བོད་མིའི་སྒྲིག་འཛུགས་ཆོས་རིག་བཀའ་བློན་པདྨ་ཆོས་འབྱོར་མཆོག་ཆེད་ཕེབས་ཐོག་ཁ་སང་ཟླ་ ༥ ཚེས་ ༡ ཉིན་རྡ་ས་དགེ་ལྡན་ཆོས་གླིང་བཙུན་དགོན་དུ་དགེ་བཤེས་མའི་རྒྱུགས་སྤྲོད་ཆེན་མོ་དབུ་འཛུགས་བསྐྱངས་གནང་སོང་།
ཐེངས་འདིའི་རྒྱུགས་སྤྲོད་འདི་ནི་ཉིན་གྲངས་ ༡༢ རིང་རེད་འདུག་པ་དང་དེའི་ཁྲོད་དགེ་བཤེས་མ་འཛིན་གྲྭའི་ལོ་རིམ་དང་པོ་གཉིས་པ་དང་གསུམ་པ་བཞི་པ་བཅས་ཀྱི་སློབ་མ་ ༤༥ ནས་རྒྱུགས་སྤྲོད་གནང་གི་འདུག ཁྱད་པར་དུ་འདི་ལོའི་རྒྱུགས་སྤྲོད་འདི་ནི་ལོ་རིམ་བཞི་པའམ་སྐབས་དང་པོའི་དགེ་བཤེས་མ་འཛིན་གྲྭའི་སློབ་མ་༢༠ཡོད་པ་རྣམས་ཀྱི་རྒྱུགས་སྤྲོད་མཐའ་མ་དེ་ཆགས་ཀྱི་འདུག
ཆོས་རིག་བཀའ་བློན་པདྨ་ཆོས་འབྱོར་མཆོག་གིས་ཁ་སང་གསར་འགོད་པ་རྣམས་ལ་དགེ་བཤེས་མའི་བྱུང་རིམ་སྐོར་དང་འབྲེལ། ཐོག་མར་༸གོང་ས་སྐྱབས་མགོན་ཆེན་པོ་མཆོག་གིས་༡༩༩༥ཙམ་ནས་བཙུན་དགོན་སྒྲོལ་མ་གླིང་དབུ་འབྱེད་སྐབས་སུ་དགེ་བཤེས་མ་གཏང་རྒྱུ་གལ་ཆེ་ཡིན་པ་ལམ་སྟོན་བཀའ་སློབ་བསྩལ་ཡོད་པ་དང། དེའི་རྗེས་སུའང་ལམ་སྟོན་སྔ་རྗེས་ཕེབས་ཡོད་པ་དགོངས་དོན་བཞིན། ༢༠༡༢ལོར་ཆོས་རིག་ལས་ཁུངས་དང་ཆོས་བརྒྱུད་ཁག་གི་སྐུ་ཚབ་རྣམས་ནས་དགེ་བཤེས་མའི་སྐོར་གཏན་འབེབས་གནང་པ་ཞིག་ཡིན་སྐོར་གསུངས་གནང་སོང་བ་དང་། ལྷག་པར་དུ་ཆོས་རིག་ལས་ཁུངས་ངོས་ནས་དགེ་བཤེས་མ་འདི་ནི་གསར་གཏོད་དང་ལོ་རྒྱུས་ཐོག་ཧ་ཅང་གི་གལ་ཆེ་ཞིག་ཏུ་ངོས་འཛིན་གནང་གི་ཡོད་པ་གསུངས་གནང་སོང་།
ཐེངས་འདིའི་རྒྱུགས་སྤྲོད་ཀྱི་གཞུང་དང་སློབ་ཚན་གཙོ་བོ་ནི་ ཕར་ཕྱིན་དང་དབུ་མ། འདུལ་དང་མཛོད། གཞན་ཡང་རྩོམ་རྒྱུགས་དང་རྒྱལ་རབས་ཆོས་འབྱུང་། དེང་དུས་ཚན་རིག་སོགས་ཀྱི་ཐོག་བྲིས་རྒྱུགས་དང་རྩོད་རྒྱུགས་སྤྲོད་གནང་དགོས་འདུག་ཅིང་། རྒྱུགས་སྤྲོད་ཞིབ་འཇུག་གནང་མཁན་ཁོངས་གདན་ས་གསུམ་ནས་ལྷ་རམས་དགེ་བཤེས་བཞི་གདན་ཞུ་ཕུལ་འདུག ཆོས་རིག་བཀའ་བློན་མཆོག་གིས་གསུངས་པར་སྐབས་དང་པོའི་དགེ་བཤེས་མའི་བསླབ་པ་་མཐར་སོན་གྱི་ཕྱག་ཁྱེར་དེ་ནི་ཕྱི་ཟླ་༡༠པའི་ནང་༸གོང་ས་མཆོག་གིས་གསོལ་སྩལ་གནང་རྒྱུའི་ཞལ་བཞེས་ཐོབ་འདུག
གཞི་རྩའི་བཙུན་མ་རྣམས་ནས་དགེ་བཤེས་མ་གཏང་རྒྱུའི་ལས་རིམ་འདི་ནི་༢༠༡༣ནས་དབུ་འཛུགས་གནང་ཡོད་པ་དང། དེ་ཡང་གཙོ་བོ་བོད་མིའི་སྒྲིག་འཛུགས་ཆོས་རིག་ལས་ཁུངས་དང་། བཙུན་དགོན་དགེ་ལྡན་ཆོས་གླིང་དང་སྒྲོལ་མ་གླིང་སོགས་བཙུན་དགོན་དྲུག་དང་། དེ་བཞིན་རྡ་ས་རིགས་ལམ་སློབ་གཉེར་ཁང་བཅས་ནས་ཐུགས་འགན་བཞེས་གནང་གི་ཡོད་པ་རེད།