Homepage

ཁ་སང་ཟླ་ ༦ ཚེས་ ༢༦ ཉིན་ཐེ་ཝན་དུ་དགའ་ལྡན་ཤར་རྩེ་ནང་ཆོས་སློབ་གཉེར་ཁང་གི་ཆོས་ཚོགས་དང་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་འཁྲུངས་སྐར་དུས་ཆེན་སྔ་སྣུར་གྱིས་སྲུང་བརྩི་ཞུས་འདུག ཐེ་ཝན་ནང་རྟེན་གཞི་བྱས་པའི་ Dr. Sun Yat Sen དྲན་རྟེན་ཚོགས་ཁང་དུ་མི་མང་སྟོང་ཕྲག་ལྷག་མཉམ་འཛོམས་ཀྱིས་༸གོང་ས་མཆོག་ཕྱི་ལུགས་ལྟར་དགུང་གྲངས་ ༨༣ ལ་ཕེབས་པའི་༸སྐུའི་འཁྲུངས་སྐར་དུས་ཆེན་སྲུང་བརྩི་ཞུས་པ་སྦྲགས། ཐེ་ཝན་བོད་བརྒྱུད་ནང་བསྟན་དགའ་ལྡན་ཤར་རྩེ་ནང་ཆོས་སློབ་གཉེར་ཁང་གི་ཆོས་ཚོགས་ནས་མགོན་པོ་༸གང་ཉིད་མཆོག་ལ་ཇི་ལྟར་གསོལ་འདེབས་ཞུས་པ་བཞིན།  ༸གང་ཉིད་མཆོག་གིས་དྲྭ་ལམ་ཐད་གཏོང་བརྒྱུད་ཐེ་ཝན་དད་ལྡན་མང་ཚོགས་ཚོར་བཀའ་སློབ་དང་བཀའ་འདྲིར་བཀའ་ལན་མཛད་པ་དང་འབྲེལ། ངོས་ཀྱི་སྐྱེས་སྐར་རྟེན་འབྲེལ་གྱི་ལག་རྟགས་ཡག་ཤོས་ནི་ཁྱེད་རྣམ་པས་བྱམས་པ་དང་སྙིང་རྗེའི་ཐོག་ནས་གཞན་ལ་སེམས་པ་བཟང་པོ་བྱ་རྒྱུ་དང་།  ཁོར་ཡུག་སྲུང་སྐྱོབ་བྱ་རྒྱུ།   དེ་བཞིན་མཉམ་རུབ་ཀྱིས་བོད་ཀྱི་ཆོས་དང་རིག་གཞུང་གཅེས་སྐྱོང་བྱ་དགོས་ཞེས་དང་ལྷག་དོན་ཁྱེད་རྣམས་ངོས་ཀྱི་གྲོགས་པོ་ཡིན་ན་ངོས་ནས་ཤད་པ་དེ་ལག་ལེན་བསྟར་དགོས་ཞེས་བཀའ་བསྩལ་འདུག ༸གོང་ས་མཆོག་གི་༸སྐུའི་འཁྲུངས་སྐར་དུས་ཆེན་སྲུང་བརྩི་དང་འབྲེལ་ཐེ་ཝན་མི་མང་ནས་མགོན་པོ་མཆོག་༸སྐུ་ཚེ་༸ཞབས་པད་བརྟན་པ་དང་༸གང་ཉིད་མཆོག་གི་མཛད་འཕྲིན་མཐའ་དག་ཡར་ངོས་ཟླ་ལྟར་འཕེལ་བར་ཐུགས་སྨོན་དང་བཅས་༸གོང་ས་མཆོག་གི་མཚན་ཐོག་ཏུ་སྨན་ཁང་ཁག་ལ་ནད་པ་འདྲེན་བྱེད་ཀྱི་འགྲུལ་འཁོར་ཞལ་འདེབས་ཕུལ་འདུག གཞན་ཡང་རིང་མིན་ཟླ་བ་ ༧ ཚེས་ ༡ ཉིིན་ཐེ་ཝན་སྐུ་ཚབ་དོན་གཅོད་ཁང་ནས་རྐང་འགན་བཞེས་ཐོག་ཐེ་ཝན་དུ་གནས་བཞུགས་བོད་མི་རྣམས་དང་།   དགའ་ལྡན་ཤར་རྩེ་ཆོས་ཚོགས་ཀྱི་ཚོགས་གཙོ་སོགས་གདན་ཞུས་ཀྱིས་༸གང་ཉིད་མཆོག་གི་༸སྐུའི་འཁྲུངས་སྐར་དགའ་སྟོན་གྱི་རྟེན་འབྲེལ་དང་། སྨོན་ལམ་གསོལ་འདེབས་ཀྱི་ལས་རིམ་འཚོགས་རྒྱུ་རེད་འདུག དེ་དང་ཕྱོགས་མཚུངས་ཕྱི་ལོ་ ༢༠༡༨ ལོ་དེ་བཞིན་བཀའ་ཤག་ནས་བཙན་བྱོལ་བོད་མི་རྣམས་ནས་རང་ཉིད་ཀྱི་གནས་ཡུལ་གཞུང་མང་གཉིས་ལ་ཐུགས་རྗེ་ཆེ་ཞུའི་ལོར་སྲུང་བརྩི་དགོས་པའི་ལམ་སྟོན་གནང་བ་ལྟར་འདི་ལོ་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་གསར་འཛུགས་གནང་ནས་ལོ་ངོ་ ༢༠ འཁོར་བ་དང་བསྟུན་ཐེ་ཝན་སྐུ་ཚབ་དོན་གཅོད་ཁང་ནས་འགྲིམ་འགྲུལ་སྣུམ་འཁོར་ངོས་སུ་ཐེ་ཝན་གཞུང་མང་གཉིས་ནས་ད་བར་བོད་མི་ཚོར་གཡོ་བ་མེད་པའི་རྒྱབ་སྐྱོར་གནང་བར་བཀྲིན་རྗེས་དྲན་ཞུས་འདུག གཞན་ཡང་འདི་ལོའི་ལོ་ཐོ་འདོན་སྤེལ་དང་བོད་གཞུང་ཟློས་གར་ཚོགས་པས་རིག་གཞུང་དང་འབྲེལ་བའི་གཞས་སྣ་ཁག་ཅིག་གཟིགས་འབུལ་བརྒྱུད་ཐུགས་རྗེ་ཆེ་ཞུ་གནང་རྒྱུ་རེད་འདུག

དགའ་ལྡན་བྱང་རྩེ་ཐོས་བསམ་ནོར་གླིང་གྲྭ་ཚང་གི་ཚན་རིག་སྡེ་ཚན་དང་རྗེ་ཀླུ་འབུམ་ཁང་ཚན་ཐུན་མོང་ནས་གོ་སྒྲིག་གནང་ཐོག་ཁ་སང་ཚེས་ ༢༦ ཕྱི་དྲོ་དགའ་ལྡན་བྱང་རྩེ་གྲྭ་ཚང་གི་འདུ་ཁང་དུ་ནང་པའི་དགེ་བཤེས་མཁས་དབང་དང་དེང་རབས་ཚན་རིག་མཁས་དབང་དབར་ནང་པའི་སེམས་ཁམས་རིག་པ་དང་དེང་རབས་དབང་རྩའི་ཚན་དབར་གཞི་རྒྱ་ཆེ་བའི་བགྲོ་གླེང་ཞིག་ཚོགས་གནང་ཡོད་པ་རེད། དགའ་ལྡན་བྱང་རྩེ་ཐོས་བསམ་ནོར་གླིང་གྲྭ་ཚང་གི་ཚན་རིག་སྡེ་ཚན་དང་རྗེ་ཀླུ་འབུམ་ཁང་ཚན་ཐུན་མོང་ནས་གོ་སྒྲིག་གནང་བའི་ནང་པའི་སེམས་ཁམས་རིག་པ་དང་དེང་རབས་ཀྱི་དབང་རྩའི་ཚན་རིག་དབར་གྱི་བགྲོ་གླེང་ཐོག་ཤར་བྱང་གཉིས་ཀྱི་མཁན་རིན་པོ་ཆེ་རྣམ་པ་གཉིས་ཀྱིས་གཙོས་དབུ་ཆོས་རྣམ་པ། དཔེ་ཁྲིད་དགེན་རྣམ་པ། ཨེ་མོ་རི་དང་བོད་ཀྱི་ཚན་རིག་ལས་འཆར་དབྱར་ཁའི་ཟབ་སྦྱོང་ཐོག་ཆེད་ཕེབས་གནང་བའི་ནུབ་ཕྱོགས་པའི་ཚན་རིག་དགེ་རྒན་ཆེན་མོ་རྣམས། དེ་བཞིན་བཙུན་མ་རྣམ་པ། མོན་གྷོ་གཏན་སློབ་ཀྱི་སློབ་མ་རྣམས། གཞན་ཡང་དགེ་འདུན་འདུས་མང་དང་བཅས་ཁྱོན་མི་གྲངས་སྟོང་ཕྲག་བརྒལ་བ་མཉམ་ཞུགས་གནང་འདུག དགའ་ཤར་དགེ་བཤེས་ལྷ་རམས་པ་བྱམས་པ་ཤེས་རབ་ལགས་ཀྱིས་ཀླད་པ་ལས་འདས་པའི་སེམས་ཀྱི་གནས་ལུགས་ཞེས་པའི་བརྗོད་གཞིའི་ཐོག་གསུང་བཤད་གནང་བ་དང་། ཚན་རིག་དགེ་རྒན་ལྕམ་རི་ཆར་ཇཱེ་ཀོབ་སི་ལགས་ཀྱིས་ཀླད་པ་གཙོ་བོར་འཛིན་པའི་ཀླད་རྩའི་རྣམ་གཞག། དགའ་བྱང་ལྷ་རམས་པ་རྒན་ཚེ་བརྟན་རྡོ་རྗེ་ལགས་ཀྱིས་ནང་པའི་སེམས་ཁམས་རིག་པ་ལས་བྱུང་བའི་མིག་ཤེས་ཀྱི་ངོ་བོ་དང་དེ་ཡུལ་ལ་འཇོག་ཚུལ།  ཚན་རིག་དགེ་རྒན་སྦི་རི་ཌི་ལྦ་སྦལ་ལགས་ནས་དེང་རབས་ཚན་རིག་ལས་མཐོང་ཚོར་མ་ལག་དང་འབྲེལ་བའི་སྒོ་ནས་ཡུལ་ལ་འཇུག་ཚུལ་བཅས་ཀྱི་ཐོག་གསུང་བཤད་གནང་བ་མ་ཟད་དེ་འབྲེལ་བརྗོད་གཞིའི་ཐོག་དྲི་བ་དྲིས་ལན་ཡང་གནང་ཡོད་པ་རེད། རྩ་བའི་དགའ་ལྡན་རྗེ་ཀླུ་འབུམ་ཁང་ཚན་དང་བྱང་རྩེ་གྲྭ་ཚང་ཐོུང་ནས་ད་བར་ཚན་རིག་བགྲོ་གླེང་ཐེངས་གསུམ་གནང་ཡོད་པ་དང་ད་རེས་ཐེངས་བཞི་པ་དེ་ཆགས་ཀྱི་འདུག

ཟླ་བ་འདིའི་ཚེས་ ༢༢ ཉིན་ནས་ཁ་སང་ཚེས་ ༢༦ བར་ཁྱོན་ཉིན་གྲངས་ལྔའི་རིང་བཞུགས་སྒར་དུ་ཚོགས་པའི་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་རྒྱ་བལ་འབྲུག་གསུམ་ནང་གནས་འཁོད་བོད་མིའི་ས་གནས་འགོ་འཛིན་རྣམ་པའི་འཛིན་སྐྱོང་ཚོགས་ཆེན་ཐེངས་བཅུ་གཉིས་པ་མཇུག་སྒྲིལ་གནང་སོང་། ཚོགས་ཆེན་ཐོག་ཕེབས་པའི་རྒྱ་བལ་འབྲུག་གསུམ་ནང་གི་བཙན་བྱོལ་བོད་མིའི་གཞིས་ཆགས་ ༤༥ནས་ཁྱོན་ས་གནས་འགོ་འཛིན་ ༤༣ འདུ་འཛོམས་བྱུང་ཡོད་པ་དང། ཉིན་གྲངས་ལྔའི་རིང་ཚོགས་པའི་ཚོགས་ཆེན་ཐོག་ཚོགས་བཅར་བ་རྣམས་ནས་༸གོང་ས་མཆོག་གི་༸སྐུ་ཕྱྭའི་སྲུང་སྐྱོབ་དང་། སྔ་ལོའི་ཚོགས་ཆེན་གྲོས་ཆོད་ལ་བསྐྱར་ཞིབ། ༢༠༡༤ ལོའི་སྐྱབས་བཅོལ་བོད་མིའི་མཐུན་རྐྱེན་སྦྱོར་སྤྲོད་ཀྱི་སྲིད་བྱུས་ད་བར་ས་གནས་ག་ཚོད་ནང་ལག་བསྟར་གནང་ཐུབ་ཡོད་པ་དང་དེའི་གྲུབ་འབྲས་སྐོར། ལྔ་དང་ལྔ་བཅུའི་སྲིད་བྱུས་དགོངས་དོན་ལྟར་གཞིས་ཆགས་སྲ་བརྟན་དང་ས་གནས་འགོ་འཛིན་ཀྱི་ལས་ཁུངས་ཁག་རང་ཁ་རང་གསོ་ཡོང་ཐབས། འབྱུང་འགྱུར་ལོ་གསུམ་ནང་ཛ་དྲག་གི་གལ་ཆེའི་ལས་འཆར་སྤེལ་རྒྱུ། བོད་ནས་བྱེས་སུ་ཕེབས་པའི་བོད་མིར་སྡོད་ཁང་མེད་པའི་དཀའ་ངལ་སེལ་ཐབས་བྱ་རྒྱུའི་སྐོར། དེ་བཞིན་གཞིས་ཆགས་ཁག་གི་མཉམ་འབྲེལ་དང་སྤྱི་མཐུན་མཉམ་འབྲེལ། བཟོ་ཚོགས་བཅས་ཀྱི་གནས་སྟངས་སྐོར་ཐོག་མའི་དམིགས་ཡུལ་བཞིན་ཇི་ཙམ་བསྒྲུབ་ཐུབ་ཡོད་མེད་བཅས་གྲོས་གཞི་ཁག་མི་འདྲ་བ་བདུན་གྱི་ཐོག་བཀའ་བསྡུར་གནང་ཡོད་པ་རེད། རྩ་བའི་ཁ་སང་ཕྱི་དྲོ་ཚོགས་འདུའི་མཇུག་བསྡོམས་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དེང་སྐབས་བཙན་བྱོལ་བོད་མིའི་སྤྱི་ཚོགས་འདི་དེ་སྔ་དཀའ་སྡུག་མང་པོ་འཕྲད་པའི་སྐྱབས་བཅོལ་བའི་སྤྱི་ཚོགས་ཤིག་ནས་གྲུབ་འབྲས་གཟེངས་སུ་ཐོན་པའི་སྤྱི་ཚོགས་ཤིག་ཆགས་ཡོད་པ་གསུངས་སོང་། ལྷག་དོན་བེུད་ནུས་སྟོབས་ཀྱི་གལ་གནད་དང་འབྲེལ་ད་ཆ་བཙན་བྱོལ་བོད་མིའི་ཁྲོད་ཤེས་ཡོན་གྱི་ཆ་ནས་འཛིན་རིམ་བཅིུས་ཐོན་མཁན་དང་མཐོ་སློབ་ལ་བསྐྱོད་མཁན། དེ་བཞིན་འབུམ་རམས་པའི་སློབ་གཉེར་བྱེད་མཁན་གྱི་བརྒྱ་ཆ་ལ་གཞིགས་ཚེ་བེུད་མང་བ་ཡོད་པ་དང། སྲི་ཞུ་བའི་ཁོངས་སུའང་ལོ་རེ་བཞིན་བེུད་འཛུལ་ཞུགས་བྱེད་མཁན་མང་དུ་ཕྱིན་ཡོད་སྐོར་གསུངས་པ་མ་ཟད། ཉེ་བའི་ཆར་དྲྭ་ལམ་ཐོག་བེུད་ལ་བཙན་གཡེམ་བྱས་པའི་གནད་དོན་ཞིག་ཐོན་བཞིན་ཡོད་པ་ནི་ཐབས་སྐྱོ་བའི་གནས་སྟངས་ཤིག་ཡིན་པ་དང། མ་འོངས་པར་གནས་ཚུལ་དེ་རིགས་ས་གནས་སུ་བྱུང་ཚེ་ངེས་པར་དུ་ས་འགོ་འཛིན་རྣམས་ཀྱིས་བཟོད་སྲན་སྤུ་ཙམ་མེད་པར་རྒྱ་གར་གྱི་ཁྲིམས་ལ་གཏུགས་དགོས་པར་ནན་སྐུལ་གནང་ཡོད་པ་རེད།

ཉན་པ།: Listen ཕབ་ལེན། Download ༸གོང་ས་མཆོག་གིས་རྒྱ་གར་གྱི་གནའ་བོའི་རིག་གཞུང་གིས་ནང་སེམས་ཀྱི་དཀའ་ངལ་ལ་གདོང་ལེན་གནང་ཐུབ་ཀྱི་རེད་ཅེས་བཀའ་བསྩལ་བ། མནར་གཅོད་དང་འབྲེལ་བའི་རི་མོ་བྲིས་འགྲེམས་བརྒྱུད་རྒྱལ་སྤྱིའི་མནར་གཅོད་འགོག་པའི་ཉིན་མོ་སྲུང་བརྩི་ཞུས་སོང། བོད་ཀྱི་གནའ་བོའི་རིག་གནས་ཤུལ་བཞག་སྲུང་སྐྱོབ་དགོས་པའི་ཞུ་འབོད་གནང་འདུག བོད་ཀྱི་མཛངས་པ་ཉི་མ་ལགས་གོ་ལའི་མཛངས་པའི་འགྲན་བསྡུར་ནང་མཉམ་བཞུགས་གནང་རྒྱུ། བོད་ཀྱི་གླུ་གཞས་ལས་རིམ། ཟླ་བ་བུ་ཁྲིད་ལགས་ཀྱིས་བླངས་བའི་རྒྱལ་སྲས་མཁྱེན། Tuesday 26/06/2018 Ancient Indian values can help tackle emotion: Dalai Lama to Indian students Quilt of Dreams: International day in support of Torture victims marked in Dharamsala UNESCO urged to protect Lhasa's remaining cultural heritage Mr Tibet gears up for 2018 Mister Global pageant MUSIC FEATURE: Gyalsey Khen, a tribute to Karmpa Rinpoche by Dawa Bhuti

 བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་བཞུགས་སྒར་༸རྒྱལ་བའི་ཕོ་བྲང་དུ་རྒྱ་གར་གྱི་སློབ་ཕྲུག་ཁག་ཅིག་ལ་དམིགས་བསལ་བཀའ་སློབ་བསྩལ་བ་དང་སྦྲགས།  རྒྱ་གར་གྱི་ལོ་ངོ་སྟོང་ཕྲག་ལྷག་སོང་བའི་གནའ་བོའི་རིག་གཞུང་གིས་ནང་སེམས་ཀྱི་དཀའ་ངལ་ལ་གདོང་ལེན་བྱེད་ཐུབ་ཀྱི་རེད་ཅེས་བཀའ་བསྩལ་མཛད་འདུག   དེ་ཡང་ཝཱ་རཱ་ཎ་སཱིར་རྟེན་གཞི་བྱས་པའི་རྒྱ་གར་སློབ་གྲྭ་ཞིག་གིས་ཇི་ལྟར་གསོལ་འདེབས་ཞུས་པ་ལྟར། མགོན་པོ་༸གང་ཉིད་མཆོག་གིས་རྒྱ་གར་གྱི་སློབ་ཕྲུག་རྣམས་ལ་དམིགས་བསལ་བཀའ་སློབ་དང་བཀའ་འདྲིར་བཀའ་ལན་བཀྲིན་ཆེ་བ་བསྩལ་ཡོད་པ་རེད། སྐབས་དེར་༸གང་ཉིད་མཆོག་གིས་དེང་དུས་ཀྱི་ཤེས་ཡོན་སློབ་གསོ་ནང་ཕྱིའི་དངོས་པོར་དོ་སྣང་སྤྲད་པ་མ་གཏོགས་ནང་སེམས་ཀྱི་རིན་ཐང་གོང་འཕེལ་ཐོག་དོ་སྣང་གནང་གི་མེད་པ་དང།  ད་ལྟའི་དུས་སྐབས་ཀྱི་མི་རབས་ཁྲོད་ནང་སེམས་ཀྱི་དཀའ་ངལ་མང་པོ་ནི་ཕྱིའི་དངོས་པོ་ལ་དོན་གཉེར་ཤུགས་ཆེ་བྱེད་བཞིན་པར་བརྟེན་ནས་ཡོང་བ་ཞིག་ཡིན་པར་བཀའ་བསྩལ་བ་མ་ཟད་རྒྱ་གར་གྱི་ལོ་ངོ་སྟོང་ཕྲག་ལྷག་སོང་བའི་གནའ་བོའི་རིག་གཞུང་ལས་ཞི་གནས་དང་ལྷག་མཐོང་ལ་སོགས་པའི་རིག་གནས་ཀྱི་ཤེས་བྱ་མང་པོ་ཞིག་བདག་ཅག་གི་སྟོན་པ་མ་ཕེབས་པའི་གོང་དུ་རྒྱ་གར་ནང་ཡོད་པ་ཞིག་ཡིན་ཀྱང་། དེང་སྐབས་རྒྱ་གར་ཡུལ་མི་རྣམས་ནས་ཁྱད་དུ་འཕགས་པའི་གནའ་བོའི་རིག་གཞུང་རྣམས་བརྗེད་པའི་རྣམ་པ་ལྟ་བུ་ཞིག་འདུག་པས་རྒྱ་གར་བ་ཚོས་རིག་གཞུང་དེ་དག་གསོན་པོ་གནང་ཐབས་ལ་འབད་དགོས་པར་ལམ་སྟོན་བསྩལ་བ་དང་ཆབས་ཅིག དེང་དུས་ཀྱི་ཤེས་ཡོན་སློབ་གསོའི་ཁྲོད་ནང་སེམས་ཀྱི་རིན་ཐང་གོང་འཕེལ་ཐོག་སློབ་ཁྲིད་གནང་དགོས་གལ་ཡིན་པར་བཀའ་ནན་བསྩལ་འདུགད་ལྟའི་མི་རབས་དང་མ་འོངས་པའི་མི་རབས་རྣམས་ནས་རྒྱ་གར་གྱི་གནའ་བོའི་རིག་གཞུང་ཐོག་བསླབ་པ་སློབ་གཉེར་གནང་ནས་ནང་སེམས་ཀྱི་བདེ་སྐྱིད་གོང་འཕེལ་གནང་རྒྱུའི་འགོ་ཐོག་མ་རྒྱ་གར་ནས་བཙུགས་ཏེ་རྒྱ་ནག་དང་རིམ་བཞིན་འཛམ་བུ་གླིང་ཡོངས་ལ་ཁྱབ་སྤེལ་གནང་དགོས་གནད་ཡིན་པ་བཀའ་བསྩལ་འདུག སློབ་ཕྲུག་རྣམས་ནས་༸གང་ཉིད་མཆོག་ལ་བཀའ་འདྲི་ཁག་ཅིག་ཞུས་ཡོད་པ་ལྟར་སློབ་ཕྲུག་ཞིག་གིས་མིའི་མི་ཚེ་དངོས་ཀྱི་རང་གཤིས་གང་ཡིན་ནམ་ཞེས་བཀའ་འདྲི་ཞུས་པར་༸གང་ཉིད་མཆོག་གིས་བདེ་སྐྱིད་ནི་མིའི་མི་ཚེར་དགོས་དོན་གཙོ་བོ་ཡིན་སྐོར་བཀའ་བསྩལ་དང་འབྲེལ་ཏེ་མི་ཚེ་ནང་གནས་སྟངས་འདྲ་མིན་འོག་དཀའ་ངལ་ཅི་འདྲ་ཞིག་འཕྲད་ཀྱང་བློ་ཆུང་བའི་སྒོ་ནས་བསམ་བློ་གཏང་ཚེ་མཐར་རང་ཤི་བརྒྱབ་རྒྱུ་དང།  ཆང་རག་ལ་སྤྱོད་རྒྱུ།  བཟི་སྨན་ལ་སོོགས་པར་ལོངས་སུ་སྤྱད་ནས་མི་ཚེ་སྟོང་ཟད་གྱུར་བས་དེ་ལས་དུས་དང་རྣམ་པ་ཀུན་ཏུ་རེ་བ་བཟང་ས་ནས་བརྒྱབ་རྒྱུ་དང་བསམ་བློ་གུ་ཡངས། དེ་བཞིན་བློས་དཔྱད་པའི་ཐོག་དཀའ་ངལ་ལ་གདོང་ལེན་བྱེད་དགོས་པར་ལམ་སྟོན་རྒྱ་ཆེ་མཛད་འདུག དེ་བཞིན་སློབ་ཕྲུག་གཞན་ཞིག་གིས་ཀྱང་ང་ཚོ་ཆོས་ལ་འཇུག་དགོས་དོན་གང་ཡིན་ནམ་ཞེས་བཀའ་འདྲི་ཞུས་པར་༸གོང་ས་མཆོག་གིས་ཆོས་ཕྱོགས་ལ་འཇུག་མི་འཇུག་ནི་རང་ཉིད་སོ་སོའི་འདོད་མོས་ཡིན་པ་དང་། འཛམ་གླིང་ནང་མི་མང་དུང་ཕྱུར་བདུན་ཡོད་པ་ལས་དུང་ཕྱུར་གཅིག་ནི་ཆོས་དད་མེད་མཁན་ཡིན་པ་དང་། འགྲོ་བ་མི་དུང་ཕྱུར་དྲུག་ཡོད་པ་རྣམས་ནས་ཀྱང་ཡོངས་རྫོགས་ཆོས་ལ་སེམས་རྩེ་གཅིག་ཏུ་འཇུག་མཁན་མེད་པ་རེད། དཔེར་ན།   བྷར་མ་ནང་ཡོད་པའི་ནང་པའི་འཇིགས་སྐུལ་བར་ངོས་འཛིན་བཞིན་པ་དེ་དག་དོན་དམ་པའི་ནང་པ་མིན་པ་དང་གལ་ཏེ་དོན་དམ་པའི་ནང་པ་དང་ཁ་ཆེ་བ་ཡིན་ཚེ་མི་གསོད་ཁྲག་སྦྱོར་གྱི་ལས་བྱེད་ཀྱི་མ་རེད་ཅེས་བཀའ་བསྩལ་བ་དང་ཆབས་ཅིག་ཏུ་ཆོས་ལུགས་ཚང་མས་བྱམས་པ་དང་བརྩེ་བ་ཁྱབ་སྤེལ་གནང་གི་ཡོད་སྐོར་བཀའ་བསྩལ་ཡོད་པ་རེད། རྩ་བའི་ད་ལྟའི་ཆར་བཞུགས་སྒར་དྷ་སར་ཡོད་པའི་རྒྱ་གར་གཞུང་གི་མཐོ་རིམ་སློབ་གྲྭ་ནས་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་བསླབ་གཞི་ལས་འཆར་ཞིག་སྤེལ་མུས་ཡིན་པ་དང།  སྒོས་སུ་ཕྱི་ལོ་ ༢༠༡༨ ཟླ་ ༧ ཚེས་ ༢ ཉིན་ནས་རྒྱ་གར་གྱི་རྒྱལ་ས་ལྡི་ལིའི་མངའ་སྡེ་གཞུང་གི་སྟངས་འཛིན་འོག་ཡོད་པའི་སྔོན་འགྲོ་ནས་འཛིན་རིམ་བརྒྱད་པ་བར་གྱི་སློབ་གྲྭ་ཚང་མའི་ནང་རྒྱུན་ལྡན་སློབ་ཚན་རྣམས་ཡོད་པའི་ཐོག་བདེ་སྐྱིད་སྐྲུན་ཐབས་ Happiness Curriculum ཞེས་པའི་སློབ་ཚན་འཕར་མ་ཞིག་སློབ་ཁྲིད་གནང་རྒྱུ་ཡིན་པ་ལྟར་༸གོང་ས་༸སྐྱབས་མགོན་ཆེན་པོ་མཆོག་ནས་བསླབ་གཞི་དེ་ དབུ་འབྱེད་མཛད་ཀྱི་ཡོད་པ་དང་འབྲེལ། ༸གོང་ས་མཆོག་ནས་དགེ་རྒན་ ༥༠༠༠ ལྷག་ཙམ་དང་བོད་པའི་མཁས་དབང་ཁག་ཅིག་གདན་ཞུས་ཐོག་རྒྱ་གར་གྱི་གནའ་བོའི་རིག་གཞུང་ཇི་ལྟར་གསོན་པོ་གནས་ཐབས་ཀྱི་མཛད་སྒོ་ཞིག་ཀྱང་འཚོགས་རྒྱུ་ཡིན་པ་རེད།

དེ་རིང་ཟླ་ ༦ ཚེས་ ༢༦ ཉིན་མོ་འདི་ནི་རྒྱལ་སྤྱིའི་མཉམ་འབྲེལ་རྒྱལ་ཚོགས་ནས་གཏན་འབེབས་གནང་བའི་ International Day in Support of Victims of Torture འམ་རྒྱལ་སྤྱིའི་མནར་གཅོད་འགོག་རྒོལ་ཉིན་མོ་ཡིན་པ་དང་བསྟུན། བཞུགས་སྒར་དུ་རྟེན་གཞི་བྱས་པའི་བོད་ཀྱི་དགུ་བཅུ་གསུམ་ལས་འགུལ་ཚོགས་པས་དྷ་སྟེང་བོད་ཁྱིམ་སློབ་གྲྭའི་ཚོགས་ཁང་དུ་རྨི་ལམ་གྱི་ཡོལ་བ་ཞེས་པའི་བརྗོད་གཞིའི་ཐོག་མནར་གཅོད་དང་འབྲེལ་བའི་རི་མོ་བྲིས་འགྲེམས་བརྒྱུད་སྲུང་བརྩི་ཞུས་སོང་། ལས་རིམ་ཐོག་གཙོ་བོ་དྷ་སྟེང་བོད་ཁྱིམ་སློབ་གྲྭའི་འཛིན་རིམ་བདུན་པའི་སློམ་མ་ཡོངས་ནས་མཉམ་ཞུགས་གནང་ཡོད་པ་དང་། སྐབས་དེར་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་རྒྱུན་ལས་བསོད་ནམས་རྡོ་རྗེ་ལགས་ནས་དེ་རིང་གི་ཉིན་མོ་སྲུང་བརྩི་དང་འབྲེལ་བའི་གསར་འགོད་བསྒྲགས་གཏམ་སྙན་སྒྲོན་གནང་བའི་བརྒྱུད་བོད་ཀྱི་མདོ་དབུས་ཁམས་གསུམ་གྱི་ས་གནས་གང་སར་རྒྱ་གཞུང་ནས་དམག་མི་བཀྲམ་པ་དང་། གསང་བའི་པར་ཆས་བཙུགས་ཏེ་བོད་མིའི་འགྲོ་སྡོད་སྤྱོད་གསུམ་ལ་སོ་ལྟ་བྱས་པ་དང་། བོད་ཀྱི་དགོན་སྡེ་དང་གཞི་རིམ་གྲོང་གསེབ་ཁག་ཏུ་རྒྱ་གཞུང་གི་ལས་དོན་ཚོགས་ཆུང་ཟེར་བ་ཆེད་བཙུགས་ཀྱིས་བོད་མི་ཞི་རྒོལ་བ་རྣམས་བཙོན་འཇུག་མུ་མཐུད་བྱེད་བཞིན་པ་སོགས་འགྲེལ་བརྗོད་དང་སྦྲགས། རྒྱ་གཞུང་གི་བཙན་གནོན་དང་སྡུག་རྩུབ་འོག་འདས་གྲོངས་སུ་ཕྱིན་པ་དང་འདི་བཞིན་ད་ལྟ་མུ་མཐུད་ནས་མནར་གཅོད་མྱོང་བཞིན་པ་རྣམས་ལ་གདུང་སེམས་མཉམ་བསྐྱེད་དང་། ལྷག་དོན་མནར་གཅོད་མྱོང་བཞིན་པ་རྣམས་མུན་ནག་གི་བཙོན་ཁང་ནས་གྲོལ་ཏེ་རང་དབང་གི་མཁའ་དབུགས་རྔུབ་ལེན་ཐུབ་པའི་རེ་སྨོན་ཞུ་བཞིན་ཡོད་པ་གསུངས་ཡོད། བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ངོས་ནས་དེང་སྐབས་འཛམ་བུ་གླིང་འདིའི་ཐོག་མནར་གཅོད་དང་སྡུག་རྩུབ་མྱོང་བཞིན་པའི་གྲངས་འབོར་སྔར་ལྷག་མང་དུ་འགྲོ་བཞིན་ཡོད་པ་དང་། ལྷག་པར་དུ་མི་རིགས་དབྱེ་འབྱེད་དང་ཆོས་ལུགས་དབྱེ་འབྱེད། ཕོ་མོ་དབྱེ་འབྱེད། སྐད་ཡིག་དབྱེ་འབྱེད་སོགས་ཀྱི་གནས་ཚུལ་ལའང་ཛ་དྲག་ཏུ་འགྲོ་བཞིན་ཡོད་སྟབས། ཚང་མས་དེ་རིང་གི་ཉིན་མོ་འདི་བཞིན་འཆར་ཅན་ཙམ་མ་ཡིན་པར་འཛམ་གླིང་འདི་བཙན་གནོན་དང་མནར་གཅོད་མེད་པའི་འཛམ་གླིང་ཞིག་ཆགས་ཐབས་སུ་འབད་བརྩོན་དང་དམ་བཅའ་གསར་པ་ཞིག་འཇོག་དགོས་གལ་ཡིན་པ་གསུངས་ཡོད། དེ་བཞིན་སྐབས་དེར་འཛིན་རིམ་བདུན་པའི་སློབ་མ་རྣམས་ནས་རང་ཉིད་ཀྱི་འཆར་སྣང་ཐོག་རས་གཞི་དཀར་པོའི་སྟེང་དུ་རྨི་ལམ་གྱི་ཡོལ་བ་ཞེས་པའི་བརྗོད་གཞིའི་ཐད་རྒྱ་གཞུང་གི་སྲིད་བྱུས་འོག་བོད་མི་རྣམས་མི་སྤྱོད་ལས་འདས་པའི་མནར་གཅོད་མྱོང་སྟངས་དང་འབྲེལ་བའི་བཙོན་ཁང་གི་གནས་སྟངས་དང་། མེ་མདའ། དེ་བཞིན་བོད་ཀྱི་རྒྱལ་དར་དང་བོད་རྒྱའི་དབར་ལག་པ་གཏོང་བཞིན་པ་སོགས་རི་མོ་མི་འདྲ་བ་ལྔ་བཅུ་ལྷག་བྲིས་ནས་འགྲེམས་སྟོན་གནང་ཡོད་པ་རེད། བོད་ཀྱི་དགུ་བཅུ་གསུམ་ལས་འགུལ་ཚོགས་པས་སློབ་ཕྲུག་དེ་དག་ལ་བོད་མིའི་ཆབ་སྲིད་བཙོན་པའི་ལོ་རྒྱུས་དང་རང་ལུས་མེར་སྲེག་དང་འབྲེལ་བའི་བརྙན་ཐུང་ཞིག་ཀྱང་གཟིགས་འབུལ་ཞུས་ཡོད་སྟབས། སྐབས་དེར་སློབ་མ་ཁག་ཅིག་ནས་རང་སྲེག་ལས་གཞན་པའི་ཤེས་ཡོན་རང་གི་ཐོག་ནས་བོད་ཀྱི་བདེན་དོན་གསལ་ཐབས་གནང་དགོས་གལ་ཡིན་པའི་དགོངས་འཆར་ཕུལ་སོང་།

ཆེས་ཐོག་མའི་ཕྱི་ལོ་ ༢༠༡༧ ལོའི་བོད་ཀྱི་མཛངས་པ་འགྲན་སྡུར་ཁྲོད་ནས་ཨང་དང་པོའི་རྒྱལ་ཁ་ཐོབ་མཁན་སྦེང་ལོར་ཁྲིམས་ལུགས་རིག་པའི་ཐོག་སློབ་གཉེར་གནང་བཞིན་པ་བོད་པའི་གཞོན་སྐྱེས་ཉི་མ་ལགས་འདི་ལོ་ཕྱི་ལོ་ ༢༠༡༨ ལོའི་ཕྱི་ཟླ་ ༧ ཚེས་ ༡༢ ནས་ ༢༡ བར་ཐེ་ལན་གྱི་རྒྱལ་ས་སྦེང་ཀོག་ནང་འཚོགས་རྒྱུའི་སྐབས་ལྔ་པའི་ Mister Global འམ་མཛངས་པའི་འགྲན་བསྡུར་ནང་བདམས་ཐོན་བྱུང་འདུག ཐེངས་འདིའི་གོ་ལའི་མཛངས་པ་འགྲན་བསྡུར་ནང་རང་བཙན་ཡོད་པའི་སྟོབས་ཆེན་རྒྱལ་ཁབ་རྒྱ་ནག་དང་།  རྒྱ་གར། སྦར་ཛིལ་སོགས་རྒྱལ་ཁབ་ ༤༠ ལྷག་གི་ནང་ནས་མི་གྲངས་༤༠ ལྷག་མཉམ་ཞུགས་གནང་གི་འདུག

ཉན་པ།: Listen ཕབ་ལེན། Download རྒྱལ་ཞེན་རིང་ལུགས་ཀྱི་ལྟ་བས་རྒྱལ་ཁབ་གཞན་གྱི་བདེ་སྡུག་སྣང་མེད་གཏང་ན་ནོར་འཁྲུལ་རེད། རྒྱ་ནག་གིིས་དམ་དྲག་འོག་བྲོས་བྱོལ་ཕྱིན་པའི་བོད་མི་ཞིག་གི་ནང་མིར་དཀའ་ངལ་སྤྲད་འདུག སྲིད་སྐྱོང་མཆོག་ཨིས་རེལ་ནང་གཞུང་འབྲེལ་འཚམས་གཟིགས། རྒྱ་གཞུང་གིས་ལ་དྭགས་ནང་སིམ་འཛུལ་བྱེད་པར་གདོང་ལེན་དགོས། Shangai རྒྱལ་སྤྱིའི་གློག་བརྙན་དུས་སྟོན་ཐོག་བོད་མི་གློག་བརྙན་བར་བྱ་དགའ་ཐོབ་པ། དམིགས་བསལ་ལེ་ཚན། ༸རྒྱལ་མཆོག་སྐུ་ཕྲེང་ལྔ་པའི་སྐོར། Monday 25/06/2018 Extreme Nationalism is wrong: Dalai Lama at Happiness and Wellbeing Forum Family of Tibetan woman who fled Chinese repression harassed Sikyong Lobsang Sangay visits Jerusalem India urged to rebuff Chinese moves in Ladakh Sonthar Gyal’s Ala Changso wins Jury Grand Prix award HISTORY FEATURE: Fifth Dalai Lama Ngawang Lobsang Gyatso

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨོ་སི་ཊོ་ལི་ཡའི་གྲོང་ཁྱེར་ Sydney ནང་ཚོགས་པའི་ཞི་བདེ་དང་དེའི་རྒྱུ་རྐྱེན་ཞེས་མང་ཚོགས་སྟོང་ཕྲག་བརྒལ་བའི་ལྷན་ཚོགས་ཀྱི་ཐད་གཏོང་དྲྭ་བརྙན་ཐོག་རྒྱལ་ཞེན་རིང་ལུགས་ཀྱི་ལྟ་བ་མཁྲེགས་བཟུང་གིས་རྒྱལ་ཁབ་གཞན་གྱི་མང་ཚོགས་ཀྱི་བདེ་སྡུག་དང་རང་དབང་ལ་སྣང་མེད་གཏང་ཚེ་དེ་ནི་ནོར་འཁྲུལ་རེད་ཅེས་བཀའ་བསྩལ་འདུག ཨོ་སི་ཊོ་ལི་ཡའི་གྲོང་ཁྱེར་ Sydney ནང་དེ་རིང་དང་སང་ཉིན་བཅས་ཉིན་གཉིས་རིང་འཚོགས་བཞིན་པའི་ "Happiness & Its Causes" ཞེས་པའི་རྒྱལ་སྤྱིའི་ལྷན་ཚོགས་ཀྱི་གོ་སྒྲིག་ཚོགས་ཆུང་ནས་ཇི་ལྟར་གསོལ་འདེབས་ཞུས་དོན་ལྟར། མགོན་པོ་མཆོག་གིས་དེ་རིང་བཞུགས་སྒར་༸རྒྱལ་བའི་ཕོ་བྲང་ནས་ཐད་གཏོང་དྲྭ་ལམ་བརྒྱུད་ཕྱི་ལོ་ ༢༠༡༨ ལོའི་ཞི་བདེ་དང་དེའི་རྒྱུ་རྐྱེན་ཞེས་པའི་ལྷན་ཚོགས་ཐོག་བཅར་བའི་ཚོགས་བཅར་བ་ཡོངས་ལ་བཀའ་སློབ་དང་བཀའ་འདྲིར་བཀའ་ལན་བཀྲིན་ཆེ་བ་བསྐྱངས་ཡོད་པ་རེད། སྐབས་དེར་༸གོང་ས་༸སྐྱབས་མགོན་ཆེན་པོ་མཆོག་གིས་དེང་སྐབས་འཛམ་གླིང་འདིའི་ཐོག་སྐྱབས་བཅོལ་བ་ཚོར་རྒྱལ་ཁབ་གཞན་ནང་འཛུལ་སྐབས་ས་མཚམས་ནས་བཀག་འགོག་བྱས་པ་སོགས་ཀྱི་དཀའ་ངལ་མང་པོ་འཕྲད་བཞིན་པའི་གནད་དོན་དང་འབྲེལ།  ༸གང་ཉིད་མཆོག་གིས་དེ་ནི་གཙོ་བོ་ནང་སེམས་ཀྱི་རིན་ཐང་ཐོག་སློབ་གསོ་དང་བྱམས་བརྩེ་མ་འདང་བར་བརྟེན་ནས་ཡིན་པར་བཀའ་གནང་བ་དང་འབྲེལ། དེང་སྐབས་སྟོབས་ཆེན་རྒྱལ་ཁབ་ཨ་རི་ལྟ་བུར་ཆ་མཚོན་ན་འཛམ་གླིང་འདིའི་ཆ་ཤས་ཤིག་ཡིན་པ་མ་ཟད་མ་འོངས་པའི་མདུན་ལམ་ཡང་རྒྱལ་ཁབ་གཞན་ལ་བརྟེན་དགོས་པ་དང། སྤྱིར་རྒྱལ་ཞེན་རིང་ལུགས་བྱེད་ན་འགྲིག་གི་ཡོད་པ་དེ་ལྟར་ཡང།  དེང་སྐབས་བློ་རྒྱ་ཆུང་བའི་བསམ་བློ་འཛིན་མཁན་ཨ་རིས་གཙོས་པའི་རྒྱལ་ཁབ་ཁག་ཅིག་གིས་རྒྱལ་ཞེན་རིང་ལུགས་ཀྱི་ལྟ་བ་མཁྲེགས་བཟུང་གིས་རང་ཉིད་ཀྱི་རྒྱལ་ཁབ་ཀྱི་ཁེ་ཕན་གྱི་ཨང་དང་པོར་བཞག་ནས་རྒྱལ་ཁབ་གཞན་གྱི་མང་ཚོགས་ཀྱི་རང་དབང་དང་བདེ་སྡུག་སྣང་མེད་གཏང་ཚེ་དེ་ནི་ནོར་འཁྲུལ་རེད་ཅེས་བཀའ་ནན་བསྩལ་འདུག མགོན་པོ་༸གང་ཉིད་མཆོག་གིས་ད་ལྟའི་དུས་རབས་ཉེར་གཅིག་པའི་ནང་འཛམ་གླིང་གི་ཤར་ལྷོ་ནུབ་བྱང་རྒྱལ་ཁབ་ཚང་མའི་མ་འོངས་པའི་མདུན་ལམ་ནི་སྔར་དང་མི་འདྲ་བར་གཅིག་ལ་གཅིག་བརྟེན་ཆགས་ཡོད་པ་དང་དེའང་དོན་དངོས་ཐོག་གོ་ལའི་དཔལ་འབྱོར་དང་གོ་ལོའི་གནམ་གཤིས་འགྱུར་ལྡོག་གི་གནད་དོན་ནི་དེ་སྔ་དང་མི་འདྲ་བར་འཛམ་བུ་གླིང་འདིའི་ཐོག་རྒྱལ་ཁབ་ཚང་མར་ས་མཚམས་ཀྱི་དབྱེ་བ་མེད་པར་གཅིག་མཚུངས་ཀྱི་དཀའ་ངལ་ཞིག་ཆགས་ཡོད་སྟབས། འཛམ་གླིང་ཐོག་ཡོད་པའི་འགྲོ་བ་མི་ཐེར་འབུམ་བདུན་པོ་ཚང་མས་དུས་རབས་ཉེར་གཅིག་པ་འདིའི་དོན་དངོས་ཀྱི་གནས་སྟངས་ངོས་འཛིན་གྱིས་ཁས་ལེན་གནང་བ་དང་ལྷན་འགྲོ་བ་མིའི་ཚང་མ་གཅིག་གྱུར་གྱི་འདུ་ཤེས་གཞིར་བཞག་ཐོག་གོ་ལ་སྤྱིའི་འགན་ཁུར་བླངས་དགོས་པ་ནི་དུས་ཀྱི་དགོས་མཁོ་ཡིན་པ་བཀའ་བསྩལ་འདུག ཐད་གཏོང་དྲྭ་བརྙན་ལས་རིམ་ཐོག་བཅར་བའི་ཚོགས་བཅར་བས་༸གང་ཉིད་ལ་མཆོག་ལ་ཨ་རིའི་སྲིད་འཛིན་ལས་ཐོག་ཊམ་སྐོར་འཀའ་འདྲི་ཞུས་པར་སྲིད་འཛིན་ཊམ་མཆོག་ནི་རང་དབང་ལྡན་པའི་འཛམ་གླིང་འདི་སྣེ་ཁྲིད་བྱེད་མཁན་གྱི་ཨ་མི་རི་ཀའི་རྒྱལ་ཁབ་ཀྱི་མང་ཚོགས་ནས་འོས་འདེམས་གནང་བའི་འགོ་ཁྲིད་ཞིག་ཡིན་སྟབས་༸གང་ཉིད་མཆོག་ནས་གུས་བརྩི་ཞུ་བཞིན་ཡོད་པ་དེ་ལྟར་ཡང། སྲིད་འཛིན་ཁོང་ནས་འཛིན་བཞིན་པའི་ཨ་རི་དང་པོ་ཞེས་པའི་ལྟ་བ། ཨ་རིས་ཕ་རན་སི་ནང་ཚོགས་པའི་གོ་ལའི་གནམ་གཤིས་ཚ་དྲོད་ཆ་སྙོམས་དང་འབྲེལ་བའི་ཕ་རན་སི་གྲོས་མཐུན་ནས་ཕྱིར་འཐེན་གནང་བ་དང་། དེ་བཞིན་དཔལ་འབྱོར་གནད་དོན་ཆུང་ཙགས་ཀྱི་རྒྱུ་མཚན་བྱས་ནས་ཨ་རི་དང་ཡོ་རོབ་རྒྱལ་ཁབ་ཕན་ཚུན་དབར་འབྲེལ་ཐག་རིང་དུ་སོང་བ། དེ་བཞིན་སྲིད་འཛིན་མཆོག་གིས་སྐྱབས་བཅོལ་བའི་ཐོག་འཛིན་པའི་ལྟ་བ་བཅས་ཀྱི་ཐོག་མགོན་པོ་༸གང་ཉིད་མཆོག་མོས་མཐུན་མེད་སྐོར་བཀའ་བསྩལ་བ་དང་འབྲེལ། ཨ་རིའི་ངོས་ནས་རང་དབང་དང་ལྡན་པའི་འཛམ་གླིང་སྣེ་ཁྲིད་གནང་མཁན་རྒྱལ་ཁབ་ཞིག་ཡིན་པའི་ཆ་ནས་དེ་དང་མཐུན་པའི་ལངས་ཕྱོགས་འཛིན་ནས་འཛམ་གླིང་རང་དབང་ཆེད་དུ་རྒྱབ་སྐྱོར་གནང་དགོས་ཞེས་དང།  ཨ་རིར་སྐྱབས་བཅོལ་དུ་ཡོང་མཁན་མང་ཚོགས་དེ་དག་ནས་ཨ་རིར་གུས་བརྩི་དང་རེ་བ་ཆེན་པོ་བྱས་ནས་སྐྱབས་བཅོལ་དུ་ཡོང་སྟབས་ཨ་རིའི་རྒྱལ་ཁབ་ཀྱི་ངོས་ནས་སྤོབས་པ་གནང་དགོས་པ་ཞིག་རེད་ཅེས་བཀའ་བསྩལ་འདུག གཞན་ཡང་སྐབས་དེར་མགོན་པོ་༸གང་ཉིད་མཆོག་གི་༸སྐུ་ཚེ་ནང་ཐུགས་ཐག་བཅད་ཁག་ལས་ནོར་འཁྲུལ་བྱུང་ཡོད་མེད་སྐོར་བཀའ་འདྲི་ཞུས་པར་དགོང་ལོ་ ༡༦ ནས་བོད་ཀྱི་ཆབ་སྲིད་ཀྱི་ཐུགས་འགན་བཞེས་པ་ནས་ཕྱི་ལོ་ ༢༠༡༡ ལོར་ཆབ་སྲིད་ཀྱི་༸སྐུ་དབང་ཆ་ཚང་མང་ཚོགས་ནས་འོས་འདེབས་བྱས་པའི་འགོ་ཁྲིད་ལ་གསོལ་བསྩལ་གནང་སྐོར་དང་འབྲེལ་༸གང་ཉིད་མཆོག་ནས་ཐུགས་ཐག་གང་བཅད་པ་དེ་དག་ཕུགས་རྒྱང་རིང་པོར་ནོར་འཁྲུལ་མེད་པར་ཡག་པོ་བྱུང་ཡོད་པར་ངོས་འཛིན་གནང་བཞིན་ཡོད་པའི་བཀའ་ལན་མཛད་འདུག སྐབས་དེར་ལས་རིམ་གཙོ་སྐྱོང་བས་མགོན་པོ་༸གང་ཉིད་མཆོག་ལ་ད་ལྟའི་ཆར་ཆབ་སྲིད་ཀྱི་༸སྐུ་དབང་རྩིས་སྤྲོད་ཟིན་ཡོད་ཀྱང་བོད་ཀྱི་གནད་དོན་ཐོག་ཐུགས་ཁུར་བཞེས་ཕྱོགས་སྐོར་བཀའ་འདྲི་ཞུས་པར་༸གང་ཉིད་མཆོག་གིས་དུས་རབས་བདུན་པ་དང་བརྒྱད་པའི་སྐབས་བོད་ཀྱི་རྒྱལ་ཁམས་དང། སོག་པའི་རྒྱལ་ཁམས། དེ་བཞིན་རྒྱ་ནག་གི་རྒྱལ་ཁམས་བཅས་ཁག་སོ་སོར་གནས་ཡོད་པ་དང། དུས་རབས་དགུ་པ་ནས་བོད་དེ་སིལ་བུར་ཐོར་ཡོད་པ་དེ་ལྟར་ཡང། བོད་ཀྱི་སྐད་ཡིག་དང་ནང་ཆོས་དང་འབྲེལ་བའི་རིག་གཞུང་འདིས་བོད་ས་ཡོངས་རྫོགས་མི་རིགས་གཅིག་གི་ངོ་བོར་གནས་ཐུབ་པ་བྱུང་ཡོད་པ་མ་གཏོགས་དུས་རབས་མང་པོ་ནང་ཆབ་སྲིད་ཐོག་འཐུས་ཤོར་བཏང་ཡོད་པ་བཀའ་བསྩལ་བ་མ་ཟད།  ཕྱོགས་གཞན་ཞིག་ནས་༸གང་ཉིད་མཆོག་གིས་རྒྱ་ནག་དམར་པོའི་གཞུང་གིས་བོད་སར་དབང་སྒྱུར་བྱས་ནས་བོད་མི་ཚོར་དཀའ་ངལ་མང་པོ་འཕྲད་པར་བརྟེན་ད་ཆ་བོད་ཀྱི་ས་ཁུལ་ཁག་ཏུ་ཡོད་པའི་བོད་མི་ས་ཡ་དྲུག་པོ་ཚང་མ་ཆིག་སྒྲིལ་བྱུང་བ་དང། གལ་ཏེ་དེ་འདྲ་ཞིག་བྱུང་མེད་ཚེ་བོད་མི་ཚོ་ད་དུང་ང་དང་ཁོའི་ས་ཆ་ཞེས་རང་གཅེས་འཛིན་གྱི་བློ་འཁྱེར་ནས་གནས་ཡོད་པ་དང་། རྒྱ་ནག་གིས་བོད་ལ་དབང་སྒྱུར་བྱས་པ་དེ་ཡག་པོ་བྱུང་ཡོད་པའི་དགོངས་པ་འཁོར་གྱི་འདུག་ཅེས་བཀའ་བསྩལ་འདུག གཞན་ཡང་༸གང་ཉིད་མཆོག་གིས་ད་ལྟའི་དུས་སྐབས་འདིར་ཆོས་ལུགས་མཐུན་སྒྲིལ། འགྲོ་བ་མིའི་གཅིག་གྱུར་གྱི་འདུ་ཤེས་འཛིན་རྒྱུའི་གལ་གནད། སྤྱི་ཚོགས་ནང་བྱམས་བརྩེ་གོང་འཕེལ་བཅས་དེ་དག་ཡོང་བ་ལ་ཤེས་ཡོན་གྱི་སློབ་གསོ་ཁག་གི་ནང་དུ་ཕྱིའི་དངོས་པོ་འདུ་ཤེས་ཁོ་ན་མ་ཡིན་པར་ནང་སེམས་ཀྱི་རིན་ཐང་སྐོར་སློབ་ཁྲིད་གནང་བར་འབད་དགོས་གལ་ཡིན་པ་སོགས་ཀྱི་ཐད་ལམ་སྟོན་རྒྱ་ཆེ་མཛད་འདུག རྩ་བའི་ཨོ་སི་ཊོ་ལི་ཡའི་གྲོང་ཁྱེར་ Sydney ནང་ཚོགས་པའི་ཞི་བདེ་དང་དེའི་རྒྱུ་རྐྱེན་ཞེས་མང་ཚོགས་སྟོང་ཕྲག་བརྒལ་བའི་ལྷན་ཚོགས་དེ་དེ་རིང་དང་སང་ཉིན་བཅས་ཉིན་གཉིས་རིང་ཚོགས་ཀྱི་ཡོད་པ་རེད། ལྷན་ཚོགས་ཐོག་འཛམ་གླིང་ཞི་བདེའི་ཐོག་ཕྱག་ལས་གནང་མཁན། ཆེད་ལས་མི་སྣ། དེ་བཞིན་ཤེས་ཡོན་དང་ཉམས་མྱོང་གི་རྒྱབ་ལྗོངས་འདྲ་མིན་ཡོད་པའི་གནད་ཡོད་མི་སྣ་མང་དག་ཞིག་ནས་གཏམ་བཤད་གནང་གི་འདུག ལྷན་ཚོགས་གོ་སྒྲིག་ཚོགས་ཆུང་གི་ངོས་ནས་༸གོང་ས་༸སྐྱབས་མགོན་ཆེན་པོ་མཆོག་མ་འོངས་པར་ཨོ་སི་ཊོ་ཡ་ནང་ཆིབས་བསྒྱུར་མཛད་ནས་ལྷན་ཚོགས་ཐོག་དབུ་བཞུགས་ཡོང་བར་གསོལ་འདེབས་ཞུས་ཡོད་པ་རེད།