ཏེ་ཨ་རིའི་གྲོས་ཚོགས་འཐུས་མི་ཡོངས་ལ་ཐུགས་རྗེ་ཆེ་ཞུས་པ་དང་སྦྲགས། བོད་དོན་རྒྱབ་སྐྱོར་གྱི་ཁྲིམས་འཆར་དེས་རྒྱ་ནག་གཞུང་ལ་བོད་དོན་ཐོག་ཨ་རིའི་རྒྱབ་སྐྱོར་ཉམས་གུད་ཕྱིན་མེད་པའི་བརྡ་ལན་གསལ་པོ་ཞིག་མཚོན་པར་མ་ཟད་རིམ་པས་འདི་ལོའི་ཕྱི་ཟླ་དྲུག་པའི་སྔོན་ལ་ཁྲིམས་འཆར་འདི་ཨ་རིའི་གྲོས་ཚོགས་གོང་མར་གཏན་འབེབས་ཐུབ་པའི་རེ་བ་ཡོད་ཅེས་གསུངས་སོང་། གཞི་རྩའི་ཨ་རིའི་བོད་དོན་ཁྲིམས་འཆར་གསར་པའི་ནང་དེ་སྔ་ ༢༠༠༢ ལོར་གཏན་འབེབས་གནང་བའི་ Tibet Policy Act 2002 ཞེས་ཨ་རིའི་བོད་ཐོག་འཛིན་པའི་སྲིད་བྱུས་ནང་གསལ་བའི་དོན་ཚན་ཁག་ལ་རྒྱས་བཤད་དང་༸གོང་ས་མཆོག་གིས་དབུས་པའི་བོད་ཀྱི་བླ་སྤྲུལ་ཡང་སྲིད་ཀྱི་གནད་དོན་ཐོག་རྒྱ་ནག་གཞུང་ལ་ཐེ་བྱུས་བྱེད་དབང་མེད་པ་དང་། བོད་ཀྱི་རང་བྱུང་ཁོར་ཡུག་སྲུང་སྐྱོབ་དགོས་པ། བོད་མིའི་སྒྲིག་འཛུགས་འདི་བོད་མི་ཡོངས་ཀྱི་མངོན་འདོད་མཚོན་པའི་སྒྲིག་འཛུགས་ཤིག་ཏུ་ངོས་འཛིན་ཞུ་རྒྱུ་སོགས་འཁོད་ཡོད་པ་རེད།

ཏོག་དབྱིབས་ནད་དུག་ཞི་བར་སྒྲོལ་མའི་མཚན་སྔགས་གསུང་འདོན་གནང་དགོས་པར་ལམ་སྟོན་བསྩལ་བ།

རྒྱ་ནག་ཝུ་ཧན་གྲོང་ཁྱེར་ནས་ཁྱབ་གདལ་བྱུང་བའི་ཏོག་དབྱིབས་ནད་དུག་འམ་ Corona virus ཞེས་པ་དེ་ད་ཆ་འཛམ་གླིང་གི་རྒྱལ་ཁབ་གཞན་ཁག་ཏུ་ཁྱབ་གདལ་དུ་བྱུང་བའི་གནས་ཚུལ་རིམ་པ་འཐོན་བཞིན་པའི་ཁྲོད་འདིར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནད་ཡམས་དེ་ཞི་བར་༸རྗེ་བཙུན་སྒྲོལ་མའི་མཚན་སྔགས་གསུང་འདོན་གནང་དགོས་པར་ལམ་སྟོན་བསྩལ་འདུག ཁ་སང་༸གོང་ས་མཆོག་གི་རྒྱ་ཡིག་ངོ་དེབ་ཐོག་གནས་ཚུལ་སྤེལ་བར་གཞིགས་ན་རྒྱ་ནག་སྐམ་ས་ཆེན་པོའི་དད་ལྡན་མང་པོ་ཞིག་གིས་དྲྭ་ལམ་བརྒྱུད་༸གང་ཉིད་མཆོག་ལ་ནད་གཞི་དེ་རྒྱ་ནག་གྲོང་ཁྱེར་ཝུ་ཧན་གྱིས་གཙོས་པའི་འཛམ་གླིང་ཡུལ་གྲུ་གཞན་ཁག་ཏུའང་ཁྱབ་གདལ་འགྲོ་བཞིན་ཡོད་པར་བརྟེན་ཏོག་དབྱིབས་ཅན་ནད་དུག་གློ་ཚད་རིམས་ནད་དེ་ཞི་བའི་ཕྱིར་ལམ་སྟོན་བསྩལ་གནང་ཡོང་བ་ཞེས་གསོལ་འདེབས་ཞུས་འདུག་པ་ལྟར་༸གོང་ས་མཆོག་གིས་རྒྱ་ནག་ནང་ཡོད་པའི་དགོན་པ་ཁག་དང་། དད་ལྡན་མང་ཚོགས་ཀྱི་ངོས་ནས་༸རྗེ་བཙུན་སྒྲོལ་མའི་མཚན་སྔགས་གང་མང་གསུང་འདོན་གནང་ཚེ་ནད་ཡམས་དེ་ཞི་བར་ཕན་ཐོགས་ཡོད་ཅེས་ལམ་སྟོན་བཀྲིན་ཆེ་བ་བསྩལ་འདུག་པར་མ་ཟད། དེ་དང་ལྷན་དུ་མགོན་པོ་༸གང་ཉིད་མཆོག་གིས་ཞལ་སྔ་ནས་སྒྲོལ་མའི་མཚན་སྔགས་ལྗགས་ལུང་མཛད་པའི་གསུང་སྒྲ་ཞིག་ཀྱང་མཉམ་སྦྱར་གནང་འདུག སྤྱིར་ནད་གཞི་དེ་ད་ཆ་ཨ་རི་དང་ཉི་ཧོང་།  ཐེ་ལན་ཌི། ཨོ་སི་ཊོ་ལི་ཡ། ཧོང་ཀོང་སོགས་སུ་ཁྱབ་གདལ་འགྲོ་བཞིན་པ་དང་ལྷག་པར་དུ་རྒྱ་གར་ནང་མི་རེ་ཟུང་ལ་ནད་གཞི་དེ་ཕོག་པར་དོགས་གཞི་ཡོད་པའི་གནས་ཚུལ་སོགས་ཐོན་ཡོད་པ་ལྟར། བོད་མི་ཁག་གཅིག་གིས་ངོ་དེབ་གཙོས་སྤྱི་ཚོགས་ཀྱི་བརྒྱུད་ལམ་ཐོག་ནས་རྫ་དྲག་གི་དུས་ཚིགས་འདིའི་རིང་དགའ་ལྡན་ཕོ་བྲང་ཡིག་ཚང་ནས་༸གོང་ས་མཆོག་ལ་མཇལ་ཁ་ཞུ་མཁན་རིགས་ངེས་པར་དུ་མཚམས་འཇོག་གནང་དགོས་པའི་འབོད་སྐུལ་གནང་མཁན་ཡང་འདུག རྩ་བའི་བརྒྱུད་ལམ་ཁག་ནས་ཐོན་པའི་གནས་ཚུལ་ལ་བལྟས་ན། ནད་གཞི་དེ་ད་ཆ་མི་གྲངས་ ༤༥༠༠ ལྷག་ལ་ཕོག་ཡོད་པ་དང་དེའི་ཁྲོད་ཝུ་ཧན་གྱི་གྲོང་ཁྱེར་ནང་ནད་གཞི་དེའི་རྐྱེན་པས་ད་བར་མི་གྲངས་ ༡༠༦ ཙམ་འདས་གྲོངས་སུ་ཕྱིན་ཡོད་པ་འཁོད་པ་དང་། ད་ལྟའི་ཆར་རྒྱ་གཞུང་གིས་ནད་ཡམས་དེ་འབྲེལ་ཞིབ་དཔྱད་བྱེད་པར་དམ་དྲག་ཤུགས་ཆེ་བྱས་དང་བྱེད་བཞིན་པར་བརྟེན་བརྒྱུད་ལམ་ཁག་ཏུ་སྤེལ་བའི་ནད་གཞི་དེ་ཕོག་ནས་འདས་གྲོངས་སུ་གྱུར་བ་དང་ནད་ཕོག་གི་གྲངས་འབོར་ལས་མང་བ་ཡོད་པར་ཚོད་དཔག་གནང་གི་འདུག

སེམས་ཀྱི་ཞི་བདེ་བསྐྲུན་པར་ནང་ཆོས་ལས་ལྷག་པ་མེད་པར་བཀའ་བསྩལ་བ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སེམས་ཀྱི་ཞི་བདེ་བསྐྲུན་རྒྱུར་ནང་ཆོས་ལས་ལྷག་པ་མེད་པར་བཀའ་བསྩལ་འདུག དེ་རིང་སྔ་དྲོ་མགོན་པོ་༸གང་ཉིད་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་བལ་ཡུལ་ནས་ཆེད་བཅར་ཞུས་པའི་བལ་ཡུལ་རྣམ་རྒྱལ་སློབ་གྲྭའི་དགེ་ལས་སློབ་མ་ཁག་གཅིག་ལ་དམིགས་བསལ་མཇལ་ཁ་བསྩལ་བ་དང་སྦྲགས། དེང་གི་འཛམ་གླིང་ཐོག་ཡོད་པའི་ཤེས་ཡོན་དེ་དག་ནུབ་ཕྱོགས་ནས་དར་བ་ཞིག་ཡིན་པ་དང་། ང་ཚོས་ནུབ་ཕྱོགས་ཀྱི་ཤེས་ཡོན་དེ་དག་ཁོ་ནའི་ཐོག་མི་ཚེ་བསྐྱལ་ཚེ་ང་རྒྱལ་དང་ཕྲག་དོག འགྲན་སེམས། རང་གཅེས་འཛིན་སོགས་ཀྱི་བསམ་བློ་ཤུགས་ཆེ་རུ་ཕྱིན་ཏེ་མི་ཚེ་སྐྱིད་པ་ཞིག་ཡོང་རྒྱུ་ཁག་པོ་ཡིན་པར་བཀའ་བསྩལ་བ་དང་ཆབས་ཅིག དཀའ་ངལ་དེ་དག་སེལ་ཐབས་སུ་ནང་པའི་གཞུང་ནས་གསུང་པའི་ལྟ་གྲུབ་དང་ཚན་རིག་གི་རྣམ་གཞག་ཐོག་སློབ་གཉེར་གནང་དགོས་པའི་ལམ་སྟོན་བསྩལ་འདུག མགོན་པོ་༸གང་ཉིད་མཆོག་གིས་འདས་པའི་ལོ་མང་རིང་སྐུ་ལས་བསྐྱོན་ཏེ་ཕྱོགས་བསྒྲིགས་ཞུས་པའི་ནང་པའི་ཚན་རིག་དང་ལྟ་གྲུབ་ཀུན་བཏུས་ཀྱི་ཕྱག་དཔེ་ཞིག་དགེ་སློབ་ཚོར་གསོལ་བསྩལ་དང་སྦྲགས། ནང་པ་སངས་རྒྱས་པའི་གཞུང་འདི་ཆོས་ཕྱོགས་དང་ཚན་རིག དེ་བཞིན་ལྟ་གྲུབ་བཅས་སྡེ་ཚན་གསུམ་རུ་དབྱེ་ཡོད་པ་ལྟར་ཕྱག་དཔེ་ནང་གཙོ་བོ་བོད་ཀྱི་ནང་པའི་ཚན་རིག་དང་ལྟ་གྲུབ་སྐོར་ཡོད་པ་དེ་ནི་ཆོས་དད་ཡོད་མེད་ཚང་མར་འབྲེལ་བ་ཡོད་པ་ཞིག་ཡིན་སྟབས། དུས་ཚོད་སྟོང་པ་ནམ་ཡིན་ལ་སློབ་མ་ཚོར་སློབ་ཁྲིད་གནང་ཐུབ་ན་དགེ་མཚན་ཆེན་པོ་ཡོད་པ་བཀའ་བསྩལ་ཡོད་པ་རེད། དེ་བཞིན་༸གོང་ས་མཆོག་གིས་དེང་གི་འཛམ་གླིང་ཐོག་ནང་པའི་ལུང་པ་མང་པོ་ཡོད་ཀྱང་ཚན་རིག་དང་མཐུན་པའི་ཐོག་གཞུང་ཆེན་ཁག་འགྲེལ་བརྗོད་གནང་ཐུབ་མཁན་བོད་པ་ཁོ་ན་ཡིན་པ་འདི་ནི་བོད་མི་རིགས་ཀྱི་སྤོབས་པ་དང་སེམས་ཤུགས་འཕར་གཞི་ཞིག་ཀྱང་ཡིན་པས་ངེས་དུ་རིག་གནས་དེ་དག་ཐོག་དོ་སྣང་བྱེད་དགོས་ཞེས་ལམ་སྟོན་བཀྲིན་ཆེ་བ་བསྩལ་ཡོད། གཞི་རྩའི་༸གོང་ས་མཆོག་ཉེ་ཆར་ཕྱི་ཚེས་ ༢༠ ཉིན་རྒྱ་གར་གྱི་མངའ་སྡེ་ཆེ་ཁག་གསུམ་ནང་གི་མཛད་འཕྲིན་ཁག་ལེགས་གྲུབ་ཀྱིས་བཞུགས་སྒར་དུ་༸ཞབས་སོར་བདེ་བར་འཁོད་ཡོད།

གཞོན་སྐྱེས་ཚོས་གོ་ལ་འདིའི་མི་སེར་གཅིག་གྱུར་གྱི་བསམ་བློ་ཡོད་ཐོག་མཉམ་ལས་གནང་གལ་ཡིན་པ་བཀའ་བསྩལ་བ།

རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ Empowering the Vision Project འམ་ན་གཞོན་ནུས་སྤེལ་ལས་གཞི་ཚོགས་པའི་གོ་སྒྲིག་འོག་ཁ་སང་ཕྱི་ཚེས་ ༢༡ ནས་ཚེས་ ༢༥ བར་རྒྱ་གར་བྱང་ཤར་སྒང་ཏོག་གྱི་ཁུལ་དུ་ Global vision for  young Tibetans Conference འམ་བོད་ཀྱི་གཞོན་སྐྱེས་ནུས་སྤེལ་ལྷན་ཚོགས་ཐེངས་ལྔ་པ་དེ་འཚོགས་འདུག་པ་དང་། ལྷན་ཚོགས་དེའི་ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་གསུང་འཕྲིན་ཞིག་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་བསྩལ་བའི་གསུང་འཕྲིན་ནང་དུ་ན་གཞོན་ནུས་སྤེལ་ལས་གཞིའི་ངོས་ནས་བོད་ཀྱི་གཞོན་སྐྱེས་ནུས་སྤེལ་ལྷན་ཚོགས་ཞེས་པའི་བརྗོད་གཞིའི་འོག་རྒྱ་གར་དང་བལ་ཡུལ་ནས་བོད་རིགས་གཞོན་སྐྱེས་དྲུག་ཅུ་ལྷན་འཛོམས་བྱུང་བར་འཚམས་འདྲི་མཛད་པ་དང་སྦྲགས། འཛམ་གླིང་འདིའི་ནང་དུ་དུས་རབས་ ༢༠ པའི་ནང་འཚེ་བའི་ལས་ཁོ་ན་བྱུང་ཡོད་སྟབས་དུས་རབས་ཉེར་གཅིག་པ་འདི་མི་གསོད་ཁྲག་སྦྱོར་དང་སྡུག་བསྔལ་ཅན་གྱི་དུས་རབས་ཤིག་མི་ཡོང་བར་བོད་རིགས་གཞོན་སྐྱེས་གཙོ་གྱུར་དེང་རབས་ཀྱི་གཞོན་སྐྱེས་རྣམས་འགན་འཁྲི་ཡོད་པ་བཀའ་གནང་བ་དང་འབྲེལ། གཞོན་སྐྱེས་རྣམས་ནས་གོ་ལ་འདིའི་མི་སེར་གཅིག་གྱུར་གྱི་བསམ་བློ་ཡོད་ཐོག་མཉམ་རུབ་ཀྱིས་འགན་བླངས་དགོས་པ་མ་ཟད། འདི་ལྟ་བུའི་བློ་རྒྱ་ཡངས་པའི་བསམ་བློ་དེ་བོད་ཀྱི་བདེ་དོན་དང་འབྲེལ་ནས་རེ་བ་བཟང་ཕྱོགས་ཀྱི་ཐོག་ནས་བོད་ཀྱི་བདེ་དོན་སེལ་རྒྱུར་ཧ་ཅང་གནད་འགག་ཆགས་ཀྱི་ཡོད་པ་བཀའ་བསྩལ་འདུག ད་དུང་མགོན་པོ་༸གང་ཉིད་མཆོག་གིས་རྒྱལ་སྤྱིའི་ཁྲོད་གཞི་རྩའི་འགྲོ་བ་མིའི་ཐོབ་ཐང་གཙོ་གྱུར་རང་དབང་དང་དྲང་བདེན། དེ་བཞིན་ཞི་བདེར་ངོས་བཞེས། ཕོ་མོ་དབྱེར་མེད་ཐོག་ནས་བེུད་རྣམས་ལ་གུས་བརྩི་དགོས་པའི་བསམ་ཚུལ་གཅིག་མཚུངས་འབྱུང་བཞིན་པའི་ཁྲོད་ང་ཚོར་རེ་བ་ཡོད་པ་ཞིག་ཡིན་ཀྱང་གདོང་ལེན་གནང་དགོས་པ་མང་དག་ཅིག་ཡོད་པ་བཀའ་བསྩལ་བ་དང་སྦྲགས། དེང་གི་འཛམ་བུ་གླིང་འདིའི་ནང་གི་དཀའ་ངལ་མང་དག་ཅིག་ང་ཚོ་མིས་བཟོས་པ་ཆགས་ཀྱི་ཡོད་པ་མ་ཟད། དཀའ་ངལ་དེ་དག་ནི་ཕུགས་རྒྱང་རིང་པོར་བསམ་བློ་འཁོར་མ་ཐུབ་པ་དང་། གཞན་གྱི་བསམ་ཚུལ་ལ་མི་ཉན་པའི་དབང་གིས་བྱུང་བ་ཞིག་ཡིན་སྟབས་རྒྱ་གར་གྱི་གནའ་བོའི་རིག་གནས་ལས་ཆས་པའི་བྱམས་པ་དང་། འཚེ་བ་མེད་པ། དེ་བཞིན་སྙིང་རྗེ་སོགས་ནི་ད་ལྟའི་དུས་འདི་ཉེ་བར་མཁོ་བ་ཅིག་ཡིན་པ་བཀའ་བསྩལ་འདུག ༸གོང་ས་༸སྐྱབས་མགོན་ཆེན་པོ་མཆོག་གིས་སྤྱི་ཚོགས་བདེ་སྐྱིད་དང་ལྡན་པ་ཞིག་གི་ནང་དུ་མི་ཚེ་བདེ་སྐྱིད་དང་ལྡན་པ་ཞིག་ཡོང་བར སེམས་བཟང་པོ་དང་སྙིང་རྗེ་ནི་ལྡེ་མིག་ལྟ་བུ་ཡིན་པར་བཀའ་བསྩལ་བ་དང་སྦྲགས། རང་ཉིད་དཀའ་ངལ་ནང་ལྷུང་ཚེ་ཕྱོགས་གང་ས་ནས་རྒྱུ་རྐྱེན་ལ་དཔྱད་ཞིབ་བྱས་ནས་སྐྱོབ་ཐབས་ལ་འབད་དགོས་པ་དང་། ཅི་སྟེ་དེ་ལྟར་བྱེད་ཐུབ་ཚེ་སྤྱིར་གོ་ལ་ཁྱོན་ཡོངས་ཀྱི་བདེ་སྡུག་དང་བྱེ་བྲག་ཏུ་བོད་མི་རིགས་ཀྱི་བདེ་དོན་སླད་དུ་ཞབས་འདེབས་ཞུ་ཐུབ་ངེས་ཡིན་པའི་ལམ་སྟོན་བཀྲིན་ཆེ་བ་བསྩལ་འདུག རྩ་བའི་ Empowering the Vision Project འམ་ན་གཞོན་ནུས་སྤེལ་ལས་གཞི་ཚོགས་པ་དེ་ནི་བོད་མི་གཞོན་སྐྱེས་རྣམས་ཀྱི་ནུས་པ་གོང་སྤེལ་གནང་རྒྱུར་དམིགས་ནས་ཕྱི་ལོ་ ༢༠༠༧ ལོར་གསར་འཛུགས་གནང་བ་ཞིག་དང་། བོད་ཀྱི་གཞོན་སྐྱེས་ནུས་སྤེལ་ལྷན་ཚོགས་ཐེངས་དང་པོ་དེ་ཕྱི་ལོ་ ༢༠༡༠ ལོར་བཞུགས་སྒར་དུ་ཚོགས་ཡོད་པ་མ་ཟད། ༸གོང་ས་༸སྐྱབས་མགོན་ཆེན་པོ་མཆོག་གིས་མཇལ་ཁ་དང་ལམ་སྟོན་བཀའ་སློབ་བཀའ་དྲིན་བསྩལ་ཡོད་རེད། སྐབས་དེར་༸གོང་ས་མཆོག་གིས་བོད་པ་ཞིག་ཡིན་པའི་ཆ་ནས་བློ་སྤོབས་མི་ཞུམ་ བྱེད་དགོས་པ་དང་། རང་ཉིད་བཙན་བྱོལ་བ་ཅིག་དང་ལྷག་པར་དུ་རང་དབང་གི་ལུང་པར་ཡོད་སྟབས། རང་མགོ་གང་ཐོན་མི་བྱེད་པར་མི་རིགས་གྱི་འགན་དེ་མ་བརྗེད་པ་བྱེད་དགོས་པ་མ་ཟད་གོ་ལ་ཁྱོན་ཡོངས་ལ་ཕན་ཐོགས་སྒྲུབ་དགོས་གལ་ཡིན་པ་བཀའ་བསྩལ་ཡོད་པ་རེད།  

༸གོང་ས་མཆོག་རྒྱ་གར་གྱི་མངའ་སྡེ་ཆེ་ཁག་གསུམ་ནང་གི་མཛད་འཕྲིན་ཁག་ལེགས་གྲུབ་ཀྱིས་བཞུགས་སྒར་དུ་༸ཞབས་སོར་བདེ་བར་འཁོད་སོང་།

དེ་རིང་སྔ་དྲོ་ཆུ་ཚོད་བཅུ་གཅིག་ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་རྒྱ་གར་གྱི་གྲོང་ཁྱེར་གྷོ་བ་དང་། ལྷོ་ཕྱོགས་མོན་གྷོ་འདོད་རྒྱུ་གླིང་བོད་མིའི་གཞིས་སྒར་དུ་རྟེན་རྟེན་གཞི་བྱས་པའི་གནད་ས་ཁག དེ་བཞིན་གནས་མཆོག་རྡོ་རྗེ་གདན་བཅས་ནང་གི་ཟླ་བ་གཅིག་ལྷག་གི་མཛད་འཕྲིན་ཁག་ལེགས་གྲུབ་ཀྱིས་བཞུགས་སྒར་དུ་༸ཞབས་སོར་བདེ་བར་འཁོད་སོང་། དེ་ཡང་མགོན་པོ་གང་ཉིད་མཆོག་མངའ་སྡེ་ཆེ་ཁག་གསུམ་ནང་གི་མཛད་འཕྲིགས་ཁག་ཡོངས་སུ་གྲུབ་སྟེ་དེ་རིང་སྔ་ཐོག་བཞུགས་སྒར་ཉེ་འདབས་སུ་རྟེན་གཞི་བྱས་པའི་གྷ་གྷལ་གནམ་ཐང་དུ་ཞབས་སོར་འཁོད་སྐབས་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་དང་སྲིད་ཚབ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་སོགས་ནས་ཕེབས་བསུ་དང་སྦྲགས། ཆིབས་འགྲོ་བརྒྱུད་བཞུགས་སྒར་རྒྱལ་བའི་ཕོ་བྲང་དུ་ཆིབས་བསྒྱུར་བསྐྱངས་སྐབས་ཕེབས་ལམ་གྱི་གཡས་གཡོན་དུ་ས་གནས་དད་ལྡན་མང་ཚོགས་ཡོངས་ནས་ལག་ཏུ་དཀར་གཙང་གི་མཇལ་དར་དང་དྲི་བཟང་བདུག་སྤོས་སོགས་བསྣམས་ཏེ་དགའ་བསུའི་ཕེབས་སུ་གཟབ་རྒྱས་ཞུས་ཡོད། གཞི་རྩའི་༸གོང་ས་སྐྱབས་མགོན་ཆེན་པོ་མཆོག་ཟླ་བ་སྔོན་མ་སྟེ། ཕྱི་ཟླ་ ༡༢ ཀྱི་ཕྱི་ཚེས་ ༩ ཉིན་རྒྱ་ག ར་གྱི་མངའ་སྡེ་གྷོ་བ་དང་ཀར་ན་ཊ་ཀ། དེ་བཞིན་བྷི་ཧར་གསུམ་ནང་གི་བཀའ་སློབ་ལམ་སྟོན་དང་ཆོས་འབྲེལ་སོགས་ཀྱི་མཛད་འཆར་སླད་བཞུགས་སྒར་ནས་ཆིབས་ཐོན་མཛད་ཡོད་པ་དང་། འདས་པའི་ཟླ་བ་གཅིག་དང་བདུན་ཕྲག་གཅིག་ལྷག་གི་མཛད་འཕྲིན་ཁྲོད་ཕྱི་ཟླ་༡༢ ཕྱི་ཚེས་ ༡༡ ཉིན་༸གོང་ས་སྐྱབས་མགོན་ཆེན་པོ་མཆོག་གིས་གྷོ་བ་མངའ་སྡེའི་ནང་རྟེན་གཞི་བྱས་པའི་གྷོ་བ་གཙུག་ལག་སློབ་གྲྭ་ཆེན་མོའི་དགེ་ལས་སློབ་མ་རྣམས་ལ་དེང་རབས་ཀྱི་དུས་ཚོད་འདིར་དཔལ་ནཱ་ལེནྡཱའི་རིག་གནས་ཀྱི་འབྲེལ་བ་ཞེས་པའི་བརྗོད་གཞིའི་ཐོག་བཀའ་སློབ་དང་དྲི་བ་དྲིས་ལན་སོགས་ཀྱི་མཛད་འཕྲིན་བསྐྱངས་ཡོད། གྷོ་བ་ནང་གི་མཛད་འཕྲིན་ཁག་གྲུབ་མཚམས་ཏེ་ཕྱི་ཚེས་ ༡༢ ཉིན་མགོན་པོ་གང་ཉིད་མཆོག་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་སྒར་དུ་ཞབས་སོར་བདེ་བར་འཁོད་མཚམས་འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་མཆོག་གིས་དབུས་པའི་ཁྲི་ཟུར་རིན་པོ་ཆེ་མཆོག ཤར་བྱང་ཆོས་རྗེ་རྣམ་གཉིས། དཔལ་ལྡན་འབྲས་དཀར་སྤུངས་པའི་མཁན་བླ་འདུས་མང་དང་སེར་སྐྱ་མང་ཚོགས་སྟོང་ཕྲག་ལྷག་གིས་དཔལ་ལྡན་འབྲས་སྤུངས་བླ་སྤྱིའི་ཚོགས་ཁང་ཆེན་མོར་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་དང་། སྐབས་དེའི་ཕེབས་སྟོན་མཛད་སྒོའི་ཐོག་༸གོང་ས་མཆོག་ནས་མང་ཚོགས་ཡོངས་ལ་འཚམས་འདྲི་དང་སྦྲགས། དེ་སྔ་བོད་ནང་ལ་དཔལ་ལྡན་འབྲས་དཀར་སྤུངས་པ་ཞེས་པ་དེ་བོད་གངས་ཅན་ལྗོངས་སུ་དཔལ་ནཱ་ལེནྡཱ་ཞེས་གསུང་སྲོལ་ཡོད་པ་ལྟར་དོན་ལ་གནས་པའི་སློབ་གཉེར་ཁང་ཞིག་ཡིན་པ་སོགས་བཀའ་བསྩལ་ཡོད།༸གོང་ས་༸སྐྱབས་མགོན་ཆེན་པོ་མཆོག་གིས་ཁུལ་དེར་རྟེན་གཞི་བྱས་པའི་གདན་ས་འབྲས་སྤུངས་དང་གདའ་ལྡན་སོ་སོའི་དགོན་ཁག་ཏུ་དད་ལྡན་ཆིག་ཁྲི་བརྒལ་བར་ནང་ཆོས་ངོ་སྤྲོད་དང་ཚེ་དབང་བཅས་བཀའ་དྲིན་བསྩལ་བ་མ་ཟད། དགོན་སྡེ་ཁག་གི་རྟགས་གསལ་ལ་གཟིགས་ཞིབ་སོགས་མཛད་ཡོད་པ་དང་། ཕྱི་ཚེས་ ༢༠ ཉིན་གདན་ས་དགའ་ལྡན་རྣམ་པར་རྒྱལ་བའི་གླིང་དུ་རི་བོ་དགེ་ལྡན་པའི་སྲོལ་འབྱེད་རྗེ་ཙོང་ཁ་པ་ཆེན་པོ་༸སྐུ་མྱ་ངན་ལས་འདས་ནས་ལོ་དྲུག་བརྒྱ་འཁོར་བ་དང་བསྟུན་གོ་སྒྲིག་ཞུས་པའི་རྒྱལ་སྤྱིའི་མཁས་པའི་བགྲོ་གླེང་ཐོག་དབུ་བཞུགས་མཛད་དེ་༸རྗེ་རིན་པོ་ཆེ་མཆོག་ནི་སྔོན་གྱི་མཁས་པ་ཚོའི་ཡིད་འཕྲོག་ཐུབ་མཁན་གྱི་མཁས་པ་བསམ་གྱིས་མི་ཁྱབ་པ་ཞིག་ཡིན་པ་སོགས་བཀའ་བསྩལ་ཡོད། ལྷག་པར་དུ་ཕྱི་ཚེས་ ༢༡ ཉིན་༸གོང་ས་མཆོག་རྗེ་ཙོང་ཁ་པ་ཆེན་པོ་སྐུ་མྱ་ངན་ལས་འདས་པའི་དགོངས་རྫོགས་མཆོད་འབུལ་ཐོག་དབུ་བཞུགས་མཛད་དེ་རྗེ་དགེ་འདུན་གྲུབ་ཀྱི་མཛད་པའི་ཤར་གངས་རི་མའི་བཀའ་ཆོས་བཀའ་དྲིན་བསྩལ་ཡོད་པ་དང་། སྐབས་དེའི་མཆོད་འབུལ་མཛད་སྒོའི་ཐོག་འཇམ་མགོན་རྒྱལ་བའི་གདུང་ཚབ་དགའ་ལྡན་ཁྲི་རིན་པོ་ཆེ་མཆོག་གིས་དགེ་ལྡན་པ་ཡོངས་ཀྱི་ཚབ་མཛད་དེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་རྒྱལ་བའི་བསྟན་པ་སྤྱི་དང་། ཁྱད་པར་དུ་འཇམ་མགོན་བླ་མའི་བསྟན་པར་མཛད་རྗེས་དང་བཀའ་དྲིན་འགྲན་ཟླ་མེད་པར་བསྐྱངས་པར་ཆེ་བསྟོད་དང་སྦྲགས། རྗེ་ཙོང་ཁ་པ་ཆེན་པོའི་གཟེངས་རྟགས་ཞེས་པ་ཞིག་འབུལ་ལམ་ཞུས་ཡོད། ༸གོང་ས་མཆོག་མོན་གྷོ་འདོད་རྒྱུ་གླིང་ཁུལ་གྱི་ཉིན་གྲངས་ ༡༤ ལྷག་གི་མཛད་འཕྲིན་ཁག་ལེགས་པར་གྲུབ་རྗེས་གནས་མཆོག་རྡོ་རྗེ་གདན་ཕྱོགས་སུ་ཆིབས་བསྒྱུར་མཛད་དེ་ཁུལ་དེར་རྟེན་གཞི་བྱས་པའི་དུས་འཁོར་ཐང་ཆེན་དུ་དད་ལྡན་སྟོང་ཚོ་བརྒལ་བར་ལག་ལེན་སོ་བདུན་མ་དང་། ཉེ་བརྒྱུད་འཇམ་དབྱངས་ཆོས་འཁོར་གྱི་བཀའ་ཆོས་དང་། སྤྱན་རས་གཟིགས་དང་སྒྲོལ་དཀར་། དེ་བཞིན་༸རྗེ་བཙུན་མ་ནག་མའི་བཀའ་དབང་བཅས་བསྩལ་ཡོད་པ་མ་ཟད། ཁུལ་དེར་སྐུ་ལྷོད་བཞུགས་མཛད་པའི་རིང་ལ་ཕྱི་ནང་གི་དད་ལྡན་མང་ཚོགས་ལ་མཇལ་ཁ་དང་བཀའ་སློབ། ལྷག་པར་དུ་དྲ་ཐོག་བརྒྱུད་ཨ་མི་རི་ཀའི་གྲོང་ཁྱེར་ New York ནང་འདུ་འཛོམས་བྱུང་བའི་རྒྱ་རིགས་དང་བོད་པའི་མཐོ་རིམ་སློབ་གྲའི་སློབ་ཕྲུག་སུམ་བརྒྱ་ཙམ་ལ་ཆོས་ལུགས་དང་མ་འབྲེལ་བའི་སྤྱོད་བཟང་དང་འཇིག་རྟེན་སྤྱི་སྨན་གྱི་འགན་ཁུར་ཞེས་པའི་བརྗོད་གཞིའི་ཐོག་བཀའ་སློབ་ལམ་སྟོན་དང་། གྷ་ཡ་རྫོང་ཁོངས་སུ་ཆགས་པའི་ Indian Institute of Management ཞེས་རྒྱ་གར་གྱི་ཚོང་ལས་འཛིན་སྐྱོང་སློབ་གཉེར་ཁང་གི་དགེ་ལས་སློབ་ཕྲུག་རྣམས་ལ་རྒྱ་གར་གྱི་གནའ་བོའི་རིག་གནས་ཀྱི་གལ་གནད་དང་། བྷི་ཧར་གྱི་རྒྱལ་ས་པཊ་ནར་རྟེན་གཞི་བྱས་པའི་བྷི་ཧར་གྱི་ཁྲིམས་ལུགས་རིག་པའི་ལྟེ་གནས་ཁང་དུ་ཆེ་མཐོ་ཁྲིམས་ཞིབ་པ་དང་ཁྲིམས་དཔོན་སོགས་ལ་བྱམས་པ་དང་རྙིང་རྗེ་ཞེས་པའི་བརྗོད་གཞིའི་ཐོག་བཀའ་སློབ་བཀའ་དྲིན་སྩལ་ཡོད། ལྷག་པར་དུ་ཐེངས་འདིའི་མཛད་འཕྲིན་ཁྲོད། མགོན་པོ་གང་ཉིད་མཆོག་དང་བྷི་ཧར་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Nitish Kumar མཆོག་རྣམ་གཉིས་མཇལ་མོལ་ཐེངས་གཉིས་མཛད་པ་མ་ཟད། རིང་མིན་གནས་མཆོག་རྡོ་རྗེ་གདན་གྱི་ཉེ་འཁྲིས་སུ་ཏཱ་ལའི་བླ་མའི་ནཱ་ལེནྡཱའི་རིག་གནས་སློབ་གཉེར་ཁང་ཞིག་ཆེད་འཛུགས་གནང་གཏན་འཁེལ་ཡོད་པ་ཡོངས་གྲགས་མཛད་ཡོད། མངའ་སྡེ་ཆེ་ཁག་གསུམ་ནང་གི་མཛད་འཕྲིན་ཁག་ཡོངས་སུ་གྲུབ་མཚམས་མགོན་པོ་གང་ཉིད་མཆོག་ཁེ་ཉིན་ཕྱི་ཚེས་ ༡༨ ཉིན་མཁའ་ལམ་བརྒྱུད་པཊ་ན་ནས་རྒྱལ་ས་ལྡི་ལིར་ཆིབས་བསྒྱུར་མཛད་དེ་ཉིན་གྲངས་གཅིག་རིང་ཁུལ་དེར་སྐུ་བཞུགས་མཛད་པའི་རིང་སྐུའི་འཕྲོད་བཞེས་བརྟག་དཔྱད་གང་ལེགས་གནང་ཐོག་དེ་རིང་སྔ་དྲོ་རྒྱལ་ས་ལྡི་ལི་ནས་བཞུགས་སྒར་རྒྱལ་བའི་ཕོ་བྲང་དུ་ཞབས་སོར་བདེ་བར་འཁོད་ཡོད།

Latest news