ཕྱི་ཟླ་ ༥ པའི་ཚེས་ ༡༧ སྟེ་ཆུང་སྲིད་པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་རྒྱ་ནག་གཞུང་གི་འཛིན་བཟུང་བཙོན་འཇུག་བྱས་ནས་ལོ་ ༢༣ འཁོར་བའི་ཉིན་མོ་དང་བསྟུན། བོད་ཀྱི་བེུད་ལྷན་ཚོགས་ནས་ཐེག་ཆེན་ཆོས་གླིང་གཙུག་ལག་ཁང་ནས་དབུ་འཛུགས་ཀྱིས་ཀི་ལོ་མི་ཊར་ ༩ ཙམ་གྱི་སར་ཆགས་པའི་ཀ་ཅེ་རི་ས་ཚིག་བར་གོམ་བགྲོད་དང་ངོ་རྒོལ་སྐད་འབོད་ཀྱི་ལས་འགུལ་སྤེལ་བའི་ཐོག་ནས་ཉིན་མོ་དེ་རྗེས་དྲན་ཞུས་སོང་།
ཁ་སང་བཞུགས་སྒར་དུ་བོད་ཀྱི་བེུད་ལྷན་ཚོགས་ཀྱི་ཚོགས་ཆེན་ཐེངས་ ༡༢ པ་མཇུག་སྒྲིལ་དང་བསྟུན། ཚོགས་ཆེན་དེའི་ཐོག་ཕེབས་པའི་རྒྱ་གར་དང་བལ་ཡུལ། དེ་བཞིན་རྒྱལ་སྤྱིའི་ཁྲོད་ཀྱི་བེུད་ལྷན་ཚོགས་ཀྱི་ཡན་ལག་ ༣༧ གྱི་ཚོགས་བཅར་བ་ཁྱོན་ ༢༠༠ ཙམ་ཡོད་པ་རྣམས་དེ་རིང་སྔ་དྲོ་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་གི་ཉེ་འཁྲིས་དཔའ་བོ་དཔའ་མོའི་རྡོ་རིང་མདུན་དུ་འདུ་འཛོམས་གནང་ཐོག་དབུས་བོད་ཀྱི་བེུད་ལྷན་ཚོགས་ཀྱི་ཚོགས་གཙོ་སྒྲོལ་མ་དབྱངས་ཅན་ལགས་ཀྱིས་གསར་འགོད་བསྒྲགས་གཏམ་ཞིག་འདོན་སྤེལ་གནང་ཡོད་པ་དེ་སྙན་སྒྲོན་ཞུས་ཡོད།
གསར་འགོད་གསལ་བསྒྲགས་འདི་བརྒྱུད་བེུད་ལྷན་ཚོགས་ཀྱི་ངོས་ནས་རྒྱ་ནག་གཞུང་ལ་ཀུན་གཟིགས་པཎ་ཆེན་སྐུ་ཕྲེང་ ༡༡ པ་དགེ་འདུན་ཆོས་ཀྱི་ཉི་མ་མཆོག་སྐུ་འཚོ་བཞུགས་ཡོད་ཟེར་བ་ཙམ་གྱི་མི་འགྲིག་པར། ད་ལྟའི་ཁོང་གི་བཞུགས་གནས་དང་སྐུ་གཟུགས་ཀྱི་གནས་སྟངས། དེ་བཞིན་འདྲ་པར་སོགས་ཡོངས་གྲགས་འདོན་སྤེལ་བྱེད་དགོས་པ་དང། རྒྱལ་ཚོགས་ཀྱི་དམིགས་བསལ་སྐུ་ཚབ་མི་སྣར་པན་ཆེན་རིན་པོ་ཆེ་མཆོག་དང་མཇལ་འཕྲད་གནང་བཅུག་དགོས་པ། དེ་བཞིན་པན་ཆེན་རིན་པོ་ཆེའི་ཡང་སྲིད་རྩད་གཅོད་གནང་མཁན་གདན་ས་བཀྲིས་ལྷུན་པོའི་མཁན་པོ་བྱ་བྲལ་རིན་པོ་ཆེ་མཆོག་གི་གནས་སྟངས་གསལ་བཤད་དགོས་པ། པཎ་ཆེན་རིན་པོ་ཆེ་མཆོག་དང་ཁོང་གི་ནང་མི་དབུས་འཁོར་བཅས་པ་རྣམས་ཆ་རྐྱེན་གང་ཡང་མེད་པའི་ཐོག་ནས་འཕྲལ་དུ་གློད་བཀྲོལ་གཏང་དགོས་པ་སོགས་ཀྱི་དགོས་འདུན་དོན་ཚན་ལྔ་ཆེད་བཏོན་གནང་བ་དང་སྦྲགས།
བོད་ཀྱི་བེུད་ལྷན་ཚོགས་ཀྱི་ངོས་ནས་ཀུན་གཟིགས་པཎ་ཆེན་རིན་པོ་མཆོག་གི་གནད་དོན་སྐོར་ལ་རྩད་ཞིབ་དང་གློད་བཀྲོལ་གྱི་འཐབ་རྩོད་ནམ་ཡང་གློད་གཏང་གནང་རྒྱུ་མིན་པ་དང། རྒྱལ་ཚོགས་དང་རྒྱལ་སྤྱིའི་དབུ་ཁྲིད་རྣམ་པ་དང་བོད་དོན་རྒྱབ་སྐྱོར་བ་རྣམས་ནས་འཐབ་རྩོད་དེར་རྒྱབ་སྐྱོར་གྱིས་རྒྱ་ནག་གཞུང་ལ་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གློད་བཀྲོལ་གཏང་དགོས་པའི་གནོན་ཤུགས་སྤྲོད་དགོས་པའི་འབོད་སྐུལ་ཞུས་ཡོད།
