བོད་རྒྱ་ཞི་མོལ་ཡོང་མ་ཐུབ་པའི་འགག་རྩ་རྒྱ་ནག་ལ་ཐུག་ཡོད།


vot.org
Facebooktwittergoogle_plusmail
བོད་རྒྱ་ཞི་མོལ་ཡོང་མ་ཐུབ་པའི་འགག་རྩ་རྒྱ་ནག་ལ་ཐུག་ཡོད།

བོད་ཀྱི་གནད་དོན་སེལ་ཆེད་དང་འབྲེལ་བའི་བོད་མིའི་སྒྲིག་འཛུགས་ཀྱི་ཆབ་སྲིད་ཀྱི་གལ་གནད་ཆེ་བའི་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུ་ཐེངས་ ༢༩ པ་དེ་བཞིན་དེ་རིང་མཇུག་སྒྲིག་གནང་སོང་བ་དང་ཆབས་ཅིག ད་བར་རྒྱ་བོད་ཞི་མོལ་ཡོང་མ་ཐུབ་པའི་རྒྱུ་རྐྱེན་གཙོ་བོ་རྒྱ་ནག་གི་ཕྱོགས་ནས་གཞུང་འབྲེལ་ཡ་ལན་མེད་པའི་དབང་གིས་རེད་ཅེས་གསུངས་སོང་།

དེ་ཡང་ཁ་སང་ཟླ་ ༡༠ ཚེས་ ༩ དང་དེ་རིང་ཚེས་ ༡༠ བཅས་སུ་འདི་ག་བཞུགས་སྒར་དུ་རྟེན་གཞི་བྱས་པའི་ Asia Health resort གསོལ་མགྲོན་ཁང་དུ་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དབུ་བཞུགས་ཕྱག་སྦྲེལ་བཀའ་བློན་རྣམ་པ་དང་། དཔལ་ལྡན་དགའ་ལྡན་ཕོ་བྲང་ཡིག་ཚང་གི་དྲུང་ཆེ་རྣམ་པས་གཙོས་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་མི་ ༡༧ ཡོད་པ་ཚང་མ་ལྷན་འཛོམས་ཐོག་ཚོགས་འདུ་ཐེངས་ ༢༩ པ་ཚོགས་ཡོད་པ་རེད། ཚོགས་འདུ་འདི་ནི་གལ་གནད་ཅན་ཞིག་ཆགས་ཀྱི་ཡོད་སྟབས་གོ་བསྡུར་ཇི་བྱུང་ནང་དོན་རྒྱས་པ་གསུང་སྲོལ་མེད་པ་རེད། བོད་མིའི་སྒྲིག་འཛུགས་ཀྱི་མགྲིན་ཚབ་པ་ཕྱི་འབྲེལ་དྲུང་ཆེ་དྭགས་པོ་བསོད་ནམས་ནོར་བུ་ལག་ས་ཀྱིས་ཐེངས་འདིའི་ཚོགས་འདུ་དང་འབྲེལ་གསར་འགོད་པའི་བཅར་འདྲི་དང་ལེན་གནང་སྐབས། ཚོགས་འདུའི་སྐབས་ཉིན་ཤས་གོང་དུ་ཚོགས་གྲུབ་པའི་བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུ་ཚོགས་འདུའི་ཐོག་ཞི་མོལ་ཡོང་ཐབས་དང་འབྲེལ་བའི་དགོངས་འཆར་མང་དག་ཕེབས་ཁག་ལ་བསྐྱར་ཞིབ་དང་གོ་བསྡུར་གནང་རྒྱུ་ཙམ་མ་ཟད། བོད་རྒྱ་ཞི་མོལ་ལས་དོན་ཚོགས་ཆུང་གི་ལས་དོན་ཇི་གནང་དང་ཚགས་ཚུད་གཏོང་ཕྱོགས་སོགས་ཀྱི་ཐད་ལ་བཀའ་བསྡུར་གནང་ཡོད་པ་གསུངས་ཡོད། ཁྱད་པར་དུ་ཁོང་གིས་ཞི་མོལ་ལས་དོན་ཚོགས་ཆུང་གི་ལས་འགན་གཙོ་བོ་ནི། ཞི་མོལ་ཐབས་སུ་རྒྱ་ནག་དང་བོད་ཀྱི་གནད་དོན་གཞི་རྩར་བཞག་ཐོག་ཞིབ་འཇུག་སོགས་གནང་ནས་དགོངས་ཚུལ་བསྡུ་རབ་གནང་རྒྱུ་ཆགས་ཀྱི་ཡོད་ནའང་། མཐའ་མའི་ཐག་གཅོད་བཀའ་ཤག་ནས་གནང་གི་ཡོད་པ་གསུངས་ཡོད། ལྷག་དོན་བོད་མིའི་ཕྱོགས་ནས་དུས་ཚོུད་དང་ས་གནས་ལ་ལྟོས་མེད་འབྲེལ་མོལ་གནང་རྒྱུ་གྲ་སྒྲིག་ཡིན་རུང་། ད་བར་རྒྱ་ནག་གི་ཕྱོགས་ནས་གཞུང་འབྲེལ་གྱི་ཡ་ལན་མ་བྱུང་བའི་རྐྱེན་གྱིས་ཞི་མོལ་ཡོང་ཐུབ་ཀྱི་མེད་པ་གསུངས་གནང་སོང་།

རྩ་བའི་ཕྱི་ལོ་ ༢༠༡༠ བར་འབྲེལ་མོལ་ཐེངས་ ༩ བྱུང་ཡོད་པ་དང་དེའི་རྗེས་ནས་བསྐྱར་གསོ་མ་བྱུང་བར་ལྷག་ཡོད་པ་རེད། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་དབུ་ཁྲིད་པའི་བཀའ་ཤག་སྐབས་གཉིས་རིང་ད་བར་ལ་བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུ་ཐེངས་བདུན་ཚོགས་གྲུབ་ཡོད་པ་རེད།


འབྲེལ་ཡོད་གསར་འགྱུར།