བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ད་ལྟའི་ཆར་རྒྱ་གར་བྱང་ཕྱོགས་ལ་དྭགས་ནང་དུ་བཞུགས་ཞག་གིས་མཛད་འཕྲིན་དུ་མ་སྐྱོང་བཞིན་ཡོད་པ་ལྟར། ཁ་སང་ཟླ་ ༨ ཚེས་ ༡ ཉིན་ཞི་བའི་ཚལ་༸རྒྱལ་བའི་ཕོ་བྲང་དུ་ལ་དྭགས་གླེ་བསོད་ནམས་ནོར་བུ་དྲན་རྟེན་སྨན་ཁང་ཆེན་མོའི་སྨན་ཞབས་པ་རྣམས་ལ་དམིགས་བསལ་མཇལ་ཁ་དང་བཀའ་སློབ་བཀའ་དྲིན་བསྩལ་འདུག
མགོན་པོ་༸གང་ཉིད་མཆོག་ནས་སྨན་ཞབས་པའི་ལས་ཀ་ནི་གཞན་ཕན་གྱི་བྱ་བ་ཞིག་ཡིན་པས་ཁྱེད་ཚོས་ངེས་པར་དུ་བསམ་པ་བཟང་པོའི་ཐོག་ནས་ནད་པར་ཕན་རོགས་བྱེད་དགོས་པ་མ་ཟད་ནད་པ་ཚོར་བརྩེ་བ་དང་གད་མོ་དགོད་ནས་ཕན་ཐོགས་བྱ་ཐུབ་ཚེ་ཕན་རླབས་ཆེན་པོ་ཡོད་པ་བཀའ་བསྩལ་འདུག ཚེ་འདིར་མི་ལུས་ཤིག་བླངས་ནས་གཞན་ཕན་བྱ་རྒྱུའི་གོ་སྐབས་བྱུང་ཡོད་པ་རེད། ཚེ་འདིར་བསོད་ནམས་བསགས་པ་དེས་ཚེ་རབས་ནས་ཚེ་རབས་ལ་གཞན་ཕན་སྒྲུབ་རྒྱུ་ཡོང་གི་རེད། དེས་ན་ངོས་ཀྱིས་ཁྱེད་ཅག་ལ་སྨོན་ལམ་བརྒྱབ་ཆོག་ཞེས་ཐུགས་བརྩེ་བ་ཆེན་པོས་བཀའ་བསྩལ་འདུག