༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཨ་རུ་སུའི་དད་ལྡན་པ་ཁག་ཅིག་ལ་དྲ་རྒྱའི་བརྒྱུད་ཉིན་གྲངས་གཉིས་རིང་གི་མདོ་སྡེ་རྒྱན་གྱི་བཀའ་ཆོས་དབུ་འཛུགས་བསྐྱངས་པ་དང་འབྲེལ། དེ་སྔ་ཨུ་རུ་སུ་དམར་པོའི་གཞུང་འོག་ཉམ་ཆགས་ཕྱིན་པའི་སངས་རྒྱས་ཀྱི་བསྟན་པ་དེ་ད་ཆ་སླར་གསོ་བྱེད་བཞིན་པའི་རྣམ་པ་གསལ་པོ་མངོན་རྒྱུ་ཡོད་སྟབས་མུ་མཐུད་སློབ་གཉེར་གནང་གལ་ཡིན་པའི་ལམ་སྟོན་བཀའ་སློབ་སྩལ་སོང་།ཨུ་རུ་སུ་ནང་པའི་རྗེས་འཇུག་པ་རྣམས་ནས་ཇི་ལྟར་གསོལ་འདེབས་ཞུས་པ་བཞིན་དེ་རིང་སྔ་དྲོ་ཆུ་ཚོད་ ༨།༤༥ ཙམ་ལ་མགོན་པོ་༸གང་ཉིད་མཆོག་༸རྒྱལ་བའི་གཟིམ་ཆུང་ཕོ་བྲང་ནས་བཀའ་ཆོས་གནང་ཡུལ་དུ་ཆིབས་སྒྱུར་གྱིས་ཉིན་གྲངས་གཉིས་རིང་བསྩལ་རྒྱུའི་རྗེ་བཙུན་བྱམས་པ་མགོན་པོས་མཛད་པའི་མདོ་སྡེ་རྒྱན་གྱི་བཀའ་ཆོས་དབུ་འཛུགས་བསྐྱངས་པ་དང་། སྐབས་དེར་མགོན་པོ་མཆོག་གིས་སངས་རྒྱས་བཅོམ་ལྡན་འདས་ཀྱིས་ངའི་བསྟན་པ་བྱང་ནས་བྱང་དུ་དར་ཡོང་ཞེས་གསུངས་ཡོད། གང་ལྟར་དངོས་ཡོད་གནས་ཚུལ་ལ་རྒྱ་གར་བྱང་རྒྱུད་ལ་ནཱ་ལེནྡྲ་ཤུགས་ཆེན་པོ་དར་བ་དང་། དེ་ནས་ཡར་བོད་དུ་སླེབས། བོད་ནས་ཕྱི་སོག་དང་ནང་སོག བྷུ་རི་ཡཏ་སོགས་ཡུལ་གྲུ་ཁག་མང་པོ་ཞིག་ལ་བོད་ནས་མར་སངས་རྒྱས་པའི་ཆོས་དར་རྗེས་བསྟན་པ་བྱང་ནས་བྱང་དུ་དར་ཡོང་ཞེས་གསུངས་པ་དེ་གོ་བ་ལེན་གྱི་ཡོད་སྐོར་བཀའ་སྩལ་དང་ཆབས་ཅིག མགོན་པོ་༸གང་ཉིད་མཆོག་སྐུ་ན་ཆུང་ཆུང་སྐབས་སོག་པོའི་དགེ་བཤེས་དང་མཁས་པ་མང་པོ་མཇལ་མྱོང་ཡོད་པར་མ་ཟད་མགོན་པོ་མཆོག་ལ་ཆ་མཚོན་ན་ཆུང་ཆུང་སྐབས་གཞུང་སྤྱི་དང་ལྷག་པར་རྟགས་གསལ་གཏོང་སྟངས་བསླབ་མཁན་དངོས་གྲུབ་ཚོགས་ཉིད་ཆགས་ཀྱི་ཡོད་སྐོར་བཀའ་སྩལ་ཡོད།སྔར་སངས་རྒྱས་ཀྱི་བསྟན་པ་བོད་གངས་ཅན་གྱི་ལྗོངས་ལ་ཡོད་པ་འདི་ཆེན་པོ་ཧོར་གྱི་ཡུལ་དུ་ཧ་ལས་པ་དར་ཁྱབ་ཆེན་པོ་ཆགས་ཏེ་བསྐྱར་དུ་བོད་ནང་སོག་པོའི་དཔེ་ཆ་མང་པོ་ཞིག་བོད་ཀྱི་སངས་རྒྱས་ཀྱི་བསྟན་པ་ཐོས་བསམ་སྒོམ་གསུམ་གྱི་ཐོག་ནས་བཤད་སྒྲུབ་ཟུང་སྦྲེལ་གྱིས་བསྟན་པ་འཛིན་སྐྱོང་སྤེལ་གསུམ་གནང་གི་ཡོད་པ་དང་། ཕྱིས་སུ་ང་ཚོ་བཙན་བྱོལ་དུ་འབྱོར་རྗེས་གནས་སྟངས་ཉམ་ཐག་པོ་གྱུར་ཡོད་ཀྱང་། བྱེས་ཀྱི་གནད་ས་ཁག་ཏུ་དེ་རིང་ཁ་སང་སོག་པོའི་གྲྭ་རྒྱུན་ཁ་ཤས་ཡོད་པར་མ་ཟད། བར་སྐབས་ཤིག་ནས་སོག་པོའི་གྲྭ་རྒྱུན་ནང་གང་འཚམ་ཞིག་རྒྱ་གར་དུ་འབྱོར་ཏེ་སྒོ་མང་ལ་སོག་པོའི་གྲྭ་རྒྱུན་འགའ་ཤས་ཡོད་པ་ལྟར་བསྟན་པ་འཛིན་སྐྱོང་སྤེལ་གསུམ་གནང་བཞིན་པ་བཅས། སྤྱི་ཡོངས་ནས་བཤད་ན། ནང་པ་སངས་རྒྱས་ཀྱི་ཆོས་དང་ལྷག་པར་དུ་དཔལ་ནཱ་ལེནྡྲའི་ཆོས་བརྒྱུད་པའི་ལེགས་སྦྱར་གྱི་ཆོས་བརྒྱུད་དེ་བོད་སོག་གཉིས་ཀྱིས་མི་ཉམས་རྒྱུ་འཛིན་གནང་བཞིན་ཡོད་པར་ངོས་འཛིན་གནང་ཆོག་པར་བཀའ་སྩལ་ཡོད།ད་རེས་ཨུ་རུ་སུའི་ཆོས་གྲོགས་ཚོ་དང་མཇལ་འཕྲད་ཀྱི་གོ་སྐབས་བྱུང་བར་ཐུགས་དགྱེས་ཚོར་ཆེན་པོ་བྱུང་སྐོར་དང་ལྷག་པར་བོད་མི་རྣམས་ཀྱིས་བཙན་བྱོལ་དུ་འབྱོར་བའི་རྗེས་སུ་གཞུང་ཆེན་སློབ་གཉེར་གནང་རྒྱུ་ཐོག་དམིགས་བསལ་འབད་བརྩོན་གནང་བཞིན་ཡོད་པ་དང་འབྲེལ། དེང་སྐབས་སོག་པོའི་གྲྭ་རྒྱུན་རྣམས་ནས་ཀྱང་ནང་ཆོས་ལ་བསླབ་པ་སློབ་གཉེར་འབད་བཞིན་པ་དེ་དག་ལས་དེ་སྔ་ཨུ་རུ་སུ་དམར་པོའི་གཞུང་འོག་ཉམ་ཆགས་ཕྱིན་པའི་སངས་རྒྱས་ཀྱི་བསྟན་པ་དེ་ད་ཆ་སླར་གསོ་བྱེད་བཞིན་པའི་རྣམ་པ་གསལ་པོ་མངོན་རྒྱུ་ཡོད་པར་གཟིགས་སྐབས་མགོན་པོ་མཆོག་ཐུགས་དགྱེས་ཚོར་ཆེན་པོ་བྱུང་ཞེས་བཀའ་སྩལ་འབྲེལ་ཏེ་ལྷག་པར་དུ་མུ་མཐུད་སློབ་གཉེར་གནང་གལ་ཡིན་པའི་ལམ་སྟོན་བཀའ་དྲིན་ཆེ་བ་སྩལ་ཡོད།དེ་བཞིན་༸གོང་ས་མཆོག་གིས་ང་ཚོའི་རིག་པས་དཔྱད་པ་གནང་རྒྱུ་གཙོ་བོ་འཛིན་པའི་ཐོག་ནས་དཔལ་ནཱ་ལེནྡྲའི་ཆོས་བརྒྱུད་འཛིན་བཞིན་ཡོད་པ་ལྟར། བོད་བརྒྱུད་ནང་བསྟན་ལ་བསླབ་པ་སློབ་གཉེར་གནང་བཞིན་པའི་ཨ་རུ་སུའི་ཆེན་པོ་ཧོར་གྱི་ཡུལ་གྱི་སྡེ་ཁག་རྣམས་ལ་ཚད་མ་རིག་པའི་གཞུང་ལུགས་ཀྱི་ཐོག་ནས་བཤད་རྒྱུ་ཡོད་པ་དེ་ཉམས་པ་སོར་ཆུད་དང་མི་ཉམས་རྒྱུན་འཛིན་གནང་རྒྱུའི་གོ་སྐབས་ཡོད་པ་ལྟར་འཛམ་གླིང་ཐོག་ངོམས་སུ་ཆོག་པའི་སངས་རྒྱས་ཀྱི་བསྟན་པ་དེ་མུ་མཐུད་སླར་གསོ་གནང་བར་འབད་བརྩོན་གནང་མུས་ཁྲོད་སློབ་གཉེར་ལ་ཤུགས་སྣོན་རྒྱག་དགོས་པར་ལམ་སྟོན་མཛད་ཡོད།རྩ་བའི་༸གོང་ས་༸སྐྱབས་མགོན་ཆེན་པོ་མཆོག་གིས་ཨུ་རུ་སུའི་དད་ལྡན་རྣམས་ལ་བཀའ་ཆོས་དབུ་འཛུགས་བསྐྱངས་ནས་ད་བར་ལོ་ ༡༣ ཕྱིན་ཡོད་པ་དང་། དེའི་ཁྲོད་༸གོང་ས་མཆོག་གིས་སོག་རིགས་དད་ལྡན་རྣམས་ལ་བཞུགས་སྒར་དྷརྨ་ཤ་ལ་དང་། རྒྱ་གར་གྱི་རྒྱལ་ས་ལྡི་ལི། དེ་བཞིན་ Latvia ཡི་ Riga གྲོང་ཁྱེར་བཅས་སུ་བཀའ་ཆོས་སྩལ་མྱོང་ཡོད་པ་རེད། སྔ་ལོར་འཛམ་གླིང་ཁྱོན་ཡོངས་སུ་ཏོག་དབྱིབས་གཉན་རིམས་ཀྱི་དཀའ་ངལ་འཕྲད་པ་ནས་བཟུང་ཨུ་རུ་སུའི་རྗེས་འཇུག་རྣམས་ལ་དྲ་ཐོག་བརྒྱུད་བཀའ་ཆོས་སྩལ་བ་ཐེངས་གཉིས་པ་དེ་ཆགས་ཡོད། དེ་སྔ་༸གོང་ས་མཆོག་གིས་ནང་པའི་དཔེ་ཆ་རྣམས་ཨུ་རུ་སུའི་སྐད་ཡིག་ཐོག་ཕབ་བསྒྱུར་གནང་དགོས་པའི་ལམ་སྟོན་བཀའ་སློབ་སྩལ་དོན་ལྟར་མདོ་སྡེ་རྒྱན་དང་ཆོས་དབྱིངས་རྣམ་འབྱེད། དེ་བཞིན་དབུས་མཐའ་རྣམ་འབྱེད་བཅས་ཕྱག་དཔེ་ཁག་ཅིག་ཡིག་བསྒྱུར་གནང་སྟེ་ཟླ་ཤས་སྔོན་ལ་༸གོང་ས་མཆོག་ལ་སྤྱན་འབུལ་ཞུས་ཡོད་པ་རེད།

ཨ་རིའི་ Pennsylvania མངའ་སྡེའི་ Philadelphia གྲོང་ཁྱེར་ནང་དུ་བཅའ་བཞུགས་སེམས་ཁམས་རིག་པའི་མཁས་པ་དང་།  Cognitive Behavior འམ་རྟོག་པའི་སྤྱོད་ཚུལ་གྱི་སྨན་བཅོས་མཁས་པ་སྐུ་ཞབས་ Dr Aaron Beck མཆོག་དགོངས་པ་རྫོགས་པར་བརྟེན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་གསོའི་གསུང་འཕྲིན་ཞིག་སྩལ་འདུགདེ་རིང་རྒྱལ་སྤྱིའི་བརྒྱུད་ལམ་ཁག་གིས་གནས་ཚུལ་སྤེལ་བར་འཛམ་གླིང་ནང་ Cognitive Behavior Therapy ཞེས་པའི་རྟོག་པའི་སྤྱོད་ཚུལ་གྱི་སྨན་བཅོས་གསར་གཏོད་གནང་མཁན་ལ་ངོས་འཛིན་ཡོད་པའི་སེམས་ཁམས་རིག་པའི་མཁས་པ་སྐུ་ཞབས་ Dr. Aaron Beck མཆོག་དགུང་གྲངས་ ༡༠༠ ཐམ་པའི་ཐོག་ཁ་ཉིན་རེས་གཟའ་ཟླ་བའི་ཉིན་རང་ཤག་ཏུ་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་ཡོད་པ་རེད། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དམ་པ་དེ་ཉིད་ཀྱི་སྲས་མོ་ལྕམ་སྐུ་ Judith ལགས་དང་སྐུ་ཟླས་གཙོས་པའི་ཤུལ་ལུས་ནང་མི་རྣམས་ལ་ཐུགས་གསོའི་གསུང་འཕྲིན་ཞིག་སྩལ་འདུག་པའི་ནང་། སྐུ་ཉིད་ཀྱི་ཡབ་དམ་པ་དེ་ཉིད་སྐུ་འཚོ་བཞུགས་སྐབས་སུ་མི་ཚེ་དོན་དང་ལྡན་པ་ཞིག་སྐྱེལ་ཡོད་ཅེས་བཀའ་སྩལ་བ་དང་སྦྲགས། འདས་པའི་དུས་ཡུན་ནང་དུ་མགོན་པོ་༸གང་ཉིད་མཆོག་གིས་དམ་པ་དེ་ཉིད་ཀྱི་བཞུགས་གནས་སུ་ཆིབས་བསྒྱུར་མཛད་པ་གཙོས་ཁོང་དང་མཇལ་འཕྲད་ཐེངས་ཁ་ཤས་མཛད་ མྱོང་ཡོད་སྐོར་ཐུགས་དྲན་གསོས་པ་མཛད་དེ། མཇལ་འཕྲད་དེ་དག་ཐོག་དམ་པ་ཁོང་དང་ལྷན་དུ་ཐུགས་མཐུན་གྱི་བརྗོད་གཞི་སྣ་མང་ཐོག་བཀའ་མོལ་མཛད་ཡོད་པ་དང་། ལྷག་པར་དུ་ཀླད་པའི་བྱེད་ལས་དང་དེའི་བརྒྱུད་ནས་འགྲོ་བ་མི་རྣམས་ལ་བདེ་སྐྱིད་དང་དོན་དང་ལྡན་པའི་མི་ཚེ་སྐྱེལ་རྒྱུར་ཕན་ཐོགས་ཇི་ཡོད་ཀྱི་ནུས་པ་བཅས་ཀྱི་ཐོག་བཀའ་བསྡུར་ལྷུག་པོ་མཛད་པ་སོགས་བཀའ་སྩལ་བ་དང་ཆབས་ཅིག མགོན་པོ་༸གང་ཉིད་མཆོག་གིས་དམ་པ་ཁོང་གིས་སེམས་ཁམས་འཕྲོད་བསྟེན་ཐོག་ལ་ཁྱད་དུ་འཕགས་པའི་དམིགས་བསལ་ཞབས་འདེགས་ཞུས་པར་ཡི་རངས་ཀྱི་མངོན་བསྟོད་མཛད་ཀྱི་ཡོད་པར་བཀའ་སྩལ་འདུག༸གོང་ས་མཆོག་གིས་ད་དུང་སྲས་མོ་ལྕམ་སྐུ་ Judith ལགས་དང་ཁོང་གི་ཡབ་དམ་པ་གཉིས་དང་ལྷན་དུ་གསར་འཛུགས་གནང་བའི་ Beck བསྟི་གནས་ཁང་གིས་དམ་པ་དེ་ཉིད་ཀྱི་རིན་ཐང་བྲལ་བའི་ཕྱག་ལས་དེ་དག་རྒྱུན་སྐྱོང་གནང་རྒྱུར་ཐུགས་རེ་ཆེན་པོ་ཡོད་སྐོར་བཀའ་སྩལ་དང་འབྲེལ་ཏེ། དེ་ལྟར་གནང་ཚེ་དེ་ནི་དམ་པ་ཁོང་གི་སྐུ་ཚེ་ཧྲིལ་པོའི་མཛད་རྗེས་ལ་ཆེ་བསྟོད་ལེགས་ཤོས་ཤིག་འགྱུར་ངེས་ཡིན་པ་བཀའ་སྩལ་འདུག རྩ་བའི་སྐུ་ཞབས་ Aaron Beck དམ་པ་དེ་ཉིད་དང་༸གོང་ས་༸སྐྱབས་མགོན་ཆེན་པོ་མཆོག་རྣམ་གཉིས་དབར་དེ་སྔ་ཕྱི་ལོ་ ༢༠༠༥ ལོར་ Meeting of the Minds ཞེས་རྟོག་པའི་ལྷན་ཚོགས་ཐོག་མཇལ་འཕྲད་གནང་བ་དང་།སྐབས་དེར་སྐུ་ཞབས་ Aaron Beck མཆོག་གིས་གསར་གཏོད་གནང་བའི་ Cognitive Therapy ཐོག་བཀའ་བསྡུར་ལྷུག་པོ་མཛད་ཡོད། སྐབས་དེར་༸གོང་ས་མཆོག་གིས་སྐུ་ཞབས་ Aaron མཆོག་གིས་གསར་གཏོད་གནང་བའི་ Cognitive Behavioral Therapy ཞེས་པ་དེ་ནང་པའི་ཆོས་ཀྱི་ཉམས་ལེན་ལས་དཔྱད་སྒོམ་དང་གཅིག་པ་ཡིན་པར་གཟིགས་ཀྱི་ཡོད་པ་དང་། ཁོང་གིས་ལྗགས་རྩོམ་གནང་བའི་ཕྱག་དེབ་ Prisoners of Hate ཞེས་པ་དེའང་ནང་ཆོས་ཀྱི་དཔེ་ཆ་ལྟ་བུར་གཟིགས་ཀྱི་ཡོད་པར་བཀའ་སྩལ་མཛད་ཡོད་པ་རེད། རྗེས་སུ་སྐུ་ཞབས་  Aaron མཆོག་གིས་ཀྱང་རྟོག་པའི་སྤྱོད་ཚུལ་གྱི་ཐོག་ནས་སྨན་བཅོས་ཀྱི་ལྟ་གྲུབ་དེ་དང་ནང་པའི་ཆོས་གཉིས་དབར་འབྲེལ་བ་ཆེན་པོར་གཟིགས་ཀྱི་ཡོད་སྐོར་གསུངས་ཡོད།

ཁ་སང་དབྱིན་ཡུལ་གྱི་ Glasgow གྲོང་ཁྱེར་དུ་ COP26 ཞེས་འཛམ་གླིང་མཉམ་འབྲེལ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ལྷན་ཚོགས་ཐེངས་ཉེར་དྲུག་པ་དབུ་འཛུགས་དང་བསྟུན་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་ཞིག་སྩལ་ཏེ་རྒྱལ་ཚོགས་ཀྱི་གོ་ལའི་གནམ་གཤིས་འགྱུར་ལྡོག་གི་ལྷན་ཚོགས་ཐོག་དེང་སྐབས་ང་ཚོར་འཕྲད་བཞིན་པའི་གནམ་གཤིས་ཀྱི་ཛ་དྲག་གནས་སྟངས་ལ་གདོང་ལེན་ཆེད་དབུ་ཁྲིད་ཚོས་མཉམ་རུབ་ངང་འབད་སྤུངས་ཀྱིས་ལས་འགུལ་དུས་བཅད་ཀྱི་རེའུ་མིག་འཆར་འགོད་གནང་བའི་ཐུགས་རེ་མཛད་འདུགམགོན་པོ་༸གང་ཉིད་མཆོག་གི་གསུང་འཕྲིན་ནང་གོ་ལའི་ཚ་དྲོད་འཕེལ་བ་འདི་དངོས་ཡོད་ཀྱི་གནས་ཚུལ་ཛ་དྲག་ཅིག་ཡིན་པ་དང་ང་ཚོ་སུས་ཀྱང་འདས་པའི་དུས་ཚོད་ལ་འགྱུར་བ་གཏང་རྒྱུ་དཀའ་ནའང་། ང་ཚོ་ཚང་མར་མ་འོངས་པ་སྔར་ལས་བཟང་བ་ཞིག་ཡོང་བར་ཞབས་འདེགས་ཞུ་ཐུབ་པའི་གོ་སྐབས་ཡོད་པར་མ་ཟད་ང་ཚོ་དང་ལྷག་དོན་འགྲོ་བ་མི་དུང་ཕྱུར་བདུན་ཅུ་ལྷག་ཡོད་པ་ཚང་མར་ཞི་བདེ་དང་ཉེན་ཁ་མེད་པར་མུ་མཐུད་གནས་ཐབས་བྱ་རྒྱུའི་འགན་ཡོད་སྟབས། ཚང་མས་རེ་བ་དང་ཆོད་སེམས་བརྟན་པོའི་ཐོག་ནས་སོ་སོ་དང་གྲོང་པ་ཁྱིམ་མཚེས་ཡོངས་ལ་ངེས་པར་གཅེས་སྐྱོང་གནང་དགོས་པའི་ལམ་སྟོན་སྩལ་འདུག དེ་བཞིན་༸གོང་ས་མཆོག་གིས་ང་ཚོའི་མེས་པོ་རྣམས་ཀྱིས་སའི་གོ་ལ་འདི་ནི་ལོངས་སྤྱོད་ཕུན་སུམ་ཚོགས་པ་ཞིག་ཏུ་འདོད་པ་དེ་དེ་བཞིན་རེད། དེ་ལས་ཀྱང་གལ་ཆེ་བ་ནི་འཛམ་གླིང་འདི་ང་ཚོའི་རང་ཁྱིམ་ཁོ་ན་དེ་ཡིན་པ་དང་འདི་ཉིད་སྲུང་སྐྱོབ་བྱ་རྒྱུ་ནི་ང་ཚོ་ཁོ་ནའི་ཆེད་དུ་མིན་པར་མི་རབས་རྗེས་མ་རྣམས་དང་། ང་ཚོ་དང་མཉམ་དུ་ལོངས་སྤྱོད་མཁན་གྱི་ས་ཡི་གོ་ལའི་སྐྱེས་ལྡན་རིགས་ཡོད་དོ་ཅོག་གི་ཆེད་དུའང་རེད་ཅེས་བཀའ་སྩལ་མཛད་ཡོད། བོད་མཐོ་སྒང་ནི་འཛམ་གླིང་གི་བྱང་སྣེ་དང་ལྷོ་སྣེ་གཉིས་ཕུད་པའི་གངས་དང་འཁྱག་པའི་གན་མཛོད་ཆེ་ཤོས་ཡིན་པའི་དབང་གིས་“འཛམ་གླིང་གི་སྣེ་གསུམ་པ་”ཞེས་ཡང་ཡང་འབོད་བཞིན་པ་དང་བོད་ནི་འཛམ་གླིང་གི་རྒྱུགས་ཆུ་ཆེ་གྲས་ཡར་ཀླུང་གཙང་པོ་དང་། གངྒཱ། སེངྒེ་གཙང་པོ། རྫ་ཆུ། རྒྱ་མོ་རྔུལ་ཆུ། རྨ་ཆུ། འབྲི་ཆུ་བཅས་ཀྱིས་གཙོས་པའི་ཆུ་བོ་ཆེ་ཁག་འགའི་འབྱུང་ཁུངས་ཀྱང་ཡིན་པར་མ་ཟད། གཙང་པོ་དེ་དག་ནི་ཨེ་ཤ་ཡའི་མི་འབོར་དུང་ཕྱུར་ཉི་ཤུ་མ་ཟིན་ཙམ་གྱི་འཐུང་ཆུ་དང་ཞིང་འདྲེན་ཡུར་ཆུ། དེ་བཞིན་གློག་བཟོ་སྐྲུན་བཅས་ལ་ཉེ་མཁོར་གྱུར་ཡོད་སྟབས། བོད་ཀྱི་ཁ་བའི་འཁྱག་རོམ་མང་དག་ཅིག་བཞུ་བ་དང་། གཙང་པོར་ཆུ་མཛོད་ཀྱི་རགས་རྒྱག་པ། ཆུ་ཁ་སྒྱུར་བ། གཞི་རྒྱ་ཆེ་བའི་ཤིང་ནགས་གཅོད་འབྲེག་སོགས་ས་རྒྱུད་གཅིག་ཏུ་ཁོར་ཡུག་ལ་སྣང་ཆུང་བྱས་པའི་རྐྱེན་གྱིས་ས་ཕྱོགས་གང་སར་དེའི་ངན་འབྲས་འབྱུང་བ་གསལ་པོར་མཚོན་ཡོད་ཅེས་ལུང་འདྲེན་མཛད་དེ་ད་ཆ་ང་ཚོས་མ་འོངས་པར་གདོང་ལེན་བྱེད་སྟངས་དེ་ཞེད་སྣང་གིས་སྨོན་ལམ་བཏབ་ནས་མ་ཡིན་པར་ཚན་རིག་གི་ཤེས་ཚད་ལ་གཞི་བཅོལ་བའི་དངོས་དོན་དང་མཐུན་པའི་ལག་ལེན་གྱི་སྒོ་ནས་གནང་དགོས་པར་བཀའ་སྩལ་བ་དང་ཆབས་ཅིག ད་ཆ་རང་རེའི་འཛམ་གླིང་འདིར་གནས་པའི་སེམས་ཅན་རྣམས་སྔར་དང་མི་འདྲ་བར་ཕན་ཚུན་ལྟོས་ཚབས་ཆེ་བས་སོ་སོས་གང་བྱེད་ཀྱང་རོགས་པ་མི་གཞན་རྣམས་མ་ཚད་པར་རྩི་ཤིང་དང་སེམས་ཅན་གྲངས་ལས་འདས་པ་ལའང་ཕན་གནོད་འདྲེན་གྱི་ཡོད་ཅེས་ལམ་སྟོན་བཀའ་དྲིན་ཆེ་བར་སྩལ་ཡོད།ལྷག་དོན་མགོན་པོ་༸གང་ཉིད་མཆོག་གིས་ང་ཚོ་འགྲོ་བ་མི་རྣམས་ནི་འཇིག་རྟེན་འདི་གཏོར་བཤིག་གཏོང་བ་དང་ཡང་ན་སྲུང་བའི་ནུས་པ་ཆེ་ཤོས་ལྡན་པའི་སྲོག་ཆགས་གཅིག་པོ་དེ་ཡིན་སྟབས། གནམ་གཤིས་འགྱུར་ལྡོག་གི་གནས་དོན་ཐད་ངེས་པར་ཀུན་ལ་ཕན་ཆེད་གོ་ལའི་ཁྱོན་ཡོངས་ནས་འཕྱར་གྲུ་མཉམ་འདེགས་གྱིས་གདོང་ལེན་གནང་དགོས་པ་དང་ལྷན་དུ་མི་སྒེར་གྱི་ངོས་ནས་ཀྱང་སོ་སོའི་ནུས་པ་གང་ཡོད་ངེས་པར་འདོན་དགོས་ལ། རང་རེའི་རང་བྱུང་ཁམས་དེ་སོ་སོའི་ཉིན་རེའི་འཚོ་བའི་ཆ་ཤས་སུ་བརྩིས་ཏེ་བདག་གཅེས་གནང་དགོས་ལ་ཚན་རིག་གིས་སློབ་སྟོན་གང་གནང་རྒྱུ་ཡོད་པ་དེ་དག་ངེས་པར་དུ་སློབ་གཉེར་གནང་དགོས་ཞེས་ལམ་སྟོན་མཛད་ཡོད། ༸གོང་ས་མཆོག་གིས་མི་རབས་གཞོན་པ་རྣམས་ནས་གནམ་གཤིས་འགྱུར་ལྡོག་ཐད་ཁ་ཞེ་གཉིས་མེད་ཀྱིས་ལག་བསྟར་བྱེད་དགོས་པའི་འབོད་སྐུལ་ཐོས་སྐབས་༸སྐུ་ཉིད་མཆོག་ཐུགས་སྐྱེད་ཆེན་པོ་ཡོང་བཞིན་འདུག་པ་དང་དེས་མ་འོངས་པའི་ཐུགས་རེ་གང་ལ་གང་འཚམ་སྤྲོད་ཀྱིན་གྱི་འདུག་ལ། ལྷག་དོན་གཞོན་སྐྱེས་ལས་འགུལ་བ་ Greta Thunberg ལགས་ཀྱིས་ཚན་རིག་གི་གྲུབ་དོན་ལ་གསན་འཇོག་དང་དེ་འབྲེལ་ལག་བསྟར་དགོས་པའི་སྐོར་ལ་གོ་རྟོགས་སྤེལ་བ་དེ་ནི་གནད་དོན་གལ་འགངས་ཆེན་པོ་དང་ཁོང་ཚོའི་ལང་ཕྱོགས་དེ་དངོས་ཡོད་གནས་ཚུལ་དང་མཐུན་པ་ཡིན་པས་ཁོང་ཚོར་སེམས་ཤུགས་ངེས་པར་སྤེལ་དགོས་ཞེས་བཀའ་སྩལ་འདུག གསུང་འཕྲིན་དེའི་ནང་མགོན་པོ་༸གང་ཉིད་མཆོག་གིས་རྒྱུན་དུ་འགྲོ་བ་མི་རྣམས་གཅིག་མཚུངས་ཀྱི་འདུ་ཤེས་འཛིན་དགོས་གལ་ཆེ་བ་དང་འབྲེལ། གོ་ལའི་ཚ་དྲོད་དང་གནམ་གཤིས་འགྱུར་ལྡོག་གི་ཉེན་ཁ་ལ་རྒྱལ་ཁབ་ཀྱི་ས་མཚམས་ཀྱིས་ཚད་བཀག་མེད་པ་དང་དེས་ང་ཚོ་ཚང་མར་ཕོག་ཐུག་གཏོང་གིན་ཡོད་སྟབས། ད་ལྟའི་དཀའ་རྙོག་འདི་ཐུན་མོང་དུ་མྱོང་བས་དེའི་བྱུང་འབྲས་ཇེ་ཉུང་གཏོང་ཕྱིར་རྡོག་རྩ་གཅིག་སྒྲིལ་གནང་དགོས་གལ་ཆེ་བ་དང་ལྷན་དུ་དབུ་ཁྲིད་ཚོས་ཐུགས་འཁུར་ཆེར་བསྐྱེད་ཀྱིས་མཉམ་རུབ་ངང་འབད་སྤུངས་གནང་སྟེ་ད་ལྟའི་ཛ་དྲག་གི་གནས་སྟངས་འདི་སེལ་ཐབས་གནང་དང་དེ་བཞིན་ལས་འགུལ་དུས་བཅད་ཀྱི་རེའུ་མིག་ཞིག་འཆར་འགོད་གནང་ཐོག་འཛམ་གླིང་འདི་སྔར་ལས་ཀྱང་སྡོད་བློ་བཟོད་པ་དང་སྔོ་ལྗང་ཅན། བདེ་སྐྱིད་ལྡན་པ་ཞིག་བཟོ་རྒྱུར་འབད་བརྩོན་གནང་དགོས་པའི་ཐུགས་རེ་དང་ཐུགས་སྨོན་བཅས་མཛད་འདུགགཞི་རྩའི་ཐེངས་འདིའི་ COP26 གྱི་ལྷན་ཚོགས་འདི་བཞིན་ཁ་སང་ཚེས་ ༢༩ ནས་དབུ་འཛུགས་ཀྱིས་ཟླ་བ་འདིའི་ཚེས་ ༡༢ བར་འཚོགས་འཆར་ཡོད་པ་དང་ཉེ་ཆར་ཕྱི་ཟླ་ ༡༠ ཚེས་ ༢༩ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་ཁོར་ཡུག་ལྷན་ཚོགས་དབུ་འཛུགས་མ་གནང་བའི་གོང་དུ་བརྙན་འཕྲིན་བརྒྱུད་གསུང་འཕྲིན་ཞིག་སྩལ་བའི་ནང་དུ་ཁོར་ཡུག་གཏོར་སྐྱོན་གྱིས་གོད་ཆག་ལས་བསླབ་བྱ་བླངས་ཏེ་མ་འོངས་པའི་ཁ་ཕྱོགས་ལ་འགྱུར་བ་གཏོང་དགོས་པའི་བཀའ་སློབ་སྩལ་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་འདིའི་མ་འོངས་པའི་གནས་བབ་ང་ཚོའི་ལག་པར་ཡོད་པར་མ་ཟད་ལྷག་པར་དུ་ས་བབས་དང་ཁོར་ཡུག་གི་གནད་འགག་ཏུ་གྱུར་བ་བོད་ཀྱི་ཁོར་ཡུག་སྲུང་སྐྱོབ་བྱེད་རྒྱུ་དེ་འགག་རྩ་ཞིག་ཏུ་གྱུར་ཡོད་ཅེས་བཀའ་སྩལ་འདུགགནངས་ཉིན་ཕྱི་ཚེས་ ༣༡ ནས་ཕྱི་ཟླ་ ༡༡ ཚེས  ༡༢ བར་ཡུ་རོབ་དབྱིན་ཡུལ་རྒྱལ་ཁབ་ཀྱི་མངའ་ཁོངས་སུ་ཡོད་པ་ Scotland ཡི་གྲོང་ཁྱེར་ Glasgow ནང་དུ་ COP26 ཞེས་འཛམ་གླིང་མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་དང་འབྲེལ་བའི་ཚོགས་འདུ་ཐེངས་ཀོབ་༢༦ COP26 འཚོགས་འཆར་ཡོད་པ་དང་བསྟུན་དེ་རིང་༸དཔལ་ལྡན་དགའ་ལྡན་ཕོ་བྲང་ཡིག་ཚང་གིས་༸གོང་ས་༸སྐྱབས་མགོན་ཆེན་པོ་མཆོག་གིས་ཐེངས་འདིའི་གནམ་གཤིས་འགྱུར་ལྡོག་གི་ཚོགས་འདུ་དང་འབྲེལ་ནས་སྩལ་བའི་གསུང་འཕྲིན་ཞིག་སྤེལ་བར་མགོན་པོ་༸གང་ཉིད་མཆོག་གིས་གོ་ལའི་ཚ་དྲོད་འཕེལ་བ་འདི་གནས་ཚུལ་ཛ་དྲག་ཅིག་ཡིན་པས་ང་ཚོས་དེར་དོ་སྣང་ཆེ་ཙམ་བྱེད་དགོས་པ་དང་། དུས་ཚོད་ནི་ནམ་ཡང་རང་སོར་མི་སྡོད་པ་དང་། ང་ཚོ་ཡང་རང་བཞིན་གྱིས་དེའི་ཆ་ཤས་སུ་གཏོགས་པ་ཞིག་ཡིན་སྟབས། འདས་ཟིན་པའི་དུས་ཚོད་དེ་དག་ནས་བློ་སྐྱེད་བླངས་ཏེ་ང་ཚོའི་ལག་ཏུ་ཡོད་པའི་མ་འོངས་འཛམ་གླིང་འདི་འགྱུར་འགྲོས་ཐོག་ལ་དགོངས་པ་བཞེས་དགོས་པར་བཀའ་སྩལ་འདུགང་ཚོའི་ཀུན་སྤྱོད་ལ་འགྱུར་བ་བཏང་སྟེ་ཨོ་ཛོན་མཁའ་རླུང་རིམ་པ་ལ་ཉམས་ཆག་གཏོང་ཚབས་ཆུང་དུ་གཏང་དགོས་པ་དང་། དེ་ཡང་འཛམ་བུ་གླིང་འདི་ང་ཚོ་ཚང་མར་བདག་པ་ཞིག་ཡིན་སྟབས་འདོད་རྔམ་ཆེན་པོས་སྤྱོད་མཚམས་འཇོག་ནས་སོ་སོའི་བྱ་སྤྱོད་ལ་དྲན་ཤེས་བསྟེན་དགོས་པར་མ་ཟད་ཁོར་ཡུག་ནི་སོ་སོའི་ཉིན་རེའི་འཚོ་བའི་ཆ་ཤས་སུ་བརྩིས་ཏེ་ངེས་པར་དུ་བདག་གཅེས་གནང་དགོས་པའི་ལམ་སྟོན་མཛད་འདུགལྷག་པར་དུ་༸གོང་ས་མཆོག་གིས་བོད་མཐོ་སྒང་གི་ས་ཆ་འདི་འཛམ་གླིང་གི་དྭངས་གཙང་གི་ཆུ་མཛོད་གསུམ་པ་དེ་ཆགས་ཡོད་པར་མ་ཟད། སྐྱེ་དངོས་སྣ་ཚོགས་སྐྱེ་འཕེལ་བྱེད་པའི་ཁྱད་ཆོས་ལྡན་པའི་ས་གཞིའི་ཆགས་རིམ་དང་། མི་འབོར་དུང་ཕྱུར་ ༡།༨ ཙམ་གྱི་འཚོ་གནས་དང་འབྲེལ་བའི་ཆུ་བོའི་འབབ་རྒྱུན་དང་འབྱུང་ཁུངས་ལ་ཚོད་འཛིན་བྱེད་མཁན་གྱི་ས་ཆ་དང་ཁོར་ཡུག་གནད་འགག་ཅན་ཞིག་ཆགས་ཀྱི་ཡོད་སྟབས་བོད་ཀྱི་ཁོར་ཡུག་སྲུང་སྐྱོབ་བྱེད་རྒྱུ་དེ་འགག་རྩ་ཞིག་ཏུ་གྱུར་ཡོད་ཅེས་བཀའ་སྩལ་འདུགའཚོགས་ཉེ་ COP26 ཞེས་འཛམ་གླིང་མཉམ་འབྲེལ་རྒྱལ་ཚོགས་ཀྱི་གནམ་གཤིས་འགྱུར་ལྡོག་དང་འབྲེལ་བའི་ཚོགས་འདུ་ཐེངས་ ༢༦ པའི་ཐོག་ལ་རྒྱལ་སྤྱིའི་རྒྱལ་ཁབ་ ༢༠༠ ལྷག་གི་སྐུ་ཚབ་ནས་རྒྱལ་ཁོངས་སོ་སོའི་ནང་གནམ་གཤིས་ཚ་དྲོད་ཆེ་རུ་གཏོང་མཁན་གྱི་དུག་རླངས་ཚོད་འཛིན་གི་གནས་བབས་དང་། མ་འོངས་ཁོར་ཡུག་སྲུང་སྐྱོབ་ཀྱི་ལས་དོན་གནང་ཕྱོགས་སོགས་ཀྱི་ཐོག་ལ་གྲོས་བསྡུར་གནང་འཆར་ཡོད་པ་དང་བསྟུན། ཟླ་བ་འདིའི་ཕྱི་ཚེས་ ༤ ཉིན་ཡི་ཤུའི་བླ་ཆེན་ Pope Francis མཆོག་གིས་དབུས་པའི་འཛམ་གླིང་གི་ཆོས་ཕྱོགས་དབུ་ཁྲིད་དང་ཚན་རིག་པ་སོགས་ཁྱོན་མི་གྲངས་ ༤༠ ལྷག་ནས་ཁོར་ཡུག་འབག་བཙོག་དང་གནམ་གཤིས་འགྱུར་ལྡོག་གི་རྐྱེན་གྱིས་འཛམ་གླིང་སྤྱིར་ཛ་དྲག་གི་དཀའ་ངལ་མང་དག་ཅིག་འཕྲད་བཞིན་པའི་དུས་སྐབས་འདིར་ COP26 ལྷན་ཚོགས་ཐོག་བཅར་མཁན་འཛམ་གླིང་གི་དབུ་ཁྲིད་རྣམས་ཀྱིས་དཀའ་ངལ་དེ་དག་སེལ་ཐབས་སུ་ཁ་ཡོད་ལག་ཡོད་ཀྱི་ཐབས་ལམ་ཞིག་འཚོལ་དགོས་པའི་འབོད་སྐུལ་ཞུས་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཤེས་ཡོན་ཐོག་ལ་ཕྱག་ལས་གནང་མཁན་ཁག་ཅིག་ལ་སློབ་གྲྭའི་ནང་དུ་སྙིང་རྗེ་དང་ཆེ་མཐོང་གོང་འཕེལ་གཏོང་ཐབས་ཞེས་པའི་བརྗོད་གཞིའི་ཐོག་བཀའ་སློབ་ལམ་སྟོན་སྩལ་བ་དང་སྦྲགས་ཏེ་ཤེས་ཡོན་སྤྲད་པའི་དགོས་དམིགས་གཙོ་བོ་དེ་རྙོག་གྲ་བཟོ་རྒྱུཕྱིར་མ་རེད་ཅེས་ལམ་སྟོན་མཛད་སོང་།ཨ་རིའི་ Colorado གཙུག་ལག་སློབ་གཉེར་ཁང་གི་འཕྲོད་བསྟེན་བདེ་ཐབས་ལྟེ་གནས་ཁང་དང་སེན་ཌི་འེ་གོའི་ཁ་ལི་ཕོ་ཉའི་གཙུག་ལག་སློབ་གཉེར་ཁང་གི་བྱམས་བརྩེ་ལྟེ་གནས་ཁང་གཉིས་ཀྱིས་ཇི་ལྟར་གསོལ་བ་བཏབ་པ་ལྟར། དེ་རིང་སྔ་དྲོ་ཆུ་ཚོད་དགུ་པ་ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་ནས་དྲ་ལམ་བརྒྱུད་སློབ་གྲྭ་ནང་ལ་སྙིང་རྗེ་དང་ཆེ་མཐོང་གོང་འཕེལ་གཏོང་ཐབས་ཞེས་པའི་བརྗོད་གཞིའི་ཐོག་བཀའ་སློབ་ལམ་སྟོན་སྩལ་བ་དང་། སྐབས་དེར་མགོན་པོ་༸གང་ཉིད་མཆོག་གིས་དྲ་ཐོག་བརྒྱུད་མཉམ་ཞུགས་གནང་བའི་དགེ་ལས་ཡོངས་ལ་འཚམས་འདྲིའི་བཀའ་སྩལ་དང་འབྲེལ། བྱམས་སྙིང་རྗེ་ནི་འགྲོ་བ་མི་ཙམ་མིན་པར་འཛམ་གླིང་འདིའི་ཐོག་ཡོད་པའི་སྐྱེ་འགྲོ་སྤྱིར་དགོས་མཁོ་ཡོད་པ་ཞིག་དང་། ང་ཚོ་འཇིག་རྟེན་འདིར་མ་ལས་བཙས་མ་ཐག་ཏུ་ཨ་མའི་བྱམས་བརྩེས་སྐྱོང་མ་ཐུབ་པའི་གནས་སྟངས་བྱུང་ཚེ་འཚོ་གནས་ཐུབ་རྒྱུ་ངལ་གནད་ཡིན་སྟབས་བྱམས་སྙིང་རྗེ་ནི་ང་ཚོ་འཚོ་གནས་ཐུབ་མིན་གྱི་གཞི་མ་དེ་ཆགས་ཡོད་པར་བཀའ་སྩལ་ཡོད།  མགོན་པོ་༸གང་ཉིད་མཆོག་ནས་འདས་པའི་དུས་ཚོད་ནང་ལ་དམག་འཁྲུག་དང་འཚེ་བའི་དོན་རྐྱེན་མང་དག་ཅིག་བྱུང་ཡོད་པ་དེ་དག་ཕལ་ཆེ་བ་འཁོན་འཛིན་དང་ཁོང་ཁྲོའི་དབང་གིས་བྱུང་བ་ཞིག་ཡིན་པར་བཀའ་སྩལ་བ་དང་ལྷན་ཅིག་ཏུ་ད་ཆ་འཛམ་གླིང་གི་ས་ཕྱོགས་གང་སར་ཡོད་པའི་འགྲོ་བ་མི་རྣམས་ཀྱིས་ཞི་བདེ་ཞེས་བརྗོད་བཞིན་ཡོད་པ་དང་། ཞི་བདེ་ལྡན་པའི་འཛམ་གླིང་ཞིག་ཡོང་བར་དང་ཐོག་དེར་དོ་བདག་སོ་སོའི་སེམས་རྒྱུད་ལ་བྱམས་བརྩེའི་རང་བཞིན་ལྡན་པའི་ནང་སེམས་ཀྱི་ཞི་བདེ་ཞིག་བསྐྲུན་ཐུབ་དགོས་གལ་ཡིན་པ་དང་། དེ་ལྟར་འབྱུང་ཚེ་སོ་སོའི་མདུན་ངོས་སུ་མཚོན་ཆའི་རིགས་ཡོད་ཀྱང་བེད་སྤྱོད་མེད་པ་དང་ཕྱིའི་ཟང་ཟིང་གི་བར་ཆད་རིགས་འཕྲད་ཀྱང་བྱམས་བརྩེའི་ཉམས་ལེན་ཐོག་ནས་སེམས་ཀྱི་ཞི་བདེ་ལ་དོ་ཕོག་གཏང་ཐུབ་ཀྱི་མ་རེད་ཅེས་བཀའ་སྩལ་ཡོད།    དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་བྱམས་སྙིང་རྗེ་ཞེས་པ་དེ་ནི་ཆོས་ཕྱོགས་ཁོ་ན་དང་འབྲེལ་བ་ཡོད་པ་ཞིག་མིན་པར་ཆོས་དད་ཡོད་མེད་ལ་ལྟོས་མེད་འགྲོ་བ་སྤྱིའི་བདེ་ཐབས་དང་ལྷག་པར་དུ་དོ་བདག་སོ་སོའི་འཚོ་གནས་དང་མི་ཚེ་བདེ་སྐྱིད་ལྡན་པ་ཞིག་ཡོང་རྒྱུའི་རྩ་བ་ལྟ་བུ་ཞིག་ཆགས་ཡོད་པར་ལམ་སྟོན་མཛད་ཡོད།  ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་གིས་བྱམས་བརྩེ་གོང་འཕེལ་གཏོང་ཕྱོགས་དང་འབྲེལ། ང་ཚོ་ཆུང་དུས་འཚར་ལོངས་བྱུང་སྐབས་སུ་རང་ཉིད་ཀྱི་སེམས་རྒྱུད་ལ་བྱམས་བརྩེའི་ས་བོན་ཞིག་ཡོད་ཀྱང་། རིམ་པས་ཤེས་ཡོན་གྱི་ལྟེ་གནས་ཁག་ཏུ་སྒྲིམ་སྐབས་སུ་བྱམས་བརྩེ་དང་སེམས་པ་བཟང་པོ་བྱ་རྒྱུ་སོགས་འགྲོ་བ་མིའི་རང་བཞིན་དུ་ཡོད་པའི་བཟང་པོའི་ཆ་དེ་དག་གོང་འཕེལ་གཏོང་ཐབས་ཐོག་དེ་ཙམ་དོ་སྣང་བྱེད་ཀྱི་མེད་པ་ནི་ནོར་འཁྲུལ་ཞིག་ཡིན་པར་བཀའ་འགྲེལ་དང་སྦྲགས། ང་ཚོ་ཤེས་ཡོན་སྤྲད་པའི་དགོས་དམིགས་གཙོ་བོ་དེ་རྙོག་གྲ་བཟོ་རྒྱུའི་ཆེད་དུ་མིན་པར་མི་བཟང་པོ་དང་ཞི་བདེ་ལྡན་པ། ལྷག་པར་དུ་དཀའ་ངལ་རིགས་འཕྲད་ཚེ་ཞི་བའི་ཐོག་ནས་སེལ་ཐུབ་མཁན་ཞིག་བཟོ་རྒྱུ་སོགས་ལ་དམིགས་པ་ཡིན་སྟབས། ཤེས་ཡོན་གྱི་སློབ་གསོའི་བརྒྱུད་རིམ་ནང་ལ་བྱམས་སྙིང་རྗེ་དང་འགྲོ་བ་མིའི་རིན་ཐང་དང་འབྲེལ་བའི་བཟང་སྤྱོད་ཀྱི་ཆ་ཤས་ཁག་སློབ་ཁྲིད་གནང་གལ་ཡིན་པར་ལམ་སྟོན་བཀྲིན་ཆེ་བ་མཛད་སོང་། ༸གོང་ས་མཆོག་གི་བཀའ་སློབ་ལམ་སྟོན་སྩལ་གྲུབ་མཚམས་སུ་དྲ་ཐོག་ཏུ་ལྷན་ཞུགས་གནང་བའི་དགེ་ལས་ཁག་ཅིག་ནས་མགོན་པོ་མཆོག་ལ་སེམས་གུ་དོག་པོ་ཆགས་སྐབས་བྱམས་བརྩེ་ཉམས་ལེན་གནང་གལ་དང་། དགེ་རྒན་དང་སློབ་མའི་དབར་བྱམས་བརྩེ་གལ་འགངས་ཆེ་ཚུལ་སོགས་ཀྱི་བཀའ་འདྲི་ཁག་ཅིག་ཞུས་སོང་། སྐབས་དེར་མགོན་པོ་༸གང་ཉིད་མཆོག་ནས་སེམས་གུ་དོག་པོ་དང་དཀའ་ངལ་རིགས་འཕྲད་ཚེ་བྱམས་སྙིང་རྗེ་ཉམས་ལེན་བྱ་རྒྱུ་ནི་ནད་པར་སྨན་ཐོབ་པ་ལྟ་བུའི་ཕན་ནུས་ཡོད་པ་དང་། དགེ་རྒན་གྱི་ལས་གནས་ཙམ་མིན་པར་སྤྱི་ཚོགས་ཀྱི་ལས་དོན་གང་ཞིག་གི་ཁྲོད་དུ་ཡོད་ཀྱང་བྱམས་བརྩེ་དང་སེམས་པ་བཟང་པོ་བྱ་རྒྱུ་དེ་ནི་གལ་ཆེན་པོ་ཡིན་པར་མ་ཟད་ལྷག་པར་དུ་དགེ་རྒན་ཞིག་ཡིན་པའི་ཆ་ནས་སོ་སོའི་སློབ་ཕྲུག་དེ་དག་བྱམས་བརྩེའི་ཐོག་ནས་སྐྱོང་ཐུབ་ཚེ་རང་ཉིད་ཀྱི་སེམས་སྐྱིད་པ་དང་སློབ་ཕྲུག་དེ་དག་ཀྱང་དགེ་རྒན་དང་ལྷན་དུ་དུས་ཚོད་བཏང་ནས་བསྡད་རྒྱུར་ཆེས་སྤྲོ་སྣང་ཡོང་ངེས་ཡིན་པ་སོགས་བཀའ་ལན་སྩལ་གནང་མཛད་ཡོད། གཞི་རྩའི་༸གོང་ས་༸སྐྱབས་མགོན་ཆེན་པོ་མཆོག་དང་ཨ་རི་རིའི་ Colorado གཙུག་ལག་སློབ་གཉེར་ཁང་དང་སེན་ཌི་འེ་གོའི་ཁ་ལི་ཕོ་ཉའི་གཙུག་ལག་སློབ་གཉེར་ཁང་བཅས་ཀྱི་དབར་བྱམས་བརྩེ་དང་བཟང་སྤྱོད་གོང་འཕེལ་སོགས་ཀྱི་ལས་གཞི་དང་འབྲེལ་དམིགས་བསལ་གྱི་འབྲེལ་བ་དམ་ཟབ་ཡོད་པར་མ་ཟད། དེ་རིང་ལས་རིམ་གྱི་ཐོག་མར་ Colorado གཙུག་ལག་སློབ་གཉེར་ཁང་གི་རིགས་བདག་ཆེན་པོ་ Dr. Philip DiStefano མཆོག་གིས་གཙུག་ལག་སློབ་གཉེར་ཁང་ནང་ལ་ད་ཆ་འགྲོ་བ་མིའི་བདེ་དོན་དང་འབྲེལ་བའི་ལས་གཞི་གནང་རྒྱུ་ཡོད་པ་དེའི་ས་བོན་དང་རྨང་གཞི་གཙོ་བོ་དེ་དེ་སྔ་ ༢༠༡༦ ལོར་༸གོང་ས་མཆོག་གཙུག་ལག་སློབ་གཉེར་ཁང་དུ་དངོས་སུ་ཆིབས་བསྐྱུར་བཀའ་དྲིན་མཛད་སྐབས་བྱུང་བ་ཞིག་ཡིན་པ་སོགས་འགྲེལ་བརྗོད་དང་སྦྲགས། ད་རེས་སླར་ཡང་༸གོང་ས་མཆོག་དྲ་ཐོག་བརྒྱུད་གཙུག་ལག་སློབ་གཉེར་ཁང་གི་ལས་གཞིའི་ཐོག་དབུ་ཞུགས་མཛད་པར་ཐུགས་རྗེ་ཆེ་ཞེས་ཞུས་ཡོད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་བྱང་ཕྱོགས་ Uttarakhand མངའ་སྡེར་ཆར་ཞོད་ཀྱི་གོད་ཆག་ཕོག་པར་ཐུགས་གསོ་དང་ཐུགས་སྨོན་མཛད་པ་དང་ཆབས་ཅིག མགོན་པོ་༸གང་ཉིད་མཆོག་གིས་གདུང་སེམས་མཉམ་བསྐྱེད་མཚོན་ཕྱིར་ཏཱ་ལའི་བླ་མའི་དགེ་རྩ་ནས་ངལ་སེལ་རོགས་དངུལ་གསོལ་སྩལ་མཛད་རྒྱུ་ཡིན་ཞེས་བཀའ་བསྩལ་འདུགཁ་སང་དང་ཁ་ཉིན་སོགས་འདས་པའི་ཉིན་ཤས་ནང་ལ་རྒྱ་གར་གྱི་ཨུཏྟརཱཁནྜ་མངའ་སྡེ་ནང་ལ་ཆར་ཤུགས་དྲག་པོ་བརྒྱབ་ནས་ཆུ་ལོག་དང་ས་རུད་སོགས་ཀྱི་གོད་ཆག་འོག་མང་ཚོགས་ཀྱི་འཚོ་བར་གནོད་འཚེ་ཚབས་ཆེན་ཕོག་པ་མ་ཟད་གང་ཟག་གི་ཚེ་སྲོག་ཤོར་བ་སོགས་ཀྱི་དོན་རྐྱེན་ངན་འཕྲད་པ་དང་བསྟུན། དེ་རིང་༸གོང་ས་༸སྐྱབས་མགོན་ཆེན་པོ་མཆོག་གི་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Pushkar Singh Dhami མཆོག་གི་མཚན་ཐོག་ལ་ཐུགས་གསོའི་གསུང་འཕྲིན་ཞིག་སྩལ་འདུགམགོན་པོ་༸གང་ཉིད་མཆོག་གིས་ཐེངས་འདིའི་ཆར་ཞོད་ཀྱི་གོད་ཆག་ཁྲོད་འདས་གྲོངས་སུ་གྱུར་བ་རྣམས་ཀྱིས་གཙོས་པའི་ཤུལ་ལུས་ནང་མི་སྤུན་མཆེད་དང་བཅས་པར་ཐུགས་གསོ་སྩལ་བ་དང་སྦྲགས། ཨུཏྟརཱཁནྜ་མངའ་སྡེ་གཞུང་དང་འབྲེལ་ཡོད་དབུ་ཁྲིད་རྣམ་པས་ཆུའི་འཇིག་པའི་གོད་ཆག་དབང་གིས་གནོད་འཚེ་ཕོག་པ་དག་ལ་ངལ་སེལ་སླད་གང་ཐུབ་ཅི་ཐུབ་ཀྱིས་རོགས་རམ་གནང་བཞིན་པར་ཡི་རངས་བསྔགས་བརྗོད་མཛད་འདུག༸གོང་ས་མཆོག་གིས་ད་དུང་ཆར་ཞོད་ཀྱི་གོད་ཆགས་ཁྲོད་གར་སོང་ཆ་མེད་དུ་གྱུར་བ་རྣམས་ཀྱི་བདེ་དོན་ཐོག་ཐུགས་སྨོན་མཛད་བཞིན་ཡོད་པར་བཀའ་སྩལ་དང་སྦྲགས་ཏེ་མངའ་སྡེའི་སྤྱི་ཁྱབ་བློན་ཆེན་མཆོག་གིས་དབུས་པའི་མང་ཚོགས་ཡོངས་ལ་གདུང་སེམས་མཉམ་བསྐྱེད་མཚོན་ཆེད་ཏཱ་ལའི་བླ་མའི་དགེ་རྩ་ནས་ངལ་སེལ་རོགས་དངུལ་གསོལ་སྩལ་མཛད་རྒྱུ་ཡིན་ཞེས་བཀའ་སྩལ་འདུགགཞི་རྩའི་ཉིས་ཤས་གོང་ལ་རྒྱ་གར་རྒྱལ་ཡོངས་སུ་གནམ་གཤིས་འགྱུར་ལྡོག་ཤུགས་ཆེར་སོང་ནས་ས་ཁུལ་ཁག་ཅིག་ཏུ་ཆར་ཤུགས་དྲག་པོ་བརྒྱབ་པའི་གནས་སྟངས་བྱུང་ཡོད་པ་དང་ད་རེས་ Uttarakhand མངའ་སྡེ་ནང་གི་ཆར་ཞོད་ཀྱི་གོད་ཆག་ཁྲོད་མི་སེར་ ༤༦ ལྷག་གི་ཚེ་སྲོག་ཤོར་བ་མ་ཟད་མི་སེར་མི་ཉུང་བ་ཞིག་རྙེད་སོན་མེད་པའི་གནས་སྟངས་ཆགས་པ། མངའ་སྡེའི་རྒྱ་ལམ་དང་འཛུགས་སྐྲུན་གྱི་ལས་གཞི་སོགས་ལ་དོ་ཕོག་ཆེན་པོ་ཐེབས་ཡོད་པ་ལྟར་སྲིད་བློན་སྐུ་ཞབས་ Narendra Modi མཆོག་གིས་ཀྱང་མངའ་སྡེའི་མང་ཚོགས་ལ་ཐུགས་གསོ་གནང་འདུག མངའ་སྡེ་གཞུང་གི་ངོས་ནས་གོད་ཆག་ཁྲོད་ཚེ་སྲོག་ཤོར་བའི་ནང་མི་རྣམས་ལ་ངལ་སེལ་སླད་ཧིན་སྒོར་འབུམ་བཞི་རེ་དང་། སྡོད་ཁང་ལ་གནོད་སྐྱོན་ཕོག་པ་ཚོར་ཧིན་སྒོར་འབུམ་གཉིས་རེ་བཅས་རོགས་རམ་གནང་རྒྱུ་རེད་འདུག

བོད་མིའི་བླ་ན་མེད་པ་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ཆོས་ལུགས་ཁག་གི་གྲོས་ཚོགས་ཞེས་པའི་ཆོས་ལུགས་རིས་མེད་ཀྱི་ལྷན་ཚོགས་ཐེངས་བརྒྱད་པའི་ཐོག་ཆོས་ལུགས་ཚང་མར་ནང་སེམས་ཀྱི་ཞི་བདེ་བསྐྲུན་རྒྱུའི་ཐད་ནུས་པ་ཡོད་སྟབས་ལྷན་ཚོགས་ཀྱི་འཐུས་མི་རྣམ་པས་འཛམ་གླིང་ཞི་བདེ་ལྡན་པ་ཞིག་བསྐྲུན་ཐབས་སུ་ལས་དོན་མང་ཙམ་སྤེལ་དགོས་པའི་བཀའ་སྩལ་འདུགཟླ་བ་འདིའི་ཕྱི་ཚེས་ ༡༦ ནས ༡༨ དབར་ཚོགས་པའི་འཛམ་གླིང་ཆོས་ལུགས་ལྷན་ཚོགས་ཐེངས་ ༨ ཐོག་ཁ་སང་༸གོང་ས་༸སྐྱབས་མགོན་ཆེན་པོ་མཆོག་གིས་བརྙན་པར་བརྒྱུད་འཛམ་གླིང་ཆོས་ལུགས་ལྷན་ཚོགས་ཀྱི་ཚོགས་མིར་འཚམས་འདྲི་མཛད་པ་དང་སྦྲགས། སྤྱིར་འཛམ་གླིང་ནང་དེ་སྔ་ཙམ་མ་ཟད་དུས་ད་ལྟའང་དྲག་པོ་དང་འཚེ་བའི་ངལ་བ་སོགས་འཕྲད་བཞིན་ཡོད་པས་ང་ཚོས་མེ་མདའ་དང་གོ་མཚོན་ཇི་ཙམ་གྱིས་བཟོ་སྐྲུན་མང་བ་གནང་བ་དེ་ཙམ་གྱིས་འཚེ་བའི་ངལ་བ་མང་དུ་འགྲོ་ངེས་ཡིན་པ་དང་སྒོས་ཆོས་ལུགས་ཚང་མའི་བསླབ་བྱ་བྱམས་བརྩེ་གོང་མཐོར་གཏོང་རྒྱུ་དེ་གཅིག་མཚུངས་ཡིན་པ་ལྟར་ཞི་བདེའི་ས་བོན་ནི་བྱམས་བརྩེ་ཡིན་ཞེས་ལམ་སྟོན་བཀྲིན་ཆེ་བ་སྩལ་ཡོད། དེ་བཞིན་༸གོང་ས་མཆོག་གིས་ཆོས་ལུགས་མི་འདྲ་ཡོད་པ་ཚོར་སེམས་ཀྱི་ཞི་བདེ་བསྐྲུན་ཐབས་ཐད་འོས་འགན་ཆེན་པོ་ཡོད་པ་དང་། འདས་པའི་དུས་ཡུན་ནང་ཆོས་ལུགས་ཀྱི་བཞེད་པ་མི་མཐུན་པའི་དབང་གིས་དཀའ་རྙོག་འཕྲད་པ་བྱུང་ཡོད་ཀྱང་། དེ་དག་མི་ཁག་ཅིག་གིས་ཆབ་སྲིད་ཀྱི་རྐྱེན་གྱིས་ཆོས་ལུགས་སྤྱོད་པ་ཞིག་ཡིན་སྟབས་ཆོས་ལུགས་ངོ་མ་དེ་སེམས་པ་བཟང་པོ་དང་བཟོད་བསྲན་གནང་རྒྱུ་དེ་ཡིན་པས་ཆོས་ལུགས་ཚང་མར་ནང་སེམས་ཀྱི་ཞི་བདེ་བསྐྲུན་རྒྱུའི་ཐད་ནུས་པ་ཡོད་པར་བཀའ་སྩལ་མཛད་ཡོད།   མགོན་པོ་༸གང་ཉིད་མཆོག་གིས་འཛམ་གླིང་ཆོས་ལུགས་ཁག་གི་གྲོས་ཚོགས་དེ་དེང་རབས་དགོས་མཁོ་ཞིག་ཡིན་པར་བཀའ་སྩལ་དང་དང་ཆབས་ཅིག ལྷན་ཚོགས་ཀྱི་འཐུས་མི་རྣམས་པས་ཁ་ཡོད་ལག་ཡོད་ཀྱིས་འཛམ་གླིང་ཞི་བདེ་ལྡན་པ་དང་མཐུན་སྒྲིལ་ཡོང་བར་ལས་དོན་གང་མང་སྤེལ་དགོས་པ་དང་། ༸གོང་ས་མཆོག་ནང་པའི་ཆོས་ཉམས་བཞེས་མཛད་མཁན་ཞིག་ཡིན་པའི་ཆ་ནས་ཞི་བདེ་དང་ཆོས་ལུགས་མཐུན་སྒྲིལ་ཡོང་བར་ཐུགས་བརྩོན་མཛད་མུས་ཡིན་པར་བརྟེན་ལྷན་ཚོགས་ཀྱི་འཐུས་མི་རྣམ་པས་འཛམ་གླིང་ཞི་བདེ་ལྡན་པ་ཞིག་བསྐྲུན་ཐབས་སུ་ལས་དོན་མང་ཙམ་སྤེལ་དགོས་པའི་འོས་འགན་ཆེན་པོ་ཡོད་པར་བཀའ་སྩལ་སོང་། གཞི་རྩའི་ད་ལན་འཛམ་གླིང་ཆོས་ལུགས་ལྷན་ཚོགས་ཐེངས་ ༨ པ་དེ་དྲ་ཐོག་བརྒྱུད་ཚོགས་ཡོད། ཆོས་ལུགས་རིས་མེད་ཀྱི་ལྷན་ཚོགས་ཐོག་མ་དེ་ཕྱི་ལོ་ ༡༨༩༣ ལོར་ཨ་རིའི་གྲོང་ཁྱེར་ཅི་ཀ་གྷོ་ནང་ཚོགས་ཡོད་ཅིང་། སྐབས་དེར་རྒྱ་གར་གྱི་རྣལ་འབྱོར་པ་སྰབཱམཱི། བིབེཀཱནཾད། (Swami Vivekananda) མཆོག་གིས་དབུས་པའི་འཛམ་གླིང་གི་ཆོས་ལུགས་ཀྱི་དབུ་ཁྲིད་མང་དག་ཅིག་ལྷན་ཞུགས་མཛད་ཡོད་པ་རེད།  འདས་པའི་ཆོས་ལུགས་རིས་མེད་ཀྱི་ལྷན་ཚོགས་དྲུག་པོ་རྣམས་ཨ་རིས་གཙོས་པའི་ལྷོ་ཨ་ཕི་རི་ཀ་དང་སི་པན། ཁེ་ན་ཌ། ཨོ་སི་ཊོ་ལི་ཡ་བཅས་སུ་ཚོགས་པ་དང་། ཕྱི་ལོ་ ༢༠༡༥ ལོར་ཨ་རིའི་གྲོང་ཁྱེར་ Salt Lake City ནང་སྐོང་ཚོགས་གནང་བའི་ལྷན་ཚོགས་དེའི་ཐོག་༸གོང་ས་༸སྐྱབས་མགོན་ཆེན་པོ་མཆོག་ཚོགས་མགོན་དུ་དབུ་བཞུགས་མཛད་ཡོད་པ་རེད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་རྒྱ་གར་ལྷོ་ཕྱོགས་ཀེ་ར་ལ་མངའ་སྡེའི་ས་གནས་མང་པོའི་ནང་ལ་ཆར་ཞོད་དང་ས་རུད་སོགས་བྱུང་ནས་མང་ཚོགས་ཀྱི་འཚོ་བར་གནོན་འཚེ་ཚབས་ཆེན་ཕོག་པ་དང་། གང་ཟག་གི་ཚེ་སྲོག་ཀྱང་ཤོར་བར་མ་ཟད། དུས་ད་ལྟའང་དཀའ་ཚེགས་ཆེན་པོ་འཕྲད་བཞིན་ཡོད་སྟབས་ཤུལ་ལུས་ནང་མི་ཉེ་སྤུན་མཆེད་དང་མངའ་སྡེའི་མི་མང་ཡོངས་ལ་ཐུགས་གསོ་དང་ཐུགས་སྨོན་མཛད་པ་དང་ཆབས་ཅིག མགོན་པོ་༸གང་ཉིད་མཆོག་གིས་གདུང་སེམས་མཉམ་བསྐྱེད་མཚོན་ཕྱིར་ཏཱ་ལའི་བླ་མའི་དགེ་རྩ་ནས་ངལ་སེལ་རོགས་དངུལ་གསོལ་བསྩལ་མཛད་རྒྱུ་ཡིན་ཞེས་བཀའ་བསྩལ་འདུགཀེ་ར་ལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་  Pinarayi Vijayan མཆོག་གི་མཚན་ཐོག་ཏུ་སྩལ་བའི་གསུང་འཕྲིན་དེའི་ནང་མགོན་པོ་༸གང་ཉིད་མཆོག་གིས་སྤྱི་ཁྱབ་བློན་ཆེན་མཆོག་གིས་གཙོས་པའི་མངའ་སྡེ་དེའི་མང་ཚོགས་འདས་གྲོངས་སུ་གྱུར་བ་རྣམས་ཀྱི་ཤུལ་ལུས་ནང་མི་ཉེ་སྤུན་མཆེད་དང་བཅས་པར་ཐུགས་གསོ་དང་འབྲེལ། ཀེ་ར་ལ་མངའ་སྡེ་གཞུང་དང་འབྲེལ་ཡོད་དབུ་ཁྲིད་རྣམ་པས་ཆུའི་འཇིག་པའི་གོད་ཆག་དབང་གིས་གནོད་འཚེ་ཕོག་པ་དག་ལ་ངལ་སེལ་སླད་གང་ཐུབ་ཅི་ཐུབ་ཀྱི་འབད་བརྩོན་ཆེན་པོས་རོགས་རམ་གནང་མུས་ཡིན་པ་མཁྱེན་རྟོགས་བྱུང་ཞེས་བཀའ་སྩལ་བར་མ་ཟད། ༸གོང་ས་མཆོག་གིས་མངའ་སྡེའི་གཞུང་མང་ཡོངས་ལ་གདུང་སེམས་མཉམ་བསྐྱེད་མཚོན་ཕྱིར་ཏཱ་ལའི་བླ་མའི་དགེ་རྩ་ནས་ངལ་སེལ་རོགས་དངུལ་གསོལ་བསྩལ་མཛད་རྒྱུ་ཡིན་ཞེས་བཀའ་བསྩལ་དང་འབྲེལ་ནས་ཐུགས་སྨོན་སྐྱབས་འཇུག་མཛད་འདུགགཞི་རྩའི་ཐེངས་འདིའི་ཀེ་ར་ལ་མངའ་སྡེར་ནང་གི་ལྷོ་ཕྱོགས་དང་དབུས་ཀྱི་ས་གནས་དུ་མར་ཆར་ཞོད་ཆེ་བའི་རྐྱེན་གྱིས་ཆུ་རུད་རྒྱུག་པ་དང་ས་རུད་བྱུང་བ་བཅས་ལ་གཞིགས་ཏེ་མངའ་སྡེའི་ནང་མང་ཚོགས་ ༢༥ ལྷག་གི་ཚེ་སྲོག་ཤོར་ཡོད་པ་རེད་འདུགརྒྱ་གར་གྱི་སྲིད་བློན་སྐུ་ཞབས་ Narendra Modi མཆོག་གིས་ཀྱང་སྒེར་གྱི་འཕྲུལ་སྒྲ་སྟེང་ཆར་ཞོད་ཆེ་བའི་དབང་གིས་ཆུ་རུད་དང་ས་རུད་རྐྱེན་པས་ཀེ་ར་ལ་མངའ་སྡེའི་མང་ཚོགས་དུ་མའི་ཚེ་སྲོག་ཤོར་བར་ཆེས་ཐུགས་ཕམ་གནང་བ་དང་སྦྲགས་ཏེ་གོད་ཆག་ཕོག་པའི་ཤུལ་ལུས་ནང་མི་སྤུན་མཆེད་བཅས་པར་ཐུགས་གསོ་གནང་འདུག་ཅིང་། ད་ལྟའི་ཀེ་ར་ལ་ནང་གི་གནས་སྟངས་དང་འབྲེལ་བའི་མང་ཚོགས་ཀྱི་བདེ་ཐབས་ཐོག་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་  Pinarayi Vijayan མཆོག་དང་བཀའ་བསྡུར་གནང་རྒྱུ་ཡིན་སྐོར་གསུངས་འདུག

དེ་རིང་སྔ་དྲོ་ཚོུད་ ༩ ཐོག་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོངས་སྐྱབས་མགོན་ཆེན་པོ་མཆོག་གིས་ཨ་རིའི་ཞི་བདེ་ལྟེ་གནས་ཁང་གི་ཞི་བདེ་འགན་ཁུར་བ་གཞོན་སྐྱེས་རྣམས་ལ་སེམས་བཅོས་ཐབས་ཀྱི་ཤེས་ཡོན་ཞེས་པའི་བརྗོད་གཞིའི་ཐོག་བཀའ་སློབ་སྩལ་ཏེ་ཉིན་གཉིས་ཀྱི་མཛད་རིམ་མཇུག་སྒྲིལ་གནང་སོང་།དེ་རིང་བཀའ་སློབ་ཀྱི་ཐོག་མར་མགོན་པོ་༸གང་ཉིད་མཆོག་གིས་ང་ཚོ་ཚང་མ་བདེ་བ་འདོད་ཅིང་སྡུག་བསྔལ་མི་འདོད་པ་གཅིག་པ་ཡིན་ནའང་། དུས་རབས་སྔ་མོའི་ནང་དུ་འགྲོ་བ་མིའི་རིགས་ཀྱི་རང་ཞེན་གྱི་བསམ་བློའི་དབང་གིས་འཛམ་གླིང་གི་དམག་ཆེན་སྔ་རྗེས་གཉིས་ཀྱི་མཚོན་པའི་འཐུས་ཤོར་ཆེན་པོ་ཕྱིན་ཡོད་པ་དང་སྐབས་དེར་འགྲོ་བ་མིའི་རིགས་ཀྱི་རྣམ་དཔྱོད་ཀྱི་རྩལ་དེ་རྡུལ་མཚོན་དང་གོ་མཚོན་བཟོ་བ་སོགས་མིའི་རིགས་ལ་གཏོར་རྒོལ་གཏོང་ཐབས་སུ་བེད་སྤྱོད་བཏང་ཡོད་པར་དྲན་གསོ་མཛད་དེ་ད་ཆ་འགྲོ་བ་མི་ཡོངས་ཀྱིས་དུས་རབས་ཀྱི་འགྱུར་འགྲོས་དང་བསྟུན་ཏེ་འཛམ་གླིང་གི་ཞི་བདེ་ལ་དམིགས་པའི་བསམ་བློ་དེ་རིམ་བཞིན་གོང་འཕེལ་གཏོང་བཞིན་པའི་ཁྲོད་འདིར། འཛམ་གླིང་ཐོག་ཡོད་པའི་འགྲོ་བ་མི་ཐེར་འབུམ་བདུན་གྱིས་དུས་རབས་ཉེར་གཅིག་པའི་དོན་དངོས་ཀྱི་གནས་སྟངས་ངོས་འཛིན་གྱིས་ཁས་ལེན་གནང་བ་དང་ལྷན་འགྲོ་བ་མི་ཚང་མ་གཅིག་གྱུར་གྱི་འདུ་ཤེས་གཞིར་བཞག་ཐོག་གོ་ལ་སྤྱིའི་འགན་ཁུར་ལེན་དགོས་གལ་ཡིན་པར་ལམ་སྟོན་བཀའ་དྲིན་ཆེ་བ་མཛད་སོང་།དེ་བཞིན་༸གོང་ས་མཆོག་གིས་ད་ལྟ་འཚར་ལོངས་བྱུང་བཞིན་པའི་ན་གཞོན་སློབ་མ་གཙོས་གཞོན་སྐྱེས་ཚོས་འདས་ཟིན་པའི་རྙོག་གླེང་ཅན་གྱི་དུས་རབས་ཁག་ལ་བསྐྱར་ཟློས་མི་གནང་བར་མ་འོངས་འཛམ་གླིང་སྤྱིའི་བདེ་དོན་དང་གོ་ལའི་འགྱུར་ལྡོག་ལ་གཞིགས་པའི་བསམ་བློ་གསར་པ་གཏོང་གལ་རེད་ཅེས་ལམ་སྟོན་མཛད་སྐབས། དེང་གི་ཤེས་ཡོན་སློབ་གསོའི་ཁྲོད་མ་འོངས་གཞོན་སྐྱེས་ཚོར་འགྲོ་བ་མིའི་རིན་ཐང་དང་འབྲེལ་བའི་བཟང་སྤྱོད་སོགས་ཀྱི་སློབ་གསོ་གང་མང་སྤྲོད་གལ་ཆེ་བ་དང་ལྷག་པར་དུ་མིའི་ལྷན་སྐྱེས་སུ་ཡོད་པའི་གཞན་ཕན་དང་བྱམས་སྙིང་རྗེ་བསམ་པ་གོང་མཐོར་གཏོང་རྒྱུ་བཅས་ལ་ཐུགས་ཁུར་ཆེ་བཞེས་གནང་དགོས་པ་མ་ཟད། དངོས་ཡོད་གནས་ཚུལ་དང་མཐུན་པའི་འགྲོ་བ་མིའི་གཅིག་གྱུར་གྱི་འདུ་ཤེས་དང་གོ་ལའི་ཚ་དྲོད་ཀྱི་ཛ་དྲག་གནས་སྟངས་ཐད་དགོངས་པ་བཞེས་རྒྱུ་ནི་ཚང་མའི་འགན་ཡིན་པར་བཀའ་སྩལ་གནང་སོང་། ༸གོང་ས་མཆོག་ནས་བཀའ་སློབ་སྩལ་གྲུབ་མཚམས་སུ་གཞོན་སྐྱེས་ཚོགས་བཅར་བ་ཁག་ཅིག་གིས་མགོན་པོ་༸གང་ཉིད་མཆོག་ལ་བཀའ་འདྲི་དགོངས་སྐོར་ཞུས་པའི་ཁྲོད། ན་གཞོན་ཞིག་གིས་ཁོང་དེ་སྔ་ཆུང་དུས་སྐབས་རང་ཉིད་ཀྱི་དགེ་རྒན་ཞིག་གི་ནོར་འཁྲུལ་ཐེར་འདོན་བྱས་པའི་རྐྱེན་གྱིས་དགེ་རྒན་དེ་ཉིད་ཀྱིས་ཁོང་ལ་གཤེ་གཤེ་བཏང་སྟབས་ཁོང་སེམས་ཤུགས་ཆགས་ཏེ་མཐར་ལོ་གསུམ་རིང་འཛིན་གྲྭའི་ནང་སྐད་ཆ་གང་ཡང་བཤད་མ་ཐུབ་པའི་གནས་སུ་གྱུར་ཡོད་པ་ངོ་སྤྲོད་དང་འབྲེལ་ནས་དེ་འབྲེལ་དགེ་རྒན་གྱི་བྱེད་ལས་ཐད་ནས་བཀའ་འདྲི་ཞུས་པར། མགོན་༸གང་ཉིད་མཆོག་གིས་སྤྱིར་འགྲོ་བ་མིའི་འབྲེལ་ལམ་གང་ཞིག་ཡིན་པ་ཐམས་ཅད་བྱམས་བརྩེའི་རང་བཞིན་ལྡན་པ་ཞིག་དགོས་རྒྱུ་གལ་ཆེན་ཡིན་པ་དང་དགེ་རྒན་ཞིག་ལ་མཚོན་ན་སེམས་ལ་ཚོར་བ་ཡོད་པ་ཞིག་དང་བྱམས་བརྩེ་ཟེར་བ་ཚིག་ཙམ་གྱི་སྐད་ཆ་གཅིག་པུ་མིན་པར་མི་ལ་བྱམས་བརྩེ་ངོ་སྤྲོད་དང་བསླབ་བྱ་བྱེད་པའི་སྐབས་སུ་དགེ་རྒན་རང་ཉིད་ཀྱི་ཉིན་རེའི་འཚོ་བ་དང་ལྷག་པར་འཛིན་གྲྭ་འཚོགས་སྐབས་སློབ་ཕྲུག་ཚོར་འགྲེལ་བཤད་རྒྱག་པའི་སྐབས་སུ་བྱམས་བརྩེ་ལྡན་པ་ཞིག་གི་ཐོག་ནས་སློབ་ཕྲུག་གི་མི་ཚེའི་མདུན་ལམ་ལ་སེམས་ཁུར་ལེན་དགོས་པ་ལས་ཁྲལ་ལྟར་བསླབ་བ་དེ་སློབ་ཕྲུག་གིས་སེམས་གཏིང་ལ་འཛིན་མི་ཐུབ་པ་དངོས་ཡོད་གནས་ཚུལ་ཡིན་སྟབས་ངེས་པར་བྱམས་བརྩེ་དང་ཡིད་ཆེས་ལྡན་པའི་ཐོག་ནས་སློབ་ཁྲིད་བྱེད་མཁན་དེར་སློབ་སློབ་ཕྲུག་གི་བསམ་བློའི་ནང་དུ་གུས་བརྩི་དང་བརྩེ་བ་བསླེབས་ན་དགེ་རྒན་གྱིས་བསླབས་པ་དེའང་སློབ་པྲུག་གི་སེམས་ལ་འཇུག་སླ་བ་ཡོད་ཅེས་བཀའ་ལན་བསྩལ་སོང་།དེ་ནས་ཨ་རིའི་ཞི་བདེ་ལྟེ་གནས་ཁང་གི་ཚོགས་གཙོ་དང་སྤྱི་ཁྱབ་གཙོ་འཛིན་ལྕམ་སྐུ་ Lise Grande ལགས་ཀྱིས་ཆོས་ལུགས་ཀྱི་དབུ་ཁྲིད་རྣམས་ནས་གཅིག་གྱུར་གྱི་འདུ་ཤེས་བཟུང་བའི་ཐོག་ནས་འགྲོ་བ་མིའི་སྤྱི་ཚོགས་འདི་འདྲ་མཉམ་དང་བྱམས་བརྩེ་ཅན་དེ་བཞིན་ཤེས་རབ་དང་ལྡན་པའི་གཅེས་འཛིན་ཞིག་ཏུ་སྐྲུན་རྒྱུར་ཞབས་འདེགས་སྒྲུབ་ཐུབ་མིན་ཐད་བཀའ་འདྲི་ཞུས་སྐབས། མགོན་པོ་༸གང་ཉིད་མཆོག་གིས་སྤྱི་ཡོངས་ནས་འཛམ་གླིང་ཐོག་ཡོད་པའི་ཆོས་ལུགས་སོ་སོར་ལྟ་གྲུབ་དང་ཉམས་ལེན་གནང་སྟངས་སོགས་མི་འདྲ་བ་ཡོད་ཀྱང་། གཞི་རྩའི་བསླབ་བྱ་གཙོ་བོ་ནི་བྱམས་བརྩེ་གསུང་མཁན་གཅིག་ཡིན་སྐོར་བཀའ་སྩལ་ཏེ། ཚང་མས་འགྲོ་བ་མིའི་གཅིག་འགྱུར་གྱི་བསམ་པ་དང་ཆོས་ལུགས་ཕན་ཚུན་དབར་ལ་མཐུན་འབྲེལ། དེ་བཞིན་གྲོགས་ཕོ་མོའི་འདུ་ཤེས་གོང་མཐོར་གཏོང་སླད་ཆོས་ལུགས་སོ་སོ་དང་མཐུན་པའི་ལྟ་གྲུབ་དང་རིག་ལམ་སོགས་སྤྱོད་དགོས་གལ་ཡིན་པའི་ལམ་སྟོན་མཛད་སོང་།དྲི་བ་དྲིས་ལན་གྱི་ལས་རིམ་གྲུབ་མཚམས་སུ་༸གོང་ས་མཆོག་གིས་མ་འོངས་གཞོན་སྐྱེས་ཚོར་གཞེན་སྐུལ་དང་སྦྲགས། རང་ཉིད་ཀྱི་མི་ཚེ་ནང་གནས་སྟངས་འདྲ་མིན་འོག་ངལ་བ་ཅི་འདྲ་ཞིག་འཕྲད་སྐབས་སེམས་ཤུགས་ཆགས་ནས་མི་ཚེ་སྟོང་ཟད་དུ་བསྒྱུར་བ་ལས་དུས་དང་རྣམ་པ་ཀུན་ཏུ་རེ་བ་བཟང་ས་ནས་བརྒྱབ་རྒྱུ་དང་བསམ་བློ་གུ་ཡངས། དེ་བཞིན་བློས་དཔྱད་པའི་ཐོག་ནས་དཀའ་ངལ་ལ་གདོང་ལེན་བྱེད་དགོས་པར་ལམ་སྟོན་རྒྱ་ཆེར་མཛད་པ་མ་ཟད། མགོན་པོ་གང་ཉིད་མཆོག་གི་༸སྐུ་ཚེ་ཧྲིལ་པོའི་ནང་ལའང་དཀའ་ངལ་མང་དག་ཅིག་འཕྲད་ཀྱང་ཞུམ་མེད་ཀྱི་སྙིང་སྟོབས་ཀྱིས་མུ་མཐུད་ནས་བློས་དཔྱད་པའི་ཐོག་ནས་དཀའ་ངལ་ལ་གདོང་ལེན་བྱེད་བཞིན་ཡོད་ཅེས་གསུངས་ཏེ་བཀའ་སློབ་མཛད་རིམ་མཇུག་སྒྲིལ་གནང་སོང་།