འགྲོ་བ་མིའི་ཐོབ་ཐང་སྲུང་སྐྱོབ་པར་འཕྱར་གྲུ་མཉམ་འདེགས་ཞེས་པའི་སྦྱོང་བརྡར་མཇུག་སྒྲིལ་གནང་བ།

བཞུགས་སྒར་དུ་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གོ་སྒྲིག་འོག་གཞུང་འབྲེལ་དང་གཞུང་འབྲེལ་མིན་པའི་འགྲོ་བ་མིའི་ཐོབ་ཐང་ཐད་འབྲེལ་ཡོད་ལས་ཀྱི་སྣེ་མོ་ཁག་ཅིག་དང། གཞོན་སྐྱེས་སློབ་གཉེར་བ་བཅས་མཁྱོན་མི་གྲངས་ ༣༥ ལྷག་ལ་འགྲོ་བ་མིའི་ཐོབ་ཐང་སྲུང་སྐྱོབ་པར་འཕྱར་གྲུ་མཉམ་འདེགས་ཞེས་པའི་སྦྱོང་བརྡར་གྱི་ལས་རིམ་ཚོགས་འདུག ཟླ་འདིའི་ཕྱི་ཚེས་ ༣ ནས་ ༥ བཅས་སུ་མེ་གྷན་ནོར་བུ་གསོལ་མགྲོན་ཁང་དུ་འགྲོ་བ་མིའི་ཐོབ་ཐང་སྲུང་སྐྱོབ་པར་འཕྱར་གྲུ་མཉམ་འདེགས་ཞེས་པའི་སྦྱོང་བརྡར་གྱི་ཟབ་སྦྱོར་ཞིག་གོ་སྒྲིག་ཞུས་ཡོད་པ་རེད། ད་ལན་གྱི་ཟབ་སྦྱོང་དེ་ཚོགས་པའི་དགོས་དམིགས་གཙོ་བོ་ནི། འགྲོ་བ་མིའི་ཐོབ་ཐང་སྲུང་སྐྱོབ་པ་ཚོར་སྲུང་སྐྱོབ་བྱེད་ཐབས་དང། རྒྱལ་སྤྱིའི་དང་རྒྱ་ནག་གི་ཁྲིམས་ཡིག་ནང་འགྲོ་བ་མིའི་ཐོབ་ཐང་སྲུང་སྐྱོབ་པའི་ཆེད་དུ་འཁོད་པའི་རང་དབང་དང་ཐོབ་ཐང་ཇི་ཡོད་སོགས་ཀྱི་ཐད་ཐད་གོ་རྟོགས་དང་སྦྱང་བཤད་བྱ་རྒྱུའི་དམིགས་བསལ་གྱི་ལས་རིམ་ཞིག་རེད་འདུག ལྷག་པར་དུ་ཉིན་གསུམ་གྱི་སྦྱོང་བརྡར་གྱི་ལས་རིམ་དེའི་ནང་འགྲོ་བ་མིའི་ཐོབ་མཁས་ལས་མི་སྣ་ཁག་དང་ལྷན་དུ་བོད་ནང་གི་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ལས་དོན་ནུས་པ་གཞི་རྒྱ་ཇེ་ཆེར་གཏོང་རྒྱུའི་དགོངས་ཚུལ་སྤེལ་རེས་ཀྱི་ལས་རིམ་ཡང་འདུག དེ་བཞིན་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་ སྦྱོང་བརྡར་གྱི་ལས་རིམ་དེའི་ནང་མཉམ་ཞུགས་གནང་མཁན་ཚོགས་བཅར་བ་ཚོར་རྒྱུན་ལྡན་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ལས་དོན་གཉེར་བའི་སྐབས་སུ་ལས་དོན་དེའི་ནུས་པ་ཇེ་ཆེ་གཏོང་ཐབས་དང། རང་ཉིད་སེམས་བག་ཚ་བའི་གནས་སྐབས་སུ་བག་ཡངས་ཇི་ལྟར་བཟོ་ཕྱོགས་ཀྱི་ཐབས་ལམ་ཡང་སློབ་ཁྲིད་གནང་ཡོད་པ་རེད་ཅེས་གསུངས་སོང།