Tibetan Royal Year of 2151 | Year of the Wood Dragon

kalachakra

སོག་པོའི་དགེ་འདུན་པ་ཚོས་སོག་ཡུལ་དུ་བསྟན་པའི་ཞབས་འདེགས་བསྒྲུབ་རྒྱུའི་འགན་ཡོད་ཅེས་བཀའ་བསྩལ་བ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས༸སྐྱབས་མགོན་ཆེན་པོ་མཆོག་གིས་གནས་མཆོག་རྡོ་རྗེ་གདན་དུ་རྟེན་གཞི་བྱས་པའི་སོག་པོའི་དགོན་པ་གསར་པར་དབུ་འབྱེད་རབ་གནས་གནང་པ་དང་འབྲེལ། སོག་པོའི་དགེ་འདུན་པ་ཚོས་ནང་ཆོས་ལ་བསླབ་པ་སློབ་གཉེར་ཡག་པོ་གནང་ནས་རང་ཉིད་ཀྱི་ཕ་ཡུལ་དུ་བསྟན་པའི་ཞབས་འདེགས་བསྒྲུབ་རྒྱུའི་འགན་ཡོད་ཅེས་བསྩལ་སོང། དེ་རིང་ཟླ་ ༡ ཚེས་ ༩ ཉིན་སྔ་དྲོ་ཚོུད་ ༡༡ སྟེང་༸གོང་ས་༸སྐྱབས་མགོན་ཆེན་པོ་མཆོག་གིས་སོག་ཡུལ་དགའ་ལྡན་དགོན་པའི་མཁན་པོ་ཆོས་རྒྱ་མཚོ་མཆོག་གིས་དབུས་པའི་སོག་པོའི་སེར་སྐྱ་མང་ཚོགས་ཚོས་ཇི་ལྟར་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་བསྩལ་མཛད་ཐོག་སྔ་དྲོ་དུས་དབང་གི་སྒྲུབ་བཤག་ལེགས་གྲུབ་གནང་རྗེས་གནས་མཆོག་རྡོ་རྗེ་གདན་གྱི་ཉེ་འདབས་སུ་ཉེ་ཆར་གསར་བཞེངས་ལེགས་གྲུབ་ཟིན་པའི་སོག་ཡུལ་དགའ་ལྡན་ཐེག་ཆེན་དགོན་པའི་ཡན་ལག་པ་ཐཱ་ཚ་གྭང་ལྷ་ཁང་ལ་ཆིབས་བསྒྱུར་མཛད་སྟེ་དབུ་འབྱེད་རབ་གནས་བཀྲིན་བསྐྱངས་ཡོད་པ་རེད། ༸གོང་ས་མཆོག་གིས་སྐབས་དེར་སོག་པོ་དང་བོད་གབར་གྱི་འབྲེལ་ལམ་དེ་ནི་ཚོང་གི་འབྲེལ་ལམ་ལྟ་བུ་ཞིག་མ་ཡིན་པར་༸གོང་ས་༸སྐུ་ཕྲེང་བཞི་པ་ཡོན་ཏན་རྒྱ་མཚོ་མཆོག་སོག་ཡུལ་དུ་སྐུ་འཁྲུངས་པ་དང་ཁོང་ལ་ཏཱ་ལའི་བླ་མ་ཞེས་མཚན་ཐོབ་པ་སོགས་གསུངས་ཏེ་བོད་སོག་གཉིས་ཀྱི་དབར་ད་བར་ཆོས་ཕྱོགས་ཀྱི་དད་པ་དམ་ཚིག་གི་ཐོག་ནས་འབྲེལ་ལམ་དམིགས་བསལ་ཞིག་ཆགས་ཡོད་སྐོར་སོགས་བཀའ་བསྩལ་གནང་པ་མ་ཟད། ལྷག་པར་དུ་དེ་སྔའི་ལོ་རྒྱུས་ཁྲོད་བོད་ཀྱི་གདན་ས་ཁག་ནས་སོག་པོའི་མཁས་དབང་དང་དགེ་བཤེས་མང་པོ་ཞིག་ཐོན་ཐུབ་པ་བྱུང་ཡོད་པ་ལུང་འདྲེན་མཛད་པ་དང་སྦྲགས་ཏེ་ད་ལྟ་བཙན་བྱོལ་ནང་དུའང་གདན་ས་ཁག་ལ་ཡོད་པའི་སོག་པོའི་དགེ་འདུན་པ་ཚོས་ནང་ཆོས་ལ་སློབ་གཉེར་ཧུར་ཐག་གནང་དགོས་པ་དང་། རང་ཉིད་སོ་སོའི་ཕ་ཡུལ་དུ་ཕྱིར་ལོག་གནང་རྗེས་བསྟན་པའི་ཞབས་འདེགས་བསྒྲུབ་རྒྱུའི་འགན་ཡོད་ཅེས་བཀའ་བསྩལ་ཡོད་པ་རེད།  ༸གང་ཉིད་མཆོག་གིས་ད་ལན་གནས་མཆོག་རྡོ་རྗེ་གདན་དུ་སོག་པའི་དགོན་པ་གསར་བཞེངས་བྱུང་བར་བསྔགས་བརྗོད་མཛད་པ་དང་འབྲེལ། སངས་རྒྱས་པོའི་བསྟན་པ་འཛིན་སྐྱོང་སྤེལ་གསུམ་གནང་རྒྱུར་གཙ་བོ་ལུང་རྟོགས་གཉིས་ཀྱི་བསྟན་པ་ལ་ཐུག་ཡོད་པ་ལས། ལམ་དང་ལུགས་སྲོལ་ལྟ་བུར་ཕྱིན་ཚེ་སངས་རྒྱས་པའི་བསྟན་པ་བརྟན་པོ་ཡོང་གི་མ་རེད་ཅེས་བཀའ་ནན་མཛད་སོང། རྩ་བའི་༸གོང་ས་༸སྐྱབས་མགོན་ཆེན་པོ་གིས་དབུ་འབྱེད་རབ་གནས་པའི་སོག་པོའི་དགོན་པ་དེ་རྒྱ་གར་གྱི་གནས་མཆོག་རྡོ་རྗེ་གདན་དུ་སོག་པོའི་ནང་པའི་དགོན་པ་ཐོག་མ་དེ་ཆགས་ཡོད་པ་དང་འདི་བཞིན་དགོན་པ་དེ་གཙོ་བོ་སོག་ཡུལ་དགའ་ལྡན་དགོན་པའི་མཁན་པོ་ཆོས་རྒྱ་མཚོ་མཆོག་གིས་ཐུགས་འགན་གཙོ་བཞེས་འོག་ཕྱག་བཏབ་པ་ཞིག་ཡིན་པ་རེད་འདུག དགོན་པ་དེའི་གཤམ་འོག་ཏུ་སོག་ཡུལ་གྱི་ནང་པའི་དགོན་པ་ཁག་དང་སོག་པོའི་རིག་གཞུང་དང་འབྲེལ་བའི་པར་རིས་ཁག་ཅིག་འགྲེམས་སྟོན་ཡང་གོ་སྒྲིག་ཞུས་འདུག ཤེས་རྟོགས་བྱུང་བར་གཞིགས་ཚེ་ད་ལྟའི་ཆར་བྱེས་ཀྱི་གདན་ས་སེ་འབྲས་གཉིས་སུ་སོག་པོའི་དགེ་འདུན་པ་སློབ་གཉེར་གནང་མཁན་ ༧༨༠ ཡོད་པ་དང་། ཐེངས་འདིའི་དུས་འཁོར་དབང་ཆེན་ཐོག་སོག་ཡུལ་ནས་ནང་པའི་དད་ལྡན་ཆོས་ཞུ་བ་ཁྱོན་ ༢༠༠༠ ལྷག་ཆེད་བཅར་གནང་འདུག

༸གོང་ས་མཆོག་གིས་རིས་མེད་ཆོས་ལུགས་ཕན་ཚུན་དབར་ཐུགས་མཐུན་ཁྲིམས་གཙང་དགོས་གལ་ཡིན་པར་ལམ་སྟོན་བསྩལ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དུས་དབང་ཐེངས་ ༣༤ པའི་ཐོག་སྔོན་འགྲོའི་བཀའ་ཆོས་ལེགས་གྲུབ་མཛད་ཡོད་པ་དང་། དེ་རིང་སྔོན་འགྲོའི་ཆོས་འབྲེལ་ཉིན་མཐའ་མའི་སྐབས་རྒྱལ་སྲས་ཆེན་པོ་ཞི་བ་ལྷས་མཛད་པའི་བྱང་ཆུབ་སེམས་པའི་སྤྱོད་པ་ལ་འཇུག་པ་དང་། སློབ་དཔོན་ཀ་མ་ལ་ཤཱི་ལས་མཛད་པའི་བསྒོམ་རིམ་བར་པའི་ཆོས་འབྲེལ་ཡོངས་སུ་ལེགས་གྲུབ་དང་བསྟུན། མགོན་པོ་༸གང་ཉིད་མཆོག་གིས་རིང་མིན་གནས་མཆོག་རྡོ་རྗེ་གདན་དུ་འཚོགས་འཆར་ཡོད་པའི་རིས་མེད་ཆོས་ལུགས་ཀྱི་ཚོགས་འདུ་དེར་འཚམས་འདྲི་གནང་པ་དང་སྦྲགས།  ཆོས་ལུགས་ཕན་ཚུན་དབར་དམ་ཚིག་ཐུགས་མཐུན་ཁྲིམས་གཙང་དགོས་རྒྱུ་གལ་ཆེན་པོ་ཡིན་པ་དང་། དེའང་རྒྱུན་ལྡན་ནས་ཆོས་ལུགས་ཕན་ཚུན་བར་ལ་ད་ལྟ་གནས་མཆོག་རྡོ་རྗེ་གདན་དུ་ཚོགས་རྒྱུའི་ཚོགས་འདུ་དེ་ལྟ་བུ་མང་ཙམ་ཚོགས་ཐུབ་པ་ཡིན་ན། ཕན་ཚུན་བར་ངོ་ཤེས་པ་དང་དེའི་བརྒྱུད་ནས་སེམས་ཐག་ཉེ་པོ་ཡོང་གི་རེད། ལྷག་པར་དུ་ས་དགེ་བཀའ་རྙིང་སོགས་ཀྱི་ཆོས་ལུགས་ཚང་མས་སྔོན་གྱི་མཁས་པ་ཚོས་མཛད་པའི་གཞུང་དེ་དག་ལ་དོ་སྣང་བྱེད་དགོས་པ་དང་། ས་དགེ་བཀའ་རྙིང་ཇོ་ནང་དང་བཅས་པ་ཆོས་བརྒྱུད་ཚང་མ་བཅོམ་ལྡན་འདས་དང་དཔལ་ནཱ་ལེནྡྲའི་ཆོས་བརྒྱུད་འཛིན་མཁན་གཅིག་མཚུངས་ཡིན་སྟབས་ཆོས་བརྒྱུད་ཕན་ཚུན་ཚང་མས་ཆོས་ལུགས་སོ་སོའི་མཁས་པ་ཚོས་མཛད་པའི་གཞུང་ཚང་མར་དོ་སྣང་གནང་དགོས་གལ་ཡིན་པར་ལམ་སྟོན་སོགས་བཀྲིན་བསྩལ་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་དེ་བཞིན་སྔོན་འགྲོའི་ཆོས་འབྲེལ་ཁག་ལེགས་པར་གྲུབ་པ་དང་བསྟུན། ཆོས་ཞུ་བ་ཚོས་རྒྱུན་དུ་ཆོས་སེམས་ནས་བྱེད་དགོས་པ་དང་མཆུ་ཏོ་གཅིག་པོར་ལས་ཀ་བསྐུལ་ཏེ་གཟུངས་སྔགས་བགྲངས་བསྡད་པ་ལས་དེ་རེས་སྔོན་འགྲོའི་གསུང་ཆོས་སུ་བསྩལ་བའི་སྤྱོད་འཇུག་ལྟ་བུའི་གཞུང་དེ་ཚོར་དོ་སྣང་ཐུབ་ན་ཁེ་ཕན་ཆེ་བའི་ལམ་སྟོན་སོགས་རྒྱ་ཆེ་མཛད་ཡོད་པ་རེད། ད་རེས་ཀྱི་དུས་འཁོར་དབང་ཆེན་ཐེངས་ ༣༤ པ་འདིའིསྔོན་འགྲོའི་ཆོས་འབྲེལ་ཁག་དེ་རིང་ལེགས་པར་གྲུབ་ཡོད་ཀྱང་། སང་ཚེས་ ༩ ཉིན་མཆོད་གར་དང་ཚེས་ ༡༠ ཉིན་བཀའ་དབང་སྔོན་འགྲོ་སློབ་མ་སྟ་གོན། དེ་རྗེས་དབང་དངོས་དཀྱིལ་འཁོར་དུ་ཞུགས་པ་དང་ཞུགས་ནས་དབང་བསྐུར་བ། དེ་བཞིན་དབང་གོང་མ་དང་གོང་ཆེན་བཞི་བཅས་རིམ་པས་བཀྲིན་བསྩལ་རྒྱུ་མ་ཟད། ༸གང་ཉིད་མཆོག་གིས་ད་རེས་ཀྱི་དུས་དབང་འདིའི་ཆོས་འབྲེལ་གྱི་མཐའ་མར་སྤྱན་རས་གཟིགས་ངན་སོང་ཀུན་གྲོལ་གྱི་རྗེས་གནང་བཀྲིན་བསྩལ་གནང་གི་ཡོད་པ་རེད།

༸གོང་ས་མཆོག་གིས་བོད་དང་རྒྱ་ནག་ནང་གི་ནང་པ་རྣམས་ནམ་ཡང་བརྗེད་ཀྱི་མ་རེད་ཅེས་བཀའ་བསྩལ་བ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་དང་རྒྱ་ནག་ནང་གི་ནང་པ་རྣམས་ནམ་ཡང་བརྗེད་རྒྱུ་མིན་པ་དང་། རྒྱ་ནག་གི་རྣམ་འགྱུར་ལ་དུས་ནམ་ཞིག་འགྱུར་བ་འགྲོ་ཚེ་མགོན་པོ་༸གང་ཉིད་མཆོག་བོད་དང་རྒྱ་ནག་ནང་ཕེབས་རྒྱུར་གྲ་སྒྲིག་ཨང་སར་ཡིན་ཅེས་བཀའ་བསྩལ་སོང་། དེ་རིང་ཟླ་ ༡ ཚེས་ ༨ ཉིན་གནས་མཆོག་རྡོ་རྗེ་གདན་དུ་སྔོན་འགྲོའི་ཆོས་འབྲེལ་ཉིན་མཐའ་མའི་ཆོས་ཐུན་དབུ་འཛུགས་མ་གནང་གོང་ལ་ཧོང་ཀོང་དང་མ་ཀའོ་གཙོས་པའི་རྒྱ་ནག་སྐམ་ས་ཆེན་པོ་ནས་བཅར་བའི་དད་ལྡན་ཆོས་ཞུ་བ་ཁག་ཅིག་ལ་དམིགས་བསལ་བཀའ་སློབ་བསྩལ་ཡོད་པ་རེད། སྐབས་དེར་༸གང་ཉིད་མཆོག་གིས་རྒྱ་རིགས་ཆོས་ཞུ་བ་དེ་དག་ལ་བླ་མ་དང་སློབ་མའི་དབར་གྱི་དམ་ཚིག་སྐོར་བཀའ་བསྩལ་ཡོད་པ་རེད། ཁྱེད་ཚོར་ཧ་ཅང་དཀའ་ལས་ཡོད་ཀྱང་ཨུ་ཚུགས་བརྒྱབ་སྟེ་འདི་གར་ཆེད་མངགས་ཡོང་བར་བརྟེན་དམིགས་བསལ་གྱི་འཚམས་འདྲི་ཡོད་ཅེས་བཀའ་གནང་པ་དང་སྦྲགས།  གལ་ཏེ་རྒྱ་ནག་གཞུང་གིས་ཁྱེད་ཚོ་ཕར་ལོག་དགོས་པའི་སྡིག་ར་དང་བསུན་གཙེར་ཤུགས་ཆེ་བཟོ་བཞིན་ཡོད་ན་ཁྱེད་ཚོ་ཕར་ལོག་ན་འགྲིག་གི་རེད་ཅེས་ལམ་སྟོན་མཛད་པ་མ་ཟད། ལྷག་དོན་དུས་འཁོར་དབང་ཆེན་དངོས་གཞིའི་སྐབས་ངས་ཁྱེད་རང་ཚོ་དབང་གི་དམིགས་འོག་ཏུ་བཅུག་ནས་སྨོན་ལམ་རྒྱག་གི་ཡིན་ཅེས་བཀའ་བསྩལ་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་ད་དུང་ཆོས་ཞུ་བ་ཚོའི་ངོས་ནས་ཆོས་དད་ལ་དད་པ་གཅིག་པོ་ཙམ་མ་ཡིན་པར་ཕྱག་དཔེ་ཁག་ཉིན་རེའི་མི་ཚེའི་ནང་བལྟ་ཀློག་ཐུབ་པ་ཞིག་དང་ལྷག་པར་དུ་ཕྱག་དཔེ་དེ་དག་ནང་བཀའ་འགྲེལ་གང་གནང་པ་དེ་དག་ཐོག་ལ་ཡང་ཡང་བསམ་བློ་གཏོང་དགོས་པ་དང་དེ་བཞིན་ཆོས་གྲོགས་ཕན་ཚུན་དབར་བགྲོ་གླེང་གནང་བའི་བརྒྱུད་སོ་སོའི་སེམས་ལ་འགྱུར་བ་ཞིག་ཐེབས་ཐབས་གནང་དགོས་གལ་ཡིན་པར་ལམ་སྟོན་མཛད་ཡོད། ༸གང་ཉིད་མཆོག་གིས་རྒྱ་ནག་སྐམ་ས་ཆེན་པོ་ནང་གི་ནང་པ་ཚོ་དུས་ནམ་ཡང་བརྗེད་ཐབས་མེད་སྐོར་བཀའ་སྩལ་བ་དང་འབྲེལ་ཏེ་རྒྱ་གཞུང་གི་རྣམ་འགྱུར་ལ་དུས་ནམ་ཞིག་འགྱུར་བ་འགྲོ་ཚེ་ ༸གང་ཉིད་མཆོག་བོད་དང་རྒྱ་ནག་སྐམ་ས་ཆེན་པོ་གཉིས་ནང་ཕེབས་རྒྱུར་གྲ་སྒྲིག་ཨང་སར་ཡིན་ཅེས་བཀའ་བསྩལ་མཛད་ཡོད་པ་རེད། རྩ་བའི་ཐེངས་འདིའི་དུས་འཁོར་དབང་ཆེན་ཐོག་རྒྱ་ནག་སྐམ་ས་ཆེན་པོ་གཙོས་པའི་ཧོང་ཀོང་དང་ཐེ་ཝན་སོགས་ཀྱི་རྒྱ་རིགས་ ༩༠༠ ལྷག་ཙམ་ཆེད་བཅར་ཞུས་འདུག

དུས་འཁོར་དབང་ཆེན་ཞུ་བར་བཀག་སྡོམ་བྱེད་མེད་ཅེས་བརྗོད་པ་དེ་ཁུངས་ལུང་མེད་པའི་ཧམ་བཤད་རེད།

བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་རྒྱ་ནག་གཞུང་ནས་བོད་མི་ཚོ་དུས་འཁོར་དབང་ཆེན་ཞུ་བར་བཀག་སྡོམ་བྱེད་མེད་ཅེས་བརྗོད་པ་དེ་ཁུངས་ལུང་མེད་པའི་ཧམ་བཤད་རང་རེད་ཅེས་གསུངས་ཡོད་པ་རེད། དེ་རིང་ཟླ་ ༡ ཚེས་ ༨ ཉིན་སྔ་དྲོ་ཚོུད་ ༡༡། ༠༠ ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་དུས་དབང་གོ་སྒྲིག་ཚོགས་ཆུང་གི་ཚོགས་གཞོན་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་བཅས་རྣམ་གཉིས་དབུ་བཞུགས་ཀྱིས་བོད་མིའི་སྒྲིག་འཛུགས་ཀྱི་ངོས་ནས་ཐེངས་འདིའི་དུས་དབང་གོ་སྒྲིག་ཞུས་པའི་དགོས་དམིགས་དང་། ད་བར་དུས་དབང་སྤྱི་ཡོངས་ཀྱི་ལས་དོན་སོགས་དང་འབྲེལ་བའི་གསར་འགོད་ལྷན་ཚོགས་ཤིག་བསྐོང་ཚོགས་གནང་སོང་། སྐབས་དེར་སྲིད་སྐྱོང་མཆོག་གིས་གསར་འགོད་པའི་དྲི་བར་བཀའ་ལན་གནང་པར་ཉེ་ཆར་རྒྱ་ནག་གཞུང་གིས་ཕྱིར་བསྐྱོད་ལག་འཁྱེར་ཡོད་མཁན་བོད་མི་ཚོ་དུས་འཁོར་དབང་ཆེན་ཞུ་བར་བཀག་སྡོམ་བྱེད་མེད་ཅེས་བརྗོད་བཞིིན་པ་དེ་ནི་ཁུངས་ལུང་མེད་པའི་ཧམ་བཤད་རང་རེད་ཅེས་གསུངས་པ་མ་ཟད། ད་ལྟའི་ཆར་བོད་མི་སྟོང་ཕྲག་མང་པོ་ཞིག་འདིར་གནས་མཇལ་དུ་འབྱོར་ཡོད་ཀྱང་། རྒྱ་ནག་གཞུང་གི་གནོན་ཤུགས་རྐྱེན་པས་གློ་བུར་དུ་བོད་ལ་ཕྱིར་ལོག་གནང་དགོས་བྱུང་ཡོད་པ་བཅས་བོད་མིའི་སྒྲིག་འཛུགས་ལ་བདེན་དཔང་ར་སྤྲོད་བྱེད་རྒྱུ་ཡོད་སྟབས། རྒྱ་ནག་གཞུང་གིས་སྐྱོན་བརྗོད་བྱེད་བཞིན་པ་དེར་ངོས་ལེན་ཞུ་ཐབས་རྩ་བ་མེད་ཅེས་གསུངས་པ་དང་སྦྲགས། ལྷག་དོན་རྒྱ་ནག་གཞུང་གི་བྱ་སྤྱོད་དེས་རྒྱལ་སྤྱིའི་འགྲོ་བ་མིའི་ཐོབ་ཐང་དང་རྒྱ་ནག་གི་རྩ་ཁྲིམས་དང་ཡོངས་སུ་འགལ་བ་མངོན་གསལ་ཆགས་ཀྱི་ཡོད་ཅེས་གསུངས་ཡོད། དེ་བཞིན་སྲིད་སྐྱོང་མཆོག་གིས་ད་ལྟའི་ཆར་བོད་ནང་གི་བོད་མི་བརྒྱ་ཆ་ ༩༠ ལ་ཕྱིར་བསྐྱོད་ལག་འཁྱེར་མེད་པ་རེད་ཅེས་གསུངས་སོང་། རྩ་བའི་ཟླ་བ་འདིའི་ཕྱི་ཚེས་ ༥ ཉིན་རྒྱ་ནག་ཆབ་སྲིད་གྲོས་ཚོགས་ཀྱི་མི་རིགས་དང་ཆོས་རིག་ལྷན་ཁང་གི་འགན་འཛིན་ཀྲུ་ཝན་ཇན་གྱིས་བོད་མིའི་སྒྲིག་འཛུགས་ནས་བོད་ནས་ཡོང་མཁན་བོད་མི་མང་པོ་ཞིག་དུས་དབང་ཞུ་མ་ཐུབ་པར་ཕྱིར་ལོག་གནང་དགོས་བྱུང་བའི་གནས་ཚུལ་དེ་དྲང་བདེན་རྩ་བ་ནས་མིན་པ་མ་ཟད། རྒྱ་གཞུང་གི་ངོས་ནས་བོད་མིར་དུས་བཀག་ཚོད་འཛིན་འོག་བོད་ལ་ཕྱིར་ལོག་དགོས་པའི་ཉེན་བརྡ་བཏང་བ་སོགས་སྐྱོན་བརྗོད་བྱས་ཡོད་པ་རེད། འོན་ཀྱང་འདི་ག་རླུང་འཕྲིན་ཁང་ལ་སྐབས་དེར་བོད་མིའི་སྒྲིག་འཛུགས་ཀྱི་དུས་དབང་གོ་སྒྲིག་ཚོགས་ཆུང་གི་ཚོགས་གཙོ་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་གིས་གལ་ཏེ་རྒྱ་ནག་དབུས་གཞུང་གིས་བོད་མིར་བཀག་སྡོམ་བྱས་མེད་བརྗོད་ཀྱི་ཡོད་ན། བོད་ནས་ཕེབས་པའི་བོད་མི་མང་དག་ཞིག་ཐེངས་འདིའི་དུས་དབང་ཞུ་མ་ཐུབ་པའི་དོན་གནད་གང་ཡིན་བོད་རང་སྐྱོང་ལྗོངས་ཟེར་བ་གཙོས་པའི་བོད་མིའི་ས་གནས་ཁག་གི་ས་གནས་དཔོན་རིགས་སོ་སོར་འདྲི་བརྩད་ཀྱིས་རྒྱུ་རྐྱེན་རྩད་གཅོད་བྱེད་དགོས་ཀྱི་རེད་ཅེས་ནན་བརྗོད་གནང་ཡོད། དེ་རིང་གི་གསར་འགོད་ལྷན་ཚོགས་དེའི་ཐོག་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་ངོས་ནས་ཐེངས་འདིའི་དུས་འཁོར་དབང་ཆེན་གོ་སྒྲིག་ཞུ་དགོས་པའི་དམིགས་ཡུལ་གཙོ་བ་ནི། འཛམ་གླིང་སྤྱི་ལ་ཞི་བདེ་ཡོང་ཐབས་དང་བོད་མིའི་སྤྱི་མཐུན་བསོད་ནམས་གསོག་སྒྲུབ་གནང་པའི་བརྒྱུད་བོད་དོན་འཐབ་རྩོད་ཀྱི་ནུས་པ་ཇི་ཆེ་ཡོང་བར་ཆེད་དམིགས་གནང་པ་ཞིག་ཡིན་ཅེས་སོགས་འགྲེལ་བརྗོད་གནང་ཡོད་པ་རེད། གཞན་ཡང་སྲིད་སྐྱོང་མཆོག་གིས་བོད་མི་ཚོའི་རྒྱུད་ལ་ནང་པ་སངས་རྒྱས་པའི་རིག་གཞུང་བཟང་པོ་དེ་དང་། ལྷག་པར་དུ་༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་བཟང་པོའི་འོག་ད་ལྟའི་ཆར་འཛམ་གླིང་འདིའི་ཁྲོད་ཡོད་པའི་བཙན་བྱོལ་བ་འདྲ་འདྲའི་ནང་ནས་མ་འདྲ་བ་ཞིག་དང་ཚགས་ཚུད་ཤོས་ཤིག་ཆགས་ཡོད་སྐོར་སོགས་གསུངས་སོང་། སྲིད་སྐྱོང་མཆོག་གིས་བོད་མིར་ཡོད་བསྡད་པའི་ནང་པ་སངས་རྒྱས་པའི་ཆོས་དང་འབྲེལ་བའི་རིག་གཞུང་འདིར་མ་འོངས་པའི་བོད་མིའི་འཐབ་རྩོད་ལ་མདུན་ལམ་དང་རེ་བ་ཆེན་པོ་ཡོད་པ་གསུངས་པ་དང་ཆབས་ཅིག ད་བར་ལོ་ངོ་ ༡༠༠ མན་ཙམ་ཕྱིན་པའི་དམར་ཤོག་རིང་ལུགས་དང་འདི་བཞིན་ལོ་ངོ་ ༢༥༠༠ ལྷག་ཙམ་ཕྱིན་པ་ནང་པ་སངས་རྒྱས་པའི་ཆོས་གཉིས་དབར་རྩ་བ་ནས་བསྡུར་ཐབས་མེད་ཅེས་གསུངས་པ་དང་འབྲེལ་ཏེ་ང་ཚོར་མ་འོངས་པར་རེ་བ་ཆེན་པོ་ཡོད་པ་དང་གཏན་གཏན་རྒྱལ་ཁ་ཐོབ་ཀྱི་རེད་ཅེས་སོགས་གསུངས་ཡོད་པ་རེད།

བོད་མི་རྣམས་དུས་དབང་ཞུ་མ་ཐུབ་པར་ཕྱིར་ལོག་གནང་དོན་གང་ཡིན་རྩད་གཅོད་བྱེད་དགོས་ཀྱི་རེད་ཅེས་གསུངས་པ།

བོད་མིའི་སྒྲིག་འཛུགས་ཀྱིས་རྒྱ་གཞུང་གིས་ཆེས་དམ་བསྒྲགས་འོག་ཐེངས་འདིར་བོད་ནས་ཕེབས་མཁན་བོད་མི་མང་པོ་ཞིག་དུས་དབང་ཞུ་མ་ཐུབ་པར་ཕྱིར་ལོག་གནང་དགོས་བྱུང་བའི་གནས་ཚུལ་དངོས་ཡིན་པའི་དཔང་རྟགས་ཡོད་སྐོར་གསུངས་པ་དང་སྦྲགས། གལ་ཏེ་རྒྱ་ནག་དབུས་གཞུང་གིས་བོད་མིར་བཀག་སྡོམ་བྱས་མེད་བརྗོད་ཀྱི་ཡོད་ན། བོད་ནས་ཕེབས་པའི་བོད་མི་མང་དག་ཞིག་ཐེངས་འདིའི་དུས་དབང་ཞུ་མ་ཐུབ་པའི་དོན་གནད་གང་ཡིན་བོད་རང་སྐྱོང་ལྗོངས་ཟེར་བ་གཙོས་པའི་བོད་མིའི་ས་གནས་ཁག་གི་ས་གནས་དཔོན་རིགས་སོ་སོར་འདྲི་བརྩད་ཀྱིས་རྒྱུ་རྐྱེན་རྩད་གཅོད་བྱེད་དགོས་ཀྱི་རེད་ཅེས་ནན་བརྗོད་གནང་སོང་། དེ་ཡང་རྒྱ་ནག་ཆབ་སྲིད་གྲོས་ཚོགས་ཀྱི་མི་རིགས་དང་ཆོས་རིག་ལྷན་ཁང་གི་འགན་འཛིན་ཀྲུ་ཝན་ཇན་གྱིས་ཁ་སང་རྒྱ་ནག་གཞུང་གི་ Global Times བརྒྱུད་ལམ་ཐོག་འགྲེལ་བརྗོད་བྱས་པར་གཞིགས་ན། ད་རེས་བོད་མིའི་སྒྲིག་འཛུགས་ཀྱིས་གནས་མཆོག་རྡོ་རྗེ་གདན་དུ་གོ་སྒྲིག་ཞུས་པའི་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༤ པ་དེ་ཆབ་སྲིད་ཀྱི་ལག་ཆ་ལྟ་བུར་སྤྱོད་ནས་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་གི་བརྒྱུད་ནས་རྒྱལ་སྤྱིའི་མང་ཚོགས་ཁྲོད་རྒྱ་ནག་གཞུང་ལ་སྡང་སེམས་ཀྱི་བློ་ཤུགས་ཆེ་རུ་གཏོང་བཞིན་ཡོད་པ་དང་། ཁྱད་པར་དུ་བོད་མིའི་སྒྲིག་འཛུགས་ཟེར་བའི་དུས་དབང་གོ་སྒྲིག་ཚོགས་ཆུང་གི་ཚོགས་གཙོས་བརྗོད་པར་རྒྱ་ནག་གཞུང་གི་དམ་བསྒྲགས་འོག་ཐེངས་འདིར་བོད་ནས་ཕེབས་མཁན་བོད་མི་མང་པོ་ཞིག་དུས་དབང་ཞུ་མ་ཐུབ་པར་ཕྱིར་ལོག་གནང་དགོས་བྱུང་བའི་གནས་ཚུལ་དེ་དྲང་བདེན་རྩ་བ་ནས་མིན་པ་མ་ཟད། རྒྱ་གཞུང་གི་ངོས་ནས་བོད་མིར་དུས་བཀག་ཚོད་འཛིན་འོག་བོད་ལ་ཕྱིར་ལོག་དགོས་པའི་ཉེན་བརྡ་བཏང་འདུག་ཅེས་བཤང་དོན་ལྟར་དེ་འདྲ་གང་ཡང་བཏང་མེད་ལ། ཁོང་རྣམ་པར་དུས་དབང་ལ་བཅར་དགོས་པའི་བརྒྱུད་སྐུལ་ལ་སོགས་པ་ཡང་གང་ཡང་བྱེད་མེད་ཅེས་བརྗོད་འདུག དེ་བཞིན་ཀྲུ་ཝན་ཇན་གྱིས་བོད་མིའི་སྒྲིག་འཛུགས་ཟེར་བ་དེས་དུས་དབང་ཆེད་ཡུན་རིང་ནས་གོ་སྒྲིག་བྱེད་པ་ཡོངས་རྫོགས་ཐད་ཀར་ཆབ་སྲིད་དང་འབྲེལ་བ་ཆགས་ཀྱི་ཡོད་པ་དང་། དུས་དབང་ཁ་ལ་འཁྱེར་ནས་བོད་ནས་ཕེབས་མཁན་བོད་མི་རྣམས་དང་འབྲེལ་བ་དམ་ཟབ་ཡོང་རྒྱུར་དམིགས་བཞིན་ཡོད་པ་རེད། རྒྱ་གཞུང་གིས་བོད་ནང་གི་བོད་མི་ཚོར་བཙན་བྱོལ་ནང་ལ་གོ་སྒྲིག་ཞུ་སྲོལ་ཡོད་པའི་དུས་དབང་ལ་སོགས་པའི་ཆོས་ཕྱོགས་ཀྱི་བྱེད་སྒོ་ཁག་ཁ་བྲལ་རིང་ལུགས་པ་ཡིན་ཚུལ་གྱི་གསལ་བཤད་བྱེད་རྐྱེན་འདས་པའི་ལོ་ཤས་རིང་བོད་མིའི་ཆོས་ཕྱོགས་ཀྱི་བྱེད་སྒོ་ཁག་ཏུ་བོད་ནས་ཕེབས་མཁན་ལོ་རེ་བཞིན་ཇེ་ཉུང་དུ་འགྲོ་བཞིན་ཡོད་ཚུལ་བརྗོད་འདུག འོན་ཀྱང་བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་དང་དུས་དབང་གོ་སྒྲིག་ཚོགས་ཆུང་གི་ཚོགས་གཙོ་གཡུ་ཐོག་ཀརྨ་དགེ་ལེགས་མཆོག་གིས་འདི་ག་རླུང་འཕྲིན་ཁང་ལ་རྒྱ་ནག་གཞུང་གི་བྱེད་སྟངས་དེ་ནི་རྒྱུན་ལྡན་གྱི་བྱ་སྤྱོད་ཞིག་ཡིན་པ་ལས། དེར་བདེན་པའི་ཕྲན་བུ་ཙམ་ཡང་མེད་སྐོར་ལན་འདེབས་གནང་པ་དང་སྦྲགས། རྒྱ་གཞུང་གིས་རྒྱལ་སྤྱིའི་ཁྲོད་བོད་དེ་རྒྱ་ནག་མི་དམངས་སྤྱི་མཐུན་རྒྱལ་ཁབ་ནང་ཚུད་ཀྱི་ཡོད་པ་དང་དེར་ཆོས་དད་རང་དབང་ཆ་ཚང་སྤྲོད་ཡོད་ཚུལ་ཡོངས་བསྒྲགས་བྱས་ཀྱང་།བོད་མིའི་ཆོས་དང་རིག་གཞུང་དར་སྤེལ་གཏོང་རྒྱུ་མཚོན་ཆོས་ཕྱོགས་ཀྱི་གནང་སྒོ་ཁག་གི་ཐོག་ལ་ཚོད་འཛིན་བྱེད་བཞིན་པར་བློ་ཕམ་ཆེན་པོ་དང་དེ་ཡ་མཚན་དགོས་པ་ཞིག་རེད་བཅས་གསུངས་སོང་། ད་དུང་ཆོས་རིག་བཀའ་བློན་མཆོག་གིས་དུས་དབང་གོ་སྒྲིག་ཚོགས་ཆུང་ལ་ཐེངས་འདིར་བོད་ནས་ཕེབས་མཁན་བོད་མི་མང་པོ་ཞིག་རྒྱ་གཞུང་གིས་དམ་བསྒྲགས་འོག་དུས་དབང་ཞུ་མ་ཐུབ་པར་ཕྱིར་ལོག་གནང་དགོས་བྱུང་བའི་དཔང་རྟགས་རག་སོན་བྱུང་ཡོད་སྐོར་གསུངས་པ་མ་ཟད། གལ་ཏེ་རྒྱ་ནག་གཞུང་ནས་བོད་ནས་ཕེབས་མཁན་བོད་མི་རྣམས་ལ་དམ་བསྒྲགས་བྱས་མེད་ཅེས་བརྗོད་ཀྱི་ཡོད་ཚེ། རྒྱ་ནག་དབུས་གཞུང་ནས་གནད་དོན་དེའི་ཐད་བོད་རང་སྐྱོང་ལྗོངས་ཟེར་བ་གཙོས་པའི་བོད་མི་གནས་སྡོད་རང་སྐྱོང་ས་གནས་ཁག་གི་དཔོན་རིགས་དང་ལྷན་འདྲི་བརྩད་ཀྱིས་རྒྱུ་རྐྱེན་རྩད་གཅོད་བྱེད་དགོས་ཀྱི་རེད་ཅེས་ནན་བརྗོད་གནང་པ་དང་སྦྲགས། རྒྱ་གཞུང་གིས་ད་རེས་བོད་མིར་དུས་དབང་ཞུ་རྒྱུར་བཀག་སྡོམ་བྱས་པ་དེ་རྒྱ་ནག་དབུས་གཞུང་རང་གི་སྲིད་བྱུས་ཤིག་ཡིན་མིན་ལ་ཐེ་ཚོམ་ཡོད་པའི་བརྡ་ལན་གནང་ཡོད་པ་རེད། རྒྱ་ནག་གི་ global times གསར་ཤོག་ཐོག་སྤེལ་བའི་གནས་ཚུལ་དེའི་ནང་ཀྲུ་ཝེ་ཇན་གྱིས་བོད་ནང་གི་བོད་མི་ཚོར་དུས་དབང་ཆེད་བཅར་རྒྱུར་བཀག་སྡོམ་བྱས་མེད་སྐོར་བརྗོད་པ་མ་ཟད། དུས་དབང་ཐོག་རྒྱ་རིགས་ཕྱིར་བསྐྱོད་ལག་འཁྱེར་ཡོད་པ་གང་ཙམ་བཅར་ཐུབ་ཡོད་པ་ཚོ་ལའང་དམ་བསྒྲགས་བྱས་མེད་སྐོར་བརྗོད་ཡོད་པ་རེད། འོན་ཏང་ཆོས་རིག་བཀའ་བློན་མཆོག་གིས་ཐེངས་འདིའི་དུས་དབང་ཆེད་ནང་ཆོས་ལ་དོ་སྣང་ཡོད་པའི་རྒྱ་རིགས་གནད་ཡོད་ཁག་ཅིག་ནས་ཀྱང་བློ་ཕམ་ཆེན་པོའི་ཐོག་དུས་དབང་ལ་བཅར་རྒྱུ་ཕྱིར་འཐེན་གནང་ཡོད་སྐོར་གསུངས་ཡོད། རྩ་བའི་དུས་དབང་འདིའི་ཐོག་བོད་ནས་བོད་མི་མང་དག་ཞིག་རྒྱ་གར་ལ་ཕེབས་འབྱོར་བྱུང་ཡོད་ཀྱང་རྒྱ་གཞུང་གིས་དམ་བསྒྲགས་ཤུགས་ཆེ་བྱེད་པའི་འོག་བོད་མི་མང་པོ་ཞིག་ཕྱིར་ལོག་གནང་དགོས་བྱུང་སྟབས། ༸གོང་ས་༸སྐྱབས་མགོན་ཆེན་པོ་མཆོག་གིས་ཉེ་སྔོན་བོད་ནས་ཕེབས་པའི་བོད་མི་རྣམས་ལ་དམིགས་བསལ་གྱི་མཇལ་ཁ་དང་བཀའ་སློབ་རིམ་པ་བསྩལ་བའི་སྐབས། བོད་ཟླ་ ༡༡ ཚེས་ ༡༣ ནས་ ༡༥ བར་དུས་འཁོར་དབང་ཆེན་དངོས་གཞི་འཁེལ་གྱི་ཡོད་སྟབས། ཁྱེད་རང་ཚོས་བོད་ནས་ཚུར་སྨོན་ལམ་ཡག་པོ་བརྒྱབ། ཁྱེད་རང་ཚོ་དད་པ་གཡོ་བ་མེད་པ་ཞིག་ཡོད་པ་རེད། ངོས་ཀྱིས་ཁྱེད་རང་ཚོ་བོད་ནང་ལ་ཡོད་པའི་རྒྱ་ཆེ་མི་མང་གི་དད་པ་དང་དམ་ཚིག་གཡོ་བ་མེད་པ་ཡོད་པ་དེ་དག་དབང་གི་དམིགས་འོག་ཏུ་བཅུག་ནས་སྨོན་ལམ་རྒྱག་གི་ཡིན་ཅེས་བཀའ་བསྩལ་བ་མ་ཟད། རྒྱ་ནག་ནང་དུ་ཡོད་པའི་རྒྱ་རིགས་ནང་པ་དེ་དག་ལའང་དེ་མཚུངས་སུ་དབང་གི་དམིགས་འོག་ཏུ་བཅུག་ནས་ཐུགས་སྨོན་མཛད་རྒྱུ་ཡིན་ཅེས་བཀའ་གནང་ཡོད་པ་རེད།

བྱང་སེམས་དང་སྟོང་ཉིད་ཀྱི་ལྟ་བ་བསྒོམ་རྒྱུ་དེ་རང་དོན་གྲུབ་པའི་ཐབས་མཆོག་ཏུ་གྱུར་བ་ཡིན་པར་ལམ་སྟོན་བསྩལ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་སང་གནས་མཆོག་རྡོ་རྗེ་གདན་དུ་ཉིན་བཞིའི་སྔོན་འགྲོའི་ཆོས་འབྲེལ་དུ་སློབ་དཔོན་ཀ་མ་ལ་ཤྰི་ལས་མཛད་པའི་སྒོམ་རིམ་བར་པ་དང་རྒྱལ་སྲས་ཆེན་པོ་ཞི་བ་ལྷས་མཛད་པའི་སྤྱོད་འཇུག་ཆེན་མོ་གཉིས་ཀྱི་བཀའ་ཆོས་བཀྲིན་བསྐྱངས་གནང་ཡོད་པ་ལྟར། སྤྱོད་འཇུག་གི་ལེའུ་དང་པོ་བྱང་ཆུབ་སེམས་པའི་ཕན་ཡོན་སྐོར་གྱི་ཆོས་འབྲེལ་བཀྲིན་སྩལ་སྐབས་ཆོས་ཞུ་བ་ཚོས་བྱང་ཆུབ་ཀྱི་སེམས་པ་དང་སྟོང་ཉིད་ཀྱི་ལྟ་བ་བསྒོམ་པ་ཡིན་ན་སྐྱེ་བ་ཕྱི་མ་མི་ལུས་བཟང་པོ་ཞིག་ཐོབ་པར་༸གོང་ས་༸སྐྱབས་མགོན་ཆེན་པོ་མཆོག་གིས་བརྒྱ་ཆ་བརྒྱ་ཐུགས་ཐག་བཅད་ཐུབ་ཀྱི་ཡོད་ཅེས་བཀའ་གནང་པ་མ་ཟད། ལྷག་དོན་ཆོས་ཞུ་བའི་ཁོངས་ལོ་རྒན་འཆི་ཁའི་ཆོས་བྱེད་མཁན་ཚོས་གཟུངས་སྔགས་བགྲང་པ་དང་སངས་རྒྱས་ཆོས་ཚོགས་མ་ལྟ་བུའི་སྟེང་ནས་བྱང་ཆུབ་ཀྱི་སེམས་པ་དང་སྟོང་པ་ཉིད་ཀྱི་ལྟ་བ་བསྒོམ་པ་ཡིན་ཚེ། ཚེ་རབས་ནས་ཚེ་རབས་བར་བདེ་ཞིང་སྐྱིད་པ་ཡོང་རྒྱུར་ལམ་སྟོན་བསྩལ་ཏེ་དེ་ནི་རང་དོན་གྲུབ་པའི་ཐབས་ཤེས་མཆོག་ཏུ་གྱུར་བ་ཞིག་རེད་ཅེས་ལམ་སྟོན་རྒྱ་ཆེ་མཛད་ཡོད། ད་དུང་༸གོང་ས་མཆོག་གིས་ཆོས་ཞུ་བ་ཚོའི་ངོས་ནས་༸གང་ཉིད་མཆོག་གིས་ཉིན་རེའི་ཆོས་འབྲེལ་སྐབས་ཆོས་ཀྱི་འགྲེལ་བརྗོད་གང་གནང་པ་དེ་དག་སེམས་ནང་ཉར་ཐུབ་པ་ཞིག་དང་། ལྷག་པར་དུ་ཆོས་གྲོགས་ཕན་ཚུན་དབར་བགྲོ་གླེང་གནང་པའི་བརྒྱུད་སེམས་ལ་འགྱུར་བ་ཤིག་ཐེབས་ཐབས་གནང་དགོས་གལ་ཡིན་པའི་ལམ་བཀའ་བསྩལ་མཛད་ཡོད་པ་རེད། གཞི་རྩའི་༸གོང་ས་མཆོག་གིས་དེ་རིང་གི་ཆོས་འབྲེལ་སྐབས་ཁ་སང་སྤྱོད་འཇུག་གི་ལེའུ་དང་པོ་བྱང་ཆུབ་སེམས་པའི་ཕན་ཡོན་ཞེས་པ་ནས་བྱང་ཆུབ་སེམས་སྐྱེས་གྱུར་ན་སྐད་ཅིག་གིས། །  འཁོར་བའི་བཙོན་རར་བསྡམས་པའི་ཉམ་ཐག་རྣམས། །  བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང། །  འཇིག་རྟེན་ལྷ་མིར་བཅས་པས་ཕྱག་བྱར་འགྱུར། ཞེས་པའི་བར་མུ་མཐུད་ཆོས་འབྲེལ་མཛད་པ་དང་སྦྲགས། སངས་རྒྱས་པའི་ཆོས་བྱེད་མི་བྱེད་སོ་སོའི་རང་དབང་ཡིན་ཀྱང་། ཆོས་ལ་དད་པ་བྱས་ཚར་བའི་རྗེས་སུ་ཆོས་ཆོས་སུ་འགྲོ་བ་ཞིག་བྱེད་དགོས་པ་དང་། དེའང་ཚེ་འདི་ཕྱི་གཉིས་ཀྱི་བདེ་སྐྱིད་ཀྱི་རྒྱུ་དེ་རང་གི་སེམས་འདུལ་བར་བྱེད་རྒྱུ་དེ་རེད་ཅེས་ལམ་སྟོན་གནང་སོང་།  ༸གོང་ས་མཆོག་གིས་དེ་རིང་ཉིན་རྒྱབ་ཚོུད་ ༡༢།༠༠ ནས་དབུ་འཛུགས་ཀྱིས་ཚོུད་ ༣།༠༠ བར་སྤྱོད་འཇུག་ལེའུ་གཉིས་པ་སྡིག་བཤག་ནས་ལེའུ་ལྔ་པ་ཤེས་བཞིན་བསྲུང་བའི་བར་མུ་མཐུད་བཀའ་ཆོས་མཛད་ཡོད་པ་རེད།

རྒྱ་གར་ལ་ཡོད་པའི་ཆོས་བརྒྱུད་མཐུན་སྒྲིལ་དེ་འཛམ་གླིང་སྤྱི་ལ་མིག་དཔེ་སྟོན་ཐུབ་པ་ཞིག་དགོས།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་གནས་མཆོག་རྡོ་རྗེ་གདན་དུ་ཆོས་ལུགས་རིས་མེད་ཀྱི་མཛད་སྒོ་ཐོག་དབུ་ཞུགས་མཛད་ཡོད་པ་དང་། ༸གང་ཉིད་མཆོག་གིས་སྐབས་དེར་རྒྱ་གར་ནང་ལ་ཆོས་ལུགས་ཕན་ཚུན་མཐུན་སྒྲིལ་གྱི་གོམས་སྲོལ་བཟང་པོ་དེ་མུ་མཐུད་སྲ་བརྟན་གནང་ཐོག་འཛམ་གླིང་སྤྱི་ལ་མིག་དཔེ་སྟོན་ཐུབ་པ་ཞིག་དགོས་པའི་བཀའ་བསྩལ་སོང། དེའང་ཟླ་ ༡ ཚེས་ ༢ ཉིན་ནས་རྒྱ་གར་གྱི་གནས་མཆོག་རྡོ་རྗེ་གདན་དུ་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ནང་གི་དད་ལྡན་ཆོས་ཞུ་བ་ཚོར་དཔལ་དུས་ཀྱི་འཁོར་ལོའི་དབང་ཆེན་བཀྲིན་བསྩལ་བཞིན་ཡོད་པ་དང། དེ་རིང་ཉིན་རྒྱབ་ཀྱི་བཀའ་ཆོས་དངོས་སུ་དབུ་འཛུགས་མ་མཛད་གོང་ལ་མང་ཚོགས་ཁྲི་ཚོ་བརྒལ་བ་འདུ་འཛོམས་བྱུང་བའི་དུས་དབང་གི་གསུང་ཆོས་ར་བར་༸གོང་ས་མཆོག་དབུ་བཞུགས་ཐོག་འཛམ་གླིང་ནང་གི་ཆོས་ལུགས་འདྲ་མིན་གྱི་དབུ་ཁྲིད་བླ་ཆེན་ཁག་ཅིག་ལྷན་འཛོམས་ཀྱིས་ཆོས་ལུགས་རིས་མེད་ཀྱི་སྟབས་བདེའི་མཛད་སྒོ་ཞིག་ཚོགས་ཡོད་པ་རེད། ༸གོང་ས་༸སྐྱབས་མགོན་ཆེན་པོ་མཆོག་གིས་མཛད་སྒོའི་ཐོག་ལ་བཀའ་སློབ་བསྩལ་དོན། ད་ལན་གནས་ཁྱད་པར་ཅན་འདིར་རྒྱ་གར་གྱི་ཆོས་བརྒྱུད་གཙོ་ཆེ་ཁག་གི་དབུ་ཁྲིད་རྣམ་པ་ཆེད་བཅར་ཞུས་པར་༸གང་ཉིད་མཆོག་ཐུགས་དགྱེས་ཚོར་ཆེན་པོ་བྱུང་སོང་ཞེས་བཀའ་བསྩལ་བ་དང་འབྲེལ། འཛམ་གླིང་འདིའི་སྟེང་མི་དུང་ཕྱུར་ ༧༠ ཙམ་ཡོད་པ་དང། དེ་དག་གི་ཁམས་མོས་བསམ་པ་བག་ལ་ཉལ་བ་བཅས་མི་འདྲ་བ་ཞིག་ཡོད་སྟབས། ཆོས་ལུགས་མི་འདྲ་བ་ངེས་པར་དུ་དགོས་ཀྱི་ཡོད་པ་རེད། ཆོས་ལུགས་དེ་དག་ཐམས་ཅད་ཀྱིས་མི་བྱམས་བརྩེ་དང་ལྡན་པ་ཞིག་དང། གཞན་ལ་ཕན་ཐོགས་པ། མི་བཟང་པོ་དགོས་པའི་བསླབ་བྱ་གཅིག་གྱུར་སྟོན་གྱི་ཡོད་ཅེས་བཀའ་བསྩལ་མཛད་པ་དང་ཆབས་ཅིག ༸གང་ཉིད་མཆོག་གིས་༸སྐུ་ཚེ་གང་བོ་བྱམས་བརྩེའི་ཐོག་ལ་ཤུགས་སྣོན་མཛད་རྒྱུ་ཡིན་པས་ད་རེས་འདིར་ཕེབས་པའི་ཆོས་གྲོགས་རྣམ་པ་ཚོ་གཙོས། དེ་མིན་ཕྱོགས་མཐའ་ཁག་ཏུ་བཞུགས་ཡོད་པའི་ཆོས་གྲོགས་རྣམ་པ་ཚོས་ཀྱང་ཆོས་ལུགས་ཕན་ཚུན་གཅིག་གྱུར་གྱི་འདུ་ཤེས་འཛིན་རྒྱུ་ཐོག་ཧུར་ཐག་གནང་རོགས་གནང་ཞེས་འབོད་སྐུལ་དང་བཅས་བཀའ་བསྩལ་མཛད་ཡོད་པ་རེད། དེ་བཞིན་མགོན་པོ་མཆོག་གིས་རྒྱ་གར་རྒྱལ་ཁབ་འདི་འཛམ་གླིང་འདིའི་སྟེང་གི་ཆོས་ལུགས་གཙོ་ཆེ་ཚང་མ་ཡོད་བསྡད་པའི་རྒྱལ་ཁབ་ཅིག་ཆགས་ཀྱི་ཡོད་པ་མ་ཟད། དེའང་ཆབ་སྲིད་ཀྱི་དགོས་མཁོ་གཅིག་པོ་མ་ཡིན་པར་འདས་པའི་ལོ་ངོ་སྟོང་ཁྲག་རིང་ལ་ལྟ་གྲུབ་མི་འདྲ་བའི་ཆོས་བརྒྱུད་རྣམས་ཕན་ཚུན་ལྷན་དུ་གནས་ཐུབ་པ་དེ་ནི་འཛམ་གླིང་སྤྱི་ལ་ཁྱད་དུ་འཕགས་པ་ཞིག་རེད་ཅེས་བཀའ་བསྩལ་དང་སྦྲགས། དེ་ལྟར་མུ་མཐུད་ནས་སྲ་བརྟན་གནས་པའི་ཐོག་འཛམ་གླིང་སྤྱི་ལ་མིག་དཔེ་སྟོན་ཐུབ་པ་ཞིག་བྱེད་དགོསཀྱི་རེད་ཅེས་ལམ་སྟོན་མཛད་ཡོད་པ་རེད། གཞི་རྩའི་དེ་རིང་ཐེངས་འདིའི་དུས་དབང་སྐབས་ཚོགས་པའི་ཆོས་ལུགས་རེས་མེད་ཀྱི་མཛད་སྒོར་རྒྱ་གར་ནང་གི་སིཀ་ཆོས་ལུགས་དང་གཅེར་བུ་བའི་ཆོས་ལུགས། ཁ་ཆེ་ཆོས་ལུགས། ཧིན་དུ་ཆོས་ལུགས་བཅས་ཀྱི་དབུ་ཁྲིད་ཁག་ཅིག་ཆེད་བཅར་ཞུས་འདུག སྐབས་དེར་ཆོས་ལུགས་ཁག་གི་དབུ་ཁྲིད་ཚོས་རང་རང་སོ་སོའི་ཆོས་ལུགས་ཀྱི་སྨོན་ལམ་གསུང་འདོན་གནང་པ་དང་འདི་བཞིན་༸གོང་ས་༸སྐྱབས་མགོན་ཆེན་པོ་མཆོག་ནས་ད་བར་འཛམ་གླིང་ཞི་བདེ་དང་ཆོས་ལུགས་མཐུན་སྒྲིལ་ཐོག་མཛད་རྗེས་རླབས་པོ་ཆེ་ཞིག་འཇོག་གནང་མཛད་པར་ཆེ་བསྟོད་ཞུས་ཡོད་པ་རེད། རྩ་བའི་རྒྱ་གར་གྱི་ཆོས་ལུགས་འདྲ་མིན་ཁག་གི་དབུ་ཁྲིད་དེ་དག་ཁ་སང་བྷི་ཧར་མངའ་སྡེའི་རྒྱལ་ས་པ་ཊ་ནཱར་རྒྱ་གར་སིཀ་ཆོས་བརྒྱུད་ཀྱི་བླ་ཆེན་གུ་རུ་གྷོ་ཝིནཌ་སིངྒ་མཆོག་སྐུ་འཁྲུངས་ནས་ལོ་ངོ་ ༣༥༠ འཁོར་བའི་མཛད་སྒོར་བཅར་ཡོད་པ་དང། ཁོང་རྣམ་པས་གོ་སྐབས་དེ་དང་བསྟུན་༸གོང་ས་༸སྐྱབས་མགོན་ཆེན་པོ་མཆོག་ལ་ཆོས་ལུགས་རིས་མེད་ཀྱི་མཛད་སྒོ་དེ་ལྟར་ཚོགས་པར་གསོལ་འདེབས་ཞུས་པ་ཞིག་ཡིན་པ་རེད།

Latest news