ཁ་སང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལ་དྭགས་ཀྱི་ཀར་གྷིལ་རྫོང་ཁོངས་སུ་གཏོགས་པའི་ཝ་ཀ་མུལ་སྦེག་ཁུལ་གྱི་ Spring Dales Public High School ནས་ཇི་ལྟར་གསོལ་འདེབས་ཞུས་དོན་ལྟར་ཁུལ་དེར་༸ཞབས་སོར་བདེ་བར་འཁོད་ཡོད་པ་དང་། མགོན་པོ་༸གང་ཉིད་མཆོག་ནས་སླར་ཡང་བླ་མའི་ཆབ་སྲིད་ལ་རྒྱུན་དུ་ནས་མི་མང་ཚོས་ཡིད་གཟབ་གནང་དགོས་པ་དང་། བོད་ཀྱི་ཆོས་བརྒྱུད་ཚང་མའི་རྩ་བ་དེ་དཔལ་ནཱ་ལེནྡཱའི་ཆོས་བརྒྱུད་འཛིན་མཁན་ཞིག་ཡིན་སྟབས། རྔ་རྡུང་། འཆམ་འཁྲབ། ཆོ་ག་འདོན་རྒྱུ་བཅས་ལ་ངོ་མཚར་གང་ཡང་མི་གནང་པར་རྒྱུན་དུ་གཞི་ལམ་འབྲས་གསུམ་གྱི་རྣམ་གཞག་གནད་ཆེར་ངོས་འཛིན་དགོས་པར་ལམ་སྟོན་མཛད་ཡོད།
མགོན་པོ་༸གང་ཉིད་མཆོག་གིས་ཆོས་ལ་དད་པ་ཡོད་མེད་ལ་ལྟོས་མེད་རྒྱུན་དུ་མི་བཟང་པོ་ཞིག་ཡོང་ཐབས་སུ་འབད་བརྩོན་བྱེད་དགོས་པ་དང་། གཞན་ལ་ཕན་ཐོགས་བྱེད་དགོས་པ། དེ་ལྟར་མ་བྱུང་ཡང་གནོད་པ་མི་བྱེད་པ་ཞིག་བྱེད་རྒྱུ་ནི་ཆོས་ཀྱི་སྙིང་པོ་དང་འཇིག་རྟེན་མི་ཆོས་ཀྱི་རྩ་བ་ཡང་ཡིན་པར་ལམ་སྟོན་བསྩལ་ཡོད།
ཝ་ཀ་མུལ་སྦེག་ཁུལ་གྱི་ Spring Dales Public High School སློབ་གྲྭ་དེ་ནི་ཕྱི་ལོ་ ༡༩༩༥ལོར་གསར་འཛུགས་གནང་བ་ཞིག་དང་། སྔོན་འགྲོ་ནས་འཛིན་རིམ་བཅུ་པ་བར་ཡོད་པ་ལྟར་དེང་སྐབས་སློབ་ཕྲུག་ ༢༠༠ ལྷག་འདུག
ཤེས་རྟོགས་བྱུང་བར་༸གོང་ས་མཆོག་གི་ཏཱ་ལའི་བླ་མའི་ཐེབས་རྩ་ཁང་ནས་དེ་སྔོན་སློབ་གྲྭ་དེར་ཧིན་སྒོར་འབུམ་དགུ་བཅུ་གསོལ་བསྩལ་མཛད་འདུག། སློབ་གྲྭ་དེའི་སློབ་སྤྱིའི་ངོས་ནས་ཕྱི་ལོ་ ༢༠༡༠ ལོར་༸གོང་ས་མཆོག་སློབ་གྲྭར་ཆིབས་བསྒྱུར་མཛད་ནས་ལམ་སྟོན་ཕེབས་དོན་ལྟར་དེང་སྐབས་སློབ་གྲྭའི་ཤེས་ཡོན་གནས་སྟངས་སོགས་གང་ལེགས་ཡོད་པའི་ལས་བསྡོམས་སྙན་སྒྲོན་ཞུས་པ་མ་ཟད་ཏཱ་ལའི་བླ་མའི་ཐེབས་རྩ་ནས་ཞལ་འདེབས་གནང་བར་སྙིང་དབུས་ནས་ཐུགས་རྗེ་ཆེ་སོགས་ཞུས་ཡོད་པ་རེད།
ཝ་ཀ་མུལ་སྦེག་ནི་ཀར་གྷིལ་ཁུལ་ནས་གླེ་ངོས་སུ་ཀི་ལོ་མི་ཀྲར་ ༤༠ སར་གནས་པའི་གྲོང་ཚོ་ཞིག་ཡིན་པ་དང་། གྲོང་ཚོ་དེའི་ནང་ནང་པའི་མི་འབོར་ལྔ་སྟོང་ལྷག་ཙམ་ཞིག་འདུག།ཁ་སང་མཛད་སྒོའི་ཐོག་ཁུལ་དེའི་དམག་དཔོན་དང་། འབྲེལ་ཡོད་རྒྱ་གར་གྱི་ས་གནས་ལས་བྱེད། དེ་བཞིན་སློབ་གྲྭའི་སྦྱིན་བདག་ཕྱི་རྒྱལ་བ་སོགས་མང་པོ་ཞིག་ཕེབས་ཡོད་པ་ལྟར་སྐབས་དེར་༸གོང་ས་མཆོག་ནས་ཐོག་མར་དབྱིན་སྐད་ནང་བཀའ་སློབ་བསྩལ་བར་འདས་པའི་དུས་རབས་ཉི་ཤུ་དེ་དམག་འཁྲུག་དང་མི་གསོད་ཁྲག་སྦྱོར་སོགས་ཀྱི་དུས་རབས་དེ་ལས་སློབ་གསོ་བླངས་ནས་མི་རབས་གཞོན་པ་ཚོས་དུས་རབས་ཉིར་གཅིག་པ་དེ་ཞི་བདེ་མཉམ་གནས་ཡོང་བའི་དུས་རབས་ཤིག་ཡོང་ཐབས་བྱེད་དགོས་པ་དང་། དཀའ་ངལ་རིགས་གྲོས་མོལ་གྱི་ལམ་ནས་སེལ་ཐབས་བྱེད་དགོས་པའི་དུས་རབས་ཤིག་ཡོང་བ་དང་སྔར་ལྷག་དུས་རབས་ཤིག་བསྐྲུན་གལ་ཡིན་པ་ལམ་སྟོན་མཛད་ཡོད་པ་རེད།
མགོན་པོ་༸གང་ཉིད་མཆོག་འཛམ་གླིང་ས་ཕྱོགས་གང་དུ་ཆིབས་བསྒྱུར་གནང་ཡང་འགྲོ་བ་མི་ཚང་མ་ཨ་མའི་བྱམས་བརྩེར་བརྟེན་ནས་འཚར་ལོངས་བྱུང་བ་གང་ཞིག་བདེ་བ་འདོད་མཁན་འབའ་ཞིག་ཡིན་སྟབས།ཆོས་ཁས་ལེན་མིན་ལ་ལྟོས་མེད་འགྲོ་བ་མི་ཚང་མ་གཅིག་མཚུངས་ཡིན་པའི་འདུ་ཤེས་དེའི་འོག་ནས་ཕྱིའི་དངོས་པོའི་འཕྲོད་བསྟེན་དང་འབྲེལ་ཏེ་ནང་སེམས་ཀྱི་འཕྲོད་བསྟེན་ཡང་གལ་འགངས་ཆེན་པོ་ཡིན་སྐོར་ལམ་སྟོན་མཛད་ཀྱི་ཡོད་པ་བཀའ་བསྩལ་སོང་།
ལྷག་པར་དུ་༸གོང་ས་མཆོག་གིས་རྒྱ་གར་གྱི་དཔལ་ནཱ་ལེནྡཱའི་ཆོས་བརྒྱུད་ནས་བྱུང་བའི་ཚད་མ་དང་སེམས་ཁམས་རིག་པ་བཅས་ནི་དེང་རབས་ཀྱི་ཚན་རིག་དང་ཆེས་མཐུན་པའི་འཛམ་གླིང་ཞི་བདེར་ཕན་པའི་རིག་པའི་གཞུང་ལུགས་ཤིག་ཡིན་སྟབས་ཚང་མས་དེར་རྒྱུན་དུ་དོ་སྣང་བྱེད་དགོས་པ་སོགས་ལམ་སྟོན་མཛད་ཡོད།
མཛད་སྒོ་དེ་གྲུབ་བསྟུན་༸གོང་ས་༸སྐྱབས་མགོན་ཆེན་པོ་མཆོག་ནས་ Spring Dales Public High School སློབ་གྲྭར་དངོས་སུ་ཆིབས་བསྒྱུར་མཛད་དེ་ཁང་པ་གསར་རྒྱག་གྱི་འཛུགས་སྐྲུན་ལས་གཞིར་རབ་གནས་བཀྲིན་བསྩལ་བ་དང་སློབ་ཕྲུག་ཚོ་དང་ལྷན་སྐུ་པར་སྒྲོན་ཡོད་པ་རེད།
