སྤྱི་འཐུས་ཚོགས་གཞོན་མཆོག་གིས་སྣེ་ཁྲིད་པའི་སྐུ་ཚབ་ཚོགས་ཆུང་ནས་རྒྱ་གར་གྱི་གྲོས་ཚོགས་འཐུས་མི་ ༤༠ ལྷག་མཇལ་དང་འཕྲད་གནང་བ།


vot.org
Facebooktwittergoogle_plusmail
སྤྱི་འཐུས་ཚོགས་གཞོན་མཆོག་གིས་སྣེ་ཁྲིད་པའི་སྐུ་ཚབ་ཚོགས་ཆུང་ནས་རྒྱ་གར་གྱི་གྲོས་ཚོགས་འཐུས་མི་ ༤༠ ལྷག་མཇལ་དང་འཕྲད་གནང་བ།

བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཨཱ་ཙཱརྱ་ཡེ་ཤེས་ཕུན་ཚོགས་མཆོག་གིས་སྣེ་ཁྲིད་འོག་སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་ལགས་དང་སྤྱི་འཐུས་བློ་བཟང་ཡེ་ཤེས་ལགས་བཅས་སྤྱི་འཐུས་ཚོགས་ཆུང་ཞིག་གིས་རྒྱལ་ས་ལྡི་ལིར་རྒྱ་གར་གྲོས་ཚོགས་ཀྱི་དགུན་དུས་གྲོས་ཚོགས་དང་བསྟུན་ཕྱི་ཚེས་  ༡༨ ནས་འགོ་འཛུགས་ཀྱིེས་དེ་རིང་བར་ཉིན་གྲངས་ལྔའི་རིང་རྒྱ་གར་རྒྱལ་ཡོངས་ཀྱི་མངའ་སྡེ་ཁག་ ༡༥ ལྷག་ནས་ཕེབས་པའི་སྲིད་དོན་ཚོགས་པ་འདྲ་མིན་ཁག་ ༡༠ ཙམ་གྱི་གྲོས་ཚོགས་ཚོགས་མི་ ༤༠ ལྷག་དང་མཇལ་འཕྲད་གནང་ཡོད་པ་མ་ཟད། གྲོས་འཐུས་དེ་དག་ལ་བོད་ཀྱི་འདས་མ་ད་གསུམ་གྱི་གནད་དོན་ཁག་ཡིག་ངག་གཉིས་ཐོག་ནས་འགྲེལ་བརྗོད་དང་། ལྷག་དོན་རྒྱ་གར་གྲོས་ཚོགས་ནང་བོད་དོན་གླེང་སློང་ཡོང་ཐབས་སོགས་ཀྱི་འབོད་སྐུལ་ཞུས་འདུག

ཚོགས་གཞོན་ཨཱ་ཙཱརྱ་ཡེ་ཤེས་ཕུན་ཙོགས་མཆོག་གིས་བོད་དོན་ཞུ་སྐུལ་ལས་འགུལ་དེའི་སྐབས་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོས་རྒྱ་གར་གྱི་བདེ་སྲུང་བློན་ཆེན་ཟུར་པ་སྐུ་ཞབས་ Mulayam Singh Yadav  མཆོག་གིས་དབུས་པའི་ཁྲིམས་ཁང་གོང་མའི་ཁྲིམས་རྩོད་པ་སྐུ་ཞབས་ KTS Tulsi  མཆོག་དང་སྐུ་ཞབས་  Vivek Tankha མཆོག དེ་སྔོན་མངའ་སྡེའི་སྤྱི་ཁྱབ་བློན་ཆེན་གནང་མྱོང་མཁན་སྐུ་ཞབས་ Shanta Kumar མཆོག་སྐུ་ཞབས་ Bhagat Singh Koshyari  མཆོག སྐུ་ཞབས་ Moti Lal Vohra  མཆོག དེ་བཞིན་སྐུ་ཞབས་   Subhash Chandra མཆོག་སོགས་རྒྱ་གར་ཆབ་སྲིད་ཚོགས་པ་ཆེ་གྲས་ཀྱི་གནད་ཡོད་དཔོན་རིགས་མང་དག་ཞིག་དང་འཇལ་འཕྲད་གནང་ཐུབ་ཡོད་སྐོར་གསུངས་སོང་།

གྲོས་ཚོགས་ཀྱི་ཚོགས་མི་དེ་དག་གིས་མགྲིན་དབྱངས་གཅིག་གྱུར་གྱིས་རྒྱ་ནག་དེ་རྒྱ་གར་གྱི་ཁྱིམ་མཚེས་རྒྱལ་ཁབ་ཆགས་པ་ནས་བཟུང་རྒྱ་གར་གྱི་བདེ་འཇགས་ལ་དཀའ་ངལ་འཕྲད་པའི་སྐོར་དང་། ལྷག་པར་དུ་རྒྱ་གར་གྱི་ཆབ་སྲིད་ཚོགས་པ་ཕན་ཚུན་དབར་ལྟ་གྲུབ་སོགས་མི་མཐུན་པའི་ཆ་ཕྲན་བུ་ཡོད་ཀྱང་། བོད་དང་བོད་མིའི་བདེ་དོན་ཐོག་ཆབ་སྲིད་ཚོགས་པ་ཚང་མས་གུས་བརྩི་དང་ཆེ་མཐོང་གནང་བ་མ་ཟད་གོ་སྐབས་ནམ་བྱུང་ལ་རྒྱབ་སྐྱོར་གནང་རྒྱུའི་ཞལ་བཞེས་སོགས་ཀྱང་གནང་ཡོད་པ་རེད།

དེ་བཞིན་ཁ་སང་བོད་མི་མང་སྤྱི་འཐུས་ལྷན་ཚོགས་ཀྱི་སྐུ་ཚབ་ཚོ་ལྡི་ལིར་ཕེབས་ཞོར་དང་བསྟུན་རྒྱ་གར་གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ཚོགས་མི་ཚོ་འཇལ་འཕྲད་གནང་བ་དང་། གྲོས་ཚོགས་ཀྱི་བོད་དོན་རྒྱབ་སྐྱོར་ཚོགས་པའི་ལྷན་ཚོགས་དེའི་ཐོག་ནས་ལས་དོན་བསྐྱར་ཞིབ་དང་ལྷག་པར་མ་འོངས་པར་ལས་དོན་གནང་ཕྱོགས་དང་འབྲེལ་བའི་གྲོས་ཆོད་ཁག་གཅིག་ཀྱང་བཞག་ཡོད་པ་རེད།