དབང་ཕྱུག་ཚེ་བརྟན་ལགས་ཀྱི་སྐུ་ཕུང་ནང་མིར་སྤྲད་མི་འདུག

Facebooktwittergoogle_plusmail

བོད་ཁམས་དཀར་མཛེས་ཉག་རོང་ནས་ཡིན་པའི་རྒྱལ་གཅེས་པ་དབང་ཕྱུག་ཚེ་བརྟན་ལགས་ཀྱིས་རང་ལུས་མེར་སྲེག་གནང་ནས་འདས་གྲོངས་སུ་གྱུར་ཟིན་ཡོད་ཀྱང་། རྒྱ་གཞུང་གི་ཉེན་རྟོག་པས་ཁོང་གི་སྐུ་ཕུང་ད་དུང་ཡང་ནང་མིར་རྩིས་སྤྲོད་བྱས་མི་འདུག
རྒྱལ་གཅེས་པ་དེ་ཉིད་ཀྱིས་ཟླ་ ༤ ཚེས་ ༡༥ ཉིན་དཀར་མཛེས་རྫོང་ཐོག་ཏུ་རྒྱ་གཞུང་ལ་ངོ་རྒོལ་གྱིས་རང་ལུས་མེར་སྲེག་གནང་པ་ནས་བཟུང་དཀར་མཛེས་རྫོང་དང་ཉག་རོང་ས་གནས་སུ་སྔར་ལྷག་དམ་བསྒྲགས་བྱེད་བཞིན་ཡོད་སྟབས་ཐེངས་འདིའི་རང་ལུས་མེར་སྲེག་སྐོར་གྱི་གནས་ཚུལ་དང་བརྒྱུད་རིམ་ཞིབ་ཚགས་ཞིག་ཡོང་ཐུབ་མེད་པ་རེད།
དེ་རིང་འབྲེལ་ཡོད་ཁ་ཤས་ནས་གསར་དུ་གནས་ཚུལ་ཤེས་རྟོགས་བྱུང་བའི་ཁོངས། རྒྱལ་གཅེས་པ་དབང་ཕྱུག་ཚེ་བརྟན་ལགས་རྒྱ་གཞུང་གི་ཉེན་རྟོག་པའི་ལག་ཏུ་དགོངས་པ་རྫོགས་ཡོད་ཀྱང་ཁོང་གི་སྐུ་ཕུང་ད་བར་ནང་མིར་རྩིས་སྤྲོད་བྱེད་མེད་པ་མ་ཟད། ཁ་སང་དེ་རིང་ཁོང་གི་ནང་མི་ལ་ཧ་ཅང་དམ་དྲག་བྱེད་ནས་དཀའ་ངལ་བཟོ་བཞིན་འདུག

ད་དུང་ཤེས་རྟོགས་བྱུང་བར་དཀར་མཛེས་རྫོང་ཉེན་རྟོག་པས་དབང་ཕྱུག་ཚེ་བརྟན་ལགས་ཀྱི་རང་སྲེག་དང་འབྲེལ་ཡོད་འཛིན་བཟུང་བྱས་པ་ཉག་རོང་བ་དཀོན་མཆོག་རྒྱལ་མཚན་ལགས་དང་ཉི་མ་ལགས་གློད་བཀྲོལ་བཏང་ཡོད་ཀྱང་། ཁོང་གཉིས་གནས་སྐབས་ཕ་ཡུལ་ཉག་རོང་ལ་འགྲོ་མི་ཆོག་པ་བཟོ་ཡོད་འདུག
ཁ་སང་འདི་ག་རླུང་འཕྲིན་ཁང་གི་གསར་འགྱུར་ནང་སྐབས་དེ་དུས་ཉག་རོང་ནས་མི་གསུམ་འཛིན་བཟུང་བྱས་ཡོད་པའི་ཁོངས་མི་གསུམ་པའི་མིང་ལ་ཚེ་རིང་རྒྱ་མཚོ་ཡིན་པ་ཞུས་ཡོད། འོན་ཀྱང་དེ་རིང་གནས་ཚུལ་ཡོང་ཁུངས་ལ་ཞིབ་དཔྱད་བྱེད་སྐབས་ཁོང་གི་མིང་ལ་དཀོན་དབང་ངམ་དཀོན་མཆོག་ཚེ་རིང་ཟེར་གྱི་འདུག རྫོང་ཉེན་རྟོག་པས་ཁོང་འཛིན་བཟུང་བྱེད་ཕྱོགས་ཐད་ད་ལྟའི་ཆར་འགྲེལ་བཤད་གཉིས་ཡོང་གི་འདུག་སྟབས། གཅིག་གིས་གསུངས་པར་ཁོང་ནས་སྐུ་ལུས་མེར་སྲེག་གི་བརྙན་པར་ལེན་པའི་དབང་གིས་ཡིན་པ་དང་། གཞན་གྱིས་གསུངས་པར་ཁོང་གིས་རྒྱལ་གཅེས་པ་དབང་ཕྱུག་ཚེ་རིང་ལགས་ཀྱི་ལག་ཐོག་ཁ་པར་ཉར་བའི་རྐྱེན་གྱིས་ཡིན་པ་གསུངས་འདུག

ཀློག་གྲངས། ༡༦༧
Facebooktwittergoogle_plusmail