ཟླ་བ་འདིའི་ཚེས་ ༢༦ ཉིན་ཕྱི་དྲོ་བྱེས་ཀྱི་གདན་ས་སེ་ར་ཐེག་ཆེན་གླིང་གིས་ཇི་ལྟར་གདན་ཞུ་གསོལ་འདེབས་ཞུས་དོན་ལྟར། འཁོན་རིགས་བསྟན་པའི་གསལ་བྱེད་དཔལ་ས་སྐྱ་༸གོང་མ་ཁྲི་ཆེན་རིན་པོ་ཆེ་མཆོག་སེ་ར་ཐེག
་ཆེན་གླིང་གྲྭ་ཚང་བྱེས་སྨད་གཉིས་ལ་༸ཞབས་སོར་འཁོད་པ་མ་ཟད། ཚོགས་ཆེན་གྱིས་གོ་སྒྲིག་འོག་ཕྱི་དྲོ་ཚོུད་ ༦ ཐོག་སེ་ར་ཚོགས་ཆེན་དུ་མཚུངས་མེད་སྐྱབས་རྗེ་བྱང་རྩེ་ཆོས་རྗེ་རིན་པོ་མཆོག་དང་མཁན་རིན་པོ་ཆེ། དེ་བཞིན་བླ་སྤྲུལ་དགེ་བའི་བཤེས་གཉེན་དགེ་འདུན་འདུས་མང་ཡོངས་རྒྱས་འཛོམས་ཐོག་ས་སྐྱ་༸གོང་མ་ཁྲི་རིན་པོ་ཆེ་མཆོག་ལ་བརྟན་བཞུགས་བསྡུས་པ་ཞིག་བསྟར་འབུལ་དང་གཞུ
ང་ཀ་པོད་ལྔའི་སྒོ་ནས་རྩོད་པའི་དམ་བཅའ་ཆེན་མོ་ཞིག་གཟིགས་འབུལ་ཞུས་པ་དང་ཆབས་ཅིག དཔལ་ས་སྐྱ་༸གོང་མ་ཁྲི་རིན་པོ་ཆེ་མཆོག་གིས་འདུས་མང་ཡོངས་ལ་ཐོག་མར་༸གང་ཉིད་མཆོག་འདིར་ཕེབས་སྐབས་ཚང་མས་སྣེ་ལེན་དང་གུས་བསུ་གཟབ་རྒྱས་གནང་པར་ཐུགས་རྗེ་ཆེ་ཞེས་གསུངས་པ་མ་ཟད། དེང་སྐབས་༸གོང་ས་༸སྐྱབས་མགོན་ཆེན་པ་མཆོག་གི་རླབས་ཆེན་མཛད་འཕྲིན་འོག་ཆོས་བརྒྱུད་ཕན་ཚུན་དབར་དེ་སྔ་ལོ་རྒྱུས་ཐོག་བྱུང་མ་མྱོང་བའི་ཐུགས་མཐུན་དམ་གཙང་ཡོད་བཞིན་པའི་ཐོག་དེང་སྐབས་གཉན་ཕྲང་གིི་དུས་འདིར་ཚང་མས་སྔར་ལྷག་ཐུགས་མཐུན་དམ་གཙང་གནང་སྐྱོང་ཡོང་བའི་ཞེན་སྐུལ་གནང་པ་དང་སྦྲགས། ༸གོང་ས་༸སྐྱབས་མགོན་ཆེན་པོ་མཆོག་ནི་འཛམ་གླིང་སྤྱི་དང་ཡང་སྒོས་བོད་མི་ཡོངས་ལ་བཀའ་དྲིན་ཆེན་པོ་བསྐྱངས་དོན་ལྟར་ང་ཚོས་མགོན་པོ་༸གང་ཉིད་མཆོག་ལ་བཀའ་དྲིན་རྗེས་དྲན་ཞུ་དགོས་པ་དང་༸གང་ཉིད་མཆོག་གི་བཀའ་བཞིན་སྒྲུབ་རྒྱུ་དེ་ཆེས་གནད་ཆེ་ཡིན་པ་སོགས་ལམ་སྟོན་བསྩལ་སོང་།
དེ་དང་ཕྱོགས་མཚུངས་དེང་སྐབས་ང་ཚོ་ཁེར་རྐྱང་ཟུར་དུ་གནས་ཐབས་མེད་སྟབས་ང་ཚོས་སྲོལ་རྒྱུན་གྱི་ཤེས་ཡོན་སློབ་སྦྱོང་བྱེད་
པ་དང་མཉམ་དུ་ཕྱིའི་སྐད་ཡིག་གིས་མཚོན་པའི་དང་དེང་དུས་རིགས་གསར་གྱི་ཤེས་བྱ་ལ་ཡང་སློབ་སྦྱོང་གནང་ཏེ་དུས་རབས་གསར་པའི་མིའི་བསམ་བློ་གཏོང་སྟངས་དང་ཁམས་དང་མོས་པ་ལྟར་འདུལ་བྱ་སྐྱོང་དགོས་རྒྱུ་གལ་ཆེ་ཡིན་པའི་ལམ་སྟོན་གནང་ཡོད།
གཞི་རྩའི་དཔལ་ས་སྐྱ་༸གོང་མ་ཁྲི་ཆེན་རིན་པོ་ཆེ་མཆོག་གིས་ཟླ་ ༤ ཚེས་ ༤ ཉིན་རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དུ་༸ཞབས་སོར་འཁོད་ཡོད་པ་དང་། ཉིན་གྲངས་ ༢༣ རིང་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་དང་ཀོ་ལི་གྷལ་དོན་ལྡན་གླིང་། ཧུན་སུར་རབ་རྒྱས་གླིང་། སྦེལ་ཀོབ་བོད་མིའི་གཞིས་ཆགས་གཉིས་བཅས་ཀྱི་ནང་རྟེན་གཞི་བྱས་པའི་གདན་ས་ཆེན་པོ་གསུམ་དང་དེ་བཞིན་ཆོས་རྒྱུད་རིས་མེད་དགོན་སྡེ་གྲྭ་ཚང་ཁག མང་ཚོགས་བཅས་ལ་འཚམས་གཟིགས་དང་ཆོས་འབྲེལ་གྱི་མཛད་འཕྲིན་རྒྱ་ཆེ་བསྐྱངས་གནང་ཡོད་པ་མ་ཟད་ཆོས་འབྲེལ་ཉིན་མཐའ་མ་དེ་ཚེས་ ༢༧ ཉིན་སྦེལ་ཀོབ་གྷོ་ལ་ཐ་ལ་གཞིས་གྲོང་ལྔ་པ་དང་དྲུག་གཉིས་ཀྱི་ལྷ་ཁང་གསར་པ་དབུ་འབྱེད་རབ་གནས་དང་མང་ཚོགས་ལ་བཀའ་སློབ་དང་ཕོ་ལུང་བཅས་གནང་ཡོད་པ་རེད།
