༸གོང་ས་མཆོག་ཧི་མཱ་ཅལ་ཨ་བྷི་ཨ་བྷི་གསར་ཁང་ལོ་གསུམ་འཁོར་བའི་མཛད་སྒོར་ཆིབས་བསྒྱུར་མཛད་པ།


vot.org
Facebooktwittergoogle_plusmail
༸གོང་ས་མཆོག་ཧི་མཱ་ཅལ་ཨ་བྷི་ཨ་བྷི་གསར་ཁང་ལོ་གསུམ་འཁོར་བའི་མཛད་སྒོར་ཆིབས་བསྒྱུར་མཛད་པ།

བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཁ་ཉིན་ཧི་མཱ་ཅལ་མངའ་སྡེའི་ཀང་ར་རྫོང་དུ་རྟེན་གཞི་བྱས་པའི་ཧི་མཱ་ཅལ་ཨ་བྷི་ཨ་བྷི་གསར་ཁང་ཆེད་འཛུགས་གནང་ནས་ལོ་གསུམ་འཁོར་བའི་དུས་དྲན་མཛད་སྒོར་ཆིབས་བསྒྱུར་གྱིས་བཀའ་སློབ་བསྩལ་འདུག

ཧི་མཱ་ཅལ་ཨ་བྷི་ཨ་བྷི་གསར་ཁང་ནས་ཇི་ལྟར་གསོལ་འདེབས་ཞུས་དོན་ལྟར་༸གོང་ས་༸སྐྱབས་མགོན་ཆེན་པོ་མཆོག་གིས་ཁ་ཉིན་སྔ་ཐོག་གསར་ཁང་དེ་གསར་འཛུགས་གནང་ནས་ལོ་ངོ་གསུམ་འཁོར་བའི་དུས་དྲན་མཛད་སྒོར་ཆིབས་བསྒྱུར་བཀྲིན་མཛད་སྐབས་གསར་ཁང་གི་འགན་འཛིན་སྐུ་ཞབས་ Balaji ལགས་ཀྱིས་ཕེབས་བསུ་དང་འབྲེལ། མགོན་པོ་༸གང་ཉིད་མཆོག་ལ་མངའ་སྡེའི་དབུ་ཞྭ་ཞིག་ཕྱག་རྟགས་སུ་ཕུལ་ཏེ་ཕེབས་བསུའི་སྣེ་ལེན་གཟབ་རྒྱས་ཞུས་ཡོད་པ་རེད།

སྐབས་དེར་༸གང་ཉིད་མཆོག་གིས་ཨ་བྷི་ཨ་བྷི་གསར་ཁང་གསར་བཞེངས་ལེགས་གྲུབ་བྱུང་བའི་སྒྲ་འཇུག་ཁང་གསར་པ་དབུ་འབྱེད་དང་གསར་ཁང་གི་དམིགས་བསལ་བཅར་འདྲི་ཞུ་ཡུལ་དུ་ཆིབས་བསྒྱུར་བསྐྱངས་ནས་བཅར་འདྲི་ཁག་ཅིག་ལ་བཀའ་ལན་བསྩལ་ཡོད་པ་རེད། མཛད་སྒོའི་ཐོག་ཧི་མཱ་ཅལ་མངའ་སྡེའི་གནད་ཡོད་མི་སྣ་ཁག་ཅིག་དང་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག སྤྱི་འཐུས་ཚོགས་གཞོན་ཨཱ་ཙཱརྱ་ཡེ་ཤེས་ཕུན་ཚོགས་མཆོག བཀའ་བློན་ཁྲི་ཟུར་མཁས་དབང་སློབ་དཔོན་ཟམ་གདོང་རིན་པོ་ཆེ་མཆོག་སོགས་ཕེབས་ཡོད་པ་རེད།

༸གོང་ས་༸སྐྱབས་མགོན་ཆེན་པོ་མཆོག་གིས་ཐོག་མར་ཐེངས་འདིའི་མཛད་སྒོ་གོ་སྒྲིག་ཞུ་མཁན་ཀུན་ལ་ཐུགས་རྗེ་ཆེ་ཞུ་དང་འབྲེལ་ཏེ་རྒྱ་གར་གྱི་གནའ་བོའི་རིག་གཞུང་ལས་འཚེ་མེད་ཞི་བ་དང་ཆོས་ལུགས་རིས་མེད་སོགས་ཀྱི་བཟང་པོའི་ཡོན་ཏན་གྱི་ཁྱད་ཆོས་ལྡན་ཡོད་པ་བཀའ་བསྩལ་གནང་ནས་མགོན་པོ་༸༸གང་ཉིད་མཆོག་ནི་རྒྱ་གར་གནའ་རབས་ཀྱི་སྲོལ་རྒྱུན་རིག་གནས་རྗེས་འབྲང་པ་ཞིག་དང་ལྷག་དོན་དཔལ་ནཱ་ལེཎྡཱ་ནས་དར་བའི་ལེགས་བཤད་དེ་དག་ཉམས་ལེན་གནང་མཁན་རྒྱ་གར་གྱི་སློབ་མ་ཞིག་ཀྱང་ཡིན་སྐོར་བཀའ་བསྩལ་འདུག

དེ་བཞིན་མགོན་པོ་མཆོག་གིས་ང་ཚོ་ཚང་མ་ཐོག་མར་ཨ་མའི་བྱམས་སྐྱོང་དང་བརྩེ་སེམས་འོག་ནས་འཚར་ལོངས་བྱུང་བ་ཞིག་ཡིན་པ་མ་ཟད། དེང་སྐབས་རྒྱལ་སྤྱིའི་ཚན་རིག་མཁས་དབང་མང་པོས་འགྲོ་བ་མིའི་གཞི་རྩའི་རང་བཞིན་ནི་བྱམས་སྙིང་རྗེ་ལྡན་པ་ཞིག་ཡིན་པར་ར་འཕྲོད་ཐོག་དེ་ལྟར་ངོས་ལེན་གནང་མུས་ཡིན་སྟབས། ང་ཚོས་དུས་རབས་ ༢༡ པ་འདི་ཞི་བདེ་ལྡན་པའི་དུས་རབས་ཤིག་བསྐྲུན་རྒྱུར་འབད་བརྩོན་གནང་གལ་ཡིན་པར་བཀའ་བསྩལ་བ་མ་ཟད། ལྷག་དོན་ཡུ་རོབ་མཐུན་ཚོགས་ལ་མཚོན་ན་སྒྲིག་འཛུགས་དེའི་རྐྱེན་པས་ཡུ་རོབ་རྒྱལ་ཁབ་ནང་ཕན་ཚུན་དམག་འཁྲུག་མཚམས་འཇོག་བྱུང་ཡོད་པ་ལུང་འདྲེན་གནང་སྟེ་༸གང་ཉིད་མཆོག་ནས་ཡུ་རོབ་མཐུན་ཚོགས་ཀྱི་སྒྲོམ་གཞིར་ཡིད་སྨོན་མཛད་ཀྱི་ཡོད་ཅེས་བཀའ་བསྩལ་ཡོད།

༸གོང་ས་མཆོག་གིས་ཁོར་ཡུག་གི་དཀའ་ངལ་དེ་ནི་འཛམ་གླིང་མི་འབོར་ཐེར་འབུམ་བདུན་པོ་ཚང་མའི་མ་འོངས་པ་དང་འབྲེལ་བ་ཡོད་སྟབས། ཁོར་ཡུག་སྲུང་སྐྱོབ་ཐད་ལ་དམིགས་བསལ་འགན་འཁུར་དགོས་པ་དང་ལྷག་དོན་རྒྱ་གར་གྱི་མི་རབས་གཞོན་པ་ཚོའི་ངོས་ནས་རྒྱ་གར་གྱི་ལོ་ངོ་སྟོང་ཕྲག་ལྷག་རིང་གི་ལོ་རྒྱུས་ལྡན་པའི་གནའ་བོའི་རིག་གཞུང་སླར་གསོ་གནང་རྒྱུར་ཐུགས་སྣང་ཆེ་ཙམ་བཞེས་དགོས་པར་ལམ་སྟོན་མཛད་ཡོད།

འབྲེལ་ཡོད་གསར་འགྱུར།