ཟླ་བ་འདིའི་ཕྱི་ཚེས་ ༡༨ ཉིན་བོད་མདོ་སྨད་རེབ་གོང་སྒོ་དམར་ས་གནས་རྒྱ་ནག་གཞུང་ཕྱོགས་ཀྱིས་རེབ་གོང་སྨད་པ་སྡེ་བ་བདུན་གྱི་ཁོངས་རི་རྩ་སྡེ་བ་ཡོད་སར་མེ་འཁོར་འབབ་ཚུགས་འཛུགས་སྐྲུན་དང་། རེབ་གོང་ཞོ་ཕུང་ཕྱོགས་སུ་ཆུ་མཛོད་གློག་ཁང་གསར་རྒྱག་སོགས་འཛུགས་སྐྲུན་ལ་ཁ་གཡར་ཏེ་རེབ་གོང་སྙན་ཐོག་དང་སྒོ་དམར་སྡེ་བའི་ས་ཞིང་ཨེ་ཀ་ཆིག་སྟོང་ལྷག་ལ་རིན་གོང་ཧ་ཅང་དམའ་པོ་ལས་མ་སྤྲད་པ་མ་ཟད་ད་ལོ་ཞིང་ཁ་འདེབས་མ་བཅུག་པར་གཞུང་བཞེས་བཏང་འདུག
ས་གནས་མང་ཚོགས་ཀྱི་མ་འོངས་པའི་འཚོ་རྟེན་མེད་པར་གྱུར་བར་བརྟེན་ཧ་ཅང་བློ་འཚབ་ཆེན་པོའི་ངང་གནས་ཡོད་པ་དང་། ས་གནས་རྒྱ་ནག་སྲིད་གཞུང་གིས་ཞུང་བཞེས་བཏང་བའི་ས་ཞིང་དེ་དག་རིན་གོང་ཁེ་བོ་ཐོག་ངེས་པར་དུ་བཙོང་དགོས་པའི་བཙན་བཀའ་བཏང་བར་ཡུལ་མི་ཚོས་ས་ཞིང་དེ་དག་བཙོང་ནས་དངུལ་ཏོག་ཙམ་རག་ནས་འཚོལ་བ་འཁྱོལ་ཙམ་ཡོང་གི་ཡོད་ནའང་། དེ་དག་ང་ཚོའི་མི་རབས་རྗེས་མའི་བུ་ཕྲུག་རྣམས་ཀྱི་འཚོ་བའི་རྟེན་གཞི་ས་ཞིང་མེད་ན་འཚོ་བ་ཇི་ལྟར་བསྐྱེལ་དགོས་སམ་ཞེས་ས་གནས་རྫོང་སྲིད་གཞུང་ལ་རེ་སྐུལ་ཞུས་ཀྱང་ཉན་འཇོག་བྱས་མེད་པ་རེད་འདུག
སྤྱིར་སྔ་ལོའི་ཟླ་ ༣ པའི་ནང་རྒྱ་ནག་གཞུང་གིས་ཡར་རྒྱས་དང་འཛུགས་སྐྲུན་ལ་ཁ་གཡར་ཏེ་གོང་གསལ་སྡེ་བ་དེ་དག་གི་ས་ཞིང་རྒྱལ་ཁབ་ལ་སྤྲོད་དགོས་པའི་བཙན་བཀའ་བཏང་ཡོད་པ་དང་། སྐབས་དེར་ས་གནས་མང་ཚོགས་ཀྱིས་ས་ཞིང་གཞུང་བཞེས་བཏང་ན་ཁོ་ཚོའི་མི་རབས་རྗེས་མ་ཚོར་འཚོ་བའི་རྟེན་གཞི་གང་ཡང་མེད་པར་གྱུར་རྒྱུ་མ་ཟད། རྒྱ་མི་མང་པོ་གནས་སྤོ་བྱས་ཏེ་བོད་ཀྱི་ཡུལ་སྲོལ་གོམས་གཤིས་དང་རིག་གཞུང་བཅས་ལ་ཉམས་ཉེས་ཡོང་རྒྱུ་ཡིན་སྟབས་དེ་ལྟར་མི་དགོས་པའི་གོང་རིམ་ལ་ཞུ་གཏུག་རིམ་པར་བྱས་ཀྱང་དེ་ནི་རྒྱལ་ཁབ་ཀྱི་བཀའ་ཡིན་པར་བརྗོད་ནས་མང་ཚོགས་ཀྱི་རེ་འདུན་ལ་བདག་སྤྲོད་གང་ཡང་མ་བྱས་པར་ཉེ་ཆར་དངོས་སུ་གཞུང་བཞེས་བཏང་འདུག
དེ་བཞིན་ཉེ་འཁོར་གྱི་རེབ་གོང་སེང་གཞོང་སྡེ་བ་དང་རྒྱལ་ཚང་མ་སྡེ་བ། ཧོར་རྒྱ་སོགས་སུ་ཡང་ས་ཞིང་གཞུང་ལམ་དང་ཁང་བརྩེགས་སྐྲུན་ཡུལ་དུ་ཁེལ་བ་རྣམས་གཞུང་བཞེས་བཏང་བ་མ་ཟད། ཨེ་ཀར་རེར་གུན་གསབ་རྒྱ་སྒོར་ཁྲི་ ༢༥ ཡས་མས་ལས་སྤྲད་མེད་པ་རེད། འོན་ཀྱང་གོང་གསལ་སྒོ་དམར་སྡེ་བའི་ས་ཞིང་ལ་ཨེ་ཀ་གཅིག་ལ་རྒྱ་སྒོར་ཁྲི་ ༡༣ དང་ཁྲི་ ༡༤ ཡས་མས་མ་གཏོགས་མ་སྤྲད་པར་གུན་གསབ་ཉུང་བ་སྤྲད་འདུག