ཕྱི་ལོ་ ༢༠༡༤ ལོར་རྒྱ་གར་དབུས་གཞུང་གིས་གཏན་འབེབས་གནང་བའི་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ཕྱི་ལོ་ ༢༠༡༤ ཞེས་པ་དེ་ད་བར་རྒྱ་གར་མངའ་སྡེ་ཧི་མཱ་ཅལ་པར་དེ་ཤི་དང་། ཨུཏྟར་ཁནྜ། ཀ་ན་ཊ་ཀ་བཅས་ཀྱི་ནང་གཏན་འབེབས་གནང་ཡོད་པ་ལྟར། ཉེ་ཆར་སྲིད་བྱུས་དེ་ཨ་རུ་ནཱ་ཅལ་མངའ་སྡེ་ནང་དུ་དེ་མཚུངས་གཏན་འབེབས་གནང་གཏན་འཁེལ་ཡོད་པ་ཡོངས་བསྒྲགས་གནང་འདུག
གནད་དོན་དེ་དང་འབྲེལ་རྒྱ་གར་བྱང་ཤར་ཨ་རུ་ནཱ་ཅལ་པར་དེ་ཤི་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་པདྨ་མཁའ་འགྲོ་མཆོག་གི་དབུ་ཁྲིད་འོག་མངའ་སྡེའི་གཞུང་གིས་ ༢༠༡༤ ལོའི་བཙན་བྱོལ་བོད་མིའི་སྲིད་བྱུས་དེ་ལག་བསྟར་གནང་གཏན་འཁེལ་ཡོད་པ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གི་མཚན་ཐོག་ལ་ཕྱག་བྲིས་ཤིག་གནང་འདུག་པའི་ནང་། སྤྱི་ཁྱབ་བློན་ཆེན་མཆོག་གིས་ཉེ་ཆར་ཨ་རུ་ནཱ་ཅལ་མངའ་སྡེའི་བཀའ་ཤག་ལྷན་ཚོགས་ཐོག་ཁོང་དང་ཁོང་གི་ཕྱག་རོགས་རྣམས་ཀྱིས་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ཕྱི་ལོ་ ༢༠༡༤ ཞེས་པ་འདི་མངའ་སྡེ་དེའི་ནང་གཏན་འབེབས་ལག་བསྟར་ཞུ་རྒྱུའི་ཐག་གཅོད་བྱུང་བ་སྲིད་སྐྱོང་བློ་བཟང་སེང་གེ་མཆོག་ལ་སྙན་གསེང་ཞུས་པ་དང་སྦྲགས།
ཨུ་རུ་ནཱ་ཅལ་མངའ་སྡེ་ནི་རྒྱ་གར་ནང་བོད་མི་བཙན་བྱོལ་བ་གནས་སྡོད་བྱ་ཡུལ་ཆེ་ཤོས་བཞི་པ་དེ་ཆགས་ཡོད་སྟབས། ས་གནས་དེ་དག་ནང་གནས་སྡོད་བྱེད་བཞིན་པའི་བཙན་བྱོལ་བོད་མི་གཞོན་སྐྱེས་རྣམས་ལ་གོ་སྐབས་དང་མཐུན་འགྱུར་ཇེ་བཟང་དུ་གཏོང་ཆེད་རྒྱ་གར་དབུས་གཞུང་གིས་གཏན་ལ་ཕབ་པའི་སྲིད་བྱུས་དེ་ཉིད་ལག་བསྟར་བྱ་རྒྱུར་ཞལ་བཞེས་གནང་འདུག ལྷག་པར་དུ་སྲིད་སྐྱོང་མཆོག་ནས་ཀྱང་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག་ལ་ཐུགས་རྗེ་ཆེ་ཞུས་པ་དང་སྦྲགས་ཏེ་ཨ་རུ་ནཱ་ཅལ་མངའ་སྡེ་ལ་མཚོན་ན་ལོ་རྒྱུས་ཐོག་ནས་བོད་མི་ཚོ་དང་འབྲེལ་བ་ཧ་ཅང་ཤུགས་ཆེ་ཡོད་པ་དང་། ད་ལན་མངའ་སྡེ་དེའི་ནང་བོད་མིར་རྒྱབ་སྐྱོར་གྱི་སྲིད་བྱུས་གཏན་འབེབས་གནང་ཐུབ་པ་དེས་ཕྱོགས་གཉིས་དབར་མཛའ་འབྲེལ་གྱི་འདུ་ཤེས་སྔར་ལྷག་ཤུགས་ཆེ་རུ་འགྲོ་ངེས་ཡིན་པ་རེད། དེས་ན་ངས་ཐེངས་འདིའི་གོ་སྐབས་བརྒྱུད་སྤྱི་ཁྱབ་བློན་ཆེན་མཆོག་གི་ཡབ་དམ་པ་ཨ་རུ་ནཱ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་སྐུ་ཞབས་རྡོ་རྗེ་མཁའ་འགྲོ་མཆོག་རྗེས་དྲན་ཞུས་པ་དང་འབྲེལ། དམ་པ་ཁོང་གིས་མངའ་སྡེ་དེའི་ནང་གི་བོད་མི་རྣམས་ལ་རོགས་རམ་རྒྱ་ཆེ་གནང་བར་བཀའ་དྲིན་རྗེས་དྲན་ཞུ་རྒྱུ་ཡིན་ཞེས་གསུངས་ཡོད་པ་རེད།
ཨ་རུ་ནཱ་ཅལ་མངའ་སྡེའི་ནང་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་གཏན་འབེབས་གནང་ཕྱོགས་སྐོར་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་དྲུང་འཕར་ཀརྨ་ཆོས་དབྱིངས་ལགས་སུ་བཅར་འདྲི་ཁག་ཅིག་ཞུས་ཡོད།