Tibetan Royal Year of 2151 | Year of the Wood Dragon

གསར་འགྱུར།

༢༠༢༡ ལོའི་སྔོན་འགྲོའི་འོས་བསྡུའི་གྲུབ་འབྲས་གསལ་བསྒྲགས་བསྐྱངས་པ།

དབུས་འོས་བསྡུ་ལས་ཁང་གིས་ཉེ་ཆར་མཇུག་སྒྲིལ་ཟིན་པའི་ཕྱི་ལོ་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུའི་གྲུབ་འབྲས་གསལ་བསྒྲགས་གནང་བ་དང་སྦྲགས། ཕྱི་ཟླ་ ༣ ཚེས་ ༢༡ ཉིན་སྲིད་སྤྱི་གཉིས་ཀྱི་དངོས་གཞིའི་འོས་མི་གསལ་བསྒྲགས་མ་གནང་གི་བར་དུ་འོས་མི་རྣམ་པས་གཙོས་རྒྱབ་སྐྱོར་བ་མང་ཚོགས་སུས་ཀྱང་འོས་བསྡུ་དང་འབྲེལ་བའི་དྲིལ་བསྒྲགས་རིགས་གང་ཡང་སྤེལ་ཆོག་གི་མེད་ཅེས་གསུངས་སོང་།དེ་རེང་སྔ་དྲོ་ཆུ་ཚོད་ ༡༡ ཐོག་ཕྱི་དྲིལ་ལྷག་པ་ཚེ་རིང་དྲེན་རྟེན་ཚོགས་ཁང་དུ་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་དཔེ་ཟུར་དབང་འདུས་ཚེ་རིང་ལགས་ཀྱིས་གཙོས་པའི་འགན་འཛིན་ལས་འཕར་སྤྱི་ཟུར་བསོད་ནམས་རྒྱལ་མཚན་ལགས་དང་དགེ་བཤེས་མ་བདེ་ལེགས་དབང་མོ་ལགས་གཉིས་བཅས་དབུ་བཞུགས་ཐོག་གསར་འགོད་ལྷན་ཚོགས་ཤིག་གནང་སྟེ་བཙན་བྱོལ་བོད་མིའི་འོས་བསྡུའི་སྒྲིག་གཞི་དོན་ཚན་ ༦༧ དང་། དོན་ཚན་ ༤༩ པའི་དགོངས་དོན་གཞིར་བཟུང་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོའི་གྲུབ་འབྲས་ཁོངས་ནས་རྩེ་བཏོགས་སོན་པའི་སྲིད་སྐྱོང་གི་སྔོན་འགྲོའི་འོས་དམིགས་དྲུག་དང་སྤྱི་འཐུས་ཀྱི་ཐོབ་ཁོངས་སོ་སོའི་ཐོབ་ཆའི་གྲངས་ཚད་ཀྱི་གསུམ་ལྡབ་ལས་མི་ཉུང་བའི་ཐོག་ནས་ཁྱོན་སྤྱི་འཐུས་ཀྱི་སྔོན་འགྲོའི་འོས་དམིགས་ ༡༤༥ མཚན་མངོན་གསལ་གནང་ཡོད།སྲིད་སྐྱོང་གི་སྔོན་འགྲོའི་འོས་མི་ ༦ གི་མཚན་མངོན་གསལ་གནང་བའི་ཁོངས་ནས་སྤྱི་འཐུས་ཚོགས་གཙོ་སྤེན་པ་ཚེ་རིང་ལགས་ལ་འོས་གྲངས་ ༢༤༤༨༨ དང་སྤྱི་ཚོགས་ཡར་རྒྱས་ཐེབས་རྩའི་འགན་འཛིན་ཟུར་པ་དབུ་དཀར་ཚང་སྐལ་བཟང་རྡོ་རྗེ་ལགས་ལ་འོས་གྲངས་ ༡༤༥༤༤  བཀའ་ཟུར་རྒྱ་རི་སྒྲོལ་མ་ལགས་ལ་འོས་གྲངས་ ༡༣༣༦༣ བཀའ་ཟུར་འབྲོང་ཆུང་དངོས་གྲུབ་ལགས་ལ་འོས་གྲངས་ ༡༠༢༠༠ བཀའ་ཟུར་བློ་བཟང་སྙན་གྲགས་ལགས་ལ་འོས་གྲངས་ ༩༩༩ དེ་བཞིན་སྤྱི་འཐུས་ཚོགས་གཞོན་ཨཱཙཱརྱ་ཡེ་ཤེས་ཕུན་ཚོགས་ལགས་ལ་འོས་གྲངས་ ༢༢༦ བཅས་ཐོབ་འདུག  སྤྱི་འཐུས་ཀྱི་སྔོན་འགྲོའི་འོས་མིའི་ཁོངས་སུ་ཆོལ་ཁ་རེ་རེ་ནས་འོས་གཞི་གྲངས་ ༣༠ རེ་དང་ཆོས་ལུགས་ཁག་ལྔ་དང་། ལྷོ་བྱང་ཨ་རི། ཡུ་རོབ་དང་ཨ་ཕི་རི་ཀ་བཅས་ནས་འོས་གཞི་གྲངས་ ༦ རེ། དེ་བཞིན་རྒྱ་བལ་འབྲུག་གསུམ་ཕུད་པའི་ཨེ་ཤི་ཡ་དང་ཨོ་སི་ཀྲེ་ལེ་ཤི་ཡའི་ཁོངས་ནས་འོས་གཞི་གྲངས་ ༣ བཅས་མཚན་འདོན་གནང་ཡོད་པ་དང་། དེ་དག་ཁྲོད་ནས་འདི་ལོ་དབུས་གཙང་དང་མདོ་སྨད་ཆོལ་ཁའི་སྔོན་འགྲོའི་འོས་དམིགས་རྩེ་བཏོགས་བཅུའི་ནང་ནས་རྒྱ་ཆ་ ༣༠ འོས་དམིགས་གསར་པ་དང་དེ་བཞིན་མདོ་སྨད་ཆོལ་ཁའི་སྔོན་འགྲོའི་འོས་དམིགས་རྩེར་སོན་བཅུའི་ནང་ནས་རྒྱ་ཆ་ ༤༠ འོས་དམིགས་གསར་པ་ཆགས་ཀྱི་འདུགད་རེས་རྒྱ་བལ་འབྲུག་གསུམ་ཕུད་པའི་ཨེ་ཤི་ཡ་དང་ཨོ་སི་ཀྲེ་ལེ་ཤི་ཡའི་མངའ་ཁུལ་གྱི་སྤྱི་འཐུས་ཀྱི་སྔོན་འགྲོས་འོས་བསྡུའི་ཁྲོད་གང་ཟག་གཉིས་ལ་འོས་ཤོག་འདྲ་མཉམ་ཐོབ་ཏེ་ཨང་གཉིས་པ་སོན་མཁན་གཉིས་བྱུང་བ་དང་འབྲེལ། དབུས་འོས་བསྡུ་ལས་ཁང་ནས་ཐེངས་འདིའི་འོས་བསྡུའི་སྐབས་སུ་རྒྱ་བལ་འབྲུག་གསུམ་ཕུད་པའི་ཨེ་ཤི་ཡ་དང་ཨོ་སི་ཀྲེ་ལེ་ཤི་ཡའི་མངའ་ཁུལ་ནས་འོས་གཞི་གསུམ་མངོན་གསལ་གནང་རྒྱུ་གཏན་ཁེལ་བྱུང་ཡོད་པ་གསུངས་ཡོད།གཞི་རྩའི་དེ་རིང་ཡོངས་གྲགས་གནང་བའི་སྲིད་སྤྱི་གཉིས་ཀྱི་འོས་མི་དེ་དག་སྔོན་འགྲོའི་འོས་དམིགས་ཆགས་ཀྱི་ཡོད་པ་དང་། དེ་རིང་ནས་དབུ་འཛུགས་ཀྱིས་ཕྱི་ཟླ་ ༣ ཚེས་ ༢༠ བར་ཁྱོན་ཉིན་གྲངས་ ༤༠ རིང་ལ་འོས་དམིགས་དང་འབྲེལ་བའི་གསལ་བསྒྲགས་ཁག་ས་གནས་འོས་བསྡུ་ལས་ཁང་ཁག་ལ་གཏང་རྒྱུ་དང་། འོས་གཞིར་བཞུགས་འདོད་མེད་མཁན་རྣམས་ནས་དགོངས་ཞུ་ཕུལ་དགོས་པ། དེ་བཞིན་དབུས་འོས་བསྡུ་ལས་ཁང་ནས་དངོས་གཞིའི་འོས་གཞི་གྲ་སྒྲིག་གནང་རྒྱུ་སོགས་དུས་ཚོད་ཆགས་ཀྱི་ཡོད་པ་ལྟར་དབུས་འོས་བསྡུ་ལས་ཁང་གི་སྤྱི་ཁྱབ་འགན་འཛིན་མཆོག་ནས་དུས་ཡུན་དེའི་རིང་ལ་སྲིད་སྤྱི་གཉིས་ཀྱི་འོས་མི་རྣམ་པ་གཙོས་རྒྱབ་བསྐྱོར་བ་དང་མང་ཚོགས་སུས་ཀྱང་འོས་བསྡུ་དང་འབྲེལ་བའི་དྲིལ་བསྒྲགས་རིགས་གང་ཡང་སྤེལ་ཆོག་གི་མེད་པར་གསུངས་སོང་།འདི་ལོའི་ཕྱི་ཟླ་ ༡ ཚེས་ ༣ ཉིན་གནང་བའི་ ༢༠༢༡ ལོའི་སྲིད་སྤྱི་གཉིས་ཀྱི་སྔོན་འགྲོའི་འོས་བསྡུ་ཆེན་མོར་འོས་འཕེན་པའི་མིང་གཞུང་དེབ་སྐྱེལ་གནང་མཁན་ཁྱོན་མི་གྲངས་ ༨༢༩༦༩ བྱུང་བའི་ཁོངས་ནས་དངོས་སུ་འོས་འཕེན་མཁན་གྱི་གྲངས་འབོར་བརྒྱ་ཆ་ ༧༦༌༧༨ ཆགས་ཀྱི་འདུག་པ་དང་། དེ་ནི་དེ་སྔ་ ༢༠༡༦ ལོའི་སྔོན་འགྲོའི་འོས་བསྡུ་དང་བསྡུར་ཚེ་བརྒྱ་ཆ་ ༢༣ ལྷག་འཕར་ཆ་བྱུང་འདུག འོན་ཀྱང་དེ་སྔ་ལྟར་འདི་ལོ་སླར་ཡང་འབྲུག་ཡུལ་དུ་ཡོད་པའི་བོད་མི་རྣམས་ནས་སྔོན་འགྲོའི་འོས་བསྡུ་ཆེན་མོར་མཉམ་ཞུགས་གནང་ཐུབ་མི་འདུག   Preliminary Results

རྒྱ་ནག་ནི་ས་མཚམས་བརྒལ་ནས་རང་ཉིད་ཀྱི་མང་ཚོགས་ལ་དྲག་གནོན་བྱེད་མཁན་སྡུག་ཤོས་ཡིན་པར་ཐེར་འདོན།

ཨ་རིའི་རང་དབང་ཁང་པས་རྒྱལ་སྤྱིའི་སྤྱི་ཚོགས་ཀྱི་སྲིད་གཞུང་ཁག་གིས་ས་མཚམས་ལས་བརྒལ་ནས་རང་ཉིད་ཀྱི་མི་སེར་ཐོག་གསང་ཞིབ་དང་དྲག་གནོན་བྱེད་བཞིན་པའི་སྙན་ཐོ་ཞིག་འདོན་སྤེལ་གནང་བའི་ནང་དུ། རྒྱ་ནག་དམར་ཤོག་སྲིད་གཞུང་ནི་བཙན་བྱོལ་དུ་ཡོད་པའི་བོད་མི་དང་ཡུ་གུར་མི་མང་། ནང་སོག་དང་ཧོང་ཀོང་སོགས་ཀྱི་མི་སེར་ལ་དངོས་ཤུགས་བརྒྱུད་གསུམ་ནས་དྲག་གནོན་ཤུགས་ཆེ་ཤོས་བྱེད་མཁན་ཞིག་ཡིན་པ་མངོན་གསལ་གནང་འདུག དེའང་རང་དབང་ཁང་པས་ཟླ་བ་འདིའི་ཚེས་༤ ཉིན་འདོན་སྤེལ་གནང་བའི་ Out of Sight, Not Out of Reach འམ། མཐོང་མ་ཐུབ་ཀྱང་སྙོབ་མ་ཐུབ་པ་མེད་ཅེས་པའི་སྙན་ཐོ་འདིའི་ནང་དུ། རྒྱལ་སྤྱིའི་སྲིད་གཞུང་ཁག་གིས་རང་ཉིད་ཀྱི་མང་ཚོགས་ཀྱི་རང་དབང་དང་འདྲ་མཉམ། དེ་བཞིན་འགྲོ་བ་མིའི་ཐོབ་ཐང་དང་མང་གཙོ་སོགས་ཀྱི་བྱེད་ལས་ལ་རྒྱལ་མཚམས་མེད་པར་ཕྱོགས་ཡོངས་ནས་དྲག་གནོན་བྱས་པའི་གནད་དོན་འདྲ་མིན་ ༦༠༨ ཙམ་ཕྱོགས་སྒྲིག་ཞུས་པའི་ཁོངས་སུ། རྒྱ་ནག་དང་། turkey, Rwanda, Saudi Arabia, དེ་བཞིན་ཨུ་རུ་སུ་དང་ཨེ་རན་བཅས་རྒྱལ་ཁབ་དྲུག་ནི་ཆེས་སྡུག་ཤོས་ཡིན་པ་འབུར་འདོན་བྱས་པ་མ་ཟད། རྒྱ་ནག་ནི་བོད་དང་ཡུ་གུར་མི་རིགས། དེ་བཞིན་རྒྱ་ནག་གི་མང་གཙོ་དོན་གཉེར་བ་སོགས་ལ་དྲག་གནོན་གྱིས་འཛིན་བཟུང་དང་མནར་གཅོད་བྱེད་མཁན་གྱི་རྒྱལ་ཁབ་སྡུག་ཤོས་སུ་མིང་འདོན་བྱས་འདུག སྙན་ཐོ་ནང་ ཕྱི་ལོ་༢༠༡༤ ནས་ཕྱི་ལོ་ ༢༠༢༡ བར་དུ་རྒྱལ་སྤྱིའི་སྤྱི་ཚོགས་ཀྱི་ནང་དུ་སྲིད་གཞུང་ཁག་གིས་རྒྱལ་མཚམས་མེད་པར་རང་ཉིད་ཀྱི་མི་མང་སྤྱི་དང་གསར་འགོད་པ་དེ་བཞིན་འགྲོ་བ་མིའི་ཐོབ་ཐང་ལས་འགུལ་བ་སོགས་ལ་སུན་གཙེར་དང་དྲག་གནོན་གྱི་གྱོད་དོན་༦༠༨ ཙམ་བྱུང་ཡོད་པའི་ཁྲོད་དུ། བརྒྱ་ཆ་གསུམ་ཆ་གཅིག་སྟེ། གྱོད་དོན་༢༡༤ རྒྱ་ནག་དང་འབྲེལ་བ་ཡོད་སྐོར་གསུངས་བ་མ་ཟད། དེའང་རྒྱ་ནག་གིས་དེང་དུས་ཚད་ལྡན་རང་བཞིན་སྒོ་ནས་གཙོ་བོ་ཡུ་གུར་ཁ་ཆེའི་གྲངས་ཉུང་མི་རིགས་ཀྱི་མཚོན་པའི་ཆབ་སྲིད་ཐད་གཞུང་དང་ལྟ་སྤྱོད་མི་མཐུན་མཁན་རྣམས། འགྲོ་བ་མིའི་ཐོབ་ཐང་རྩོད་ལེན་པ་དང་གསར་འགོད་པ་སོགས་ལ་དམིགས་བཀར་གྱིས་དྲག་གནོན་བྱེད་བཞིན་པར་བརྗོད་འདུག སྙན་ཐོའི་ནང་དུ་ད་དུང་རྒྱ་ནག་གིས་བོད་མི་བཙན་བྱོལ་རྣམས་ལ་གནོད་ཤུགས་སྤྲོད་ཐབས་ཀྱི་ལས་གཞི་རྒྱ་བསྐྱེད་དང་ཡུ་གུར་མི་མང་ས་ཡ་ལྷག་བཀག་སྐྱིལ། དེ་བཞིན་ནང་སོག་གི་ཆོས་དང་རིག་གཞུང་རྩ་གཏོར། གཞན་ཡང་ཧོང་ཀོང་གི་ནང་དུ་བཙན་དབང་གིས་བདེ་འཇགས་ཀྱི་ཁྲིམས་གཞི་ལག་བསྟར་གྱིས་མི་མང་ལ་གནོན་ཤུགས་སྤྲད་དང་སྤྲོད་མུས་མ་ཟད། རྒྱ་ནག་གི་རྒྱལ་མཚམས་བརྒལ་ནས་བཙན་བྱོལ་བ་རྣམས་ལ་འཇག་རྒོལ་དང་ཁོང་ཚོའི་ནང་མི་རྒྱ་ནག་གི་ནང་དུ་ལྷག་པ་རྣམས་ཀྱི་རྒྱུ་ནོར་བཙན་འཕྲོག དེ་བཞིན་སྲིད་གཞུང་གིས་དམིགས་བཀར་གྱི་མང་ཚོགས་ཀྱི་འགྲོ་སྐྱོད་ཀྱི་ལག་འཁྱེར་བཀག་སྡོམ། དེ་བཞིན་ལྐོག་ཟ་རུལ་སུངས་ལ་རྒོལ་རྡུང་གི་མིང་ཐོག་ནས་རྒྱ་ནག་གི་དཔོན་རིགས་བརྒྱ་ཕྲག་ལ་དྲག་གནོན་བྱས་པ་སོགས་ཀྱི་མཚོན་པའི་དྲ་ཐོག་ནས་འཇིགས་སྐུལ་བྱས་པ་དང་གསང་ཉུལ་བ་བཏང་ནས་མང་ཚོགས་ལ་ལྟ་སྲུང་བྱས་པ། དེ་བཞིན་དེང་རབས་ཀྱི་འཕྲུལ་ལས་བརྒྱུད་ནས་རྒྱལ་སྤྱིའི་སྤྱི་ཚོགས་ཀྱི་ཁྲོད་དུ་རྒྱ་ནག་སྲིད་གཞུང་དང་འགལ་ཟླར་གྱུར་བ་རྣམས་ལ་གནོན་ཤུགས་སྤྲད་ཡོད་པ་ཡོངས་གྲགས་གནང་འདུག ཕྱོགས་མཚུངས་སྔོན་ཆད་བོད་ནས་བལ་ཡུལ་དང་རྒྱ་གར་དུ་ལོ་རེར་བོད་མི་བཙན་བྱོལ་བ་སྟོང་ཕྲག་ཁ་ཤས་ཡོང་གི་ཡོད་ནའང་། ཕྱི་ལོ་ ༢༠༡༩ ལོར་བལ་ཡུལ་དང་རྒྱ་ནག་བར་ས་མཚམས་དོ་དམ་གྱི་གྲོས་མཐུན་བཞག་ཡོད་སྟབས། བལ་ཡུལ་གཞུང་ནས་བོད་མི་ཚོ་རྒྱ་ནག་ལ་རྩིས་སྤྲོད་བྱེད་ཀྱི་ཡོད་པ་དང་། འདས་ལོར་ཨ་རིའི་ནེའུ་ཡོག་གྲོང་ཁྱེར་དུ་ཉེན་རྟོག་པ་པད་མ་དར་རྒྱས་ཟེར་བས་ཨ་རིར་གནས་པའི་བོད་མིའི་ཐོག་གསང་མྱུལ་བྱས་ཡོད་པ། དེ་བཞིན། སི་ཝེ་ཌན་དང་སུ་སིད། ཁེ་ན་ཌ་བཅས་ཀྱི་ནང་བོད་མིའི་ཐོག་རྒྱ་ནག་གིས་གསང་བའི་མྱུལ་ཞིབ་བྱེད་ཀྱི་ཡོད་སྐོར་སོགས་བཀོད་པ་བརྒྱུད། ཕྱི་ལོ་ ༢༠༡༩ ལོར་སྐྱབས་བཅོལ་དུ་ཡོང་མཁན་བོད་མི་ ༢༣ ལས་མེད་པ་དང་། དེ་བཞིན་ལོ་དེར་བོད་མི་ ༦ བལ་ཡུལ་དུ་འབྱོར་ཡོད་ནའང་བལ་ཡུལ་གཞུང་གིས་ཕར་རྒྱ་ནག་ལ་རྩིས་སྤྲོད་བྱས་ཡོད་ལུགས་སོགས་ཀྱི་མཚོན་པས། རྒྱ་ནག་གིས་བོད་མི་རྣམས་ཀྱི་འགྲོ་འདུག་ལ་སྟངས་འཛིན་ནན་མོ་བྱེད་བཞིན་པ་མ་ཟད། ཉེ་འཁོར་གྱི་རྒྱལ་ཁབ་ཁག་ལ་གནོན་ཤུགས་ཀྱིས་བོད་མི་རྣམས་བཙན་བྱོལ་དུ་འབྲོ་བཞིན་པར་ཕྱིར་རྒྱ་ནག་ལ་རྩིས་སྤྲོད་བྱེད་དགོས་ལུགས་བརྗོད་ཡོད་པར་འཁོད་འདུག དེ་བཞིན་རྒྱ་ནག་གི་དྲག་གནོན་དང་གསང་བའི་མྱུལ་ཞིབ་ཀྱི་ལས་འགུལ་དེས། འཛམ་གླིང་གི་མང་གཙོའི་རྒྱལ་ཁབ་ ༣༦ ཙམ་ནང་གནས་པའི་རྒྱ་རིགས་དང་གྲངས་ཉུང་མི་རིགས་ས་ཡ་མང་པོར་གནོན་ཤུགས་ཐེབས་ཀྱི་ཡོད་པ་དང་། རྒྱལ་སྤྱིའི་སྟེང་རྒྱ་ནག་གི་ཤུགས་རྐྱེན་ཇེ་ཆེར་ཕྱིན་པ་དང་བསྟུན་ནས་རྒྱ་ནག་གི་ཐབས་བརྒྱ་ཇུས་སྟོང་གི་དྲག་གནོན་ལས་འགུལ་མང་པོའི་ཤུགས་རྐྱེན་ཁྲོད་རྒྱ་རིགས་དམངས་གཙོའི་འཐབ་རྩོད་པ་ཙམ་མ་ཟད། མི་རིགས་གཞན་གྱི་མི་སེར་རྣམས་ལའང་གནོན་ཤུགས་ཐེབས་ཏེ་འཛམ་གླིང་རྒྱལ་ཁབ་ཁག་གི་ཁྲིམས་ཀྱི་དབང་སྒྱུར་དང་རྒྱལ་སྤྱིའི་ཁྲིམས་སྲོལ་དང་འགྲོ་ལུགས་སོགས་རྒྱ་ནག་རང་གི་མངོན་འདོད་ཅན་དུ་བསྒྱུར་ཐབས་བྱེད་ཀྱི་ཡོད་སྐོར་སོགས་བརྗོད་འདུག

ཁམས་འབྲི་རུ་རྫོང་དུ་བོད་མི་ཞིག་ལ་མི་ལོ་ ༡༣ གྱི་ཁྲིམས་ཐག་བཅད་འདུག

རྒྱ་ནག་གིས་ ༢༠༡༣ ལོར་མིང་ལ་རྣམ་དག་ཅེས་པའི་སྐྱེས་པ་ཞིག་ལ་མི་ལོ་ ༡༣ གྱི་བཙོན་འཇུག་ཁྲིམས་ཐག་བཅད་པའི་གནས་ཚུལ་ཞིག་ད་ཆ་གཞི་ནས་ཕྱི་འགྱར་བྱུང་འདུགདེ་རིང་གསར་ཁང་ལ་ཁམས་འབྲི་རུ་རྫོང་ནས་ཡིན་ཞིང་བཞུགས་སྒར་གནས་བཞུགས་གནང་མཁན་བོད་མི་ཞིག་གིས་གནས་ཚུལ་མཁོ་སྤྲོད་གནང་བར་ ༢༠༡༣ ཙམ་ལ་ཁམས་འབྲི་རུ་རྫོང་དུ་ཆབ་སྲིད་དང་འབྲེལ་བའི་རྙོག་གླེང་མང་པོ་བྱུང་ཡོད་པ་ལྟར་རྒྱ་ནག་གིས་སྐབས་དེར་འབྲི་རུ་རྫོང་ཙྭ་ལ་ཡུལ་ཚོ་མེ་རི་གྲོང་ཚོ་ནས་ཡིན་པའི་སྐྱེས་བ་རྣམ་དག་ལགས་ཀྱིས་རྒྱ་གར་དུ་བྲོས་བྱོལ་ལ་འགྲོ་མཁན་གྱི་བོད་མི་ཁག་ཅིག་ལ་རོགས་རམ་གནང་བའི་ཉེས་མིང་འོག་འཛིན་བཟུང་གིས་མི་ལོ་ ༡༣ རིང་ལ་བཙོན་འཇུང་གྱི་ཐག་བཅད་བྱས་ཡོད་པ་དང་། སྐབས་དེར་ཁོང་དང་ལྷན་དུ་ཁམས་འབྲི་རུ་རྫོང་གི་བོད་མི་དྲུག་བདུན་ཙམ་ཞིག་མཉམ་དུ་འཛིན་བཟུང་བྱས་ཡོད་ཀྱང་། བོད་མི་གཞན་དེ་དག་རྗེས་སུ་ཁྲིམས་ཐག་བཅད་པ་ཙམ་ལས་ཁོང་ཚོར་ཉེས་མིང་ཅི་ཞིག་གི་འོག་ཏུ་འཛིན་བཟུང་བྱས་པའི་སྐོར་ཤེས་རྟོགས་ཐུབ་ཀྱི་འདུག་ཅེས་གསུངས་སོང་། ཁོང་གིས་རྣམ་དག་ལགས་སུ་ཁྲིམས་ཐག་བཅད་རྗེས་ནང་མི་རྣམས་ཐེངས་འགར་ཐུག་འཕྲད་བྱེད་དུ་བཅུག་ཡོད་ཀྱང་། འདས་པའི་ལོ་གཉིས་ཙམ་གྱི་གོང་ནས་ཁོང་ལ་སྒྱུ་ལྷག་གི་ན་ཚ་ཡོད་པར་བརྗོད་དེ་ནང་མི་རྣམས་དང་མཉམ་དུ་ཐུག་འཕྲད་དང་འབྲེལ་གཏུག་གང་ཡང་བྱེད་དུ་བཅུག་མེད་སྐོར་ཤེས་རྟོགས་བྱུང་བ་ལས་ད་ལྟའི་ཆར་ཁོང་གི་འཕྲོད་བསྟེན་གྱི་གནས་བབ་སོགས་ཞིབ་ཕྲའི་གནས་ཚུལ་གང་ཡང་ཤེས་རྟོགས་མེད་པར་འགྲེལ་བརྗོད་གནང་ཡོད། ཁམས་འབྲུ་རི་རྫོང་དུ་སྔོན་ཆད་རྒྱ་ནག་གིས་གཏེར་ཁ་སྔོག་འདོན་གྱི་ལས་གཞི་རྒྱ་སྐྱེད་བྱེད་སྐབས་ས་གནས་ཀྱི་བོད་མི་རྣམས་ཀྱིས་རང་ས་སྲུང་སྐྱོབ་ཀྱིས་གཏེར་ཁ་སྔོག་ཏུ་མ་བཅུག་པར་བརྟེན་རྒྱ་ནག་གིས་སྡང་ཟུག་ཆེན་པོ་བྱ་ཡུལ་ཞིག་ཏུ་གྱུར་ཡོད་པ་དང་། ཕྱིས་སུ་ཕྱི་ལོ་ ༢༠༡༣ ཡས་མས་སུ་ཁམས་འབྲུ་རི་རྫོང་ཁོངས་སུ་ཆབ་སྲིད་ཀྱི་དོན་གནད་མང་དག་ཅིག་བྱུང་བའི་ཁྲོད་རྒྱ་ནག་གིས་ཁུལ་དེ་དམ་དྲག་དང་ལྟ་རྟོག་ནན་པོ་བྱ་ཡུལ་ཞིག་ཆགས་པར་བརྟེན་ད་ཆ་བོད་ཕྱི་ནང་གཉིས་ཀྱི་འབྲེལ་ལམ་སྔར་ལྷག་དམ་དྲག་གི་འོག་ཏུ་གནས་ཡོད་པར་འགྲེལ་བརྗོད་གནང་སོང་། གཞན་ཡང་ཁོང་གིས་རང་ཉིད་བཙན་བྱོལ་དུ་ཡོད་པའི་ཁམས་འབྲི་རུ་རྫོང་གི་ཡུལ་མི་ཞིག་ཡིན་པའི་ཆ་ནས་གཞིས་བཞུགས་རྣམས་ཀྱི་རང་ཉིད་ཀྱི་ཕ་མ་སྤུན་མཆེད་རྣམས་ཀྱིས་གཙོས་ཁུལ་དེའི་ཡུལ་མི་རྣམས་ཛ་དྲག་རང་བཞིན་གྱི་དམ་དྲག་འོག་ཡོད་པར་བློ་འཚབ་ཆེན་པོ་ཡོད་ཀྱང་།  རྒྱ་ནག་གིས་དུས་རྒྱུན་ནས་བཙན་བྱོལ་གྱི་བོད་མི་རྣམས་ཀྱི་བྱེད་ལས་ལ་ཁ་གཡར་ནས་ནང་མི་སྤུན་མཆེད་རྣམས་ལ་སྡུག་སྦྱོང་མནར་གཅོད་གཏོང་གི་ཡོད་སྟབས་ཡུལ་མི་རྣམས་ཀྱི་བདེ་སྡུག་ལ་སེམས་ཁྲལ་བྱེད་རྒྱུ་ཙམ་ལས་རང་གི་ངོས་ནས་ནུས་པ་ཐོན་པའི་ལས་འགུལ་རིགས་གང་ཡང་སྤེལ་ཐབས་མེད་པར་ལྷག་ཡོད་སྐོར་ཡང་འགྲེལ་བརྗོད་གནང་ཡོད། གཞི་རྩའི་སྔར་ལོའི་ཟླ་༦ པའི་ནང་རྒྱ་ནག་གཞུང་གིས་ཁམས་འབྲི་རུ་རྫོང་ནས་ཡིན་པའི་བསྟན་འཛིན་ཐར་པ་དང་ཁོང་གི་སྤུན་མཆེད་ལྷ་མོ་གཉིས་རྒྱ་གར་དུ་སྒོར་མོ་བཏང་བའི་ཉེས་མིང་འོག་འཛིན་བཟུང་བཙོན་འཇུག་བྱས་ཏེ་གཅར་རྡུང་མང་པོ་བཏང་བ་བརྒྱུད་བྱིས་པ་གསུམ་གྱི་ཨ་མ་ཡིན་པའི་ལྷ་མོ་ལགས་བཀག་སྐྱིལ་ཁང་ནས་འདས་གྲོངས་སུ་གྱུར་ཡོད་པ་དང་། དེ་བཞིན་ཁུལ་དེའི་གཞོན་སྐྱེས་གླུ་བ་ལྷུན་གྲུབ་གྲགས་པ་ལགས་ཀྱིས་བོད་ལྗོངས་ནག་ཆུ་གྲོང་ཁྱེར་འབྲི་རུ་རྫོང་སྲིད་གཞུང་གི་དྲག་གནོན་སྲིད་བྱུས་ཁག་ལ་སྐྱོན་བརྗོད་ཀྱིས་ཞྭ་མོ་ནག་པོ་ཞེས་པའི་གླུ་གཞས་དེ་བླངས་པར་ཁ་གཡར་ཏེ་ཕྱི་ལོ་ ༢༠༡༩ ལོར་འཛིན་བཟུང་བཀག་སྐྱིལ་གྱིས་སྔར་ལོའི་ཟླ་ ༦ ནང་ཁོང་ལ་ལོ་༦ གི་ཁྲིམས་ཐག་བཅད་ཡོད་པ་རེད།

  ཕུན་ཚོགས་ཁང་གསར་གྱི་ལས་གཞིའི་རྨང་རྡོ་བཙུགས་པ།

དེ་རིང་སྔ་དྲོ་ཚོུད་ ༡༠ སྟེང་བཞུགས་སྒར་དྷརྨ་ས་ལའི་ས་གནས་འགོ་འཛིན་ལས་ཁུངས་ཀྱི་ཁྱབ་ཁོངས་སུ་དབུས་བོད་མིའི་སྒྲིག་འཛུགས་ཀྱི་མ་དངུལ་ཆེད་གཏོང་གིས་ཕུན་ཚོགས་ཁང་གསར་ཞེས་པའི་ཚོགས་ཁང་གསར་རྒྱག་གི་རྨང་རྡོ་འཛུགས་པའི་མཛད་སྒོ་ཚོགས་སོང་།འགྲོ་གྲོན་བྱི་བ་གཉིས་དང་འབུམ་བརྒྱད་ཅུ་ལྷག་གི་ལས་གཞིའི་རྨང་རྡོ་འཛུགས་པའི་མཛད་སྒོའི་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེངྒེ་མཆོག་གིས་དབུས་པའི་ནང་སྲིད་བཀའ་བློན་མཆོག་དང་ནང་སྲིད་དྲུང་ཆེ་མཆོག དེ་བཞིན་གནས་ཆུང་ཆོས་རྒྱལ་ཆེན་པོའི་༸སྐུ་རྟེན་ཐུབ་བསྟན་དངོས་གྲུབ་མཆོག་གིས་གཙོས་དྷ་ས་ས་གནས་འགོ་འཛིན་ལས་ཁུངས་ཀྱི་ལས་བྱེད་སོགས་ལྷན་འཛོམས་ཐོག་ཚོགས་ཁང་གསར་རྒྱག་གི་རྨང་རྡོ་བཏིང་སྟེ་གནས་ཆུང་༸སྐུ་རྟེན་མཆོག་གིས་རབ་གནས་མཛད་སོང་།སྲིད་སྐྱོང་བློ་བཟང་སེངྒེ་མཆོག་གིས་ཚོགས་ཁང་གསར་རྒྱག་དང་འབྲེལ་བའི་བཀའ་སློབ་གནང་བར་ སྔོན་ཆད་གངས་ཅན་སྐྱིད་གཤོངས་སུ་ཨར་ལས་རྒྱག་དུས་ལྷན་པ་རྒྱག་པའི་གོམས་གཤིས་ཤིག་ཡོད་པར་ལུང་འདྲེན་གྱིས་ད་ལྟའི་བཀའ་ཤག་གི་ལས་ཡུན་རིང་ལ་གངས་སྐྱིད་ཀྱི་ཨར་ལས་འཛུགས་སྐྲུན་གྱི་ལས་གཞི་རྒྱ་བསྐྱེད་ཀྱིས་གངས་སྐྱིད་ཁྱོན་ཡོངས་བྱུས་འགོད་བོད་བཟོའི་ངོ་བོར་བསྒྱུར་ཡོད་པ་ལྟར་དྷ་ས་ས་གནས་འགོ་འཛིན་ལས་ཁུངས་དེ་ཡང་ཕྱི་མི་མང་པོ་ཕེབས་སའི་ས་ཚིགས་ཤིག་ཆགས་ཡོད་སྟབས་འགྲོ་གྲོན་ལ་མ་ལྟོས་པར་ཚོགས་མི་བརྒྱ་དང་ལྔ་བཅུ་ཙམ་ཤོང་སའི་བོད་བཟོའི་བྱུས་འགོད་ལྡན་པའི་ཚོགས་ཁང་ཞིིག་གསར་རྒྱག་གནང་གཏན་འཁེལ་ཡོད་པར་འགྲེལ་བརྗོད་གནང་སོང་།མཛད་སྒོ་གྲོལ་མཚམས་སུ་གསར་འགོད་པས་དྷ་ས་ས་གནས་འགོ་འཛིན་ཀུན་དགའ་ཚེ་རིང་ལགས་སུ་ཨར་ལས་ཀྱི་འཛུགས་སྐྲུན་གྱི་ལས་གཞིའི་མ་དངུལ་མཁོ་འདོན་དང་ལས་གཞི་ཡོངས་རྫོགས་ལེགས་གྲུབ་ནམ་ཟིན་ནམ་ཞེས་བཀའ་འདྲི་ཞུས་པར་ཁོང་གིས་དབུས་བོད་མིའི་སྒྲིག་འཛུགས་ཀྱིས་ཨར་ལས་འཛུགས་སྐྲུན་གྱི་མ་དངུལ་བྱེ་བ་གཉིས་དང་འབུམ་བརྒྱད་བཅུ་ལྷག་གི་བརྒྱ་ཆ་གྱ་ལྔ་ཙམ་མཁོ་འདོན་གནང་རྒྱུའི་ཞལ་བཞེས་ཐོབ་ཡོད་པ་དང་མ་དངུལ་བརྒྱ་ཆ་བཅོ་ལྔ་ཙམ་ས་གནས་རང་ཁོངས་ནས་མཁོ་འདོན་ཞུ་དགོས་སྐོར་ངོ་སྤྲོད་གནང་བ་དང་འབྲེལ། ཟླ་བ་དགུའི་ནང་ཚུད་དུ་ཚོགས་ཁང་གསར་རྒྱག་གི་ལས་གཞི་ཡོངས་སུ་ལེགས་གྲུབ་ཐུབ་རྒྱུར་ཤུགས་སྣོན་རྒྱག་གི་ཡོད་པ་གསུངས་སོང་།དེ་བཞིན་ཁོང་གིས་ད་བར་ས་གནས་འགོ་འཛིན་ལས་ཁུངས་ཀྱི་ཁྱབ་ཁོངས་སུ་ཚོགས་ཁང་གསར་རྒྱག་གནང་མ་ཐུབ་པའི་རྒྱུ་རྐྱེན་གང་གསལ་པོ་བརྗོད་ཐབས་མེད་པར་གསུངས་པ་དང་སྦྲགས། གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་གི་མཚན་གནས་རྗེས་འབྲེལ་གྱི་ཐོག་ནས་ལས་གཞི་ཡོད་ཚད་ལེགས་བཅོས་གནང་བཞིན་ཡོད་སྐོར་གསུངས་ཡོད།  པར་ཁག་གི་བདག་དབང་བོད་མིའི་སྒྲིག་འཛུགས།

ཨ་རིའི་ཕྱི་སྲིད་དྲུང་ཆེ་མཆོག་གིས་བོད་དོན་ལ་རྒྱབ་སྐྱོར་ཡོད་པར་གསུངས་འདུག

ཨ་རིའི་སྲིད་འཛིན་བྷེ་ཊན་གྱི་གཞུང་འཛིན་གསར་བའི་ཕྱི་སྲིད་དྲུང་ཆེ་མཆོག་གིས་ཨ་རིའི་ངོས་ནས་བོད་དོན་ལ་ཤུགས་སྣོན་སྐྱོན་རྒྱུ་ཡིན་པའི་ཁས་ལེན་གནང་འདུག

རྒྱལ་སྤྱིའི་ཨོ་རྩེད་འགྲན་ཚོགས་ཚོགས་ཆུང་གི་ལས་ཁུངས་མདུན་དུ་ངོ་རྒོལ།

རྒྱལ་སྤྱིའི་ནང་གི་འགྲོ་བ་མིའི་ཐོབ་རྩོད་ལེན་གནང་མཁན་ཚོགས་སྒེར་ཁག་གིས་འཚོགས་ལ་ཉེ་བའི་ཕྱི་ལོ་ ༢༠༢༢ ལོའི་པེ་ཅིང་དགུན་དུས་ཨོ་རྩེད་འགྲན་ཚོགས་ལ་ངོ་རྒོལ་གྱི་ལས་འགུལ་རྣམ་པ་འདྲ་མིན་ཐོག་ནས་སྤེལ་བཞིན་པའི་ཁྲོད་ཁ་སང་ཕྱི་ཚེས་ ༣ ཉིན་སུད་སི་གྲོང་ཁྱེར་ Lausanneདུ་རྟེན་གཞི་བྱས་པའི་རྒྱལ་སྤྱིའི་ཨོ་ལམ་སྤིག་རྩེད་འགྲན་ཚོགས་ཆུང་གི་ལས་ཁུངས་མདུན་དུ་བོད་མི་ལས་འགུལ་བ་ཚོས་རྒྱལ་སྤྱིའི་ཨོ་རྩེད་འགྲན་ཚོགས་ཆུང་གི་ངོས་ནས་རྒྱ་གཞུང་གིས་བོད་ནང་བོད་མིའི་ཆོས་དང་རིག་གཞུང་རྩ་མེད་གཏོང་བཞིན་པའི་བྱ་སྤྱོད་དང་བོད་ནང་གི་བོད་མིར་འགྲོ་བ་མིའི་ཐོབ་ཐང་མེད་པར་དུ་ངོས་འཛིན་གནང་སྟེ་འཚོགས་ལ་ཉེ་བའི་ ༢༠༢༢ ལོའི་རྒྱལ་སྤྱིའི་དགུན་དུས་ཨོ་རྩེད་འགྲན་ཚོགས་རྒྱ་ནག་ནས་ཕྱིར་འཐེན་བྱེད་དགོས་པ་དང། རྩེད་འགྲན་དེར་ད་བར་རྒྱ་ནག་གཞུང་ལ་དཔལ་འབྱོར་དང་ཆེད་ལས་ལག་རྩལ་ཐོག་ནས་རྒྱབ་སྐྱོར་བྱེད་མཁན་འབྲེལ་ཡོད་རྒྱལ་སྤྱིའི་གཞུང་སྒེར་ཚོགས་ཁག་གི་ངོས་ནས་རྒྱབ་སྐྱོར་གནང་རྒྱུ་ཕྱིར་འཐེན་གནང་དགོས་པའི་འབོད་སྐུལ་གནང་སྟེ་ཞི་བའི་ངོ་རྒོལ་གྱི་ལས་འགུལ་སྤེལ་འདུག སྤྱིར་དེ་སྔ་ ༢༠༠༨ རྒྱ་ནག་གི་པེ་ཅིང་ཨོ་རྩེད་འགྲན་ཚོགས་སྔ་རྗེས་སུ་ཚོགས་སྐབས་སུའང་བོད་མི་གཙོ་བོར་གྱུར་པའི་རྒྱལ་སྤྱིའི་ནང་གི་འགྲོ་བ་མིའི་ཐོབ་ཐང་རྩེད་ལེན་པ་ཁག་གིས་རྒྱ་ནག་དང་རྒྱལ་སྤྱིའི་ཨོ་རྩེད་འགྲན་ཚོགས་ཆུང་ལ་ངོ་རྒོལ་ཤུགས་ཆེ་གནང་ཡོད་པར་མ་ཟད་རྒྱ་ནག་གཞུང་གིས་རྒྱལ་སྤྱིའི་ཨོ་རྩེད་འགྲན་ཚོགས་ཆུང་ལ་རྒྱ་ནག་མངའ་འོག་ཏུ་ཡོད་པའི་བོད་དང་དེ་མིན་ས་ཁུལ་གཞན་ཁག་ཏུ་འགྲོ་བ་མིའི་ཐོབ་ཐང་གི་གནས་སྟངས་ཡར་རྒྱས་གཏོང་རྒྱུའི་ཁས་ལེན་བྱས་ཡོད་པ་དེ་ལྟར་ཡང། དོན་དངོས་ཐོག་ ༢༠༠༨ རྗེས་ནས་རྒྱ་ནག་གཞུང་གིས་བོད་ནང་བོད་མིར་ཕྱོགས་ཡོངས་ནས་དམ་དྲག་ཆེས་ཆེར་བྱས་པར་བརྟེན་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་ཇེ་སྡུག་ཕྱིན་ཡོད་སྟབས་ད་བར་བོད་མི་ ༡༥༠ ལྷག་གིས་རང་ལུས་མེར་བསྲེགས་བཏང་བའི་གནས་སྟངས་བྱུང་ཡོད་པ་རེད།  ཕྱི་ལོ་ ༢༠༢༢ ལོའི་རྒྱལ་སྤྱིའི་དགུན་དུས་ཨོ་རྩེད་འགྲན་ཚོགས་དེ་ཡང་རྒྱ་ནག་ཏུ་འཚོགས་གཏན་འཁེལ་ཟིན་པ་རེད། ཡོ་རོབ་བོད་ཀྱི་གཞོན་ནུ་མཐུན་ཚོགས་ལས་འགུལ་བ་རྣམས་ཀྱིས་ཁ་སང་ཕྱི་ཚེས་ ༣ ཉིན་རྒྱ་ནག་ཏུ་རྒྱལ་སྤྱིའི་དགུན་དུས་ཨོ་རྩེད་འཚོགས་རྒྱུར་ལོ་གཅིག་ལྷག་ཡོད་པའི་དུས་སྐབས་དང་བསྟུན་སུད་སིར་རྟེན་གཞི་བྱས་པའི་རྒྱལ་སྤྱིའི་ཨོ་ལམ་སྤིག་རྩེད་འགྲན་ཚོགས་ཆུང་གི་ལས་ཁུངས་མདུན་དུ་བོད་མི་ལས་འགུལ་བ་ཚོས་བོད་རང་དབང་ཞེས་འཁོད་པའི་སྟོད་གོས་གྱོན་པ་དང་ལག་ཏུ་བོད་ཀྱི་རྒྱལ་དར་དང་ ༢༠༢༢ ལོའི་པེ་ཅིང་དགུན་དུས་ཨོ་རྩེད་འགྲན་ཚོགས་ལ་ཟུར་ས་དང་སྐྱོན་བརྗོད་མཚོན་པའི་ཕྲེད་དར་འཁྱེར་ནས་མི་གསོད་ཁྲག་སྦྱོར་དང་འབྲེལ་བའི་རྩེད་འགྲན་དེ་རྒྱ་ནག་ཏུ་གནང་རྒྱུ་མེད་པ་དང་། ངོ་ཚ་ཁྲེལ་གཞུང་མེད་པའི་ཨོ་ རྩེད་ཚོགས་ཆུང། ཨོ་རྩེད་འགྲན་ཚོགས་ཆུང་གཉིད་ལས་སད་ཤོག དེ་བཞིན་བོད་ལ་རང་དབང་དགོས་པ་སོགས་ཀྱི་འབོད་ཚིག་འོག་རྒྱ་དམར་ཤོག་གཞུང་ལ་ཨོ་ལམ་སྤིག་རྩེད་འགྲན་ཚོགས་ཆུང་གི་བྱ་སྤྱོད་ལ་སྐྱོན་བརྗོད་ཀྱིས་ངོ་རྒལ་སྐད་འབོད་གནང་འདུག དེ་བཞིན་ལས་འགུལ་བ་རྣམས་ཀྱིས་རྒྱལ་སྤྱིའི་ཨོ་རྩེད་འགྲན་ཚོགས་ཆུང་གི་ལས་ཁུངས་མདུན་དུ་རྒྱལ་སྤྱིའི་ཨོ་ལིམ་སྤིག་རྩེད་འགྲན་ཚོགས་ཆུང་གི་ཚོགས་གཙོས་འགྲོ་བ་མིའི་ཐོབ་ཐང་རྡོག་རོལ་དང་མི་རིགས་སྡེབ་གསོད་བྱེད་མཁན་རྒྱ་ནག་གི་སྲིད་འཛིན་ཞི་ཅིན་ཕིང་གི་བྱ་སྤྱོད་ལ་རྒྱབ་སྐྱོར་གྱིས་ལག་འབྲེལ་ཡོད་པའི་ཟུར་ཟའི་གཏམ་བརྗོད་བརྒྱུད་རིང་མིན་རྒྱ་ནག་ཏུ་འཚོགས་རྒྱུའི་དགུན་དུས་ཨོ་རྩེད་འགྲན་ཚོགས་དེ་མི་རིགས་སྡེབ་གསོད་ཀྱི་འགྲན་ཚོགས་ཤིག་ཡིན་པར་མཚོན་ཐབས་གནང་ཡོད་པ་རེད།རྩ་བའི་ ༢༠༢༢ ལོའི་རྒྱ་ནག་ཏུ་འཚོགས་རྒྱུའི་དགུན་དུས་ཨོ་ལིམ་སྤིང་རྩེད་འགྲན་ཆེན་མོར་བོད་མི་རྣམས་ཀྱིས་སྣེ་ཁྲིད་དེ་ཤར་ཏུ་ཀི་སི་ཐན་དང་ནང་སོག ཐེ་ཝན། ཧོང་ཀོང་སོགས་ཀྱི་མང་ཚོགས་མཚོན་པའི་རྒྱལ་སྤྱིའི་ཚོགས་སྡེ་ ༡༨༠ ལྷག་མཉམ་རུབ་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཇེ་ཞན་ཇེ་སྡུག་ཏུ་འགྲོ་བཞིན་པར་སྐྱོན་བརྗོད་ཀྱིས་རྒྱལ་སྤྱིའི་ཨོ་ལམ་སྤིག་རྩེད་འགྲན་ཚོགས་ཆུང་ལ་རྒྱ་ནག་ཏུ་འགྲན་ཚོགས་དེ་བསྡུ་སྐོང་གནང་རྒྱུའི་ཐོབ་ཐང་གནང་ཐབས་མེད་པའི་ལས་འགུལ་སྣ་མང་སྤེལ་ཡོད་ཀྱང་། ད་བར་དུ་ཨོ་རྩེད་འགྲན་ཚོགས་ཀྱི་ངོས་ནས་རྒྱ་ནག་ནང་དུ་ཨོ་རྩེད་འགྲན་ཚོགས་འཚོགས་གཏན་ཁེལ་བ་དེ་ཕྱིར་བཤོལ་བྱས་མེད་སྟབས། ད་ལྟའི་ཆར་ལས་འགུལ་གྱི་ཁ་ཕྱོགས་ལ་འགྱུར་བ་བཏང་ནས་རྒྱལ་སྤྱིའི་སྲིད་གཞུང་ཁག་དང་རྩེད་འགྲན་པ་རྣམ་པར་ཞུ་སྐུལ་གནང་སྟེ་རྒྱ་ནག་ཏུ་འཚོགས་རྒྱུའི་དགུན་དུས་རྩེད་འགྲན་དེར་འཛུལ་ཞུགས་མི་གནང་བར་ངོ་རྒོལ་གནང་དགོས་བའི་གཞེན་སྐུལ་གནང་བཞིན་ཡོད་པ་རེད།

པེ་ཅིན་གྱི་དགུན་དུས་ཨོ་རྩལ་འགྲན་ཚོགས་ལ་རྒྱལ་སྤྱིའི་སྤྱི་ཚོགས་ཀྱིས་འཛུལ་ཞུགས་བྱ་རྒྱུ་མེད་པའི་རེ་འབོད།

ཕྱི་ལོ་ ༢༠༢༢ ལོའི་པེ་ཅིང་གི་དགུན་དུས་ཨོ་ལམ་སྤིག་རྩེད་འགྲན་འཚོགས་པར་ལོ་གཅིག་ཏག་ཏག་ལྷག་ཡོད་པའི་དུས་སྐབས་དང་བསྟུན། དེ་རིང་བོད་མི་དང་ནང་སོག ཡུ་གུར། ཧོང་ཀོང་སོགས་ཀྱི་འགྲོ་བ་མིའི་ཐོབ་ཐང་ཚོགས་པ་འདྲ་མིན་ ༡༨༠ ངོས་ནས་རྒྱལ་སྤྱིའི་སྤྱི་ཚོགས་ལ་སང་ལོའི་དགུན་དུས་འགྲན་ཚོགས་དེར་ཞུགས་རྒྱུ་མེད་པའི་ཞུ་འབོད་གནང་བཞིན་པའི་ཁྲོད།་དེ་རིང་སྔ་དྲོ་ཕྱག་ཚོད་བཅུ་བའི་ཐོག  བཞུགས་སྒར་ཁུལ་དུ་རྟེན་གཞི་བྱས་པའི་བོད་ཀྱི་གཞོན་ནུ་ལྷན་ཚོགས་དང་བུད་མེད། བོད་རང་བཙན་སློབ་ཕྲུག་ཚོགས་པ། དེ་བཞིན་བོད་རྒྱལ་ཡོངས་མང་གཙོ་ཚོགས་པ་དང་བོད་ཀྱི་དགུ་བཅུ་གསུམ་ལས་འགུལ་ཚོགས་པ་སོགས་ཀྱི་གཞུང་འབྲེལ་མིན་པའི་ཚོགས་པ་ལྔའི་གོ་སྒྲིག་གི་འོག  རྒྱ་ནག་གི་ནང་གི་སང་ལོའི་དགུན་དུས་ཨོ་རྩལ་འགྲན་ཚོགས་ལ་རྒྱལ་སྤྱིའི་སྤྱི་ཚོགས་ཀྱིས་འཛུལ་ཞུགས་མི་བྱེད་རྒྱུའི་རེ་ཞུ་རང་བཞིན་གྱི་གསར་འགོད་བསྒྲགས་གཏམ་ཞིག་སྤེལ་བ་མ་ཟད། མེག་གྷན་བཞི་མདོ་རུ་ཨོ་རྩལ་འགྲན་ཚོགས་ཀྱི་ལས་རྟགས་ཀྱི་སྟེང་དུ་མི་རོ་བཀལ་ནས་ཡོད་པའི་འདྲ་གཟུགས་བཤམ་སྟོན་གྱིས་ངོ་རྒོལ་གྱི་ལས་འགུལ་ཞིག་སྤེལ་སོང་།   དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཁང་ནང་དུ་ཚོགས་པའི་གསར་འགོད་ལྷན་ཚོགས་དེའི་སྐབས། དབུས་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་གཙོ་མགོན་པོ་དོན་འགྲུབ་ལགས་ཀྱིས།  ད་ལྟའི་རྒྱ་ནག་དམར་ཤོག་གི་སྲིད་གཞུང་གི་གདུག་རྩུབ་འོག་ཏུ། བོད་དང་ཡུ་གུར་མི་རིགས། དེ་བཞིན་ལྷོ་ནང་སོག་སོགས་ཀྱི་གྲངས་ཉུང་མི་རིགས་རྣམས་ཀྱི་གཙོ་བྱས་པའི་ཐེ་ཝན་དང་ཧོང་ཀོང་སོགས་ཡོངས་ཀྱི་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་ཐེབས་ཀྱི་ཡོད་སྟབས།  དེ་རིང་གི་གསར་འགོད་བསྒྲགས་གཏམ་གྱི་ལས་འགུལ་དེ་བརྒྱུད་ནས་རྒྱ་ནག་དང་ཨོ་རྩལ་མཐུན་ཚོགས་གཉིས་ལ་མཐའ་གཅིག་ཏུ་ངོ་རྒོལ་བྱེད་རྒྱུ་ཡིན་པར་མ་ཟད། རྒྱལ་སྤྱིའི་སྤྱི་ཚོགས་ཀྱི་ཚོགས་སྡེ་ཡོངས་དང་། སྒོས་སུ་རྒྱ་ནག་གི་ཨོ་རྩལ་འགྲན་ཚོགས་དེར་འཛུལ་ཞུགས་བྱེད་མཁན་གྱི་རྩེད་འགྲན་པ་ཡོངས་ལ་རེ་ཞུ་བྱས་ཏེ། རྒྱ་ནག་ནང་གི་སང་ལོའི་དགུན་དུས་ཀྱི་ཨོ་རྩལ་འགྲན་ཚོགས་དེར་འཛུལ་ཞུགས་གནང་རྒྱུ་མེད་པའི་རེ་སྐུལ་གནང་སོང་།དེ་བཞིན་སྐབས་དེར་བོད་རྒྱལ་ཡོངས་མང་གཙོ་ཚོགས་པའི་ཚོགས་གཙོ་ཚེ་བརྟན་ནོར་བུ་ལགས་ཀྱིས་དེ་རིང་གི་གསར་འགོད་བསྒྲགས་གཏམ་སྒྲོག་སྦྱང་གནང་པའི་ནང་དུ།  རྒྱལ་སྤྱིའི་ཨོ་རྩལ་མཐུན་ཚོགས་ཀྱིས་རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ལ་ལྟོས་མེད་ཀྱིས་ཕྱི་ལོ་ ༢༠༢༢ ལོའི་དགུན་དུས་ཀྱི་ཨོ་རྩལ་འགྲན་ཚོགས་རྒྱ་ནག་ཏུ་འཚོགས་རྒྱུར་ཐག་གཅོད་བྱས་པ་ནི་ཨོ་རྩལ་མཐུན་ཚོགས་ཀྱི་ངོས་ནས་རྒྱ་ནག་དམར་ཤོག་གཞུང་གི་བཙན་འོག་ཏུ་ཡོད་པའི་གྲངས་ཉུང་མི་རིགས་རྣམས་རྩ་གཏོར་དང་མི་མང་སྡེབ་གསོད་ཀྱི་བྱ་སྤྱོད་ལ་བསམ་ཤེས་མ་བྱས་པ་ཞིག་དང་། བཙན་གནོན་གྱི་རྒྱ་ནག་དམར་པོའི་རྒྱལ་ཁབ་སྲིད་གཞུང་དེ་ཁྲིམས་མཐུན་ཡིན་པར་ངོས་འཛིན་བྱས་པའི་གནས་བབ་ཅིག་ཡིིན་སྐོར་གསུངས་སོང་།འདི་གའི་གསར་འགོད་པས་སྐབས་དེར་རྒྱ་ནག་གི་སང་ལོའི་དགུན་དུས་ཀྱི་་ཨོ་རྩལ་འགྲན་ཚོགས་དེར་བོད་མིའི་གཙོ་བྱས་པའི་རྒྱལ་སྤྱིའི་འགྲོ་བ་མིའི་ཐོབ་ཐང་གི་ཚོགས་པ་བརྒྱ་དང་བརྒྱད་ཅུ་ལྷག་གིས་མཉམ་རུབ་ཀྱི་ཐོག་ནས་ད་བར་ལས་འགུལ་རབས་དང་རིམ་པ་སྤེལ་བར་གྲུབ་འབྲས་ག་རེ་ཐོན་ཡོད་མེད་ཀྱི་ཐད་ནས་བཀའ་འདྲི་ཞུས་པར་བོད་རང་བཙན་སློབ་ཕྲུག་ཚོགས་པའི་རྒྱལ་སྤྱིའི་འགན་འཛིན།  བོད་མི་མང་སྤྱི་འཐུས་ལས་ཐོག་རྡོ་རྗེ་ཚེ་བརྟན་ལགས་ཀྱིས་ཐོག་མའི་དམིགས་ཡུལ་ལྟར་ན་རྒྱ་ནག་གི་ཨོ་རྩལ་འགྲན་ཚོགས་དེ་རྒྱ་ནག་ནས་ཕྱིར་འཐེན་བྱེད་དགོས་བའི་ཐོག་ནས་ལས་འགུལ་ཤུགས་ཆེར་སྤེལ་བ་ལྟར་རྒྱ་ནག་སྲིད་གཞུང་དང་ཨོ་རྩལ་མཐུན་ཚོགས་གཉིས་ལ་གནོན་ཤུགས་ཆེན་པོ་ཞིག་སྤྲད་པ་མངོན་གསལ་བྱུང་ཡོད་པར་ལུང་འདྲེན་དང་སྦྲགས། ཨོ་རྩལ་མཐུན་ཚོགས་ཀྱི་ཚོགས་གཙོའི་ངོས་ནས་དངོས་སུ་ཨོ་རྩལ་མཐུན་ཚོགས་འདིར་ངོ་རྒོལ་སྤེལ་ན་ཡག་པོ་མེད་ལུགས་ཀྱི་རྩོམ་ཡིག་བྲིས་ཡོད་པ་མ་ཟད། ཨ་རི་དང་དབྱིན་ཡུལ་གྱི་གྲོས་ཚོགས་ནང་དུ་རྒྱ་ནག་ཏུ་བསྡུ་རྒྱུའི་ཨོ་རྩལ་འགྲན་ཚོགས་དེར་ངོ་རྒོལ་བྱེད་དགོས་བའི་གྲོས་འཆར་ཡང་བཏོན་ཡོད་པར་གསུངས་སོང་།གསར་འགོད་ལྷན་ཚོགས་རྗེས་སུ་གཞུང་འབྲེལ་མ་ཡིན་པའི་ཚོགས་པ་རྣམས་ཀྱིས་མེག་གྷན་བཞི་མདོ་རུ་ཨོ་རྩལ་འགྲན་ཚོགས་ཀྱི་ལས་རྟགས་མཚོན་པའི་ཨ་ལོང་རེ་རེའི་ཐོག་བོད་མི་དང་ཡུ་གུར། ནང་སོག ཧོང་ཀོང་། དེ་བཞིན་ཐའེ་ཝན་སོགས་ཀྱི་མི་རོ་རྣམ་པ་བཀལ་བའི་ཁྲོད། ཨོ་ལིམ་སྤིག་རྩེད་འགྲན་ལྷན་ཚོགས་ཀྱི་ཚོགས་གཙོ་དང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་མཁན་གྱི་རྒྱ་ནག་གི་སྲིད་འཛིན་གཉིས་ལག་པར་མདར་རྟགས་སྐྱོན་ཏེ། རྒྱ་ནག་ཏུ་འཚོགས་རྒྱུའི་ཨོ་རྩལ་འགྲན་ཚོགས་དེ་མི་མང་སྡེབ་གསོད་ཀྱི་འགྲན་ཚོགས་ཡིན་པའི་སྦྱར་ཡིག་འགྲེམས་སྟོན་གྱིས་རྒྱ་ནག་ཏུ་འཚོགས་རྒྱུའི་ཨོ་རྩལ་འགྲན་ཚོགས་ལ་ངོ་རྒོལ་གནང་སོང་། གཞི་རྩའི་རྒྱ་ནག་གི་ནང་དུ་སང་ལོའི་དགུན་དུས་སུ་ཨོ་རྩལ་འགྲན་ཚོགས་བསྡུ་རྒྱུའི་ཐག་གཅོད་དེར། བོད་མི་རྣམས་ཀྱི་སྣེ་ཁྲིད་པའི་ཐོག  ཡུ་གུར་ཁ་ཆེ་མི་རིགས་དང་ནང་སོག་མི་རིགས། དེ་བཞིན་ཐེ་ཝན་དང་ཧོང་ཀོང་སོགས་ཀྱི་མཚོན་པའི་རྒྱལ་སྤྱིའི་ཚོགས་སྡེ་༡༨༠ ལྷག་གིས་མཉམ་རུབ་ཀྱིས་ལས་འགུལ་སྤེལ་ཏེ། རྒྱ་ནག་ནང་གི་འགྲོ་བ་མིའི་ཐོབ་ཐང་གི་གནས་བབ་ཇེ་ཞན་ཇེ་སྡུག་ཏུ་འགྲོ་བཞིན་པའི་དུས་སྐབས་འདིར་རྒྱལ་སྤྱིའི་ཨོ་རྩལ་འགྲན་ཚོགས་ཀྱིས་རྒྱ་ནག་ཏུ་འགྲན་ཚོགས་དེ་བསྡུ་རྒྱུའི་ཐོབ་ཐང་སྤྲོད་ཐབས་མེད་པའི་ལས་འགུལ་སྣ་མང་སྤེལ་ཡོད་ནའང་། ད་ལྟའི་བར་དུ་ཨོ་རྩལ་འགྲན་ཚོགས་ཀྱིས་རྒྱ་ནག་ནག་གི་སང་ལོའི་ཨོ་རྩལ་དེ་ཕྱིར་བསྡུ་བྱས་མེད་སྟབས།  ད་ཆ་ལས་འགུལ་གྱི་ཁ་ཕྱོགས་ལ་འགྱུར་བ་བཏང་ནས་རྒྱལ་སྤྱིའི་སྲིད་གཞུང་ཁག་དང་། རྩེད་འགྲན་པ་རྣམས་པར་ཞུ་སྐུལ་གྱིས་རྒྱ་ནག་ནང་གི་ལས་འགུལ་དེར་འཛུལ་ཞུགས་མི་བྱེད་པར་ངོ་རྒོལ་བྱེད་དགོས་བའི་ཞུ་སྐུལ་གནང་བཞིན་པ་རེད་འདུག

བོད་དང་ཧོང་ཀོང་སོགས་ཀྱི་ནང་སྲིད་ལ་ཐེ་བྱུས་གནང་དབང་མེད་པའི་ཉེན་བརྡ།

རྒྱ་ནག་དབུས་དམར་ཤོག་ཚོགས་པའི་ཕྱི་སྲིད་ལས་དོན་ཚོགས་ཆུང་གི་ངེས་སྟོན་པ་ Yang Jiechi ཡིས་ཨ་རིའི་སྲིད་འཛིན་སྐུ་ཞབས་ Joe Biden མཆོག་གི་གཞུང་འཛིན་གསར་པར་བོད་དང་ཧོང་ཀོང་སོགས་རྒྱ་ནག་གི་ནང་སྲིད་གནད་དོན་ལ་ཐེ་བྱུས་གནང་རྒྱུ་མེད་པའི་ཉེན་བརྡ་བཏང་འདུགཁ་ཉིན་ཚེས་ ༡ ཉིན་ཨ་རིའི་ New York གྲོང་ཁྱེར་དུ་རྟེན་གཞི་བྱས་པའི་ National Committee on US China Relations ཞེས་ཨ་རི་དང་རྒྱ་ནག་གཉིས་ཀྱི་འབྲེལ་ལམ་ཚོགས་ཆུང་གིས་གོ་སྒྲིག་འོག་དྲ་ཐོག་གླེང་མོལ་སྟེང་རྒྱ་ནག་དབུས་དམར་ཤོག་ཚོགས་པའི་ཚོགས་མི་མཐོ་གྲས་དང་དམར་ཤོག་ཚོགས་པའི་ཕྱི་སྲིད་ལས་དོན་ཚོགས་ཆུང་གི་ངེས་སྟོན་པ་ Yang Jiechi ཡིས་སྐུ་ཞབས་ Doland Trump མཆོག་གི་གཞུང་འཛིན་འོག་ཨ་རིས་རྒྱ་ནག་ཐོག་སྲིད་བྱུས་ལོག་པ་འཛིན་པའི་རྐྱེན་གྱིས་རྒྱལ་ཁབ་ཕྱོགས་གཉིས་དབར་འབྲེལ་ལམ་ཐོག་མ་དབུ་འཛུགས་གནང་བ་ནས་ད་བར་གྱི་གནས་སྟངས་ཆེས་སྡུག་ཤོས་སུ་གྱུར་ཡོད་སྐོར་འགྲེལ་བརྗོད་དང་འབྲེལ། རྒྱ་ནག་གི་ངོས་ནས་ད་དུང་ཡང་ཞི་བདེ་དང་འཛུགས་སྐྲུན་ལ་ཡིད་ཆེས་བྱེད་བཞིན་པའི་ཁྲོད་ཞི་བདེ་མཉམ་གནས་གནང་རྒྱུ་དེས་ཕྱོགས་ཚང་མར་ཕན་ཐོགས་ཡོང་རྒྱུ་ཡིན་པ་ལྟར་ཚང་མས་དེ་དེ་བཞིན་འདོད་པར་ངོས་འཛིན་གྱི་ཡོད་སྐོར་བརྗོད་པ་དེ་ལྟར་ཡང་། ཨ་རི་གཞུང་གི་ངོས་ནས་བོད་དང་ཤིན་ཅང་། ཧོང་ཀོང་བཅས་རྒྱ་ནག་གི་ནང་སྲིད་གནད་དོན་ལ་ཐེ་བྱུས་གནང་དབང་མེད་པ་ལྟར་དེ་ལྟར་གནང་མཚམས་འཇོག་དགོས་པ་དང་། ཅི་སྟེ་མཚམས་འཇོག་མ་གནང་ཚེ་དེས་ཕྱོགས་གཉིས་ཀྱི་འབྲེལ་ལམ་ལ་གནོད་གཞིར་འགྱུར་ངེས་ཡིན་པའི་ཉེན་བརྡ་བཏང་འདུགརྩ་བའི་སྲིད་འཛིན་ Trump མཆོག་གི་གཞུང་འཛིན་འོག་ཨ་རི་ངོས་ནས་རྒྱ་ནག་ལ་ཚོང་འབྲེལ་དང་འགྲོ་བ་མིའི་ཐོབ་ཐང་། བོད་དང་ཧོང་ཀོང་། དེ་བཞིན་ཐེ་ཝན་དང་ཤིན་ཅང་བཅས་ཀྱི་གནད་དོན་ཐོག་བཞེངས་ཕྱོགས་མཁྲེགས་པོ་འཛིན་ནས་བོད་དང་ཧོང་ཀོང་གི་གནད་དོན་ཐོག་རྒྱབ་སྐྱོར་གྱི་ཁྲིམས་འཆར་ཁག་ཅིག་གཏན་འབེབས་དང་ཤིན་ཅང་གི་གནད་དོན་དང་འབྲེལ་སྟེ་རྒྱ་ནག་གི་དཔོན་རིགས་ལ་ཉེས་ཆད་བཏང་བར་མ་ཟད། ཐེ་ཝན་དང་ལྷན་དུ་འབྲེལ་ལམ་བསྐྱར་གསོ་གནང་བ་སོགས་ད་བར་ཨ་རིའི་གཞུང་འཛིན་སྔར་རྣམས་ཀྱི་ངོས་ནས་གནང་མྱོང་མེད་པའི་ཕྱག་བསྟར་མང་དག་ཅིག་གནང་ཡོད་པ་ལྟར་དེང་སྐབས་ཚང་མས་ཨ་རིའི་གཞུང་འཛིན་གསར་པའི་ངོས་ནས་རྒྱ་ནག་ཐོག་བཞེངས་ཕྱོགས་གང་འདྲ་ཡོད་མེད་ཐོག་དོ་སྣང་ཆེས་ཆེར་གནང་བཞིན་པ་རེད།ཉེ་ཆར་ཕྱི་ཟླ་ ༡ ཚེས་ ༢༠ ཉིན་ཨ་རིའི་སྲིད་འཛིན་སྐུ་ཞབས་ Joe Biden མཆོག་གི་གཞུང་འཛིན་གསར་པའི་ཕྱག་ལས་དངོས་སུ་དབུ་འཛུགས་གནང་བ་ནས་བཟུང་རྒྱ་ནག་གི་དཔོན་རིགས་མཐོ་གྲས་ཕྱོགས་ནས་སྐད་ཆ་བཤད་མཁན་ Yang Jiechi ཟེར་བ་དེ་ཆེས་ཐོག་མ་ཆགས་ཀྱི་ཡོད་པ་རེད། Yang Jiechi ཡིས་དྲ་ཐོག་གཏམ་བཤད་སྤེལ་བར་ Cooperation འམ་མཉམ་འབྲེལ་དང་མཉམ་ལས་སོགས་ཀྱི་ཚིག་བརྗོད་ཐེངས་ ༢༤ ཙམ་སྤྱོད་དེ་རྒྱལ་ཁབ་ཕྱོགས་གཉིས་ཀྱི་འབྲེལ་ལམ་ཆེས་ཞན་པོ་ཆགས་པ་དེ་བསྐྱར་གསོ་བྱེད་དགོས་པའི་སྐུལ་མ་བསྐྱར་ནན་བྱས་འདུག རྒྱ་ནག་དམར་ཤོག་ཚོགས་པའི་གཞུང་འཛིན་ནང་རྒྱ་ནག་གི་ཕྱི་སྲིད་བློན་ཆེན་ལས་དབང་ཆ་ཆེ་བ་ཡོད་པའི་ Yang Jiechi ཡིས་ད་དུང་རྒྱལ་ཁབ་ཕྱོགས་གཉིས་ཀྱི་ཚོང་འབྲེལ་ཁྲོད་རྒྱལ་སྲུང་གི་གནད་དོན་ལ་མཐོང་ཆུང་གནང་རྒྱུ་མེད་པའི་ཉེན་བརྡ་ཡང་བཏང་འདུག

བོད་རྒྱལ་ཡོངས་རྩེད་རིགས་ཚོགས་པའི་ཚོགས་གཙོར་བཅར་འདྲི།

ཁ་སང་ཕྱི་ཟླ་ ༢ ཚེས་ ༢ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བོད་རྒྱལ་ཡོངས་རྩེད་རིགས་ཚོགས་པའི་ལས་ཁུངས་གསར་པ་དབུ་འབྱེད་གནང་བ་དང་སྦྲགས། ད་ཆ་ཚོགས་པ་དེ་དངོས་སུ་གཞུང་འབྲེལ་ཐོག་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ཚན་པའི་ངོ་བོའི་ཐོག་ནས་ཕྱག་ལས་གནང་རྒྱུ་དབུ་འཛུགས་གནང་འདུགརྩ་བའི་ཕྱི་ལོ་ ༡༩༩༠ ལོར་ཆེད་འཛུགས་གནང་བའི་བོད་རྒྱལ་ཡོངས་རྩེད་རིགས་ཚོགས་པ་ནི་ཕྱི་ལོ་ ༢༠༡༩ ལོར་བོད་མིའི་སྒྲིག་འཛུགས་ཀྱི་ཁྱབ་ཁོངས་སུ་ཆགས་འདུག་པ་དང་དེ་སྔ་དྷ་སྟེང་དུ་ཡོད་པའི་རྩེད་རིགས་ཚོགས་པའི་ལས་ཁུངས་དེ་ད་ཆ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་སུ་གནས་སྤོས་ཡོད་པ་རེད།  ཚོགས་པ་དེ་ ༡༩༩༠ ལོའི་ནང་ཐོག་མར་ཆེད་འཛུགས་ཀྱིས་ཕྱི་ལོ་ ༢༠༠༢ ཟླ་ ༥ ནང་དངོས་སུ་དེབ་སྐྱེལ་གནང་བ’འི་ཚོགས་པ་ཞིག་ཆགས་ཀྱི་ཡོད་པ་རེད།  ད་བར་ཚོགས་པ་དེའི་གོ་སྒྲིག་འོག་༸རྒྱལ་ཡུམ་ཆེན་མོ་གསེར་གྱི་རྟགས་མའི་རྩེད་འགྲན་ཐེངས་ ༢༥ ཚོགས་ཐུབ་པ་བྱུང་བར་མ་ཟད་རྒྱལ་སྤྱིའི་སྡིངས་ཆའི་སྟེང་ཐེངས་བཞི་འཛུལ་ཞུགས་གནང་ཡོད་པ་རེད། རྩེད་རིགས་ཚོགས་པའི་འགན་འཛིན་བསྟན་འཛིན་རིན་ཆེན་ལགས་སུ་རྩེད་རིགས་ཚོགས་པ་དེ་བོད་མིའི་སྒྲིག་འཛུགས་ཀྱི་ཁྱབ་ཁོངས་སུ་འཛུལ་ཞུགས་གནང་དོན་གང་ཡིན་དང་། དེ་བཞིན་མ་འོངས་པའི་ལས་འཆར་གང་དང་གང་སྤེལ་འཆར་ཡོད་མེད་སོགས་ཀྱི་སྐོར་ལ་དམིགས་བསལ་བཅར་འདྲི་ཁག་ཅིག་ཞུས་ཡོད། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བོད་རྩེད་རིགས་ཚོགས་པའི་ལས་ཁུངས་དབུ་འབྱེད་གནང་སྐབས་ལུས་སེམས་གཉིས་ཀྱི་འཕྲོད་བསྟེན་བདག་གཅེས་གནང་དགོས་གལ་དང་། རྩེད་རིགས་ཁྲོད་བོད་མི་གཞོན་སྐྱེས་ཚོའི་ནུས་པ་སྐྱེད་སྲིང་བྱ་རྒྱུའི་གལ་གནད་སོགས་གཙོས་ད་བར་སྒྲིག་འཛུགས་ཀྱི་ངོས་ནས་རྩེད་རིགས་ཚོགས་པར་མཐུན་འགྱུར་གནང་ཡོད་སྐོར་སོགས་ཀྱི་གསུང་བཤད་གནང་བ་དང་སྦྲགས། རྩེད་རིགས་ཚོགས་པ་དང་བོད་མིའི་སྒྲིག་འཛུགས་གཉིས་མཉམ་འབྲེལ་གནང་དགོས་དོན་གཙོ་བོ་ནི་ཕུགས་རྒྱང་རིང་པོར་སྨན་པའི་བོད་མིའི་འཕྲོད་བསྟེན་ཡར་རྒྱས་དང་ལྷག་པར་དུ་རྩེད་མོའི་གོ་སྐབས་འདྲ་མིན་བརྒྱུད་ནས་གཞོན་སྐྱེས་རྣམས་ངན་པར་ལང་ཤོར་གྱི་ཕྱོགས་སུ་མི་འགྲོ་བར་ཕན་ཐོགས་ཡོད་སྐོར་གསུངས་འདུག

Latest news