བདེ་སྲུང་ལས་ཁུངས་ནས་བོད་མིའི་སྐྱབས་བཅོལ་ལག་དེབ་དང་ཕྱི་སྐྱོད་ལག་དེབ་ཀྱི་དཀའ་ངལ་སེལ་ཐབས་སུ་དགོངས་པ་བཞེས་དགོས།


vot.org
Facebooktwittergoogle_plusmail
བདེ་སྲུང་ལས་ཁུངས་ནས་བོད་མིའི་སྐྱབས་བཅོལ་ལག་དེབ་དང་ཕྱི་སྐྱོད་ལག་དེབ་ཀྱི་དཀའ་ངལ་སེལ་ཐབས་སུ་དགོངས་པ་བཞེས་དགོས།

ཁ་སང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ལས་ཉིན་བདུན་པའི་ཐོག་བོད་མིའི་སྒྲིག་འཛུགས་བདེ་སྲུང་ཁུངས་ཀྱི་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༡༦་༡༧ ལོའི་ལོ་འཁོར་ལས་བསྡོམས་ཐོག་དྲི་བ་དྲིས་ལན་གནང་སྐབས་སྤྱི་འཐུས་ཁག་གཅིག་ནས་ཚོར་ཤུགས་ཆེན་པོས་བདེ་སྲུང་སྲུང་ལས་ཁུངས་ནས་རྒྱ་གར་ནང་གནས་སྡོད་ཆོག་པའི་བོད་མིའི་སྐྱབས་བཅོལ་ལག་དེབ་དང་ཕྱི་སྐྱོད་ལག་དེབ་སེར་པོའི་དཀའ་ངལ་ཁག་སེལ་ཐབས་སུ་དགོངས་པ་བཞེས་དགོས་པ་གསུངས་སོང་།

དེ་ཡང་གྲོས་ཚོགས་ལས་ཉིན་བདུན་པ་དེ་དགོང་དྲོ་ཆུ་ཚོད་བདུན་པ་བར་འཕར་འགྱང་གནང་ཐོག་ཤེས་རིག་ལས་ཁུངས་ཀྱི་ཕྱི་ལོ་ ༢༠༡༦་༡༧ ལོའི་ལས་བསྡོམས་དང་འབྲེལ་བའི་དྲི་བ་དྲིས་ལན་ཁག་ཡོངས་སུ་གྲུབ་མ་ཐག་བདེ་སྲུང་བཀའ་བློན་འཕགས་པ་ཚེ་རིང་མཆོག་ནས་བདེ་སྲུང་ལས་ཁུངས་ཀྱི་ལོ་འཁོར་ལས་བསྡོམས་སྙན་སྒྲོན་ཞུས་སོང་པ་དང་། སྐབས་དེར་བོད་མི་མང་སྤྱི་འཐུས་རྒྱུན་ལས་ནས་བདེ་སྲུང་ལས་ཁུངས་ཀྱི་ལོ་འཁོར་ལས་བསྡོམས་རྒྱས་པར་དཔྱད་ཞིབ་གནང་པའི་དམིགས་བསལ་དྲི་བ་གང་ཡང་གནང་མེད་པ་རེད།

འོང་ཀྱང་སྤྱི་འཐུས་སྒེར་གྱི་དྲི་བ་དྲིས་ལན་གནང་པ་ལས་སྤྱི་འཐུས་ཁག་ཅིག་གིས་བར་སྐབས་ཤིག་ནས་རྒྱ་གར་གཞུང་གིས་བོད་མི་ཚོར་གནང་པའི་ཕྱི་སྐྱོད་ལག་དེབ་སེར་པོ་དེ་རྒྱལ་སྤྱིའི་རྒྱལ་ཁབ་ཁག་ཅིག་ནས་ངོས་ལེན་མེད་པ་དང་། ལྷག་པར་དུ་རྒྱ་གར་གཙོས་པའི་རྒྱལ་སྤྱིའི་གནམ་ཐང་ཁག་ཏུ་ཡང་ངོས་ལེན་ཡོད་མེད་སོགས་ཀྱི་དཀའ་ངལ་མང་དག་ཞིག་མུ་མཐུད་འཕྲད་བཞིན་པ་དང་། དེ་བཞིན་རྒྱ་གར་དུ་གནད་སྡོད་བྱེད་བཞིན་པའི་བོད་མི་རྣམས་ལ་སྐྱབས་བཅོལ་ལག་དེབ་འམ་ RC ཞེས་པ་དེ་འཕར་འགྱང་གནང་སྟངས་དང་། ལྷག་དོན་ས་གནས་གཅིག་ནས་གཞན་ལ་གནས་སྤོ་ཞུ་སྐབས་དཀའ་ངལ་མི་ཉུང་བ་ཞིག་འཕྲད་བཞིན་ཡོད་པ་འགྲེལ་བརྗོད་དང་སྦྲགས། འབྲེལ་ཡོད་བདེ་སྲུང་ལས་ཁུངས་ནས་ངལ་བ་དེ་དག་སེལ་ཐབས་སུ་དགོངས་པ་ཆེ་བཞེས་གནང་དགོས་ཀྱི་འདུག་ཅེས་གསུངས་ཡོད།  སྐབས་དེར་བཀའ་བློན་མཆོག་ནས་དཀའ་ངལ་དེ་དག་སེལ་ཐབས་སུ་ད་ལྟའི་ཆར་འཛིན་སྐྱོང་བཀའ་ཤག་གི་ངོས་ནས་འབྲེལ་ཡོད་རྒྱ་གར་གཞུང་དང་ལྷན་དུ་ལས་རིམ་ཞིག་གནང་མུས་ཡིན་ཞེས་ལན་འདེབས་གསལ་བཤད་གནང་སོང་།

དེ་དེ་བཞིན་སྤྱི་འཐུས་གཞན་ཁག་ཅིག་གིས་འདས་པའི་ལོ་དུས་ནང་ལ་བདེ་སྲུང་ལས་ཁུངས་གཙོས་པའི་རྒྱ་གར་དབུས་ས་སྤྱི་ནས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཕྱྭའི་སྲུང་ཆ་ཐོག་ཕྱག་ལས་འཐུས་ཚང་གནང་པར་བསྔགས་བརྗོད་ཞུས་སོང་བ་དང་། ཡང་ལ་ལས་འདས་པའི་ལོ་དུས་ནང་མགོན་པོ་༸གང་ཉིད་མཆོག་རྒྱ་གར་བྱང་ཕྱོགས་ལ་དྭགས་ནང་མཛད་འཕྲིན་མང་དྲག་སྟབས་ཕྱི་རྒྱལ་གྱི་མཛད་འཕྲིན་ཁག་ཅིག་ཕྱིར་འཐེན་གནང་དགོས་བྱུང་བ་དང་། ལྷག་པར་དུ་༸གོང་ས་མཆོག་སྔར་ལོ་རྒྱ་གར་བྱང་ཤར་ཁུལ་དུ་ཆིབས་བསྒྱུར་བཀའ་དྲིན་མཛད་སྐབས་གནམ་གཤིས་ལེགས་མིན་རྐྱེན་པས་གནམ་གྲུར་འཁྲུག་ཆ་ཐེབས་པའི་གནས་སྟངས་བྱུང་སྐོར་ལུང་འདྲེན་གྱིས་འབྲེལ་ཡོད་ལྷན་ཁང་གི་ངོས་ནས་༸གོང་ས་མཆོག་གི་ཆིབས་བསྒྱུར་ཉུང་དུ་གཏང་རྒྱུ་དང་། ཁྱད་པར་དུ་ཆིབས་སྒྱུར་སྐབས་སུ་ས་གནས་ཀྱི་གནམ་གཤིས་གནས་སྟངས་གང་ཡིན་ཐོག་སྔོན་ཚུད་ནས་ཞིབ་དཔྱད་གནང་གལ་ཡིན་པའི་འབོད་སྐུལ་ཤུགས་ཆེ་གནང་ཡོད་པ་རེད།

འབྲེལ་ཡོད་གསར་འགྱུར།