དེ་རིང་ཟླ་ ༨ ཚེས་ ༢ ཉིན་སྔ་དྲོ་ཚོུད་ ༡༠ ཐོག་གངས་སྐྱིད་གཉའ་ཁྲི་ཚོགས་ཁང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཕྱི་རྒྱལ་ཡུལ་གྲུ་འདྲ་མིན་ཁག་ནས་དབྱར་ཁའི་སློབ་དུས་ཐོག་བཅར་བའི་བོད་ཕྲུག་སློབ་མ་ ༧༠ སྐོར་ཞིག་ལ་ཚོུད་གཉིས་ཙམ་རིང་ལ་བོད་མི་རིགས་ཀྱི་ངོ་བོ་དང་རྒྱལ་རབས་སོགས་ཀྱི་ཐད་གསུང་བཤད་གནང་སོང་།
སྐབས་དེར་སྲིད་སྐྱོང་མཆོག་གིས་ཕྱི་རྒྱལ་དུ་འཚར་ལོངས་བྱུང་བའི་བོད་ཕྲུག་ཚོས་རང་ཉིད་ཀྱི་ངོ་བོ་གང་ཡིན་འགྲེལ་བརྗོད་གདེང་འཁེལ་བ་ཞིག་གནང་ཐུབ་ཀྱི་མེད་སྟབས། ཁྱེད་ཅག་རང་ཉིད་སོ་སོའི་གནས་ཡུལ་རྒྱལ་ཁབ་གང་ཡིན་དེ་དག་གི་མི་སེར་ཆགས་ཀྱི་ཡོད་པ་ལྟར་རྒྱལ་ཁབ་དེའི་ཁྲིམས་སྒྲིག་ཁག་བརྩི་སྲུང་བྱེད་དགོས་ཀྱང་། རང་ཉིད་ཀྱི་ངོ་བོ་དེ་བོད་མི་ཞིག་ཡིན་པ་དུས་ནམ་ཡང་བརྗེད་རྒྱུ་མེད་སྐོར་གསུངས་ཡོད།
དེ་བཞིན་སྲིད་སྐྱོང་མཆོག་གིས་འཛམ་གླིང་ནང་ནང་པ་སངས་རྒྱས་པའི་ཆོས་ལུགས་ཉམས་ལེན་གནང་མཁན་རྒྱལ་ཁབ་མང་དག་ཞིག་ཡོད་ཀྱང་བདག་ཅག་གི་སྟོན་པ་ཐུབ་པའི་དབང་པོས་གསུངས་པའི་ཆོས་ཕུང་བརྒྱད་ཁྲི་བཞི་སྟོང་ཡོད་པ་དེ་དག་ཚང་ལ་མ་ནོར་བ་བོད་ཡིག་ཁོ་ནའི་ཐོག་ལ་ཡོད་པ་ལས་སྐད་ཡིག་གཞན་ནང་མེད་སྟབས། སློབ་ཕྲུག་ཁྱེད་ཅག་ནས་སྔར་འབྱོན་བོད་ཀྱི་ལོ་ཙྰ་བ་རྣམས་ཀྱི་བཀྲིན་དྲན་ཞིང་གནའ་དེང་གཉིས་ཀྱི་ཤེས་ཡོན་ཐོག་ཧུར་བརྩོན་བྱེད་དགོས་གནད་ཡིན་པར་ལམ་སྟོན་གནང་སོང་།
སྲིད་སྐྱོང་མཆོག་གིས་བོད་ཕྲུག་སློབ་མ་རྣམས་ལ་གསུང་བཤད་གནང་གྲུབ་མ་ཐག་སློབ་ཕྲུག་འགས་བཀའ་འདྲི་ཁག་ཅིག་ཞུས་ཡོད་པ་ལྟར། སློབ་ཕྲུག་ཞིག་གིས་བོད་དེ་ད་ཆ་རྒྱ་གཞུང་གིས་བཙན་བཟུང་འོག་ཡོད་པ་དང་རྒྱུ་མཚན་དེར་བརྟེན་བོད་དེ་རྒྱ་ནག་གི་ཆ་ཤས་ཆགས་སམ་ཞེས་བཀའ་འདྲི་ཞུས་པར་སྲིད་སྐྱོང་མཆོག་གིས་བོད་དེ་ལོ་རྒྱུས་ཀྱི་ཐོག་ནས་རང་བཙན་གཙང་མའི་རྒྱལ་ཁབ་ཞིག་དང་ང་ཚོར་སོ་སོའི་རྒྱལ་དངུལ་དང་དཔྱ་ཁྲལ། དེ་བཞིན་ཁྲིམས་སྒྲིག་སོགས་ཡོད་སྐོར་གསུངས་སོང་།
རྩ་བའི་དབྱར་ཁའི་སློབ་དུས་དེ་ཕྱི་རྒྱལ་གནས་བཞུགས་བོད་ཕྲུག་རྣམས་རང་སྐད་དང་བྲལ་ནས་གཞན་གྱི་རིག་གཞུང་གིས་ཤུགས་རྐྱེན་ཐེབས་ཀྱི་ཡོད་སྟབས། སོ་སོའི་རིག་གཞུང་དང་བོད་མིའི་ངོ་བོ་རྩ་བརླག་འགྲོ་བའི་ཉེན་ཁར་གཟིགས་ཏེ་བཀའ་ཟུར་༸རྗེ་བཙུན་པདྨ་མཆོག་གི་དགོངས་བཞེས་དང་ཕྱི་རྒྱལ་གནས་བཞུགས་བོད་ཕྲུག་ཚོའི་ཕ་མ་རྣམས་ཀྱི་དགོངས་འཆར་གནང་བར་བརྟེན་ཆེད་མངགས་བོད་ཕྲུག་ཁྱིམ་སྡེར་བོད་ཀྱི་རིག་གཞུང་དང་ཡུལ་གོམས་གཤིས་ལུགས་སོགས་ལ་བསླབ་པ་སློབ་གཉེར་ཆེད་དབྱར་ཁའི་སློབ་དུས་དེ་བཙུགས་པ་རེད།