བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཟླ་ ༢ ཚེས་ ༡༡ ཉིན་ཉི་ཧོང་ནང་བོད་དོན་རྒྱབ་སྐྱོར་བ་དང་རྩོམ་པ་པོ། གསར་འགོད་པ་སོགས་དང་མཇལ་འཕྲད་གནང་པའི་བརྒྱུད
་གཞུང་འབྲེལ་གྱི་ལས་དོན་ཁག་ཅིག་གནང་མུས་ལྟར། དེ་རིང་ཉིན་རྒྱབ་སྲིད་སྐྱོང་མཆོག་གིས་ཁུལ་དེའི་གྲོས་ཚོགས་སུ་གྲོས་ཚོགས་འཐུས་མི་བདུན་ཅུ་སྐོར་ཞིག་ལ་བོད་དོན་སྙན་གསེང་དང་། ཉི་ཧོང་དང་བོད་གཉིས་ཀྱི་འབྲེལ་ལམ་ཐོག་གསུང་བཤད་གནང་ཡོད་པ་རེད།
དེའང་གྲོས་ཚོགས་ཀྱི་ལས་རིམ་ཐོག་ཉེ་ཆར་གསར་འཛུགས་གནང་པའི་ཉི་ཧོང་བོད་དོན་རྒྱབ་སྐྱོར་ཚོགས་པའི་གྲོས་ཚོགས་འཐུས་མི་རྣམས་ཀྱིས་གཙོས་པའི་ཁྱོན་གྲོས་ཚོགས་འཐུས་མི་བདུན་ཅུ་ཙམ་ནས་མཉམ་ཞུགས་གནང་ཡོད་པ་དང་། སྐབས་དེར་སྲིད་སྐྱོང་མཆོག་གིས་ཆེས་ཐོག་མར་ཁུལ་དེའི་གྲོས་ཚོགས་སུ་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་ཐུབ་པར་ཆེ་བསྟོད་ཞུས་པ་མ་ཟད། ད་བར་ཉི་ཧོང་གི་ངོས་ནས་ཁུལ་དེའི་ནང་གི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཆིབས་བསྒྱུར་ཁག་དང་། བོད་དོན་ཐོག་ལ་མུ་མཐུད་རྒྱབ་སྐྱོར་གནང་བཞིན་པར་བཀའ་དྲིན་ཆེ་ཞུས་པ་དང་སྦྲགས། སླད་མར་བོད་རྒྱའི་དཀའ་རྙོག་སེལ་ཐབས་སུ་གཉིས་ཕན་དབུ་མའི་ལམ་གྱི་སྲིད་བྱུས་ལ་མུ་མཐུད་རྒྱབ་སྐྱོར་གནང་སྐྱོང་ཡོང་བའི་འབོད་སྐུལ་ཤུགས་ཆེ་ཞུས་ཡོད་པ་རེད།
གཞི་རྩའི་སྲིད་སྐྱོང་མཆོག་གིས་གྲོས་ཚོགས་སུ་གསུང་བཤད་མ་གནང་གོང་དུ་བོད་དོན་ལ་ཡུན་རིང་ནས་རྒྱབ་སྐྱོར་གནང་མཁན་ཉི་ཧོང་གྲོས་ཚོགས་འཐུས་མི་ཟུར་པ་སྐུ་ཞབས་ Makino Seshu ལགས་དང་མཇལ་འཕྲད་ཀྱིས་བོད་དོན་གླེང་སློང་གནང་ཡོད་པ་མ་ཟད། ཐེངས་འདིའི་གཞུང་འབྲེལ་ཕྱོགས་ཕེབས་དེའི་ཁྲོད་ཁུལ་དེའི་གྲོང་ཁྱེར་རྙིང་གྲས་ Kyoto དང་། Osaka གཉིས་ཀྱི་ནང་ཆེད་ཕེབས་ཀྱིས་ས་གནས་བོད་རིགས་དང་མཐོ་རིམ་སློབ་གྲྭའི་སློབ་མ་སོགས་ལ་གསུང་བཤད་ཀྱང་གནང་ཡོད་པ་རེད།
