༸གོང་ས་མཆོག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བདེ་མཆོག་ལཱུ་ཨི་པའི་བཀའ་དབང་མཇུག་སྒྲིལ་དང་འབྲེལ། དེ་རིང་༸དཔལ་ལྡན་རྒྱུད་གྲྭ་སྟོད་སྨད་གཉིས་ནས་མགོན་པོ་༸གང་ཉིད་མཆོག་སྐུ་ཚེ་ཞབས་པད་བསྐལ་བརྒྱར་བརྟན་སླད་བརྟན་བཞུགས་བསྟར་འབུལ་ཞུས་ཡོད་པ་དང་། ༸གོང་ས་མཆོག་གིས་སྐབས་དེར་༸གང་ཉིད་ལོ་བཅུ་ཕྲག་གཅིག་གཉིས་བཞུགས་རྒྱུའི་བཀའ་བཞེས་སྨིན་སྩལ་དང་འབྲེལ། ཆོས་ཁས་ལེན་མིན་ལ་མ་ལྟོས་པར་རྒྱུན་དུ་ནས་སེམས་པ་བཟང་པོ་དང་གཞན་ཕན་བསྒྲུབ་དགོས་པའི་ལམ་སྟོན་མཛད་པ་མ་ཟད། དེ་རིང་གི་གོ་སྐབས་འདིའི་བརྒྱུད་ནས་ཉེ་ལམ་༸སྐུའི་འཁྲུངས་སྐར་སྐབས་སུ་ཕྱོགས་མཐའ་ཁག་མང་པོ་ཞིག་ནས་འཚམས་འདྲི་ཞུ་མཁན་ཚང་མར་ཐུགས་རྗེ་ཆེ་ཞེས་བཀའ་སྩལ་མཛད་སོང་། དེ་རིང་ཟླ་ ༧ ཚེས་ ༡༠ ཉིན་གྱི་ཞོགས་པ་ཕྱག་ཚོད་ ༨་༣༠ ཡོལ་ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་༸རྒྱལ་བའི་ཕོ་བྲང་ནས་ཐེག་ཆེན་ཆོས་གླིང་གཙུག་ལག་ཁང་གི་བཞུགས་ཁྲིར་༸ཞབས་སོར་འཁོད་གནང་མཛད་དེ་༸དཔལ་ལྡན་རྒྱུད་གྲྭ་སྟོད་སྨད་ཐུན་མོང་ནས་མཎྜལ་འདེགས་འབུལ་དང་མགོན་པོ་༸གང་ཉིད་མཆོག་བསྟན་འགྲོའི་མགོན་དུ་༸སྐུ་ཚེ་ཞབས་པད་མི་ཤིགས་རྡོ་རྗེ་ཁམས་ལྟར་བརྟན་པའི་བརྟན་བཞུགས་བསྟར་འབུལ་ཞུས་ཡོད། བརྟན་བཞུགས་གྲུབ་མཚམས་སུ་མགོན་པོ་༸གང་ཉིད་མཆོག་གིས་༸དཔལ་ལྡན་རྒྱུད་གྲྭ་སྟོད་སྨད་ཐུན་མོང་ནས་བརྟན་བཞུགས་བསྟར་འབུལ་ཞུས་པར་ཐུགས་རྗེ་ཆེ་ཞུས་དང་འབྲེལ། མགོན་པོ་༸གང་ཉིད་མཆོག་ད་དུང་དགུང་ལོ་ལོ་བཅུ་ཕྲག་གཅིག་གཉིས་བཞུགས་རྒྱུའི་བཀའ་བཞེས་བཟང་པོ་སྨིན་སྩལ་མཛད་སོང་།༸གོང་ས་མཆོག་གིས་སྐབས་དེར་ད་དུང་༸དཔལ་ལྡན་རྒྱུད་གྲྭ་སྟོད་སྨད་གཉིས་ནས་རྒྱུད་གཞུང་ཙམ་མ་ཡིན་པར་གཞུང་ཆེན་དག་ལ་སློབ་གཉེར་གནང་གལ་ཡིན་པའི་ལམ་སྟོན་སྩལ་སོང་། ༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་ལམ་མགོན་པོ་༸གང་ཉིད་མཆོག་གི་༸སྐུའི་འཁྲུངས་སྐར་སྐབས་ཕྱོགས་མཐའ་ཁག་མང་པོ་ཞིག་ནས་ངོས་ལ་རྒྱབ་སྐྱོར་གྱི་འཚམས་འདྲི་ཞུ་བར་ཐུགས་རྗེ་ཆེ་ཞེས་བཀའ་སྩལ་བ་དང་སྦྲགས། དེ་ནི་ངོས་ཀྱིས་ད་ལྟའི་བར་དུ་ཧུར་ཐག་བྱས་པ་ལ་ངོས་ལེན་ཡོད་པའི་ཐོག་ནས་རྒྱབ་སྐྱོར་བྱེད་ཀྱི་ཡོད་པ་རེད། དེས་ན་གོ་སྐབས་འདི་བཟུང་ནས་བཀྲ་ཤིས་བདེ་ལེགས་ཞུ་མཁན་ཚང་མར་ཐུགས་རྗེ་ཆེ་ཞེས་བཀའ་སྩལ་དང་སྦྲགས། ཆོས་ཁས་ལེན་མིན་ལ་མ་ལྟོས་པར་རྒྱུན་དུ་སེམས་པ་བཟང་པོ་དང་གཞན་ཕན་བསྒྲུབ་དགོས་པའི་ལམ་སྟོན་མཛད་པ་དང་ཆབས་ཅིག དེའི་བརྒྱུད་ནས་འཛམ་གླིང་སྤྱི་ལ་དངོས་གནས་དྲང་གནས་སེམས་ཀྱི་ཞི་བདེ་ཡོད་པ་དང་ཞི་བདེ་ཡོང་བའི་གོ་སྐབས་ཡོད་པ་རེད་ཅེས་ལམ་སྟོན་བཀྲིན་ཆེ་བ་མཛད་ཡོད། གཞི་རྩའི་༸དཔལ་ལྡན་རྒྱུད་གྲྭ་སྟོད་སྨད་གཉིས་ནས་ཇི་ལྟར་གསོལ་འདེབས་ཞུས་དོན་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་ཟླ་བ་འདིའི་ཕྱི་ཚེས་ ༨ དང་ ༩ བཅས་ཉིན་གཉིས་ཀྱི་རིང་བདེ་མཆོག་ལཱུ་ཨི་པའི་བཀའ་དབང་གི་སྟ་གོན་དང་དངོས་གཞི་རིམ་པར་བཀའ་དྲིན་སྩལ་བའི་སྐལ་བཟང་དགའ་སྟོན་གྱི་རྗེས་འབྲེལ། དེ་རིང་ཕྱི་ཚེས་ ༡༠ ཉིན་༸དཔལ་ལྡན་རྒྱུད་གྲྭ་སྟོད་སྨད་ཐུན་མོང་ནས་བརྟན་བཞུགས་བསྟར་འབུལ་ཞུས་སྐབས་༸སྐྱབས་རྗེ་དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་གིས་དབུས་པའི་བླ་ཆེན་དང་མཁན་པོ་རྣམ་པ། དེ་བཞིན་མི་མང་སྟོང་ཚོ་དུ་མ་དྷརྨ་སཱ་ལཱའི་ཆར་ཤོད་ཆེན་པོ་ཡོད་མེད་ལ་མ་ལྟོད་པར་༸རྒྱལ་བའི་བརྟན་བཞུགས་སྐབས་བཅར་ཡོད་པ་རེད།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་༸དཔལ་ལྡན་རྒྱུད་གྲྭ་སྟོད་སྨད་གཉིས་ཀྱིས་ཇི་ལྟར་གསོལ་འདེབས་ཞུས་དོན་ལྟར། དེ་རིང་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་བདེ་མཆོག་ལཱུ་ཨི་པའི་བཀའ་དབང་གི་སྟ་གོན་བཀྲིན་སྩལ་བ་དང་སྦྲགས་ཏེ་གཞིས་ལུས་རྒྱ་ཆེ་མང་ཚོགས་ཀྱིས་གཙོས་པའི་རྒྱ་ནག་གི་དད་ལྡན་མང་ཚོགས་ལ་སོགས་པ་རྣམས་ས་ཁྱད་ཉེ་རྒྱང་མེད་པར་བཀའ་དབང་འདི་ཐོབ་ཀྱི་རེད་ཅེས་བཀའ་སྩལ་སོང་།སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལོ་ཤས་གོང་ནས་༸དཔལ་ལྡན་རྒྱུད་གྲྭ་སྟོད་སྨད་གཉིས་ཀྱིས་ཇི་ལྟར་གསོལ་བ་འདེབས་དོན་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་ཟླ་ ༧ ཚེས་ ༨ ཉིན་བདེ་མཆོག་ལཱུ་ཨི་པའི་བཀའ་དབང་གི་སྟ་གོན་དབུ་འཛུགས་བཀའ་དྲིན་བསྐྱང་སྐབས་འཇམ་མགོན་༸རྒྱལ་བའི་རྒྱལ་ཚབ་དགའ་ལྡན་ཁྲི་རིན་པོ་ཆེ་རྡོ་རྗེ་འཆང་ཆེན་པོ་མཆོག་གིས་དབུས་པའི་མཚུངས་མེད་བྱང་རྩེ་ཆོས་རྗེ་སྒོ་སོག་རིན་པོ་ཆེ་མཆོག་དང་བོད་བརྒྱུད་ནང་བསྟན་གྱི་ཆོས་ལུགས་རིས་མེད་མཁན་བླ་སྤྲུལ་གསུམ་དང་དགེ་འདུན་པ་རྣམ་པ་བཅས། གཞན་ཡང་ཕྱི་ནང་གི་དད་ལྡན་སེར་སྐྱ་མང་ཚོགས་ཁྲི་ཚོ་བརྒལ་ཕེབས་འདུག༸གོང་ས་༸སྐྱབས་མགོན་ཆེན་པོ་མཆོག་གིས་ཆེས་ཐོག་མར་༸དཔལ་ལྡན་རྒྱུད་སྟོད་གྲྭ་ཚང་གིས་རྐང་འགན་བཞེས་ཏེ་བདེ་མཆོག་ལཱུ་ཨི་པའི་བཀའ་དབང་བཀའ་དྲིན་བསྩལ་གནང་ཡོང་བའི་གསོལ་འདེབས་ཞུས་ཡོད་པ་བཀའ་སྩལ་བ་དང་སྦྲགས། བདག་ཅག་གི་སྟོན་པ་མཉམ་མེད་སངས་རྒྱས་བཅོམ་ལྡན་འདས་ཀྱིས་ཀྱང་གདུལ་བྱར་དབང་པོ་རབ་འབྲིང་མཐའ་གསུམ་ཡོད་པ་ལྟར་སེམས་ཅན་གྱི་ཁམས་དང་མོས་པ། བསམ་པ་བཅས་དང་མཐུན་པའི་མདོ་སྔགས་ཀྱི་ཆོས་ཇི་ལྟར་བསྟན་ཚུལ་སོགས་ཞིབ་རྒྱས་སུ་ངོ་སྤྲོད་མཛད་སོང་།དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གིས་གསང་བདེ་འཇིགས་གསུམ་གྱི་དམིགས་བསལ་ཐུན་མིན་ཁྱད་ཆོས་གང་ཡོད་པ་རྣམས་ངོ་སྤྲོད་མཛད་པ་དང་སྦྲགས། གསང་བདེ་འཇིགས་གསུམ་ཡ་མ་བྲལ་བ་ཉམས་བཞེས་ཇི་ལྟར་གནང་དགོས་པའི་ཚུལ་སོགས་གསུངས་སོང་།༸གོང་ས་མཆོག་གིས་༸དཔལ་ལྡན་རྒྱུད་གྲྭ་སྟོད་སྨད་གཉིས་ཀྱི་དགེ་འདུན་པ་གཙོས་གདན་ས་ཁག་ནས་ཕེབས་པའི་དགེ་འདུན་པ་ཚོར་ཆེད་དམིགས་ཀྱིས་མགོན་པོ་༸གང་ཉིད་མཆོག་གིས་ཉིན་ལྟར་བྱང་ཆུབ་ཀྱི་སེམས་དང་སྟོང་ཉིད་ལྟ་བར་དགོངས་བཞེས་ཀྱིས་ཉམས་བཞེས་མཛད་ཀྱི་ཡོད་སྐོར་བཀའ་སྩལ་བ་དང་ཆབས་ཅིག་ཏུ་དེ་ལྟར་ཉམས་ལེན་གནང་དགོས་གལ་ཡིན་པའི་ལམ་སྟོན་བཀྲིན་ཆེ་བ་སྩལ་སོང་། ༸གོང་ས་མཆོག་གིས་གཞིས་ལུས་རྒྱ་ཆེ་མང་ཚོགས་ཀྱིས་གཙོས་པའི་རྒྱ་ནག་གི་དད་ལྡན་མང་ཚོགས་ལ་སོགས་པ་རྣམས་ངོས་ཀྱིས་དམིགས་འོག་ཏུ་བཅུག་གི་ཡིན་ཞེས་བཀའ་བཞེས་བཟང་པོ་སྨིན་སྩལ་མཛད་སོང་བར་མ་ཟད་ས་ཁྱད་ཉེ་རྒྱང་མེད་པར་བདེ་མཆོག་ལཱུ་ཨི་པའི་བཀའ་དབང་འདི་འཐོབ་རྒྱུ་ཡོད་ཅེས་བཀའ་སྩལ་སོང་། ཤེས་རྟོགས་བྱུང་བར་གཞིགས་ན། དེ་རིང་གི་བཀའ་ཆོས་ཀྱི་སྟ་གོན་ཐོག་བཅར་བའི་ཕྱི་ནང་གི་དད་ལྡན་མང་ཚོགས་ཁྲི་ཚོ་བརྒལ་བ་ཡོད་པ་ཁྲོད་མཁན་ཆེན་དང་སྤྲུལ་སྐུ་ཁྱོན། ༡༢༨ གྲྭ་བཙུན་ཁྱོན། ༢༥༤༢ དགེ་བཤེས་དང་དགེ་བཤེས་མ། དེ་བཞིན་མཁན་པོ་ཁྱོན་ ༡༡༤༥ ཧི་མཱ་ཡའི་མི་རིགས། ༢༥༠ དེ་བཞིན་རྒྱ་གར་མི་རིགས། ༢༡༥ དང་ཕྱི་རྒྱལ་བ། ༡༡༥༡ སོགས་ཆེད་བཅར་ཞུས་འདུག ༸སྐུ་པར་ཁག་གཅིག་གི་བདག་དབང་༸དཔལ་ལྡན་དགའ་ལྡན་ཕོ་བྲང་ལ་ཡོད།

དེ་རིང་སྔ་དྲོ་ཉི་ཧོང་གི་སྲིད་བློན་ཟུར་པ་སྐུ་ཞབས་ Shinzo Abe མཆོག་གུ་ཡངས་མས་གཙོ་ཚོགས་པར་རྒྱབ་སྐྱོར་གྱི་གསུང་བཤད་གནང་བར་ཕེབས་སྐབས་མགུལ་ལ་མེ་མདས་བརྒྱབ་རྐྱེན་ཛ་དྲག་ངང་སྨན་བཅོས་གནང་ཡོད་ཀྱང་ཕན་འབྲས་མ་སོན་པར་དགོངས་པ་རྫོགས་པའི་གནས་ཚུལ་ཐོན་ཡོད་སྟབས། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དམ་པ་དེ་ཉིད་ཀྱི་སྐུ་ཟླ་ Abe Akie ལགས་ཀྱི་མཚན་ཐོག་ཏུ་ཐུགས་གསོའི་གསུང་འཕྲིན་ཞིག་སྩལ་འདུགམགོན་པོ་༸གང་ཉིད་མཆོག་གིས་གསུང་འཕྲིན་ནང་། དེ་རིང་སྔ་དྲོ་ངོས་ཀྱི་མཛའ་གྲོགས་སྐུ་ཞབས་ Shinzo Abe མཆོག་ལ་མེ་མདས་བརྒྱབ་པའི་རྐྱེན་གྱིས་སྐུ་གྲོངས་པའི་གནས་ཚུལ་ཐོས་པར་ཆེས་བློ་ཕམ་བྱུང་ཞེས་དང་ཁོང་གིས་གཞན་ཕན་གྱི་ཕྱག་ལས་གནང་སྟེ་མི་ཚེ་དོན་སྙིང་ལྡན་པ་ཞིག་བསྐྱེལ་ཡོད་སྐོར་དང་འབྲེལ། མགོན་པོ་༸གང་ཉིད་མཆོག་གིས་དམ་པ་ཁོང་དང་ཤུལ་ལུས་སྐུ་འཁོར་ནང་མི་ཡོངས་ལ་ཐུགས་གསོ་དང་ཐུགས་སྨོན་མཛད་འདུག ད་དུང་༸གོང་ས་མཆོག་གིས་སྐུ་ཉིད་ཀྱིས་མཁྱེན་གསལ་ལྟར་སྐུ་ཞབས་དམ་པ་ཁོང་ནི་བོད་མི་རྣམས་ཀྱི་མཛའ་གྲོགས་ཡིད་བརྟན་འཕེལ་བ་ཞིག་ཡིན་པ་དང་། མགོན་པོ་མཆོག་གིས་དམ་པ་ཁོང་གིས་བོད་མིར་འགྱུར་མེད་ཀྱི་མཛའ་གྲོགས་དང་ཆེས་ཕྱུག་པའི་གཅེས་ནོར་ནང་པའི་ལེགས་བྱང་དང་བོད་མིའི་ངོ་བོ་བཅས་པར་རྒྱབ་སྐྱོར་གཡོ་བ་མེད་པ་གནང་བར་ཡི་རངས་མཛད་ཀྱི་ཡོད་སྐོར་བཀའ་སྩལ་འདུག སྐུ་ཞབས་ Shinzo Abe མཆོག་རིང་མིན་སླེབས་ལ་ཉེ་བའི་ཉི་ཧོང་གི་གྲོས་ཚོགས་གོང་མའི་འོས་བསྡུ་ཆེན་མོ་དང་འབྲེལ་ནས་དེ་རིང་སྔ་དྲོ་ཉི་ཧོང་གི་ Nara ས་ཁུལ་དུ་མང་ཚོགས་ཁྲོད་གཏམ་བཤད་གནང་བཞིན་སྐབས་ཚོུད་ ༡༡ ཙམ་ལ་གློ་བུར་དུ་ Tetsuya Yamagami ཟེར་བའི་གང་ཟག་ཞིག་གིས་མགུལ་ལ་མེ་མདའ་བརྒྱབ་རྐྱེན་ས་ལ་འགྱེལ་བར་བརྟེན་ཛ་དྲག་མྱུར་སྐྱོབ་ཆེད་དུ་ན་ར་ཁུལ་གྱི་སྨན་ཁང་ཞིག་ཏུ་སྨན་གཏུགས་གནང་ཡོད་ཀྱང་ཕན་འབྲས་གང་ཡང་མ་སོན་པར་དགོངས་པ་རྫོགས་པའི་ཡིད་སྐྱོའི་གནས་ཚུལ་ཐོན་ཡོད་པ་རེད། སྐབས་དེར་ཉེན་རྟོག་པས་ལག་ཏུ་རང་གིས་བཟོས་པའི་མེ་མདའ་ཞིག་འཁྱེར་ནས་ཡོང་བའི་རང་ལོ་ ༤༡ སོན་པ་ Tetsuya Yamagami ཟེར་བའི་སྐྱེས་པ་དེ་འཛིན་བཟུང་བྱས་འདུག ཉི་ཧོང་གི་བརྒྱུད་ལམ་ཁག་ཏུ་གནས་ཚུལ་སྤེལ་བར་མེ་མདའ་རྒྱག་མཁན་གང་ཟག་དེ་དེ་སྔ་ཉི་ཧོང་གི་མཚོ་དམག་ནང་དུ་ལོ་ ༣ བསྡད་མྱོང་ཡོད་པ་དང་། ཁོ་པས་སྐུ་ཞབས་ཨ་བྷི་མཆོག་གི་ཕྱག་ལས་གནང་ཕྱོགས་ལ་འདོད་བློ་མི་འཁེངས་པའི་རྐྱེན་གྱིས་མེ་འདའ་བརྒྱབ་ཡིན་སྐོར་བཤད་འདུག རྩ་བའི་སྐུ་ཞབས་ Shinzo Abe དམ་པ་དེ་ཉིད་ཕྱི་ལོ་ ༡༩༥༤ ལོར་སྐུ་འཁྲུངས་ཤིང་ད་ལྟ་དགུང་ལོ་ ༦༧ ཡིན་པ་དང་། ཁོང་གིས་ཉི་ཧོང་གི་ Liberal Democratic Party ཞེས་པའི་ཆབ་སྲིད་ཚོགས་པའི་ཚོགས་མིའི་ཐོག་ནས་ཕྱི་ལོ་ ༢༠༠༦༌༠༧ དང་། རྗེས་སུ་སླར་ཕྱི་ལོ་ ༢༠༡༢ ནས་ ༢༠༢༠ བར་དུ་རྒྱལ་ཁབ་ཀྱི་སྲིད་བློན་གྱི་ཐུགས་འགན་བཞེས་ཡོད་སྟབས། ཁོང་ནི་ཡུལ་དེའི་སྲིད་བློན་རྒྱུན་རིང་ཤོས་གནང་མཁན་དེ་ཆགས་ཀྱི་ཡོད་པ་རེད།

ཁ་སང་ཕྱི་དྲོ་འདི་ག་རྒྱ་གར་གྱི་རྒྱལ་ས་ལྡི་ལིའི་ India Habitat Centre  ཞེས་པའི་ལྟེ་གནས་ཁང་དུ་ལྡི་ལི་སྐུ་ཚབ་དོན་གཅོད་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༨༧ ལ་ཕེབས་པའི་༸སྐུའི་འཁྲུངས་སྐར་གྱི་དགའ་སྟོན་མཛད་སྒོ་ཞིག་གོ་སྒྲིག་གནང་ཡོད་པ་ལྟར་  Silver Oak དུ་སྐུ་མགྲོན་གཙོ་བོར་རྒྱ་གར་དབུས་གཞུང་གི་ཕྱི་སྲིད་དང་རིག་གཞུང་བློན་ཆེན་གཞོན་པ་ལྕམ་སྐུ་ Meenakshi Lekhi མཆོག་གིས་དབུས་པའི་ཁྲིམས་ལུགས་བློན་ཆེན་གཞོན་པ་སློབ་དཔོན་ S P Singh Baghel མཆོག་ཆེད་ཕེབས་གནང་ཡོད་པ་དང་། དེ་བཞིན་ལྡི་ལིར་ཡོད་པའི་ཕྱི་རྒྱལ་གཞུང་ཚབ་ལྔ་བཅུ་ལྷག་གི་སྐུ་ཚབ་དང་གཞུང་ཚབ་པ་བཅས་གནད་ཡོད་མི་སྣ་ ༢༠༠ ལྷག་ཆེད་ཕེབས་གནང་འདུག ༸སྐུའི་འཁྲུངས་སྐར་གྱི་མཛད་སྒོའི་སྐུ་མགྲོན་གཙོ་བོ་ལྕམ་སྐུ་ Meenakshi Lekhi མཆོག་གིས་དེང་སྐབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་བྱམས་པ་དང་སྙིང་རྗེ། བཟོད་པ་བཅས་ལམ་སྟོན་མཛད་མཁན་གྱི་དབུ་ཁྲིད་རླབས་ཆེན་ཞིག་ཡིན་པ་དང་། ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་འཁྲུངས་ཡུལ་རྒྱ་གར་མིན་ནའང་། མགོན་པོ་༸གང་ཉིད་མཆོག་རྒྱལ་ཁབ་འདིའི་རིགས་མྱུག་ཞིག་ཏུ་ངོས་འཛིན་གནང་གི་ཡོད་སྐོར་གསུངས་ཡོད། དེ་བཞིན་ཁོང་གིས་རྒྱ་གར་གནའ་རབས་ཀྱི་རིག་གཞུང་བཟང་པོའི་ཡོན་ཏན་ཁག་ལ་རྒྱུན་དུ་ནས་ཆེ་མཐོང་མཛད་མཁན་ཞིག་དང་། ལྷག་དོན་ཆོས་མཐུན་སྒྲིལ་གྱི་བསླབ་བྱ། མིའི་རིན་ཐང་བཅས་པ་རྒྱུ་མཚན་ཡང་དག་ཐོག་ནས་ལམ་སྟོན་མཛད་མཁན་གྱི་བླ་ན་མེད་པའི་དབུ་ཁྲིད་ཅིག་ཡིན་པ་སོགས་གསུངས་ཏེ། རྒྱ་གར་གཞུང་མང་གཉིས་ཀྱི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཚེ་བསྐལ་བརྒྱར་བརྟན་པའི་སྨོན་འདུན་ཞུས་སོང་། ༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༧ བདག་གིར་བཞད་པའི་༸སྐུའི་འཁྲུངས་ཀྱི་མཛད་སྒོའི་ཐོག་ད་དུང་ལྡི་ལི་སྐུ་ཚབ་དོན་གཅོད་བཀའ་ཟུར་འབྲོང་ཆུང་དངོས་གྲུབ་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ནི་༸སྐུ་ཚེ་ཧྲིལ་པོའི་རིང་འགྲོ་བ་མིའི་རིན་ཐང་དང་ཆོས་ལུགས་མཐུན་སྒྲིལ། བོད་མིའི་མགྲིན་ཚབ་པ་བཅས་ཀྱི་དབུ་ཁྲིད་ཅིག་ཡིན་པ་འགྲེལ་བརྗོད་དང་སྦྲགས། བཀའ་ཟུར་མཆོག་རིང་མིན་བགྲེས་ཡོལ་དུ་ཕེབས་ཀྱི་ཡོད་སྐོར་གསུངས་ཏེ་འདས་པའི་དུས་ཡུན་དེའི་རིང་རྒྱ་གར་གཞུང་གི་འབྲེལ་ཡོད་ཁག་གི་ལམ་སྟོན་དང། ལས་དོན་བྱེད་ཕྱོགས་སོགས་གང་ཅིའི་ཐོག་ནས་རྒྱབ་སྐྱོར་གང་ཡོང་གནང་བར་བཀྲིན་ཆེ་ཞེས་སོགས་གསུངས་ཡོད། གཞི་རྩའི་ལྡི་ལི་ཁུལ་གྱི་གཞུང་འབྲེལ་མཛད་སྒོ་དེ་ཁ་སང་སྔ་ཐོག་བོད་སྒར་བསམ་ཡས་གླིང་དུ་ཚོགས་ཡོད་པ་དང་མཛད་སྒོའི་སྐུ་མགྲོན་གཙོ་བོར་རྒྱ་གར་དབུས་གཞུང་གྲངས་ཉུང་མི་རིགས་ཀྱི་ནང་པའི་སྐུ་ཚབ་ལྕམ་སྐུ་རིན་ཆེན་ལྷ་མོ་ལགས་ཕེབས་ཡོད་པ་དང་། སྐུ་མགྲོན་དུ་ས་གནས་ཀྱི་གྲོས་ཚོགས་ཚོགས་མི་སྐུ་ཞབས་ Parlad Singh Sawhney ལགས་དང་། ལྡི་ལི་སྐུ་ཚབ་དོན་གཅོད། སྤྱི་འཐུས་ཚོགས་གཞོན་ཟུར་པ་ཨཱཙཱརྱ་ཡེ་ཤེས་ཕུན་ཚོགས་ལགས་གཙོས་མི་མང་བརྒྱ་ཕྲག་འགའ་འདུ་འཛོམས་གནང་སྟེ་དགའ་དགའ་སྤྲོ་སྤྲོའི་ངང་ནས་༸སྐུའི་འཁྲུངས་སྐར་སྲུང་བརྩི་ཞུས་ཡོད་པ་རེད།

དེ་རིང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་གྱི་ཉིན་མོར་༸གོང་ས་མཆོག་གིས་བཞུགས་སྒར་དྷ་སའི་ལྷ་རྒྱལ་རིའི་ཉེ་འཁྲིས་སུ་ཆགས་པའི་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་དབུ་འབྱེད་མཛད་སོང་། དེ་རིང་སྔ་དྲོ་ཕྱག་ཚོད་ ༨ ཡོལ་ཙམ་ལ་༸གོང་ས་མཆོག་གིས་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་དབུ་འབྱེད་མཛད་པ་དང་འབྲེལ་ཏེ་དཔེ་མཛོད་དང་ཡིག་ཚགས་ཁང་། གཟེངས་རྟགས་སྒྲིག་གཤོམ་ཁང་བཅས་སུ་གཟིགས་ཞིབ་ཀྱིས་བྱིན་འབེབས་རབ་གནས་སྩལ་གྲུབ་མཚམས་དབུ་འབྱེད་མཛད་སྒོར་དབུ་བཞུགས་མཛད་སོང་། སྐབས་དེར་མགོན་པོ་༸གང་ཉིད་མཆོག་གིས་ཁྱེད་རང་ཚོ་༸རྒྱལ་བ་རིན་པོ་ཆེའི་སྐྱེས་སྐར་ལ་འཛུམ་མུལ་མུལ་དང་དགའ་སེམས་འཁོལ་བོའི་ངང་འདུ་འཛོམས་གནང་བར་ཐུགས་རྗེ་ཆེ་ཞེས་བཀའ་སྩལ་བ་དང་། གཉན་འཕྲང་གི་དུས་ཚིགས་འདིར་ངོས་ནས་ཏཱ་ལའི་བླ་མ་མིང་འཁུར་ཏེ་བོད་གངས་ཅན་གྱི་ཆོས་དང་རིག་གཞུང་། མི་རིགས་ཀྱི་ཐོབ་ཐང་རྩོད་ལེན་བྱས་ཡོད་ཅེས་བཀའ་སྩལ་བ་དང་ཆབས་ཅིག ད་བར་ངོས་ནས་བསམ་པ་རྣམ་དག་གིས་ལས་དོན་གཉེར་ཁག་གི་ལག་རྗེས་སུ་འཛམ་གླིང་གང་སར་ནས་མང་ཚོགས་དུ་མས་བོད་ཀྱི་གནད་དོན་དེ་ཆབ་སྲིད་ཀྱི་གནད་དོན་ཁོ་ན་མ་ཡིན་པར་དྲང་བདེན་གྱི་གནད་དོན་ཞིག་ཡིན་པར་དོ་སྣང་གནང་གི་ཡོད་སྐོར་བཀའ་སྩལ་སོང་།དེ་བཞིན་མགོན་པོ་༸གང་ཉིད་མཆོག་གིས་བོད་ཀྱི་ཆོས་དང་རིག་གཞུང་ནི་སེམས་ཁམས་རིག་པ་གཙོ་བོར་གྱུར་པའི་སེམས་ཀྱི་ཞི་བདེ་བསྐྲུན་རྒྱུ་ཞིག་ཡིན་པ་དང་། དེ་ནི་ཆོས་དད་ཡོད་མེད་ལ་མ་ལྟོས་པར་ཀུན་ལ་མཁོ་བ་ཞིག་ཡིན་སྟབས། བོད་ཀྱི་སེམས་ཁམས་རིག་པ་གཙོ་བོར་གྱུར་པའི་རིག་གཞུང་དེ་འཛམ་བུ་གླིང་འདིའི་སྒང་ལ་ཕན་ཐོགས་ཡོད་པ་ཞིག་ཆགས་ཡོད་སྐོར་བཀའ་སྩལ་སོང་།མགོན་པོ་༸གང་ཉིད་མཆོག་གིས་བོད་མི་རྣམས་ནི་བཙན་བྱོལ་བ་འདྲ་འདྲི་ནང་ནས་མི་འདྲ་ཞིག་ཆགས་ཡོད་པ་དང་ལྷག་པར་མགོན་པོ་༸གང་ཉིད་མཆོག་གི་གྲོགས་པོ་ཞིག་གིས་དེ་སྔ་མ་སུ་རི་ནས་བཞུགས་སྒར་དུ་ཆིབས་བསྒྱུར་མཛད་སྐབས་༸རྒྱལ་བ་རིན་པོ་ཆེའི་བཞུགས་སྒར་དྷརྨ་སཱ་ལཱ་བཞུགས་ནས་ཐུགས་རྗེའི་འོད་ཟེར་འཛམ་བུ་གླིང་ཡོངས་ལ་ཁྱབ་ཐུབ་པ་ཡོང་གི་རེད་ཅེས་གསུངས་པ་དང་སྦྲགས། གཞིས་བྱེས་གཉིས་སུ་བཞུགས་པའི་བོད་མི་ཡོངས་ནས་བོད་སྤྱིའི་དོན་དུ་སེམས་ཤུགས་སྤུངས་ཏེ་ཕྱག་ལས་གནང་བར་ཐུགས་རྗེ་ཆེ་ཞེས་བཀའ་སྩལ་སོང་བར་མ་ཟད་ངོས་ད་དུང་ལོ་ངོ་བཅུ་ཕྲག་གཅིག་གཉིས་འཚོ་ཐུབ་ཀྱི་རེད་ཅེས་བཀའ་སྩལ་སོང་།མཛད་སྒོར་༸དཔལ་ལྡན་དགའ་ལྡན་ཕོ་བྲང་ཡིད་ཆེས་དགེ་རྩའི་ཚོགས་གཙོ་ལས་ཚབ་བཀའ་བློན་ཁྲི་ཟུར་ཟམ་གདོང་རིན་པོ་ཆེ་མཆོག་གིས་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་ངོ་སྤྲོད་གསུང་བཤད་གནང་སྐབས་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་ནས་ཕྱི་ལོ་ ༡༩༥༩ ལོ་ནས་བཟུང་ད་བར་༸སྐུ་སྒེར་ཡིག་ཚང་གི་ཡིག་ཚགས་མ་ཉམས་པ་ཡོད་པ་ཡོངས་དང་ཕྲན་བུ་ཉམ་ཆག་ཕྱིན་པ་རྣམས་ཉམས་གསོའི་ཐོག་ནས་བདག་ཉར་བྱ་རྒྱུ་དང་། དེ་བཞིན་ཤེས་ཡོན་གྱི་ཉམས་ཞིབ་པ་ཚོར་༸རྒྱལ་དབང་རིམ་བྱོན་གྱི་གསུང་འབུམ་སོགས་དཔེ་མཛོད་གཅིག་གི་ནང་བདེ་བླག་ཏུ་འཚོལ་རྙེད་ཀྱིས་གསན་བསམ་ཉམས་ཞིབ་གནང་ཐུབ་པའི་དཔེ་མཛོད་ཕུན་སུམ་ཚོགས་པ་ཞིག་བསྐྲུན་རྒྱུ་ནི་༸གོང་ས་ཏཱ་ལའི་བླ་མའི་དཔེ་མཛོད་ཀྱི་དགོས་དམིགས་ཡིན་སྐོར་གསུངས་སོང་།གཞི་རྩའི་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་ནང་དཔེ་མཛོད་དང་ཡིག་ཚགས་ཁང་། གཟེངས་རྟགས་སྒྲིག་གཤོམ་ཁང་། དེ་བཞིན་སྒྲ་བརྙན་སྡེ་ཚན། གསུང་འབུམ་ཕྱོགས་སྒྲིག་སྡེ་ཚན་གྱི་ལས་ཁུངས་སོགས་ཡོད། དེ་རིང་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་དབུ་འབྱེད་ཀྱི་མཛད་སྒོ་ཐོག་དགའ་ལྡན་ཁྲི་ཐོག་ ༡༠༤ པ་༸རྗེ་བཙུན་བློ་བཟང་བསྟན་འཛིན་དཔལ་བཟང་པོ་མཆོག་གིས་དབུས་པའི་བླ་སྤྲུལ་རྣམ་པ་དང་། སྲིད་སྐྱོང་སྤེན་པ་ཚེ་རིང་མཆོག་གིས་གཙོས་པའི་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ། བོད་དོན་རྒྱབ་སྐྱོར་བ་ཨ་རིའི་གློག་བརྙན་འཁྲབ་སྟོན་པ་གྲགས་ཅན་སྐུ་ཞབས་ Richard Gere ལགས་སོགས་ནས་ལྷན་ཞུགས་གནང་སོང་།

དེ་རིང་བཞུགས་སྒར་དྷརྨ་སཱ་ལཱའི་ཐེག་ཆེན་ཆོས་གླིང་གཙུག་ལག་ཁང་དུ་ཕྱི་ནང་གི་མང་ཚོགས་སྟོང་ཕྲག་མང་པོ་འདུ་འཛོམས་ཐོག་གཞུང་འབྲེལ་གྱི་མཛད་སྒོ་ཚོགས་པ་བརྒྱུད་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༧ དང་བོད་ལུགས་ལྟར་དགུང་གྲངས་ ༨༨ བདག་གིར་བཞད་པའི་༸སྐུའི་འཁྲུངས་སྐར་སྲུང་བརྩི་ཞུས་ཏེ་བཀའ་སྤྱི་གཉིས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གིས་བོད་བསྟན་སྲིད་མི་རིགས་ཀྱི་སླད་དུ་སྐུ་ངལ་མཛད་མེད་ཀྱིས་མཛད་པ་ཇི་སྙེད་ཅིག་བསྐྱངས་པ་དང་སྒོས་སུ་འཛམ་གླིང་ཁྱོན་ཡོངས་སུ་ཞི་བདེ་དང་བྱམས་བརྩེ་གོང་འཕེལ་སླད་མཛད་པ་རླབས་ཆེན་སྐྱོང་བའི་འོག་དེང་སྐབས་བཙན་བྱོལ་བོད་མིའི་སྤྱི་ཚོགས་འདི་འཛམ་གླིང་ཁྲོད་ཀྱི་སྐྱབས་བཅོལ་བའི་སྒྲིག་འཛུགས་གཟེངས་སུ་ཐོན་པ་ཞིག་བསྐྲུན་གནང་མཛད་པའི་བླ་ན་མེད་པའི་མཛད་འཕྲིན་ཁག་དྲན་གསོ་ཞུས་པ་དང་འབྲེལ། ༸གོང་ས་མཆོག་གི་ཐུགས་བསྐྱེད་ཆེན་པོ་བཞི་གཙོས་བཀའ་དགོངས་བཞིན་རྣམ་དཀར་དགེ་བའི་ལས་ལ་གཞོལ་ཞིང་། སྤྱི་དོན་ཐོག་ནུས་པ་མཉམ་སྤུངས་གནང་བའི་འབོད་སྐུལ་བསྐྱར་ནན་གནང་སོང་།དེ་རིང་སྔ་དྲོ་ཕྱག་ཚོད་ ༡༠ ཐོག་གཞུང་འབྲེལ་གྱི་༸སྐུའི་འཁྲུངས་སྐར་སྲུང་བརྩིའི་མཛད་སྒོ་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་གི་གསུང་འཕྲིན་སྒྲོག་སྦྱང་གནང་སྟེ་༸གོང་ས་༸སྐྱབས་མགོན་ཆེན་པོ་མཆོག་གིས་བོད་བསྟན་སྲིད་མི་རིགས་ཀྱི་ཆེད་དུ་ད་བར་སྐུ་ངལ་མཛད་མེད་ཀྱིས་སྐུ་ལས་བསྐྱོན་པའི་ཁྲོད་དེང་སྐབས་བཙན་བྱོལ་བོད་མིའི་སྤྱི་ཚོགས་འདི་རང་གི་ཆོས་དང་རིག་གཞུང་། སྐད་ཡིག་དང་བཅས་པ་མི་ཉམས་རྒྱུན་འཛིན་དང་ཉམས་པ་སླར་གསོ་གནང་སྟེ། འཛམ་གླིང་ཁྲོད་ཀྱི་སྐྱབས་བཅོལ་བའི་སྤྱི་ཚོགས་ཚགས་ཚུད་ཤོས་སུ་གྱུར་གནང་མཛད་ཡོད་པ་སོགས་༸སྐུའི་མཛད་རྗེས་ཁག་དྲན་གསོ་དང་འབྲེལ། རང་ཅག་ལས་ཀྱི་སྣེ་མོ་བ་རྣམས་དང་མང་ཚོགས་བཅས་ཐུན་མོང་གི་ངོས་ནས་སྤྱི་མཐུན་བསོད་ནམས་གསོག་པ་དང་༸རྒྱལ་བ་དགྱེས་པའི་མཆོད་སྤྲིན་དུ་༸གོང་ས་མཆོག་ཐུགས་འཚབ་དང་ཐུགས་སུན་འབྱུང་གཞིའི་གཏམ་བརྗོད་མཐའ་དག་རྒྱང་དུ་དོར་ཏེ། ཐུགས་བསྐྱེད་དམ་བཅའ་བཞི་གཙོ་གྱུར་ཐོག་བཀའ་དགོངས་བཞིན་རྣམ་དཀར་དགེ་བའི་ལས་ལ་གཞོལ་ཞིང་། སྤྱི་དོན་ཐོག་ནུས་པ་མཉམ་སྤུངས་ཡོང་བའི་འབོད་སྐུལ་དང་། སྐབས་ ༡༦ པའི་བཀའ་ཤག་གི་ངོས་ནས་ལས་དོན་བྱེད་སྒོ་མཐའ་དག་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་གཞིར་བཟུང་འབད་བརྩོད་ཞུ་མུས་ཡིན་ཞིང་། མ་འོངས་པར་ཡང་༸མགོན་པོ་མཆོག་གི་དགོངས་གཞི་བསྒྲུབ་རྒྱུའི་དམ་བཅའ་བརྟན་པོ་ཡིན་ཞེས་སོགས་གསུངས་སོང་།དེ་བཞིན་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཀྱང་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྗེས་ཁག་ལ་ཆེ་བསྟོད་དང་འབྲེལ་དེ་རིང་གི་གོ་སྐབས་ཆེས་བཞེས་ཀྱིས་དུས་རབས་ཉེར་གཅིག་པའི་གནས་བབ་བཅས་ལ་བསམ་ཞིབ་ཀྱིས་རྒྱ་ནག་གི་དཔོན་རིགས་ཚོས་བོད་ཐོག་འཛིན་པའི་མཁྲེགས་བཟུང་ཅན་གྱི་སྲིད་བྱུས་ལ་བཟང་ཕྱོགས་ཀྱི་འགྱུར་བ་ཞིག་ངེས་པར་དུ་གཏོང་དགོས་པའི་དུས་ལ་བབ་ཡོད་པའི་སྐུལ་མ་གནང་སོང་།སྤྱིར་དེ་རིང་བསྐལ་བཟང་ཉིན་མོ་དེར་སྐུ་མགྲོན་གཙོ་བོར་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་ Jai Ram Thakur མཆོག་ཆེད་ཕེབས་གནང་གཏན་ཁེལ་ཡོད་ཀྱང་དྲག་ཆར་ཁྲོད་ཐད་ཕུར་གནམ་གྲུ་ཕུར་མ་ཐུབ་པའི་རྐྱེན་གྱིས་མཛད་སྒོའི་ཐོག་ཕེབས་ཐུབ་མེད་སྟབས། ཁོང་གིས་དྲ་རྒྱ་བརྒྱུད་ནས་གསུང་འཕྲིན་ཞིག་སྩལ་ཏེ་མང་ཚོགས་ལ་༸རྒྱལ་བའི་༸སྐུའི་འཁྲུངས་སྐར་ཉིན་མོར་འཚམས་འདྲི་དང་རིང་མིན་དྷརྨ་སཱ་ལཱར་ཕེབས་ནས་༸གོང་ས་མཆོག་དང་ལྷན་མཇལ་འཕྲད་ཞུ་ཐབས་གནང་རྒྱུ་ཡིན་སྐོར་གསུངས་པ་དང་འབྲེལ། ང་ཚོ་ཚང་མས་༸གོང་ས་མཆོག་གི་བཀའ་སློབ་ཁག་གང་ཐུབ་ལག་བསྟར་ཞུས་ནས་མགོན་པོ་༸གང་ཉིད་མཆོག་གིས་འདོན་གནང་མཛད་པའི་ལམ་ཐོག་ཤར་སྐྱོད་གནང་དགོས་པའི་སྐུལ་མ་གནང་བར་མ་ཟད། དེ་རིང་ཁོང་གིས་ཞལ་པར་བརྒྱུད་ནས་༸གོང་ས་མཆོག་ལ་དགའ་བསུའི་འཚམས་འདྲི་ཞུས་སྐབས་མགོན་པོ་༸གང་ཉིད་གིས་ད་དུང་དགུང་ལོ་ ༢༥ ནས་ ༣༠ བར་བཞུགས་རྒྱུའི་ཞལ་བཞེས་མཛད་པ་བཞིན་བློན་ཆེན་མཆོག་གིས་ཀྱང་༸གོང་ས་མཆོག་༸སྐུ་ཚེ་བསྐལ་བརྒྱར་བརྟན་པའི་ཐུགས་སྨོན་ཞུ་བཞིན་ཡོད་སྐོར་གསུངས་སོང་།དེ་རིང་མཛད་སྒོའི་ཐོག་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་མཆོག་ཕེབས་ཐུབ་མེད་སྟབས་ཁོང་གི་ཚབ་ཏུ་མངའ་སྡེའི་ཤིང་ནགས་བློན་ཆེན་སྐུ་ཞབས་ Rakesh Pathania མཆོག་གིས་གསུང་བཤད་གནང་བར་༸གོང་ས་མཆོག་ཧི་མཱ་ཅལ་ནང་དུ་༸སྐུ་བཞུགས་མཛད་པ་དེ་ང་ཚོ་ཧི་མཱ་ཅལ་མང་ཚོགས་ཀྱི་བསོད་ནམས་ཡིན་པ་དང་དེ་རིང་སྲིད་སྐྱོང་མཆོག་གིས་བོད་མིའི་འཐབ་རྩོད་དང་༸གོང་ས་མཆོག་གི་མཛད་རྗེས་སྐོར་ངོ་སྤྲོད་གནང་བ་ལྟར་ཧི་མཱ་ཅལ་མངའ་སྡེའི་སློབ་གྲྭ་ཁག་གི་བསླབ་གཞིའི་ནང་དུ་གཏན་འཇོག་གནང་སྟེ་མང་ཚོགས་ལ་༸གོང་ས་མཆོག་གི་རླབས་ཆེན་གྱི་བློས་བཏང་དང་མཛད་འཕྲིན་སྐོར་གོ་རྟོགས་སྤེལ་རྒྱུ་ཡིན་པ་དང་། རྒྱ་གར་གཞུང་མང་ཡོངས་ནས་བོད་མིའི་རང་བཙན་འཐབ་རྩོད་ལ་དུས་རྟག་ཏུ་རྒྱབ་སྐྱོར་ཡོད་ཅེས་གསུངས་སོང་།དེ་བཞིན་དེ་རིང་གི་དམིགས་བསལ་སྐུ་མགོན་རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་ལྷན་ཚོགས་ཀྱི་ཚོགས་གཙོ་རྒྱལ་སྤྱིའི་གློག་བརྙན་འཁྲབ་བསྟོན་པ་གྲགས་ཅན་ Richard Gere ལགས་༸གོང་ས་༸སྐྱབས་མགོན་ཆེན་པོ་མཆོག་ལྟ་བུའི་སྐྱེས་ཆེན་དམ་པ་ཞིག་བོད་མིའི་ལྷན་དུ་ཡོད་པ་འདི་ནི་ཧ་ཅང་གི་བསྐལ་བཟང་ཡིན་པ་དང་། ༸གོང་ས་མཆོག་དགུང་གྲངས་ ༡༡༣ འམ་ ༡༥༠ བར་དུ་བཞུགས་སྲིད་ཀྱང་༸གོང་ས་མཆོག་མེད་པའི་དུས་སྐབས་ལ་བོད་མི་རྣམས་ཕན་ཚུན་མཉམ་རུབ་ཐོག་ནས་བོད་ཀྱི་རང་དབང་དང་བདེན་པའི་འཐབ་རྩོད་ཀྱི་འགན་ཁུར་དགོས་ཞེས་གསུངས་སོང་།དེ་བཞིན་དེ་རིང་༸རྒྱལ་བའི་༸སྐུའི་འཁྲུངས་སྐར་དང་བསྟུན་རྒྱ་གར་རྒྱལ་ཡོངས་དང་བླངས་ཞབས་ཞུ་ཚོགས་པའི་དབུ་ཁྲིད་རྒན་གྲས་ Indresh Kumar ལགས་ཀྱིས་༸གོང་ས་མཆོག་གི་༸སྐུའི་འཁྲུངས་སྐར་ལ་དྲན་རྟེན་ཆེད་ཕྱག་རྟགས་ཤིག་སྐུར་ཡོད་པ་དེ་མཛད་སྒོའི་ཐོག་ཆེད་ཕེབས་གནང་བའི་རྒྱ་གར་ BJP ཆབ་སྲིད་ཚོགས་པའི་དབུ་ཁྲིད་སྐུ་ཚབ་ Vijay Jolly མཆོག་གིས་སྲིད་སྐྱོང་མཆོག་ལ་ཕུལ་སོང་།དེ་རིང་བཞུགས་སྒར་དྷརྨ་སཱ་ལཱ་གཙོས་བོད་མི་གནས་སྡོད་ས་གནས་གང་སར་དགའ་སྤྲོའི་རྣམ་པའི་ཐོག་ནས་༸སྐུའི་འཁྲུངས་སྐར་སྲུང་བརྩི་ཞུ་བཞིན་པའི་ཁྲོད་དྷ་སར་གཞུང་འབྲེལ་མཛད་སྒོའི་ཐོག་མང་ཚོགས་ལ་རྟེན་འབྲེལ་ཚུལ་དུ་མངར་ཟས་ཞལ་གྲངས་ ༡༡༣ འགོད་འགྲེམས་གནང་བ་དང་། ཉིན་དགུང་ཞལ་ལག་གོ་སྒྲིག་སོགས་བརྒྱུད་ནས་ཉིན་མོ་དེ་སྲུང་བརྩི་ཞུས་ཡོད་པར་མ་ཟད། ཕྱི་དྲོ་ཕྱག་ཚོད་ ༥ བར་བོད་ཀྱི་ཐུན་མོང་མ་ཡིན་པའི་རྐང་བྲོ་གླུང་གཞས་སོགས་གོ་སྒྲིག་གནང་འདུག

རྒྱ་གར་གྱི་སྲིད་བློན་མོ་དི་མཆོག་གིས་དེ་རིང་སྔ་དྲོ་བོད་མིའི་བླ་ན་མེད་པའི་དབུ་འཁྲིད་སྤྱི་ནོར༸གོང་ས་༸སྐྱབས་མགོན་ཆེན་པོ་མཆོག་ལ་ཞལ་པར་ཕུལ་ཏེ་༸སྐུའི་འཁྲུངས་སྐར་ལ་འཚམས་འདྲི་ཞུས་པ་དང་ཆབས་ཅིག མགོན་པོ་༸གང་ཉིད་༸སྐུ་ཚེ་བསྐལ་བརྒྱར་བརྟན་པ་དང་༸སྐུ་ཁམས་གསལ་ཐང་ཡོང་བའི་སྨོན་འདུན་ཞུས་འདུགསྲིད་བློན་མཆོག་གིས་དེ་རིང་སྐུ་ཉིད་ཀྱི་ Twitter དྲ་གནས་ཐོག་བཀོད་པའི་འཚམས་འདྲི་དེ་ཉིད་རྒྱ་གར་གྱི་བརྒྱུད་ལམ་འདྲ་མིན་ཐོག་རྒྱ་ཁྱབ་ཆེན་པོ་སྤེལ་བར་མ་ཟད། དེ་ཞིན་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Jai Ram Thakur མཆོག་དང་རྒྱ་གར་བྱང་ཤར་འབྲས་ལྗོངས་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ Prem Singh Tamang མཆོག ཨ་རུ་ན་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག དེ་བཞིན་ཨོ་ཌི་ཤ་མངའ་སྡེའི་བློན་ཆེན་ Naveen Patnaik མཆོག ལྡི་ལི་སྤྱི་ཁྱབ་བློན་ཆེན་ Kejriwal མཆོག  Anurag Thakur ལགས་དང་། G Kishan Reddy ལགས། Nitin Gadkari ལགས་ལ་སོགས་པའི་རྒྱ་གར་དབུས་གཞུང་གི་བློན་ཆེན་མང་དག་ཅིག་གིས་བརྙན་དང་ཡིག་ལམ་ཐོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༧ ལ་ཕེབས་པའི་༸སྐུའི་འཁྲུངས་སྐར་ལ་འཚམས་འདྲི་ཞུས་པ་དང་འབྲེལ། མགོན་པོ་༸གང་ཉིད་མཆོག་༸སྐུ་ཚེ་ཡུན་རིང་བཞུགས་ཏེ་མུ་མཐུད་༸སྐུ་ཁམས་གསལ་ཐང་ཐོག་འཛམ་གླིང་གི་སྐྱེ་འགྲོ་ཡོངས་ལ་བརྩེ་བ་དང་བྱམས་པ། ཞི་བདེ་བཅས་བྱིན་གྱིས་རླབས་ཐུབ་པའི་སྨོན་འདུན་ཞུས་དང་ཞུ་མུས་རེད་འདུག གཞི་རྩའི་རྒྱ་གར་གྱི་སྲིད་བློན་མཆོག་གིས་དེ་སྔའི་བཞེངས་ཕྱོགས་དང་མི་འདྲ་བར་སྔ་ལོའི་༸སྐུའི་འཁྲུངས་སྐར་ཉིན་༸གོང་ས་མཆོག་ལ་ཆེད་དུ་ཞལ་པར་ཕུལ་ནས་འཚམས་འདྲི་ཞུས་པ་ཙམ་མ་ཟད་དེའི་སྐོར་རང་ཉིད་ཀྱི་ Twitter ཐོག་ཡོངས་གྲགས་བཀོད་ཡོད་པ་དང་། རྒྱ་གར་གྱི་དཔྱད་ཞིབ་པ་ཁག་གཅིག་གིས་སྲིད་བློན་མཆོག་ལ་བསྔགས་བརྗོད་དང་འབྲེལ་ཏེ་སྲིད་བློན་མཆོག་གི་གནང་སྟངས་དེ་རིམ་པས་སྲོལ་ལྟ་བུར་གྱུར་ཡོད་པ་ནི་བཟང་ཕྱོགས་ཀྱི་རྣམ་པ་ཞིག་ལ་ངོས་འཛིན་གནང་བཞིན་འདུག སྤྱིར་༸གོང་ས་མཆོག་གིས་ཀྱང་སྔ་ལོར་སྲིད་བློན་མོ་དི་མཆོག་གི་འཁྲུངས་སྐར་ཉིན་སྲིད་བློན་མཆོག་ལ་འཚམས་འདྲི་མཛད་པ་དང་འབྲེལ། རྒྱ་གར་གྱི་རྒྱལ་ཁབ་ཆེན་མོ་འདིའི་ཡང་དག་པའི་མང་གཙོ་དང་མང་གཙོའི་ལམ་ལུགས་དང་འབྲེལ་བ་གཏིང་ཟབ་ཡོད་པའི་ཆོས་ལུགས་སྣ་མང་གཅིག་བསྡུས་ཀྱི་ཞི་བདེ་དང་བརྟན་ལྷིང་ལ་བསྔགས་བརྗོད་མཛད་པར་མ་ཟད། བོད་མི་མང་པོ་ཞིག་རྒྱ་གར་དུ་གནས་ཡོད་པ་དང་འབྲེལ་ནས་རྒྱ་གར་ནི་བོད་མི་རྣམས་ཀྱི་ཆོས་ལུགས་ཀྱི་སྐྱབས་བཅོལ་ས་ཁོ་ན་ཙམ་མིན་པར་འདས་པའི་ལོ་ངོ་དྲུག་ཅུ་ལྷག་གི་རིང་ལ་རྒྱ་གར་རྒྱལ་ཁབ་ནི་བོད་མི་མང་པོ་ཞིག་གི་ཁྱིམ་གཞིས་ཆགས་ཡོད་པར་ལུང་འདྲེན་མཛད་དེ་རྒྱ་གར་གཞུང་མང་གཉིས་ནས་བོད་མི་རྣམས་ལ་ད་བར་མཐུན་འགྱུར་རོགས་རམ་གནང་བར་བསྐྱར་དུ་ཐུགས་རྗེ་ཆེ་ཞེས་བཀའ་སྩལ་མཛད་ཡོད་པ་རེད།

སང་ཕྱི་ཟླ་ ༧ ཚེས་ ༦ སྟེ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༨༧ བདག་གིར་བཞེས་པའི་༸སྐུའི་འཁྲུངས་སྐར་དང་བསྟུན་རྒྱ་གར་ཤར་ཕྱོགས་སུ་ཆགས་པའི་ཀ་ལིམ་སྤོང་ནང་དུ་གོམ་བགྲོད་དང་རྐང་འཁོར་སྐོར་སྐྱོད་བརྒྱུད་༸རྒྱལ་བའི་༸སྐུའི་འཁྲུངས་སྐར་སྲུང་བརྩི་ཞུས་འདུག ཁ་སྔོན་ཕྱི་ཚེས་ ༣ རེས་གཟའ་ཉི་མའི་ཉིན་ཟླ་བ་ཤར་པ་ལགས་དང་བློ་ཆོས་ལགས། ལྷུན་གྲུབ་ལགས། བསྟན་འཛིན་ནོར་འཛིན་ལགས། ཕུན་ཚོགས་ལགས་བཅས་ཀྱིས་༸གོང་ས་མཆོག་༸སྐུ་ཚེ་ཡུན་དུ་བརྟན་ཅིང་མཛད་འཕྲིན་རྒྱས་པ་དང་། རྒྱ་གར་ཡུལ་མི་དང་བོད་མི་དབར་འཆམ་མཐུན་ཡོང་བ་བཅས་དམིགས་ཡུལ་གཙོ་བཟུང་འོག་འབྲས་ལྗོངས་དང་ཀ་སྦུག  རྡོ་རྗེ་གླིང་།  སི་ལི་གུ་རི་བཅས་ནས་བོད་མི་གཙོས་ཡུལ་མི་ཁྱོན་མི་གྲངས་ ༡༥༠ ལྷག་མཉམ་ཞུགས་གནང་ནས་ཀ་སྦུག་ནས་ལ་ཝ་དགོན་པ་བར་སྤྱི་ལེ་ ༨༧ ལམ་ཐག་ཡོད་སར་གོམ་བགྲོད་དང་རྐང་འཁོར་སྐོར་སྐྱོད་གནང་བ་དང་དེ་བཞིན་ལ་ཝར་༸གོང་ས་མཆོག་གི་དགུང་གྲངས་དང་མཐུན་པའི་ལྗོན་ཤིང་ ༨༧ འདེབས་འཛུགས་ཀྱིས་༸རྒྱལ་བའི་༸སྐུའི་འཁྲུངས་སྐར་སྲུང་བརྩི་ཞུས་འདུགལྷག་པར་གོ་སྒྲིག་ཞུ་མཁན་རྣམས་ནས་མི་མང་མཉམ་ཞུགས་གནང་མཁན་ཚོར་ཕྱག་འཁྱེར་གནང་བར་ཁུལ་དེའི་དབུས་གཙང་ཚོགས་གཙོར་ཞུས་དོན་བཞིན་ཀ་སྦུག་དབུས་གཙང་ཆོལ་ཁས་རྒྱབ་སྐྱོར་གནང་སྟེ་མཉམ་ཞུགས་གནང་མཁན་ཚོར་ཕྱག་འཁྱེར་གནང་ཡོད།   གཞི་རྩའི་འཛམ་གླིང་གི་ས་གནས་གང་སར་ཡོད་པའི་བོད་མི་རྣམས་ཀྱིས་ལས་གཞིའི་རྣམ་པ་འདྲ་མིན་སྤེལ་བའི་ཐོག་ནས་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྲུང་བརྩི་ཞུས་དང་ཞུ་བཞིན་ཡོད་པ་རེད།  ཁ་སང་ལ་དྭགས་ཀྱི་ཁྲིགས་སེ་དང་བདེ་སྐྱིད་དགོན་པའི་དབུ་བླ་དང་རྒྱ་གར་གྱི་གྲོས་ཚོགས་གོང་མའི་འཐུས་མི་གནང་མྱོང་མཁན་ཁྲིགས་སེ་རིན་པོ་ཆེ་མཆོག་གིས་ལ་དྭགས་དབུས་གཞུང་མངའ་སྡེའི་འཛིན་སྐྱོང་ལ་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་ཆ་ཤས་ཙམ་ཞིག་འཇལ་སླད་ཕྱི་ཟླ་ ༧ ཚེས་ ༦ ཉིན་ལ་དྭགས་དབུས་གཞུང་མངའ་སྡེ་ཁྱོན་ཡོངས་ནས་༸གོང་ས་མཆོག་གི་༸སྐུའི་འཁྲུངས་སྐར་སྲུང་བརྩི་ཞུ་རྒྱུ་དང་དེ་ཉིན་གཞུང་སྒེར་ལས་ཁུངས་ཁག་ལས་མཚམས་འཇོག་ཆོག་པའི་གཞུང་འབྲེལ་གུང་སེང་གསལ་བསྒྲགས་གནང་སྐྱོང་ཡོང་བའི་ཞུ་སྙན་ཕུལ་འདུག

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་རླབས་ཆེན་གྱི་དགོངས་གཞི་ལྟར་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ངོས་ནས་ཕྱི་ལོ་ ༢༠༡༨ ནས་བཟུང་རྒྱ་གར་གྱི་ཆེས་མཐོའི་མི་སྣ་དང་ལྷན་དུ་བགྲོ་གླེང་ཚོགས་འདུ་རིམ་པ་གནང་མཐར་འདི་ལོའི་༸རྒྱལ་བའི་སྐུའི་འཁྲུངས་སྐར་གྱི་ཉིན་མོ་དང་བསྟུན་ནང་པའི་སློབ་གཉེར་ཁང་ཞིག་དབུ་བརྙེས་པའི་ལོར་སྲུང་བརྩི་ཞུ་རྒྱུའི་གསལ་བསྒྲགས་བསྐྱངས་སོང་།འཇམ་མགོན་རྒྱལ་བའི་རྒྱལ་ཚབ་༸སྐྱབས་རྗེ་དགའ་ལྡན་ཁྲི་ཆེན་རྡོ་རྗེ་འཆང་ཆེན་པོ་མཆོག་དང་བྱང་རྩེ་ཆོས་རྗེ་སྒོ་སོག་རིན་པོ་ཆེ་མཆོག རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཁྱབ་ཁོངས་གྲྭ་ཚང་ཁག་གི་མཁན་རིན་པོ་ཆེ་རྣམ་པ། རྒྱལ་སྤྱིའི་དགེ་ལྡན་ལྷན་ཚོགས་ཀྱི་ངེས་སྟོན་པ་དང་ཤེས་ཡོན་སློབ་སྟོན་པ་བཅས་ཁོང་རྣམས་ཀྱིས་དེ་རིང་ཟླ་ ༧  ཚེས་ ༤  ཉིན་གྱི་སྔ་དྲོ་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་དང་ནང་པའི་སློབ་གཉེར་ཁང་གི་བཅའ་ཁྲིམས་མཚན་རྟགས་འབྱར་བའི་རྩ་འཛིན་ཡིག་ཆ་དེ་ཉིད་མགོན་པོ་༸གང་ཉིད་མཆོག་ལ་སྤྱན་འབུལ་ཞུས་པ་དང་སྦྲགས། སྔ་དྲོ་ཚོུད་ ༡༡༌༠༠ སྟེང་བཞུགས་སྒར་དུ་རྟེན་གཞི་བྱས་པའི་ནོར་བུ་གསོལ་མགྲོན་ཁང་གི་ཞི་བདེ་ཚོགས་ཁང་གི་ནང་དུ་གསར་འགོད་ལྷན་ཚོགས་ཤིག་བསྐོང་ཚོགས་གནང་སོང་།གསར་འགོད་ལྷན་ཚོགས་སྐབས་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ངེས་སྟོན་པ་སྒོ་མང་མཁན་ཟུར་དགེ་བཤེས་བློ་བཟང་རྒྱལ་མཚན་ལགས་ཀྱིས་སློབ་གཉེར་ཁང་གསར་འཛུགས་གནང་བའི་དམིགས་ཡུལ་གཙོ་བོ་ནི། རྒྱ་གར་འཕགས་པའི་ཡུལ་གྱི་དཔལ་ནཱ་ལེནྡཱའི་གཙུག་ལག་སློབ་གཉེར་ཁང་གི་ནང་བསྟན་ཐེག་པ་ཆེ་ཆུང་སྔགས་དང་བཅས་པ་བོད་གངས་ཅན་ལྗོངས་ལ་དར་ཁྱབ་ཀྱིས་ལོ་ངོ་བརྒྱ་ཕྲག་མང་པོའི་རིང་བདག་ཉར་བྱས་ཡོད་པ་དང་། རྒྱ་གར་གི་གནའ་བོའི་ཤེས་ཡོན་དེའི་ཁྲོད་ནང་སེམས་ཀྱི་གདུང་བ་སེལ་བ་དང་ཞི་བདེ་སྒྲུབ་པར་ཕན་ནུས་དམིགས་བསལ་ཡོད་སྟབས། དེས་མི་སྒེར་དང་། སྤྱི་ཚོགས། འཛམ་གླིང་བཅས་ཞི་བདེ་དང་བྱམས་བརྩེ་ལྡན་པ་ཞིག་བསྐྲུན་རྒྱུ་དང་། ད་ཡོད་དགོན་སྡེ་ཁག་གི་སློབ་གཉེར་ལམ་སྲོལ་རྣམས་ཉམས་མེད་རྒྱུན་སྐྱོང་ཐོག་དེ་སྔ་དགོན་པའི་ཤེས་ཡོན་གྱི་ཁོངས་སུ་མེད་པའི་ཆོས་ལུགས་ཕན་ཚུན་མཚུངས་བསྡུར་གྱི་སློབ་ཚན། ཚན་རིག ནུབ་ཕྱོགས་ཀྱི་ལྟ་གྲུབ། འཛམ་གླིང་གི་རྒྱལ་རབས། ཆོས་ལུགས་ལ་མ་བརྟེན་པའི་བཟང་སྤྱོད། ཨང་རྩིས་སོགས་སློབ་སྦྱོང་གི་གོ་སྐབས་སྐྱ་སེར་ཀུན་ལ་ཆ་མཉམ་ཕུལ་ཏེ་ཤེས་ཡོན་རྒྱ་བསྐྱེད་བྱ་རྒྱུ། དེ་བཞིན་སློབ་གཉེར་ཁང་འདི་ནས་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཁྱབ་ཁོངས་དགོན་སྡེ་དང་བཙུན་དགོན་ཚང་མར་སྤྱི་མཚུངས་ལག་འཁྱེར་གནང་རྒྱུ་དང་ཕྱིའི་སྐྱ་སེར་ཕོ་མོ་ཀུན་ལ་རྒྱ་གར་གྱི་གནའ་བོའི་ཤེས་ཡོན་སྦྱོང་བརྡར་ཁྱད་འཕགས་སློབ་སྦྱོང་གི་གོ་སྐབས་གནང་རྒྱུ་བཅས་ཀྱི་དམིགས་ཡུལ་ཡོད་པར་མ་ཟད། རིམ་བཞིན་སློབ་གཉེར་ཁང་འདི་ཉིད་ UGC འམ་གཙུག་ལག་སློབ་གཉེར་ཁང་སྟངས་འཛིན་ལྷན་ཚོགས་ཀྱི་བཅའ་ཁྲིམས་དོན་ཚན་ ༡༩༥༦ གི་ཁོངས་ནས་ཆེས་མཐོའི་གཙུག་ལག་སློབ་ཁང་དུ་ཚད་འཛིན་ཐོབ་ཐབས་གནང་གི་ཡོད་སྐོར་གསུངས་ཡོད།ནང་པའི་སློབ་གཉེར་ཁང་དེ་ནི་ཕྱི་ལོ་ ༢༠༡༨ ལོ་ནས་བཟུང་རྒྱ་རྒྱལ་སྤྱིའི་དགེ་ལྡན་ལྷན་ཚོགས་དབུ་བཞུགས་བསྟན་བདག་རྣམ་པ་དང་། རྒྱ་གར་གྱི་ཆེས་མཐོའི་མི་སྣ། དེ་བཞིན་གདན་ས་གྲྭ་ཚང་ཁག་གི་མཁན་རིན་པོ་ཆེ་བཅས་ནས་བགྲོ་གླེང་དང་ཚོགས་འདུ་སྔ་རྗེས་སུ་རིམ་པ་གནང་བ་དང་སྦྲགས། འབྲེལ་ཡོད་སློབ་སྟོན་པ་ཕྱིའི་མཁས་དབང་ཁག་གདན་ཞུས་ཀྱིས་ད་ཡོད་དགོན་སྡེ་ཁག་གི་ཤེས་ཡོན་ལམ་ལུགས་ཐད་ཉམས་ཞིབ་གནང་སྟེ་ནང་པའི་སློབ་གཉེར་ཁང་གི་རྩ་འཛིན་ཁྲིམས་ཡིག་གཏན་འབེབས་དང་འབྲེལ། ཕྱི་ལོ་ ༢༠༢༢ ཟླ་ ༧ ཚེས་ ༦ ༸རྒྱལ་བའི་སྐུའི་འཁྲུངས་སྐར་དུས་ཆེན་ཉིན་ནང་པའི་སློབ་གཉེར་ཁང་དབུ་བརྙེས་པའི་ལོར་སྲུང་བརྩི་ཞུ་རྒྱུ་ཡིན་པ་རེད།དེ་རི་སྔ་དྲོ་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ཆེས་མཐོའི་སྐུ་ཚབ་རྣམ་པས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཇལ་ཁ་ཞུས་པ་དང་ནང་པའི་སློབ་གཉེར་ཁང་གི་བཅའ་ཁྲིམས་མཚན་རྟགས་འབྱར་བའི་རྩ་འཛིན་ཡིག་ཆ་དེ་ཉིད་མགོན་པོ་༸གང་ཉིད་མཆོག་ལ་སྤྱན་འབུལ་ཞུས་པ་དང་འབྲེལ། བཀའ་སློབ་ལམ་སྟོན་བཀའ་དྲིན་སྨིན་སྩལ་མཛད་པ་ལྟར་མཇལ་བཅར་སྐབས་མགོན་པ་༸གང་ཉིད་མཆོག་ནས་བཀའ་སློབ་གང་སྩལ་ཡོད་མེད་སྐོར་རྒྱལ་སྤྱིའི་དགེ་ལྡན་ལྷན་ཚོགས་ཀྱི་ངེས་སྟོན་པ་མཁན་ཟུར་དགེ་བཤེས་བློ་བཟང་རྒྱལ་མཚན་མཆོག་ལ་བཅར་འདྲི་ཞུས་པར་ཁོང་གིས་རིང་མིན་ཟླ་འདིའི་ཕྱི་ཚེས་ ༧ ཉིན་བཞུགས་སྒར་དྷརྨསཱལཱར་རྟེན་གཞི་བྱས་པའི་རྣམ་རྒྱལ་གྲྭ་ཚང་གི་སློབ་གྲྭའི་ཚོགས་ཁང་དུ་བོད་ལུགས་ཐོག་ནས་ནང་པའི་སློབ་གཉེར་ཁང་དབུ་བརྙེས་པའི་མཛད་སྒོ་ཞིག་འཚོགས་རྒྱུ་ཡིན་པ་གསུངས་སོང་།