ཁ་སང་ཟླ་ ༡ ཚེས་ ༡༩ ཉིན་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཝིར་བྷ་དུ་སིངྒ་མཆོག་གིས་བཙན་བྱོལ་བོད་མིའི་བསྟི་གནས་བཞུགས་སྒར་དྷ་རྨ་ས་ལ་མངའ
་སྡེ་འདིའི་རྒྱལ་ས་གཉིས་པར་ངོས་འཛིན་བྱ་རྒྱུ་ཡིན་ཅེས་ཡོངས་བསྒྲགས་གནང་འདུག
དེ་ཡང་ཉེ་སྔོན་དྷ་རྨ་ས་ལར་ཚོགས་པའི་མངའ་སྡེའི་གྲོས་ཚོགས་མཐའ་མའི་སྐབས་ཐུགས་ཐག་བཅད་དོན་ལྟར། ཁ་སང་རེས་གཟའ་ཕུར་བུའི་ཉིན་སྤྱི་ཁྱབ་བློན་ཆེན་སྐུ་ཞབས་ Virbhadra Singh མཆོག་གིས་ཧི་མཱ་ཅལ་མངའ་སྡེའི་རྒྱལ་ས་ Shimla ནས་རྒྱང་ཐག་སྤྱི་ལེ་ ༢༥༠ སར་ཡོད་པའི་དྷ་རྨ་ས་ལའི་ལོ་རྒྱུས་དང་གལ་ཆེའི་རང་བཞིན་ཁག་ལ་གཟིགས་ནས་གྲོང་ཁྱེར་དེ་ལ་མངའ་སྡེའི་རྒྱལ་ས་གཉིས་པའི་གནས་བབས་ཐོབ་རྒྱུ་དེ་འོས་ཤིང་འཚམས་པ་ཞིག་ཆགས་ཡོད་ཅེས་གསུངས་པ་མ་ཟད། དྷ་རྨ་ས་ལ་ནི་ཧི་མཱ
་ཅལ་མངའ་སྡེའི་ Kangra རྫོང་གཙོས་པའི་ Chamba དང་ Hamirpur དེ་བཞིན་ Una བཅས་ཀྱི་རྫོང་ཁོངས་དེ་དག་ལ་དམིགས་བསལ་གལ་གནད་དང་རིན་ཐང་ཆེན་པོ་ཆགས་ཡོད་སྟབས། ད་ལན་གྱི་གྲོས་ཚོགས་ནང་དྷ་རྨ་ས་ལ་ཧི་མཱ་ཅལ་མངའ་སྡེའི་རྒྱལ་ས་གཉིས་པར་ངོས་འཛིན་བྱུང་བ་ཞིག་རེད་ཅེས་གསུངས་ཡོད་པ་རེད། དེ་བཞིན་སྐུ་ཞབས་ཝིར་བྷ་དུ་སིངྒ་མཆོག་གིས་དྷ་རྨ་ས་ལ་ཧི་མཱ་ཅལ་མངའ་སྡེའི་རྒྱལ་ས་གཉིས་པར་ངོས་འཛིན་གནང་རྒྱུའི་ཐུགས་ཐག་བཅད་པ་དེས་གྲོང་ཁྱེར་དེའི་ནང་གནས་སྡོད་གནང་བཞིན་པའི་ས་གནས་ཡུལ་མིར་ཁེ་ཕན་ཡོད་པ་མ་ཟད། ཁོང་རྣམས་གཞུང་འབྲེལ་ལས་དོན་ཆེད་ཐག་རིང་སར་ཡོད་པའི་ཤིམ་ལར་བསྐྱོད་མི་དགོས་པའི་གནས་སྟངས་ཤིག་ཆགས
་ངེས་ཡིན་པ་སོགས་གསུངས་འདུག སྤྱི་ཁྱབ་བློན་ཆེན་མཆོག་གིས་ད་དུང་དྷ་རྨ་ས་ལ་དེ་རྒྱ་གར་གྱི་ས་བཀྲ་ནང་ནས་ཆེས་མངོན་གསལ་ཆགས་ཡོད་པ་མ་ཟད། དེའི་ནང་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་གནས་ཡོད་པ་བཅས་ཀྱི་གལ་ཆེའི་རྒྱུ་མཚན་ཁག་ལ་བརྟེན་ནས་འཛམ་གླིང་ཁྱོན་ཡོངས་ཀྱི་མི་དམངས་རྣམས་ནས་དོ་སྣང་ཆེན་པོ་དང་ཡུལ་སྐོར་སྤྲོ་འཆམ་པ་ཕོན་ཆེ་ཡོང་ས་གནད་ཆེ་ཞིག་ཡིན་པ་གསུངས་ཡོད་པ་རེད།
རྩ་བའི་བཞུགས་སྒར་དྷ་རྨ་ས་ལ་ནི་ཧི་མཱ་ཅལ་མངའ་སྡེའི་ཀང་ར་རྫོང་ཁོངས་ཀྱི་ཁྱབ་ཁོངས་རི་རྒྱུད་གྲོང་ཁྱེ
ར་ཞིག་ཡིན་པ་དང་དེའི་ནང་༸གོང་ས་༸སྐྱབས་མགོན་ཆེན་པོ་མཆོག་གི་བཞུགས་གནས་༸རྒྱལ་བའི་ཕོ་བྲང་དང་བོད་མིའི་སྒྲིག་འཛུགས་ཀྱི་བསྟི་གནས་བཅས་ཡོད་པ་མ་ཟད། ཕྱི་ལོ་ ༢༠༠༥ ལོར་གྲོང་ཁྱེར་དེའི་ནང་ཧི་མཱ་ཅལ་མངའ་སྡེའི་དགུན་དུས་གྲོས་ཚོགས་ཆེས་ཐོག་མ་བསྐོང་ཚོགས་གནང་ནས་ད་བར་ཁྱོན་དགུན་དུས་གྲོས་ཚོགས་ཐེངས་ ༡༢ ཚོགས་ཟིན་པ་དང་། ལྷག་དོན་སྔ་ལོ་ཟླ་ ༥ པའི་ནང་དྷ་རྨ་ས་ལ་དེ་བསྐྱར་དུ་དེང་དུས་ཅན་གྱི་གྲོང་ཁྱེར་འཛུགས་བསྐྲུན་ལས་གཞིའི་ཁོངས་སུ་བདམས་ཐོན་གྱིས་ལས་གཞི་དེའི་ཆེད་དྷ་རམ་ས་ལ་ས་གནས་སུ་ཧིན་སྒོར་ས་ཡ་ཆིག་སྟོང་གནང་རྒྱུ་ཡིན་པའི་གསལ་བསྒྲགས་ཀྱང་གནང་ཡོད་པ་རེད།
