དེ་ཡང་ཞུགས་སྒར་རྡ་ཤོད་སྣུམ་འཁོར་འབབ་ཚུགས་ཀྱི་ཉེ་འགྲམ་དུ་རྟེན་གཞི་བྱས་པའི་ས་གནས་རྒྱ་གར་གཞུང་གི་ཚོགས་ཁང་ཆེན་མོའི་ནང་དུ་ཟླ་བ་འདིའི་ཚེས་ ༢༣ ནས་བཟུང་དབུ་འཛུགས་གནང་བའི་རྒྱལ་སྤྱིའི་བོད་རང་བཙན་ཚོགས་ཆེན་ཐེངས་ལྔ་པ་དེ་ཁ་ས་ཕྱི་ཟླ་ ༥ ཚེས་ ༢༥ ཉིན་གྱི་དགོང་མོ་ཕྱག་ཚོད་ ༧ ཡས་མས་ཞིག་ལ་མཇུག་བསྒྲིལ་གནང་ཡོད་པ་དང་། ཐེངས་འདིའི་ཚོགས་ཆེན་ཐོག་ནས་བསྒྲགས་གཏམ་དོན་ཚན་ལྔ་དང་དགོངས་ཚུལ་ཁག་བཅོ་ལྔ་འཁོད་པ་ཞིག་ཡོངས་བསྒྲགས་གནང་སོང་།
དོན་ཚན་ལྔ་ཅན་གྱི་བསྒྲགས་གཏམ་དེའི་ནང་གཙོ་བོ་བོད་དོན་བདེན་མཐའ་མ་སེལ་བར་དུ་བོད་རང་བཙན་འཐབ་རྩོད་ཀྱི་ལས་འགུལ་མི་རབས་ནས་མི་རབས་བར་རྒྱུན་བསྲིང་བྱ་རྒྱུ་ཙམ་མ་ཟད། བོད་རང་བཙན་འཐབ་རྩོད་པ་རྣམས་ནས་དགྲ་གཉེན་མགོན་གསུམ་གྱི་ཁ་ཕྱོགས་མ་ནོར་བའི་ཐོག་ནས་རྡོག་རྩ་གཅིག་བསྒྲིལ་དགོས་པ། གཞན་ཡང་རྒྱ་གར་གཞུང་མང་ཡོངས་ལ་བཀྲིན་ཆེ་ཞེས་ཞུས་པ་དང་ཆབས་ཅིག བོད་རང་བཙན་དེ་རྒྱ་གར་གྱི་བདེ་འཇགས་དང་ཐུག་ཡོད་སྟབས་རྒྱ་གར་གཞུང་ནས་དེའི་ཐོག་སྔར་ལྷག་རྒྱབ་སྐྱོར་ཡོང་བ་སོགས་ཀྱི་འབོད་སྐུལ་ཞུས་གནང་འདུག
དེ་རིང་གི་ཚོགས་ཆེན་དེའི་ཐོག་ཚོགས་བཅར་བ་ ༡༦༠ ལྷག་ཙམ་མཉམ་ཞུགས་གནང་ཡོད་པ་དང་། ཁ་ས་ཚོགས་འདུ་ཉིན་མཐའ་མའི་ཐོག་སྐབས་རྗེས་མའི་ཚོགས་ཆེན་དེ་རྒྱ་གར་ནང་དུ་ཚོགས་རྒྱུ་གཏན་འཁེལ་བྱུང་ཡོད་པ་མ་ཟད། ད་ལན་གྱི་ཚོགས་ཆེན་དེའི་བརྒྱུད་རྒྱལ་ཁབ་རེ་ནས་འབྲེལ་མཐུད་པ་རེ་བསྐོ་བཞག་གནང་ཡོད་པ་རེད།