བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ལྷོ་ཨ་ཕི་རི་ཀར་གཞུང་འབྲེལ་ཕྱོགས་ཕེབས་ཆེས་ཐོག་མ་དེ་བསྐྱངས་ཡོད་པ་རེད།
སྲིད་སྐྱོང་མཆོག་གིས་ཡོ་རོབ་རྒྱལ་ཁབ་གསུམ་ནང་གི་གཞུང་འབྲེལ་ཕྱོགས་ཕེབས་གྲུབ་པའི་རྗེས་སུ་ཟླ་བ་འདིའི་ཕྱི་ཚེས་ ༥ ནས་ལྷོ་ཨ་ཕི་རི་ཀའི་གྲོང་ཁྱེར་ཇོ་ནེསི་བྷག་ཏུ་གཞུང་འབྲེལ་ཕྱོགས་ཕེབས་གནང་བཞིན་འདུག་པ་དང། ཐེངས་འདིའི་གཞུང་འབྲེལ་ཕྱོགས་ཕེབས་དེ་ལྷོ་ཨ་ཕི་རི་ཀའི་ཨིན་ཀ་ཐ་ཆབ་སྲིད་ཚོགས་པས་གདན་ཞུ་ཕུལ་བ་ལྟར། ཡུལ་དེའི་གྲོས་ཚོགས་སུ་ལྷོ་ཨ་ཕི་རི་ཀའི་སྲིད་འཛིན་ཛུ་མ་མཆོག་གི་རྒྱལ་ཡོངས་གཏམ་བཤད་མཛད་སྒོའི་ཐོག་ཆེད་ཕེབས་གནང་བ་ཞིག་ཆགས་ཀྱི་འདུག
ལྷག་ཏུ་ད་རེས་སྲིད་སྐྱོང་མཆོག་ལྷོ་ཨ་ཕི་རི་ཀར་གཞུང་འབྲེལ་ཕྱོགས་གནང་བ་དེ་ནི་སྲིད་སྐྱོང་བློ་བཟང་སེང་གེ་མཆོག་སྲིད་སྐྱོང་ཀྱི་ཐུགས་འགན་བཞེས་རྗེས་ཁུལ་དེར་གཞུང་འབྲེལ་ཕྱོགས་ཕེབས་གནང་བ་ཆེས་ཐོག་མ་ཆགས་ཀྱི་ཡོད་པ་རེད།
སྲིད་སྐྱོང་མཆོག་ལྷོ་ཨ་ཕི་རི་ཀར་ཉིན་གྲངས་བརྒྱད་རིང་གི་གཞུང་འབྲེལ་ཕྱོགས་ཕེབས་ལེགས་གྲུབ་རྗེས་ཕྱི་ཚེས་ ༩ ཉིན་རྒྱ་གར་ལ་ཕྱིར་ཕེབས་གནང་རྒྱུ་ཡིན་པ་རེད།
རྩ་བའི་འདས་པའི་ལོ་ཤས་ནང་ལྷོ་ཨ་ཕི་རི་ཀའི་རྒྱལ་ཁབ་དང་རྒྱ་ནག་གཞུང་དབར་དཔལ་འབྱོར་དང་ཚོང་གི་འབྲེལ་ལམ་དམ་ཟབ་ཕྱིན་ཡོད་པ་རེད། དེ་ལྟར་འབྲེལ་ལམ་ཟབ་རྐྱེན་རྒྱ་གཞུང་གིས་གནོན་ཤུགས་འོག་ཕྱི་ལོ་ ༢༠༠༩ ལོ་ནས་ད་བར་༸གོང་ས་༸སྐྱབས་མགོན་ཆེན་པོ་མཆོག་ཡུལ་དེའི་ནང་ཆིབས་བསྒྱུར་མཛད་ཐུབ་མེད་པ་རེད།