རྒྱ་གར་བ་ཚོས་རང་གི་གནའ་བོའི་རིག་གཞུང་སླར་གསོ་གནང་ཐོག་འཛམ་གླིང་ཁྱོན་ལ་ཞི་བདེ་ཡོང་བར་འབད་བརྩོན་གནང་དགོས་པ་བཀའ་བསྩལ་བ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་རྒྱ་གར་གྱི་གྲོང་ཁྱེར་མུམ་བའེ་ནང་རྒྱ་གར་གྱི་ན་གཞོན་ཤེས་ཡོན་ཅན་མི་གྲངས་ ༣༠༠ ལྷག་ལ་འཛམ་གླིང་ཁྱོན་ཡོངས་ལ་དཀའ་ངལ་འདྲ་མིན་འཕྲད་བཞིན་པའི་དུས་སྐབས་འདིར་རྒྱ་གར་ཞེས་པའི་རྒྱལ་ཁབ་འདིས་འཛམ་གླིང་སྤྱི་ལ་རླབས་ཆེན་གྱི་ཕན་ཐོགས་བསྒྲུབ་རྒྱུའི་ཆ་རྐྱེན་དང་རེ་བ་ཆེན་པོ་གཟིགས་ཀྱི་ཡོད་པར་བཀའ་བསྩལ་དང་སྦྲགས་ཏེ་རྒྱ་གར་བ་རྣམས་ནས་རང་གི་གནའ་བོའི་རིག་གཞུང་ཐོག་དོ་སྣང་དང་སློབ་གཉེར་གནང་དགོས་གལ་ཡིན་པར་ལམ་སྟོན་རྒྱ་ཆེ་བསྩལ་འདུག

མུམ་བའེ་གྲོང་ཁྱེར་ནང་རྟེན་གཞི་བྱས་པའི་ Vidyaloke ཞེས་རྒྱ་གར་གནའ་རབས་ལེགས་སྦྱར་སླར་གསོའི་བསྟི་གནས་ཁང་ནས་ཇི་ལྟར་གསོལ་འདེབས་ཞུས་དོན་ལྟར། དེ་རིང་སྔ་དྲོ་༸གོང་ས་མཆོག་གིས་ Somaiya སློབ་གཉེར་བསྟི་གནས་ཁང་དུ་རྒྱ་གར་གྱི་གནའ་བོའི་རིག་གཞུང་སླར་གསོ་གནང་ཐབས་སྐོར་བཀའ་སློབ་བཀྲིན་བསྩལ་གནང་ཡོད་པ་དང་། སྐབས་དེར་མགོན་པོ་༸གང་ཉིད་མཆོག་གིས་ཐོག་མར་༸སྐུ་ཉིད་ད་རེས་སླར་ཡང་ས་གནས་འདིར་ཆིབས་བསྒྱུར་མཛད་ཐུབ་པ་ནི་སྐལ་པ་བཟང་པོ་བྱུང་ཞེས་བཀའ་བསྩལ་བ་མ་ཟད། འཛམ་གླིང་ཐོག་ཡོད་པའི་འགྲོ་བ་མི་ཚང་མར་བདེ་སྐྱིད་ལྡན་པའི་མི་ཚེ་སྐྱེལ་རྒྱུའི་ཐོབ་ཐང་གཅིག་མཚུངས་ཡོད་ནའང་རང་བྱུང་གི་གནོད་འཚེ་ཕོག་པ་ཕུད་པའི་དེ་མིན་མི་འདོད་བཞིན་དུ་འཕྲད་པའི་ངལ་བ་མང་དག་ཞིག་ནི་འགྲོ་བ་མི་རང་གིས་བཟོས་པ་ཞིག་ཡིན་སྟབས། ང་ཚོས་འགྲོ་བ་མི་གཅིག་འགྱུར་གྱི་འདུ་ཤེས་འཛིན་པའི་ཐོག་རང་རྒྱུད་ལ་ཡོད་པའི་བྱམས་བརྩེའི་ས་བོན་དེ་མུ་མཐུད་རྒྱུན་སྐྱོང་དང་གོང་མཐོར་གཏོང་རྒྱུར་འབད་བརྩོན་ཤུགས་ཆེ་གནང་རྒྱུ་ནི་ཧ་ཅང་གལ་ཆེ་ཡིན་པར་བཀའ་བསྩལ་འདུག

དེ་བཞིན་༸གང་ཉིད་མཆོག་གིས་འདས་པའི་ལོ་ངོ་ ༣༠ ལྷག་གི་རིང་འཛམ་གླིང་ནང་གི་ཤེས་ཡོན་ཅན་དང་ཚན་རིག་པ་ཚོ་དང་མཇལ་འཕྲད་གནང་བའི་༸སྐུའི་མྱོང་བའི་ཁྲོད་བོད་མི་ཚོས་ད་བར་གཅེས་ཉར་བྱས་པའི་རྒྱ་གར་གྱི་གནའ་བོའི་རིག་གཞུང་དེ་དག་ནི་འཛམ་གླིང་ཐོག་ཧ་ཅང་གི་འབྲེལ་བ་ཡོད་པ་ཞིག་དང་ལྷག་དོན་འགྲོ་བ་མིའི་སེམས་ཀྱི་ཞི་བདེ་དང་བྱམས་བརྩེའི་བསམ་པ་གོང་མཐོར་གཏོང་རྒྱུ་སོགས་ལ་དགེ་མཚན་ཆེན་པོ་ཡོད་པ་བཀའ་བསྩལ་བ་དང་ཆབས་ཅིག འཕྲུལ་རིགས་དང་ཕྱིའི་དངོས་པོ་ཡར་རྒྱས་འགྲོ་བཞིན་པ་དང་མཉམ་དུ་དེང་དུས་ཀྱི་ཤེས་ཡོན་ཁོ་ན་མིན་པར་རྒྱ་གར་གྱི་གནའ་བོའི་རིག་གཞུང་ཁག་ལ་དེ་མཚུངས་དོ་སྣང་དང་སློབ་གཉེར་གནང་ཐོག་སླར་གསོ་གནང་དགོས་གལ་ཡིན་པར་བཀའ་བསྩལ་འདུག

ལྷག་དོན་རིག་གཞུང་དེའི་ཐོག་ནས་ནང་སེམས་བཅུན་རྒྱུའི་ཐབས་ཤེས་དེ་ཆོས་ཕྱོགས་ཀྱི་གནད་དོན་ཞིག་ཏུ་ངོས་མི་འཛིན་པར་ཤེས་ཡོན་ལམ་ལུགས་བྱེ་བྲག་པ་ཞིག་གི་ངོ་བོར་བཞག་ནས་སློབ་གཉེར་གནང་ཐུབ་ཚེ་ཆོས་དད་མེད་མཁན་ཚོ་ལའང་ཕན་ཐོགས་པའི་ཁྱད་ནུས་ཡོད་པར་བཀའ་ནན་བསྩལ་འདུག

ཁྱད་པར་དུ་མགོན་པོ་༸གང་ཉིད་མཆོག་གིས་མི་རབས་གཞོན་པ་ཚོས་ད་ལྟའི་དུས་རབས་ ༢༡ པ་འདི་བདེ་སྐྱིད་ལྡན་པའི་དུས་རབས་ཤིག་བསྐྲུན་ཐུབ་པ་ན་འབྱུང་འགྱུར་དུས་རབས་དེ་དག་ཞི་བདེ་བག་ཕེབས་ཀྱི་དུས་རབས་ཤིག་ཡོང་ངེས་ཡིན་པ་ལམ་སྟོན་རྒྱ་ཆེ་བསྩལ་ཡོད་པ་རེད།

དེ་རིང་སྔ་དྲོ་མགོན་པོ་༸གང་ཉིད་མཆོག་གི་བཀའ་སློབ་བསྩལ་གྲུབ་རྗེས་ཉིན་རྒྱབ་ཏུ་ནང་པའི་དགེ་བཤེས་ཁག་ཅིག་དང་རྒྱ་གར་གྱི་ན་གཞོན་ཤེས་ཡོན་ཅན་དབར་རྒྱ་གར་གནའ་བོའི་ཤེས་རིག་ཐོག་བགྲོ་གླེང་གནང་ཡོད་པ་དང་། སང་ཉིན་༸གོང་ས་མཆོག་གིས་མུ་མཐུད་གོང་གི་བརྗོད་གཞི་ཐོག་བཀའ་སློབ་བསྩལ་རྒྱུ་ཡིན་པ་རེད།