༸གོང་ས་མཆོག་གིས་རྒྱ་གར་གྱི་གནའ་བོའི་རིག་གཞུང་དེའི་ཐོག་ནས་སངས་རྒྱས་ཤཱཀྱ་ཐུབ་པ་དང་གྷན་དྷི་ཇེ་མང་ཐོན་ཐུབ་པ་བྱེད་ཞེས་ལམ་སྟོན་མཛད་སོང་།


vot.org
Facebooktwittergoogle_plusmail
༸གོང་ས་མཆོག་གིས་རྒྱ་གར་གྱི་གནའ་བོའི་རིག་གཞུང་དེའི་ཐོག་ནས་སངས་རྒྱས་ཤཱཀྱ་ཐུབ་པ་དང་གྷན་དྷི་ཇེ་མང་ཐོན་ཐུབ་པ་བྱེད་ཞེས་ལམ་སྟོན་མཛད་སོང་།

༸གོང་ས་མཆོག་གིས་རྒྱ་གར་གྱི་གནའ་བོའི་རིག་གཞུང་དེའི་ཐོག་ནས་སངས་རྒྱས་ཤཱཀྱ་ཐུབ་པ་དང་གྷན་དྷི་ཇེ་མང་ཐོན་ཐུབ་པ་བྱེད་ཞེས་ལམ་སྟོན་མཛད་སོང་།
བོད་མིའི་བླ་ན་མེད་པའི་དབུ་ཁྲིད་༸གོང་ས་༸སྐྱབས་མགོན་ཆེན་པོ་མཆོག་གིས་དེ་རིང་སྔ་ཐོག་རྡ་རམ་ས་ལར་རྟེན་གཞི་བྱས་པའི་ཧི་མཱ་ཅལ་མངའ་སྡེའི་གཞུང་གི་དབུས་གཙུག་ལག་སློབ་གཉེར་ཁང་དུ་ཚོགས་པའི་འཛམ་གླིང་ཞི་བདེའི་ལྷན་ཚོགས་ཐོག་གྷན་དྷིའི་རྗེས་འབྲང་པ་བརྒྱ་སྐོར་ཙམ་ཞིག་ལ་རྒྱ་གར་གྱི་ལོ་ངོ་སྟོང་ཕྲག་ལྷག་རིང་གི་གནའ་བོའི་རིག་གཞུང་ཕྱུག་པོ་ཡོད་པར་ཆེ་བསྟོད་དང་སྦྲགས། དེང་གི་རྒྱ་གར་སྤྱི་ཚོགས་ནས་སངས་རྒྱས་ཤཱཀྱ་ཐུབ་པ་དང་བདག་ཉིད་ཆེན་པོ་གྷན་དྷི་ཇེ་མང་ཐོན་ཐུབ་པ་བྱེད་དགོས་ཞེས་བཀའ་བསྩལ་མཛད་སོང་།
ལྷན་ཚོགས་འདི་ནི་མངའ་སྡེའི་དབུས་གཙུག་ལག་སློབ་གཉེར་ཁང་དང་ལྡི་ལིར་རྟེན་གཞི་བྱས་པའི་ Gandhi Smriti དང་། Darshan Samiti ཟུང་འབྲེལ་གྱིས་གོ་སྒྲིག་གནང་པ་ཞིག་ཡིན་པ་རེད་འདུག་པ་དང་། ཚོགས་འདུའི་ཐོག་རྒྱ་གར་ལྷོ་ཕྱོགས་ Karnataka དང་ Maharashtra དེ་བཞིན་རྒྱལ་ས་ལྡི་ལི་སོགས་མངའ་སྡེ་ཁག་ཅིག་ནང་གི་གྷན་དྷིའི་རྗེས་འབྲང་པ་གཞོན་སྐྱེས་ ༨༠ ཐམ་པ་ཆེད་བཅར་ཞུས་འདུག
དེ་རིང་ཚོགས་འདུ་དབུ་འབྱེད་ཀྱི་ཚོགས་མགོན་དུ་༸གོང་ས་༸སྐྱབས་མགོན་ཆེན་པོ་མཆོག་དང་དམིགས་བསལ་སྐུ་མགྲོན་དུ་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག མངའ་སྡེའི་དབུས་གཙུག་ལག་སློབ་གཉེར་ཁང་གི་ཉེ་བའི་རིགས་བདག་སྐུ་ཞབས་ Kuldeep Chand ལགས་སོགས་གདན་ཞུས་ཕུལ་འདུག ཉིན་གསུམ་རིང་གི་ཞི་བདེའི་ལྷན་ཚོགས་ཀྱི་བརྗོད་གཞི་ In the path of Buddha and Gandhi འམ་སྟོན་པ་ཤཱཀྱ་ཐུབ་པ་དང་གྷན་དྷིའི་སྲོལ་གཏོད་པའི་ལམ་བུ་ཞེས་བཞག་ཡོད་པ་ལྟར་༸གོང་ས་མཆོག་གིས་སྐབས་དེར་རྒྱ་གར་གྱི་ས་གནས་གང་ས་ནས་ཕེབས་པའི་གྷན་དྷིའི་རྗེས་འབྲང་པ་གཙོ་གྱུར་འདི་གའི་ས་གནས་ཀྱི་མཐོ་རིམ་སློབ་མ་རྣམས་ལ་རྒྱ་གར་རང་ནས་བྱུང་བའི་འཚེ་མེད་ཞི་བའི་ལྟ་གྲུབ་དང་ཆོས་ལུགས་རིས་མེད་ཀྱི་ལྟ་གྲུབ། དཔལ་ནཱ་ལེནྡྲ་ནས་བརྒྱུད་པའི་ནང་པའི་སེམས་ཁམས་རིག་པ་དང་ཚད་མ་རིག་པའི་རྣམ་གཞག་སོགས་འཛམ་གླིང་རྒྱལ་ཁབ་སུ་གཅིག་ལ་མེད་པ་གནའ་བོའི་ཤེས་བྱ་དང་རིག་གཞུང་ཕྱུག་པོ་ཞིག་ཡོད་པ་དེའི་ཐོུང་མིན་པའི་ཁྱད་ཆོས་དང་། ལྷག་པར་དུ་དེང་གི་འཛམ་གླིང་འདིའི་ནང་རིག་གཞུང་དེ་དག་ཆེས་དགོས་ངེས་ཅན་ཞིག་དང་འབྲེལ་བ་ཆེན་པོ་ཞིག་ཆགས་ཡོད་པར་ལམ་སྟོན་རྒྱ་ཆེ་གནང་སོང་།
སྒོས་སུ་མགོན་པོ་མཆོག་གིས་ལྷན་ཚོགས་ཀྱི་བརྗོད་གཞི་དང་འབྲེལ་རྒྱ་གར་གྱི་མེས་པོ་དམ་པ་བདག་ཉིད་ཆེན་པོ་གྷན་དྷི་མཆོག་དང་སངས་རྒྱས་ཤཱཀྱ་ཐུབ་པ་ཞེས་གསུང་སྐབས་རྒྱ་གར་གྱི་གནའ་བོའི་རིག་གཞུང་ཐོག་བསམ་བློ་འཁོར་དགོས་པ་དང་། རིག་གཞུང་དེ་དག་ལ་བརྟེན་ནས་སྐྱེས་ཆེན་དམ་པ་དེ་དག་བྱུང་ཡོད་སྟབས། ང་ཚོས་སྔོན་བྱོན་སྐྱེས་ཆེན་དམ་པ་ཚོར་གསོལ་བ་སྨོན་ལམ་འདེབས་པ་ཙམ་མ་ཡིན་པར་གཙོ་བོ་ཁོང་རྣམ་པས་དགོངས་བཞེས་དང་ཉམས་བཞེས་གང་གནང་འདུག་པ་དེ་ཤེས་པར་བྱེད་ནས་ལག་བསྟར་ཐུབ་དགོས་གལ་ཡིན་པ་གསུངས་ཡོད།
ཁྱད་དུ་༸གོང་ས་མཆོག་གིས་ཚོགས་བཅར་བ་ཀུན་ལ་དྲན་སྐུལ་དུ་ལམ་སྟོན་གནང་པ་དང་འབྲེལ། ཅི་སྟེ་རྒྱ་གར་གྱི་གནའ་བོའི་རིག་གཞུང་ལ་དེ་དག་ལ་བརྟེན་ནས་གྷན་དྷི་དང་སངས་རྒྱས་སོགས་བསམ་བློ་བ་དང་ལྟ་གྲུབ་སྨྲ་བ་ཇེ་སྙེད་ཅིག་བྱུང་ཡོད་པ་བཞིན་དེ་རིང་སང་ཡང་རྒྱ་གར་གྱི་རིག་གཞུང་དེ་གནས་ཡོད་སྟབས་རྒྱ་གར་བའི་ཁྲོད་སངས་རྒྱས་ཤཱཀྱ་ཐུབ་པ་དང་བདག་ཉིད་ཆེན་པོ་གྷན་དྷི་ཇེ་མང་ཐོན་ཐུབ་པ་བྱེད་དགོས་པ་དང་། དེའང་དེང་དུས་ཀྱི་ཤེས་ཡོན་ཁོ་ན་མ་ཡིན་པར་རང་གི་གནའ་བོའི་རིག་གཞུང་ཟུང་དུ་འབྲེལ་ནས་ཡོང་དགོས་པར་བཀའ་ནན་གནང་སོང་།
དབུ་འབྱེད་མཛད་སྒོའི་དེའི་ཐོག་ནས་ཁྲི་ཟུར་སློབ་དཔོན་ཟམ་གདོང་རིན་པོ་ཆེ་མཆོག་གིས་༸གོང་ས་མཆོག་གི་༸སྐུའི་ཐུགས་བསྐྱེད་མཛད་འཁུར་གསུམ་དང་སྒོས་སུ་མགོན་པོ་༸གང་ཉིད་མཆོག་གིས་ཕྱི་ལོ་༡༩༦༧ ལོ་ནས་བཟུང་བོད་མིའི་རང་དབང་འཐབ་རྩོད་དེ་འཚེ་མེད་ཞི་བའི་ལམ་དུ་ལམ་སྟོན་བཀྲིན་བསྐྱངས་ཡོད་པ་སོགས་གསུང་བཤད་གནང་ཡོད་པ་རེད།
ལྷན་ཚོགས་གོ་སྒྲིག་གནང་མཁན་ལྡི་ལིའི་ Gandhi Smriti འི་གྷན་དྷིའི་རྗེས་འབྲང་པ་བགྲེས་པ་སྐུ་ཞབས་ Laxmi Dass ལགས་ཀྱིས་ལྷན་ཚོགས་འདིའི་ཐོག་༸གོང་ཏཱ་ལའི་བླ་མ་མཆོག་གདན་ཞུ་གསོལ་འདེབས་ཞུ་དགོས་དོན་ནི་དེང་གི་དུས་འདིར་འཛམ་གླིང་ཞི་བདེ་གོང་འཕེལ་ཆེད་༸གོང་ས་མཆོག་ལས་ལྷག་པ་གཞན་སུ་གང་ཡང་མེད་པ་དང་། ༸གང་ཉིད་མཆོག་ནི་ཞི་བདེའི་ཕོ་ཉ་དང་ཞི་བདེའི་ངོ་བོ་མཚོན་ཐུབ་ཀྱི་ཡོད་སྟབས། འཛམ་གླིང་མང་ཚོགས་ཀུན་ཁྱབ་ལ་ཞི་བདེ་གོང་འཕེལ་གྱི་སེམས་ཤུགས་དང་སེམས་བསྐུལ། དེ་བཞིན་ལམ་སྟོན་གནང་ཐུབ་མཁན་༸གོང་ས་མཆོག་གཅིག་པུ་ཡིན་པ་གཟིགས་ཀྱི་ཡོད་ཅེས་གསུངས་སོང་།
རྩ་བའི་ཉིན་གསུམ་རིང་གི་ལྷན་ཚོགས་འདིའི་ཁྲོད་རྒྱ་གར་མངའ་སྡེ་ཁག་ཅིག་ནས་ནས་ཕེབས་པའི་གྷན་དྷིའི་རྗེས་འབྲང་པ་བགྲེས་སོང་ཁག་ཅིག་དང་གྷན་དྷིའི་ལྟ་གྲུབ་ཐོག་ཞིབ་འཇུག་གནང་བཞིན་པའི་ཤེས་ཡོན་ཅན་ཁག་ཅིག་ནས་ཀྱང་གཏམ་བཤད་དང་ཚོགས་བཅར་བ་དང་ལྷན་དུ་དྲི་བ་དྲིས་ལན། དེ་བཞིན་གོ་བསྡུར་སྦྱང་བཤད་སོགས་གནང་གི་འདུག

འབྲེལ་ཡོད་གསར་འགྱུར།