བོད་མིའི་བླ་ན་མེད་པའི་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་དགའ་ལྡན་ལྔ་མཆོད་ཉིན་མོ་དང་བསྟུན་སྔ་ཐོག་འབྲས་སྤུངས་བློ་གསལ་གླིང་གྲྭ་ཚང་གི་ཆོས་རའི་ནང་དུ་མོན་གྷོ་འདོ་རྒུ་གླིང་གཞིས་ཁོངས
་སློབ་ཕྲུག་དང་སེར་སྐྱ་མི་མང་ཡོངས་ལ་འདི་ཕྱིའི་ལམ་སྟོན་བཀའ་སློབ་དང་ཐེག་པ་ཆེན་པོའི་སེམས་བསྐྱེད་ཀྱི་བཀའ་ཆོས་བསྩལ་གནང་སོང་།
༸གོང་ས་མཆོག་གིས་ཐོག་མར་ང་ཚོ་བོད་མི་རྣམས་བཙན་བྱོལ་དུ་ཡོང་དགོས་དོན་ནི་རང་མི་རིགས་ཀྱི་ཐོབ་ཐང་རྩོད་ལེན་དང་། ཆོས་རིག་སྲུང་སྐྱོབ་ཆེད་དུ་ཡིན་པར་བཀའ་སློབ་བསྩལ་སོང་བ་མ་ཟད་བོད་མིའི་ཐོབ་ཐང་རྩོད་ལེན་དང་ཆོས་རིག་སྲུང་སྐྱོབ་ཆེད་བཙན་བྱོལ་ནང་བོད་མིའི་སློབ་གྲྭ་དང་གཞིས་ཆགས་ཁག་ཟུར་དུ་གསར་འཛུགས་གནང་སྐོར་སོགས་ངོ་སྤྲོད་གནང་བ་དང་ཆབས་ཅིག གཞིས་ཆགས་པ་ཚོས་ཀྱང་དེ་སྔའི་ཞིང་ལས་བྱེད་སྟངས་དེར་ཆོག་ཤེས་ནས་མ་བསྡད་པར་ཡར་རྒྱས་གྱི་རྣམ་པ་ཅན་དུ་བསྐྱོད་དགོས་གལ་ཡིན་པར་ལམ་སྟོན་བསྩལ་ཡོད།
ལྷག་དོན་མགོན་པོ་༸གང་ཉིད་མཆོག་གིས་རྒྱུན་དུ་ཆོས་ལུགས་མཐུན་སྒྲིལ་དང་ཆོས་ལུགས་ལ་མ་བརྟེན་པའི་བཟང་སྤྱོད་གོང་འཕེལ། བོད་ཀྱི་ཆོས་རིག ཁོར་ཡུག་སྲུང་སྐྱོབ་བཅས་ཀུན་ཁྱབ་མཛད་ཁུར་གསུམ་གྱི་སྐོར་བཀའ་བསྩལ་གནང་
པ་དང་སྦྲགས། ༸གང་ཉིད་མཆོག་ནས་སྲིད་ཀྱི་སྐུ་དབང་ཡོངས་རྫོགས་བཞག་ཟིན་ཀྱང་བོད་དང་བོད་མི་རིགས་ཀྱི་གནད་དོན་དེ་མགོན་པོ་མཆོག་གི་ཐུགས་ནས་ནམ་ཡང་བློས་གཏོང་གནང་སྲིད་ཀྱི་མ་རེད་ཅེས་བཀའ་བསྩལ་སོང་བ་དང་། དེ་བཞིན་མགོན་པོ་༸གང་ཉིད་ཀྱིས་བོད་ཀྱི་ཁོར་ཡུག་ཐོག་ཐུགས་སྣང་གནངབཞིན་པ་ལྟར་གཞིས་ཆགས་ནང་གཞོན་སྐྱེས་ཚོས་ཁོར་ཡུག་གཙང་སྦྲའི་ཐད་ལ་དོ་སྣང་བྱེད་དགོས་པར་ལམ་སྟོན་གནང་སོང་།
༸གོང་ས་མཆོག་གིས་རྣམ་དཔྱོད་ཁྱད་དུ་འཕགས་པའི་ང་ཚོའི་མེས་པོ་གོང་མ་ཚོས་རྒྱ་གར་འཕགས་པའི་ཡུལ་ནས་གདན་ཞུ་གནང་པའི་ནང་པ་སངས་རྒྱས་པའི་ལྟ་གྲུབ་དང་ཐོུང་མ་ཡིན་པའི་བོད་ཀྱི་སྐད་ཡིག་དང་རིག་གཞུང་ཕྱུག་པོ་དེ་དག་ལ་གཞོན་སྐྱེས་ཕོ་མོ་ཁྱད་མེད་ཚོས་སློབ་གཉེར་གནང་ཐོག་རྒྱུན་འཛིན་གནང་དགོས་གལ་ཡིན་པར་བཀའ་ནན་བསྩལ་ཡོད།
༸གོང་ས་མཆོག་གིས་༸གང་ཉིད་མཆོག་དེང་སྐབས་དགུང་ལོའི
་བབ་ལ་གཞིགས་ནས་སྔར་དང་མི་འདྲ་བའི་སྐུ་ཐང་ཆད་བཞིན་ཡོད་པར་བརྟེན་དེང་སྐབས་ཨ་རི་དང་ཡོ་རོབ་སོགས་ཕྱིའི་རྒྱལ་ཁབ་ཁག་་ལ་ཕྱོགས་ཕེབས་རྒྱུའི་མཛད་འཆར་ཁག་བསྐྱང་གནང་རྒྱུ་མིན་སྐོར་བཀའ་བསྩལ་སོང་།
དེ་རྗེས༸་གོང་ས་༸སྐྱབས་མགོན་ཆེན་པོ་མཆོག་ནས་སེར་སྐྱ་མང་ཚོགས་དང་སློབ་ཕྲུག་བཅས་ལ་ཐེག་ཆེན་སེམས་བསྐྱེད་ཀྱི་ཆོས་འབྲེལ་དང་སྤྱན་རས་གཟིགས་དང་འཇམ་དཔལ་དབྱངས། སྒྲོལ་མ་བཅས་ཀྱི་རྗེས་གནང་བསྩལ་ཡོད་པ་རེད།
མཛད་འཆར་ལྟར་ན་སང་ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་གདན་ས་འབྲས་སྤུངས་དང་ར་བསྟོད་གྲྭ་ཚང་གི་དགེ་འདུན་པར་བསྙེན་རྫོགས་སྒྲུབ་གནང་རྒྱུ་རེད་འདུག
